Manipur Express | July 31, 2013

JULY 31, 2013 ISSUE

HEADLINES

Telangana region(bial) pumpi  ah mipi kipakin laamzak uh

UPA meeting in India a state 29na di’n Telangana lemsa

New Delhi, July-30: Congress makaihna  UPA govt atel party tuamtuam a makai ‘UPA Co-ordination Committee meeting tuni nitaklam om a, huai ah India khangthu a state 29na dingin Andhra Pradesh state akipan Telangana state bawlkhiak dingin lemsa uhi. Huaizawh a Congress Working Committee (CWC) tutkhawmna ah leng CWC member-te’ lakah ngaihdan
kikalh khenkhat  om mahleh state thak bawlkhiak ding  thupukna (resolution) la uh chih hi a, ahihziakin, huai tawh kisai a ngentel zaw ‘modalities’ bawl  hilai hen chi uhi. Centre govt a vaihawm UPA in Telangana state piak ding  lemsa chihthu zakphet in Telangana region ah political party khentuam omlou in party tuamtuam a worker-te leh mipi vantang himhim leng lampi dung ah lamzak ua,kipahluat ziakin mun tuamtuam ah  mipi in cracker leng halpuak zungzung uh chihthu kiza hi.

Tuni nitaklam dak 4.00 in Prime Minister Dr Manmohan Singh official residence 7-Race Course Road, New Delhi ah  UPA Co-ordination Committee meeting om a, huaizawh nitaklam dak  5:30 in Congress Working Committee (CWC) tutkhawmna in zui  hi. Tuni  zingkal baihtakin Congress President Mrs Sonia Gandhi makaihna in Prime Minister Manmohan Singh tenna in ah Telangana issue genkhawm masa uh a,  tua hunah Congress adia khuak nei mahmah a telkhiak mi tamlou  Sushil Kumar Shinde, Ghulam Nabi Azad, Digvijaya Singh leh Ahmed Patel tel uhi.

Andhra Pradesh Chief Minister Kiran Kumar Reddy in tuni’n  atuam in Prime Minister Dr Manmohan, AICC Chief Sonia Gandhi leh senior Congress leader dangte kimuhpih hi. Reddy in  CWC thutanna pom thei mahmah lou hi’n kigen a, huai kia hilou in, Andhra Pradesh kekzakin Congress adingin kiakniamna  tunzaw ding chi’n pang den a, Chief Minister ahihna apan kitawp ding tanpha in Congress High Command ah phu mahleh High Command in kitawplou dingin thupia chih ahi hi.

            Senior Congress leader Digvijaya Singh in tuni nitaklam in News saite kiang agendanin hibang thupukna lakpen thunuam ahi hetkei a, lungsim tengteng senga thupukna kibawl ahihman in kuapeuhin theihsiam mai ngai chi hi. Digvijaya ahihleh Congress High Command in Andhra Pradesh state omzia enkai dinga mawhpuakna a piak uh ahi hi. Andhra Pradesh kichi region 3 a khen hi a, huailak ah Telangana region leng khat hi a, Congress leader tamtakin Telangana state bawlkhiak deihlou in hiai region 3te  “Andhra Pradesh state" mah ah kigawmkhawm lai le uh khantouhna thupitak omzaw ding ahi chih ngaihdan nei tinten uhi. Region dang 2te ahihleh Coastal Andhra leh Rayalseema kichi hi a ,tu in Rayalseema te’n leng statehood lunggulh mahmah uh chih hi. Union Home Minister Sushil Kumar Shinde in tuni nitak in  agenna ah, tulel dinmun et in Andhra Pradesh ah dan leh thupiak dinmun a hoih mahmah a, patauhna ding a om kei phot chi hi.

Maj General Vindo Kumar in Lamka pha

Lamka, July-30: Major General Vindo Kumar, GOC, 41-Sub-area, Jorhat in tuni sunnung dak 2.00 velin HQ veng, Lamka West  a om Ex-servicemen Contribution Health Scheme (ECHS) Polyclinic mun pha in enkhia  hi.Huai  ECHS Polyclinic ahihleh January 15, 2013 a dinkhiak hi a, hileleng April 1, 2013 a function taktak pan hi’n kigen hi. Ex-servicemen ten a et kol uleh amau ading liauliau a kibawlkhia  hi a, Doctor 1, Nurse 1 leh Lab technician 1 om hi’n  gen uhi. Akigendan in huai ECHS Polyclinic ah ex-servicemente la a smart card neite ki etsak theih ding a, huailou in  Hospital a refer ahih ualeh, a om sung ua senna teng leng free hivek dingin gen uhi. Huailou in ECHS in govt hospital-te tawh kizopna, empanel  nei uh a, CCpur district ah Distirct Hospital tawh akizop ban uah Imphal ah Shija Hospital leh Babina Diagnostic Centre-te tawh leng kizom uh hi’n gen uhi.

Hospital staff tamtak duty kipat hun  in tunglou

Lamka, July-30: Maniram Sharma, IAS, Addl. DC leh S. Khaikhopau Ngaihte, SDC, BO/HQ  in tuni zinglam dak 10.30 in  District Hospital omdan enkhia in inspection bawl uh a, doctor leh  staff tamkhop in Hospital duty kipat hun dinga bikhiah(timing) zuilou uh  ahihdan mukhia uhi.  Inspection hunah OPD, Ortho OPD, ENT OPD leh Gynae OPD te leng enkhia uh a huchih hun ah doctor om nailou hi’n kigen hi. Huchih hun ah Medicine, Children leh Skin OPD  ah bel doctor om hi’n gen uh a, doctor omloute Medical Supdt, District Hospital in a kintheipen a show-cause notice pe dingin Addl DC in theisak  a, a copy  DC leh ADC kiang ape dingin leng theisak  hi. Addl DC in latrine  telin hospital ward tuamtuam leng  ensuak a, hun paisa tawh dinmun kibang toulai ahihman in poisa ahihdan gen a, tunung a hibang a thil omlai amuh leh inspection nawn chiang in Medical Supdt  tungah show cause notice suahkhum hiding chi hi. Addl DC in Hospital kichi damloute edtkolna mun ahih man in a sianthou leng poimawh hi’n gen a, Hospital a sianthouna lam a ginat kei leh akul leh poimawh bangin action lading hi’n leng gen hi.

Anganwadi Worker-te’n lungkimlouhna langsak

Lamka, July-30: CCpur District Anganwadi Workers/Helpers Association pawlin kha 14 hial honorarium a muhlouh uh lungkimlouh lahna in tuni zinglam dak 10:00 a rally pai in  DC tungtawn in govt ah memorandum pia uhi. Association lam apan kizadan in CCpur dist  block 10 a Anganwadi centre 1010 akipan Anganwadi worker leh Helper te’n kha 14 a  honorarium muhlouh pekhe ding a phutna in Peace Rally pai hi uh a, block tuamtuam apan member-te kim uh hi’n  gen uhi.

     Lamka Public ground kipan Rally pai uh a, Tipaimukh Road-Red Cross Road-Tedim Road tawn in DC office tan pai ua,  DC tungtawn in govt ading memorandum piak a sawm ua leh DC a omlouh ziakin Addl DC/CCpur khut ah pia uh a, Addl DC in thuneitu sangzaw huai memorandum piaksawn sak ding ahihdan gen hi.Huai memorandum ah  a taklatdan un tuma deuh in Social Welfare deptt in  kha 2 a honorarium ding Rs. 1 lakh released uh a, kha 14 a kimulou lakah  kha 2 kia ading  pomlou uh ahihdan uh taklang uhi. Govt in kha 14 a honorarium pekhe kin dinga nawh kawm in tuban regular taka  honorarium payment bawl ding in phu uh a, August 10, 2013 tan ngak ding uh hi’n taklang uhi. Huai hun tana govt in a limsak kei leh  kiphinna tuamtuam omtou zel ding hi’n leng theisak uhi. Veineilhing, President, Anganwadi Association in a gendan in govt in a thilphut uh a pichinsak masiah kiphinna paitou zel ding hi’n gen , July 31, 2013 akipam office-te khak ding uh ahihdan  gen in, thagum a ngaih leleng thagum suah ding a mansa a om uh hi’n gen hi. Honorarium muhlouhte muhna ding ahih phot leh hinna tapha pe dinga mansa a om uh h’n gen hi. 

LOCAL NEWS

Koite ah Shaktiman lengkhia

Lamka, July-30: Tuni sunnung dak 1.30 velin Lamka lam manawh Shaktiman (No. MN-02/5705) tuahsia in lamlian apan khia a, Koite a tuilou kidenna hi’n kigen hi. Gari neite’ gendanin gari dang tawh kipel deklai a steering abuai ziakin singkung khat phukha masa a, huai in sawtlou ohtang zek mahleh lamkhang ah lengkhia hi. Shaktiman ah driver telin mi 2 tuang uh a, a kitawm khiak man ziak un vangphat huaitakin liamlou uh hi’n kigen a, gari bel naksiat mahmah hi’n gen uhi.  Shaktiman a horn a hoihlouh ziakin Lamka a bawlsak sawm lai tuahsia uh hi’n kigen hi.

Fishery office ah training ding

Lamka, July-30: Tuibuong a District Fishery office ah July 31, 2013 in ni khat  sung ‘Short term training’ om ding a,huai ah  mi 40 tan telthei ding hi’n thutut kingah hi.District Fishery Officer/CCpur apan thusuak in a taklatdan in huai  training ah nga khoi(fish farmer) leh ngakul nei(fishery farm/pond owner)a lunglutte tel dingin theisak hi.

Footpath tungah mehzuak tawm deuhta

Lamka, July-30:  Khawpi sung lamlian nawl ah khe paina ding a footpath kibawlte ah tuma deuh in mehzuak pawlin meh ding koihna in zang uh a, huai in footpath tup-le-ngim hihsia in nawngkaina tun hi. Tuni tan in Hebron Veng leh mun khenkhat ah footpath tunga mehzuak tawm deuhta hi’n kigen uh a, himahleh mehzuak muh ding omlai veve hi.

Mi 2327 lakah 31 in Malaria vei

Lamka, July-30: Malaria deptt in khateng a report a bawl dungzui un July, 2013 sungin District Malaria office ah  mi 2327 sisan test uh a, huaite lakah 31 in malaria vei uhi.  Huaite  malaria positive 16 leh malaria PF 15  hi uh a, malaria ziakin July sungin mi 2 si uh a, official record ah bel mi 1 hi’n chiamteh  uhi.

Ebenezer Academy ah Evangelistic Week

Lamka, July-30: Ebenezer Academy ah tuni zinglam in ‘Let the Little Children Come to Me’ chih thupi zang in tuni apan ni 3 daih ding ‘Evangelistic Week’ kipan a, Pastor T.Vungkhansuan, Local Pastor, EBCC Hebron  in thumna in hong hi.  Huai Evangelistic Week ah Nursery - Class I(Category A), Class II –III(Category B), Class IV -VI (Category C) leh Class-VII-XI(Category D) tel  uh a, Pastor Dr.Thangminlun Mangte, Local Pastor, Bethel Baptist Church, Lailamveng;  V.Biaklal leh Niang Priscilla te’n sinsak uhi. 

SDO/Tipaimukh in theisak

Lamka, July-30: SDO/Tipaimukh apan thusuak in a gendan in Supervisor leh Enumerator khenkhat in tutan Bank account No. submit nailou uh a, huaite’n  Bank account No., IFSC code No.MICR code, home address leh contact no. Kimtak SDO/Tipaimukh khut a submit ding in theisak hi.

Comedy Film ‘Kaihlam Helooo’

Lamka, July-30: Kaihlam Film company in abawl, ‘KAIHLAM HELOOO’(Comedy & the Paite Legendary love story of SALMATPA) kichi  Aug 3, 2013 zinglam dak 10.00 in Rayburn Auditorium Hall,New Lamka ah Chairman, ADC khuallian apang in hongkhe ding hi. Comedy film bel  Bukpi pau zanga kibawl ahihban ah Kaihlam leh singtanglam mun tuamtuam a shooting kibawl hi’n gen  uhi.  Film honkhiakna ah Actor-te apan lam lahna a om ding banah Award leh memento piakna  telin Bukpi pau kidemna leng sai ding uh a, Prize  Rs. 1000 hiding hi. Huailou in Thangginsang, Sankim, Nemngaihlian, Chingngaihmawi leh  Senty Mawi te’n avangkim in lasa ding uhi. 

Breed Survey training ding

Lamka, Juy-30: Vety office, Tuibuong ah Aug 1, 2013  in Breed Survey tawh kisai training programme om ding a, huai ah   khaw tuamtuam 10 a breed survey bawl ding dan sinsakna nei ding uhi.   

BSF te’n thaukap sunzom ding

Lamka, July-30: STC BSF CCpur a training te’n  July  16, 2013 akipan June 31, 2013 tan  zingsang  dak 5.00 apan  nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar  a kap(firing )  uh  Aug 1,2013 akipan Aug 15,2013 tan sutzop lai dingin ahun behlap uhi. Huai  hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia  kuama’n khahzanlou ding in  DIG, STC/BSF in thupuan bawl  hi.

Ganvulhte dikna enzui ding

Lamka, July-30:  Vety deptt  in govt order dungzui in ganvulh  tunga thangtatna leh gelgotna  omte enzui dingin ‘Society for Prevention of Cruelty to Animals’ phuhkhiak sawm uh a, lunglutna nei kum 18 tunglam, kuapueh in July 31, 2013 apan Vety office, Tuibuang ah applicatoin form  laktheih ding hi. Society  phuhkhiak hun ah  member ten annual fee dan in bank draft tungtawn in Rs. 250 piak zel ngai ding a, lunglutna nei a appication form laten August 21, 2013 tan Vety office, Tuibuang ah submit theih ding hi.

SUUNNA

Suankhoman (87) m/o Ngamkhenthang of Kamdou Veng tuni sunnung dak 1.45 in teknat in si a, July 31, 2013  in Kamdou Veng hanmual ah kivui ding hi.

&&&&&&&&&&&&&&&&&&&&&&&&&&&&&&&&&&&&&&

IMPHAL NEWS

Ambassador in Governor leh CM mu

Imphal, July-30: Myanmar a  India Ambassador  Gautam Mukhopadhaya in tuni nitaklam in Manipur  Governor Dr. Ashwinikumar leh Home Minister Gaikhangam mu a, huaima in  Chief Minister O. Ibobi, Chief Secretary DS Poonia leh Principal Secy(Commerce & Industries) O. Nabakishore telin high ranking official tuamtuam abanban in mu a,huai ah  Border Trade, Integrated Check Post, Border dispute leh border fencing tungtang genkhawm uhi.Ambassador in a genna ah Manipur in health sector leh education lam ah Myanmar panpih lehang Myanmar akipan hamphatna ngahtheih ding tampi om hi’n gen hi. Ambassador in CM tawh a kimuhna hun ah Imphal-Mandalay kala Bus service ding tungtang leng genkhawm uhi. 

Truck 700 in Imphal hong zuan

Imphal, July-30: Silchar akipan Jiribam hongzuan Truck 700 velin Manipur zuan uh a, amau thautui, life-saving drugs, oxygen cylinders leh niteng vanzat poimawh tuamtuam pua hi’n kigen hi. Huai truck-te’n   Jiribam khengin  Imphal zuanlel uhi.  Imphal  ah thautui haksat ziakin petrol man naktak in khang a, tuni tan in petrol litre 1 man Rs 150 tung a, diesel leng Rs 90 tung mahleh mipite’n khawk salou in black a kizuakna munte ah kivual dim uh hi’n kigen hi. 

US Consulate team in mun tuamtuam pha

Imphal, July-30:Kolkata a om US Consular teamte ni 3 sung Imphal a om ding in zan in  hongzin uh a, tuni zinglam dak 10.30 in Mega Manipur School pha in huai ah student-te lak ah US gam phak theihna dia Viva ngah theihna ding procedure poimawhte genpih uhi. Huaizawh sunnung dak 2.00 in JNIMS a student-te lakah US visa ngah theihna ding lampi kawkmuh uhi. July 31, 2013 zinglam dak 9.00 in Classic Hotel a Board Room ah Manipur a Travel Agent tuamtuamte kimuhpih ding uh a, huaizawh in Kolkata ah kiknawn ding uhi.

Oil Tanker hunkhop kuankhe ding

Imphal, July-30:Imphal-Dimapur lamlian(NH No. 2) a Kohima kianga menchim omna pelhna ding Mao leh Kohima kikal by-pass tawn ding thautui paw ding Oil Tanker 100 vel July 31, 2013 in Security escort tawh kithuah in kuankhe ding uhi. CAF & PD Minister M. Okendro makaihna in tuni sunnung in a office chamber ah meeting om a, huai ah L. Dikho,MLA(Mao A/C); Dr Alexander Pao,MLA(Karong A/C); Commissioner( CAF & PD ) Y. Thamkishore;  Additional Secretary M. Yaiskul Meitei;  IOC a State Level Co-ordinator, KI Singh leh Depot Manager SI Singh tel uhi.

   Huai a thupukna dungzui in CRPF escort tawh kithuah Oil Tanker 100 val July 31, 2013 in Imphal apan kuankhe ding uhi. Huai hun ah IOC official-te gendan in zan in Imphal-Jiribam lamlian tawn Oil tanker 52 vel Imphal hongtung uh a, Oil tanker 82 velin thautui load khin in Imphal paisuak ding ngakin tu’n Jiribam ah om lel uhi.

.

Imphal ah Arnold birthday zang uh .
Imphal, July-30: Hollywood star-te laka minthang mahmah Arnold Schwarzenegger’ birthday tuni’n Imphal a Lamyanba shanglen, Palace gate ah  zang uhi.Huai hun ah taksa bawlhoihna ding a patkhiak Animal Gym phuhkhiak nung kum 11 chinna tawh zatkhawm hi a, huai ah Ksh Upendra Singh,Nepram Kishan Singh,Helendro Maibam, N Suranjan Singh, Dr Kh Shantikumar leh Dr Bhabananda T banah ‘Mister world’ title ngahthak Ng Shantikumar te’n uap uhi.

Student-te’n toilet zatlouhte hihsia

Imphal, July-30: DM College of Science students’ union pawlin DESAM tawh pangkhawm in College sunga toilet kizang nawnlou leh zat taklouhte hihsia uhi. Arambam Thoithoi in a genna ah Higher Education (college) level a vanzat khenkhat kingakna taklou ahih ziakin   govt. ah bawlhoih dinga ngetna bawl ahihlai in thuchiam om mahleh sepsuah omlou hi’n gen a, huaithu ziakin hibanga gamtang uh hizaw in gen  hi.  

Works allocation & transfer/posting

1.Smt Ch. Chitra Devi,MCS,Secretary/State Election Commission,Manipur & i/c   

   Director(Social Welfare) as Secretary/State Election Commission,Manipur.

2.L. Ibobi Singh,MCS, Chief Exe Officer, Zilla Parishad & i/c Project Director/DRDA,

   Bishnupur and ADC Bishnupur as i/c Director(Social Welfare).

3.Kh. Lalmani Singh,MCS, SDO/Bishnupur & AC to DC/ Bishnupur in addition as

   SDO/Bishnupur & i/c Chief Exe Officer,Zilla Parishad & i/c Project Director,DRDA,

   Bishnupur  in addition.

NATIONAL NEWS

Nagate’n rally thupitak neihsawm

Dimapur, July- 30: NSCN (IM) leh government of India in Indo-Naga peace talks apat nung uh zingchiang (July 31, 2013) in kum 16 chingta dinga, hiai tawh kisai in kilemna piching om na di’n tunung sawtlou in Naga inhabited area teng ah rally thupitak neihsawm uh chih thu kiza hi. Hiai rally ahihleh Naga Hoho makaiha sai hidingin kigen a, hiai hun ah Naga milip telkim sak sawm ahi chi uhi. Naga Hoho General Secretary Chuba Ozukum in agendanin, a hun leh ni ding tawh kisai Naga Hoho leh Eastern Naga Peoples Organisation (ENPO) in final bawlpahta ding ahi chi a, lampi zuihna neih ahih ding banah Naga area a biakinn teng in leng Naga peace talks agahsuahna dingin a biakinn chiat uah Ni khat thumna nei ding uh chi hi.

ENPO in statehood mah chi tinten

Dimapur, July-30: Nagaland cabinet in July 27, 2013 in ENPO te’n district 4 uap a statehood a ngetna utawh kisai genkhawmna nei in Autonomous Council thuneihna sangtak piakdingin lemsa ua, huai council in Tuensang, Mon, Longleng leh Kiphire district-te uap ding chi uhi. Himahleh, Eastern Nagaland People’s Organisation (ENPO) thusuak in agenna ah, May 25, 2007 in Tuensang headquarter ah thupukna lak a om sa pen nelhsiah theih hilou ding a, full-fledged state (Frontier Nagaland) apian ma kiphinna uang semsem ding chi uhi. ENPO vice president Yonglong Konyak leh general secretary Toshing Wangtung te’n ataklatna uah, state government in autonomous council a genkhak himhim leng kipahhuai ahi chi ua, statehood ngetna tawh kisai a step masa ahi chi kawm in, statehood ngetna nasasem a paipih hiding chi uhi.

FOREIGN NEWS

Pakistan ah President thak

Islamabad, July-30: India a piang Mamnoon Hussain  tuni in Pakistan President 12na dingin telchingin om a, aman President  Asif Ali Zardari khengkhe ding hi. Tulel a President Zardari hun(term) Sept 2013 in bei ding hi.Pakistan a President election ah mi 2 lel kituh (straight fight) uh a, Hussain leh Pakistan’ Supreme Court a Judge lui Wajihuddin Ahmad of Pakistan Tehreek-i-Insaf party hi uhi. Tuni zing dak 10.00 in security khauhtak nuaiah election kipan a, nitaklam dak 4.00 tan om hi.

President dia telching a om Hussain bel  India gam Uttar Pradesh state sunga  om Agra ah piang a, Urdu-speaking ethnic group hizaw mah a,kum  1947 a India leh Pakistan a kikhen kum in Pakistan gamah pemlut uhi. Amah ruling PML-N govt adia mi poimawh mahmah ahihbanah PML-N party candidate leng ahi hi. Election ah national parliament leh provincial assemblies 4 apan member 1,000 valte’n vote khia uh a, vote simna leng buaina omlouin zawhfel ahi chi uhi.

Taliban te’n jail tang 250 hunkhia

Islamabad, July-30: Pakistan Taliban pawlin northwest region Khyber Pakhtunkhwa province sung Dera Ismail Khan’ central prison buluh uh a, saltang a om Taliban helpawl 250 hunkhia uhi. Huai tawh kisai thusuakin ataklatdanin  galvan hoihtak tawh kithuam Taliban helpawlin high-security prison khat buluh uh a, midang 14 that uh chi hi. Senior Police official gendanin nitak sawtnung, zankim velin bomb leh galvan hoihtaktak tawh helpawlte’ huai jail sung lut uh a, police 6 a thah ban uah, Shia Muslim saltang 6 tawh security guard 2 that uh a, helpawlte ahihleh mi 100 vel dinga gintak hi’n gen hi. Jail sungah mi 5,000 vel om uh a, amaute lakah helpawl 250 hi uhi.

Saudi  princess in mihing zuak

California, July-30: Saudi Princess Meshael Alayban in California ah human trafficking tawh kisai in thutanna maituah a, kum masa a Kenyan numei khat a etkol tungtang hi’n kigen hi.Thusuakin ataklatdanin July 9, 2013 in Alayban matkhiak hi a, a innsung ah thagum a Kenya numei pen nasem dinga zang hi’n ngohna tuak a, himahleh court a huaithu genkhawmna om ding chih hunah va kilanglou hi. 

Ireland ah abortion law zat hita

Dublin,   Irish President Michael D. Higgins in Abortion Bill kibawl pen gamsunga a zat dingin Law di’n suaikai a, tuni akipan zat hita hi. Abortion law  dungzui  numeite’n nau sukkiak ah phalna ngah ding uh a, himahleh numei hinkhua adia minsiatna ahihkeileh haksatna tun thei dingte chauh ah nau sukkiak phalsak hi’n kigen hi.