Manipur Express | December 22, 2016

Consumers’ Club in hun beisa haltum

Lamka, Dec-21: CCpur Consumers’ Club (CCC) in tuni sunnung in New bazar a Bus parking ah khawpi sung mun tuamtuam dawr bawlte’n azuak uh van hunbeisa amatsak uh press/media-te mai ah haltum uhi. 

Huai hun ah SN John, President in  economic blockade ziakin tutan deihbang in khawpi sung ah van puaklut hilou a,  dawr bawl khenkhat in van hun beisa aneihte pholhkhia in, mipi lei din zuak uh a, huaithu report zak ahih dungzui in Dec. 17, 2016 akipan khawpi drive bawlin dawr tuamtuam check uh a, huaihun ah amatkhiakte uh tuni a haltum uh hi’n gen hi. Maban ah leng drive sunzom ding uh a, kuapeuh in van lei chiang in pilvanga hun bei leh beilouh en-masa dingin leng district mipi ngen hi. Tuni a haltum a om van tuamtuamte ahihleh atangpi in theitui leh nektheih telin chi 50 vel hi a, sum ah tuat in Rs. 50,000/- vel man dingin leng kigen hi.

Manipur Express | December 21, 2016

ADC/CCpur chairman makaih meeting om

Lamka, Dec-20: Langkhanpau Guite, Chairman ADC/CCpur makaih in tuni’n Tuibuong a ADC office ah ama chamber ah executive member-te meeting neihpih hi. Hua hun ah  ADC sunga department tuamtuam omte nasepdan velkhawmna leh hatzaw sem a panlak dingdan kikumkhawm uh a, khawpi sunga saman tela van tuamtuam man akhan tawh kisai in e-blockade leh sum haksat suanlam a kuaman vanman khangsaklou din ngen uh a, huai tawh kisai enkai dingin Executive Office (town) mawhpuakna apiak banuah  vanman pungsak teitei a om a leh e-blockade zawh chianga et-thak hidingin thupuk uhi. 

Thautui tawh kisai a Kumpuan Bawhzui Pawl Sub-Committee, Central YMA in Manipur a thautui puaklut louhdia thupuan abawl uh tawh kisai in YMA Manipur Group-te ban ah Central YMA makai-te phone tungtawn in thuzak uh a, District mipi sik-in ADC/CCpur in ngetna leh kipahthu email tungtawn in Central YMA kiang ah laikhak uh a, thautui tawh kisai a Central YMA in zingchiang in pawl khat-te houlimpih ding hi’n kigen hi. Huchikal ah, District khenzak leh economic blockade ziaka state dang apan innlam zuan lamkal a koltang-te pikhiak ahih theihna dingun govt. kiang ah nawhna bawlding uh hi’n leng gen uhi.

Go Grace Mission' Winter Retreat pailel, Lamka Worship Night om ding

Go Grace Mission (GGM) saina in Synod Hall, IB road ah tuni zinglam apan 'Winter Retreat 2016' zatna kipan a, Speaker in N Thangkhansiam pang hi. Tuni (Dec 20) in Session 1 leh 2 ah Return to your Cross leh Return To Your Worship pansan in thugenna om a, zingchiang December 21 in Session 3 ah Reutrn to you Pain leh  Session 4 ah Return to our Hope pansan in thugenna om nawn ding hi.   Winter Retreat ni tawpni, December 22 in St. Pauls Institute Campus ah 'LAMKA WORSHIP NIGHT' om ding a, Lamka apan Pathian lasiam tuamtuam te'n phatna la sa ding uhi. 

PhualvaTimes in Adminpu Muamuan pa galna nei

PhualvaTimes enkaitute lak a khat, Muamuan Tonsing pianna pia, Upa T. Zampu (53) s/o (late) Tunzachin, Khominthang, New Lamka in ahunloutak a hon mualliam san ziakin tuni in Lamka a om PhualvaTimes Team in sigalna kinei a, thuakpihna ding in puandum a siluang tuamna kinei hi.  

Manipur Express | December 20, 2016

HEADLINES:

Manipur phaizang leh singtang bial ah tuni’n gari 8 hal in om:

Imphal East district ah curfew paizom touzel, Imphal West district ah Night Curfew koih in om

Source: http://i.ndtvimg.com. (file photo)

Imphal, Dec-19: United Naga Council (UNC) in hunchiam omlou economic blockade a bawl uh lungkim louh ziak a phaizang bial a mipite’ kiphinna leng paizom touzel hi. Blockade supporter-te’n tuni’n NH-2 in a totkhak Imphal-Senapati lampi mun tuamtuam ah gari 4 hal uh a, zinglam in Counter-blockade bawlte’n Lamlai PS huamsung a Seijang area ah Bolero 1 leh Swift Car 1 hal nawn uhi. Tuni a blockade supporter-te’n Senapati district a gari a hal leh phaizang a counter blockade bawlte’n a gari hal teng uh Bus 1 tel in gari 8 pha a, State sung a zan leh tuni a gari kihal teng kigawm 30 pha hi’n kigen hi. 

State government in Sadar Hills district leh Jiribam district a bawlkhiak ding deihlouh ziakin UNC in apaisa Nov 1, 2016 apan in highway-te ah hunchiam omlou economic blockade bawl uhi. Huchihlai in State Cabinet in district thak 7 bawlkhia in district bawlkhiak thakte honna hun a vengbittu dia zat a om state security-te lak ah helte’n police 3 kaplum in 11 kapliam uhi. Huai phet in Phaizang bial mipi lungkimloute’n Counter blockade hatsak sem in state dinmun naktak in sousang hi.    

Manipur Express | December 19, 2016

Aug 29, 2016 apan Singtang bial ah Electric Shutdown om

Khengjang apan Thanlon kikal ah 132/KV Tower 242 bawlna pailel

Lamka, Dec-18: Thanlon khua a 132-KV Power Sub-Station a meivak laklutna di’n Manipur State Power Company Limited (MSPCL) pawlin Khengjang leh Thanlon kikalah 132 KV Transmission Line tower 242 bawlna di’n nasep pan uh a, zan nitak in Chongchin tan ah Tower bawlzawh a omta chihthu kiza hi. Thanlon ah tulelin 33KV zat hi a, meivak kiningching zaw omtheihna di’n August 29, 2016 apan 132-KV tower bawl hun in 33KV power supply teng lakkhiak(shutdown) phot hi a, mun tamtak ah 132-KV power line leh 33KV line ki-hettuah khak ziakin Shutdown a om hi a, nasep zawhsiang hunhun in singtang bial ah electric piakkhiak hinawn ding chi uhi. MSPCL pawlin 132KV zawhsiangma a 33KV pen a vak theihna ding inleng lampi ngaihtuah in gamlak ah ki-camp uh chihthu om hi. Singtanggam ah tulel in electric fee lak hinailou a, contractor te’n huai nasepna azawhsiang hun ua MSPCL kianga thuneihna apiakkhiak chiang un electric fee omta ding hi’n kigen hi.

Manipur Express | December 18, 2016

HEADLINES:

‘Demonetization’ in hun sawt la nawnlou ding’: Arun Jaitley

Pradhan Mantri Garib Kalyan Yojana (PMGKY) zat-theih ding in tuni’n kipan

New Delhi, Dec-17: Union Finance Minister Arun Jaitley in sum note thak bawlna ‘demonetization process’ paizom touzel in hun sawt lut nawnlou ding hi’n tuni’n gen a, huai tawh kisai in Reserve Bank of India (RBI) in theihtawp suah in panla touzel chi hi. New Delhi a tuni a ‘Annual General meeting of Federation of Indian Chambers of Commerce & Industry’ ah Jaitley in sum note sihsakna leh Goods & Services Tax (GST) bill tawh kisai in thupukna khauhtak lak a om ahi chi hi. Demonetization pe’n zawhsiang ahih chiangin India a di’n zangkhai deuhta ding ahi chi a, India a mizawng leh gentheite mah khualna ahih manin thil sautak en kawm a panlakna ah hun tomchik sung i buai uh kuapeuh in chil-lum tawh valh in dawhzou photni chi hi. Leitung pumpi ah economy tawh kisai in kitaitehna nasatak in pailel a, nidang lai in India pen economy thil ah a niampen lam in pang mahleh tuni chiangin ‘fastest growing economy’ lak ah telpha hi’n Jaitley in gen a, Goods & Services Tax (GST) leng April 1, 2017 apan zat hiding a lam-et ahihdan gen hi.   

Manipur Express | December 17, 2016

HEADLINES:

District thak 7 bawlkhiak a omte te lak ah 5 honkhiak hita:

Chief Minister Ibobi Singh in Helicopter a tuang in tuni’n Pherzawl leh Noney district hong 

Lamka,Dec-16: Pherzawl a Deputy Commissioner Complex ah tuni’n Pherzawl district honna om a, huai ah programme tuamtuam hunkhop leng om hi. Huai hun ah Dy. CM Gaikhangam, Revenue Minister I. Hemochandra, Hill Area Committee Chairman Dr. Chaltonlien Amo banah Manipur government a Civil leh Police Top official-te tel uhi. CM in huai nung zek in Noney district thak leng hong hi. Noney Part 3 a Longmai Ground ah Chief Minister O. Ibobi in security khauhtak vengbitna nuai ah Noney district hong a, huai tawh kisai Tamenglong a thupesawntu Agui Kamei in a gendan in Chief Minister, Dy. CM leh Minister tuamtuam-te Helicopter a tuang in sunnung dak 2:00 in Noney mun tung uhi. Tuni a district piching a kihong 2 telin Manipur Government in district thak 7 a puante lakah full-fledged revenue district ding in district 5 hon hita chihthu om hi. 

Public meeting and open discussion om

Lamka, 17 December 2016: Tunitak dak 5:30pm apat in VENUS saina in " Public Meeting and Open Discussion of Policies with Intending MLA Candidates 58/AC CCPur"  hun zat in om hi.

NXT Digital Cable News | December 16, 2016

Project Sunrise FHI360-Shalom saina in HL Daka Memorial Hall, HSA campus rengkai ah December 16 leh 17 2016 ninih sungdaih ding Training of TI-NGO on Hepatitis B & C and Overdose Management kichi tuni in kipan hi.  Hiai hun ah Shalom, LRRC leh PPO apan Peer Educator  te tel ua, sunma dak 10:30 in traning pan uhi. Training hun sung in Nengkhozam Advocacy officer, Shalom, Vungngaihkim Nurse, Shalom, Chinghauniang, Nurse, Shalom, Dr. V. Ralte, Esther PM Shalom, Baby Saithangpui, leh Paukhansang District Mentor, Project Sunrise te’n Hepatitis B leh C toh kisai ban ah khamtheih adiak a a kikap thoh te a overdose hun ua, a hutkhiak ding dan leh etkol ding dan toh kisai in sinsak ding uhi.  Two Days Training of TI NGO on Hepatitis B & C and Overdose Management in atup pipen ahihleh churachandpur district sung a kham theih kikap toh People With injecting Drug ten baihsam tak a Hepatitis B leh C screening muhtheih ding ban ah overdose hun a etkol ding chih hi a, training hun sung in Shalom, PPO leh LRRC apan Peer Educator (PE) te tel ding uhi.

Manipur Express | December 16, 2016

HEADLINES:

District thak 7 laka 3-te official a honkhiak hita:

CM Ibobi Singh in tuni’n Kangpokpi District leh Tengnoupal district hongkhia

Imphal, Dec-15: Sadar Hills district leh Jiribam district bawlkhiak ding deihlou a United Naga Council (UNC) in apaisa Nov.1, 2016 apan kiphinna nei in State sung a National Highway-te ah economic blockade a bawl banah Naga mite tenna bial teng ah rally neih in om mahleh Manipur cabinet in district 7 bawlkhe thak uhi. District bawlkhiak thak a omte lak ah zan a Jiribam district honkhiak ahihnung in tuni’n Kangpokpi district leh Tengnoupal district-te Chief Minister O. Ibobi Singh in official in hongkhia hi. 

Tengnoupal DHQ ah tuni a Chief Minister Ibobi Singh in district honna hun a thugenna ah district thak honkhiak ding ziak in state police commando khenkhat si mahle uh administration lemtangzaw ding tupna government in  a bawlkhiak ahihdan gen a, state police-te beih a om tawh kisai naktak in mawhpaih thu taklang masa hi. CM in a genna ah, police-te beih a kaplup in bangmah gahkhe saklou ding hi’n gen a, issue omte kihouna pansan a hihveng ding hizaw chi hi. District honkhiak zawh  in cultural programe tuamtuam in zui a, huaizawh in CM leh a team-te’n helicopter in Kangpokpi zuan uhi.

NXT Digital Cable News | December 15, 2016

Tuzing baihtak dak 12:30 vel in CYA Road, Gouchinkhup veng, New Lamka a om, Genesis Pharmacy neitu N Ginlalmuon S/O N Siaka in mei in kang a phelhmit vuallouh in kang tum hi. Thu kizadan in, inn a kat tung in a inn kiang te un thei masa ua, patau dak khen in mipi a thei masate'n ki delh huan ua himahleh a gate ki sungkalh ziakin panla pah theih lou in om uhi. Hun bangtan hiam nung in gate hongthei in hih theih dandan a pan la in inn kiim le kiang a te peh ding veng uhi. Meikang theihphet in fire brigade ten delh in mipi toh pangkhawm in mei phelh uhi.

Manipur Express | December 15, 2016

HEADLINES:

Tengnoupal leh Kangpokpi full-fledged Revenue district leng hon hiding

Chief Minister in Jiribam District thak tuni’n hong

Imphal, Dec-14: Manipur Chief Minister O. Ibobi in tuni’n helicopter zangin Jiribam district va pha a, huai bial teng district piching (full-fledged revenue district) hiding in honna vanei hi. Chief Minister in Chingdon Leikai a DC Office kilam thak leng Jiribam district mipi zat ding in pekhia hi. Chief Minister in a thugenna ah tuni a district piching thak hiding a kihong Jiribam district ah Government in vanzat poimawh (infrastructure) teng akin lam a koih ahih theihna ding a panla ding hi’n gen hi. Huailou in Borobekra sub-division ah Fire sub-station 1 leh Police Station 1 leng akintheilam ah honkhiat hiding chi’n gen hi. Thudang kiza danin Tengnoupal district leh Kangpokpi district leng Dec 15, 2016 in hon hiding chihthu om hi. 

NXT Digital Cable News | December 14, 2016

CCpur SP Rakesh Balwal IPS thupiak dungzui in CCpur Civil police leh Traffic police ten tulai in khopi sung a taituah gari pei nih leh passenger pua a tai Diesel Auto te avangkim in check zel uhi.  Hiai toh kiton in tuni in leng CCpur Civil police leh Traffic police ten hiangtam Lamka Tipaimuh Road a PTC GHQ Office lutna bul ah khopi sung a passenger pua a tai vial leh leh Diesel Auto te khamkhawl in Driver in gari hekthei na dia driving licence nei na hiam, gari lai pua kim hia chih te chek in, driving licence leh gari lai paw lou te TR 5 receipt cut in sum liau sak uhi.  Tuni in CCpur Civil police leh Traffic police in diesel auto chek abawlna uah gari lai leh driving licence paw lou auto 44 makia in, asum in Rs. Sang 4 leh 400 mukhia in District Transport office ah submit uhi. CCpur Civil police leh Traffic police in ahihleh maban ah khopi sung mun tuamtuam ah avang kim in check bawl zel ding uhi.

Manipur Express | December 14, 2016

HEADLINES:

PM in Session ni 3 omlaite Parliament ah zang ding: Venkaiah Naidu

Parliament Winter Session ni 4 a khawl nungin zingchiang(Dec 14) in sunzom ding

New Delhi, Dec-13: Parliament Winter session tutkhawmna ni 3 sung omlai dingte ah Prime Minister Narendra Modi in Parliament ah hun zang ding hi’n Union Minister M Venkaiah Naidu in tuni’n gen a, opposition pawlte’n innpi 2-te a ‘demonetization’ thu debate dia a phut uh debate akipat phet a PM leng debate neih hun a om ding a phut uh‘goal post kiphuhna mun suan uh’ hizaw in leng taklang hi.  

Venkaiah Naidu in a genna ah, PM  in niteng in Parliament ah hun zang tampen gige a, a pawtkhiak kal chih louhte ah Parliament a om hizaw in taklang hi.  Parliament a lut masapen leh a pai nanungpen leng hi a, a room sung ah session a bang thiltung om hiam chih hoihtak a enchian zel hizaw in taklang hi. Session hun ni 3 omlaite ah Prime Minister in Parliament a om taktak ding hiam chih dotna tawh kisai Venkaiah Naidu in a dawnna ah ‘om ding ahi’ chi hi.  Union Minister of Information & Broadcasting Venkaiah Naidu in Prime Minister tungtang a genna ziak ahihleh opposition pawl te’n ‘demonetization’ thu a debate neihna hun ah Prime Minister Modi leng tel ding  a phut ziak uh hi a, discussion neih a omte vote lakna in a zuih ding chih deih uhi. Parliament Winter session ahihleh November 16, 2016 akipan in kha 1 ching thei phial neih in omta mahleh ‘demonetization’ thu a kiselna a sousan gige ziak in masawnna taktak omlou a, ni 4 sung khawlsak a om nung December 14, 2016 a kipan nawn in December 16, 2016 in zou ding uhi.  

Manipur Express | December 13, 2016

HEADLINES:

Manipur a UNC blockade thil diklou ‘illegal’ ahi - Ministry of Home Affairs

New Delhi, December-12: United Naga Council (UNC) in Manipur a nek-le-tak thilte leh niteng vanzat poimawh tuamtuamte puaklut ding a khamna a Economic Blockade a puan ni 40 a chin tawh kiton in Ministry of Home Affairs (MHA) in tuni’n UNC kiang ah blockade lakhe ding in theisak a, issue khatpeuh democracy dan tawh kituak a kihouna tungtawn a sukveng theih vek ahi chi hi. Blockade ziak in Manipur ah buaina thupitak a tun tawh kiton in tuni’n Centre in ‘warning’ pia a, kuapeuh in gamsung dan omsa kalh a mahni khut a dan kitawi thil hithei hilou ding chih thupuan bawl hi. Manipur a blockade omlel pen ‘thil diklou (illegal) ahihdan a taklat banah ‘crime against humanity’hizaw hi’n Home Ministry thusuak in taklang hi. Home Ministry thusuak in Manipur a blockade om tungtang ah awlmawh huai ahihthu taklang kawm in Manipur mipite a dia nek-le-tak banah niteng poimawh tuamtuam a haksatna a tuahte uh Centre in theihpih leh thuakpih ahihdan leng gen kawm in UNC in blockade a bawl a kinthei pen a lakhe ding in theisak hi. 

NXT Digital Cable News | December 13, 2016

Agape mission cooperative credit society limited AMCOSS, a multi state cooperative society limited in tuni sunma dak 10:30 in Upa H Jelshyam Chapel GBC Campus, Dorcas Veng New lamka ah a 10-veina annual conference-cum-business session nei uhi. Hiai hun ah AMCOCS a share holder te tel ua, Rev. E Paukhanlian Divisional Superintendent, LAmka North Division in hun zatna makaih in, sihna tuak heutute zahna leh suunna hun pi hi.  Upa T Paukhasiam Chairman, BOD AMCOCS in hun patna leh vaidawmna thugen in, Pumkhogin Guite, Secretary & CEM AMCOCS in annual report pia a, paikhawm member ten annual report toh kisai houlimna nei uhi.  Chairman BOD leh auditor pina nuai ah audit note velna leh pomna nei ua, budget leh plan etkhawmna nei in, hiai hun ah paikhawm palai ten budget ding in Crore 9 leh lakh 17 pom kipna nei in, Rev. V Nenglian, BOD AMCOCS in thumna in hun khakna nei hi.  Agape mission cooperative credit society limited AMCOCS ahihleh EBC saptuam sung a mission worker mi 20 in 2003 in pan ua, aloh ching touhzel toh kiton in Hebron Veng tedim road new lamka ah office hong in churachandpur ading in nominal member hih theihna ding in pankhia ua, tulel in AMCOCS ah share holder mi 184 om in, Nominal member 4000 val om a, office ah staff 7 leh agent 10 in nasem uhi. Tuni a AMCOCS in a 10 veina conference cum business session aneih hun uah share holder mi 184 lak ah mi 90 tel uhi. 

Manipur Express | December 12, 2016

HEADLINES:

CM O. Ibobi in Highway a di’n sumtam sem sanction ding in ngen

Union Minister in Rs. 1,152 crore bei ding project 17 patna di’n hong

Imphal, Dec-11: Union Minister (Road, Transport, Highways & Shipping) Nitin Gadkari in Jiribam leh Imphal ah Rs. 1,152 crore bei a lampi leh lei kibawl ding project tuamtuam 17 tuni’n nasep patna ding in hong hi. Imphal a 1st Bn Manipur Rifle Parade Ground ah tuni zinglam dak 11:00 velin lamlian bawlna ding Project-te nasep patna ding a honna hun ah Union Minister Gadkari in a gendan in Centre government in Manipur ah special status pia a, huai dungzui in tuban kum 3 akipan kum 4 sung in Manipur a lampi leh lei bawlhoihna ding in Rs. 22 crore val package piak ding in thukim hi’n gen hi. 

Manipur Express | December 11, 2016

HEADLINES:

Parliament a hun piak ka hihlouh ziak a mipi lak a thugen ka hi, 

ni 50 sung in thil kikheng na mu ding uh: PM

Deesa, December-10: Prime Minister Narendra Modi in tuni’n Gujarat state a Banaskantha district huamsung  Deesa mun a ‘Farmers’ rally’ hun ah thugenna nei a, huai ah Parliament Winter Session a buaina om den tungtang ah opposition Congress pawlte naktak in mawhsa hi. Centre a BJP makaih NDA government in sum note 500 leh 1000 a sihsak nung khakhat a chin tawh kiton in, Parliament session a ‘demonetisation’ tungthu gen-le-sak bangmah neilou chihthu a mawhsakna tamveitak a om tawh kisai in innpi ah bangmah gen theih ding dinmun a hihlouh ziak a genlou hizaw hi’n taklang hi. Aman a genzelna ah, political thil a kibatlouhna omte koihkhia a, party tuamtuamte’n mipi lak a ‘digital banking’ theihsiamna a omna ding a awareness bawl theihna chiteng a bawl zaw ding in opposition pawlte chial hi.

Manipur Express | December 10, 2016

HEADLINES:

Manipur state sung a district om teng 16 pha 

Manipur Government in district thak 7 bawlkhia

Imphal, Dec-9: Manipur Cabinet thupukna dungzui in Government in district 9 om sa banah December 8, 2016 in district thak 7 bawlkhe thak a, huaite tuni’n Manipur Gazette ah suahkhiak in om hi. Huai tawh kiton in Manipur a district omsa Imphal East, Imphal West, Thoubal, Bishenpur, CCpur, Ukhrul, Senapati, Chandel, Tamenglong banah district thak Jiribam district, Kangpokpi district, Kakching district, Tengnoupal district, Kamjong district, Pherzawl district leh Noney district tawh kigawm in Manipur ah district 16 phatou a, district thak 7 a DC leh SP dingte leng Government in order suah hi. 

Manipur Express | December 9, 2016

HEADLINES:

Congress in Parliament Session hihbuaitu Govt hi’n ngawh:

Parliament session buai ziakin President lungkimlou

New Delhi, December-8: Parliament Winter Session pailel apaisa November 16, 2016 akipan tu a ni 17 na tan inleng ‘Monetisation’ thu in buai toulai a, ruling party in buaina vensakna dia proposal a bawl paisuaksak ding lunglut mahleh session a pai hoihna ding a Treasury bench in suggestion kichiantak pawlut theilou hizaw hi’n opposition Congress pawl in ngawh uhi.   

Lok Sabha ah Congress, Trinamool Congress leh Left pawlte tel in opposition pawl in innpi ah ‘demonetisation’ thu a discussion sutzop ding leh vote khiak ding tangkoupih nawn uh a, Treasury bench in lemsakpih lou uhi. Speaker Sumitra Mahajan in member khenkhat vauhilh kawm in member dangte’ thugen ding dal lou ding leh tunung a leng sunzom lou di’n theisak hi. Husa nasatak a omlai in General Budget for 2016-17 tawh kisai a Second Supplementary Demands for Grants leh General Budget for 2013-14 tawh kisai a Demands for Excess Grants puaklut a om in a 2 tuak in pass uhi. 

Manipur Express | December 8, 2016

HEADLINES:

Monetisation thu in Parliament Inpi 2-te khawlsak in om:

Govt in mipi theihsiam di’n campaign sunzom

New Delhi, Dec-7: Parliament Winter Session tuni in sutzop in om nawn a, tua hunsung in GST tawh kisai a Bill 3 tel in Bill thak 9 luikhiak in om a, genkhawm leh pom ding a bikhiah in om mahleh session hun ah ‘Monetisation’ thu ziak in Lok Sabha leh Rajya Sabha inpite ah buaina om touden in sutzop theihlouh in khawlsak (adjourned) in om hi.      

Rajya Sabha ah tuni a session kipat phet in demonetization thu a kikou husa nasatak kipanpah a, Finance Minister Arun Jaitley in opposition te’n Monetisation thu kia hilou a session buaisak dia husa bawl hi’n ngawh a, full debate neih ding thu a opposition pawlte thilphut leng government in pom ahihdan gen hi. Opposition makai Ghulam Nabi Azad in government thupuan ziak a mi 84 si ahihdan gen in black money bangzah hongkikta hiam chi’n dotna bawl hi. Samajwadi Party member Naresh Aggarwal in hungaih dia opposition pawlte  kiman himahleh Prime Minister leng a tel ngai ding chi’n gen hi. Deputy Chairman PJ Kurien in PM tel a discussion pat ding thu tangkoupih mahleh houlimna sutzop theih vual louh dinmun a  husa a om ziakin Deputy Chairman in sunhun tan inpi khawlsak hi.    

Manipur Express | December 7, 2016

HEADLINES:

India President, PM leh mi poimawh tamtakin suunthu puang

Tamil Nadu Chief Minister Jayalalithaa si: tuni’n kivui 

Chennai, Dec-6: Tamil Nadu Chief Minister J Jayalalithaa (68) in khawsik (fever) leh sung hoihlouh ziaka     chausia in September  22, 2016 akipan in Tamil Nadu khawpi Chennai a Apollo Hospital a  Critical Care Unit ah ni tamlou etkol nung in hoihlam a nawt ziakin Critical Care Unit akipan High Dependency Unit ah etkol in om hi. Aman hoihlam nawtzel hi’n kilang mahleh December 4, 2016 nitaklam in a lungphu buai (cardiac arrest) ziakin khaw phawklou in buaisia a, a omna Apollo Hospital ah zan  nitak dak 11.30 in si chi’n Apollo Hospital thusuak in gen hi. A sihnung sawtlou in Poes Garden a, a tenna inn tut hi a, huai akipan mipi in a sun theihna mun ding uh Rajaji Hall ah a luang kikoih hi. A hankuang (casket/ coffin) leng singgai (sandalwood) in kibawl a, tuni in Chennai khawpi a  Marina Beach kianga kivui MG Ramachandran han kiangah  kivui hi. India President, Prime Minister, Union Minister tuamtuam, party makai leh mi poimawh tamtak in Jayalalithaa suunthu puang uhi. 

Manipur Express | December 6, 2016

HEADLINES:

Venkaiah Naidu in Jayalalitha dinmun PM Modi zasak

Chennai a Apollo hospital ah Tamil Nadu Chief Minister Jayalalithaa sihsual in om

Chennai, Dec-5: Tamil Nadu Assembly election May 2016 a AIDMK ticket a telching a om Chief Minister Jayalalitha (68) dinmun thuchian diktak tunitak dak 11 tan inleng theih hilou hi. Pathianni paita nitaklam in lungtang natna (cardiac arrest) ziak in Chennai a Apollo Hospitals ah puaklut in om a, Hospital Executive Director Sangita Reddy in si thei dinmun a om in ICU ah life support system piak a om hidan in gen  hi. 

Hospital thuneitute’n nitak dak 6.08 vel a statement a suahkhiak pansan in, amah etkolna Hospital ah ruling AIADMK party MLA teng kisamkhawm in a thakhengtu dia O. Panneerselvam guan ding a lemsakna suaikaih sawm uhi. Chennai khawpi sung teng Jayalalitha damlouhna ziak a husa a nasat luat ziak in ruling party MLA te’n nitak sawt nung in a meeting ding uh postponed thak uhi. Tamil news channel tuamtuam in Jalayalalitha si hi’n puang uh a, Apollo hospital official thusuak in ahihleh damlai hi’n gen uhi.    

Manipur Express | December 5, 2016

HEADLINES:

India leh Bangladesh in Home Secretary level kihouna nei ding: 

Ni 2 sung kihouna ah ‘Terrorist douna’ agenda poimawh pen hiding

New Delhi, December-4: India leh Bangladesh in ni 2 sung daih di’n Home Secretary level kihouna December 5, 2016 apan in New Delhi ah nei nawn ding uh a, huai hun ah thuguk kipiaktuahna (intelligence sharing), gamgi kantan thilkham puaklutna (smuggling) banah a poimawh pen ding in gam 2 in terrorism douna a panlak khawm ding tungtang tel in thu tuamtuam genkhawm ding uhi.

Bangladesh leh India in New Delhi a zingchiang (Dec 5) a Home Secretary level kihouna a neihna ding uah Union Home Secretary Rajiv Mehrishi in India team-te makaih ding a, Bangladesh team ahihleh tulel a Bangladesh Home Secretary Mozammel Haque Khan in makaih ding hi. India leh Bangladesh in apaisa November, 2015 in Bangladesh a Dhaka khawpi ah Home Secretary level kihouna nanungpen nei uhi.

NE Idol-2016 ah Jenny in 1st Runners-up Hihna Ngah

Dimapur, Dec-10 (PhualvaTimes): Hun bangtan hiam paita akipan North East Idol -2016 kichi North East India a Lasa siam zonna/kidemnna paitou zel in tunitak in Dimapur ah Finale neih in om hi. Hiai final ah Lamka akipan Unaunu Jenny Zawnkhanhoih of Vengnuam Newlamka in 1st runners-up (2nd prize) hihna la in Cash prize ₹1Lakh leh trophy ngah hi.

Venus In Public Meeting and Open Discussion of Policies with Intending Candidates 58/AC Churachandpur Sai Ding

Vengnuam United Soccer (VENUS)  saina in  Public Meeting and Open Discussion of Policies with Intending Candidates 58/AC Churachandpur  17th December, 2016 dak 5:30pm in PT Sports Complex ah om ding.

Laibu Thak 'Paite Lapau Dictionary & Paunakte' Honkhiak Hiding

Shillong, Dec-7 (PhualvaTimes): Ahongtung ding December 18, 2016 in Shillong ah Phamsa Pu T. Gouzanang, B.A. B.Ed (Hindi) in kum 10 val vingveng ana buaipih, amah khut mahmah a agelh khiak, gelhlou bu (excercise book) tampi bei a khangthakte’n lapau kepbit ding awlmohna ziak a tha-le-zung leh hun tampi a seenna “Paite Lapau Dictionary & Paunakte” kichi amah damlai in sutkhiak (publish) man in omkei mah leh a tapa T. Paukhochin’ panlakna ziak in honkhiak in om ding hi.

JAC-AATB In MLAte Singtang Gam Siksaklou Ding

Lamka, Dec-6 (PhualvaTimes): The Joint Action Committee Against Anti-Tribal Bills (JACAATB) akipan thusuak kimu in agenna ah, Manipur a Singtanmi te gam susia thei ding Manipur Government in August 31, 2015 a 3 Bills:

Manipur Express | December 4, 2016

HEADLINES:

India in haksatna a tuahte ni 50 nungin zangkhai tading: PM Modi

Moradabad, Dec-3: Prime Minister Narendra Modi in sum note Rs. 500 leh Rs. 1000 sihsak nung a haksatna omte tunung ni 50 tan in kiam thei ding ahihdan tuni’n gen hi. Uttar Pradesh state sung Moradabad a ‘BJP Parivartan rally’ ah tuni’n PM Modi in Demonetization tungtang pulak in mipi haksatna leng theihpih ahihdan gen a, Nov 8 zankim apan haksatna kipante tunung ni 50 nung in zangkhai theita ding chi hi. 

Prime Minister Modi in huai huna  agenn ah, govt. panlakna pen gamsung a zawnna, siatgawpna, nekguk-takgukna leh black money hihbei tupna ziak hizaw chi a, Black money a lomlom a koihtu-te’n haksatna lianzaw tuak lai ding uh ahihdan leng gen hi. Aguktak a black money koihte, tuhun in mizawng leh gentheite’ innkong a kivual in, amaute bank account zatsak theih dingdan ngaihtuah uh a, huchihlai in sumhaute lakah leng ginomna tawh khawsa-te’n Bank leh ATM naih ngam uh chi hi. PM in a thugenna ah ‘demonetization’ ziak a gamsung mipite haksatna government in theichian a, tuhun a haksatak a kivolhpen tunung a kivolhna haksazaw tamtak hihbeina ding a panlakna hizaw hi’n gen hi.  

Manipur Express | December 3, 2016

SBI/CCpur ah sum Rs. 20 crore hongtung

Sum taksapna lian mahmah lai; dak 12 vel apan ‘Queue’ pawl omta

Express bureau:

SBI Ccpur Branch Currency Chest ading Rs. 20 crore tuni’n Imphal apan hongtung a, SBI in linked bank teng kianga ahawmkhiak banah ATM teng ah leng koih a, sunnung a ATM booth kihong in nitak tanpha in mi kivualdim  uhi. Sum hongtungte lakah Rs. 500 note bangzah hiam telzek mahleh a tamzaw Rs. 2000 note hi a, ATM-te re-calibrate/update nailouh ziakin Rs. 500 note thak koih theih hinailou hi’n kigen hi. SBI Ccpur branch tawh kizom SBI Pearsonmun, SBI Tuibuong, HDFC, Axis Bank, Canara Bank, ICICI, Central Bank, UCO leh Vijaya Bank in sum a ngah dungzui un zingchiang in hawmkhe ding uh chihthu kiza hi.

Centre solkal in Rs 500 note leh Rs 1000 note luite a sihsak (demonetise) ziakin gamsung pumpi ah genvuallouh haksatna tungin, Lamka ah leng azawng-ahau in huai haksatnate thuak kha uhi. Lamka khawpi asum taksapna liantak om ziakin bank apan sum lakkhiak sawm in mi khenkhat te’n zankim dak 12 vel apan bank naih in kivual(queue) maimah uhi. CCpur dist. ah SBI leh UBI telin bank branch tuamtuam 12 vel om a, bank in a huamkhak sung a omte’n sum apoimawh mahmah lai un, bank tawh kigamlasingtang khuate ah mipi haksatna uang diak hi’n gen uhi.

Manipur Express | December 2, 2016

Bus te’n service pan nawn ding

Lamka, Dec-1:Langkhanpau Guite, Chairman, ADC/CCpur makaih tuni’n ama office chamber ah CCpur- Imphal kal a passenger bus service-te kal a kitheih siamlouhna om tawh kisai in association a makaite meeting neihpih a, hun bangtan hiam a genkhawm nungun kilem thei uh a, Dec. 2 apan ngeina bangin service pannawn ding uh hi’n kigen hi. Huai hun ah CCpur Dist. Mini-Bus Transport Assn (CDMBTA) leh Joint Tedim Road Bus Owner Association, Manipur (Kiran Group) makaite banah Lal Hossan, Vice Chairman; Ngamhao Touthang, EM, P. Kamkholal, MDC Haopi Range leh Soiminlian Lengen, CEO/ADCC kihel  uhi. Pawl 2-te ahihleh Keisampat, Imphal a parking/platform kipia tawh kisai a kitheih siamlouhna aneih ziakun Nov. 14 apan in service khawlsan uhi. Pawl 2-te lungtunna bangin platform/parking (A, B, C) om nawnlou in platform-X ah Kiran Group-te ki-nga ding uh a, Platform-Y ah CDMBTA-te kinga ding uh a, area ding uh hoihtak a chiamteh din thukim uhi. Meeting zawh in CEO makaih in pawl 2-te apan palai-te Keishampat ah area chiamteh di’n kuan uhi.

CDMBTA nuai ah tulel in mini-bus service 14 leh JTRBOAM nuai ah direct bus leh winger telin service 45 om hi’n kigen hi.

Manipur Express | December 1, 2016

Rs. 2000 lakhe di’n mi tamkhop in dakkal 10val ngaksek uh

Manipur ah zingchiang in Rs. 500 leh Rs. 2000 note Rs. 270 Crore hongtung ding

Lamka, Nov-29: Prime Minister in ‘Demonetisation’ minvuah a Rs.500 leh Rs.1000 note asihsak nung in Lamka khawpi ah leng sum poimawh tamtakte buai uh a, Banking office hour kipat hun a sum la masa thei di’n nitak zankim dak 12:00 vel apan SBI Ccpur Branch ah meiphu tawi kawm in mi tamkhop om khinta uh chihthu kiza hi. SBI official-te apan thutut kingahdan in, Guwahati apan RBI te’n zingchiang (Dec 1)  in Manipur ah Rs.270 crore vel hon thon ding uh a, huaite lakah Rs.500 note Rs.10 crore vel telkha ding a, adangte Rs.2000 ngen ahihding banah Rs.100 note telkhalou ding hi. Imphal hongtunni zingchiang (Dec 2) in Ccpur district ading piakkhiak hiding a, Ccpur in a ngah ding zah theihchet hinaikei mahleh, tamkhop tangkha dia gintak ahihziakin mipite haksatna azia omdeuh ding hi’n kigen hi. 

Manipur Express | November 30, 2016

HEADLINES:

ADC/CCpur Chairman makaih in meeting 2 om

Lamka, Nov-29: Langkhanpau Guite, Chairman, ADC/CCpur makaih in ama’ office chamber ah tuni sunnung in meeting om a, Bus-te ziak leh Rs. 500 leh 1000 note sih ziak a mipi’ haksatna genkhawm uhi. Meeting 2-te ah Executive Member-te, Vice Chairman leh CEO tel uh a,  amasa in CCpur Dist. Mini-Bus Transport Assn.(CDMBTA) leh Joint Tedim Road Bus Owner Assn. Manipur (JTRBOAM) te’n  CCpur Dist. gari lutsaklou thu genkhawm uhi. Huai thu ah Assn. 2 te’n ahaksatna te uh gen uh a, Dec. 1, 2016 in Chairman ADC/CCpur office chamber ah genkhawm nawn ding in thupuk uhi.

Huai zawh in Rs. 500 leh Rs. 1000 note sihthu tawh kisai mipi haksatna genkhawm uh a, Bank tuamtuam a Manager-te, LATSEA-te, Marwari Society, Bengali Society, Nepali Society, Bihari Society, Pharmacy Assn. leh Hotel Assn. a makai-te tel uhi. SBI/CCpur Branch a Chief Manager in agenna ah RBI in sum a hawmkhiatna ah Manipur leh Mizoram pen Priority list ah a nuailam pek a om ziakin haksatna kituak hi’n gen a, Manipur a ding sum Rs. 500 crores vel hong tung lak ah CCpur Dist. in Rs. 50 crore lel akitan khak ziak in haksatna omlou theilou hi’n gen hi.

Engineering Zil Lunglut Te Di'n JEE - 2017 Apply Theih

Govt. of India nuai a IITs/NITs/IIITs te a Engineering zil lunglut te din Joint Entrance Exam (JEE)-2017 apply theih. Application pen online tungtawn chouh in 01/12/2016 - 02/01/2017 kikal in apply theih ding, tuading in candidate te'n Aadhaar card neih teitei ngai ding. Aadhaar card a personal detail leh educational certificates te a detail akibat teitei poimoh.

SSPP GHQ in Convention English Junior High School LUNGTHUL DAIJANG FAREWELL -cum- Prize Hawmkhiatna PROG UAP IN ONE DAY SIAMSIN ZODAWN LEGAL AWARENESS SAI

Nisim 30th November, 2016 zinglam dak 11 in Lungthul Daijang khua a CONVENTION ENGLISH JUNIOR HIGH SCHOOL-te Farewell-cum-Prize Hawmkhiatna 2016 program ah Functional President Pi Vungching, Chief of Lungthul D leh Guest of Honour hihna toh SSPPGHQ President Lianzapau Samte banah SSPPGHQ, Jt. Secy. Pu Pausuanlian,   VP leh Secy, Sports Dept, SSPP JOINT HQ- Liansiam Ngaihte leh Biakmuan leh Advocate M Vumlianmang ten va uap uhi.

NXT Digital Cable News | December 01, 2016

ESC nuai a Central Kristien Khanglai Pawl CKKP in kum non January 19 apan 22 sung Phaijang BHQ Tuilangkual Bial ah  Khanglaite krista a di’n  chih thupi zang a a 60 veina Synod Youth Conference aneih ding uh toh kiton in mun tuamtuam aom te  kithu zaktuahna nuam zaw ding gelna in tuni zingkal dak 7:30 in Lamsong Inn, Chiengkawnpang Bazar ah Khanglai -17  Information Centre honkhiakna nei uhi.  Khanglai -17 Information Centre ahihleh  Rev. Thangkhosiem, Executive director ESC  in hongkhia in pathian kiang ah latna nei a, Evan Paukhomang Coordinator khanglai 17 in information centre hongkhiak aom  toh kisai genna nei in, Upa Lamkhodem, Vice chairman CKKP in thumna in hunkhakna nei hi. a 60 veina Synod Youth  Conference

NXT Digital Cable News | November 30, 2016

Evangelical Baptist Convention EBC nuai a Division Baptist Dorcas Fellowship DBDF Lamka South Division in tuni sunma dak 10 apan in New Lamka Baptist Church NLBC Elim Veng ah lamka south division sung a Pastor leh upa ordain zite’n A pasal lungtang in mah a muang mahmah a chih thupi a zang in fellowship nei uhi.  Hiai hun hunpi nih in kikhen a hunpi masa ah sunma dak 10 in Rev. V. Nenglian Divisional Superintendent, DS Lamka south division in thumna in fellowship hongkhia in, hunzatna nu ngaikhanvung member DBDF in makaih hi.  Nu Jamkhanvung, vice president DBDF Lamka south division in vaidawNna thu gen in, Evan T. Dmkhothang in pathian thutak gen in, Pastor K. Ginkhanthang, Lamjang Area Pastor in hunpi masa thumna in khak hi.  Hunpi nihna Nu Thanmawi, member DBDF in makaih a, Evan T. Damkhothang in pathian thutak genna nei non a, Nu Manching, member DBDF in kipahthu gen in, Pastor G Sanglian, Local pastor NLBC in thumna in fellowship khak hi.  Tuni a fellowship hun ah EBC lamka south division sung a biakinn tuamtuam apan Pastor leh Upa ordainzi te mi 250 val kihel uhi.