NXT Digital Cable News | December 16, 2016

Project Sunrise FHI360-Shalom saina in HL Daka Memorial Hall, HSA campus rengkai ah December 16 leh 17 2016 ninih sungdaih ding Training of TI-NGO on Hepatitis B & C and Overdose Management kichi tuni in kipan hi.  Hiai hun ah Shalom, LRRC leh PPO apan Peer Educator  te tel ua, sunma dak 10:30 in traning pan uhi. Training hun sung in Nengkhozam Advocacy officer, Shalom, Vungngaihkim Nurse, Shalom, Chinghauniang, Nurse, Shalom, Dr. V. Ralte, Esther PM Shalom, Baby Saithangpui, leh Paukhansang District Mentor, Project Sunrise te’n Hepatitis B leh C toh kisai ban ah khamtheih adiak a a kikap thoh te a overdose hun ua, a hutkhiak ding dan leh etkol ding dan toh kisai in sinsak ding uhi.  Two Days Training of TI NGO on Hepatitis B & C and Overdose Management in atup pipen ahihleh churachandpur district sung a kham theih kikap toh People With injecting Drug ten baihsam tak a Hepatitis B leh C screening muhtheih ding ban ah overdose hun a etkol ding chih hi a, training hun sung in Shalom, PPO leh LRRC apan Peer Educator (PE) te tel ding uhi.

NXT Digital Cable News | December 15, 2016

Tuzing baihtak dak 12:30 vel in CYA Road, Gouchinkhup veng, New Lamka a om, Genesis Pharmacy neitu N Ginlalmuon S/O N Siaka in mei in kang a phelhmit vuallouh in kang tum hi. Thu kizadan in, inn a kat tung in a inn kiang te un thei masa ua, patau dak khen in mipi a thei masate'n ki delh huan ua himahleh a gate ki sungkalh ziakin panla pah theih lou in om uhi. Hun bangtan hiam nung in gate hongthei in hih theih dandan a pan la in inn kiim le kiang a te peh ding veng uhi. Meikang theihphet in fire brigade ten delh in mipi toh pangkhawm in mei phelh uhi.

NXT Digital Cable News | December 14, 2016

CCpur SP Rakesh Balwal IPS thupiak dungzui in CCpur Civil police leh Traffic police ten tulai in khopi sung a taituah gari pei nih leh passenger pua a tai Diesel Auto te avangkim in check zel uhi.  Hiai toh kiton in tuni in leng CCpur Civil police leh Traffic police ten hiangtam Lamka Tipaimuh Road a PTC GHQ Office lutna bul ah khopi sung a passenger pua a tai vial leh leh Diesel Auto te khamkhawl in Driver in gari hekthei na dia driving licence nei na hiam, gari lai pua kim hia chih te chek in, driving licence leh gari lai paw lou te TR 5 receipt cut in sum liau sak uhi.  Tuni in CCpur Civil police leh Traffic police in diesel auto chek abawlna uah gari lai leh driving licence paw lou auto 44 makia in, asum in Rs. Sang 4 leh 400 mukhia in District Transport office ah submit uhi. CCpur Civil police leh Traffic police in ahihleh maban ah khopi sung mun tuamtuam ah avang kim in check bawl zel ding uhi.

NXT Digital Cable News | December 13, 2016

Agape mission cooperative credit society limited AMCOSS, a multi state cooperative society limited in tuni sunma dak 10:30 in Upa H Jelshyam Chapel GBC Campus, Dorcas Veng New lamka ah a 10-veina annual conference-cum-business session nei uhi. Hiai hun ah AMCOCS a share holder te tel ua, Rev. E Paukhanlian Divisional Superintendent, LAmka North Division in hun zatna makaih in, sihna tuak heutute zahna leh suunna hun pi hi.  Upa T Paukhasiam Chairman, BOD AMCOCS in hun patna leh vaidawmna thugen in, Pumkhogin Guite, Secretary & CEM AMCOCS in annual report pia a, paikhawm member ten annual report toh kisai houlimna nei uhi.  Chairman BOD leh auditor pina nuai ah audit note velna leh pomna nei ua, budget leh plan etkhawmna nei in, hiai hun ah paikhawm palai ten budget ding in Crore 9 leh lakh 17 pom kipna nei in, Rev. V Nenglian, BOD AMCOCS in thumna in hun khakna nei hi.  Agape mission cooperative credit society limited AMCOCS ahihleh EBC saptuam sung a mission worker mi 20 in 2003 in pan ua, aloh ching touhzel toh kiton in Hebron Veng tedim road new lamka ah office hong in churachandpur ading in nominal member hih theihna ding in pankhia ua, tulel in AMCOCS ah share holder mi 184 om in, Nominal member 4000 val om a, office ah staff 7 leh agent 10 in nasem uhi. Tuni a AMCOCS in a 10 veina conference cum business session aneih hun uah share holder mi 184 lak ah mi 90 tel uhi. 

NXT Digital Cable News | December 01, 2016

ESC nuai a Central Kristien Khanglai Pawl CKKP in kum non January 19 apan 22 sung Phaijang BHQ Tuilangkual Bial ah  Khanglaite krista a di’n  chih thupi zang a a 60 veina Synod Youth Conference aneih ding uh toh kiton in mun tuamtuam aom te  kithu zaktuahna nuam zaw ding gelna in tuni zingkal dak 7:30 in Lamsong Inn, Chiengkawnpang Bazar ah Khanglai -17  Information Centre honkhiakna nei uhi.  Khanglai -17 Information Centre ahihleh  Rev. Thangkhosiem, Executive director ESC  in hongkhia in pathian kiang ah latna nei a, Evan Paukhomang Coordinator khanglai 17 in information centre hongkhiak aom  toh kisai genna nei in, Upa Lamkhodem, Vice chairman CKKP in thumna in hunkhakna nei hi. a 60 veina Synod Youth  Conference

NXT Digital Cable News | November 30, 2016

Evangelical Baptist Convention EBC nuai a Division Baptist Dorcas Fellowship DBDF Lamka South Division in tuni sunma dak 10 apan in New Lamka Baptist Church NLBC Elim Veng ah lamka south division sung a Pastor leh upa ordain zite’n A pasal lungtang in mah a muang mahmah a chih thupi a zang in fellowship nei uhi.  Hiai hun hunpi nih in kikhen a hunpi masa ah sunma dak 10 in Rev. V. Nenglian Divisional Superintendent, DS Lamka south division in thumna in fellowship hongkhia in, hunzatna nu ngaikhanvung member DBDF in makaih hi.  Nu Jamkhanvung, vice president DBDF Lamka south division in vaidawNna thu gen in, Evan T. Dmkhothang in pathian thutak gen in, Pastor K. Ginkhanthang, Lamjang Area Pastor in hunpi masa thumna in khak hi.  Hunpi nihna Nu Thanmawi, member DBDF in makaih a, Evan T. Damkhothang in pathian thutak genna nei non a, Nu Manching, member DBDF in kipahthu gen in, Pastor G Sanglian, Local pastor NLBC in thumna in fellowship khak hi.  Tuni a fellowship hun ah EBC lamka south division sung a biakinn tuamtuam apan Pastor leh Upa ordainzi te mi 250 val kihel uhi.

NXT Digital Cable News | November 28, 2016

United Naga Council UNC in tukha bul November 1, 2016 apan Manipur a hihna lampi nih national highway te hunchiam omlou a economic blockage abawl uh paitou zel in Manipur state sung ah Imphal tel a district tuamtuam ah nek leh tak ah mipi in haksatna tuak touzel in nek leh tak man hundang sang in napi tak in khang hi.  Nek leh tak khang ziak in district mipi in haksatna a tuah uh toh kisai bang ah vanman khangthu toh kisai in tuni sunnung dak 3 vel in Lamka Traders and Self Employed Association (LATSEA)  in lamka khopi sung a nek leh tak supply tu lian pen te toh Saulim Restaurant Tedim Road ah houlim khawmna nei uhi.  Hiai hun ah  nek leh tak supply tu lian pen te apan mahajon te tel ua, UNC in blockage abawl ziak a supply tute’n haksatna atuah te uh ban ah vanman khan dan toh kisai genkhawmna nei uhi.

NXT Digital Cable News | November 25, 2016

Imphal police commando hidia gintak te’n UNC makai lianpen Gaidon Kamei leh makai dang khenkhat amatkhiak ziakun tuni apan Manipur a Naga mite tenna bial teng ah Total Shutdown puan in om hi. Thusuak kizadan in, Pheidinga khua ah Bolero ngou, nagaland registration kithuah, NL 07C-1642 tuni in Imphal Police commando ten khamkhawl ua, asunga tuang UNC President Gaidon Kamei, kum 52, s/o (late) Landou Kamei of Noney Part 1, tulela Namdulong a omlel banah  gari hektu, Sankhui Stephen, kum 36, S/o (late) Sankhui Thamnok of Komsen Village , Chandel mankhia ua, UNC ten hun sawttak Manipur a hihbuai ziak ua mat a om uh hin kigen hi.

NXT Digital Cable News | November 24, 2016

Lunminthang haokip DC cchurachandpur in tuni in district sung a Oil pump omte’ theih ding in thusuah bawl hi.  Thusuak in ataklatna ah apaisa November 5, 2016 a petrol leh diesel hawm dia bikhiak kibawl oil pump ten zui chiat ding in theisak a, pertrol leh diesel tung zah leh stock omdan DC office ah report pe zel ding leh election toh kisai a official te ngai poimoh diak ding in theihsakna bawl hi.  DC CCpur in apaisa novemer 5, 2016 ni a thusuah abawl dan in heavy vehical truck leh bus ten diesel liter 40, light vehical tractor leh four wheeler ten diesel 20, three wheeler, petrol zang ten liter 10 leh diesel zang ten liter 10 , four wheeler petrol zang ten liter 20 leh two wheeler ten liter 10 la thei ding in thusuah bawl a, hiai thusuah pen thuthak omma oil pump ten zui chiat ding in theihsakna bawl hi.

NXT Digital Cable News | November 23, 2016

India Prime Minister makaih BJP solkar in india gamsung a diklou tak a summuhna Black Money beisak sawm in November 8 zankim apan india sum note 500 leh 1000 akhawlsak toh kiton in india gamsung pumpi in buaina nasa tak tuak ua, niteng in gamsung a bank chih ah sum khek ding, Withdrawal leh deposit nuam in mipi pung hulhul mai hi.  Churachandpur District mipi in leng sum 500 leh 1000 khawlsak ziak in buaina namai lou tuak in, niteng in zingkhang apan in bank leh ATM booth ah kivual dim gige uhi.  November 10 apan in bank ah sum khek, la leh koih ding tatsat lou in om a, bank ten leng hihtheih tawp suah in nnasep hun dia kipia sang a  tamzaw sem uhi.  District sung ah ahihleh customer haupe’n leh chest bank nih om sun, United bank of india UBI leh State bank of india churachandpur branch te ah bank dang sang in mitam zaw gige ua, tuni in leng mi hunkhop in sum la, koih leh kheng ding in bank ah adim in om uhi.  Chest bank nih te lak ah khat State of India SBI churachandpur branch in November 10, 2016 apan customer te’n bank ah sum note lui 500 leh 1000 note kheng leh akoih te uh Reserve bank of India ah thot leh kheng ding in sum note lui te sim in, 500 leh 1000 te a bundle a koih in buaipih san lel uhi.

NXT Digital Cable News | November 22, 2016

Young Paite Association (YPA) New Lamka Block leh Unit te’n lanva lei New lamka naihlam a welcome gate abawl uh zoh siang ahihtoh kiton in tuni zingkal in Welcome gate kigelhna plate tuahna nei uhi.  Hiai hun ah YPA New Lamka Block a makai te ban ah hiai huangsung a om YPA unit chih a member ban ah makai tamtak paikhawm in, Welcome to New Lamka chih kigelhna plate takna nei uhi.  Hiai welcome plate ah ahihleh Tingkangphai lam apan honglut te muh theih ding in welcome to New lamka chih kitak a, tingkangphai lam zuan te muhtheih ding mah in Mangpha chih kigelh hi.  Welcome gate kigelhna takkhiakna zoh ahihtoh kiton in zingchiang zingkal dak dak 7 in hiai mun ah welcome gate honna leh latna om ding a, hiai hun puamuanlal guite, assistant secretary YPA New lamka block in makaih ding hi.  Hiai hun ah S. Chinngaihpau, Chairman, CEC YPA General Headquarter in Gate hong in, Langkhanpau Guite, Adviser, YPA New Lamka Block in honkhiak aom welcome to new lamka chih kigelhna Gate pathian kiang ah lan ding hi.  S. Manlian, President, YPA New Lamka Block apan thugenna om ding a, HA Zatuan, Finance Secretary, YPA New Lamka Block apan welcome gate bawlna toh kisai Report om in,  Vice President, YPA New Lamka Block in kipahthu genna nei in huntawpna bawl ding hi.

NXT Digital Cable News | November 19, 2016

Churachandpur district mipi te' buaina,  taksapna leh haksatna sum note, sum nen, nek leh tak, thautui chih te ah haksatna in kiam lam manoh lou ding bang lailai hi. Bank leh ATM booth ban ah thautui la ding ani ani in mi pung hulhul a,  bank leh thautui hawm ten mipi khualna in hihthei tawp suah in nna naktak in sem uhi.

NXT Digital Cable News | November 17, 2017

Tuni zinglam dak 10:30 in Zomi Student Federation ZSF GHQ in lamka khopi sunga niteng a nek d poimoh tuamtuam zuak te lak ah, adiak in vai mahajon te lak etkhiak na va nei uhi,ZSF GHQ in atak lat na ah UNC in economic blockade ziak a nek leh tak ban ah van man bang zah hiam khang ahi chih atheih phet un dawr kai mahajon te lak et khiak na pan ngal ua mahajon ten agen na uah van man te akheng val a pelou uh hiin gen uhi,

NXT Digital Cable News | November 16, 2016

United Naga Council(UNC) in economic blockade a bawl ziak un Manipur ah haksatna nasa tak tung hi. Blockade ziak in state sung ah van man te khang in a diak in thautui toh kisai, petrol litre khat ah 200 bang tungzou hi. Thautui man toh kisai zanhal, november 14,2016 in Zomi Revolutionary Army(ZRA) in thusuah bawl in litre khat 100 tan a zuak ding leh huai sang a tamzaw a zuak lou ding in theihsakna bawl uhi.

NXT Digital Cable News | November 15, 2016

The Zou Artiste Union (ZAU) HQ saina in tuni sunnung dak 1 in zogal memorial hall complex zoveng ah ZoFilm Company in abawl  Zou Feature Film “ITNA TULLOU” kichi mipi ettheih dia zuak khiak ding in hongkhiakna om hi.   Hiai hun ah itna tullou a tel actor,  actress,  part la kha teng ban ah ngaina tu mi tamtak in uap ua, N  ibochao singh,  special contractor in chief guest hihna toh uap in zou feature  film itna tullou hongkhia hi.   Hiai hun zatna Paul TK. Lal leh Bliss lhingboi ten makaih ua  john haulamlian in thumna a hun hong in,  M thanga zou,  director  zo film company  in introduction  leh welcome  speech hunla in,  Kaisuanlian President ZAU in thugenna hunzang a,  khuallian te apan thugenna om in,  zogam ronald lalpu lead hero itna tullou in vote of thanks gen in john zamkhomang in hun khakna nei hi.   Program zat hun sungin lasiam tuamtuam in lasakna nei ua,  program zatzoh in itna tullou film screening nei uhi.  Itna tullou film ahihleh M.  Thathang zou in a direct hi a, ngainuomching in a produce hin kigen hi. 

NXT Digital Cable News | November 14, 2016

Paite Tribe Council, PTC, General Headquarters, Central Working Committee in tuni zingkal dak 7:00 in PTC/GHQ office, Hiangtam Lamka ah emergency meeting nei uhi. Meeting hun ah, John K. Ngaihte, General Secretary, PTC/GHQ in Mrs. Pamsialching sihna thu a aseppih te kuamah donglou a TO WHOM IT MAY CONCERN chih certificate DC/CCPUR a apiak thu, Moral ground a hihkhial chi a kitopna lai a piak toh kisai genkhawm uhi. PTC lam a pan thu kimu dan in, General secretary kitawp na thu toh kisai hun sawt kuamtak gen khawm ahihnung a a kitopna lai a pomsak ban uah, To Whom It May Concern note a suah pen leng CWC in bangmahlou (null and void) a koih in, District Magistrate kiang ah leng hiai certificate cancellled ahi chih tanpha lai pia uhi. Huai lou in, general secretary kitawpna a pom u toh kiton in Paite Tribe Council ki-ukna dan (11vei puahphatna, 2013) Bung 5, Article XII Clause 48 (vi) pansan in H. Pauzalal, Secretary (internal) in General Secretary mohpuakna len ding chi in nam kip ngal uhi.

NXT Digital Cable News | November 12, 2016

YPA GHQ in thu suah abawl uh kimu dan in Central Executive Committee. Young Paite Association, General Headquarters Meeting thupukna dungzuiin leh YPA Ki-Ukna Danbupi Article No. 501') in thuneihna a piak bangin, tulel a YPA Lamka Block vaipawte’n YPA General Headquarters deihna leh thupiakte zui nuamlou leh zahtaklou-a, ka] a suan teitei ziakun tuni 12th November, 2016 akipan 1n TAWPSAK ahi uhi. Tawpsak ahih uh toh kiton in, YPA min zangin, nasep silbawl bangmah a semthei nawn kei ding ua. YPA Lamka Block huam sunga YPA Unit(s) te YPA/GHQS in a enkai ding hi. YPA Lamka Block property te tengteng 13th November, 2016 tan in Presrdent/General Secretary. YPA GHQs khut ah ana pe ding ua theihsak ahi uhi. Tawpsak a om YPA Lamka Block vaipawte hiai CEC. YPA/GHQs thupukna palsat teitei muh a om theih khiak aki neih leh YPA General Heaquarters in a tunga thutanna abawl bangbang ah. a khase thei' kei ding uh chiin  taklang uhi.

NXT Digital Cable News | November 10, 2016

Tuni sunnung dak 3:30  in Churachandpur District Village Defence Force (VDF) Welfare Association in, apaisa October 7, 2016 ni a sihna tuak, amember pih uh, Dongthang s/o Lhunkhojang of N. Molhoi galna in a sungkuan te kiang ah a sum in Rs. 1lakh pia uhi. Churachandpur district ah, apaisa 2012 in VDF dinkhiak in om a, tulel in member 600 vel om hi. Dongthang ahihelh Tuibong Mini-secretariat a posting leh huai mun a duty hi a, damlouhna ziak in October 7, 2016 in a zi leh a ta, pasal 2 nusia hi. Tuni a gaalna sum piakkhiakna hun ah, All Manipur VDF Welfare Association apan President Deban makaih in member tamkhop tak tel uhi.

NXT Digital News | November 9, 2016

Tuni suunnung dak 3 in St Paul school Newlamka ah National service day zatin om hi. National service day ahih leh Manipur State Legal Services authority, Churachandpur Dist Legal services authority leh BeMung Consultancy pang khawm a aneih uh hi a, hiai hun ah St Paul Institute apan school naupang pawl 11 leh 12 arts te ki hel ua, Letkho Kipgen Chief judicial magistrate CCPur leh secretary CCPur District Legal Services Authority te telin advocate tuamtuam ki hel uhi, tuni a National Legal service Day zatna hun ah catherine in makaih in,grace chiinhoihniang advocate in vaidawn thugenna nei a, hiai program zatna hun ah P Khamkhanthuam Advocate leh Songzamang Tombing Collective Lawyers India Trust ten National legal services leh Fundamental rights and duties chih thupi pansan in sinsak na nei ua, BeMung Resource Centre ten St Paul Institute student te zatding catalogue piak khiak na leng nei ngal uhi.

NXT Digital Cable News | November 8, 2016

Apaisa October 14 ni a Thousilen khuam a sisa a kimukhia, Pamsialching, kum 22, w/o  Pausomlal of Thingkangphai, tuzing in akivuina Thingkangphai hanmual ah tawhkhiak in om a, Magistrate leh Police makaihna in Forensic Expert-te'n Imphal ah Post Mortem bawl uhi. Pamsialching pianna pa, Khamsongin Biangtung in atanu sihdan muanmawh huai sa in awklum hilou ding chi a, akhua uh Palkhuang apan Lamka hon zuan in Police Station ah FIR gelhlut hi. FIR bawl ahihnung in, siluang tawhkhiak thak di'n District Magistrate in thusuah bawl a, tuzing dak 7 velin Pamsialching sungkuante leh amah ngainatu te'n  Police leh Magistrate etkaina nuai ah toukhia ua, huaimun apan kintakin Police ten  Imphal zotpih uhi.