Theihsiam Ahak Ngei!

Written by:K. Lianthansang

Ka nasep uh a laklawh ziakin nitum nung tanpha in leng ka pai naikei uhi. Ka lawmpa’n teklei a lep kawm in, “ ka tate agil uh akialta mah ding….meh ana huan kei le uchi’n ke’n hon tawi ding ka hi ka chih hi a…” chi vungvung zawzen hi. Lamdang kasa sim mahmah a, akiang ah, “ Na tate amau vuak inn a nusia maw..?” ka chih leh, “ Amau vuak zaw hisam kei uh, api uh leng om ahi. Himahleh hat nawnlou ahi..” chi’n hon dawng hi. Kum khatsung asuk-atung a nasem a ka kizuihpih himahleh a khawsakna uh ka theihpih kei hi. Ka lawmpa’n aban hon genzel a, “ Tuni Kiginni ahih tawh, ‘pay day’ hizawmah in chin, ka tate sameh khatvei  bek mehpih nuam ing a, annek honna ngak un ka chih leh, paihak ni tawh kituakkha sese a, lungngaihlua ka hi..” hon chi hi. Huai nung sawtlou in ka tawp ua kintakin innlam a zuanpah vengveng hi.
 

Ke’n leng innlam ka zuan pah  a, koimah ah ka bang sawn sese kei hi. Inn ka tunnung tanpha in ka lawmpa’ khawsakdan theihnopna in ka pumdim hi. Zankhua in leng ka lungsim a nuam thei taktak kei. Zingkhua hong vak a, phone  in ka lawmpa ka houpih a, akiang ah, “ Tuni Pathian ahih tawh, khatvei himhim  an nekhawm ni. I innkuante leng kimeltheihtuah sak bek lehang hoih in teh “ ka chihleh kisuanglah takin hon nial bawl hi. Ki-itna latsaktuahna leng hikawm  ding ahihdan khawng leh bangbang hiam ka gen nungin hon ‘aw’ vanglak a, a innkuan un zing biakna kikhawp tawpin hong hawh nainai uhi.
 

Nitaklam an kon ne ua nuamtakin ka omkhawm zaizai uhi. An nezou, verandah ah ka tu ua, naupangte’n bel an akham naikei uh. Ka lawmpa’n a lawinu hon tonpihlouh ziakin lamdang ka sasim a, “ Na lawinu lah non tonpih hetkei a…” ka chih leh, “ Ka lawinu om nawnlou ahi. Ka pianna pa leng a om nawnkei a, ka tate leng akim in kon tonpih thei kei. Ka pianna nu ngei leng ngaplou sasa a kon kaihkhiat ahi a, khawmial ma a ka kikpah kei ua leh…lampai bang haksa sa mahmahta in chin, buaihuai maithei ahi” chi’n hon dawng hi. Ke’n a inntan uh gari a va khakik ding ka hihdan ka hilh  leh amel ah, kipak ahihdan hon latsak phet hilou in kipahthu hon gen pah  hi.
 

Amah ahihleh kei’ makaihna nuai a ‘mistry’ dinga ka zat ahi. Akhutma a mam a, idea leng nei mahmah mihing khat ahi hi. A innkuan khawsakna uh theikei mahleng ka deihsak mahmah a, ka kithuahkhak ua kipan in ka nungzui in a pangden hi. An nekhawm dinga ka sapna ziak ahihleh a khawsakna uh tangpi ka dotchian nuam ziak ahi pen hi. Mi kisuanlah hat leh chitak ahi a, pautam zelzul in leng a om ngei kei a, chiamnuih a kigen chiangin ana heh tuankei a, ana nui veve hi. Ama’n leng achang in chiamnuih a gen zel sam a, chiamnuih thanghuailua bel gen di’n leng akoih ngeikei  himhim hi.
 

Tumlam, mualdawn a ni atumkhiat tawh kiton phial in suahlam tangtung ah khapi hong suakkhe chiaichiai hi. Nitum tawh kiton a kha a suah  chiang a ‘fullmoon’ hita chihna tawh kibang ahihman in, khapi leng alian huntawk mahmah a, bem vilvel in vakpha mahmah hi. Ka lawmpa kiangah, “ Na haksatna om chiang a kisuanglah lou hial a non gen zel ding ahi. Ke’n leng kei hihtheih tan a hon panpih nuam gige ka hi..” ka chihleh, “ Nang hon deihsakna ziak liauliau a tuni tanpha nasep ding ne iden a om inga , an ngawl hial a omkha nailou ka hi uh. Pathian in ahunhun a a panpihna khut hon zakkhum lai a, ittu leh deihsaktu ding hon pelai ahi. Pathian in nang tungtawn in  nasep ding hon pia a, hon vualzawl manin kipahthu gensenglouh bat ka nei hi” chi’n hon dawng hi.
 

Aban hon genzel a, “ Ka lawinu  non kan a, ‘om nawnlou’ ahihdan kon hilh hi. Himahleh ka lawinu’ omlouhdan zaw tuni tanpha ka theisiam naikei. Ka kingaihlai ua kipan in hon pan zawzen leng; kum 18 khawng ka phakma akipan in kei sanga kum 3 a naupang zaw numei khat (ka zi) hoih ka sa mahmah  a, zawlmit in ka en pah mai hi. Himahleh, itna thu ka gen ngam kei a,amah lah naupang mahmah lai ahihman in a innsung uah tuitawi khawng lel in pangthei pan hamham hi. School kai nawnlou a nasem a kilawh ka hihman in, ka vapawt zihzeh peih kei zawmah hi. Alehlam ah, amah laisimlai ahihman in, a lai simna hihbuailou chu ka hi peuhmah phot a, ka lungkim veve hi. Kum 1 hiam lawmta dan in ka kithuahpih a, atawpin bel ka itdan ka gensuk top mai hi. Alungsim kuaikun zou dinga kilam-enlou pipi a ka gen himahleh aman leng honna ngaigu simsa ahi ngei ding a, nuam takin ka zou hiau hi.
 

Hunte hongpai zel in ka itna uh leng a kikhihna tuak ah akip mahmah  a, amawk a phelkhiat zawh ding ahi kei hi. Naupang himah le ung Manipur a‘Tribal Unity’ banga ngek ka hikei uh. Manipur a ‘Tribal Unity’ bel ngek lawlai ahihman in malta thak zek nangawn leng a nethei kei a, tuanvaite ( makaite) a dingin mehhuandan chi tuamtuam tampi zat ngai sek a, pei lung-am zou mahmah hi. Kou bel huaibang ningniang ka hikei hial uh. Anuam-ahaksa ah leng ka kitaisan kei ua, kitheisiam takin ka omtou uhi. Nikhat, nasepna mun a ka omlai in ka lungsim ah ‘nasem a kivak ding thouthou, zi kinei suk hen la; hatlai mah a tate lai simsak a,tekluat ma in amau ahon vaktheih ding un’ chih kia hong omden nilouh hi. Ke’n leng a nitak in ka nungaknu’ kiangah ka lungsim a huai thu omden ahihdan ka va gen a, amah leng hong kingaihtuah in a kalnawn in ka kigu hiau uhi.
 

Naupang chik a kigawm himah le ung ka nu leh pa’n amau’ ta bangmai in hon bawlsak ua, ka kipak mahmah hi. Nasep bang leng kei sangin ahat zaw a, ahihtheihlouh om leh leng ka nu leh pa kiangah dongzel in kisintawm kawmkawmin mailam hinkhua ding ka geltou zel uhi. Mite’n naupanglua sa in hon sitsak mahle uh a maimai tuankei. Siik asatlai mah a sek ahoih mahbang in, ka zi leng a satlai mah in ka pi a, ka nu leh pa’n a deihdan  chet un hon seksak ua, zi hoihtak nei ka suak mai hi. Ka nu leh pa a damlouh hun un leng, taitheih nana ah ana tai zel a, ‘ Kiginni chiangin kon din ding uh’  chin, Pharmacy khenkhat khawng ah damdawi ana batlak zel hi. Mi khenkhat hile uh bel, ‘ Sum omlou, bat ding zong  a vatai gige zumhuai’ chi veuvau ding un ka gingta.!!
 

Hunte hong paizel in, tapa 3 ka nei uhi. Ka tapa a neupen apian nung kalkhat zawh in anu hong damkei a, Lamka a Dist Hospital ah ka lutpih uhi. Kalkhat khawng  omzawh nung in ka pawtkhia ua, innlam a ka kikep patpat chiang un a buaise zel a, damna deihin damdawi inn ka zuankik zel uhi. Abuaihuai mahmah ahihleh, ka zi a damlouh lai in leng nasem a kuanlouh theih ahi kei. Gimse lawzen a a omlouh zek chiangin ka nasepna ah ka vakuan zel a, nitak chiangin Damdawi Inn ah ka va giahpih zel hi. Huailai a ka mi zuihpa eimite mah ahina a, ka haksatna ka gen ngam tuan kei. Ka zi, sun-le-zan a ompih in ka nasepna ah va kuan kei leng lah, ka tang a ding midang ana la ding ua, nasep bei a omzel ding ka hihmam in sun hun  in  ka nuneute ka omsak zel a, zan hun a kei vagiak zel ka hizaw hi.
Sun huna nasem a ka kuan hangin ka lungsim anuam tuankei. Central Lamka lam a Building lian mahmah khat ka bawllai uh ahi a, room khat a eikia i pankhak chiang bangin kithawmhau mahmah hi. Mi kikou zek khawng a om chiangin i diip hawm mai a, kihi loklok zawzen hi. Phone tanpha leng ka neizou naikei a, room a cement pe dia honglut dek te khawng a bang, ka zi’ sihthu hilhdia honglut dek hidan khawng in ka suangtuah kha sek a, kei-le-kei ka kisugim thei tel mai. Atawpin bel, ka mi zuihpa’ kiangah ka haksatna bangkim ka gen a, hon theisiam mahmah hi. Huainung bel ka nasep leng a nuam tuan mahmah mai a, tawldamhuai tuan leng ka sa hi.
   

  A nitak in Damdawi Inn lam ka naih nawn leuleu a, ka zi ana gim mahmah hi. Zan dak 12 lak in‘ bangmah chikei ni..hong hoih hiaihiai ding ahi a, nou leng innlam ah ana tawldam phot mai un..’ chi’n ka  nuneute ka paisak hi. Apainung uh sawtlou in ka zi hong buaisia  a, doctor-te lah ihmu vek ahihman un, phawnzawh ding a omkei uhi. Abeidot-huai ngei mai..!.Ka zi’n hon beisanta. Ka kianga naute khat ompen sawl in ka nuneute (innlam a tawldam dia ka paisakte) ka nungdelh sak a, inn a tunma un va delhpha in hong kik ngal  uhi. Huai zan in ka lungsim ah bangmah dang a omkei a, ‘ mibang a hau hile ung zaw, ka zi’ hinna kihumbit man a om maithei hi a’ chih kia ka ngaihtuah hi.
 

Mangkang te’n ‘Hospital’ ana chih uh, ‘Damdawi Inn’ agenna uh himahleh, tulai in – mitallang deuhte pibawl tuamdeuh a nei ua, Damdawi Inn a zintun (host) hoih tuam sese ding dan a ngaikha i bangta mawk uhi. Hospital kichi, lungkham mangbangte adia belhpen ahihmanin -  Christiante adia ‘Church’, Hindu sahkhua zuite adia ‘ Temple’ leh Muslim sahkhua zuite adia ‘ Mosque’ ahi chih thei gige lehang zaw nuam mahmah ding hiven. Ka gennoptak bel, damna deih a damna inn naih ihih ngal leh azawng-ahau kal ah kideidanna tu a sangin dau zawdeuh thei hamham leh ka chihna ahi zaw hi. Milian-milal hile ung bel, a minute hal a hong enkhe zel ding zaw a om ngei ka gingta tinten hi.
 

         Azan-azan in innlam ah ka kipua ua, inn ka tun un ka innsung teng uh leh ka kongpua teng uah mipi ana dim man uhi. Damdawi inn ah, khawtuah ding bei a beidong kisa in ka kap a; inn-mun ah bel, khawtuahtu mi tampite ziaka kipak in kipahna khitui  ka nul hi. I kikhawtuahdan uh thupi ka sa a, phatuamngai pawlpi i neih uh ka kipahpih mahmah hi. Tuadan mah a phattuamngaihna sunzom zel a, tunung aleng azawng-ahau khentuam seselou a kal i suantouh zel uh ka lam-en. Kithalawh ding hileh, kou innkuan hong gal ding mi atam hetkei ding, himahleh ka zi’ sihna tung a ka muhkhiat ahihleh  eimite’n phattuamngaihna kitaisan lou a, namdangte muh a ‘Christian hindan kitawisang lailai ahi’ ka chihial hi.

Atomlam in gen ni. Ka zi’ sihnung kum 4 zawh in zi dang ka neinawn hi. Zi neihthak,a sawmthu in bel ka sawm nawn kei. Himahleh, lawm-le-vual, tanau-laina te’n aguk a honna awlmawh uh ahi ngei ding a, honna zonsak hilhial uhi. Guk leng a ngaikei a, inn a lawmte’n hong pilutsak hiau uh leng ahi sim. Ka zi thak ahihleh kei sangin a upa zawtham a, tak gimgem zawzen in, hong kipatna innsung apan deihtawk a kisek( a omdan kibawlkhin) leng ahi hi.
 

    Ka kiten tung un zaw mihoih lua hiding in ka gingta a, ka lung anuam mahmah hi. Himahleh ahun hongsawt deuhdeuh chiang in ahihns diktak ‘true colour’ hong dawkkhe sengsung hi. Apautawm mahmah mai a, ka tate kimawl vengvung le uh leng a ngaihsak kholkei a, munkhat a tutang zitzet kawmin a etna ngal en-en mai a, huchi’n nitak hun khawng zang zel hi. Achangin kawng a duap batthawh siamte a gan zel a, anhuan leh tuitawi chihkhawng a nasep tangpi a hideuh hi. Ka nu leh pa lah tekta uh ahihman in, a dam theikei zawmah ua, amau’ lungtunna bangin ka kemzou kei uhi.
 

   Ka pa agawl hong na a, anai khawng hong omzel hi. Nikhat a khatvei bek hahlouh a koihtheih ahi kei. I hahlouh zek chiangin anai pumdim in, uih lutlut zawzen hi. Ka zi’n lah huaite ‘kihbawl’ ahi diam ah hah asawm ngeikei hi. Innkim-innkiangte’ theih in bel ama’ hah vek ahisak  zel hi. Ke’n nasem a ka kuankhiak dek chiang leh ka tunchiang in ka hahsak zel a, ka pa a kipakthei mahmah hi. Ka pa’n, a gawl nat ziakin antak ne theilou a, anchim lam bel ne thei cheuhcheuh hi. Huaiziak mah in, sawthon dampih kei a, leikha’ ann dingin hammual lam hon zotsan pah hi. Himahleh a sihma a ka kianga hong thugen in ka lungsim honkhoih mahmah hi. Ka pa’n, ‘ Bawi…sun khat, na lawinu kianga anchim duh ka hihdan ka gen leh, ankhingte hon huansak maimah a, ka khase mahmah. Ama’ lawhkhiatsa ne leh dawn a hing hilehang, mit hak a om ngam in a om nawn kei ding. Nidang pek akipan a a omdan ka mit asip mahmah a, himahleh nou nupa kal asiat ding ka deihlouh man in ka na im sek a, tu’n bel ka im zou nawn kei..’ hon chi a, ka kingaihtuah vungvung zawzen hi.
 

    Ka zi hon mualliamsan pen naupang chik a ka neih ahi a, deih dandan a chiltheih ahihman in zi hoihpi a suak hi. Himahleh ka zithak pen a taaksa a honglut ahihman in, bawlthak theih ahi kei. A pilthei ahita a, kamkhat ka gen ban ka gentam nuam kei. Huaiziak a hon simmawh leng ahi ngei ding a, haksatakin hinkhua ka zangtou leiluai uhi. Ka pa’ sihnung kha 1 leng pai nailou in ka tapa upapen hong damkei nawn hi. Amah ahihleh gilna sa in kipek den a, doctor kiang a ka tai chiang un damdawi honna gelhsak zel hi. Ka zithak in lah hon etkolpih taktak kei a, ka omchiang kia in a enkol taktak bangin a om  a, nasem a ka kuankhiak chiangin amah leng ana kizalensak sam hi.
 

    Nitak khat ka innkiang ua nupi khat in, ‘ sun a na innsung ua naupang kapkap za ing a, ka va etleh na kong uh ana kipaw-hon  (chabi kikhailou)in ka mu a; ke’n leng lamdang salua ing a innsung ka va etleh na tapa gilna sa leh kap kawm a ana kipek suangsuang maimah kava mu hi. Hehpihlua ing a, damdawi ka na piak ahi..’ chi’n hon gen hi. Hibang hun  khawng ah ka zi khawlak khawng a ana pawt hiauhiau mai ahihdan ka theih chiangin, ka lunggim mahmah a, etkhiat himhim ka sawm hi. Zingkal an nezou, nasem dinga ka kisak takin ka zi’n leng asiam hon phelkhe sam hi. Ka kuankhiat san a, amun ka tunnung in na ka semzek uhi. Ka cement uh hong bei laklawh a athak hong koihmanlou uh ahihman in, nasep ka khawl ua, ke’n leng innlam kintakin ka zuan hi.Innsung ka lut leh ka tapa leh api loungal innsung ah muh ding a omkei uhi. Siam lah kizalhkhesa in ana om zengzung zawmah a, a gantu ka zithak muhphak ahi kei.!
 

   Kei leng kihahsiang in ka tapa’ kiang ah ka valum tawldam hi. Nitaklam hong hi a, ka naute school kai hong pai uh a, homework khawng gelh in buai vengvung uh a, alian zawdeuhpen leh api’n an ahuan uhi. An ahuan zawh un kongpua ah va kimawl nawn uhi.Nidang a kei tunhun ding kuan in ka zi hong pai a, kou room lam ah lutsuak galgal hi. Himahleh kei hon mukei ( kei room dang a lum) a, tung nailou honsa zaw ahi ngei ding a, belkuang khawng gingpah romrom maimah hi. An kithuk vitvit ahi ngei ding a, athuk zawh in naute kiang ah, ‘ an ka ne….’ chih teng gen kangkang hi. Huaitakin konglam a kimawl a om ka tapa leng room a hong lutsuak in, ‘ Papa…an neta ding..hong thouta ou..’ hong chih leh, kei om ka hihlam athei pan a kazi a  kisuanglah mahmah hi.
 

   Ka tapa’ natna tak bang hihiam chih lah matkhiat a omlou. Test theihteng test in, ‘Ultrasound’ tanpha la mahle ung eimi doctor ka naihpa un, ‘ hong dampah in teh…’ chi’n damdawi hon pezel hi. Nitak khat bel ka buaise taktak ua, Hospital  naihnawn louh ngal kinepna himhim a omkei. Na sa-a kipek den mai ahihmanin, a zan  zan in Hospital ka kitun uhi. Huai ah meitei doctor khat ana om a, huaipa leng lunghimawh gawp in, ka damdawi lehkha teng uh leh ka ki-test na result teng uh hon ngen a, ka ensak pah hi. Ka tapa leng a en a, hoihtak a a check zawh in alu hon peikhum maimah  hi. Ka tapa bel a sikhe naikei, himahleh lam-etna himhim a om nawnkei hi. Doctor pa’n, ‘ Na tapa a gilpi vang ahi…’ hon chi maimah hi. Eimi doctor pa’ theihna ana sang deuh hihen la, test na result a-et akipan a gilpi lam dengdel ahihdan honhilh maileh zaw, Imphal tan a poimawh leleng neilou sasa a a damna ding deih a kidelh sam ding hiven. Huai hun in bel New York naih le ung leng a phattuamna ding a om nawn kei. Hinna tunga thunei Pathian himahleh, hinna kepbitna lam a siamna a piakte’ thulimlouh ziaka leng ahunloupi a sihtheih ahihdan ka chiang semsem hi.
 

   Ka zi leh ka pa ka taan nung a, ka tapa upapen ka tan nawnzel ziakin lungngai vungvung in ka om mun mahmah. Ka zithak lah hichi maimah..!!. kei adi’n zaw ‘ Theihsiam Ahak Ngei..!!’ chih vungvung louh ngal, gen ding ka theikei. Huainung sawtlou in ka zi’ sanggamte damlou hong om uh a, ka zi’n va ompih nilouh hi. Buai leh buailouh gen chih a omkei. Numeite vaihawmna kalh a gamtat khak ding kiven gige ngai ahihman in a thuthu in ka omsak hi. Kal khat nunga inn hong pai in ka innvengte uh inn ah hong bang malam a, hon gensiatna thu ka galzak kongkong zawmah hi. Kidekzawhna himhim ka nei nawnkei a, inn honglutphet  in ka ‘aw’ ka suahkhum hi. Huai nitak mah in a vante a zial a, sulkik simthu lel nawnlou dingin, khaubang hon chiahsan vengveng  hi. Akhawnung in mak-man hon phut(ngen) uh a, kou leng maitheih nana a maikhawm in ka vapepah uhi.
 

    Bangteng ka tung ah hongtung mahleh Pathian’ lam naihna in ka zang zel a, ka lung a muang veve hi. Ka lungsim ah, ‘ Theihsiam Ahak Ngei..!!’ chichi mahleng; a khawnungin Pathian in amah lam naihsemna dinga hon sapna ahihdan ka theikhia hi. Khetbuk a singpum khat leilak a ikhet chiangin  tum hoih deuhdeuh a, kip deuhdeuh hi. Himahleh khetbuk a akikhetna lam pen in thuaklah mahmah zel a, asing mong khawng kiniil nengnung sek hi. Huai mahbang in Pathian in akhetbuk leh achiang in hon khamuan a, ka tung ah thuak-haksa taktak hon tungsak mahleh amah lam ah ka belhkip deuhdeuh zawta hi “ chi’n hon gen hi. Huainung in  ka hehneptheih dandan in ka hehnem a, a inn uah ka vakha hi.
 

Laigelhtu’ Lungsung Pan:
Hiai tangthu akipan kibawlhoihna ding leh pilvanna ding tampi omkha ahihman in ziltheih leh laktheih omte ei’ a banga bawlin, ana kibawllem tawmtawm thei lehang i laigelh in manphatna lianpi nei ding hi. I taklatnop pen i theih uh ka lam-en a, kibawlhoihna dinga i zat ngei uh leng ka gingta hi.
– Ka Kipak –