Tuni zinglam dak 9:30 apan Mini-Auditorium, Dorcas hall, New Lamka ah, Centre for Community Initiative (CCI) inntekna in Regional Action on Inclusive Education in North East India (RAISE) in 1st Project Steering Committee meeting nei uhi. Hiai meeting hun ah Northeastern state tuamtuam apan palai 17, Assam state apan 5, Megahlaya apan 4, Tripura apan 3, Manipur apan 2 leh RAISE team 3 tel in RAISE project toh kisai genkhawm na nei uhi. Meeting hun ah, RAISE North East in pan a laak dan tuamtuam te kikupna a neih ban uah, action plan aneih tuamtuam te uh, partner organisation te toh pangkhawm a hih haatsem ding dan gen khawm uhi. Huai lou in tuni a meeting hun sung mah in, report tuamtuam piak na aneih ban uah, action plan tuamtuam haatsak sem ding dan kikup khawmna hun leng nei ngal uhi.
xxxxx
Churachandpur District Sports Association, CDSA saina a zingchiang, September 22, 2016 a Peace Ground Tuibuang a (L) Khaikhanlian Memorial District 1st Division League-2016 kipan ding chih himahleh a hun ding suan in om hi. CDSA lam apan thu kimu dan in, a loutheilou thil a om ziak in League ahihleh September 24, 2016 in kipan ding a, CDSA a affiliated club, 1st Division a om teng in fixture thak la chiat ding a theihsakna bawl in League kipatna/League honni a club teng tel kimchiat ding in leng theihsakna bawl ngal uhi.
Xxxxx
Tuni zinglam dak 10:30 apan, Hiangtam Lamka hausa, G.Thangkhosuanmung, EM/ADCC teenna inn ah Diabetic Retinopathy and Cataract (Mit laimu ngou) detection camp neih in om hi. Hiai camp ahihleh Hiangtam Lamka hausa Pu G.Thangkhosuanmung, EM/ADCC sai hi a, khomuhna lam toh kisai a haksatna nei te, Dr. K.Romen Singh (opthelmic) MNAMS Consultant Vitreo Retinal Surgery & Trauma in etna nei hi. Tuni a free eye camp neih na hun ah, Dr. Samuel Tuanthianmung Guite, Dr. Pumsuanmung SHoute leh Dr. Alice Khaidem te ban ah, Nazareth Nursing home ten kithuah pih in khomuhna lam a haksatna nei mi 100 val etna nei uhi. G.Thangkhosuanmung, EM/ADCC in gen dan in, hiai camp aahihleh, funding om ziak hiloua, khosakna haksa diak te khualna a ama mimal sum zang a a sai hidan in gen hi.
Xxxxx
Zan September 20, 2016 in district sung a malaria case tamna diak chi a chepteh a om, Vangai area leh Tipaimukh area mun pha diing in Dr. Gojendro Singh, State Malaria Officer makaih in mi bangzah hiam ten Vangai bial zuan uhi. State Malaria Officer te ahihleh District apan Dr. Liankhojam Guite, DMO, Nodal Officer, S.Thangthianmuan, Consultant, NVBDCP, Lalsanhim, Microscopist, Patpuimun leh Lianbiakthang Songput, Finance and Data Operator ten zui in Malaria case muhkhiak tamna mun deuh, Vangai Range, Patpuihmun PHC leh Sibapurikhal PHC te pha ding uhi. SMO in malaria case tamna mun diak te a phaak ziak ahihleh, India government in 2030 tan a malaria hihbei sawm a pan alaak bohzui na hi a, mun tuamtuam a phaak na te uah, tuma a Thousilen, Long Lasting Insecticide Net ahawm te uh a zat ding bang tak in a zang u hiam chih leh hiai thousilen kihawm te a phatuam hiam chih tanpha enkhia in mipi toh kithuahkhawmna leng neingal ding uhi. Official zin te ahihleh zannitak dak 11:00 vel in Jiribam tungua, tuni apan mun tuamtuam pha in September 24 in Lamka hongtung kiik ding uhi.
Xxxxx
Zan nitak in Bethel Veng, New Lamka ah innkuan 2 apan mi 7, meh neek ngei louh a neek khak ziak ua buaisia in damdawiinn tut in om ua, amau teng lak ah mi 4 admit in om uhi. Amau te, Ngailunchiin, 40 W/o Siamzalun of Bethel veng, Manngaihlun 24 d/o Gousuan Ngaihte, Lianbiakmoi 17 d/o Gousuan Ngaihte leh Ginsuan 32 S/o Kamkhup of Sinzawl te hi uhi. A kigen dan in, Ngailunchiin in maltameh, Ironbah bawl a, a inn nei te hawm in a neek u leh buaise ngal uhhidan in gen uhi. Maltameh bawl tu in a theihkhelh ziak in Jendem hel na ding a Van baal (Jendem toh kibang mahmah) hel kha a, a nek phet un a kam uh thak sa a luak suak in buaise ngal uhi. Thiltung theih ahihphet in Bialtu MDC, CT Lian Guite in delh ngal in ama hih theih om kei mahleh, damlou vehna ding chi in Rs. 2000/- pia hi.
Xxxxx
Hongtung ding September 24, 2016 zinglam dak 11:00 in CMO Mini Conference Hall ah Block Programme Manager teng, Block Data Manager teng, Block HMIS Assistant teng, Mother and Child Tracking System, MCTS Counter Nurse teng leh ASHA Facilitator teng in meeting nei ding uhi. Dr. Thangchinkhup Guite, CMO/CCPur in thusuah a bawl kimu danin, Mother and Child Tracking System, MCTS toh kisai a Full Immunization a ding a registration a tawm luat ziak a meeting neih a sawm uh hidan in taklang a, Meeting hun ah, Private Clinic te ah MCTS registration bawl theih ding a expansion bawl ding, MCTS toh kisai a ASHA leh ASHA Facilitator te roll toh kisai, MCTS toh kisai mah a Block Data Manager leh HMIS te roll te gen khawm na nei ding ua, ban ah, a poimohdang a om leh chairman phalna a gen beh theih diing hidan a taklang in, meeting hun ah, Block Data Manager teng in amau block sung a MCTS Full Immunization toh kisai report leh a status te toi chiat ding in leng theihsakna bawl ngal hi.
Xxxxx
Government sinsakna nuai a Computer leh electronic lam zilna mun, NIELIT, Hill Town ah tunin student te a ding laibu hawmna nei uhi. Tuni a laibu kihawm te ahihleh, O-Level sin lel student te a ding hi a, amau a batch 2na hi ta uhi. Batch masa ahihleh July 2015 in kipan a huai ah students mi 50 om in amau ten kum 1 sung O-Level sin uhi. 2nd Batch ahihleh July 2016 in kipan nawn a, student mi 55 om in amau te lai bu ding te tunin hawm khia uhi. TUni a free book distribution hun ah, Imphal apan RK Bigensana Singh, Scientist-C NIELIT, CCpur leh H. Rajender, Librarian/Manager MCC, NIELIT, Imphal ten uap in laibu te pe khia uhi.
Xxxxx
Tuni sunnung dak 3:00 in Zenhang Lamka Play Ground ah The 2nd Under-16 Late Vumzakhup Vualnam memorial Tournament, 9 Men Soccer, kipan hi. Local Pastor Khanlal, EBCC, Zenhang Lamka in hiai Tournament hongkhia a, tournament tungtawn in mahni kikepna leh hoihna hon tun henla, hiai tungtawn mah a kipumphatna atung ding deihhuai asakdan gen hi. Vumzakhup tapate laka khat, Pumsuanthang Vualnam in hiai huna agenna ah, Tournament flag kizang pen, gen nei tak a kibawl ahi chi hi. 1997 unau melhaih hunlai in apa'n sihna tuak a, flag nuailam ah rong san kizang pen in apa sisan ensak in, atunglam a rong ngou pen in, thupina a apa paita ahihdan ensak hi'n gen hi. Tuni a opening match a kimawlte ahihleh, Suansiamlian Memorial Team leh Vumzakhup Memorial Team hi ua, amaute nikum a Champions leh Runners-up hi un kigen a, vualzou omlou in 1-1 in ki-draw uhi.
xxxx
WATCH VIDEO
No comments:
Post a Comment