HEADLINES:
Kum 92 paisa apan kizui Railway budget tuam beisak hita ding
Union leh Railway Budget gawmkhawm di’n thupuk
 |
| http://i.ndtvimg.com/ |
New Delhi, Sept-21: Kum 92 paisa apan kizangtou Railway Minister adia Budget bawl a omte kumnawn in beita ding a, tuni’n central government in Union Budget lakah Railway Budget gawmkhawm(merged) di’n thupukna bawl hi. India a transporter lianpen Railway ministry kianga budget tuam piak a omte beisakna dia thusun kibawlte, Union Cabinet in apompih ziakin Finance Minister Arun Jaitley in kipahthu puang a, February 2017 nipikal masa sungin ‘common budget’ puankhiak hiding chi hi. Hunpaisa in Union Budget luikhiak madeuh in Railway Budget puan in om sek hi.
Railway Ministry ah kum paisa in sum tamtak deficit hi’n kigen a, Union Budget tawh gawmkhawm ahihdungzui in tua thubuaite om nawnlou ding a, capital expenditure omte leng Finance Minister kianga piak khiak zel hiding hi. Thusuakin agendan in 7th Pay Commission zat apan, India a nasemtu haupen Railway Ministry in Rs. 40,000 crore val seng beh in haksatna liantak tuak ua, passenger service tawh kisai a rate kiamsak hun inleng Rs. 33,000 crore mansuah uhi. Railway Minister Suresh Prabhu in huai tungtang agenna ah Railway adia capital expenditure lam a haksatna omte bei thei ding a, gamsung mun tuamtuam ah train tungtawn a kikawmtuahna khangtou ding ahihdan genkawm in, gamsung economy leng tuasang in hoihzaw ding chi hi.
Indian railway tungtawn in niteng in mihing million 23 val khualzin uh in railway line 64,000 km huamsung ah kikawmtuahna khangtou hat mahmah a, Train zanga nikhat a khualzin zah Australia leh New Zealand milip tawh kikim uh. Thusuak khenkhat in agendan in January 24, 2017 velin Union Budget Session kipan maithei a, February 1 apan Budget tuamtuam genkhawm ahihding banah, April 1 tan in Goods & Services Tax tungtang saifel hiding a, huai hunchiang in gamsung pumpi ah ‘single-tax regime’ (GST) zat hita ding hi.
Manipur ah amasapen ding in VVPAT zat hiding: ECI
 |
| http://www.thehindu.com/ |
Imphal, Sept-21: Election Commission of India (ECI) a full bench team te’n Manipur a nutsiat ma un Chingmeirong a Hotel Classic Grande muh ah tuni’n press briefing nei uh a, huai ah ECI a Chief Election Commissioner Dr. Nasim Zaidi in maban Election hun ah Manipur adia masapen ding in ‘Voter Verifiable Paper Audit Trail’ (VVPAT) zat hiding in gen a, huai tungtawn a voter te’n vote khe dik uh hiam, election tawh kisai a kikhemna leh diklouhna omte theihkhiak nang hi’n gen hi. Aman a genzelna ah political party tuamtuam-te tawh meeting hun ah vote khe ding-te gupna ngahna dia sum thahatna zat, official machinery leh govt. resource-te diklou tak a zat, govt. nuai a dept. tuamtuam adia recruitment tamtak sai, officer khenkhat chitlouhna banah election hun ah helpawl-te kigolh thu tawh kisai in ngaihdan theisak uh a, huai banah buaina omlouh nang leh lungmuangtak a election sai theihna dia single-phase poll neih ding, election hun ah model code of conduct zuih theihna dia election om hun ding kha 3 ma a pool schedule puangkhiak banah MCC zat ding leh phalna lalou a banner/poster/festoons/poster-te lakkhiak ding tawh kisai a ngaihdan a neih-te uh theisak uhi. CEO leh DEOs te’n election tawh kisai a thu poimawh tuamtuam-te media tungtawn a stake holder-te theisak ding in ECI te’n thupia uh a, media ah election tawh kisai a reports, complain leh thubuai omte etkai banah panla ding in leng theisak uhi.
ECI team te’n media-te kimuhpih in tutung a Manipur hongphak uh Assembly Election ding tawh kisai a Manipur govt. akisak kholhna hong enkhia uh hi a gen kawm in thil omdan tangpi taklang (briefing bawl) uhi. Media te’n Election om kuan a state govt. in dept. tuamtuam a recruitment a bawl zungzung tungtang dotna a bawl uh Chief Election Commissioner Dr. Nasim Zaidi in a dawnna ah Political party tuamtuam in leng huai thu ECI ah tun uh hi’n gen a, aman Manipur Chief Secretary kiangah recruitment tungtang ahi theitan a limsak nawnlou phot ding in theisak hi’n gen hi.
Assembly constituency khenkhat ah VVPAT zat hiding a, huai tawh kisai in district election machineries te’n awareness campaign sai ding uh a, election hun ah upa-te, damlou leh vualphalou te’n vote a khiak theihna ding ua panla ding in leng theisak hi. DEOs leh SPs te’n election hun ah nam leh gamgi thu tawh kisai banah helpawl-te ziak a buaina omlouhna dia panla ding leh buaina bawl banah migilou-te enchian ding in theisak uh a, thil dengdel tungtang tawh kisai a police-station level tanpha a panla ding a theisak uh hi’n kigen hi. Manipur Assembly a member 60-te term March 18, 2017 in bei ding a, huai ma ngei a election om ding a, Election Commissioner 2, Dy. Election Commissioner 3, Director 4, Principal Secy. leh Secretary 1 tuak te’n Chief Election Commissioner hong zui uh a, Manipur ah ni 2 a om nung un press briefing zawh in tunitak lam a New Delhi zuan a kik nawn uh hi’n kigen hi.
LOCAL NEWS:
M/s Hardware godown mei in kang
Lamka,Sept- 21: Lailam-lei kiang a Mahajon Doulian Colney building tunitak dak 6:30 velin mei in kang a, fire brigade leh phatuamngaite’n phelhmit uhi. Huai building bel M/s Hardware neitu TK Muana s/o Lalrinawmi of Salem Veng in (Plywood, rong, thinner, etc) a zuak ding koihna a zat hi a, asung ah van tuamtuam Rs. 10 lakh vel man ding kikoih lak ah 60% man vel kangsia hi’n godown neitu in gen a, electric short circuit ziak hidi’n gintakthu leng gen hi. Godown neitu in akhak nung dakkal khat vel nungin godown sung ah meikhu om hi’n a kiangnai a omte’n thei uh a, huai in amau leng theipan uh hidan in gen uhi.
Diabetic Retinopathy & Cataract Detection Camp
Lamka, Sept- 21: Thangkhosuanmung Guite, EM ADC/CCpur in a tenna inn Mualveng ah tuni’n zunkhum ziaka mit haksatna neite khualna in ‘Diabetic Retinopathy & Cataract Detection Eye Camp’ om a, huai ah mi 120 val ki-ensak uhi. Free eye camp ah Manipur a mitlam siam doctor minthang Dr. K. Romen Singh, DNB (Ophthalmologist), MNAMS, Consultant, Vitreo Retinal, Surgery & Trauma, Shija Eye-care Foundation in damloute en a, technician leh nurse-te ban ah vengsung a phatuamngaite’n kithuahpih uhi. Zunkhum ziak in tamtak mitlam buai om uh a, ki-etkolna ding haksate khualna in Hiangtam Lamka hausa Thangkhosuanmung Guite in ama sum zanga sai hi’n gen hi.
Dynamo leh poison zat kham
Lamka, Sept-21: Dist. Magistrate/CCpur in Khuga Dam ah dynamo leh poisonous chemical zang a ngasa man zel om ziak in mihing ading a hoihlou ban ah State Environment Impact Assessment Authority in ngai poimawh mahmah hi’n taklang hi. Sec 133 (1) (a) of Code of Criminal Procedure 1973 dungzui in kuaman Khuga Dam ah dynamo leh poisonous chemical zanga ngasa mat khamna order suah hi.
Pension sum hawm sunzom uh
Lamka, Sept- 21:Dist. Social Welfare officer/CCpur in Chiengkawnpang a DSWO office ah Old Age Pension (Green, Black & White) card neite kiang ah Sept. 15 akipan pension sum ahawm uh tuni’n CCpur A/C a omte kiang ah hawm uhi. CCpur A/C sung ah card nei 814 omlak ah tamzaw in tuni’n la uh a, Sept 22 in sunzom ding uhi. CCpur dist. ah pension card nei 3442 vel om hi’n deptt. in gen uhi. Sept. 23 in Thanlon A/C, Sept. 24 in Tipaimukh A/C-te hawm hiding a, pension sum late’n receipt leh Aadhaar card Xerox copy tawi ngai a, card neitu mah in lak ngai hi. Damlouh ziaka latheiloute’n Sept. 26 tan in a ziak diktak gelhthawh in min tawh pelut thei ding uh a, chetna om nungin a inn uah piak hiding hi. Beneficiary te’n kum 1 (March 2015- Feb. 2016) kikal a ding Rs. 2,400/- chiat a lak ban uah pension card thak leng piak hi uhi.
RAISE Project tawh kisai genkhawm
Lamka, Sept- 21: New Lamka a EBC Dorcas Jubilee Guest House, Mini-Auditorium hall ah tuni’n Regional Action on Inclusive Education in North East India (RAISE) Strategic Group te’n review meeting nei uh a, Assam, Nagaland, Megahlaya, Tripura leh Manipur apan RAISE Project nuai a NGO 12 apan delegate 18 paikhawm uhi. RAISE Project ahihleh International NGO 3- CBM, Light for the World leh Lilliane Fonds in Ministry of Human Resource Dev., Govt of India tawh pangkhawm in NE biala vualbanlou naupangte’ tuam bawlna omlou a apangngaite banga siamsinna a ngah ding uh a tuppen hi a, Feb. 2016 in huai Project pan uhi.
DHS in emergency meeting neiding
Lamka, Sept-21: CCpur Dist. a Block teng ah Full Immunisation in Mother & Child Tracking System (MCTS) registration tawh kisai 5% kia tung a, huai thu ah Sept 24, 2016 in CMO Mini-Conference Hall ah Dist Health Society emergency meeting om ding hi. Huai ah Private Clinic-te ah MCTS expand leh registration theih ding dan, MCTS ah ASHA leh ASHA Facilitator-te nasep poimawhdan, Block Data manager, HMIS Asst. te nasep poimawh dan genkhawm ding uhi.
Songza Inpi in puaknat thu suah
Lamka, Sept-21: P. Kamdou Veng hanmual lampi ah zan zing a mulkimna bei leh ganhing bang mai a Michael Henkholen Mate (28) s/o (late) Thenlal Mate of S. Canan Veng, Tuibuong thah a om Songza Inpi, Info. Secy in puaknat thu suah a, kimuhsitna sangpen a la uh hi’n taklang hi. Ni 7 sung suunna neih hiding a, ani 8 ni Sept 27, 2016 in Songza Inpi in galna neiding hi’n taklang hi.
Peace and Non-violence Workshop
Lamka, Sept-21: Glocal Volunteers leh Rayburn College saina in Oct 1, 2016 zinglam dak 10:00 in Rayburn College ah ‘First Peace and Non-violence Workshop-Life and Work of Rev. Dr. Martin Luther King Jr.’ Om ding hi. Rev. Khen P. Tombing, Principal Rayburn College in Workshop hong ding a, Dr. Leban Serto in sinsak ding hi.
SUUNNA:
Upa T. Thangkhansum (72) f/o Songgin of Vengnuam South, New Lamka tuni zinglam dak 10:40 velin heart attack in si a, sunnung in YPA hanmual, New Lamka ah kivui hi.
S. Thangkhankham Ngaihte (60) h/o Damzaching of Simveng, tuni nitaklam dak 3:40 velin sin leh kalna in si a, Sept 22, 2016 in New Lamka Christ Saptuam hanmual ah kivui ding hi. Amah Rev S. Ginzam’ nau hi a, mi tamtak in a laphuah leh asak ‘Thoukang la’(song) satu chi’n thei uhi.
Vungnuamching (50) w/o Pastor G. Sanglian, Local Pastor, NLBC Elim Veng, New Lamka tuni nitaklam dak 3:30 velin damlou veh akuan kipuk phut a, Hospital puaklut himahleh dam zoulou in si hi. Aluang Sept 22, 2016 in YPA hanmual, New Lamka ah kivui ding hi.
IMPHAL NEWS:
Airport min khen di'n recommend
Imphal, Sept-21: Chief Minister O. Ibobi makaihna in tuni a Cabinet Meeting in Imphal a International Airport (Tu ma a Tulihal International Airport kichi) tungtang genkhawm uh a, Manipur mi tamtak in huai Airport pen Manipur a mi poimawh khat min lou a khenthak a deih thu uh a gen uh tawh kisai bangtanhiam genkhawm nung in Imphal International Airport kichi leng Bir. Tikendrajit International Airport chi a khen ding in thupukna bawl uh a, huai bang a semsuah ding in India govt. a Ministry of Civil Aviation ah recommend uh chihthu om hi.
Cabinet in huai thu a gen khawmna uah India a Airport tuamtuam leng kua hiam min zang a phuah ahihdungzui in Delhi a Indira Gandhi International Airport, Kolkata a Netaji Subash Chandra International Airport, Mumbai a Chattrapati Shivaji International Airport chih minvuah ahih banah Assam a Airport leng Lokpriya Gopinath Bordoloi International Airport chi a minvuah a om ahihdan thute leng gen tel uhi.
Fin. Comtt 3 a Chairman ding guang
Imphal, Sept-21: K. Meghajit Singh, Secretary in-charge, Manipur Assembly in thusuah a bawlna ah Manipur Assembly a Finance Committee tuamtuam 3 a Chairman ding Speaker in guang hi’n puang hi. Huai dungzui in L. Ibomcha Singh in Committee on Public Accounts ah Chairman len ding a, E. Chand Singh in Committee on Estimates ah Chairman a let ding banah Ginsuanhau in Committee on Public Undertaking a Chairman hiding chi’n taklang hi.
Bandh in hindan nawngkaisak
Imphal, Sept-21: National Revolutionary Front of Manipur (NRFM) te’n Shillong ah Sept 21, 1949 a India Union ah Manipur laklutna dia Manipur Maharaja Budhachandra Singh thagum a suai kaihsak a om mawhpaihna in zan nitak zankim apan dakkal 24 sung general strike a puang un mun khenkhat ah hindan nawngkai sak hi’n gen uhi. Bandh ziak in Khwairamband, Paona leh Thangbal bazar banah BT Road, Allu Galli, Khoyathong, Nagamapal, Wahengbam Leikai leh Keishampat-te ah dawr, dukan leh sum sinnna inn-te kikhak a, Oil pump teng a kikhak banah nidang tawh teh in lampi ah gari tai tamlou hi. Inter-state/inter district passenger service banah van pua Truck te’n nasep khawlsak uh a, bandh ziak in Thoubal leh Bishnupur-te ah dawr leh dukan kikhak mahleh singtang bial ah bandh omlou tawh kibang hi’n gen uhi.
FHW interview nawngkai
Imphal, Sept-21: Lamphel a Medical Directorate Officer ah Female Health Worker lakna dia Interview hun ah nawngkaina om a, candidate tamtak te’n recruitment process khawlsak ding phutna in Medical Directorate luhsawm uh hi’n kigen hi. Dept. Chief leh Official-te mi deihsak tuam telkhiak-te Admit card piak hi uh a, a dang-te short list a telsak hi a, Hill district a candidate hunkhop te’n admit card nei mahle uh office sung a thuneite’n a min uh short-list a om kha lou a chih ziak ua thawn kik uh hi’n kigen hi. Candidate te’n form fill-up sa a piak lut uh dept. official-te etchet nung a leng admit card tang lou tamtak om banah short-list ah candidate-te a tel thei uh tungtang ah dotna bawl uh a, candidate 70% mu-te leng merit list ah omlou uh a, Medical Directorate te’n diklou tak a Admit card hawmkhiakna a sai ziak un Interview khawlsak ding ngen uhi. Huai tawh kisai in Manipur Press Club a press conference om a, huai ah Longjam Eliza Chanu in Interview na ding a application form pelut mahleh admit card mulou a, post 155 lakna dia mi 1660 val in apply mahle uh mi tamlou in admit card mu uh a, admit card mu khenkhat te’n sum Rs. 500 ( ST-te a dia Rs. 300) a piak nung un Interview ni in shortlist lakah amin uh tellou chi’n kiksak uh a, rejection list suahkhiak hilou hi’n leng gen hi.
RK Maipaksana Journalist Fellowship
Imphal, Sept-21: RK Maipaksana Memorial Trust in kum tamlou paisa akipan RK Maipaksana Journalist Fellowship a piaksek uh tukum in leng piaksawm uhi.Huai ngahthei ding in kum 2015-16 sunga 1)Human Rights, 2)Communal Harmony, 3)Women and Children of Manipur, 4) Soprts in Manipur, 5) Art & Culture and Films of Manipur leh 6) Rural Reporting tawh kisai news leh feature a suah working journalist-te’n submit dingin theisak uhi. RK Maipaksana Journalist Fellowship ngah dinga telkhiakte’n kha tengin Fellowship Rs. 3,000/- ngah ding uhi. Huchibang fellowship ngahte’n kha tengin news hiam feature 2tan a suahkhiak ding uh chih ahi hi.
PET paizom zel lai ding
Imphal,Sept-21: Manipur Police deptt a Constable (Civil/male) 2000 lakna dingin Aug 30, 2016 akipan Pangei a Manipur Police Training College ah Physical Efficiency Test(PET) om paizom zel hi.Imphal West district a candidate-te adingin Sept 19, 2016 in PET kipan hi. Huai ah candidate 627 tel uh a, Sept 22, 2016 tan sunzom ding uhi.PET ni a teltheilou district tuamtuam a candidate-te adin hun thak bikhiahsak hilai ding hi.
Tripura CJ di’n T Vaiphei kichiam
Agartala, Sept-21: Tripura High Court a acting Chief Justice, Justice Tinlianthang Vaiphei tunitaklam in Chief Justice len di’n Agartala ah kichiam hi. Tripura Governor Tathagata Roy in Raj Bhavan a Durbar Hall ah oath-taking ceremony hun makaih in kichiamna neisak a, Chief Minister Manik Sarkar leh a cabinet pihte banah high court a justice dangte leh, civil leh security lam a top official-te’n swearing-in-ceremony hun uap uhi. Justice Vaiphei in 1980 vel apan Manipur ah Law zil in minhoihna tamtak angahte ziakin, Gauhati High Court ah July 2003 apan Additional judge dia guan in om a, Tripura High Court a Chief Justice len masapen Deepak Kumar Gupta khengkhia hi. Deepak Kumar Gupta ahihleh May 2016 in Chhattisgarh High Court a Chief Justice len dia suankhiak in om hi.
Huai banah, Mizoram a Law Minister Lalsawta in tuni’n thusuah abawlna ah, Tripura Chief Justice ding a appointment ngah Justice T Vaiphei kipahpih ahihdan gen a, hibanga mawhpuakna sangtak alet kipahpih petmah ahihdan taklang hi.
Khentuam nei a vaihawm hi'n ngoh
Imphal, Sept-21: BJP MLA Kh. Joykishan in Manipur Assembly a Speaker Th. Lokeshwor Sing in MLA khenkhat tungah anti-defection law tawh kisai a khentuam nei a vaihawm chi’n ngawhna bawl hi. Hiai thu tawh kisai in media-te tawh kimuhna hun ah Speaker in Anti-defectin law gupna in case khenkhat hun sawtpi koih dap a, MSCP a MLA 5-te tungah anti-defection law tawh kisai hunsawtpi ‘reserve’ in koih a, huai banah Trinamool Congress a MLA 4 leh LJP MLA 1-te case leng hunsawtpi koih khamkhol (reserve) a koih hi’n gen hi. Aman agenzelna ah Speaker in party nusia MLA-te tungah qualify/disqualify ding tawh kisai a assembly term bei ding kuan tan a thutanna a bawl louh in elected MLA khenkhat te’n Anti-defection law kalhna ding in hanthawn a, Speaker in kha 6 sung a thutanna a bawl ding hi a, India gam sung a Assembly tuamtuam te’n anti-defection lawh tawh kisai kha 6 sang a sawtzaw koih neilou uh a, October kha akipan Speaker in dan a kalh lai leh BJP te’n kiphinna pan ding uh hi’n leng taklang hi.
TUNI THUPI:
“TOUPA aw, pathiante lakah nang bang kua a om a,! Sianthouna a thupi, phatnate a lauhuai, thil lamdang hih ah, nang bang kua a om a?” – Eksodas 15:11
EDITORIAL:
Smart city leh i poimawh
Centre government in zanzek mah in India a Smart Cities dan(phase) 3na ding ‘third list of smart cities’ puangkhia a, huai ah Meghalaya state Shillong leng smart city te’ laka 3rd phase adia guan hidia gintak himahleh a tel khaklouh ziakun khase sim mahmah uh a, huai lawhsapna pe’n sapte thugendan in ‘Shillong missed the bus’ chihtheih in om hi.
Bangziak a centre government in Nagaland khawpi Kohima leh Sikkim khawpi khat Namchi kichi India malsuah(Northeast) bial akipan smart cities dinga telkhia uh hiam chih dotna poimawhtak suak thei hi.Huchi kalah Kohima leh Namchi mipite kipak mahmah uh a, hibang hamphatna eite’n ngah lehang leng i kipak ding chih haih vual hilou mah hi. North eastern region hun paisa in nelhsiah in ana om sek a, khantouhna himhim mipi vantang in a hamphatpih khak tawm mahmah hi. India Map i et chiang in bottle neck ahihkeileh, chicken neck chih mun akipan suahlam India a omte i hi uh a, West Bengal tawh kizom leh kigamgi a omkha Northeast region kipan phet hihang.
Prime Minister Narendra Modi makaih in Smart Cities Project a list tuamtuam takkhiakna ah Imphal leng om kha zenzen a, kipahuai mahmah chihtheih hi. Smart cities in bangteng huamkha ding chiam chih bel i theikei a,mipi vantang adingin hamphatna thupitak om ngei dingin leng lam-et theih hi. Thudang khatin a taklatna ah Meghalaya Urban Affairs Minister Ronnie V. Lyngdoh in smart cities project pailel pe’n 50:50 ahihkeileh 80:20 funding pattern himaithei chi hi. Ei mi mawlte’ ngaihtuahna ah bangchibang in thil hong paiding hiam chih theihphak hilou hi.
Nagaland khawpi Kohima leh Sikkim a Namchi khua smart city a third phase a puankhiak ahih uh kipak petmah uh a, government akipan sum a crore hunkhop zang in a khawpi uh puah ding uh chihna hi himhim ding hi. Centre in a patkhiak thiltup sepkhiak ahihleh state capital telin khawpi tuamtuam puahna dingin centre government in 90% seng ding a, a kisaipih state government in 10 % seng ding hi. India malsuahbial ah khawpi bangzahhiam puah in om mahleh tua khawpi puahna pe’n bangtan ah hong lawhching ding hiam chih genkholh theih hilou hi.
Adiakin India malsuahbial ban ah central India a om tuamtuam ah Assembly election nai mahmahta a, tua etna kawm a North East Corridor banah Act East Policy et na kawma Prime Minister Narendra Modi’ Government in thiltup thuktak neikawm a policy tuamtuam pankhia ahizaw uhiam chih leng theihbut hilou hi. Kohima leh Namchi mipite adinga kipahna thupitak ahih lai in a kinep huai mahmah Shillong khawpi mipite ading in bel nguihuai mahmah ding in gintak huai hi.
Khawpi ding in khua hunkhop siam/bawlkhe ni, himahleh, tui, water supply, road and transport telin etkhiakna ding tamtak om hi. Mipite’ damtheihna a masapen hi henla, bangchibang a pupa khang apan khawsa i hihiam chihte ettouh detdet hileh deihhuai hi. Smart city bawlkhiakna dingin mipite’n i niteng poimawh uh kiphamawh masapen gige ding hi.
Kum nawn 2017 in Manipur ah assembly election om ding a, tua hun chiangin bang party hatpen a ding hiam chih theikhang, himahleh, smart city tawh kisai project a paisuak deihhuai mahmah a, tua tungtawnin Lamka leng smart city dia guan theihna lampi a om thei diam chih etzui dingin deihhuai hi. I gam in mi chitak poimawh mahmah a, mipite’n leng i palai ding un mi muanhuai i kitasam uhi. Centre government in smart city dingin 3rd phase result puangkheta ua, tunung hiam kumthak lam in leng puankhiak behlap zel ding un gintak huai hi.
Ahih ziakin tua dingin election politics kigolhlou a i telkhak theihna ding lampi sialni chi ut leng ihi uhi. Smart city adingin koikoi ah flyover bawl a poimawh dia, traffic tawh kisai hun paisa in i gengen a, traffic diversion leh inner road leh outer ring-road tanpha igelh mun mahmah hi. Smart city i neih theihna ding hialin zaw eilawi in i mamawh uh tamlaw lai veh aw maw, chih theih hi.
No comments:
Post a Comment