PhualvaTimes - Information for All: September 2013

Saturday, 28 September 2013

Pastor H. Jamkhanpau thumna ziakin Cancer vei B Khenthang damsiang

Pathian gam nasepna a muhtheih a thiltungte laka chiamteh tham mahmah thiltung khat ah, Pastor H. Jamkhanpau, Local Pastor, EBCC/ G. Mualkawi thumna tungtawn in Cancer vei, Mr. B. Khenthang h/o Vungnemkim of Bethel Veng damkhia hi’n kigen hi. Pastor thumna tungtawn a natna lauhuai akipan damsuah, B. Khenthang in agendan in, May 2013 velin Cancer vei a, himahleh Cancer ahihlam theikhe pahlou in hun sawttak inn a etkol in om hi.

Huchih lai in damsuah theilou a, ataksa chau hiaihiai in Imphal lam ah va ki-ensak uhi. Imphal ah kha khat sung vel etkol in om a, huaimun ah leng hoih thei tuanlou in inn ah hongkik hi. Huainung inn ah sawttak etkol a om in chau hiaihiai a, himahleh Sept 18 in Pastor H. Jamkhanpau leh Upa H. Tualthang vahoh in thumna neihsak ua, Pastor H. Jamkhanpau thumna neihzawh in lamdang takin Pathian thilhih theihna in hihdam ahihdan gen hi.

Mr. B. Khenthang in huai natna apan damna angah ziakin atheikhate’n lamdang sa in Biakinn tuamtuam ah testimony gen dingin chial uh a, amah leng EBCC Zoan compound sunga om in saptuam a mi kizang mahmah hi’n kigen hi. Tulelin ataksa hat naikei mahleh Cancer akipan damsiang vilvel hi’n kigen hi.

Pastor H. Jamkhanpau in tangthupha puanzakna in nitak mite lup khit ding kuan in, paungaihna zang in Pathian thu gen zel a, khawtang a buaina thuakte counselling neihph zel in, setan nasepna thilte ah buaina neite'n vanaih zel uh a, tulai in Lamka leh akim vel ah kizang mahmah hi'n kigen hi.