YPA GHQ makaih in tulai in gamsung buaina tawh kisai leh Tribal Movement tawh kisai in Khua leh Veng tuamtuam a YPA Unit te vehna nei uh a, khotang kisesa tunding thak nawnna ding thu tuamtuam te YPA makaite'n mipi lak ah gen uhi. Tunitakin YPA Central Lamka ah Awareness Programme om hi. Hiai hunte ah JAC Against Anti Tribal Bills te'n mipite lak ah sinsakna pe zel uh a, Lamka buaina thiltungte leng Video suahkhe zel uhi. "Heutu hoih hihtheihna di'n in mipite ma ah kalkhat-kalnih suan ngai a, tuhun a i buainate, heutute thulimlouh gah hi'n ka mu ahi, abiktak in ei Paite nam hi Phunphun kawm a heutute chih zuizui mi i hi, chi'n S. Chin Ngaih Pau, President, Young Paite Association, General Headquarters in gen a, August 31, 2015 akipan in lam-et phaklouh in Pathian in, kuapeuh lungtang ah gam-le-nam itna honpia in, aneu-alian in gam itna lungtang kineita, chi hi. "Tutung buaina hi Paite namte buaina vuak hiam chi in Social Media ah nial-kalh siam te pawl in dotna tampi abawl uh a, hiai tawh kisai in Paite namte buaina hiam hilou in Ccpur district pumpi, tribal teng buaina ahi chih i theihthak uh deih huai hi. Unity chi in i paitou tou a, himahleh kha 3, kha 4 hong lut chiangin, a inntek lou zawdeuhte a hong tawl uh a, a gil uh hongkial a, a inntek lou zawdeuh na-na-na-chu hong tawl in hong tawldam ut uh a, himahleh amaute a khawl suak ut hilou in a inntek taktak louh ziak uh ahi. Ei a inntek taktak te'n pan hoihtak a i hon lak leh, ei en in i tenkhawmpih u-le-nau te'n i phakna chiang chiang hong zui ding a mansa a om uh chih i thei ahi, tua ahihman in, ei a inntek te lungke maimailou ding in gam-le-nam itna thupi a i neih tawh kiton in i kihasuan uh ahi" chi'n YPA GHQ President in tulai tribal movement dinmun kamteh hi. "Singtang khuate ah kidot masak omlou in pawlkhat te'n YPA Unit, kum tamtak a omsa teng beisak uh a, tuate zong khatvei ni chiang in dinsuah thak i lam-en hi" chi a, mipite'n lungkelou a kalsuan ding in chial hi. YPA mi-le-sa te'n phattuam ngaihna khawlsan lou in theihtawp suah a pang ding inleng YPA GHQ President in mipite chialna bawl hi.
"YPA Unit omna teng ah tuahsia tuak, liam-le-bai tuak a om leh taisan mailou a, a liam-abai te kep a, damdawi inn tut ding, midangte hihdan a gari khetsiat a haal ding chih YPA te'n chiin hetlou ding ahi, YPA omna munmun Accident te adia bitna, lungmuanna mun ahihding ahi" chi'n leng gen hi.
CLICK TO ENLARGE PHOTOS
