Manipur Express | May 28, 2013

Manipur Express | May 28, 2013

HEADLINES:

Numei te’n pasal-te sangin hih hoihzaw uh

CBSE in Class XII examination  result puang

New Delhi, May-27: Central Board of Secondary Education (CBSE) in Class XII Examination 2013 result tuni’n puangkhia  a, student 82% val deuhin pass uhi.Tukum in leng kum paisate mah bangin numeite’n pasal te’ sangin hih hoihzaw uhi. CBSE nuaia centre om tengteng et in numei mah tallang zaw uh a,examna atel  candidate 9,44,721 lak ah numeite 87.98% in pass uh a, pasal-te 77.78% in pass uhi. CBSE nuaia Region omte  lakah  Chennai Region ah a pass zah tampen a, candidate-te laka 91.83% in pass chih ahi hi.

Tuni a CBSE thusuakin  a gendanin India gam pumpi uap in Class XII result puankhiak hi a, candidate-teng laka pass zah 82.10%  tung a, a pass zah kumlui 2012 a sangin 2% in sangzaw chi uhi. Tutung a examna atel candidate leng kumlui 2012 sangin 15.81% in tamzaw hi.

Top 20 adia ‘cut off score’ kibawl dungzui in general ading 391 tungban chi uh a, OBC te’ adingin 389, SC 350 leh ST adingin 338 chih ahi. Tukum 2013 apan CBSE nuaia class XII a top ranking 20 tan in a ut ua leh entrance test maituah selou in Indian Institute of Technology (IIT) ah admission muthei ding uh chih hi a, ahihziakin, hiai tawh kisai official notification bangmah muh hilou hi.

27-Sector A/R a First Lady  in panpihna pia   

Lamka, May-27: Widows’ Welfare Association. Asia kiphutkhiat nung kum 4 chinna tuni’n zang uh a, tuni zingsang  dak 8:30 in 27-Sector, Assam Rifles camp ah Mrs Nidhi Madan, First Lady of 27th Sector A/R in Widows’ Welfare Assn. Asia-te tawh kithuahkhawmna nei in deihsakna thilpiak tuamtuam leng pia hi.

      Mrs Madan in pasalte  tawh omkhawm nawnlouh ziaka kuamah kingaise mailou a,  tate hoihtak a etkol touh thil manpha  hi a genkawm in  mahni tate enkawl tou lehang tunung a hong vak leh enkoltu amau hiding uh chi’n gen hi. Maban ah meithaite’n Pathian muang kawm leh belhpen a nei ding leh thil bangkim Pathian khut a om ahihziak in thumna tawh pang in kuhkal taka tate enkol dingin hasuan hi. Aman a genbehna ah  27-Sector A/R te’n meithaite poimawh leh taksap omte  panpih dinga mansa hi gige chi’n gen hi. Mrs Nidhi Madan  in Widows’ Welfare Assn, Asia-te adingin panpihna thilpiak  -chini, antang, bawngnawi, sathau leh dal ban ah a sum in Rs. 5000/- pia hi. Tuni a Widows’ Welfare Assn Asia te’n Songpi a Maicham mun, Mission Compound Centenary Hall, Prayer Mountain leh Hengkot mun phakna dingin  27 Sector A/R te’n Bus 2 zangsak uhi.

Free Public Medical Camp kipan  

Lamka, May-27: Jewish Voice Ministries International (JVMI)-te’  saina in Sielmat Christian Hospital ah tuni apan May 31, 2013 tan daihding ‘Free Public Medical Camp’ kipan a, gam tuamtuam 4 apan doctor leh nurse 36 ban ah Imphal leh Lamka apan doctor hunkhop in kithuahpih in  damloute ending uhi.

      John Pudaite in a genna ah Jewish Voice Ministries International in kum 2010 apan Sielmat Christian Hospital ah kum tengin Free Public Medical Camp neizel uh a, tutung a tawh sim in a 4veina hi’n gen hi. Aman a genzelna ah Free Public Medical Camp tuni a kipan himahleh damlou ki-ensak ut mi tam mahmah a, ticket lakkholh theilouh ziakin akuan masa dungzui a ticket kipia hi’n gen a, Medical Camp neih  sungin damlou 5000 val et sawm uh hi’n gen hi. Free Public Medical Camp ah damdoi a manbei in pia uh a, mitlam buaite kiang ah mitbulh(spectacles) leng pia uh a, tuni in leng  damlou tamtak en uhi.

DC leh ZEO in pekhia

Lamka, May-27: SSA-RTE, IED saina in tuni zinglam  inCCpur H/S campus a  SSA Resource Training Centre ah Children with Special Needs-te adingin vanzat tuamtuam pia uhi. Huai ah Maniram Sharma, IAS, i/c DC khuallian in pang a, Chief Host in Joseph Lalrothang, ZEO/CCpur pang a,  amau’ naupangte lakah vanzat tuamtuam pekhia uhi. Maniram Sharma in agenna ah tuni a panpihna piak a om naupangte’ nu-le-pa te’n special trained teacher-te hilh kia sen mailou in  inn ah nu-le-pa te’n leng hihtheih tantan a sinsak poimawh hi’n gen hi. Children with Special Need-te’ school kia kaisakmai lou in  school danga student-te lakah kaisak hileh student-te’ lungsim bangbang  nei ding uh  chi’n gen hi.

     Tunia kihawmkhiate wheel chair  8, wheel chair with clutch 8, hearing aid 40 leh white cane 2 hi a, student khenkhat a exam ziakun latheilou uh a, huaite’n office ah laktheih ding hi’n kigen hi.

Congress worker  30 sihna thu NIA in suizui kipan

New Delhi, May-27: Chhattisgarh Pradesh Congress Committee Chief Nand Kumar Patel leh a tapa Dinesh Patel  telin Congress leader-te convoy a  pailai zanhal in Maoist te’n bomb leh galvan hoihtaktak zangin  mi 30 vel that uh a, thiltung tawh kisai suizui dingin tuni in New Delhi apan National Investigation Team (NIT) te Chhattisgarh tung uhi. Nand Kumar Patel leh a tapa’ luang  Raigarh ah tuni’n zahna liantak tawh hal hi uh a,  mihing asang asim paikhawmte lakah khitui-naptui nul muh ding a dimin om   uhi.

Kumar leh atapa telin mi 30 te’n  Kiginni paisa in  Sukma khawpi a lamlian zuidia kisa convoy pailai Maoists te’n bomb akam uh puakzak sakin huai tawh kiton in  galvan hoihpipi zangin bukap uhi. Huai hunah Congress makaite alompi in liam ua, misi kibehlap tou zelin tuni chiangin mi 30 vel sita chih ahi hi. Congress in Chhattisgarh state ah Parivartan Rally a neihlai tak uh ahi hi. Tuni a pata-te’ luang koihkhiakna hun ah Congress Vice President Rahul Gandhi telin top Congress leader hunkhop in uap uhi. Misite’ lakah CLP leader Mahendra Karma,  MLA-lui  Gopichand Madhwani, Manoj Kumar, Chandrabhan Dhruv, Rajesh Chandrakar, Yogesh Sharma, Alladhoor, Emanual Kerketta, R. Ashok Kumar, Praful Shukla, Abhishek Golcha leh Ganpat Nag tel uhi.

Thudang kizadanin, Chhattisgarh a thiltung suidingin NIA teamte tuni in Chhattisgarh khawpi Raipur tung uh a, huai apan paisuak in bomb puahna mun  enkhia  uhi. NIA team in political party worker hiaizah thah a om theihna ziak bangchidan hiam chih  a suizui ding banuah centre force-te’ ginatlouh ziak hia ahihkei leh state govt? chihte ngentel takin suiding uhi. Union Minister of State for Home RPN Singh in agenna ah centre govt in  thiltung  ngaikhawk mahmah in, akigolhkhate matkhiak hi ngeingei ding leh  atung uah dan tawh kituak gawtna piak hiding chi hi. Centre in thiltung a ngaih serious mahmah ziakin state sung a security omsate behlap dingin sepaih battalion 30 (30,000 personnel vel) Chhattisgarh ah sawllut hi.

Maoists cadre te’n Congress worker te ambush abawlna ua mi 30 site lakah PCC chief Patel, a tapa Dinesh, Congress leader Mahendra Karma, MLA-lui Uday Mudliyar leh midang tallang hunkhop si uh a, Union Minister lui V C Shukla telin mi 32 liam in, Shukla dinmun leng lauthawnghuai mahmah chi uhi. Hibangkalah, tuni in  Union Home Ministry in state tuamtuam a home department  te’ kiangah a state sung ua political party leader-te venbitna khauhsem pedingin theisak hi.

LOCAL NEWS

Health Minister in hong ding 

Lamka, May-27: Pearsonmun a ICAR mun ah May 31, 2013 zinglam dak 11:00 in Krishi Vigyan Kendra, CCpur Administrative Building thak hon hiding a,Health Minister  Phungzathang Tonsing khuallian apang in hong a, Guest of Honour in Vungzagin Valte,  Parliamentary Secy ( Hort & SC, CADDA) pang ding hi. Huai hun ah  Dr J.S Samra, CEO, National Rainfed Area Authority, Planning Commission, Govt of India leng tel ding ding hi.

CBSE ah sangtakin lawhching

Lamka, May-27:  Sylvia Hauzoukim Munluo @Zounu d/o Lamkholun Munluo of Singngat in Kerala CBSE nuaia Class-X 2013 result suak ah 95% vel mu in sangtakin lawhching a, Singngat khua ah hibang lawhchinna ngah a om ziakin khawsung hausa-te innkuan in  kipahpihthu puang uhi.

SDPO/CCpur in join nawn

Lamka, May-27: CDSA saina in Feb 1, 2013 sunnung in Lamka Public Ground ah “2nd Integrity Leaders’ Football Tournament, 2013’ kipan a, Feb 5, 2013 in football kimawlna a tel S.David Biaklian, MPS SDPO/CCpur in akhe hihliam kha in operation bawl ngai hial hi. Operation neihzawh nung ni 100 a tawldam nung damsiang  in tuni’n a sepna join  in  office kai nawnta  hi.

School tuamtuam enkhe ding

Lamka, May-27 ‘Residential Training out of School Children’ kichi tulelin school bangzah hiam ah pailel a,  ZEO/CCpur in training munte enkhe dingin May 28, 2013 in Lamka apan zinkhe ding a, May 31, 2013 in Lamka hongtung nawn ding hi. Residential Training neihna munte Vumhao H/S, Tuilaphai; Thanlon H/S; Senvon H/S, Pherzawl H/S leh Parbung H/S  hi a, ZEO in a totkhakna khuate a school omte leng inspection bawl din  kigen hi.

General Tintong statue honna

Lamka, May-27: Kuki Army a Commander-in-Chief(C-in-C) mawhpuakna len ngei General Tintong Haokip theihgigena dingin Lamka apan km 6 a gamla, Suongpi khua ah ‘General Tintong Memorial complex’ bawlkhiak hi a, huai complex sungah tuni zinglam in P.S. Haokip, President, Kuki National Organisation(KNO) in statue kibawl hong hi. General Tintong in March 1917 a Jampi khua a British sepaihte tawh kihouna om hun ah British tawh kidou ding leh mahni gam vengbit dinga thupukna abawl tawh kitonin  “KUKI RISING 1917-1919” piangkhia chih ahi hi. 

Bike in nungaknou phuliam

Lamka, May-27: K. Gracy Chiinneihoi (16)  d/o Paolal of K. Lhangnim zan nitaklam dak 5.00 velin  Khengjang apan gamlalou Lhangnim village ah lampi a pailai Pulsar in a kawng(waist) a phukha in ataklam pheipi guh kitan a, bike hektu in dist. hospital ah pawtung in admit uhi. Gracy Chiinneihoi tulel in  Salt Brook a student hi a, tuni a Class-IX exam ding himahleh dist. hospital a admit in om  hi. 

Lailam-lui ah vok pul kipai

Lamka, May-27: PKT Street area huamsung Lailam-lui ah vok pul leh a sisa luang kipai deuh gige a, a gimsiat luat banah mihing damtheihna adia leng lauhuai ahihman in tuban kuama’n Lailam-lui ah vok pul leh gan sisa painawnlou ding in PKT Street Development Committee in theisak uh a,theihkhiak leh matkhiak a om leh action khauhtak lakkhum hiding a, kuama’n bangmah a gen theikei ding chih thusuah bawl uhi.

Suunna

Chiinning Guite (75) of Khominthang, New Lamka in tuni nitaklam dak 2.40 in khawsik in  si a, May 28, 2013 in New Lamka YPA Hanmual ah kivui ding hi.  

T Munglianlal(23) s/o T Khaikhomang, Chief of Pearsonmun  damlouh ziakin tuni zingsang dak 7.00 velin si a, tuni mah in Pearsonmun hanmual ah kivui hi.

Sub Maj. L. Kam Kho Pau (75) h/o Lam Cing of Gou Cin Khup Veng, New Lamka zan nitaklam 3:00 velin awmna in si a, tuni’n CYA Hanmual ah kivui hi.

IMPHAL NEWS

Nehru sih champha 49vei na zang

Imphal, May-27: India a India Prime Minister masapen Pandit Jawaharlal Nehru sih champha 49veina tuni’n BT Road a  Congress Bhavan ah zat in om hi.Huai ah Deputy CM Gaikhangam, senior congress leader leh worker tamtak paikhawm uh a, Nehru zahna in a limlak ah pakkhi tamtak koih uhi. Deputy CM in a genna ah damdoi khamtheih zuaka kipeite  khauhtak a dou hiding a,  govt. in van leh gou a neihteng laksak theihna  ding dan(law) bawl ding hi’n gen hi. Govt tawh kihouna nei helpawlte’ omna ding  govt. in gam acre 100 sanga lianzaw leikhiak sawm hi’n leng gen a, helpawl tuamtuam in leng galvan koihkhia a, govt tawh kihouna lampi tawnzaw dingin chial hi.

 

ATSUM inntekna in ‘Consultative meeting on

Preservation of Tribal languages’ om ding

Imphal, May-27: All Tribal Students’ Union Manipur(ATSUM) inntekna in  ‘ Consultative meeting on Preservation  of Tribal languages’ kichi June 1, 2013 zinglam dak 11.30 in Chingmeirong a Tribal Research Institute ah om ding hi. ATSUM President Thangzamuan Tombing in keynote address gen ding a,huaizawh in ATSUM President-lui Ramthing Hungyo in thugen ding hi.Consultative meeting ah Resource persons in Dr R. Sanga leh Dr Gina Shangkham pang ding uhi. Kikupkhawmna in zui ding a,huaizawh in recommendation bawl ding uhi. Hun khakna hun ah ATSUM General Secy Vareiyo Shatsang in vote of thanks gen ding hi.

Eviction drive ziakin Mass rally pai

Imphal, May-27: JAC Against Forced Eviction of Naga River Lane pawl saina in State govt. in Kabo Leikai lak  force eviction a bawl mawhpaihna in tuni’n Mass rally pai uh  a,  Chingmeirong a Dewlaland area apan kipan khia in Capitol project tawn in Chingmeirong a Manipur Baptist Convention(MBC) Recreation Centre tungkik uh a, huai mun ah awareness meeting leng nei uhi. Huai hun ah Wungshim Zv, Chairman – Naga River Lane; Aram Pamei, President – Naga Women Union;  R. Daniel, Advocate; Y. Nabachandra , President, UCM leh M. Tolkon, President, Tribal Youth council te’  tel uh a, meeting ah thupukna  7 la uh a,  huaite’ lakah May 20, 2013 ni pen ‘Law breaking Day by the Govt. of Manipur’ chih minvuah ding, Govt. in Kaboleikai/Naga river lane a eviction a bawlna ua thuakkha mipite’ a omna mun ngeimah uah a omsak nawn masiah uh JAC pawlin kiphinna tawpsanlou ding uh hi’n leng taklang uhi.

 

Naupang kum 2vel ding mi sual

Imphal, May-27: Heirok Part I a Heituppokpi area a om N Boicha Singh (16) s/o Shyamkhumar of Heirok Part I in zan in numei naupang kum 2 ½ vel ding khat sual(rape) hi’n kigen hi. A kigendan in naupang’ pianna nu in naupang pen ningkitel a om banah nidang tawh a omdan kibang salou in hoihtak in velchian a, nitak dak 8:00 velin a tanu rape a om chih theikhia hi’n kigen hi. Thiltung zak phetin mipi kipunkhawmte’n mi sualtu Boicha-te’ inn zan nitak dak 11:00 velin va hihsia uh a, amah  kibumang hi’n gen uhi. Mipi kipun khawmte’n misualtute tungah midang in a etton ngamloh ding un  action khauhtak lak ahihkeileh naupang sual omzel ding chi’n patauh thu  gen uhi.

 

BJP in Congress- te’ thugen nial

Imphal, May-27: Deputy CM Gaikhanngam in zan a ‘One Day Political Conference’ ah Manipur a Opposition party-te’n minthanna ding lel zong  a nasem uh, party khenkhat in office nei mahle uh kum 10 sung in Assembly election hun ah vote bangzah mah mulou  uh a, mipite ading  na aseplouh ban uah a si tawh kibang in Congress party gensiat a nasep uh ahi, chih a gen BJP Manipur Pradesh  spokesperson Y. Nilamani in Deputy CM thugen nial in Congress party apan Chief Minister 2 in kum 11 vaihawm mahle uh hill area ah sep suah taktak neilou uh chi’n gen a, Hills leh Valley-te’ atuamkoih luatziak un, mipite’ kala kilai natna in beilam nawt hi’n gen a, Centre govt. in work  a piakte’ semlel uh hi’n gen hi. UNA

Mipi tamtakin panpihna pia

Imphal, May-27: Tutung HSLC examna result suak ah  Pukhrabam Julia kichi  pauthei lou(dumb) leh bilngong(deaf) himahleh subject 4 ah letter mark mu in Manipur pumpi ah Philosophy subject a mark tam mupen hi a, amah hinkhua tanchin  theikhate’n pangpihna tuamtuam pia uh hi’n kigen hi. Minister 2 in July 2012 in hearing aid leh Social Welfare dept. in huhna peding in chiam mahle uh tunitan  bangmah mu nailou hi’n kigen a, aman ni khat a dakkal 20 sung lekha sim hi’n  kigen hi. Julia in hearing aids leina ding in Rs 4/5 lakhs kikal poimawh a, mi kiphalte’n hearing aid leina ding pekhawm uh hi’n kigen hi.

JAC in kiphinna khauhsak  ding

Imphal, May-27: Irabanta Meetei pimang ahih ziaka JAC kibawlkhia pawlin tuni’n Manipur Press Club ah Press Conference sam uh  a, huai  ah JAC thupuangtu S. Loken Meetei in May 27, 2012 in Irabanta Meetei pimang in om a, huainung si hiam  koia om hiam chih kitheilou a, hoihtak a suizui ahih nungin NSCN(IM) te  khutnung hi a theihkhiak hi’n grn a, himahleh NSCN(IM) pawlin amau custody a Irabanta kichi omlou hi’n  gen uhi. NSCN(IM) te’ pimang chih hoihtaka theihchian himahleh  state govt. in Irabanta hutkhiakna dia  pan alaklouh  lungkimlouh thu gen a, State govt. in tukha sunga pan alak keileh JAC pawlin civil society leh organisation tuamtuam  tawh pangkhawm in  kiphinna khauhsem pan ding uh hi’n leng gen  hi