Zomi Revolutionary Army, ZRA Drug Cell pawl in tuni zinglam dak 10:30 vel in Old Bazar ah khamtheih supply a kipei mikhat man uhi. Mat a om ahihleh Ngamkhomang Mate,27 s/o Ch.Jamkhopao Mate of T. Khonomjang, Tengnoupal sub-division, Moreh, Chandel hi a, aman New Bazar leh Old Bazar te ah khamtheih chituamtuam supply zel hi. Mat aom Ngamkhomang Mate apan khamtheih chi tuamtuam No.4 tuun 50, Spasmo Proxivan tang 60, leh Sakol kichi WY tang 70 hi a a sum a tuat in sang sawmthum leh sagih vel man ding phazoua, tuni sunnung lam in Press/media te mai ah haal tum uhi. Ngamkhojang kipuan dan in khamtheih supply a 2vei hong pai pan hidan in gen a, ban ah, a khamtheih laak te Moreh a a laak, Lamka a a lehnih a pung a apiak sawn zel hidan in kigen hi. ZRA Drug Cell in khamtheih doudalna nnasep a neih uh sunzom tou zel lai diing ua, hiai bang a khamtheih supply a kipei mat khiak aom leh a kituahpih bang uh gawtna piak ding chih in gen uhi. Huai lou in tuni a mat aom Ngamkhomang ahihleh, thuhilhna hoih tak a neih ban uah, Lamka a khamtheih zuak dia hongpha nawn lou ding a kichiamna aneih ziak in khahkhia uhi.
xxxx
Rashtriya Madhyamic Shiksha Abhiyan, RMSA, Government of Manipur saina in tuni zinglam dak 10:00 in Palace Compound, Imphal ah State Level Kala utsav 2016 kipan in District tuamtuam apan school tampi tak tel uhi. Hiai Kala Utsav in ahihleh, student/learner ten a talent te uh a lahkhiak theihna ding uh ngimna a sai a om hidan in gen ua, student ten Music, Theatre leh Laam kidemna nei ding uhi. Tunin theatre kidemna neih in om a, himahleh hiai category ah ei district, Churachandpur, apan a tel om lou uhi. Chirachandpur district apan Vimala Raina Govt. High school leh Rengkai Govt. Higher Secondary School te tel ding ua amau ahihleh zingchiang, october 6, 2016 zingkal dak 6:30 in kuan ding uhi. State Level Kala Utsav a tel, Vimala Raina Govt. High School te ahihleh music ah va tel ding ua, Rengkai Govt. Higher Secondary School te ahihleh Laam(dance) ah va tel ding uhi. Programme ahihleh zingchiang in zou ding ua huai ban ah zingchiang mah in kipahman te hawmna leng nei ngal ding uhi. Rashtriya Madhyamic Shiksha Abhiyan, RMSA kichi in ahihleh Class IX apan Class XII kikal enkai hi.
Xxxxx
Khual gam a misi a hong kipuak chiang in, amah ngaina tu leh a sungkuan ten Airport ah na dawn sek ua himahleh lenna ahongtung ma sung in a ngak a om ten, a ngak na ding uh mun a om louh ban ah ki hahsiangna ding leh gilkial' dangtak hun a neek d leina ding a om louh ziak in haksatna tampi tuak uhi. Hiai bang haksatna te ngaikhawk in Young Paite Association, YPA Imphal Block in Civil Aviation Minister, Government of India kiang ah ngetna bawl uhi. Kamlianthang Guite, President YPA Imphal Block apan thu kimu danin, Imphal International Airport ah waiting room kia thamlouh wash room leh canteen te a om louh ziak a mipin haksatna tuak uh hidan a tak lang in, huchibang a mingak a om te' khawlna ding, kihahsiangna ding leh gilkial' dangtak hun a neek di leina ding, airport campus sung a bawl sak ding a ngen in P3 model dan a bawl sak ding in leng ngen ngal uhi.
Xxxxx
District Hospital, Churachandpur ah khalui September 2016 sung in Out Patient Department (OPD) ah ki-ensak mi 9547 om a, Maternity Ward ah naungek 238 piangkhia in, Blood Bank in sisan Unit 97 pekhia uhi. OPD ah ahihleh General ah mi sang 8 leh 999, ANC ah mi 222 leh Neonatal ah mi 326 in ki-ensak ding in ticket la ua, Maternity Ward ah September khasung in naupai 258 admit ahihna lak uah, naungek phik nih tel in nau 238 piangkhia a, huailak ah, pasal 132 leh numei 110 hi a, naupai 5 Hospital dang adia Referred in om uhi. Children Ward ah naungek kha 1 nuailam damlou 77, Pasal 49 leh numei 22 admit hi ua, September kha sung mah in naungek 71 pawtsak ahih lai un naungek pasal 4 in sihna tuak ua, naungek 2 hospital dang a ding in refer uhi. September kha sung mah in Naungek kha khat tunglam 199 admit hi ua, huailak ah pasal 102 leh numei 91 hi ua, naungek 182 discharge a om in, pasal naupang 3, pasal khat leh numei nih in sihna tuak ua, naupang 4 hospital dang a ding in refer in om uhi. Surgical Ward ah September khasung in damlou mi 121, pasal 70 leh numei 51 admit in om ua, huai lak ah mi 7 Imphal lam ah referred a om in midang 108 pawtsak hi uhi. Ortho ah damlou mi 48, pasal 28 leh numei 20 admit in om ua, huai lak ah mundang a refer kuamah omlou in, mi 40 pawtsak hi uhi. ENT ah damlou mi 8, Pasal 4 leh numei 4 admit hi ua, September khasung mah in damdawi inn apan mi 6 pawtsak (discharged) in om uhi. Medicine ward ah damlou mi 270, pasal 140 leh numei 130 om a, huai lak ah September kha sung in mi 6, pasal 4 leh numei 4 in sihna tuak ua, mi 30 hospital dang ah refer hi ua, mi 212 pawtsak in om hi. Blood Bank, District Hospital, Churachandpur ah khalui September khasung in sisan unit 104, voluntary in unit 96 leh replacement in unit 8 thohkhawm in om a, huailak ah sisan unit 97, A positive unit 37, B positive 20, AB positive 31 leh O positive 9 piakkhiak a om in, sisan unit 3 ditkiklouh a piak ahih ban ah, Unit 6 a sianglouh ziak in hihsiat in om hi. Tulel in Blood Bank ah sisan A-Positive Unit 2, B-Positive Unit 9, AB-Positive Unit 14 leh O-Positive Unit 15 omlel hi. Malaria department in September khasung in malaria vei dia muanmoh sisan 1, 925 test a bawlna lak uah mi 10 Positive in, mi 7 Plasmodium Falciparum PF ahih dan mukhia uhi.
XXXXXX
State Bank of India – Rural Self Employment Training Institute (SBI-RSETI), Bijang in tuailai kum 18 leh 45 kikal mite a ding in Trade tuamtuam a ding Free Training asai uh sunzom tou zel in Food preparetion azoh uh toh kiton in hongtung ding october 7 in Embroidery & Fabric Painting training kipan nawn ding hi. Training ding toh kisai kingetna lai pelut te'n zingchiang October 6 office kaihun sung in Interview om ding a, hiai hun a select omte'n october 7 in training class pan ding uhi. Training hun sung in RSETI Faculty CT Lian Guite, MBA in theory class la ding a, Guest Faculty Mangnu Hanghal in partical class la ding hi.
xxxxx
Apaisa September 21, 2016 in Zenhang Lamka Play Ground ah The 2nd Under-16 Late Vumzakhup Vualnam memorial Tournament, 9 Men Soccer, kipan in paitou zel hi. Hiai tournament ah club 20 kihel ua, Pool 4 a kikhen in tunin League match teng zou in zingchiang in Quarter final kipan ngal ding hi. Tuni a League match zohna hun ah, zinglam in FCH leh SFC te kimawl in FCH in 2-1 a zou in Quarter lut ua, sunnung in APFC leh BSSC te kimawl in, BSSC ten APFC ten 3-2 a zou in, quarter final lut uhi. Pool khat apan club 2 chiat lut ua, zingchiang zinglam dak 6:00 in Pool A champion YTFC leh Pool C a runners AFC te kimawl in sunnung in Pool A runners PKTFC leh Pool C champion SMT te kimawl ding uhi. (L) Vumzakhup Vualnam memorial Tournament a Champion in Trophy leh a sum in Rs. 10,000/- sang ding ua, Runners up in Rs. 4000/- sang ding uhi.
XXXXXX
District Hospital, Churachandpur a ward tuamtuam ding Building bawl behna tulai in nasepna paisan lel hi. Western Block, nidang a Children Ward leh maternity Ward a kizang nikum apan Renovation neih aom zohsiang hi phialta a, a kong a Block Extension ding kibawl ahihleh a khuam ding tamzaw tunkhiak in omta hi. Hiai Block Extension ahih leh asawng a bawl hiding a, atung ah lupna 33 leh anuai ah lupna 33 mah koih hiding hi. Nasepna ahihleh Manipur Housing Corporation funding a kibawl hi a, zohsiang ahih hun ding bel genchiang theih hilou hi. Khantouhna dang khat ah Hospital Canteen gei a gari koihna (garage) leng phelkhiak hi a, huai ah taksa kum upate’ ading Geriatric Ward bawl a hihding ban ah asak ah naupang poihlongna neite’ ading District Early Intervention Centre (DEIC) bawlna leng nasep pailel hi. Geriatric Ward ahihleh September 30, 2016 ni a Director, Department of Health & Family Welfare, Government of Manipur in phalna apiak toh kiton a nasep pat aom hi a, asawng a bawl hiding hi’n kigen hi. District Early Intervention Centre ahihleh Manipur Industrial Development Corporation Limited (MIDCOL) etkaina nuai a kibawl hi a, asawng a bawl ahih ding ban ah asung ah naupang' kimawlna tuamtuam koih hiding hi.
xxxxxxxx
August 31, 2015 a Manipur Assembly a Bill 3 ki-passed-te deihlou a mipi' kiphinna khawllou a pai zomtou; tuni in ni 400 chingta hi. Ni 400 a chinni toh kiton in Salpha 9-te suunna leh kiphinna Jantar Mantar a MTFD site ah Niteng a khawllou a paikhawm gige, Indongtate, makaihna in neih in om hi. Huai hun in paikhawmte’n ki-itna ankuang leng sawkkhawm uhi.Lia Ngaipi Dousel leh Pa Pumliankhai-te’n hunpi makaih ua, Upa Khamkhansuan Tombing in Pathian kiang ah thumna in hun latna nei in, Pa Mangno Ngaihte leh Lia Janeth Muang makaihna in mipi’n phatna la sakhawmna om hi. Pa Lian Suantak in mipite vaidawnna leh Movement a bul apan i tunna chiang suut in tulel a Challenges i maituah lelte taklang hi.Pa Sieka Gangte in thugenna nei in mipite khawl mailou ding in hasotna manphatak nei a, Tuazoh in 6th Schedule ngim deuh in thugenna manpha taktak Pu Khatchin Langel, Pu Thangkhanlal Ngaihte leh Nu Dorothy Nem Guite apan ngaihkhiatna om hi. 6th Schedule i chih Manipur a singtangmite adia i tantuan Indian Constitution a kigelhsa ahi a, i phut dingleh i muh ding ua kilawm mah ahihman in lungke lou a i phuut zomzel ding uh, chih gen chiat ahi. Pu Romeo, MTFD Convenor in paikhawm mipite kiang ah khawllou a Jantar Mantar a Protest ana sunzom gigete phat-huai a sakdan gen in Salpha 9-te’n a hinna manphatakte uh itlou a ana pe hilhial uh ahihman in midangte’n i hihtheih khamkham ua i panna uh thupilua ahihlai in; khawl theivual hilou i hi, tawllua leh hahpanlua kichi mailou in kuhkal suah semsem ni, chi’n hasotna leh chouna manphatak nei hi.
xxx
Salpha-te suunna hun Htp. Muan Vualnam in makaih a, salphate kipiakna thupidan suut n mipite kiang ah Pathian hatna muang in Salphate suunna leh zahna in ni 600 chintan Protest sunzom dia kiman kuateng hiam chi’n khut liikna ding hun hong hi. Mi tampi mah in salpha-te zahtakna leh suunna manphapen hi ding chi’n a khut uh liik ua, Tua zoh in mipite’n slogan, ‘Lungtup mualsuahma… Khawllou ding,’ ‘Lungtup mualsuah a salphate… Vuilou ding,’ ‘We Want… Justice,’ ‘ We Want… 6th Schedule,’ ci in kikou uhi. Salphate kipiakna ngaihtuah kawm in Suunna hun zang in mipite minute kha daai dide in om uhi. Salphate zahtakna leh amaute itna taklatna in naupang omkhate mipite mai a dingkhia in, amaute khut apan Candle de vaak chiat uhi. Vote of Thanks Pa Thanglianlal in a genzoh in Upa Biakkhanmang Guite in hun khakna leh ankuang latna thumna nei in, Paikhawm mipite’n annekhomna nei in prog zou uhi.
XXXXXX
Apaisa sept 30 a outer Manipur tribal forum ,OMTF leh joint action comttt against anti tribal bill JACAATB ten joint meeting nei uhi. Hiai meeting aneihna uah, athupukna uh sukbuchin nading in oct 7 zinglam dak 6 akipan dakkal 12 sung Manipur state a tribal te tenna bial ah bandh bawl hiding in thukim uhi. Hiai bandh in nitaklam dak 6 tan daih ding a, state sorkal in a bill draft thak non local people of Manipur bill leh coordinating body of schedule tribe demand commtee of Manipur in schedule tribe stastus alakna uh deihlouhna a bandh bolsom uh hin OMTF leh JACAATB joint meeting thusuak in gen hi. Huai lou in, protection of Manipur people bill, 2015, government in zukkik mah leh, OMTF leh JACAATB in singtangmite hetkha theidi bill thak him2 pom hilou ding inci inleng gen uhi. Hiai bandh hunsung in media, medical emergency , telecom , electricity, airport pick up and drop , kitenna prog, skull eh college exam pailel leh sports, leh programme gelkholhsa a omte huam kha lou ding hin thutut kingah hi.
xxx
WATCH VIDEO
No comments:
Post a Comment