Bolero tuahsia ah Ex-MDC Pu Ginzapau mualliam

Lamka, April-23 (PhualvaTimes): Ngazam ADC (Thanlon sub-division) a 2010-15 sung MDC len, Pu M. Ginzapau s/o Thongkhopau, Elim Veng, New Lamka, tuzing akhualzinna ah atuanna uh Bolero tuahsia in si chih kiza hi.

Thukizadan in Chongkhozou leh Khawzim kikal Tipaimukh Road ah Ex-MDC tuanna Bolero tuahsia in lamkhang ah taikhia a, amun ah Pu M. Ginzapau si hi’n kigen a, thuchian diktak theihchet hinailou hi. 
Tuahsiatna mun apan thukizadan in, Pu M. Ginzapau tuanna Bolero tawh Truck 407 a kipelhna lam uah Bolero pen Kawl ah taikhia a, amah tuanpihte leng gari apan lengkhia uh a, himahleh vangsiat huaitakin Pu Ginzapau gari sung ah koltang kha in, huchin Bolero in delhkhum in a lu kise mahmah a, a mel leng et theihlouh phial hi’n kigen hi. Bolero a tuangte lakah mi khat serious mahmah hi’n leng kigen hi.

Hiai thuzak phetin Lamka akipan mibangzah hiam in Ambulance tawh delh suk ngal uh a, gari driver Mungnou leh atuanpih George Thang bel liam uh a, adinmun uh lauhthawng huailou hi'n gen uhi. Khawzim khawte'n hankuang ding bawllel uh hi'n leng gen uhi.

Pu Ginzapau leh a lawmte ahihleh Khazang hoh dek hiai bang tuahsiatna tuak uh hi'n kigen hi.

Pu M. Ginzapau in 2015-2020 term ading in Ngazam District Council Constituency ah MDC tuh mahleh chinglou a, huainung inleng gam-le-nam ading in theihtawp suah in phatuam ngaitakin pang tou denlai hi.

Tuahsiatna mun akipan aluang hongkipua a, atenna inn New Lamka pansan in zingchiang in kivui ding chih kiza hi.