Wednesday, 29 May 2013

Manipur Express | May 29, 2013

CDPSA te’n Topper Award piaksawm

Lamka, May-28: CCpur District Private Schools’Assn (CDPSA) te’n tuni sunnung in  Lamka Central H/S ah Press-te kimuhpih uh a, tukum a BSEM, CoHSEM  leh CBSE saina a Class X & XII pass-te lak apan  Dist Topper Award piaksawm uhi. June 19, 2012 zinglam dak 11:00 in ‘Dist Topper Award 2012-13 for class X & XII’ piakkhiak hidin gen uh a, amun ding bel puang khe nailou uhi. BSEM saina a class X passed-te’ lak ah Dist Topper Award in Rs.10,000/-, 2nd topper in Rs. 8,000/ - 3rd topper in Rs. 6000/- ngah ding uhi. CoHSEM saina a class XII ah Sc, Arts leh Commerce a topper-te’ Rs. 8,000/- chiat piak hiding uhi. CBSE nuai a  class X a class topper in Rs. 5,000 leh class XII a Arts, Sc leh Commerce a class topper te’  Rs. 5,000/- chiat piak sawm uhi. Tulel in CDPSA nuai ah school 48 omlel hi’n CDPSA makaite’n gen uhi.


HEADLINES:

England ah British army history tawh kisai genkhawmna om
Imphal leh Kohima ah British-te tawh kidouna thupipen 

Imphal/New Delhi, May-28: British-te’n India a opkhum lai ua British army-te douna tawh kisai genkhawmna banah kidoupi nihna (Second world war) hun ah Imphal khawpi leh Kohima a kidouna om pen British army-te’ adia thupipen leh chiamtehtham ahi chih hi a, huai kawmin British leh Japan-te’n kidouna huaisetak aneih hun uah British- te a vualzawh hang un, hun paisa a avaihawm dan uleh India a opkhumdan uh Kidoupi II na nungin chi tuam mahmah in patauhna tawh pumdim uh ahihdan gen in om hi. Japan-te’ adia a vuallelhna upen thil poitak suakin, South Asia gambuppi a opkhum vek sawmna uh beizou hit het hi.
United Kingdom khawpi England a National Army Museum ah British army te’ khangthu sutna leh huai thu genkhawmna om a, huai a a thil muhsuahte uh  British khangthu a kidoupi nihna omlai a Manipur’ capital Imphal leh Nagaland’ capital Kohima a kidouna pen kidouna nasapen leh huaisepen a chiamteh ahi chi uhi. Amateur war researcher Rajeshwar Yumnam makaihin team khat in Manipurs Sadar Hills district sunga mun tuamtuam a fankuasna uah  Kidoupi nihna hunlai a Japanese army post omte muhkhiak in om hi. Motbung area ah kum 1944 in kidouna nasa mahmah in ‘do-or-die battle’ om a, Japan  sepaihte  leh British sepaihte  naktakin kikaptuah uh chih ahi hi. British sepaihte   vualzawh ziakun British sepaihte khut ah Japanese sepaihte kipekhia uhi.
            Motbung area ah Japanese grenades leh empty magazines, nuts, tanks’ crew leh Rifle bullets 30 leng Yumnam leh a teamte’n mukhia uh uhi. British sepaihte’ sulnung suizuitu British teamte’ lakah India mi Yumnam kia telkha a,kipahpihna in British sepaihte’n thilpiak tuamtuam leng pia uhi. Kohima a kidouna  April 3, 1944 in kipan a, Japanese 15th Army kichi sepaih 15,000 vualte’n British sepaih 1,500 vel omte naktakin bei ua, Japan sepaih 10 leh British sepaih 1 kibei uh chihna suak a, kal 2 sung vingveng British sepaihte pangzou ua, a huhtu ding(reinforcements) apai dong British sepaihte pangzou uh hi.
Imphal khawpi a kidouna mulkimhuai tak a om nung kum 70 chinna kum nawn 2014 in Imphal ah theihgigena program neih hidingin Manipur mi Researcher Rajeshwar Yumnam in gen a, researcher dangte tawh pangkhawm in hibang program neih hidinga, tua hun ah  British sepaihte leh Japanese sepaihte’ sulnung banah kidoupina IIna hunlai  a a  zat uh muhtheih dia omlaite leng mipi ma ah lahkhiakna om ding chih ahi hi.



Maoists-te’n hilhchetna thusuah bawl
“Congress leader-te’ tungah phuba la ka hi uh”- Maoists  
Raipur, May-28: Chhatisgarh state sungah Congress convoy-te ambush bawl Maoists pawlte’n tuni in page 4 dimin hilhchetna thusuah bawl uh a, huai ah Congress leader- te’ tungah phuba la ahihdan uh puang  uhi. Amau page 4 dim note a suahkhiak banuah Media-te’ zak dingin audio clipping tanpha khak uhi. Telugu pau a kigelh Maoists thusuakin agenna ah, ka khoih tup pipente uh  Congress leaders Mahendra Karma, Nand Kumar Patel leh V C Shukla hi uh a, huchi lakah mi nautang bangzahhiam  leng a sih  ziakun poi ka sa mahmah ua, a innkuante’ kiang uah ngaihdam ka ngen uh chi uhi.
Kiginni nitak a Congress convoy party-te ambush  hunah Congress leader Karma leh Patel  leng si uh a, kum 84 a upa VC Shukla ahihleh gim mahmah in tu in Gurgaon hospital ah etkol hilel a, a gil ah thautang 3 lut hi. Chhattisgarh’ Dandakaranya region a Maoist spokesperson in agenna ah, Congress convoy attack bawltute  People's Liberation Guerrilla Army( PLGA) te hi uh a, amau gari 25 kizui Congress leader-te bomb zangin khoih masa ua, tua zawhin thau in kikap huan ua, vuahzu tawh kibang mai in thautang leng chi uhi. Patel bel tulel a Chhattisgarh Congress chief hi a, a tapa tawh sikhawm kha uhi. Patel in Chhattisgarh Home Minister alet hunin Maoists- te’ tunga operation omna dingin “Operation Green Hunt” kichi lemsakna pia a, centre force-te’n anti-Naxal operations a neihna uah Maoists cadre tamtak a sih zuakun  hiai phuba lakna ahi chi uhi.
Mahendra Karma thah a hihna ziak ahihleh kum  2005 kum a state Home Minister alet lai in Maoists-te kiakniamna ding ngaihsutna ziakin ‘Salwa Judum’ kichi pan a, huai hunlai a Chhattisgarh BJP chief Ram Singh tanpha in leng Karma kipahpih mahmah a,Maoist te’n bel  a nasep khelh ziaka ‘punishment’ kipia ahi chi uhi. Maoists-te’ hilhchetna lehkha in Prime Minister Manmohan Singh, Congress President Sonia Gandhi leh BJP chief Rajnath Singh te tanpha mawhsakthu puankhum in thiltung tawh kisai genbat ding bangmah a neikei uh chi uhi. Kintakin Operation Green Hunt kichi khawlsak hihen chi’n Maoists te’n theihsakna bawl uh a, Chhattisgarh Special Public Security Act 2005 (CSPSA) leh Unlawful Activities (Prevention) Act 1967 te bawl lemthak hihen chi uh a, jail apanin Maoists cadre om tengteng thunung-thuma omlou in khahkhiak hi hen chi uhi. Maoists-te  ngetna  nawlkhin ahih ngeingei leh thiltung huaise zawsem kuakua hiam in tuaklai ding chi uhi.


LOCAL NEWS

ADC Chairman tuni’n zinkhia
Lamka, May-28: District Health Society, CCpur saina in May 29 & 30, 2013 in  Mualnuam khua ah Health Mela om ding a, May 29, 2013 zingsang dak 6:30 in Langkhanpau Guite, Chairman ADC/CCpur in hong ding hi. Chairman ADC/CCpur leh a teamte ban ah Dr HL Liensang, CMO makaih in Medical teamte gari 10 in Lamka apan kuankhia uhi. Health Mela ah specialist doctor 9 telin doctor 14 in damloute en ding uh a, sisan leh zun(urine) leng amun ah test l ding uh a, X-Ray leng lak hiding in kigen hi. Health Mela hun ah damlou ki-ensakte  manbei in damdoi piak hiding uhi.

SBI/CCpur Branch in panpihna pia
Lamka, May-28: SBI CCpur Branch a Chief Manager S.Kaikhanthang makaih in SBI/CCpur Branch staff te’n tuni’n Mata khua a EBC school naupangte veh uh a,huai ah Chief Manager in school a zat ding in Water Filter 2 leh biakinn a zatding in ceiling fan 10  pia hi.


DI/CCpur in school 2 enkhia
Lamka, May-28: Kaikhanlian Guite, DI of Schools, CCpur in tuni in NKT Aided School leh Lanva Model H/S  enkhia a, AI of Schools  2 in DI zui uhi. School 2 ah student te’n free uniform, free text book leh Mid Day Meal hoihtak a mu  uhiam? school ah proxy teacher om hiam? chih telin thil tuamtuam enkhia uhi.


Patient Care & Public Relation
Lamka, May-28: Dr N.Paulginthang, Medical Supdt, Dist Hospital leh Lions Club of CCpur Greater pangkhawm in May 29 & 30, 2013 sunnung dak 1:00 in Dist Hospital Conference Hall ah ‘Training on Patient Care & Public Relation” om ding a, doctor-te, nurse-te leh NGO-te telding uhi.


Class X passed-te kipahpihna
Lamka, May-28: Mission Veng, Hiangtam Lamka a om Phungkhothang govt H/S te’n zan zinglam in tukum a Class X pass-te kipahpihna leh present piakna program zang uh a, class X passed teng Rev V.Khamthawng in Pathian kiangah thumsak hi. Tukum a class X passed te lak ah 1st divn 1, 2nd divn  18 leh 3rd divn  mi 1  kiangah T.Hanglamthang, Headmaster in English Dictonary leh pak pia a, Chongthangmawi, teacher in ballpen 1 chiat pia hi. Phungkhothang govt H/S ah 1st divn a pass Hoineithem Chongloi in Thadou-Kuki subject ah 90 mu a, Topper of the School a lakziak in Headmaster in Rs. 1,000/- ban ah L.Ibosana Singh, teacher in Headmaster tungtawn in Rs. 1,000/- pia a, Thadou-Kuki subject teacher Nengneilhing Haokip kiangah kipah etsakna in Headmaster in Rs. 500/- pia hi.


Hanmual latna nei uh
Lamka, May-28: Phailien Welfare Committe leh D. Phailien Village Authority  panlakna in  May 25, 2013 zingsang in Kashmir Veng a  hanmual Pathian kianga latna nei uhi. Huai hanmual   thilsianglou  bawlna dinga zangsek a om ziakin khawsung leh mipite adia thilhoihlou tun a, siangthou taka zat dingin Pathian min in lan uhi.  Hanmual latna hunah ordained Pastor 8 leh thaunilh Upa 16 banah Local Comittee member 8  leh mipi tamkhop tel uhi.  D. Phailien hanmual Pathian kianga lat ahihnungin khawsung makaite’n theihtawp suah in  enkai ding uh a,kuaman thanghuai taka zang nawnlou din leng ngen  uhi.


Health leh HIV Awareness campaign
Lamka, May-28: Manipur State AIDS Control Society leh Dist AIDS Prevention & Control Unit saina in tuni sunnung in New Bazar a Bus Parking ah “Health issue & HIV/AIDS Awareness campaign” om hi. Huai ah People’s Arts & Dramatic Assn. pawl in drama lahna nei uh a, mi tamtak in uap hi. May 30, 2013 zinglam dak 11:00 in Ngathal & Thingkangphai ah nei ding uh a, sunnung dak dak 1:00 in Bungmual leh Phailian ban ah nitaklam dak 3:30 in Rengkai Playground ah nei ding uhi. May 31, 2013 in Singngat leh Thanlon  ah neihsawm uhi.


Mr. Satgouhao in Gold Medal 3 sang
Lamka, May-28: Nihon Shotokan Karate-Do Federation of India (NSKF-I) saina a Chiampionship omte ah Satgouhao @ Haobem Khongsai (6) s/o Sehthang Khongsai of Moloi kho, Karbi Anglong( Assam) in Gold Medal 3, Silver Medal 2 leh  Bronze Medal 1 sang hi. Guwahati a Tarun Ram Phookan Indoor Stadium  ah June 6, 2013 in NSKF(I) saina in ‘'7th State Karate-Do Championship'  om nawn ding a, huai ah Satgouhao tel nawn ding chihthu kiza hi.    


IMPHAL NEWS

Central deputation in pai ding
Imphal, May-28: VK Thakral,IAS, Addl Chief Secretary(MOBC & SC), Govt of Manipur in
Ministry of Steel, Govt. of India a Addl Secretary & Financial Advisor len ding in Central ah deputation in pai ding a, huaidungzui in Manipur govt in tuni’n release(khahkhia) hi. VK Thakral in tuni apan Manipur a nutsiat ziakin P.C. Lawmkunga, IAS, Addl. Chief Secy (Forest & Environment) in MOBC & SC tawh lenkhawm ding in Manipur govt in order suah hi.


KNF(P) dia gintakte’n KNF(Nehlun)te buluh

Imphal May 28: United Peoples’ Front (UPF) nuai a om Semtinthang makaih Kuki National Front (KNF-President group) leh KNF (Nehlun)  pawlte kalah hun bangtanhiam paisa apan kituahlouhna om paitou zelin KNF-P designated Camp Commander tanpha kaplup in om a, zan nitak dak 11.00 velin Senapati dist sung Sadar Hills area(Yairipok PS) a Bongbal Khullen area ah kikaptuahna piangin, huaiah KNF Nehlun faction a finance incharge hi a kigen Touthang Kipgen @ Naocha (30) of Bongbal Khullen   liam hi’n kigen hi.  
     Thusuak in a gendan in KNF (Nehlun) pawlte Bongbal Khullen ah muangchangtak a omlai KNF P pawlin valuh in dakkal 4 vel kikaptuah uh chih hi a, khawmite’ gendanin tuni zingsang dak 4.00 tanin leng thauging zakding omlai hi. KNF(N) cadre 15 velin kha 1 paisa akipan  aluah uh hi a, galvan hoih taktak tawi KNF-P te’n luh uh hi’n kigen hi.

 

 

BJP a Vice President len ding

Imphal, May-28: BJP Manipur Pradesh a Executive member Jayadeva Sharma in Vice President, BJP Manipur Pradesh hihna len ding hi’n kigen a, aman mawhpuakna alak hun akipan a dinmun thak len ding chih ahi hi.President, BJP Manipur Pradesh in order a suah dungzui in Jayadeva Sharma in CCpur leh Chandel district incharge hihna a let ding banah BJP Manipur Pradesh a Cell tuamtuam leng enkol ding hi.

 

NSCN(IM) zomthak numei 6 mankhia

Imphal May- 28: Indo-Naga peace talks atel NSCN(IM)  in  cadre ding in numei-naupang lathak uh chihthu agin nung tuni’n  NSCN(IM)  a lut dia kisa numei 6 matkhiak hi uhi. Police thusuak in a gendan in  Ukhrul dist sung a om Litan Police te’n Wahong village ah tuni zingkal in NSCN(IM) alut khinsa, training pan dia kisalel numei 6 matkhiak hi uh a, himahleh  amau’ hihna chiantak taklat hi tuanlou hi.

A innluahte soisak sek ziakin thuak

Imphal May-28:  Singjamei Police station huamsung Akampat area ah tuni in mipite’n inn luahna neitu khat  soisa uh a, bangchidan a a inn luah a omte ngaihsaklou hiam chi uhi. Soisak a om  Gurumayum Ongbi Tombi Devi of Chingamathak Nameirakpam Leikai hi a, a inn luaha om bel Y Mani Singh (30) s/o Y Suranjit of Thoubal ahi hi. Mani Singh leh a innkuante’n Tombi Devi’ inn luah uh a, tu zingin Mani Singh a inn luahna mun ah amah leh amah kithah sawm chih ahi hi. Vengsung mipite’ gendanin huai inn sungah kha 3 paisa in mi 1  amah leh amah  kithat a, tua ziakin  inn neitu naktaka vau in om a, himahleh, thiltung tawh kisai hong kilehkik ding bang a chih ziak un thangpai in tua inn khoihsia uh a, inn neitute’ ginatlouh ziakin mi 4/5 hinna hiai inn apan paisuak dek ahi chi uhi. Thangpai pawlkhat in inn neitu Gurumayum Ongbi Tombi Devi  a khoih manzek ziakun tu in Hospital ah ah etkol in omlel chih ahi hi.

Doctor tamtak in promotion mu
Imphal, May-28: Manipur Public Service Commission(MPSC) phalna pansan in   Departmental Promotion Committee in a recommend dungzui in Manipur govt in  Manipur Health Service(MHS) Grade III officer anuai ate MHS Grade II (Payscale of Rs. 15,600- 39,100 + grade pay of Rs. 7,600 per month dingin kaisang sak hi. Huaite
Non-Specialist posts:
  1. Dr.Usha Devi
  2. Dr.T.Sarat Chandra Singh
  3. Dr. Dilipkumar Mukherjee
  4. Dr. Puspa Rai
  5. Dr. L. Lakhipyari Devi
  6. Dr. S. Sarat Kumar Singh
  7. Dr. M. Hemabati Devi
  8. Dr. P. Paozachiin Guite
  9. Dr. M.B. Salamat Ullah
  10. Dr. Kh. Sakhee Kumar Mangang
Senior Specialist Posts:
  1. Dr. T. Dimamani Singh
  2. Dr. O. Kunjakishore Singh
  3. Dr. Y. Nabakumar Singh
  4. Dr. H. Bidya Devi
  5. Dr. Kamal Kishore Prasad
  6. Dr. S. Divendra Meitei
  7. Dr. Ningyaola Vashum
  8. Dr. H. Baby Chand Devi
  9. Dr. R.K. Khelendra Singh
  10. Dr. K. Komolini Devi
  11. Dr. R.K. Kumarjit Singh
  12. Dr. K. Purnamala Devi
  13. Dr. L. Ashok Sharma
  14. Dr. L. Arke Singh

DU admission ah student te panpih ding

New Delhi, May- 28: Delhi University in thupuan aneihna uah, 2013 academic session kipannawn ding hita a, kum teng in India malsuahbial apan applicant tamthei mahmah chi uhi. Tua ziakin tukum in leng hun paisa mah bangin North East student te’a dingin biik help desk bawlkhiak hiding a, Delhi University nuai a admission zong tengteng in huai help desk ah panpihna va laak theih gige ding chi uhi. India malsuahbial apan Delhi a student organisation tuamtuam om te’n leng university campus ah admission hun chiangin amau chi leh nam adingin helpdesk tungkhe sek ua, tukum in leng tungkhe nawn ding ua, huchi kawmkalah, DU in NE student te’ adingin tuam liauliau in helpdesk abawlkhiakna uh kum 3 chingta ding chih ahi.


FOREIGN NEWS

EU in Syria rebels galvan piak lemsa
 Damascus, May-28: European Union(EU) foreign minister te’n Syria rebels kianga galvan piak theihlouh dinga gakna(embargo) kibawl  abei ding tawh kitonin behlap nawnlouh lemsa uh a, gamdangte’n rebels kiangah galvan pe thei ding uh chihna suak hi. United Kingdom Foreign secretary William Hague in EU thupukna kipahpih kawm in UK lam-etna gahsuah ahihdan gen hi. Galvan piaktheih dinga phalsakna om mahleh EU in rebels kianga galvan pe ding hiam chihte thuchian bangmah puankhiak om nailou a, Russia in EU thupukna deihlou hi. Thusuak dangkhat ah govt. sepaihte kalh a gamtang, Ahrar al-Sham Brigade kichi rebels pawl in Syria leitang apan Islamic state bawlkhiak sawm in panla ua, Al Nusra Front leh Islamic State of Iraq pawl tawh ngaihdan(ideology) kibang nei uhi.  Syria khawpi tamzaw a helna pankhetu  Free Syria Army(FSA) pawlin Islamic rebels dangte tawh ngaihdan kibanglou aneih ziak un helpawlte kalah kituahna keniam hi’n thusuak om hi.


London ah Ugandan general  kibu
 London, May-28: Africa gambup(continent) a Uganda tualsuak, General David Sejusa in President tapa leh army officer khenkhat thahna dinga panla chih ziakin Uganda govt. in mat dingin thutankhum a, huchihlai in bangchi chi hiam in United Kingdom guklut a, British police-te gupna delh in UK ah kibu hi.  Thusuakin agendanin spy chief lenkawm General David Sejusa in UK ah bitna ngah mahleh Uganda ah kiknawn lou ding hi’n kipuang a, David Sejusa laywer Joseph Luzige in huaithu tawh kisai agendanin London khawpi lailung a Ugandan undercover agent te’n amatkhiak ding uh lauhna omlai chi hi. 


Mafia te’n lungsim khek di’n Pope Francis in ngen  
Washington, May-28: Mafia leh mobsters te’n mihing adia hoihlou, kizuak dinga mite bawlsiat leh khawtang dinmun hihbuai thei dinga gamtatna tawpsan a, lampi dik tawn dingin Catholic lubuk Pope Francis in ngen hi. Sicilian Mafia khutlum a Pope Reverent Giuseppe Puglisi thah ahihnung in vuina om a, Pope Francis in Mafia-te kianga ngetna bawl kawm in, kituak taka sualna(organized crime) bawlte’n lungsim khek a, lampi hoihzaw manawh dingin chial hi.  Pope Reverent Giuseppe Puglisi ahihleh Pope John Paul II in Sicily avehlai a mobster-te’n lungsim khek dinga thangpai taka paukam aneih ziaka kaplup a om ahi hi.


No comments:

Post a Comment

Subscribe to: Post Comments (Atom)