Manipur Express | May 30, 2013

Songtal ah Class X & XII passed-te kipahpihna om

Lamka, May-29: 10-Tuivai ADCC sunga Class X & XII  passed-te kipahpihna leh a failed-te siatbatna hun zan nitak dak 5:00 in Songtal  a ZYA Hall ah om a, mi poimawh tamtak in uap uhi. Huai  10-Tuivai ADCC bial apan  Class  X & XII passed mi 40 tel uh a, Langkhanpau Guite,Chairman,ADC/CCpur  in Class X topper Chingbiakmawi d/o Chingzagin of Songtal kiangah Rs 2500 + Pak + LED light pia hi. Class XII topper Thonglalpiak s/o Nengdouthang of Mualnuam kiang ah Rs 2500+ Pak+ LED light pia a, a passed teng kiangah leng Rs 500 chiat pia hi. Lawhchinna ngahteng Major V.Thangzamang, Manipur Divn a Youth Secy, Salvation Army in Pathian kiang ah thumsak hi.

     Career Guidance ah Dr HL Liensang, CMO in sinsak a, lawhchinna ngahteng kipahpihthu gen hi. 10-Tuivai ADCC sunga omte’ hampha mahmah uh ahihdan gen a, bialtu MDC tulela ADC Chairman pen servant leader diktak hi’n gen hi. Student-te’ medical line ah a lutnop ua leh Science subject poimawh petmah  a, Manipur a MBBS zousateng govt in alak leh leng tribal quota hukdim zawhlouh  post 26  omlai chi hi. Student-te’ medical line ah tamsem lut poimawh hi’n leng gen a, kuhkal, chihtak leh tupguh neikawm a laisim dingin student-te hasuan hi.

      Thanglianpau Guite, President ZRO in agenna ah student te’n subject lunglutna theihchian poimawh a, byheart system sangin theihchian vilvel ding, thil khat peuhpeuh ah kuhkal, chitak leh Pathian laukawm a pang dingin student-te hasuan hi. Kapkhanmuan, President ZSF in siamsinte’n laisim maimai lou in, atungtuan deuh a pang zou dia laisim ding in hasuan a, theihlouhte’zumna a ngailou in  mi a theite dong tamsaw le uh huai apan mipil hi mai ding uh chi’n gen hi. Lianzapau Samte, President SSPP Gen HQ in siamsinna kichi         ‘bridge to Nation’ ahihdan gen a, student-te’n kuhkal, chihtak leh tupna hoihtak neikawm banah Pathian laukawm a laisim dingin hasuan hi. Ama’n Songtal H/S te kiang ah career guidance book kibawl 25 pia hi.

     Jamkhanpau, MDC in a genna ah nu-le-pa te’n tate goumanpha ahihlam mangngilh lou a, tate laisiamna ding buaipih dingin hasuan hi. Student te’n siamsinna mah pibawl semsem ding ,politics ah midangte’n hon makhelhta uh ahihziak in student leader-te leh student te’n pan lathak dingin chial hi.Program hunsung in Chairman ADC inTribal Affairs & Hills tungtawn in ‘Financial Assistance to Women’ fund hongpai  Songtal a ZMA te’ kiang ah Rs. 10,000/- pekhia hi. Chairman ADC/CCpur in Mualnuam khua a Health Mela atel official-te ban ah Progam atel Resource Person teng vawk 1 gou in nitak-an nekpih a, Resource person teng voksabeu khat chiat pia  hi.

General election ding tawh kisai genkhawm ding

Goa ah BJP' National Executive Meet om ding

Panaji, May-29: BJP te’n June 7-9, 2013 sung Goa khawpi Panaji ah ni 3 sung National Executive Committee meeting  neiding ua, huai hunah kum 2014 a Lok Sabha election (general election) tawh kisai a Poll strategy tungtang kikum ding uh chih ahi. Party's National Vice President banah incharge of Goa hilel Desk Smruti Irani leng National Executive meeting om ding ziakin ni 2 paisa in Goa ah giaklut khinta  a, aman kisakkholhna tuamtuamte enkai lel hi.

Panaji ah tuni zingkalin Irani in Press conference ah a gendanin, BJP top leader te’n ni 3 sung meeting poimawhtak nei ding ua, hiai hunah gamsunga political leh economic dinmun genkhawm ding uhi. Irani in a genzelna ah India gamsung pumpi apan BJP top leader 350 vel paikhawm ding ua gintak ahi chi hi. BJP's National Vice President Irani in Chief Minister Manohar Parriker leh party MLA te leng kimuhpih hi. Kum 2014 chianga Parliamentary elections ding tawh kisai in BJP in Congress makaih UPA govet khetkhiak teitei sawmin kisa uh a, tua ziakin pan naktakin lak  hi a, state teng ah campaign team sawlkhiak pah hita ding chi’n leng gen hi.

HEADLINES:

‘Cong candidate te’n 90% vote muding’- Gogoi

Assam ah tuni’n Rajya Sabha election neih hiding

Guwahati, May-29: Parliament a Rajya Sabha    ah Assam state ai-ohtu ding member 2 telna May 30, 2013 in om ding hi. Seat 2 adingin Prime Minister Dr Manmohan Singh telin candidate 3 pha ua, Congress in candidate  2  nei uh a, opposition AIUDF te’n candidate khat nei uhi. Hibangkalah, Assam Chief Minister Tarun Gogoi in Congress candidate 2 te telching ahi tuak ding ua,vote leng  90% val  a mu tuaktuak ding uh chi hi.

Chief Minister Tarun Gogoi in a genna ah AIUDF in candidate guang teitei mahle uh akilawm dan lel a a guan uh hi a, a lawhsam dingsa ahi uh chi hi. Gogoi in a genbehna ah, election paidan ngeina ‘formality’ zuihna lel hi a, tuaziakin Congress candidate 2 te’n 90% vote mu ding ua, independent member te’n leng hon support  uh ahi chi hi. Prime Minister Dr Manmohan Singh in Assam apan a contest sek ziakin kipahhuai mahmah a, Assam mipite’n leng amah ah muanna nei ahihdan kilang huntawk mahmahta chi hi. Prime Minister ahihsung in Assam adingin na tamtak a semkhia a, tamsem a semkhe laiding chih ka gen ngam chi’n Chief Minister Gogoi in News saite ma ah gen hi.

Prime Minister Manmohan Singh in Rajya Sabha term pailel aneih  June 14, 2013 in beita ding hi. Zingchiang May 30 zinglam dak 9 in vote khiak kipan dinga, nitaklam dak 4 tan khiak theih hiding a, tuazawh in vote sim kipan ding chih hi. AGP apan MP(Rajya Sabha)  hilel Kumar Deepak Das hun leng June 24, 2013 chiang mahin beiding a, tua ziakin, seat 2 ah election om ding hi. Assam state in Rajya Sabha seat 6 a neihna lak ah Congress in seat 4 tangin, seat 2 te opposition te’n tang uhi.

Prime Minister Manmohan Singh tutung a telching ahih nawn leh a kizom a RS member a chin  term 5na ding hita hi. Dr Singh in kum 1991 apan Assam a Rajya Sabha member dingin telching in om a, tuanungin 1995, 2001 leh 2007 te in leng telchingin ana om hi. Dispur khawpi ah Assam Chief Minister lui a sita Hiteswar Saikia’ inn luah a, House No. 3989, Nandan Nagar, Ward No. 51, Sarumataria, Dispur, Guwahati-781006 ah teng chih ahi hi. Assam state assembly a MLA 126 omna lakah Congress in MLA 79 nei uh a, tualou in Independent MLA 5 leh Bodoland People’s Front (BPF) apan MLA 10 in a gup ziakun Congress candidate-te baihlamtak in ching ding uh chih ahi hi.

Rajya Sabha seat 2 a candidate 3 omte Congress ticket in Dr Manmohan Singh leh Santius Kujur hi uh a, tualou in AIUDF candidate ahihleh Aminul Islam ahi hi. Hibangkalah, Kujur ahihleh Udalguri district apan hi a, adivasi leader ahihbanah, Christian community apan ahi hi. Islam bel AIUDF’s general secretary ahihbanah Gauhati High Court ah leng advocate ahi hi.

  

LOCAL NEWS

Chairman in Health Mela hong

Lamka, May-29: District Health Society/ CCpur saina in tuni’n  Mualnuam khua ah Dist Level Health Mela om a, Chairman ADC/CCpur in hongkhia  hi. Aman a thugenna ah Mualnuam khua a Dist Level Health Mela omtheihna din kum 2  paisa apan DC in lemsakna pia a, Health Minister  Phungzathang Tonsing  leh Vungzagin Valte, Parliamentary Secy & MLA(Thanlon A/C) in  lem asakpih ziakua  omthei hi’n gen a, Health saitu CMO leh a staff-te tungah leng kipahthu gen hi. Huai Mela ah damloute  amanbei in damdoi piak hi uh a, sisan , zun leh X-Ray amun a laktheih hi’n leng kigen hi. Financial Assitance tungtawn in mi 10 panpihna sum pia a, Tribal Affairs & Hills tungtawn a  ‘Financial Assistance to Women’ leng Mualnuam a ZMA te’ Rs 10,000/- pia hi.

    Health Mela ah Specialist doctor 9 telin doctor 15 in damloue en uh a, Chairman ADC in Bus 1 leh Bolero gari 1 hire in Khuanggin, Songtal leh Thuangtam khua apan damlou tamtak nawn hial uhi. Tuni’n damlou mi 1000 val en uh a, huaite lakah Gyanea ah 152, Eye ah 155, Physician 244, Dental ah 27, ENT ah 36, Skin ah 88, Padiatrician (naupang lam) 263, Ortho ah 78,Psychiatric 43 ban ah sisan, zun test leh X-Ray kila tamtak om  hi. Health Mela May 30 tan sunzom ding uhi.

Nektheih hunbeisa tamkhop mukhia

Lamka, May-29: Lamka Traders & Self-employed Assn (LATSEA) pawlin khawpi sung a dukan bangzah hiam ah nektheih chituamtuam ahun beisa(expired)  kizuak chihthu om ziakin

tuni nitaklam in dukan tuamtuam enkhia uh a, Depak Store, Tedim Road (retailer);  JK Store (wholesaler) leh TK Store (Wholesaler) apan nektheih chi tuamtuam tamkhop ahunbeisa (expired) kizuak mukhia in dawr kong ah haltum  uhi. LATSEA makai te’n Depak Store te Rs 4,000/- liausak uh a, JK Store leh TK Store te Rs 5,000/- tuak liausak uhi.Nektheih hun beisa kisuakte lakah chocolate(chikhum),ghee leh nektheih lam tamdeuh hi’n kigen hi. Tulai khawlum hun hita a,hibang nektheih hun beisa chikhum(sweet)te adiakin naupang lamte nek hideuh a, hileleng hun beisa nek ziakin sungkhawh, santen leh sunglam natna tuamtuam kia hilou in khawsik, luna leh natna tuamtuam piangsakthei khopa lauhuai hi’n kigen hi.

JK Store neitu in ama’ dukan akipan  ahunbeisa nektheih tamtak muhkhiak poisakthu genkawm in  mipite lakah ngaihdam ngen hi.

ITI  admission kihong nawn

Lamka, May-29: Saikot a Industrial Training Institute (ITI) ah academic 2013-14  ading admission kihong nawnta hi. Admission form kihawmlel a, June 20, 2013 tanin submit theih ding a, Steno, dressmaking, carpentery, welder leh adangdang sintheih dinga, kum 14-40 kikal te’n apply theih ding hi. Thuchian kimzaw office hun  sungin ngahtheih ding chihthu kiza hi.

Naupang khat in sikkilh valh

Lamka, May-29: Ngaisonkim(6) d/o N.Songbiaklian of Songtal, tulel a Zuihnuam road, New Lamka a om in sikkilh(R-pin kichite) khat adal omna lam a muam laitakin valhkha a, avalh zawh nungin X-ray tungtawn in a ngoi(intestine) sungah a phei zawng in kikham chih theikhia uhi. Bangtan hiam etkhiak nunga akiak theihlouh ziakin anu-le-pate’n Imphal ah enkol uh a, May 30 in  in operation kibawl ding chihthu om  hi.

Patient Care & Public Relations

Lamka, May-29: Dr N.Paulginthang, Medical Supdt, Dist Hospital leh Lions Club of CCpur Greater pangkhawm in tuni sunnung  in Dist Hospital Conference Hall ah ‘Training on Patient Care & Public Relation’ om a, Lion N.Lhungdim, ex-Indian Revenue Service Commissioner of  Income(retd) in sinsak hi. Training hun ah Nursing staff, Paramedical staff leh  Grade IV-te tel uh a, May 30, 2013 in zouding uhi.

Semi Final ah CCpur leh FC 

Lamka, May-29: Imphal  Polo Ground a ‘13rd Challenger Cup Veteran Football Trophy, 2013’ pailel ah May 30, 2013 sunnung dak 2:30 in VSAC (CCpur) leh FC Imphal team in semi-final kimawl ding uhi. Huai Veteran Football Trophy ah Dist tuamtuam apan team 19 tel uhi. Thudang kizadan in  CDSA  a affiliate  bawl ut leh renewal bawl ut club -te’n May 31, 2013 in CDSA office ah bawltheih lai hi’n kigen hi.

Lamka College ah admission 

Lamka, May-29: Lamka College ah June 1-15, 2013 sung academic session 2013 a BA 1^st, 3^rd & 5^th Semester ading admission om ding a,a lunglutte’n office kai hun  sung in Admission staff-te contact theih ding chi’n Principal in theisak hi. 

Free Health Camp zou uh

Lamka, May-29: Khangthah Zuun Pawl(KZP) Gen HQ in Thanlon khua ah May 25,2013 in senior citizen-te ading ni 1 sung ‘Free Health Camp’ a sai uh lawhching takin zou uhi. Free Health Camp ah Dr T. Tunlalmuan, Medical Officer i/c Sinzawl PHC leh Dr T. Kambiakdik, Registar, Deptt of Pediatrics,RIMS in damlou mi 85 en uh a, damdou leng manbei in hawmkhia uhi.

BSF te’n thaukap sunzom ding

Lamka, May-29: STC BSF CCpur a training te’n  May   15, 2013 akipan May 31, 2013 tan  zingsang  dak 5.00 apan  nitak zansawt tanpha Mission compound suahlam, Pearsonmun,Mualkoi leh Gangpimual apan simtum(south-west) lam a firing range ah long/short/grenade leh 51-mm mortar  a kap(firing )  uh  June 1-15,2013 sung sutzop lai dingin ahun behlap uhi. Huai  hunsung in a kimnai a khua omte apan mihing kuamah huai area a lutlou ding leh ganvulh leng huaimun a lut dia  kuama’n khahzanlou ding in  DIG, STC/BSF in thupuan bawl  hi.

Economics Census training kipan

Lamka, May-29: DC’s office kianga Dist Training Centre ah tuni  in ‘2-Days District Level Training of 6^th Economics Census’ kipan a, Maniram Sharma, IAS, i/c DC in hong hi.  SDO/CCpur leh H.Heramani Singh, Dist Statistics Officer/CCpur te’n tuni’n sinsak uh a,  6A (house listing and Establishment Schedule) leh 6C (Establisment Abstract) sinsak uhi.  May 30, 2012 in Yamkholet Haokip, Sub Inspector, Statistic in 6B (Directory Establishment) sinsak ding hi. Training ah CCpur dist a Anganwadi Worker- te’ tel uh a, Economics Census survey leng amau sepsuah ding hi’n kigen hi. India gamg pumpi ah 1^st Economics Census kichi kum 1977 in kipan a, 2005 in a 5veina  om a, tukum in  6 veina  om ding  hi.

Diet supply-tu ding buaihuai

Lamka, May-29: Dist Hospital a damlou omte adin zing-leh-nitaka an leh meh huan ding petu(diet supplier) Paokholun Mate in kum 2008 apan govt ah bill payment a muhlouh ziakin Rs lakh bangzah hiam sum mu theilou in buai mahmah hi’n kigen hi. Dist Hospital a diet supplier in kum bangzah hiam bill a muhlouh thu Dr N.Paulginthang, Medical Supdt  in Director of Health Services kiang ah gelhthawh in memorandum pe mahleh bangmah hitheituanlou hi’n kigen a,  May 31, 2013 tan sunzom ding a, huaini tana bill a muh kei leh khawlsan ding hi’n kigen hi.

ZYA Unit 2 laklutna om ding

Lamka, May-29: ZYA Gen HQ in May 31, 2013 zingsang dak 7.00 in ZYA D. Phailian Unit leh HQ Veng Unit laklutna ‘ZYA Unit induction in Lamka area’ kichi nei ding uhi. Ph. Minlian inn, Compound Veng ah D. Phailian Unit laklutna om dinga,  T. Goukhomang, President, ZYA Gen HQ in laklutna leh kichiamsakna nei ding a, Upa Kaikhokam, L/Secy, MPCS in thumna in lan ding hi. Zinglam dak  8.30 in HYO Hall, HQ  Veng ah unit thak laklutna om ding a,  President, ZYA Gen HQ in kichiamsakna leh laklutna nei ding a, Rev. Jamkhanthang, EBCC in thumna in lan ding hi.

Manipur Express office suti ding

Manipur Express anniversary ahih tawh kiton in May 30, 2013 in Manipur Express office suti ding a, huaiziakin May 31, 2013 issue hong suaklou ding hi.Issue masa June 1, 2013 in hong suak ding hi.                                                                                             – Editor & Publisher         

Suunna

Lhingneihat (41) s/o Lienkhogin of Gangpimuol zan zinglam dak 8.00 velin damlou in si a, zan mah in kivui hi.

Thanglemsang(7 months) of Gangpimuol zan zinglam dak 11.00 velin si a, zan mah in kivui hi.

Thangkhanzam Valte(67) f/o Liansang of Teikhang tuni zingsang dak 6.00 velin internal bleeding ziakin si a, tuni’n kivui hi.

IMPHAL NEWS

 

Behiang leh New Somtal ah Border Trade Centre hon hiding –CM

Imphal, May-29: Myanmar gam Sagaing divn a Monywa khawpi ah zan in Chief Minister O. Ibobi in Union of Myanmar Federation of Chamber of Commerce & Industries leh Indian Chamber of Commerce kigawmte’ saina in ‘2-day Regional Investment &  Business Conclave’ ah Special Guest of Honour a pangkawm in a genna ah Manipur leh Myanmar kala sumdawn tuahna(trade) hoihsemna dingin CCpur district a Behiang khua leh Chandel district a New Somtal ah Border Trade Centre honkhiak hiding chi’n gen a,tunung in Ukhrul district sung mun 2 ah honkhiak hidin gen hi.CM in a genzelna ah Indian investor te’n  Myanmar ah power sector,agro industries, education leh hospital lam adin invest dingin chial hi. CM in Manipur leh Myanmar kikawmna lamlian leh huihkhua(flight) tungtawn in ahithei tana panlak tup thu gen hi.

 

Khamtheih Rs. 50 lakh man mukhia

Imphal, May-29: Narcotics and Affairs of Border (NAB) te’n zan nitaklam in Ephedrine kichi fertilizer bag sung ah khamtheih kg 25 a gik mukhia in huai pua mi 3 leng mankhia uhi. Akigendan in NAB te’n thuguk azak ziakun zan itaklam dak 3:00 in Langol a Game Village mun delh uh a, huai ah Uripok Kangchup road a tai Maruti 800 (No. WB02R/1221) muan mawh huaisa in Central Agri University gate kongah khamkhawl in, checking a bawlna uah fertilizer bag sungah khamtheih mukhia uh a, testing bawl in Ephedrine khamtheih ahih dan theichian uhi. Huai pua mat a omte Md. Latif Ali (47) s/o (late) Md. Ahmaded of Thoubal Moijing Thongkhong; Md Wahab @ Feroz Khan (32) s/o Md Naniruddin of Moirang Palli Thoubal  tulelin Baptist Church of Hatta gei a om leh Md. Abdul Wakil (28) s/o Md. Amu of Hatta a Public Hospital gei a om hi a, khamtheih mat khiakte’ a sum a tuat n International market ah Rs. 50 lakhs vel man ding hi’n kigen hi.

NHRC in Manipur govt thupia

Imphal, May-29: Manipur a Integrated Child Development Scheme(ICDS) a fund-te’ zat thelthang a om chi a NGO khat in National Human Right Commission(NHRC) kianga thu a tut ziakin NHRC in  Manipur govt. kiangah huai tungtang kal 6 sunga report peding in thupia hi’n kigen hi. NGO “Wide Angle Social Development Orgn” pawlin ‘Anganwai Centre’ tam zawte’ a function louh banah puahlouh tungtang NHRC ah complaint abawl dungzui in  NHRC in Manipur Chief Secretary kiangah notice pia  a, Ministry of Women and Child Development fund-te piakkhiak himahleh bangziak a Anganwai worker leh helper-te kha 11 sung lawh piaklouh hi uhiam chih banah Centre in fund Rs. 50 crore vel  sanction mahleh bangchidan a backlog Rs. 50 crores vel omthei hiam chih dotna bawl hi’n kigen hi. (UNA)

Governor road ah operation bawl

Imphal, May-29: Imphal West Police Commando DSP leh City Police OC te’ makaihna in tuni nitaklam dak 3:00 in Paona bazar nung a Governor road lak ah Commando te’n operation bawl uh hi’n kigen a, mi tamtak kaikhawm uh a, I-card kichian neilou mi 12 te’ verification bawl ding in pawkhia uh hi’n kigen hi.

 

MHA team in Moreh veh ding

Imphal, May-29: Union govt. in Myanmar apan damlou ki-ensak dingte Moreh ah ‘visa on arrival’ piak dia a phal dungzui in Ministry of Home Affairs apan High level team khat in June 3-7, 2013  sungin Moreh  pha maithei uh hi’n kigen a, Moreh a Integrated Check Post kibawl lel leh Customs Building ah immigration centre bawl ding amun awngthei lai hiam chih enkhe ding uh hi’n kigen hi.

Driver thatte laka tel 1 mankhia

Imphal, May-29: Sekmai area ah May 9, 2013 in Truck (No. AS01CC/2206) leh driver Kumut Ali pimang in om a, May 11, 2013 ni a driver  thah a om hi’n kigen hi. Tuni’n driver thatte’ laka tel Md. Amir Khan (22) s/o Yakup Ali of Litanpokpi matkhiak hi a, amah kipuan na apan a lawm mi 3te leng matkhiak hiding in police te’n gen uhi. A lawm mi 3te’ Md. Rajaq Ali (22) s/o Muyarfar Ali of Keibung Mayai leikai, Md. Sana @ Rahman Ali (32) s/o Suleman of Kwakta Ward No. 3 leh Md. Sanayai (45) of Keibung Mayai Leikai hi uhi.

Contract basis a Lecturer sem ding

Imphal, May-28:Manipur govt in High School 6 tulam in Hr Sec School din upgrade a, Mata a Vungzagen H/S leng  Hr Sec School a upgrade in om hi. Dy Secy(Education-S) in contract basis a Lecturer semding DPC result a suahna lakah Vungzagen Hr Sec School adia laka omte leh a subject uh anuai bang hi uh a,amau remuneration kha in Rs. 13,700/- lawh ding uhi.  

Botany:  P. Sonia Devi(general), Sonia Kongsong(ST);

Chemistry: Ruth Nemliankim(ST), N. Tilotama Devi(OBC);

Economics:  JL Dom Sang(ST), Thiekzakhip Buhril(ST);

English: Sally Niangngaihching Guite(ST), Zenmuanching(ST);

Physics :T. Khammuanthang(ST), Sh Doren Sharma(OBC);

Political Science:  Pau Sonlal Singson(ST), T. Siambiakshang(ST);

 Sociology: Thuamneihmawii(ST), Vungzamoi(ST);

Zoology : Ch. Sujata Devi(OBC), Nianthiansiam(ST);

Geography:  Ginkaplian(ST), C. KamthianMang(ST);

History:  S KamminlunVaiphei(ST), Chinthianhoih(ST);

Home Science:  L Somobala Devi(OBC);

Mathematics:  T. Songkhankhup(ST), O Geeta Devi(OBC) .

Page 4na ding

Helpawl a tel cadre 4 mankhia

Imphal, May-29: Haflong HQ nuai a om,  tulela Jiribam a om 22-A/R leh Jiribam Police te’n PLA/RPF cadre mi 3 vel om chih thuguk a zak ziakun  Jiribam Lamkhai bazaar, Bidyanagar leh Harinagar mun a search operation a bawlna uah PLA/RPF cadre 1 mankhia uhi. Mat a om s/sd Sgt. Major Sawaijam Jeevan (PLA Army No. 2416) @ Boinao (26) s/o Sawaijam Sunil of Singjamei hi a, amah apan .765mm pistol 1, magazine 1 leh tang 4 mukhia uh a, Jiribam police station ah pekhia uh hi’n kigen hi.

            Senapati district a Motbung a om 48-A/R te’n May 27, 2013 in Alto Car (No. MN0D/6748) a tung mi 3 te’ Kuki helpawl atel dia gintak ziakin man uh hi’n kigen hi. Mat a omte’ Haokholet Kipgen (25) s/o Mangla Kipgen, Lalminthang Kipgen (33) s/o Lunkai leh  Thangjalun Kipgen(19) s/o Yamkhohel of New Keithelmanbi te’ hi uh a, amau apan AK Rifle 2 leh .64 rifle khat leng mukhia uh a, police-te’ kiangah pekhia uh chi’n kigen hi.

FOREIGN NEWS

Ek-lawng sunga koltang naupang hunkhia

Beijing, May-29: Naungek khat ek-lawng(toilet pipe) sunga kiginni apan koltang hutkhiak in om a, Jinhua city a thiltung ahihleh kum 22 mi nupi khat in agilsung a naungek om pen sukkiak ding lemsalou a ekbuk(toilet) sunga aneih khiak hi a, huai hunin ekbuk lawng ah naungek lut in anu’n mat sawm mahleh khahsuah hi’n gen hi. Naungek nu’n ahihleh ahihna diktak tanpha puankhiak ding ngamlou in sepaihte khutlum thuak sang in abortion bawllou a, ata piangkhe mahleh enkai zoulou ding ahihman in hiaitan tung chi hi. Pipe letdan 10cm  sunga naungek koltang hutkhiak sawm in doctor leh nurse-te’n ni 4 sung buaipih uh a, tulelin Pujiang People's Hospital ah etkol a om in adinmun hoihlai hi’n thusuak om hi.

Myanmar ah sahkhua ziaka buaina om nawn

Yangon, May-29:  Northern Shan state a Lashio  town ah Muslim orphanage home leh biakbuk haltum ahihnawn ziakin curfew puan in om a, mipi 200  velin local police station  ah Muslim mi hentang(detainee) a omte khahkhiak dingin ngetna bawl uhi.  Thusuakin ataklatdanin Muslim khat in Buddhist-te tenna inn ahaltum ziakin buaina kipan nawn a, Police-te’n thiltung enkai in khawlai ah mihonpi vakkhiak ding khamna uh a, milip 130,000vel omna laka  Myanmar Muslim 2,000 vel khawsakna Lashio dinmun sousang mahmah chih ahi hi.