MANIPUR EXPRESS | JULY 29, 2013

Headlines:

Congress in kum 2014 a Lok Sabha election om ding mitsuan kawmin pilvang

Telangana thu ah July 31 in UPA Co-ordination Meeting

New Delhi, July-28: Andhra Pradesh state khensak theih hilou ding chi a Telangana state bawlkhiak deihlou Congress MP leh MLA hunkhop a kiphinna ziak uleh Congress party nuse ding khopin AICC Chief Sonia Gandhi avau ziakun tulai in Congress sung buai mahmah a, Congress MLA/MP te lakah Telangana deih leh deihlou kalah naktaka akikhin tuahna a om ziakin kum 2014 a Lok Sabha election ah Congress dinmun tanpha patauh-huai thei ding hi’n kigen hi.Huaiziakin Telangana state piak ding leh dinglouh tawh kisai in July 31, 2013in New Delhi ah UPA Co-ordination Committee meeting poimawhtak om ding chih ahi hi.

UPA Co-ordination Committee meeting zawhphet in Congress Working Committee tutkhawmna in zui ding chi uhi. Congress leader tamzaw in Telangana state bawlkhiak mai dingin lemsa uh a, ahihziakin Andhra Pradesh apan Congress MP leh MLA tamtakin state kekzak hitheilou ding chi’n a talpan mawk ziakun issue liantak lehsuah nawn chi uhi. 

Telangana region apan Congress MP leh MLA tengin bel govt in thupukna abawl masak danin pai henla, khut lumleh bangkei hen chi uhi. Telangana state bawlkhiak ding deihloute’ lakah Union Ministers MM Pallam Raju, KS Rao, Chiranjeevi leh D Purandeshwari banah K Bapiraju leh Anantarami Reddy te kihah pei deuh uh a, amau zanin leng Prime Minister Manmohan Singh kimuhpih uhi. Centre govt in dan (law) siam tuamtuamte’ kiang tanpha ah ngaihdan lakhawm khinvekta hi’n kigen hi. Telangana region akipan MP leh MLA tamtak in Telangana bial teng state tuam hihsak phutna in hahtakin panla uh a,MP,MLA leh Minister khenkhat tanpha kitawp uhi. Congress Core Committee leh UPA atel party khenkhat in Telangana state bawlkhiak hoihsa uh a, huai dungzui in Congress in leng athu in lemsa ahihdan gen uhi. Thusuak in a gendan in July 2013 beikuana local bodies tuamtuam election zawh hiun ding Congress in hungaih lai sawm a, Aug 2013 kal masa sung in thil omdan puangkhe ding uh chihthu om hi. Huaizawh in Congress Working Committee in ngeina dana a lemsakpih nungin Andhra state akipan Telangana state bawlkhiak ding in Parliament ah bill puaklut hiding chih ahi hi. Huaithu taksuah thei dia hong kilat taktak phet in Congress, YSR Congress leh Telegu Desam Party akipan MLA hunkhop in Andhra Pradesh state sehkhen deihlouh ziakin MLA akipan kitawp dia mansa ahihdan uh puang uh a,Congress MLA hunkhop in leng party tanpha nutsiat sawm uh ahihdan a puankhiak ziakun Congress adin lung-ap huai issue liantak hong suaknawn phing hi.

Headlines:

Mi tamzaw in Korean Movie siatlawh hi’n gen uh

CDPSA leh YPA Gen HQ in panla khawm dingin thukim uh

Lamka, July-28: CCpur District Private Schools Assn(CDPSA) leh YPA Gen HQ makaite’n tuni sunnung in Hiangtam Lamka a YPA Gen HQ office ah tuni sunnung in joint meeting nei uh a, student-te banah tulaia naupang leh khangthakte siatna thu genkhawm uh a,tuaia sualna leh siatna tuamtuam omte apan student-te, tuailaite leh khangthakte kepbitna ding a panla khawm ding in thukim uh hi’n kigen hi. YPA Gen HQ President in tunung zek chiang in tanzauzaw a kalsuan theihna din KKL leh pawl tuamtuam tawh pankhawm dan ngaihtuah hiding chi a, kuapeuh in kithuahpih dingin leng ngen hi. 

Tuni a YPA Gen HQ leh CDPSA akipan paikhawmte’n aban-ban a thugen in khawtang siatna tamzawte Korean movie a kipan ahihdan gen uhi. Society sunga mi siamte’n a suikhiakdan un tulaia naupangte’ khawhei-gamtatdan tamzawte Korean style hi’n gen uh a, kicheidan leh gamtatdan kia hilou in, gang group kibawlkhiate leng film etna akipan a lungsim uah sualna chii om hi’n leng gen uh a, tunitan in Lamka a tuailai tamtak gang group om in kisualna leng om mun mahmah chi uhi. 

Tribal society leh gam khangtou khinsa(developed) Korean culture kibang thei vual hilou hi’n leng gen uh a, huaiziakin Lamka ah Korean Movie kham(restriction bawl) ngai ahihdan leng atamzaw in gen uhi. Siatna kibehlap hatlua pen innsung a hong kipan hi’n leng mi bangzahhiam in gen uh a, nu-le-pate’n thildang sangin gil a gah goutan(tate) awlmawh a buaipih zawk hunta chi uhi. Nu-le-pa te’n tulai a tate’ pilna banpha lou in amaute’n ut-le-dah in hon lehkhem thei uh hi’n leng gen uh a, nitak khawlai pawt zalenluat ziaka siatna in hon maingal hi’n leng gen uhi. Siatna dou taktakna dingin innsung ah pat masak ngai a, innsung apan saptuam leh khawtang ah pan nasa zawsem a lak ding hi’n gen uhi. School lam ah CDPSA in student-te’ kichei dan ding zuih dia kibawl nei uh hi’n President,CDPSA in gen a, himahleh teacher-te thuneihna school huangsung lel ahihman in philantrophic orgn leh pawlpi tuamtuamte’n khawtang siatna bawlhoih theihlai hun a panlak poimawh hi’n gen hi. Aman agenna ah RTI act kichi student te’n zangkhial in laisim louhna ding peuh in ngai ua, huaiziakin bah lawh uh ahihman in nu-le-pa te’n tate laisimna mah ngai poimawh din ngen hi. Khamtheih tawh kisai ah a neupen Paras/Talab akipan mi tamzaw in siatna khuk tawnkha uh a, doudal dinga kilawmte khawtang a mawhpuakna neite’n ahuntak a etkai poimawh chi uhi. Tuni a meeting ah YPA Gen HQ leh CDPSA banah CT Lian Guite leh alawmte tel uh a, tunung in nu-le-pate leh pawl tuamtuam in khawtang bawlhoihna dinga awareness tamsem neih poimawh hi’n leng gen uhi.

Headlines:

Khamtheih zuakte apan tamtak mukhia in haltum

Lamka, July-28: Hmarveng Welfare Defence Committee kiphuhkhiak ni akipan niteng in huai vengsung ah duty uh a, tunitan in khamtheih tamkhop tawh khamtheih hihte leng mankhia uhi. Tuni sunnung in Hmarveng Community Hall ah mipi paikhawm in khamtheih matkhiakte haltum uh a, huaite lakah Kani(poppy) kg 1 leh nganza lom 5 leng tel hi. Zu telin playing card leh vanzat dang amat te uh leng haltum leh buakkhiak in om hi. Committee nuai a Women Wing pawlin July 25, 2013 akipan zinglam dak 4.00 leh nitak dak 10.00 kikal duty kikhel in vengsung mun 6 ah duty uh a, huailou hundang ah leng apoimawh bangin buaina mun tuamtuam dapkual dingin leng sehtuam nei uhi. 

Hmarveng Welfare Defence Committee in vengsung enkai dinga mawhpuakna a piak, Women Wing apan thutut kingahdanin guta-te’n Hmarveng akipan tunitan in gas cylinder 30val gumang uh a, innkuan tamtak adi’n haksatna tun ahihman in huai area ah guta leh khamtheih hih kuamah lut nawnlou dingin ngen uh a, khauhtakin panla zel ding uh hi’n leng gen uhi.

Local News:

July, 2013 sungin gari 4 kigu

Lamka, July-28:Lamka khawpi sung veng tuamtuam akipan tukha (July 2013) sungin two-wheeler 4 kigu mang a,a neute’n a genkhiaklouh ziak ua amang khenkhat kithei nailou leng om dinga gintak ahi hi. Thu kizadan in zan nitak in Hebron Veng, New Lamka ah Pulsar 180cc (No. MN 02A/5880) kigu a, July 21, 2013 nitak dak 7.30 velin Excel Travels neitu’ gari Tedim road ah minute 10 sunglel Excel Travels sung a lutkal in Activa White(No. MN01TC/004) gukmang hi a, huai nitak mah in D. Phailien ah Activa khat gutate’n gari koihna apan gukhia uhi. Huailou in SBI/Ccpur kong ah July 13, 2013 nitak dak 7.35 velin Pulsar 180cc (No. MN02A/8339) kigu hi. Tukum adia gari kigu tampen kha July,2013 hi’n kigen a, gutate’n bang vanzat zanga hibang a gamtang thei uhiam chi in mi tamtak lungmuanglou uh a, Police te’ gutate suikhia a mankhe din deihthu tamtak in gen uhi.

Traffic rule bawhsia mat hitou lailai 

Lamka, July-28:Khawpi sunga gari taite’n zuih dinga kibawl traffic rule leh 2-wheeler a taite’n Helmet khuk ding chih a zuihlouh chiang un Traffice Police te’n mankhe zel uh a, tukal sungin leng mi 16 mankhia uhi. Traffic Police-te mahin kal masa sungin mi 12 mankhia uh a, huailou in tukal a Police leh DTO kithuah a traffic tawh kisai etkaina aneih uah leng mi tamtak matkhiak hi uhi.

Seminar leh thumna khawmpi 

Lamka, July-28: Gospel For India leh Thumna khawmpi Saipawlte saina in “India a dingin thum inla, Lamka ading in thum in” chih thupi zangin Sept. 8-10, 2013 sung NPT Prayer Mount, Muolvaiphei ah Seminar tawh kithuah thumna khawmpi om ding hi. Huai hun ah Rev. Samuel Hoffmann, YWAM International Speaker in thugen ding hi. Hiai programme ah mi 200 tan telthei ding chih hi a, a telnuamte’n Aug 30, 2013 tan registration fee Rs 200 pia in minkhum thei ding uhi.

BSNL line ni 2 sung kise ta

Lamka, July-28: Bharat Sanchar Nigam Limited(BSNL) network kisiat ziakin zan nitaklam akipan tuni tan in customer omte buai uh a, network kisiat ziak mah in BSNL broadband internet line leng kisia a, Internet a kisiat ziak diktak theih hilou hi.

Cl-XII Maths guide book hongkhia

Lamka, July-28: P. Haulallawm Vaiphei, M.Sc in abawl “A comprehensive guide to Maths Class XII (New Edition)” kichi tuni nitaklam dak 3:00 in Chiengkawnpang a Excellent Hostel ah Evan VK Thanga in hongkhia a, Pathian kiang ah latna leng nei hi. Huai laibu bawltu in agenna ah, singtangmite lak ah hibang Cl-XII Maths guide bawl om nailou hi’n gen a, guide book omsate sang inleng page tamzaw hi’n gen hi. Ama’n a genzelna ah, huai book ah page 1176 om a, Class XII Syllabus thak 2010-13 tan a dingin solved paper om a, alternative solution leng om hi. Huai guide book copy 2000 lel print hidi’n gen a, July 28, 2013 akipan Bazar ah zuakkhiak hiding gen hi. Huai laibu in Rs. 500 man hi’n kigen hi.

NIIT One Day Counselling om ding

Lamka, July-28: CCpur dist sung a under-graduate leh graduate zousate a dingin July 29, 2013 zinglam dak 11:30 in CCpur College ah NIIT One Day Counselling on Post-Graduate programme in Information technology (IT) and GNIIT (Software Engineering) om ding chihthu kiza hi.

Muntuam tuam ah biakinn kibawl 

Lamka, July-28: Lamka khawpi ah biakinn kibawl kibehlap zel a, kum 5 sunga Rs. 50 lakhs budget tawh zawh dinga bikhiah EBCC Moria Pearsonmun foundation leh biakinn tung khuhzou uh a, abang leng bawl lel uhi. Huailou in EBCC Dorcas Veng biakinn bawlna nasep tamzaw zawhsiang hi a, saptuamte’n kha khat lawh ahihkeileh muhkhiak zahte apan mahni kiphal bangbang thawhkhawm in biakinn lamna dingin thawh uhi. Huailou in veng tuamtuam ah saptuam pawl tuamtuam in leng amau biakinn ding bawlna buaithei mahmah uhi.

NEDFi RO CCpur Entrepreneurs Meet 

Lamka, July-28: Rural Aid Service (RAS), Happy Valley, Tuibuong; NEDFi RO CCpur leh NEDFi Imphal Branch-te saina in July 31, 2013 zinglam dak 10:00 in IB Road a Synod Hall, ah One Day NEDFi RO CCpur Entrepreneurs Meet 2013 om ding hi. Huai ah Rajiv Khaidem, Manager NEDFi, Imphal; TC Meitei, Asst Manager, NEDFi, Imphal leh Holkhomang Haokip, CEO RAS & Manager RO CCpur te’n sinsak ding uhi.

Scholarship muloute’n ngaihven ngai

Lamka, July-28: Centre leh State govt. apan singtangmi’ student-te adia scholarship kihawm sek tukum akipan bank account tungtawn a piak ding chih ahihman in nawngkaina om zeuhzeuh a, kha 1 val paita akipan scholarship hawmkhiak a om pen tunitan in student bangzah hiam in ngah nailou uhi. Huai tawh kisai thu kizadanin bank account tungtang a buaina om ziakin concern deptt in student-te’ account ah thunlut lou uh a, huaite’n Imphal mun ah student-te’ mah in ava kisai uleh hihtheih hi’n kigen hi. Tribal Development office ah mahni bank account, academic proof leh document poimawhte tawi in sai theihlai chihthu kiza hi.

Suunna

Suomang (30) s/o S. Paupo of Chiengkawnpang, tuni zinglam dak 10.30 in RIMS ah cancer in si hi. Suomang bel CCpur Govt. College a Lab Attendant sem hi a, aluang tuni’n hong kipua a, July 29, 2013 in Chiengkawnpang hanmual ah kivui ding hi.

Imphal News:

Governor thak kichiam ding 

Imphal, July-28: Tulela Nagaland Governor Ashwani Kumar in Manipur Governor hihna tawh lenkhawm ding in July 29, 2013 in kichiam ding a, India President in Manipur Governor thak ding a guan mateng lenkhawm ding hi. 

Thu kizadan in Governor Ashwani Kumar in July 29, 2013 zinglam dak 11.00 in Imphal a Raj Bhavan Durbar Hall ah Manipur High Court a Chief Justice Abhay Manohar Sapre ma ah kichiam ding hi. Ashwani Kumar tuni in Kohima akipan gari zang in Imphal hong tung hi’n kigen hi.

Khamtheih dalna din pankhawm ngai – Chief Minister

Imphal, July-28:Chief Minister O Ibobi Singh in Manipur ah khamtheih doudalna ding leh numeite tunga tatsiatna doudalna thl ah mipi pankhawm poimawh hi’n gen hi. Police leh All Manipur Working Journalists’ Union (AMWJU) kigawm in tuni;n 1st M/R a workshop a sai uh Chief Guest a pangkawm in CM in a genna ah Manipur kichi numeite zahna gam hi’n kigen sek mahle tuni chiang in numei tunga tatsiatna niteng phialan thiltung hi a gen in om a, huai banah damdoi khamtheih (drug) tungtawn a summet bawlte leh drug diklou taka zangte ziakin Manipur adin minsiatna tanpha tun uh hi’n gen hi. Hibang thil hoihloute doudalna ding in laisiam, Press leh law enforcing agency poimawh police-te kituak taka pankhawm a panlak ngai hi’n leng CM in gen hi.

Imphal-Mandalay bus service 

Imphal, July-28: Centre govt. in Imphal leh Myanmar gama Mandalay kikal Bus service patna ding in Myanmar tawh kalah Memorandum of Understanding (MoU) suaikaih ding tungtang ah Manipur government ngaihdan dong a, gam nihte kala kitanauna hoihzaw a om theih ziak banah India’s Look East Policy bawhzuina in tunung sawtlou in Imphal-Mandalay bus service kipan thei ding hi’n kigen hi. Moreh ah visa office honkhiak ding Centre in lemsakna a piak nungin passport leh visa office honkhiak ding tungtang zekai lai hi. International Co-operation Division of Ministry of Road Transport and Highways, Government of India in MoU draft copy leh bus service tawh kisai protocol leng Manipur govt. kiangah khak hi’n tuni’n official thusuak om hi. MoU and protocol suaikaih zawh chiang in Imphal leh Mandalay kikal ah bus zangin kikawmtuahna omthei ding a, Myanmar gamsung ading route permit leng Myanmar govt. in pe ding a, Imphal lam adin Manipur government in sai ding hi. Lampi km 184 asau Kalewa apan Monywa kikal bawlhoih ngailai a, India in km 120 tan bawlsak ding a, adangteng Myanmar bawl ding in kilemna om hi’n kigen hi.

Jiribam dist demand pawl lungkimlou

Imphal, July-28: Jiribam sub-divn pumpi Revenue District piching a bawlkhiak dinga panla Jiribam Dist Demand Committee (JDDC) pawlin apaisa Nov 9, 2012 a Chief Minister tawh kilemna thukhun(MoU) a suai a kaih uh govt in tutan pichinlou chi’n lungkimlouh thu gen uhi. MoU ah district tungtang banah Jiribam a om Addl DC in DC mawhpuakna tan len ding leh Addl SP in SP mawhpuakna len ding chihthu atel banah Jiribam Hr Sec School leng College a koihtouh(upgrade) ding banah Science stream telsak ding chih hi a,Borobekra High School leng Hr Sec School a upgrade ding chih hi a,huaite tanpha govt in tutan koihdap lai uh chi’n JDDC pawlin lungkimlouhthu puang uhi.

Jiribam ah Gari 700 vel om lel

Imphal, July-28: Imphal-Dimapur lamlian (NH No. 2) a Kohima kiang Heritage mun ah menchim ziakin lamlian metre 250 vel asau lei tolhkhia ziakin huai lamlian tawna Imphal zuan ding Gari tamtak buaisia in Jiribam lam zuan uh a, tuni nitak tan in Jiribam ah van poimawh tuamtuam pua Gari 700 val in security escort ding om hunhun a Imphal zuan ding in ngak uh chihthu om hi. Gari 700 val omte lakah ah Petrol, Diesel leh LPG pua Gari 45 leh damdoi(life saving drugs) pua Gari 7 tel chihthu om hi.

Hafiz Hatta’ apex body bawlkhe ding

Imphal, July-28: Minuthong Hafiz Hatta Social Welfare Union pawlin amau office ah tuni’n press-meet sam uh a, Hatta leh Golapati area a organization tuamtuam omte’ khat a kikhai khawm theihna dingin apex body khat bawlkhe ding chi’n Md. Aktar Hussain, President, Minuthong Hafiz Hatta Social Welfare Union in gen a, tunung in bandh leh strike om hunah huai pawlpi zang in gamtat hiding chi hi.

Sports News:

8th Manipur State League adin Manager's Meeting AMFA makaih in om

Manipur adia tournament thupipen akigen Manipur State League a 8veina ding tawh kisai in tuni in All Manipur Football Association (AMFA) Office ah club kihel dingte Manager's Meeting om hi. Hiai hun in tukum a Manipur State League a club 10 kihel ding chih himahleh Manipur Police Sporting Club (MPSC) te kizuk kik ua, tua tawh kiton in club 9 pha ding uh chihna suak hi. 

Hiai Meeting ah CCpur District ai-oh a kihel ding Zomi Football Club (ZFC) apan in Coach Lemlal, Asst. Manager G. Chinkhalian leh R. Khupsianmung te va kihel uhi. Tua hun in AMFA in kumdang bangloutakin rule khauhtak tutung in zuih sawm uhi. Huai ah players red card mu peuhmah State League om sung teng pang thei nawnlou ding uh hidan in gen uhi. Huaiziakin, player khat in red card a muh hunhun ama a ding a State League bei tawh kibang ding chihna suak hi. Tua ziakin pilvan mahmah ngai dingin kilang hi. Huai banah, tuni in fixtures pai ding dan tawh kisai drawna nei ua, 8th Manipur State League August 18, 2013 in kipan ding a, opening match ah USA leh KSC te kimawltuah ding uhi. Fixture ahihleh AMFA bawl dandan zuih hiding a, hiai hun, hiai ni chi a club kihel dingten deih tel theihna neilou ding uhi. Huailou in, kimawl hun ding leng zinglam aleng om phut thei hidan in kigen hi. ZFC te bel State League a akihel patna ding uh hi a, tua ziakin experience nei tam hetlou ua, ahihziakin State League a ana kimawl gige players bangzahhiam alak uh tawh kiton in bangtanhiam a hongtun uh lamethuai hi.

Past Winners :

Year Winner

2006 TRAU, Kwakeithel

2007 NISA, Thangmeiband

2008 NISA, Thangmeiband

2009 NISA, Thangmeiband

2010 TRAU, Kwakeithel

2011 NISA, Thangmeiband

2012 SSU, Singjamei

India U-16 te final lut uh

Nepal a SAFF U-16 Football Championship om ah tuni in semi-final match kimawlna om a, huai ah India leh Nepal ten vualzawhna tang in final lut uhi. India in Army Ground ah Afghanistan te kimawlpih ua, huai ah vangphathuaitak in penalty ah 4-3 a vualzawhna tang in final lut uhi. Match dang ah Nepal te final lut ua, India leh Nepal te July 30, 2013 in final kimawl ding uhi.

Dortmund in Munich tung ah phuba la

Man. City in Sunderland te zou uh 

German club tukum Champions League a final kimawl Bayern Munich leh Borussia Dortmund ten zan nitak in German Super Cup kimawlna nei ua, huai ah Borussia Dortmund in 4-2 a vualzawhna tang champion la uhi. Borussia Dortmund te bel Champions League final ah Bayern Munich ten 2-1 in zoukhia ua, huai phuba lakna zan nitak in Dortmund ten nei uhi. Hiai match ah Bayern Munich in naktak in attack bawl mahle uh Borussia Dortmund defender ten Arjen Robben, Thiago Alcantara, Mario Mandzukic chihte palsuak sak hetlou uhi. 

Barclays Asia Trophy final match kimawlna zan a Hongkong a om ah Manchester City in Sunderland te 1-0 a zou in champion la uhi. Hiai match ah Man. City striker Edin Dzeko in goal poimawh mahmah khum a, City Manager Manuel Pellegrini trophy dop pihpa hi. Hiai ground ah Manchester United te July 29 ni in kimawl nawn ding uhi.

Foreign News:

KIO in Myitkyina office hongkhia

Laiza, July-28: Kachin Independence Organisatioin (KIO) in Myanmar govt. tawh kidouna paizel kalah Kachin State capital Myitkyina ah offial takin office hongkhia uh a, huaini mah in north western Shan state ah Myanmar sepaihte leh KIA sepaihte kikaptuah uhi. Thusuakin ataklatdanin KIO Technical Advisory Team pawlin Myitkyina's Shatapru quarter (opposite Kachin National Manau Park) ah phalna tawh office hongkhia ua, pawlnihte kala lemna thu kikup khawmna dinga mun poimawh hiding chih himahleh honkhiak ni in kikaptuahna om ngal hi. Huaimun ahihleh govt. theihpihna a kihongkhia hi a, ceasefire kipat tung 2010 lai in KIO' liaison office dia kizang ahi hi. KIO apan thusuakin ataklatna ah office thak luah ngal uh a, Col. Gawlu La Awng, KIO' Deputy Foreign Affairs representative makaihna in staff team 14 te’n huaimun ah nna sem ding ua, amaute KIO akipan staff 4 tawh govt. control area apan Kachin civilian 10 hi uhi. Kachin helpawlte office thak honna ah President Thein Sein adia chief peace negotiator U Aung Min banah government official leh military officer tamtak kihel uh a, KIO headquarter Laiza khawpi akipan Senior officer, Sumlut Gam makaihna in delegation team-te leng kihel uh a, UN' special Burma envoy Vijay Nambiar leng kihel hi. Kikaptuahna tawh kisai KIO lam apan thusuak in ataklatna ah north western Shan state sung Mantong township ah government force leh Kachin Independence Army's (KIA) Battalion 8 te nasatakin kikaptuah uh a, Shwe gas pipeline project kianga kikaptuahna ah KIO pankhawm pih Shan State Army (SSA) North banah Ta'ang National Liberation Army (TNLA) te’n leng KIO lam gupna pia in Burma sepaihte bukap uh hi’n taklang hi.

Adoption rule ziakin patau 

Marrakesh, July-28: Morocco gamsung ah Adoption rule kichi, zuih ding thukhun thak kizang a, huai in gamdangmite’ gak kha in, naupang taihsan a omte gamdang mite’n amau ta dingin la thei nawnlou ding uhi. Morocco ahihleh European mite’n a awlmawh uleh angaihsak uh gam khat hi a, huaiziakin naupang tagah genthei a omte amau ta dingin la zel uh a, himahleh zuih ding rule thak ziakin patau uhi.

“Khem in om kei un, Pathian zaw khem vual ahi kei; mi’n a tuh bangbang uh a at ding uhi.” 

-Galatia-te 6:7

Security force-te bangtan mat a om ding uhiam?

Assam Rifles te’ thupuangtu Colonel Ajay Chowdhury leh security force personnel khenkhat khamtheih tamtak tawh Pallel ah police commando te’n a matkhiak nung un Moreh a posting police commando a Officer incharge leh a personnel-te mi 10 vel mah khamtheih a sum a tuat a lakh tamtak manding tawh matkhiak hinawn zel uhi. Hibang vingveng atun nung in numei sualluihna (raped case) tawh kisai mahin IRB jawan 4 mat hinawn zel uhi. Huchih lai in, IRB personnel 2 telna guta 4 kipawlkhawmte’n zanzek in Jiribam ah Pulsar (No. AS11-D-1027) gu uh a, tuate zan zingsang dak 3.00 velin mipite’n mankhia uhi. Jiribam Police leh Commando-te’n IRB personnel-te mipi khut a om uh ahihdan theikhia in lakhia uh a, Additional SP O Menjor Singh, MPS leh 2nd OC Khamba Singh te’n thiltung tawh kisai thuchian gen nuamlou in suizui lel uh hi’n gen uhi. Manipur a om security te’ dinmun hibang ningneng khawng hi a, a kigen khe ut nawnlou security personnel-te’ gamtatna leng tamtak omlai ahihdan mipite’ lungsim ah om mahmah ding hi.

Police commando (CDO) te nasep hoih hia hoihlou chih kal gentan haksa mahmah a, helpawl dia gintak hunkhop a that uh chih leng haihvual ahikei hi. India in a buaipih mahmah fake encounter tawh kisai in Manipur police commando-te a awkkha kei ding uh chih leng genngam huai tuanlou a, Delhi a court ma ah kilang dingin leng Manipur apan security personnel tamtak sapkhakin omta uh a, sap touhzel hilai ding chih ahi. Hun paisate enkik zualta lehang, helpawl thah a omte apan galvan muhkhiak(recovery)te kibang tangpi gige a, tuaban ah, gari tai ahihkei leh lampi apai, khawldia a thupiak uleh, Police leh security-te kap a, security- te’n a kapthukna uah si chih hivek maisim hi. Kaplup a om pen helpawl atel mah ahi chih leng chih gige ngam huailou bang hi. A buaihuai mahmah khat ahihleh security force te’n mi a thahzawh uh azingchiang in Joint Action Committee against …. chih bawlkhiak in om a, misi innkuante’n lah mi nautang chivek, Police-te’n lah helpawl chivek, thudik theih hak mahmah hi. 

Commando-te’ chetdan tamlou enkik zual lai lehang, July 12, 2008 kum in Police Commando-te’ Gypsy(No. MN-01A0/6309 a tai in zinglam dak 4:30 velin Imphal west sung a om Yumnam Leikai oil pump a thautui thundia Scorpion MN 04A-1226 khawllai um kual in a sung a tuang mi 3 te man in amaute kiang ah sum demand uh chih ahi. Amaute apan Rs 16,400 ban ah laptop khat, mobile phone leh a dangdang laksak uh hi’n kigen zawmah, Hiai pen Commando-te adia minsiat huaitak ahi. Hiai apan ngaihtuah tham ching thu tamtak piang a, helpawlte’n sum demand uh kichi tengteng helpawl-te’ demand vek hi zouzai ding adiam? Thautawi leh thautawi ahihna uah helpawlte advantage a lathei pawl bang om kha thei hita e chih bangleng ngaihsut theih tham hi. Zanzek in Jiribam a oil pumpi manager kianga sum demand na tawh kisai leng thuguk kiselgu liantak om dingin ginlelh huai chih hinawn hi.

State Government ginatlouh ziaka hiai teng tung vek adiam chih leng theih ahikei, Manipur bang khopa helpawl tamna leitung pumpi ah a om dia hiam chihtheih hi. A himhim thu in security-te leh helpawlte khutnung mi nautang in bangzah vei thuak ding ihia chihte ngaihtuah tham ching hi. I zawng, i ngau man a helpawl tam adiam chih bang leng ngaihsut tham hinawn. Helpawl kichi himhim in policy siangtak aneih ngeingei ding ahi. Manipur ah lemna leh muanna piching omna ding in Chief Minister leh Home Minister ah kinga lian mahmah hi. 

CDO te’ chetdan tawh kisai in media-te mahmah in naakthuak mun aw mahmahta hi. Kum 3/4 vel paisa a Imphal Free Press a Sub Editor mahmah leng kuate thah ahia? Imphal khawpi laizang Ima Market ah nitak nung a reporter 2 khoihtu midang ahikei. BT road a Sanjit that tu kua? Adang leng tam mahmah maithei! Kumlui 2012 July kha kimlakin Thoubal leh Wangjing lak a Newspaper hawmtu(hawker) N. Bira kichi News fee khonkhin phet Police Commando hidia gintak civil dress silh a omte’n khawlsak in News lakman a khonkhiak Rs. 16,000/- leh a mobile handset laksak ua, a maituam in soisa lai uhi. Hiaite tengteng enkaitu ding State Home Minister himailou hiam? Thuneihna zangkheng val (power misused) kichi ana om thei lawtham a, hiai tungtang ah security personnel-te’ adingin pilvanhuai tamtak om ding hi.