MANIPUR EXPRESS | JULY 28,2013 SUNDAY SUPPLEMENT

LAMKA KHAWPI SUNG MUN TAMZAW A ELECTRIC MEIVAK GINALOU BANGCHILEH HOIHZAW THEIDING HIAM? 

Mihingte i khantouh dungzui in i hinkhua ah i duh,i deih,i poimawh leh kul isak hong kibehlap touzel in tuchiang in electric meivak(power) ki chih mihingte adia thil poimawhpente laka khat hong suakta hi. Zan khawmial tanvaktu ding, ,laisimna ding, mun gamla taktak phone tungtawna kihoutuahna ding, an huanna ding,an leh meh kepna ding(friz) bang,lehkha gelhna ding,sum kidawntuahna ding,damloute etkolna ding,kithu zaktuahna(internet) ding,industry leh office tuamtuam ading ban ah mihingte i nasepna uh atamzawte electric ah hong kingata hi.Huai ziakin mihingte i khantouhna ding leh gam leh nam khantouhna dingin i gam ah electricity supply kichian neih hong poimawhlaw petmah hi. 

Electricticy kichi hibang khop a mimal/mipi/khawpi adia poimawh ahihziak mahin mundang gamdang ah bel hunteng leh munteng ah i deihdan dana zatding om thei a,ei gam ah bangziaka mei pai gina theilou hiam chih theih ut-huai kisa hi. Huchi ahihman in igam a electric supply omdan theihchet a, bang dinmun a om himhim hiam, akisam bang om a,hihdan hoihzaw bang a omthei ahiam chihte zonkhiak tupna in Express staff te’n CCpur district adia electric meivak supply-na bulpi Khengjang a 132/33-KV Power Sub-station mun va kipha in thil omdan amun mahmah ah ki-enchian hi.Power station hoihtaka et banah huai muna semte kiang ah thil omdan teng kanchet hi a, huai Power Sub-station ah meivak tha(power) bangzah honglut himhim hiam,kholpi bangzah himhim om hiam, koi apan bang chidana mei hong ki-supply a koi munmun supply hiam chihte teltak a theih kisawm hi.

Tulel dinmun ah CCpur district sunga meivak(electric) supply-tu vanzat(infrastructure) anuai abang in om hi.CCpur district supply-tu ding 132/33-KV Power Sub-station khat(1) Khengjang ah om a; New Lamka, Singngat,Thingkeu leh Thanlon ah 33/11-KV Sub-station leng 4 om hi.

Lamka khawpi adia Transmission Panel

Hiai Khengjang mun ah niteng a mei a khahdan tangpi uh IB ,Singngat 2,Singngat 1, Moirang,Kangvai line record-na bupi khat leng nei uhi.Huailou in load shedding tawh kisai in chart khat leng nei uhi.

Hiai atung akigelh pen regular a electric ahon khahdan tangpi uh chiamtehna hi a, nitak chiang in bel a ngeina dan in dak 6-10pm sung mei honkhah tangpi hi uhi.

Tulelin Lamka khawpi a electric supply hong paidan tangpi en nihang: 

1. Khengjang Sub Station a pen in mipi zat ding direct in 5Mva in IB line,Singngat -1 line leh Kangvai line hon supply hi.

2. Khengjang apat mah in 33/11-KV New Lamka Sub- Station ading hong kilalut nawn hi.Huchi a feeder thum (3) laka first feeder pen in New Lamka area sung supply a, second feeder in Mata, Gangpimual line leh Suongpi,Pearsonmun,Bungmual,leh Phailian Compound veng supply non a, third Feeder pen in BSF training centre leh ZMB brick field-te dedicated line in supply hi.

1) Khengjang Sub-station mah akipan in 33/11 KV Singngat(1), Thingkeu-33/11 KV,Moirang Khunou - 33/11 KV,Ningthoukhong -33/11 KV leh Bishnupur-33/11 KV

Lamka khawpi sunga power supply system pen hiai atung adan limliam ahi. Electric gui kikhunlouhna gam himhim leng a om non kei a, hoihtakin enkai thei hilehang mei ngawl mawkmawkna ding thu leng a om kei hi.

Thil omdan muhsuah apan ngaihdan tamloute:

Tulel in Khengjang a 132/33-KV Sub-station mun ah mei 20 MW nih (2)= 40 MW capacity om a, tulel dinmun ah Lamka khawpi in mei 15 MW kiphamawh lel pen tua Khengjang Sub-Station in hon supply zou law mahmah ding 40 MW-15MW = 25 MW bangval lai zawmah hi.Ahihziakin department in Load shedding paulam in mei a omlou leng hilou napi a tang pi in (record bu apat a et in) Lamka khawpi adingin mei 6-7 MW kan hon khahlou mawk uhi.

Bangchileh meivak kidaih thei ding:

# Khuga Dam a nek senglouh tui adim a om a, govt in mipite’ nekding a hon zawl tungsak thei lou chih tawh kibang. Khengjang a electric mei i zat senglouh uh 40 MW om, Lamka te’n 15 MW lel kipoimawh lel leng ginataka muh zawh hilou,Hibang govt tunga lam-et laiding zaw haksa mahmah e.Mipi’n mei deih in kilei nuam a, hileleng i deihzah hon supply theilou uh,electric hong pai sunsun chianga leng mit zihzeh zawmah.Hibang department ginalou, a sep ding uh sem theilou uh bang hi.Top vek uhenla Delhi lamkhong a a semtheite mah nasem dia zat hile uh azia a om zawdiam ah!

# Tulel a govt nasem tengin amau’ adan in semkei uhenla,mi’ nasem bangin sem in anasepte uh hon semzaw uhenla, niteng bangin kasep hoih kei aleh ka sepna apan tawpthei ding ka hi chih lungsim in neithei le uh i gam ah nek ding tui leh meivak kiningching hong om pan ding hiveh aw.

# Mei(electric) omlou hilou in i zawllut theihlouh ziak hilel hi.Tulela lam-et theih ding omsun ahihleh semi-private-partnership model hihenla ,local a BSF leh Brick field te dedicated line apiak theih ualeh bang dinga eiveng khat, khawkhat,gamkhat a tengte leng dedicated line hon piak theihlouhna ding thu omlou hi. Huai ziakin i local civil society pawl tuamtuam in panla in a deptt tawh pangkhawm a sep louhngal lampi om nonlou bang ahi.Department-te i kithuzakpih in amau a infrastructure lam mawhpua uhenla, ei civil society in maintenance leh revenue collection lam mawhpua in panlakhawm lehang mei i duhthusam ching i muzou mai diam maw, chih ngaihtuahna om thei hi.

Bangziak a mei deihzah kimulou ahia?:

# Government department a semtute siamlouh ziak (lack of skills) in deih banga mei paisak thei lou uh.

# Loading shedding paulam a eletrik fee lah a full a lathou –nekguk(corruption) a awtluat ziak ah diam ah!!

# I electric khuam leh aguite luithei law mahmahta maintenance lah bangmah omlou, huaiziak a huihpi leh vuahpi in a nawk zek chiang a sepah- mei pai theilou sek.

# Electric gui kizanna lakah sing leh gua asuk khaktheih hah sianglouh tamlua electri gui a sukkhak zek chianga mei pai theilou.

# Khengjang a 132/33 KV Sub-station pen CCpur district ading kia hileh kilawm napi Moirang Khunou - 33/11 KV peuh, Ningthoukhong -33/11 KV leh Bishnupur-33/11 KV tantan mei apiak ziak uh adiam ?.

# New Lamka Sub-station 33/11- KV mun a feeder 3 om, a feeder khat pen BSF leh Brick field-te dedicate line petuam chitchiat uh.Feeder dang 2te azang tamzaw mipite ada kidaih lou pipi a hon kihawmsak uh, mipite adin kidaihzou mahmahlou hi. Huaiziak mahin department te’n mun khenkhat/veng bing ah hunbi tuam bawlin hon cut sak sek uhi.

Tulel a Khengjang Sub-Station 

Khengjang a 132/33-KV Sub-Station i chih 40-Mega Watt(MW) capacity ahi

Hiai Khengjang a Power-Sub Station pen high tension a mei honglutna munpi hi a, hiai mun akipan 20+20 Mega Watt = 40 Mega Watt mei piak theihna capacity nei a, huai sub- station mun ah leng 33/11-KV khat om hi.

Hiai munpi akipan in mundangte ah mei(power) anuai abang in kipesawn hi:-

33/11 KV Sub-Station a piakna munte:

1)Singngat/IB -33/11 KV 2) New Lamka 33/11 KV 3) Thingkeu-33/11 KV 4) Moirang Khunou - 33/11 KV 5) Ningthoukhong -33/11 KV 6) Bishnupur-33/11 KV

5-MVa a mipi zatdia piakna munte:

IB-Line 5Mva 2) Kangvai Line -5Mva 3) Singngat Line – 5Mva

Tulai khawvel adia poimawh:

FIR (First Information Report)

~ Mang Tawmbing, LLM

FIR chi a i theih ahihleh, mi kuahiam Dan kalh a gilou a om chiang in complaint kibawl a, Police in a gelhkhiat a, record hoihtak a kichiamteh document genna ahi. FIR a gelhlut ahih theihna ding in gitlouhna pen ‘cognizable offence’ ahih a ngai hi. Cognizable offence i chih chiangin gitlouhna tungtuan deuha theih, police in mat theihna ding ‘Warrant’ om masa sese lou a migiloute ava mattheih uh, dankalh gitlouhnate genna ahi.

Mi kuahiam suam in om taleh FIR gelhlutsaktu dingin hibang mite a hithei vek uhi: 

1) Suam a om’ pa/nu na hihleh; 2) Suam a a omlai va mukhatu na hihleh; 3) Awlmawh ziak in mikhat peuhin kuahiam suam a om chihthu zakha taleh.

Police kiang ah nang FIR kigelhlou a, na genthawh(oral) aleh a gelhkhetu’n a gelhkhiat bangbang a hon simkhiat nung in na lungkim aleh na suai/thumb impression tawh namkip a hipan diing.

Police in akiang ua FIR gelhlut a omteng a vasui(investigate) vek kei uhi. Sui taklou a police in atheih uleh a suilouh ziak uh leng a chiamteh(record) uh a ngai veve hi. Huai banah FIR pelut-tu kiangah a suilouh ziak uh a theihsak ding uh chi’n Cr PC (Criminal Procedure Code) in ngiat dan ahi.

FIR na piaklut khak aleh a thutun ah hiaite a poimawh teiteite ahi uh:

1. Na min leh na omna(address).

2. A thil tunhun, ani, a dakkal.

3. A thiltung atun dan dungzui a na theih bangbang in.

4. A thiltunna mun leh mual.

5. Thilgilou hihtu na theih leh amin, na theih kei leh mi bangchibang melpu a, chihte.

6. Thil gilou hihlai mukha(witness) na theih a om leh a min uh.

Police in FIR na piaksawm hon gelhlut sak utkei bilbel mawkle uh hiaibang deihtelna na zang thei lai:

1. Police SP, DGP, IGP chihte na muhtheih leh na lungkimlouhna na theisak thei, na muh theih keileh laithon (registered post) in.

2. Gitlouhna tunna mun a thunei kha Court kiang ah private complaint na pelut thei.

3. A gelhthawh in State Human Rights Commission/National Human Rights Commission kiang ah complaint na bawlthei hi.

Health Corner:

Heart Attack(Lungphu khawl)

-Dr. G. Zamzachin 

Lungphu khawl(heart attack) ziaka mualliam(si) atamta. Atangpi in dakkal kimkhat sung in beithei uhi. Khawvel mun tuamtuam ah piching 1-2/1000/year in heart attack nei uh, kichi hi. Kum 60 nuailamte ah, numei sangin pasal in leh 7 in, kum 60 tunglam ah leh 2 in, heart attack neitamzaw uh, kichi hi.

Aziak ahihleh lungtang a sisan ahoihlutlouh ziak ahi mai hi. Sikhal in sigui hu, lungtang siguizamte kitan chihte om chiang in lungtang sehkhat/phelkhat sithei a, lungphu khawlphut mai hi. Siphusang (hypertension), lungtang khang, lungphu kinawh, sigui-pankai (atherosclerosis) chihte hi nuam hi. Sigui a sathau a belhtam chiang in a pankai in guivang neusak hi.

Heart attack neih ding kuan in omnuam ngellou a, dip hawm a, lung-am chiaichiai zel, mit mial dundun, khatveivei huih kisam hi. Awm veilam vut tuntun in na-ek guih a, ngawng leh veilam liang leh bantawn zuisuk hi. Huihdik ding kisam ngal a, nak zoulou pah uhi. Khaw-ul nel in buak, taltang ulsuakpah hi. Natna kin-gang ahi a, minit 5-10 sung a khoiman ahihkei leh beidot theih ahi. Awmham (asthma) bang in langthei a, awmham teng asthma hilou in lungtangna hithei (heart case hizenpi asthma damdawi a ki-enkol kha), chihna ahi.

Damlou’ lu daksak a, kamsung a chilphuan lakkhiak meng ding ahi. Nakvang mekbit a kin-le-buang in a kam ah minute 10-20 hu mutlut ding ahi. Nihvei 3vei hih a phattuam keileh awm veilam 80-100/minit vel khuttum a tup ding ahi. Hiai in lungtang suhingnawn thei a, ‘sisa thounawn’ chih om mah hi.

Lungtangna hi a kitheite leh khesiak bawk sekte’n thagim, thil hihphut leh lungphawng zat chiinlouh ding ahi. Om nuamlou chituam deuh hong om leh khawl tawldampah ding a, kim-le-kianga mite hilhpah ding ahi. Leinuai(tongue) a koihpah ding sorbitrate damdawi tang kep(vom) gige ding ahi. Luna damdawi minthang aspirin, ‘heart case’ ading in hoih mahmah laizang hi.

Thil lamdang: hileleng thudik

# Japan a Osaka mun ah “ripe tomato” hair-style thang(popular) mahmah hi.

# Osama Bin Laden tangval lai a limlak vang mahmah a, hiai ah khat muhkhiak ahi.

# Titanic long tuahsiat lai in Japanese mi 1 suakta kha a, Japan gam a mipite’n passenger dangte tawh tawh si ngamlou a ngawh in mi dawilok chihkhum uh a, a sepna apan leng tawp sak a om hi’n kigen hi.

# Puansilhte’ ah laitui(ink) bang te’ hihkhiatna dingin amasa in laitui banna mun ah toothpaste nuh in keusak inla, huai in zawh sawp khele chin.

# Khawvel a traffic jam saupen China khawpi Beijing ah tung a, traffic jam 60 miles in sau a, ni 11 sung daihzou hi.

# US a North Dakota state ah July 4 ni “Fever Finger Discount Day” ziakin dan(law) dungzui in huai ni in mi mat-theih hilou hi.

# Theihtawp suah in ngaihtuah lechin leng na mumang(dream) abul kipatdan na theituan kei ding, atangpi in mi tamzaw in zan khat in mang 2-5 kikal nei uhi.

# Oakley Company in sun-glasses khat bawlkhiakna dingin $ 10 sengin $100 val azuak zel uhi.

# Lawmhoihpente tawh kiten in kikhenna ding(divorce) 70% velin sukiam zou a, damsung a kiteng suakzoupen leng hi uh chi’n kigen hi.

# "Pistanthrophobia" kichi hun paisa a thiltuahte’ ziak a mi muanngam louhna ahi.

# Lasiam Jon Bon Jovi in nekman omlou restaurant nei a, huai restaurant a valut Guests te’n a kiphaldan uh sumpia uh a, khenkhatte’n nekman piakna ding a nasem dingin vaki volunteer uhi.

# Facebook ah na logged in apan Facebook in websites na et teng a sulnung ana record hi.

# Psychologists- te’ ngaihdan in vuaktang alup in mahni kimuan ngamna hihhat hi’n gen uhi.

# Music ngaihna dingin na veilam bil(ear) in zachiang theizaw a, na taklam bil ahihleh thil zakna dingin hoihzaw hi.

# Colour – yellow, orange leh red te’n gil sukial uh a, huaiziak takin restaurant tamzaw te’n huai colour-te’ zang uhi.

# Tulelin khawvela IQ sangpen Kim Ung-Yong in kum 4 aphak apan Calculus problem solve theita hi.

# “Insomnia” kichi ihmut haksatna hi a, I.Q. sang nei te’n Insomnia nei ut se uh a, Scientist te’n leng na I.Q. sang sem leh mumang na nei munse ding chi uhi.

# BBC in leng news a neihlouh ni uh om ngei hi. April 18, 1930 in BBC in news puan ding a neihlouh ziak un News tangin Piano music play uhi.

# Mozilla Firefox in new version a suahkhiak teng un kipahpihna dan in Microsoft te’n cupcake thonzel uhi.

# Saliva (chil) i chih natural pain killer khat hi a, morphine sangin leng aleh 6 a hoihzaw hi’n kigen hi.

# Khapi(moon) a American flags kiphut teng ni(sun) radiation ziaka colour om nawnlou in a ngou(white) suakta ding hi.

Sports corner:

Indian Captain Sunil Chhetri

Sunil Chhetri bel August 3, 1984 in New Delhi ah piang a, apa KB Chhetri hi a, anu Sushila Chhetri ahi hi. Aman Delhi pansan club khat City Club ah kimawl pan a, huai apan in Kolkata club Mohun Bagan zom a, huai ah season 3 om sungin match 18 kimawl kha in goal 8 khum hi. Tua zawhin JCT Phagwara zom a, huai ah match 48 ah goal 19 khum a, tua zawh in East Bengal in leikhia uh a, huai ah match 14 ah goal 7 khum hi.Kum 2009-2010 sung Dempo SC ah kimawl a, match 13 ah goal 8 khum man a, huai apan in USA club Kansas City Wizards ten leikhia uhi.Himahleh match khat leng kimawl kha manlou in India hong kik nawn hi. Kum 2011 a India hong kiknawn in Prayag United in leikhia uh a, match 7 ah goal 7 khum a, kum 2011-12 in Mohun Bagan zom a, huai ah match 14 ah goal 8 khum hi.Kum 2012-13 season in Portugal club Sporting Lisbon in leikhia ua, match 3 kimawl kha man a, goal bel khumkha lou hi. Huai apan in Churchill Brothers te’n kum 2013 in leikhia ua, season beitan kimawl man a, Churchill Brothers- te 2012-13 I-League champion lakpih hi. Maban ah 2013-14 season a dingin I-League a club thak Bengaluru FC zom a, huai club ah kimawlta ding hi. 

International level ah kum 2004 a SAAF Games ah kihel pan a, huai ah Pakistan tawh kimawl in goal khum ngal hi. India min a tamveitak a kimawl khak nungin Malaysia a 2012 AFC Challenge Cup qualification match om ah Captain in pang hi. Dec. 11, 2011 in SAFF Cup final ah goal a khum tawh kiton in akigawm in SAFF Cup ah goal 7 khum a, India’s IM Vijayan in kum 1997 a goal 6 a khum khupkhia hi. India min a match 66 a kimawl khakna ah goal 37 khum a, Club level ah match 125 ah goal 61 khum hi. 

Individual Awards:

* AIFF Player of the Year : 2007, 2011

* AFC Challenge Cup Most Valuable Player: 2008

* Nehru Cup Top Scorer : 2012

* SAFF Championship Top Scorer : 2011

* SAFF Championship Player of the Tournament: 2011

Celebrity news:

Hollywood star lardeuh kikhente ziaka sum senzah tamdeuhte

Lamka: Khawvel pumpi a mi tuamtuam omte’n i gam leh i omna mun dungzui in tawndan tuam, zuihdan tuam leh chiindan tuamtuam a nei uhi.Huchibang ahih dungzui in ei sangtangmite i tawndan dungzui in ‘Nupa a kikhen chiang un numei pen innlam(anawlam a) vuakkik sek hi’. Numeiten innsung ah ‘Gou’ kichi himhim gentheih neilou uhi. Ahihziak in tumlam gamte paidan(Western Culture) ah bel nupa a kiten phot ualeh pumkhat suak uh a, a neih-le-lam teng uh kikop/ neikhawm uhi. Huchi ahih dungzui in ‘Nupa akikhen ngeingei ua leh a neihte uh akihawm uhi’.Hibang ahih dungzui in khawvel a mi minthang mahmah Hollywood film star minthangte laka nupa kikhente’ kilemnate tamlou i en ding.

Mel Gibson leh Robyn Moore

Hollywood a action movie actor minthang mahmah Gelbison leh Robyn a kikhen lai un $ 425 million =Rs 2538 crores tawh kikhen uhi.Amaute nupa ahih dungzui un a neihte uh kikim hawn uh chihna ahi mai a, amau gel tutan pha in khawvel a kikhenna a sum kigen tampente ahi lai uhi.

Michael Jordan leh Juanita Jordan

America-te’ Basket Ball siam minthang mahmah Micheal Jordan leh azi Juanita Jordan kum 17 a tenkhawm nung un $ 168 = Rs 1003 crore tawh kikhen uhi.

Arnold Schwarzenegger leh Maria Shriver

Action movie star minthang mahmah Arnold Schwarzenegger leh azi Maria Shriver tawh a kikhen lai un $ 155=Rs 925 crores tawh kikhen siang uhi.

GADGETS UPDATE

Google Nexus 7 suakthak

Google in Nexus 7 thak suahkhia in tuma ate sangin hoihzaw a, mantam zaw ding hi’n kigen hi. Nexus 7 tablet ahihleh Google adinga kisak theihpih tham ching dia gintak hi a, kumlui model sangin $30 in mantam zaw hi. Nexus 7 thak pixel density 323 pixels per inch hi a, model lui pen 216 ahi hi. Speaker leh sound leng sang zaw in chiang siksek chih hi a, zangkhai zaw himahleh 17 percent velin pan(thin) a, huailou in 5 percent in pek zaw hi. Videoconferencing adi’n Front-facing camera tawh kithuah a, camera ahihleh 5-megapixel ahihbanah photo leh video leng mailam ah laktheih ding hi. Google Nexus 7 in tulelin $229 vel man ding hi’n kigen a, online store tuamtuam ah zuakkhiak hita hi. Memory ahihleh 16 GB storage ahihbanah $40 ahihkeileh $269 behlap in storage memory behlap theih hi. Kalnawn Tuesday akipan United States ah zuakkhiak hita ding a, himahleh India hongtung nailou ding hi’n kigen hi.

Mt Everest kalte' kipahna thuguk

Leitung a tang(mountain) sangpen chih a om Himalaya tangdung a Mount Everest ah mobile phone zat theih dinga panlakna gahsuah in Huawei leh China Mobile tungtawn in 4G network omthei a, sea-level apan metre 5,200 ah mobile network hattak om hi. Fourth Generation network tungtawn in tangkal(climber) te’n Mt. Everest omdan kichiantak live stream tungtawn in enthei ding uhi. Kha masa inleng China Mobile service provider khat in tangvum apan High Definition(HD) video in 4G network tungtawn in Himalaya tang sangpen omdan enkhia hi. Huawei Wireless Networks President, David Wang in huaitawh kisai a genna ah Mount Everest a 4G network omthei in global LTE TDD development dinmun langsak hi’n gen hi.