Manipur Express | July 30, 2013

Langkhanpau’ Road honkhiak in om

Lamka, July-29: Lamzang khawmite’n Langkhanpau Guite, Chairman, ADC/CCpur deihsakna ziakin a khua uah ‘Langkhanpau Road’ chi’n lampi  khat a minvuah uh tuni’n ADC Chairman Langkhanpau Guite khuallian a pang in  hong hi. Aman agenna ah student-te adi’n laisim poimawhpen a, tunung chianga laisiam leh mi thupi hithei ngen ahihdan uh gen in, khuak pilna ahi ding bangtak a zang dingin hasuan hi. Tuni a lamlpi thak honkhiakna ah Guest of Honour in H. Mangchinkhup,EM/ADC pang a,Functional President in M. Gouzamang, Em/ADC pang hi. 

H. Mangchinkhup in innkuan kepbit poimawhdan gen a, khawtang siatna teng innsung a kipan hi’n gen a, saptuam siatna leng innsung a kipan ahihman in saptuamte leh innkuan mite’n innsung bawlhoih masak ngai hi’n gen  gen hi. Innbawl kichi thahatna tawh zawhtheih himahleh innsung nuam bawl kichi lungtang taktak a pan ngai hi’n gen hi.

M. Gouzamang Guite in student-te hasuan kawm in ADC Chairman damlai mah a pahtawina pia Lamzang khawmite phat-huai sakdan gen hi. New Lamka a St. Peter Principal in a thugenna ah student-te’n thilhoih lam ngaihtuah a, nitak hun leng laisim zawh luppah a, zingkal thawh pah ding chi in, tupna kichian neih ding thu genpih hi.  

HEADLINES:

India adia state thak tuni’n piangthei dinmun in om

Congress in Telangana issue ah final bawlta ding

New Delhi, July-29: Andhra Pradesh state akipan  ‘Telangana’ kichi state thak bawlkhiak ding a  ngetna a nasat mahmah ziakin Congress makaih UPA govt in leng nangzou nawnlou in Telangana state bawlkhiak  lemsa uh hi’n  kigen a, ahihziakin  zingchiang (July 30, 2013) in  Congress Working Committee (CWC)  in thutanna(final decision) bawl  ding uh chih ahi hi. United Progressive Alliance (UPA) co-ordination committee pawl leng July 31, 2013 in meeting ding uh a, huai ah Telangana state bawlkhiak ding tungtang mah genkhawm ding uh chihthu om hi. Centre govt in Telangana state thak a puankhiak aleh India khangthu adia chimtehtham thilthak hiding hi.

Congress party sunga thuneihna sangpen Congress Working Committee (CWC) in hiai thugiltak kum tamkuamtak a buaipih nungun, July 30, 2013 in thutanna la ding uh a, CWC in thupukna abawlzawh nung uh sawtlou in government in official in Telangana state puangkhe ding chihthu om phot hi. Andhra Pradesh state apan Telangana state bawlkhiak ding phutna ziakin mihing a sanga sim in hinna  tanlawhta uh a, asi  a tamzawte inn sawng tung apan tawmkhia leh mahni kihallum hi uhi. Huailou in MLA leh MP tamtakin kitawpna tanpha piaklawh uh a Congress President Mrs Sonia Gandhi in ni tamlou paisa in Telangana kichi state thak piak maidingin lemsakpih a, huai pen zingchianga CWC meeting hunah puaklut (move) hiding a, CWC member-te’ lakah akalh zawng a apang a om gintak huailou chi uhi. Congress in kumnawn 2014 a general election om ding etna kawma state thak puankhiak sawm uh hidingin muanmawhna lian mahmah chihthu leng om hi.

Thusuak kingahdanin July 30 2013 a CWC meeting kipatma in Mrs Gandhi leh Prime Minister in UPA partner-te kimuhpih masa ding uh a, India adia state 29na ding ‘road-map for India's 29th state’ kichi hilhfiah ding uh chih ahi hi. Tulel a Andhra Pradesh khawpi Hyderabad ahihleh New Delhi piandeuh in  Union Territory dana bawlding chih himahleh India adia IT industry thupina pen banga chiamteh theih a aom tak ziakin Andhra Pradesh leh state thak piang ding Telangana state in capital dan a azatkhawm ding uh chih ahi. Hiai om zia bel Punjab leh Haryana in state capital dinga Chandigarh akikop utawh kibang ding chihna ahi hi.  

Tuma zekin bel Andhra Pradesh khawpi ‘Hyderabad’ pe’n Telangana region ah om mahleh national capital New Delhi piandeuh in Union Territory (UT) ah om sak vilvel hiding kichi a, Telangana state thak khawpi dingin Hyderabad tawh kizom helhel a om ‘Secunderabad’ zat hiding chih himahleh, tu in ngaihdan khenthak in om a, state 2 te’n capital dingin Hyderabad kikop ding uh chi uhi.

Andhra Pradesh apan Congress leader (MLA/MP) hunkhop in Telangana statehood piakding deihkhop in dal uh a, kumnawn 2014 a general election ah Congress adia kiakniamna hiding chi tanpha in vau mahle uh Congress high command in a huaite’ thugen uh pom nawnlou uh hi’n kigen a, Chief Minister Kiran Kumar Reddy leng Congress high command tungah khasetak in om a, ahihziakin, Chief Minister hihna apan kitawplou dingin high command in theihsakna bawlkhin chihthu om hi. Andhra Pradesh ah parliamentary constituencies 42 om a, Congress adingin etlahhuai tham  ahihmanin, state thak apian tawh kitonin Congress tungah kipahthu genna bawlding mipi sah mahmah chi ua, Rayalaseema region a om district 2 te Telangana state thak ah belhsak hidinga, huchi hitaleh Telangana state ah district 12 omta ding chihna hi a, Andhra Pradesh in parliamentary seat 20 tangding a, Telangana state thak in seat 20 mah tang dinga, seat dang 2 te ahihleh nominate post hi’n kigen hi.

Thusuakin a genbehna ah Chief Minister lui RSY Reddy’ tapa Jagan Mohan Reddy makaih YSR Congress adingin buaihuai mahmah ding hi’n kigen hi. Telangana state thak piak ahih leleng state bawlkhiak taktak pe’n kumnawn February 2014 tana hihfel hiding in kigen a, President Pranab Mukherjee in official in lemsakna leh pompihna a bawllai ngaiding chih ahi hi. Siah(revenue) tui tawh kisai leh adangdang genkhawm ding tamtak omlai dinga, tualou in Andhra Pradesh state kichi seh 3 akhen hi a, huaite ahihleh Coastal Andhra Pradesh, Rayalaseema leh Telangana hi a, Telangana issue hihveng ahih leleng Rayalaseema region dinmun buaihuai theisem lai in kilang chi uhi. Hibangkalah, Bharatiya Janata Party (BJP) President Rajnath Singh in BJP in Telangana state bawlkhiak ding naktaka gum (support) ahihdan zan nitakin puang hi.

HEADLINE 3NA

August 1 in July,2013 khalawh hawmsawm

Imphal, July-29: Manipur govt in employee-te hih thanop tupna in kha thak tenga tarik ni 1 zelin govt employee-te khalawh, pension sum leh govt sum payment kibawl himhim.

 Regional Electronic Clearing Service Credit (RECS-Credit) tungtawn in payment bawlsawm chihthu om hi. Huaiziakin  August 1,2013 akipan in district tenga om govt employee-te lawh(pay/salary), pension sum leh govt sum himhim a mutu dingte’ bank account ah asum koihlut hiding chihthu om hi. Huai system thak zat ahih tawh kiton in lawh leh pension sum, pensioner/ family pensioner-te kha tenga sum muh,deptt of minority, OBC & scheduled caste, Higher Education, Tribal Affairs & Hills in scholarship leh stipend piak uh; Social Welfare in a piak  Old Age Pension leh payment khempeuh huamding chi’n  Finance deptt thusuak om hi.

       Regional ECS Credit system ah DDO te’n khabei kuana last working day ni 7 ma in paybill-te Treasury ah a submit ding uh chih hi a, kha beima ni 7 om sung in bill-te hoihtaka check thak in bawldik ngaite  bawldik ding uh a,  khathak tarik 1 in employee-te lawh, pension leh payment bawl ngaite a bawl ding uh chih ahi hi. Kha beima ni 7 nunga Treasury a bill submit-te bel huai deptt-te gawtna in a khathak beima in a bill uh process hilou ding chihthu leng om hi.

LOCAL NEWS

Lamka-Singngat kikal lampi bawl

Lamka, July-29:84-RCC BRTF te’n Lamka leh Singngat kikal Tedim road  ah mun 3 a kikhen in lamlian siatna munte  bawl uh a, tuni in leng Ngoiphai, Buallian farm kiang leh Singngat kiangah nasem uhi. BRTF pawlin lampi a bawlna munte uah suang sung in repairing poimawhna munte a zawh masiah uh nasem touzel ding uh hi’n kigen a, amaute bawl mah Simveng(Lamka) lutna bul a culvert ahihleh order  om chiang in  alangkhat lam bawl  kipan ding uhi. 

Nurse-te hihbuai om ziakin zinkhia

Lamka, July-29: Singngat khawtaw a Primary Health Centre(PHC) a sem  nurse-te zan nitak in pasal 2 in hihbuai uh chihthu om hi. Thu kizadan in  nitak 9:00 velin tangval 2 in PHC ah nungak va kan uh a, duty  a omte’n  nupi ngen hi’n akigen ziakun pasal 2 te’ paikhiaksan uhi. Hileleng nitak dak 11.00 velin PHC huangsung ah valut nawn uh a, nurse 2 leh Grade IV khat omte giahna lam PHC kong naktakin tuan uh a, numeite hihbuai uhi.  Huai hun ah PHC ah doctor omlou a, nurse te’n hibang thil tuahnawn khak ding lau in tuni’n Lamka hongtung uh a, CMO kiangah thil omdan theisak uhi. Amau Singngat a ZYA Unit-te leng thil omdan hilh uh a, Singngat PHC staff te’n July 30 in thiltung tawh kisai genkhawm  ding uhi.

Zenhang Bazar ah electric post kitan

Lamka, July-29:Tuni sunnung dak 2.30 velin  Zenhang bazar a electric post khat luilua in kitan a, akipuk hi. A kigendanin huai electric post  hunsawttak abul kisia in geek mahmah a, huaikim ah leng electric post dang khenkhat dengdel lai hi’n kigen hi. Tuni a electric post a kipuk hun ah electric currenct pailou a, anuai a mehzuakte leh khawlai pawt te vangpha mahmah uh hi’n kigen hi.Thiltung theihphet in electricity deptt te’n huaimun delh uh hi’n kigen  hi.

Electric-guite lui theilua, lauhuai

Lamka, July-29:Lamka khua a electric khuam(post)-te tamtak luilua in a kitan leh a kipuk a om sek banah Khengjang akipan Lamka khua adia electric lakna agui(wire) kikhung leng kum tamtak kizang ahihtak ziakin luilua a, a khenchiang in kitan maimah hi. Adiakin electric gui kikhung pen gua(bamboo) leh singkung lak khonga kikhung ahihman in huih hattak nun hun leh vuahzuk hun ah electric current pawtu agui leh singteh, singkung lerh gawteh khong tawh kihetkha sek a, huchih hun ah electric current a off uh ngaisek a,mipi in meivak tawh kisai nawngkaina tuaksek chihthu om hi. 

  

5^th position in B.Com(Hons) zou

Lamka, July-29: Miss B. Choilalfel d/o (late) Somkhanlien of HQ Veng,Lamka West in tutung  Manipur University nuaia degree result suak ah Manipur University pumpi ah 5^th position in B.Com(Honours) passed hi. Amah Rayburn College, New Lamka  akai ahi hi.Rayburn College  Chapel ah July 30, 2013 sun dak 12.20 in B. Choilalfel in B.Com(Hons) examination,2013 ah Manipur University  pumpi ah 5^th position a a pass kipahpihna (felicitation) programme om ding hi.

ANM seniority list suak

Lamka, July-29:CMO/CCpur nuaia sem ANM-te seniority list suahkhiak hita a, final bawl dingin ngaklai ahihdan Dr. HL Liensang, CMO/CCpur in gen hi. Seniority list suahkhiak ahihman in akisaipih te’n diklouhna omte velchian a theisak dingin ngen a, final kibawl nungin complain theih nawnlouh ding chi hi. 

Police te’n zu litre 338 mukhia

Lamka, July-29:Police te’n report amuh dungzui un tuni zinglam dak 10.30 velin  Hollywood Street ah zu(alcohol) litre 338 mankhia uh a, Custom & Excise dept te’n office ah huaite bawkhia uhi. Press/Media-te muh in Custom & Excise dept official-te’n tuni sunnung dak 12:30  in Tedim Road a Custom & Excise office ah Police-te matkhiak zu koihkhawm in bua uhi. Zu neitu Lalhmingmawi kiangah zuzuak tawpsan dingin thuhilh uh a, huainung in amah khahkhia uhi. 

&&&&&&&&&&&&&&&&&&&&&&&&

IMPHAL NEWS

Manipur Governor ding in kichiam

Imphal, July-29:Nagaland Governor Ashwani Kumar in Manipur Governor hihna tawh len ding in tuni zinglam dak 11.00 in Raj Bhavan a Durbar Hall ah  kichiam a, Manipur High Court a Chief Justice Abhay Manohar Sapre in kichiamsak hi. Huai hun ah Chief Minister O. Ibobi, Assembly Speaker Th. Lokeshwar Singh, Minister-te leh MLA hunkhop banah top civil leh police official-te tamtak in uap uhi. Ashwani Kumar bel zan in Nagaland khawpi Kohima akipan Gari in Imphal hong tungsuak hi. Gurbachan Jagat in July 23, 2008 akipan Manipur Governor hihna  len in July 22, 2013 in ahun beita a, Manipur ading Governor thak omma Nagaland tawh lenkhawm ding in India President in Nagaland Governor Ashwani Kumar sep hi.

Tuni in Cabinet meeting om

Imphal, July-29: Chief Minister Secretariat a Conference Hall ah tuni nitaklam dak 3.00 akipan in Cabinet meeting om a, huai ah hun sawttak adhoc a om employee-te regularised hile uh sum bangzah lut ding hiam chih adhoc a sem omna deptt tuamtuam in  tuban ni 10 sung in govt a teihsak ding uh chih Cabinet meeting ah thupuk uhi. Govt thupuangtu Education leh CAF & PD Minister M. Okendro in a gendan in tuni a Cabinet meeting in adhoc employee-te regularised ding tungtang sawtkuamtak ngentel takin genkhawm uh hi’n gen hi.

Tuni a Cabinet meeting in Municipal Council 4 a Executive Officer lakna ding MPSC ah mawhpuakna piak thukim uh a,huai Municipal Council 4te –Thoubal, Kakching,Nambol leh Moirang hi uhi. Manipur Assembly Secretariat ah MCS leh MFS post khenkhat koihna ding in a poimawhzah post creation bawl ding in leng thupuk uh chih ahi hi.Court a case pending omte leng akisaipih deptt te’n akinlama hihfel ding chi’n Cabinet meeting ah thupuk uhi.Huailou in Chingmeirong a ADC Guest House ah leng a om ut phot om theilou dinga panla dingin akisaipih Minister in semkhe din Cabinet in mawhpuakna guan uhi. 

Myanmar a India Ambassador hongzin

Imphal, July-29: Myanmar a India Ambassador Gautam Mukhopadhaya in ni 4 sung Manipur a om ding in zan nitaklam dak 4.00 in Imphal airport hongtung hi. Aman Airport akipan Langol a Shija Hospitals and Research Institute zuan pah a, aman huai mun a Ward leh deptt tuamtuam omte a et banah Blood bank leng enkhia hi.Ambassador in Shija Hospital a Auditorium a a genna ah Manipur leh Northeast a state tuamtuam leh Myanmar kala kizopna hoih a om ding India kia hilou in Myanmar govt in leng a tup hi’n gen a, Manipur leh Myanmar mipite kalah kisumdawn tuahna leh damlouh hitan huna ki-etkolna baihlam sem theihna ding in gam nih kala kikawmtuahna baihlamsem theihna dingin a poimawh bangin panlak leh sepkhiak hiding chi’n gen hi.Huailou in Imphal ah Passport leh Visa office akinlama honkhiak theihna ding in panla hi’n leng Gautam Mukhopadhaya in gen hi.

Guv kichiamna Media-te’n boycott

Imphal, July-29: Manipur Governor thak kichiamna uap dinga chialna amuh bang a va hoh sawm Journalist khat CRPF te’n lutsaklou uh a, security force leh media kalsuan khawm dingdan sinsakna’ workshop neih zawh nung a hibang thiltung masapen hi’n kigen hi. Thiltung lungkimlou in All Manipur Working Journalist Union(AMWJU) leh Imphal pansan Editor teng in Manipur Press Club ah emergency meeting nei uh a, CRPF pawl gamtatdan mawhpaih kawm in  Manipur Governor kichiamna coverage bawlte’n leng suahkhiak louh dingin thupuk uhi. AMWJU in hibang gamtatna mawhpaih in, akisaipihte’n panla dingin  nawh uhi.

American consulate official hongzin

Imphal, July-29: Kolkata a U.S. Consulate official te’n ni 3 sung Maniopur a om dingin tuni in Imphal hongtung uh a, US visa tungtang sinsakna  nei ding uhi.  Amaute’n tuni nitaklam in Manipur University campus ah U.S. visa ngah theihna dia  poimawh thiltuamtuamte  sinsak uh a, huai ah MU scholar te hunkhop in leng huai hun  uap uhi.

MU question diklou om

Imphal, July-29: Manipur University in TDC level 2^nd Semester examna ah paidan diklou zui in Sociology subject leng question  diklou om chi’n Maibam Thomas, Secretary- Games & Sports, DM College of Arts in gen a, huai tawh kisai in Department of Arts,  DM College main gate kiangah kiphinna nei in tukhawm uhi. Huai hun ah aman agendan in  result suahma ngei a MU in grace mark pe dingin ngen hi.  

Court in Manipur  nutsiat ding phallou

Imphal, July-28: Khamtheih tamtak pawlai matkhiak a om PIB(Defence Wing) a PRO Colonel Ajay Chowdhury in  Manipur pawtsan dinga ngetna a thehlut Court in phalsaklou hi’n  kigen hi. Ajay Chowdhury bel July 17, 2013 in Court in bail a Rs. 1 lakh a akhahkhiak hi a, tuahun in court phalna lou a Ajay Chowdhury in Manipur pawtsan theilou ding hidan in gen hi. Colonel Ajay Chowdhury bel Feb. 24, 2013 in  Imphal-Moreh lampi NH a Chandel district sung Pallel  ah khamtheih Rs. 25 crores tawh matkhawm hi a, huai hun in a lawmte Ngairangbam Brojendro leh Lunkhohao Haokip tawh mat hi ua, amaute  bail a pawtsan in om ua, himahleh State Home dettt in khamtheih tawh kisai a mat a om bail a khahkhiak  a omte tawh kisai ngaihtuahthak dingin court ah thutun uhi.

NATIONAL NEWS:

Tuni in Aizawl khawpi bandh hiding

Aizawl, July-29: Mizo Students’ Union (MSU) te’n state govt ah ngetna tuamtuam abawlte uh hih pichin ahihlouh thangpaih latsakna leh a thil demand uh kintaka hih buchinsak ding phutna ziakin zingchiang (July 30) sepnawnni in Aizawl khawpi sung teng total bandh puang uhi. MSU thusuakin agendanin, tutunga bandh kinei dingin Aizawl khawpi sung lel huamphot dinga, government akhauh lai leh district dangteng leng huap in bandh khauhtak bawl beh hiding chi uhi. MSU president Zodinpuia in agendanin, Mizoram state govt nuaia sepna grade pay 4,400 tunglam peuhmah gazetted leh non-gazetted hitaleh recruitment om chiangin MPSC saina nuaiah neih hihen chi ngetna kipia state govt in hon limsaklouh ziak ahi chi hi.

MSU in hiai regulation of 2011 kichi apomkei a, MPSC Regulations of Functions  kichi puahphat thak (amendment) bawl hihen chi uhi. Aizawl bandh ahihleh zinglam dak 5 apan nitaklam dak 5 tan dakkal 12 sung hiding a, Journalist, Police & Magistrate, Hospital officials, bawngnawi zuakte (milk vendor) leh PHE staff te chauh bandh in huamkha lou ding chi uhi. Aizawl khawpi mun 18 ah duty kikoih ding a, bandh kalh a gamtang a om zenzen leh amau leh amau mawh kipuak dinga, volunteer te’n mawhpaw lou ding chi’n MSU in hilhlawkna nei uhi.

Govt pawng mawhsak theih hilou - Chidambaram

New Delhi, July- 29: Union Finance minister P Chidambaram in tuni a media te’ dotna khat adawnna ah, India gamsung pumpi ah van man pen khang mah a, ahihziakin government in hihkhelh aneihziak a vanman khang hilou a, huai ziakin, government tunga amawhteng khuksak sawmna tawpsan in om hen chi hi. Government in sepkhelh/bawlkhelh aneih ziak a vanman khang ahile bel kuapeuh in soisel theih a, India i chih leitung pumpi tawh kisaikhata ahihman in, economy thil ah leng sautak etngai om a, tua ziakin amawk mai a govt dem leh mawhsa chihte kuapeuh in i tawpsan uh hunta chi hi’n Chidambaram in gen hi. Aman agenbehna ah, thautui man khang tawh kisai alou theilou hi a, International market ah crude oil man naktak a khansak ahih ziakin, India ah leng khang ahi chi hi.

FOREIGN NEWS

Bus tuahsia in Italy ah 37  si

Rome, July-29: Italy simlam Irpinia kimlak, Monteforte Irpino kiangah zan in khualzinmite tuanna bus khat tuahsia in mi 37 si uhi. Thusuakin agendanin bus sungah mi 49 tuang uh a, car tawh kipelbuai kha in highway akipan 30 metres (100 feet) vel ah lengkhia a, Italy capital Rome akipan km 250 vela thiltung hi’n leng thusuakin taklang hi.  Radio in apuang dan in aliam mi 11 hospital puaktung hi uh a, 2 gim mahmah uhi.  

US ah Israel leh Palestinian kihou ding

Jerusalem, July-29: Kum 5 paisa a kilemna thukhun omte avuaksuak nungin Israel leh Palestinian makaite’n kihouna nei dingin US khawpi Washington tung uhi. Israel opkhumna area munte uap a Palestinian state bawlkhiak dinga Palestinian makaite’ panlak leh Israel in Palestinian mite tawh Jewish mite kala lemna omsakna dia panlakna aneihte daltu om ziakin nasep haksa  hi’n pawlnih te’n gen uhi. Israel' chief negotiator, Tzipi Livni in tuni nitaklam a kihouna om ding ah pilvang kawm leh lam-etna nei in Israel  kuan chi a, Palestinian spokeswoman, Hanan Ashrawi inleng kihouna masate sang in haksatna liantak tawh Washington zuan ahihdan gen a, Palestinian political  sehnih a khenzak a omte Hamas in tumlam bial Gaza area opkhum hi’n gen a, gamdangte’n Palestinian state pompihna(recognition) apiak uh bel poimawh sa ahihdan gen hi. 

US drone strike in mi 7 that

Islamabad, July-29:  North Waziristan province sung a singtangmite tenna bial ah United States in huihkhua apan helpawlte tenna compound bukap a, huai ah Pakistan hepawl 7 kaplup a om in, midang 3 liam uhi. Pakistan in US gamtatna mawhpaih a, amau leitang sung koihna leh "sovereignty" bawhsiatna ahihdan puangkhia hi. Pakistan solkar in US gamtatna ziakin gamnihte’ kal kise thei ahi chi a, minautang hinna laksak zel drone strike khawlsan dingin US ngen hi. Tuabang kalah khawsung mite’n helpawlte bukapna mawhpaih in kiphinna nei uhi.