Integrated Child Development Scheme (ICDS) nuai a CCpur District sunga Anganwadi Workers leh helpers te'n honorarium kha 14 amuh louh uh phutna in tuni'n lampi zuihna nei uhi. Lampi zuihna ahih leh tuni zinglam dak 10:00 apan Lamka Public ground apan Tipaimukh road tawn in Red Cross road ah pial khesuk in Tedim road tawn in DC/CCpur Office tan lamzuihna nei uhi. Anganwadi workers leh helpers te'n tuni in kha 14 a honorarium pedia phut kawm in Jacintha Lazarus IAS DC/CCpur kianga memorundum piakna nei ding chih himah leh Imphal a hoh ziak in ama sik in Maniram Sharma IAS Addl. DC/CCpur kiang ah memoradum piakna nei uhi. DC a dinga memorandum submit a om lekha kimu in a taklat dan in CCpur District sung ah Anganwadi Centre 1010 om a,State Social Welfare Deparment in June 2013 a ding in tuni tan in fund khat leng released bawl nailou ahih dan leh hiai ziak in angawadi worker leh helpers te'n haksatna lianpi tuah loh uh ahih leng taklang uhi. Tua ban ah tuma hun bang tan hiam paisa in State Social Welfare Department in kha nih a ding honorarium pia ua, himah leh hiai kha 2 ading lel released a om pe'n in worker leh helpers te adinga haksatna tut beh zaw hidan in taklang uhi. Memorandum in a taklat zelna ah akisai pih thunei tute apan thu kipah huai bang mah zak ahih kei leh maban ah leng kiphinna chituam dang khat nei nawn ding uh ahihdan uh taklang uhi. Tuni a lampi zuihna hun ah anganwadi woker leh helpers 2000 val te lampi zuihna ah kihel uhi.
Maniram Sharma IAS Addl. DC/CCpur leh S. Khakhopau Ngaihte SDC, Branch Officer DC office te'n tuni zinglam 10:30 in District Hospital va pha in visit va bawl uhi. Maniram Sharma IAS DC/CCpur leh S. Khaikhopau Ngaihte SDC in Hospital aphak un Medical Superintendent leng office tung nailou a, tua ban ah hospital a ward om teng leng check bawl suak uhi. Addl. DC in visit a bawl lai in doctor mi 3 kia in damlou ki-ensak dia hohte ana en lel ua, doctor dangte kuam mah atung nailouh ziak in Addl DC heh mahmah hi. Tua ban ah District hospital sunga zunbuk leh dailen buk omte leng hahsiang louh in om hi. Maniram Sharma IAS Addl. DC/CCpur in Dr. Paulginthang Medical Superintendent kiang ah tuni a ama visit bawl hun a tung lou doctor teng kiang ah show cause notice suah khum ding in thupia a, show cause notice copy DC leh amah kiang ah leng peding in theisak hi. Aban a gen zelna ah hun danga visit a bawl nawn hun a doctor leh nurse duty hun laplou aom leh amaute kiang ah amah mah in show cause notice suah khum ding ahih dan gen a, tua ban ah doctor leh nurse te duty hun ding kichian tak bawl ding leh tak khe ding in Medical Superintendent kiang ah theisak hi.
XXXXXXXXXX
District Hospital konga District Immunization Office ah kal masa apan in Japanese Encephilitis (JE) natna damdawi naupang kum 1 apan kum 10 kikal te kiang ah athawn a kapna nei a om paitou zel in tuni in leng kapna nei nawn uhi. Naupang kum 1 apan kum 10 kikal tuni tan a Japanese Enciphilitis damdawi naupang 2191 te kap zouta ua, tukal sung in 2 vei kap lai ding ua, nu leh pa ta kum 1 apan kum 10 kikal neite'n hong tung ding ningani leh kiginni chiang in District Immunization Office ah athawn in vakapsak theih ding ding hi. Kum paisa 2012 in naupang kum 1 apan kum 10 kikal mi 30,708 te a thawn mah in Japanese Enciphilitis dawmdawi kap in ana om uhi.
XXXXXXXXXX
Major General Vinod Kumar GOC 41 Sub - Area Jorhat, Assam in tuni nitaklam dak 1:30 in Lamka hong pha in HQ Veng a PHED te Office kianga Assam Rifles te gam a Ex-Servicemen Contributionary Health Scheme (ECHS) Poly Clinic mun etkhiakna hong nei hi. Major General Vinod Kumar GOC 41 Sub - Area Jorhat ahih leh tuni in 57 Mountain Division Leimakhong apan in hong pai a, Ex-Servicemen Contributionary Health Scheme (ECHS) Poly Clinic mun ah ex-servicemen makaite leh Ex-Servicemen Contributionary Health Scheme (ECHS) Poly Clinic a staff te toh hun zatna sawtlou nei khawm uhi. Hiai hun a, Ex-Servicemen Contributionary Health Scheme (ECHS) Poly Clinic te'n apoimoh te uh Major General Vinod Kumar a theihsak ban uah, agelh thoh in leng lekha pia uhi. Major General Vinod Kumar in leng a kin theilam a tuleh tu a kitasam omte piak hiding in chiam a, tua ban ah hiai mun ka hong phak nawn hun in thil teng felvekta ding ahi chi hi. Ex-Servicemen Contributionary Health Scheme (ECHS) Poly Clinic Ex-Servicemen Contributionary Health Scheme (ECHS) Poly Clinic ahih leh tukum bul in January 15, 2013 in kiphut khia a, huai hun in Leimakhong Army HQ ah kha nih sung va om ua, April 1, 2013 in hiai mun luah pan uh hi. Ex-Servicemen Contributionary Health Scheme (ECHS) Poly Clinic ah K. Thangkhopau in Administration JCO hihna len a, tua ban staff 8 om ding chih himah leh Officer In-Charge (IOC) ding om louh ziak in Medical Officer In-Charge (MOIC) Dr. T. Hartlang in IOC toh len khawm a, Tua ban ah Lab. Technician khat, Lady Attendent 1, nurse khat, driver khat leh peon khat om uhi. Hiai mun ah sepaih pension sa smart card nei te a thawn in ki-etsak theih dinga, tua ban ah damdawi leng a thawn in piak hiding ua, investigation leng a thawn mah in bawlsak hi ding uhi.
XXXXXXXXXXX
District Malaria Department in July 2013 khasunga damlou tuamtuam mi 2327 te sisan test a bawlna uah mi 16 te malaria vei uh ahihdan musuah ua, mi 16 te lak ah 15 te malaria PF ahihdan musuah uhi. Tukha in malaria PF muh khiak a omte lak ah khat in sihna tuak hi. Malaria Department lam in a gen dan in kumlui 2012 April kha apan tuni tan in malaria department in malaria damdawi tang khat leng mukha lou ua, tua ziak in tukha in malaria PF veite lak ah khat in sihna tuak kha hidan in gen uhi.
XXXXXXXXXXX
N. Rajendro Singh Joint Director Vety CCpur in thusuah abawlna ah Prevention of Cruelty to Animal kichi Society khat CCpur ah phuh khiak hidinga, huai ding in numei leh pasal kum 18 tunglam a ut kuapeuh member hitheihna ding in min piak lut theih a, tua ban ah min piaklut hun in annual fee 250 leng piak ngai dinga, huai ding in demand draft a leng piak theih ding hi. Hiai dinga lunglutna nei te'n District Veterinary Office Tuibuang ah form la in August 21, 2013 tan in submit bawl theih ding hi.
XXXXXXXXXX
Pearsonmun a om The Malsawm Initiative (TMI) a teacher teng kal nih sung daih ding Mumbai a training dia a kuan khiak ziak un tuni July 30, 2013 apan in The Malsawm Initiative khak in om hi. The Malsawm Initiative a teacher te ahih leh The Malsawm Initiative technical support ana pe gige Voice & Vision India kichi te'n a sponsore uh hi a, Helen Keller Deaf & Deafblind Mumbai mun ah kal nih sung va training ding uhi. Amaute September 1, 2013 in Lamka hong tung kik nawn ding ua, tua ban ah The Malsawm Initiative leng September 2, 2013 apan in kihong nawn ding hidan Pauzagin Tonsing Secretary Centre for Community Centre (CCI) apan thutut kingah hi.
XXXXXXXXXXXX
District Governor, District 322D thupiak dung zui a, Lions Club of CCpur Greater aSecretary Lion Frankie P. Gangte in thusuah a bawlna ah Uttaranchal State a Tsunami thuakte panpihna ding in Lions Club of CCpur Greater a Member teng kiang ah panpihna pe khawm chiat ding in ngetna bawl hi. Tua ban ah Lions Club of CCpur Greaters in mipite khualna ziak in JP Selection ah Blue Star Water Cooler kichi tuisiang mipite dawn theih ding koih uhi. Hiai pen niteng a tui bottle khat Rs 40 hisap a nitenga litre 200 thun gige ngai ahih ziak in Lions Club of CCpur Greater in haksatna tuak ahih man in mipite khualna ziak a, mimal pawlpi phatuam ngai nuam leh a panpih utte ding in panpihna piak theih gige ahih leng taklang uhi.
XXXXXXXXXXXXX
GAMSUNG THUTHANG:
Australia leh New Zealand ten a host khawm ding uh 2015 ICC World Cup ading in, India in akikhinpih gige Pakistan apan title defence panta hi. Hiai event ahihleh february 14 apat march 29 tan omding a,match masa ah co-hosts Australia leh New Zealand te kimaituah ding uhi.1992 a Melbourne Cricket Ground a final kimawl hun a, seat stadium lakh khat luahdim a tu mipite mitmuh a Pakistan in England azohnung,kum 23 painung in,hiai melbourne stadium in March 29 in, 2015 cricket World Cup final host ding a,Sydney Cricket Ground leh Auckland`s Eden Park a semi-finals neih hiding hi.Gam 2 a venues 14 a tournament ni 44 hun omding ah, akigawm in matches 49 vei neih hiding a, Australia ah matches 26 leh New Zealand ah matches 23 neih hiding hi'n International Cricket Council (ICC) in tuni'n gen hi. 2015 World Cup ah,International Cricket Council full member 10 leh,qualification ngah Ireland banah,nations dang 3 kihel ding hi.
xxxxxxxxxxxxxxxxxxxxxxxxxxxxxxx
2008 Batla house encounter case toh kisai a matzoh a omsun leh kallui a mohpaih a om India Mujahideen (IM) operative Shahzad Ahmad tungthu Delhi Court in tuni'n thutanna puangkhia hi. Thusuak dungzui in, prosecutor leh delhi police ten Ahmad khailup ding deih ua, batla house a kikaptuahna hun a Delhi Police Special Cell Inspector MC Sharma kaplumtu Uttar Pradesh a Azamgarh apat hong kipan Ahmad siamlouh tangsaktu Additional Sessions Judge Rajender Kumar Shastri kiang a Ahmad khailum dia ngetna apiak nung un, Delhi Court in Ahmad pen damsung suangkulh tangdin tuni'n thutanna bawl hi.
xxxxxxxxxxxxxxxxxxxxxxxxxxxxxxxx
Andra-Pradesh state pen sehnih a khen a, Telangana state dinkhiak ding thu toh kisai tuni a thutanna bawlding chih ahihtoh kiton in, langpangpawlte'n hiai ngaihdan pen a pukding deihlou leh zekaisak sawm in pan nasatak in la uhi. Thusuak dungzui in, zannitak in top Congress leader ten Andhra pankhawm ding deih Andhra Pradesh MP te kimuhpih ua, MP ten Telangana state bawlkhiak ding tungtang a thupukna lakdia ngaihdan ompen zukkik ding in Congress te thuzoh sawm uhi. Andhra Deputy Chief Minister Damodar Raja in a genna ah, thilbangkim tuni a sukfel hiding a, Telangana's capital dia Hyderabad zat hiding chi hi. Congress Core Group in state tuam bawlkhe dia thusun abawl tungtang UPA allies ten kikupkhawmna aneihzoh chiang un, nitaklam dak 5.30 in Congress Working Committee te Telangana state bawlkhiak ding thu toh kisai resolution pass dia tukhawm nonding uh hin leng kigen hi. Tuabangkalah, Centre in Andra Pradesh state sehkhen a Telangana state dinsuah dia thupukna a lak leh, kiphinna leh hiamgam suahna tungthei ahihman in, huaite enkaitu ding, Union Home Ministry in paramilitary personnel tamtak Coastal Andhra Pradesh leh Rayalaseema regions ah sawllut khinta hi. Tuakia leng hilou in,Central forces te banah, Karnataka Armed Police personnel 200 leh Tamil Nadu Armed Police personnel 100 te Hyderabad leh a sehvel a kigingsa a om uh hi'n leng thusuak in gen hi.
xxxxxxxxxxxxxxxxxxxxxxxxxxxxxxxx
Delhi a Amity International School a pawl 7 sinlai naupang 2, kum 12 lel a upa tuak Shourya Chambial leh Gaurav Pati in apaisa June 2012 a amuhkhiak uh aksi lim hon (asteroid) pen International Space Community in tun theihpih ta a, Asteroid min din 2013 LS28 zat hiphot hi. Thusuak in a taklatdan in,naupang nih te a physics teacher utoh 2013 may kha a astronomy seminar a avatel uapat tuabang thute hong piang khia hi a, naupang nihte lak a khat in a genna ah, asteroid theihtum theih ahihdan theihsak in ka om ua, tuadungzuiin,software ka download ua, himahleh thil namai ahihlouh dan ka theihkhiak ziak un, niteng in hiai software adin huntampi kaseng gige uh chi hi. Naupang tegel in,software zang a possible target 62 a muhkhiak zoh un, NASA kiang ah a list khak ua, gimtak a anasepna te uh thawnsuak mailou in,NASA apat affirmative reply nithum sung in mukik ngal ua, asteroid pen confirmed a om leh asteroid hall of fame ah pom in om hi.Gaurav ahihleh Oxford educated science fiction author hih lunggulh a, Shourya bel nikhat ni chiang a NASA ah om ut hi.
xxxxxxxxxxxxxxxxxxxxxxxxxxxxxxx
West Bengal Chief Minister Mamata Banerjee party Trinamool Congress (TMC) in West-Bengal a three-tier panchayat polls ah vualzohna thupitak tang hi.Thusuak dungzui in, TMC in districts 17 lak ah 13 a vualzohna tang in, Left te hatna mun mahmah a kigen Burdwan leh Hoogly tanpha tuhkhe zou uhi. Congress ahihleh Murshidabad ah vualzou lel hi. Tuabangkalah,Left ten TMC te vote kikhia te mahni deihdan a bawl lamdang hidan in ngoh ua, himahleh Mamata in mipite vualzohna hidan a gen in,mipite'n thupukna diktak bawl kha uh chi hi.
xxxxxxxxxxxxxxxxxxxxxxxxxxxxxxx
GAMDANG THUTHANG:
United States in peace deal tungtheih nadia compromises khauhtak bawldia gamnihte thuzoh sawmtuak in, Israel leh Palestinian in kum thum sung a amasapen ding in Washington DC ah zan in direct talks sunzom uhi. Israeli chief negotiator Tzipi Livni, Palestinian counterpart Saeb Erakat leh top US diplomat John Kerry ten zan in traditional Muslim iftar meal nekhawm uhi. Israel leh Palestinian ten kihouna asutzop theih non nading ua pan nasatak a la US secretary of state John Kerry in kihouna neidia kuan gamnih apan teams te atuam in kimuhpih masa hi. US President Barack Obama in gamnihte kal a kihouna pattheih a ompen kipahpih mahmah ahihdan taklang kawm in, gamnihte lemna leh muanna toh khosak theih nading lampi geel leh tup leh ngim a nei in, gamnihte support dia US mansa a om gige hi'n leng chiam hi.
xxxxxxxxxxxxxxxxxxxxxxxxxxxxxxxx
EU foreign policy chief Catherine Ashton in Mohamed Morsi tel a key officialte akimuhpih toh kiton in, Morsi supporter ten Cairo a security headquarters manoh in lampi zuihna ua, kinoktuahna thak tunding patauh huai mahmah hi'n kigen hi. Thusuak in a genna ah, Cairo ah kiginni a Mohamed Morsi gupna a rally neihna hun ah mi tamtak in sihna a tuahziak un tension sang mahmah a, tuaziak a peaceful protest neihtheih nadia protester ten right aneih uh khengval azat uleh action lak hiding a National Defence Council leh military ten vauna abawlnung ua, zannitak a morsi supporters ten lampi zuihna aneih uh ahi. Tuabangkalah,Ashton in interim president Adly Mansour, vice-president for international affairs Mohamed ElBaradei leh army chief el-Sisi te toh meeting tuamtuam aneihkhit nung in, Morsi toh zannitak a dakkal 2 sung meeting nei uh hi'n EU official thupuangtu'n gen a, himahleh thuchian dang akimzo bel puankhiak hilou hi.
xxxxxxxxxxxxxxxxxxxxxxxxxxxxxxxxx
US state Florida a gas plant ah puakthei puakzak omziak in, a tawmpen a mi 7 in sihna tuak hi'n official thusuak om hi. Thilpuak pen in dakkal khat tan daih in,meikuang thupitak tutloh hi. Gas plant ah nasemtu 15 te liamna bangmah omlou in muhsuah in om ua, midang nihte leng liamlou in suakta thei uhi. Tuabanah, gas plant 0.5 miles sung a khosa mipite, mun bitzaw a koih din pikhiak in om uhi. Lake County Sheriff's Office thupuangtu John Harrell gendan in,emergency crews ten meikuang in akim leh kiang ate pehsawn nonlou hidia gingta leh, tuamun a khosa mipite adia tu-le-tu a lauhding bangmah omlou phot chi a, himahleh thiltunna san bel theihchiang hitadih nailou hi.
xxxxxxxxxxxxxxxxxxxxxxxxxxxxxxxx
United States gamsung a kumchinglou kizuakdia phutluih a omte zonkhiak ding tup pipen a nei in, local, state, and federal law enforcement agencies te leh National Center for Missing and Exploited Children (NCMEC) te toh kithuah leh pangkhawm a FBI in khopi tuamtuam 76 a, three-day nationwide enforcement action-Operation Cross Country aneihna uapan in, kizuakte enkaitu leh kizuakte adia clients bawlsak banah a summuhte tunga percent la leh mimal dang 150 matkhiak in om ua, thanghuai tak a kipolhna ziak a suksiat a om naupang 105 hutkhiak inleng om hi. FBI's criminal investigative division assistant director Ronald Hosko in zan a agenna ah, streets,motels, casinos leh social media platforms te a law enforcement agencies nasepna te pen FBI panlakna thupipen hilai chi hi. Mat a om mi 150 te tung ah mihing a sumdawnna (human trafficking) tel in criminal charges bulh hiding in authorities ten gen uhi.
xxxxxxxxxxxxxxxxxxxxxxxxxxxxxxxxx
Pope Francis in, pasal leh pasal kingai a, kideihta thei mi (gay) te endik (judge) louding chi a, himahleh society sung a sapumkhat a koihding chi hi. Brazil veh a kalkhat sung a tamnung hongkik lam a journalists te kiang a agenna ah, Roman Catholic Church in tokohuk (homosexual) khelhna hidan a akoihpen pomkip thakna bawl a, himahleh tokohukna pen natna tuambik neihsakna hilou chi hi. Mikhat gay hi henla,pathian thei mi hi in, omdan hoih in khosa leh, ama tung a thukhenna bawl dia kei kua ka hihiam chi'n Pope Francis in plane a reporter te toh minute 80 sung houlimna aneih hun uah gen hi. Pope Francis in pasal leh pasal kideihta thei mite tungtang mipi mai a agenkhiak masakna pen hi'n leng thusuak in gen hi.
xxxxxxxxxxxxxxxxxxxxxxxxxxxxxx
No comments:
Post a Comment