Manipur Express | August 6, 2013

HEADLINES

YPA-te’ panlak ziakin nasatakin phatuam

Lamka, Aug-5:  YPA General HQ thupiak dungzui in Lamka khawpi a Block leh Unit omna mun teng ah duty om a, tuma a  duty om ma tawh teh in tuni tan ah mi nautang gamtatdan leh khawheidan kikhek lamdang mahmah hi’n kigen uhi.  Adiakin Khuga Dam kimlak leh Pearsonmun khawsak lama lut dingte omdan kilawmlou lua a muh om nawnlou hi’n gen uhi. YPA Gen HQ in Khuga Dam area lak ah omdan kilawmlou om thei nawnlou dia enzui ding in New Lamka Block leh Mata Unit mawhpuakna pia uh a, Pangzawl Bus Terminal leh huailam area enzui ding in
Tangnuam leh Lanva Unit mawhpawsak uhi. Ngakik leh huailam area enzui ding in Pearsonmun Unit leh Mission Compound Unit enzui sak uh a,  Lamka hanmual leh Manniang Veng kimlak enzui ding in Lamka Unit mawhpuakna pia uhi. Zenhang Lamka leh Tuithapi kikal a gam-awng munte enzui dingin Zenhang Lamka leh Tuithapi Unit in sun-le-zan in duty koih uhi.

       YPA Gen HQ leh Block makaite’n mun tuamtuam a duty omte avangkim in enkhia uh a,  panlakdan ding leh a poimawh dangte g kikum zel uhi.  Huailou in student-te telin numei naupangte’n khuk(knee) khuh zoulou niik(skirt) himhim teng theilou ding a theihsakna leng YPA Gen HQ in bawl ngeita a, govt leh private institution te’n Aug, 2013 kha beima a huai zuichiat dingin leng ngetna leh theisakna bawl uhi. Khawlai a vakvial vial numeite’n silh-le-ten panlua, singlua leh puan-ngawng lianlua silhlou dingin theisak uhi.

“IAS officer suspend thu ah centre leh UP kithuzak”- PM

Parliament session kipan: Telangana leh Bodo thu ah session buai

New Delhi, Aug- 5: Tuni in Parliament Monsoon session kipana, akipat nung sawtlouin Telangana statehood thu leh Bodo te’n state a ngetna  utawh kisai innpi houlimna sousang mahmah in dinkhawl hial hi. Tualou in DMK Chief M Karunanidhi’ tanu M Kanimozhi in tuni in Rajya Sabha member dingin kichiamna nei hi. Hibangkalah Prime Minister Dr Manmohan Singh in tun’n News  saite kianga  a gendanin Uttar Pradesh government in IAS officer Durga Sakhti Nagpal kichi suspension order  a suahkhum ban uah charge sheet abawl tungtang uh Centre in ngaikhawk mahmah a, tua ziakin Centre leh Uttar Pradesh govt kithuzak tuahlel chi hi.

      Centre govt in  zanin UP government kiangah bangchidan a IAS officer khat state in suspend thei mawk hiam chih dotna bawl a, IAS-te’ thuneihna, amaute’ adia zuih ding a dan leh duun omte et ahi chi uhi. IAS officer Nagpal in Uttar Pradesh a Gautam Budh Nagar area a sand mining mafia- te’ gamtatna suikhia a, huai in Uttar Pradesh govt zahlaksak mahmah hi’n kigen hi. Minister of State for Personnel V Narayanasamy in a gendanin Centre govt in thiltung tawh kisai in state govt kiangah lehkha 3 vei khakta chi hi. UP govt in  2010-batch IAS officer Nagpal apaisa July 27, 2013 in suspend uhi.

    Hibangkalah tuni in Telangana statehood thu leh Bodoland state ngetna ziakin innpi nihte sousing mahmah a, nihvei hial innpi houlimna khawlsakin om a, sunnung in leng huai thu mah ah buainawn chih ahi. Rajya Sabha ngialah Telangana statehood gum leh gumlou kalah kikawktuahna tanpha piang a, India adia state 29na dinga Telangana bawlkhiak ahihleh bangziaka Assam apan Bodoland state bawlkhiak ding ngaihsak a omlou hiam chi’n member khenkhat kitom uhi.  Telegu Desam Party(TDP) a MP 2 te’n placard ah "We want justice for Seemandhra area" chih leh "We want united Andhra Pradesh" chih lehkha kigelhte takkhia uhi.

    Tuni sunma a Parliament session akipat phetin, session nanungpen leh tuni kikal a si Union Minister-lui VC Shukla leh Arun Nehru telin MP leh ex-MP sisa 13te suunna hun zat hi a, huai zawhphet in TDP member 2 dingtou in Andhra Pradesh apan Telangana state bawlkhiak ding deihlou uh ahihdan ngaihtak in  tangkoupih uhi. Huchih laitak in, Bodoland People’s Front (BPF) MP Biswajit Daimary leng a tutna apan dingtou in Bodoland ngetna in kikou zak a, placard tanpha takkhia in, "If Telengana, Why Not Bodoland?" chih kigelh hi. Rajya Sabha a Chairman Hamid Ansari in Baimary kiangah kuama’n hiai muntak ah banner hon takkhe nawnkei un chikawmin a tutna mun chiat uh luah dingin TDP MP 2 te leh BPF MP 1 sawlkik hi.

HEADLINE

Mizoram numeite’n State Assembly ah numei deih

Aizawl, Aug-5: Mizoram State Commission for Women (MSCW) te’n Mizoram State Assembly ah member dinga numei a om ngeilouh poisakthu puangin numei palai neih hita hen chi uhi. Commission member te’n agendan un, inn ah leng numeite a omkei leh akimlou banghiam a om chih i thei a, numeite omlou in government machinery himhim leng a bukim kei a, tua ziakin Mizoram Assembly ah leng numei MLA poimawh mahmah ahi chi uhi.

Mizoram khangthu himhim ah Member of Parliament (MP) dingin leng numeite khat vei mahleng guan hinailou chi’n MSCW thusuakin gen a, Mizoram in MP 2 nei a, tunitan in numei te’n ‘chance’ khatvei mahleng amu naikei uh chi uhi. Phetlou in, kum 30 paisa apan in leng numei MLA khat mah leng neih ahi naikei chi uhi.  MSCW te’n tu in political party tuamtuamte kiangah ngetna nei in, tukum tawp chianga Mizoram state assembly election om dingah numei candidate ahi thei zahzah guang dingin ngen uh a, huai kawm kalah, numeite’ ading liauliau in 10% tan reserve sak dingin leng ngen uhi.

LOCAL NEWS

Minister in Old Age sum hawm ding

Lamka, Aug-5: Health Minister Phungzathang Tonsing in Aug 6, 2013 zinglam dak 11.00 in New Lamka a a tenna inn ‘Salem House’ ah Manipur Old Age Pension Scheme(MOAPS)  beneficiaries-te’ lakah Old Age Pension sum hawmkhe ding hi. Huai hun ah 58-CCpur A/C sung a Congress Unit 41 akipan President/Secy teng ban ah Beneficiaries teng telkim ngai ding hi’n kigen hi.

Catchment area ah singnou suan ding 

Lamka, Aug-5: Dist Level Officer-te, MDC-te leh Student te’n August 14, 2013 in Catchment area Lanva naak (Zone-II) a Catchment area ah  singnou suanding uh a, zinglam dak 8:00 in L.Foundation Schools’ Playground ah Langkhanpau Guite, Chairman ADC/CCpur in flag-off ding hi. Singnou suanna ah L.Foundation School leh Phungkhothang Govt H/S apan student 100 tuak leng telding uhi.

Free Uniform hawmkhia

Lamka, Aug-5: Lanva Model H/S ah tuni zinglam dak 10:00 in SSA tungtawn a hong pai free uniform-te student 410 te lak ah Headmistress in hawmkhia uh a,  huai ah school a teaching staff leh non-teaching sdtaff-te kimtak in tel uh chihthu om hi.

I-Day Parade rehearshal

Lamka, Aug-5: August 15, 2013 in Lamka Public Ground ah Indian Independence Day lopna omding a, Parade a telding contingent tengin August 12 & 13, 2013 zing dak 7:00 in Parade Commander ding JK Suan Guite, MPS, Asst Commandant, 1^st IRB makaih in Parade Rehearshal nei ding uhi. Tunitan in school tuamtuam 8 in ZEO office ah parade a teldin list pia uh a, Aug 6, 2013 sun dak 12.00 tana pelut teng telthei lai ding uh chihthu om hi.

Hebron Veng a Transformer kisia

Lamka, Aug-5: New Lamka Hebron Veng a Dorcas Road-Awnsuak Road junction a 250-KV  Electric Transformer apaisa Aug 2, 2013 nitaklam  kisia a, tuni’n vengsung mipi leh deptt pangkhawm in JCB zang in lakhia uh a, Imphal a bawlsak ding in  pawkhia uhi. Transformer sia puakna dingin T.Lala Vaiphei , Special Contractor  Pick-up gari athawn in zangsak hi’n kigen hi. Huai  Transformer kisia in Hebron Veng ‘B’ leh Dorcas Road area a inn 400-500 kikal electric meivak supply hi’n gen uhi.

ZC makaite’n CS mu uh

Lamka, Aug-5: Zomi Council(ZC) makaite’n tuni sunnung dak 1.00 in Manipur Chief Secretary thak PC Lawmkunga,IAS a office chamber ah vamu uh a, Chief Secretary ahih kipahphna in  Zomi Puandum silhsak in memento leng pia uhi. Zomi Council in a nasepna ah lawhchinna deihsak in, pilna, siamna, damtheihna leh hatna ngetsak uhi.

Misao Lhahvom ah Social Work 

Lamka, Aug-5: M Lhahvom Area Christian Youth Fellowship saina in August 3, 2013 in M. Lhahvom village, M. Semol village, Vengnuamphai village, Boklui village, Tualzang village, Mualsan village, Mualpi village, Sumtukphai village, Mualkot village leh Yaiphakol village te’n Tualnuam akipan Mualkot kikal a Somkholal Road ah  social work nei in lampi bawl uhi. Huai hun ah Social worker KL Muana in JCB khat, Zamlun, Thangchinlal, Thangkhanlam leh Thanglensunga ten Shaktiman khat chiat thawh in social work a nasemte zangsak uh hi’n fellowship Chairman Manglenthang leh Secretary Thankhanlal apan thu kingah hi.

Tonzang hausanu inn kang

Lamka, Aug-5: Singngat sub-division sung a Tonzang hausa Ms. Chingbem tenna inn tuni zingsang dak  2.00 velin mei in kang a, innsung van bangmah lakkhiak man omlou in kangtum chihthu om hi. Thiltung tawh kisai in  ZYA Tuivai Block makaihna in Village Authority leh mipi pangkhawm in  an huan theihna ding inn bawlsak uh hi’n kigen hi. 

PRAN-Kit neiloute’n July akipan lawh la theilou ding

Lamka, Aug-5: Manipur govt  employee kuapeuh kum 2006 nunga appointment mu   PRAN (Parmanent Retirement Bank Account Number) -Kit neilou tengin July 2013 apan khalawh la theilou ding chi’n govt in order suah chihthu om hi. PRAN-Kit neite’n mahni Head of Deptt chiat ah submit ngaiding a, a neilou te’n Head of Deptt ah ngaihven ngaiding chi’n kigen hi.

Deptt 18 in stall bawlding

Lamka, Aug-5: Lamka Public Ground ah August 15, 2013 in Independence Day lopna hun ah govt deptt tuamtuam in 12 x 10 feet alian in Stall bawlding uh a, deptt teng in 10 x 2.5 feet alian banner leng bawlding uhi. Deptt 18 te’n amau deptt  activities tawh kisai Stall ah koihding uh a, thil tuamuam leng mipi leitheih ding in zuak hiding chihthu om hi.

Youth Integration Camp

Lamka, Aug-5: DYASO/CCpur saina in August 6, 2013 zinglam dak 11:00 in Hiangtam Lamka  a Youth Hostel ah ‘Youth Integration Camp 2013’  kipan ding a, Ms Jacintha Lazarus, IAS, DC/CCpur khuallian apang in hongkhe ding hi. Huai hun ah Guests of Honour in Lalvullien Joute, President, CDSA leh M.Chandrakumar Singh, Sr Youth Officer, YAS pang ding uh a, Functional President in Lunkhosei Haokip, DYASO/CCpur pang ding hi. Huai Youth Integration Camp ah tuailai 300 vel tel ding uh a, Aug 8, 2013 in zouing uh hi’n kigen hi.

Seniority list etthak ngai

Lamka, Aug-5: Medical deptt  asem ANM/FHW-te  seniority list bawlzawh hi a, akisaipih te’n min leh  date of bith diklou omkha hiam chih ni 2 sung in CMO office ah etthak ngai ding a, ni 2 nung in Imphal ah a list thonkhiak  hidin kigen hi.

IMPHAL NEWS

State tenga public transport ah CCTV Camera thuah hiding

Imphal, Aug-5 : Ministry of Road Transport & Highways in India gam state tenga public transport vehicles, buses leh taxi-te ah GPS leh CCTV Cemera thuahvek dingin theisak hi. Thusuak in a gendan in  GPS leh CCTV Camera kithuah dingte  Nirbhaya Fund tungtawn a sepkhiak dingin leng theihsak ahi hi. Ministry of Road Transport & Highways (Road Transport Division) in numeite bitna ding ngimna ziaka  thupiak a bawl hi’n kigen hi.

Manipur a Chief Secretary thak vaidawnna tuni in om

Imphal, Aug-5 : Manipur Secretariat (North & South Block) a Officers leh staffs te’n tuni in Old Secretariat building ah Manipur Chief Secretary thak PC Lawmkunga,IAS  vaidawnna nei uhi. Huai hun ah Chief Secretary  thak vaidawnna leh kipahpihna in  function sawtlou sung zang uh a,  Secretariat a Officer-te leh staff-te kimtak in tel  uhi.

Imphal khawpi ah security khauh

Imphal, Aug-5 : India’s Independence Day zatna August 15, 2013 a om ding tawh kisai in Manipur a helpawl tuamtuam in boycott puang ding uh chihthu zak ziakin Imphal khawpi sung ah security naktak a  hihkhauh in om hi. Police te’n mun tuamtuam ah frisking leh checking bawl zel uh a, kalkhat sung bawl ahih nungin  tuni akipan in Greater Imphal area mu tuamtuam ah  frisking bawlna mun behlap hi a, mun tamtak ah security te’n operation bawl uhi.

Vuah zuk ziakin lamlian nawngkai

Imphal, Aug-5: Imphal-Dimapur lamlian(NH No. 2) Kohim akipan gamlalou Heritage village kiang ah July 12, 2013 a menchim in lamlian metre 200 vel tolhkhia a, 89-RCC(GREF) te’n sun-le-zan a nasem in  menchipna mun a lamlian bawl in zan nitaklam dak 3.30 velin vanpua Gari-te tanpha huai mun kantan in Imphal zuan in paithei uh chih ahi hi. Hileleng tuni’n vuah tamtak a zuk ziakin vanpua Gari-te baihlam takin paithei lou uh a, buannoi ziakin nawngkai nawn zek hi’n kigen hi. 

MA Entrance hun bikhiah thak

Imphal, Aug-5: Manipur University in MA(English) 1^st Semester adia Entrance Test hun bikhiahthak in Aug 20, 2013 zinglam dak 11.00 in Departent of English premise ah Entrance Test om ding in bikhiah hi.Huai candidate hithei dingte document tuamtuam Aug 6,7 & 8, 2013 ffice kaihun sung in verification bawl hiding chihthu om hi.

Commando te’n UG 1 mankhia

Imphal, Aug-5: Imphal East Commando leh Imphal West Commando team kigawm in zanhal (Aug 3,2013) in combing operation bawl uh a, nitaklam in Allu Gali akipan KNP(Noyon) cadre khat mankhia uh chihthu om hi.Police thusuak in a gendan in amah mipi(public) akipan sumkhon ahihban ah mun khat akipan muntuam a galvan paw vialvial dana kizang hi’n kigen hi.

SEACO in 3th Foundation Day

Imphal, Aug-5:South East Asia Cultural Organization (SEACO) pawl in tuni in Konung Mamang a Lamyanba Shanglen mun ah 3^rd Foundation Day zang  uhi. Huai hun ah Sapam Bheigya, Jt. Director, Art & Culture, Govt. of India in Chief Guest hihna tawh uap a, Functional President in Koijam Brojen, President SEACO  pang hi.

Common Written test om ding

Imphal, Aug-4: Medical deptt nuaia Staff Nurse, Female Health Worker (ANM), Pharmacist, LDC leh Male Health Worker lakna ding in  Aug 18, 2013(Pathianni) in Common Written Test om ding hi. Huai a telding candidate te’n Aug 12-16, 2013 sung zinglam dak 10.00 leh nitaklam dak 4.00 sung in Medical Directorate,Imphal akipan in Admit card laktheih ding a, admit card ah written test omna mun leh ahun ding taklat hiding hi. Common written test hun ah Employment Exchange-te’n  a sponsored louh candidate-te tel theilou ding chi’n Director of Health Services, Manipur in thusuah hi.

SO/Steno Deptt Competitive exam

UPSC saina in ‘Combined Section Officer/Steno (Grade ‘B’/Grade-I) Limited Departmental Competitive Examination,2001, 2010 & 2011’ result suak a, tutana kitheipha dan in singtangmi anuai ate lawhching uhi. 

1.Thanglianlal 

2.Thangmawi Vaiphei

3. Th. Lianbawi

4. K. Khatminthang

5. Lamkhomang

6. Hausuanthang Guite

7. Khamngaihlun

8. Khamkhansuan

9. Kamzapau

10. Thawngkhotinthang Hangsing

11. Tualzapau Guite

FOREIGN NEWS

South China Sea accord adi’n kinawhlou
Beijing, Aug-5: Japan tawh kala thubuai  hihvengna dinga in South China Sea Accord a suaikaih ding tungtang ah China kinawhlou chi’n Foreign Minister Wang Yi in gen hi.  Member 10 omna Association of Southeast Asian Nations (ASEAN) in Code of Conduct a bawl ding China  in September 2013 in zintun ding a, Washington  apan huai tawh kisai kampau omte   kintak in  Code of Conduct  a suaikaih ding thu ahi hi. Vietnamese capital Hanoi a Chinese Foreign Minister Wang Yi  in Japan tawh akal ua thubuai a genna ah, Code of Conduct (CoC) bawlkhiak theihna dingin nasep ding tampi omlai a, huaiziakin China kinawh hetlou ahi, chi hi. 

 Buddhist temple ah bomb puak 

Jakarta, Aug-5: Muslim mihing  tamnapen Indonesia ah Buddhist mite biakbuk(temple) khat bomb zanga attack in  om a, Myanmar a Buddhist  tawh Rohingya Muslims  kal buaina tawh kizawitawn hidingin gingta uhi. Officials thusuakin a gen danin West Jakarta  a Ekayana temple lutna bul ah zan nitak in bomb khat puakzak a, thumna nei ding a kuan mi 3 liam uhi. Temple lutna bul kiang ah bomb puakzak lou 2 muhkhiak hi  a,  aliam mi 3 te serious lua omlou hi’n kigen hi.

Pakistan leh Afghan ah mi 111val si

Islamabad, Aug-5: Pakistan a Disaster management official Brig. Kamran Zia in  a gendanin vuah tamlua ziakin  tenna inn tamkhop sia a, ni 3 sungin mihing 53 val si hi.  Northwest's semi-autonomous tribal region ah mi 12 vel si  a, Khyber Pakhtunkhwa province ah leng 8 vel si in, Pakistan opkhum Kashmir region ah 8val si  a, central Punjab province ah 12,  southwestern Baluchistan 10,  southern Sindh ah 8 si uhi.Tuni tan in Pakistan ah tuilet ziakin mi 53 val si uh a, Pakistan tawh kinai a om Afghanistan gam lampang ah leng mi 58 si uhi.

Syria langpangte keniam uh  -Assad

Damascus, Aug-5: Syria President, Bashar al-Assad  in amah dou a langpang(opposition National Coalition)te keniam in gamsung ah bang thupilua sem thei nawnlou uh chi hi. Assad in  agenzelna ah  National Coalition pawlte kuamah adingin kingakna tak hilou uh  a, gamsung buaina hihvengna dingin bangmah sem khelou uh chi hi. Opposition pawlin  gamdangte akipan gupna deih ziak lelin nasem uh chi’n ngawh  hi.