Headlines:
Defence Minister in ngaihdam a nget poimawhlou- Govt
Indian army personnel 5 sihthu ah Parliament buainawn
New Delhi, Aug-7: Pakistan army te’n zan in LoC munah Indian army 5 akaplup utawh kisai sousang touzelin, tuni in leng avangkim in kikaptuahna om touden a, Indian army- te’ post hunkhop leng kapsiat in om a, Pakistan army-te leng mi 2 kapliam in om uh chihthu om hi. Hiai thu ah tuni in Parliament session 3vei hial buai a, nitaklam dak 3 tan session khawlsakin om hi. Union Defence Minister AK Antony in thiltung tawh kisai hilhchetna pe mahleh opposition lamte’n pomtheilou in Antony in India mipite kiangah ngaihdam ngen hen chi uhi. Ahihziakin, government in Antony in kuamah kiangah ngaihdam a ngetna ding ziak a om kei chi uh a, tuni nitaklam in Antony in Prime Minister vakimuhpih hi.
Antony in zan in Parliament ah a thugenna ah tualthat-tute galvan hoih tawi terrorist-te mi 29 vel hi uh a, amau’ Pakistani Army-te’ uniform a silhziak un Indian army te’n theikhial kha uh hizaw chi in Pakistan govt mawhsakthu bangmah genlou a, huai in opposition-te thangpaisak mahmah hi. Mi 20 vel te’n Srinagar apan simlam km 200 vela gamla Poonch mun a Line of Control hong kantan in India sepaihte hong kap uh chi’n Antony in gen hi.
BJP makai banah Lok Sabha a opposition leader Sushma Swaraj in tuni a Lok Sabha session ah a gendan in Antony in Pakistan adia kisiamtan theihna ding thil agen ziakin India mipite’ kiangah ngaihdam a nget ngeingei ding ahi chi hi. Army Chief General Bikram Singh in Kashmir vapha ngal a, amah apan thu ka zakdan teng report bawl ka hizaw chi’n Antony in gen a, Bikram Singh hong tunkik chiangin thuchian kimzaw kon puang khelai ding chi hi. Hibangkalah Pakistani govt in thiltung tawh kisai ah kigolh khalou uh ahihdan puangthak nawn uhi. Minister of State for Parliamentary Affairs Rajeev Shukla in a genna ah thiltung tawh kisai govt in ngai serious mahmah a, amawk mai in koihdap hilou ding chi hi.
Headlines:
Hmar-te’ ading district bawlsak lou dingin ngen
Aizawl, Aug-7: Central Young Mizo Association (CYMA), Mizo Upa Pawl Gen HQ leh Mizo Hmeichhe Insuihkhawm Pawl (MHIP) Gen HQ a heutu tengin zanin Aizawl ah meeting nei in huai ah Hmar-te’ ading district tuam bawlkhiak saklou dinga state govt nget dingin thukim uh chihthu om hi. HPC (D) leh Mizoram govt in peace talks a neih hun uah HPC (D) te’n Hmar-te’ tenna bial teng Sixth Schedule omna Autonomous District Council nuaia kivaipuak dingin phut uhi.
CYMA, MUP leh MHIP te’n tuma zeka Village Council by-Election om mawhpaih mahmah uh a,huailou in electric rule leh regulation-te zuih hilou chi uhi. Zan a meeting ah Mizo sunga organisation hat mahmah Mizo Students Union(MSU) leh Mizo Zirlai Pawl (MZP) te bel tellou uh hi’n kigen hi. Mizoram govt leh Hmar Peoples’ Convention(HPC-D) te’n kihouna aneih hun uah, HPC(D) akipan taktakte mah palai ding in tel uhenla, midang kuamah pom hinawn kei hen chi uhi.
Pawlpi 3 te’n thusuah abawlna uah, Mizo population tawm chik ahihmanin, khentham louhte kikhen khen ngailou ahi chi uh a, Mizo community bubit semna dinga panlak poimawh zaw chi uhi. Pawlpi 3te mah in Aizawl a Hmar Welfare Committee kichi leng mawhpaih uh ahihdan gen uh a, tunung sawtlou a general election om ding ah leng political party kuama’n Nam thil ahamphatna laksawmlou dingin ngetna leh theihsakna bawl uhi. Tuabanah, state govt leng a pilvan mahmah ngai a, beh-le-phung hiam ahihkeileh Nam (tribe/clan) tawh kisai a kuamah Autonomous District Council/ Development thil pelou dingin govt vauhilh uhi.
Hibangkalah, CYMA makaite’n MPC President Lalhmangaiha Sailo kiangah tukum tawplam a Mizoram state assembly election om ding ah helpawl kuate hiam khutzat a neih ut ziaka ethnic groups khenkhat tawh line bawl hi a genkhawm in huchibang khawlsan dingin theisak uhi. Central YMA President T.Sangkunga in Lalhmangaiha Sailo kiangah pilvang dingin theisak a, Sailo in leng MPC in atuppen zaw Mizo-te’ kipumkhatna ding mah ahi chi a, huai kawmkalah, CYMA makaite pahtakthu gen hi.
Headlines:
Assam govt in state ngen-te kihouna neihpih
Guwahati, Aug-7: Assam state govt in ‘statehood’ ngen a kiphin pawl tuamtuamte tuni’n abanban a kimuhpih in kihouna beihpih uhi. Assam govt in All Koch-Rajbonshi Students Union,(AKRSU) te kihoupih masa a, huai hunah Chief Minister Tarun Gogoi leh top government official-te tel uhi. AKRSU pawlin Assam leh West Bengal kawmtuaha Kamatapur state kichi bawlkhiak dingin phut uhi.
Official thusuakin a gendanin, meeting hunah state tuam piankhiak theih dingdan leng kikum kha uh a, tualou in issue poimawh tuamtuam genkhawm uh chih hi. Chief Minister in AKRSU te kiangah kuaman kiphinna huaise takte tawpsan chiat phot ding in ngen hi. Gogoi in AKRSU palaite kiangah a thil demand utawh kisai Prime Minister leh Union Home Minister tawh kimu a a genkhawmpih theihna ding uh lampi sialsak dingin leng chiam hi. AKRSU in Bongaigaon mun a Engineering College khat koih dinga ngetna a bawl uh Chief Minister in pomsak hi’n kigen hi.
State govt in tunitakin All Bodo Students Union (ABSU) leh Bodo National Conference (BNC) te kihouna neihpih dingin chial hi. ABSU leh BNC in bel Assam apan Bodoland bawlkhiak ding phu uhi. Hibangkalah, Karbi Anglong district sungah lemna leh muanna om hiaihiaita a Diphu khawpi ngial ah curfew lakkhiak hita hi. Dongkamokam ah tuni zinglam dak 10 apan in dakkal 6 sung curfew khahkol in om a, ngeina bangin train tai nawnta hi. ABSU in dakkal 48 sung total bandh apuan uh leng tuni zingsang in bei hi.
Local News:
‘Kei adi’n’ chih Music Video honna
Lamka, Aug-7: T. Manga Vaiphei, MLA & Chairman/MTDC tapa Kenedy Vaiphei in Music Video Album thak abawl ‘Kei a Di’n’ kichi tuni sunnung in IB Road a Synod Hall ah Michael Ginzasuan, DSO (CAF & PD) in khuallian a pang in hongkhia hi. Huai hun ah Functional President in T. Lala Vaiphei, Special Contractor pang a, Guest of Honour in H. Samson, Mahajon leh Special Guest in mi tuamtuam 9 pang uhi. Khuallian in agenna ah tulai in music leh lasiam kibehlap deuhdeuh hi’n gen a, 1970s hunlai lasate’n in drum leh electric guiter kia tawh l lasa uh hi’n gen hi. Lamka a album bawltute’n sumpung muzoulou phial uh a, gamdang ah bel album 1 bawlkhiat ziak in hausa zou uh chi’n gen hi. Kenedy Vaiphei in maban ah leng album tamsem bawlkhe zel dingin hasuan hi.
Parade ah contingent 47 telding
Lamka, Aug-7: Aug 15, 2013 in Lamka Public Ground a Independence Day lopna ah school tuamtuam akipan contingent 47 vel parade ah telding uh a, huai lak ah pasal contingent 24 leh numei contingent 23 hiding hi.Huaite banah NYK/CCpur, ASHA, Job Card holder, Civil Police, ex-Servicemen leh IRB &Band party te leng telding uhi.
Parade a telding contingent teng in Aug 12 & 13,2013 zing dak 7:00 in Parade Commander ding JK Suan Guite, MPS,Asst Commandant,1stIRB makaih in Rehearshal nei ding uh a, huai hun a telloute paihkhiat hidin kigen hi.
Naupang tuikia a siding lai hunkhia
Lamka, Aug-7: Zenhang Lamka khawtaw a Tuithalui ah Aug 4, 2013 nitaklam dak 3.30 velin a lawmte tawh kisil a omlai Lianngaihthang (7) s/o Pumgoumang Guite of Zenhang Lamka tuahsia in Tuitha-lui in taisuk a, amah leng buaisia in tui in atuah dandan in kilam(float) hi’n gen uhi. Zomunnuam khawkiang atun in mi pawlkhat in mukha uh a, himahleh Tuitha-luiatui a tam ziakin kuamah tuiliau ngam omlou uhi. Amau tuiliau thei ding mi zong uh a, mi zong uh a, huchi’n Samuel Seijahao Haokip(11) s/o Ngamkholun Haokip of G. Khonom village, tulel a Bethany Christian College a Class VI zil lai innluah a om in tui valiau in Lianngaihthang hunkhia a, akianga om phatuamngaite’n hospital ah Lianngaihthang pawtung uhi. Lianngaihthang hutkhiaklouh hileh Tuitha-lui ah si ding hi’n kigen a, hutkhiak ahihtung lai in leng khua phawklou hi’n gen uhi. Hospital ah doctor-te’n hoihtakin kem uh a, bangtan hiam nunga halhthei nawn in hospital a pawtungte mah in a inn uah vakha uhi. Lianngaihthang bel Zenhang Lamka a VK Montessori ah class-I zil lai ahi hi.
IWMP meeting hun bikhiah thak
Lamka, Aug-7: Ms Jacintha Lazarus, IAS, DC & ED/DRDA makaih in tuni’n IWMP tawh kisai Watershed Development Team (WDT) a Project 1-XIII te’n meeting nei ding chih himahleh member tamtak absent ziak in Aug 8, 2013 zinglam dak 11:00 a meeting om ding in ahun kisuan hi. Tuni a member absent-te DC in serious ngaih mahmah a, Aug 8, 2013 a meeting ah member -e telkim ding in theisak hi.
Civil Service Result sutzopna
UPSC nuaia Services (Prelims) Exam 2013 resutl suahkhiak a om ah singtangmi chihtheih mi 30 vel lawhching uh a, amaute bangzah hiam suahkhiak khitsa himahleh theihkhak nailouhte tuni in hong kisuah khenawn hi.
1. S Benjamin Vaiphei
2. Kambiakkim
3. K. Lalbiakchhunga
4. Benjamin D. Samte
5. Jamchinlian Naulak
6. Luaikhanlian Ngaihte
7. L. Hangmuanthang
Mission Fellowship-cum-Conference
Lamka, Aug-7: EBC Lamka North Divn Missions Joint Prayer Fellowship-cum- Annual Planning Conference 2013 kichi Aug 10, 2013 zinglam dak 10.30 in EBCC Zenhang Lamka ah kipan ding hi. Rev Paukhanmang Guite, DS Lamka North Divn. in hongkhe ding a, Rev L.Kham Kho Lun, Director of Missions in Pathian thugen in Workshop ah sinsak ding hi. Huai hun ah Evan H.Thangkhansiam in Mission Field report pe ding a, Upa V.Ginchinpau, Chairman Divn Working Committee in Khawmpi hun khak ding hi.
SDO/Thanlon thakin nasep pan
Lamka, Aug-7: S.Thienlaljoy Gangte, MCS in tuni’n SDO/BDO Thanlon len ding in Lalramsang Infimate, MCS apan charge la a, office kai in nasep pan hi. Lalramsang Infimate bel ADC(Dev)/Bishnupur len ding in kisuan hi.
JE dalna damdawi kaap hiding
Lamka, Aug-7: Saikawt PHC ah August 10, 2013 in naupang kum 0-5 kikalte lakah JE natna dalna damdawi kap hiding a, Saikawt PHC area in a huamkhak sunga mite kuapeuh kikap saktheih ding hi’n kigen hi.
Kimjoe May 29 Aug. 8 10am onward
(Stock - 306)
Imphal News:
Dakkal 48 sung gen strike puang
Kanggui, Aug-7: Kuki State Demand Committee (KSDC) in Kuki state pe dinga govt nawhna in August 13, 2013 zankim (mid- night) akipan dakkal 48 sung Manipur a Kuki mite luahna munteng ah general strike puang uh chihthu om hi.Tuni in Kanggui(Kangpokpi) ah KSDC leh Kuki organisation tuamtuam banah khaw tuamtuam a hausate meeting uh a, meeting zawh in KSDC a Info & Publicity Secretary George Guite in huai thu puang hi.Aman a gendan in Media leh medical kia khahkol(extempted) hiding a, General strike in govt establishments, educational institutions, business establishments, vehicular movements l;eh adangte huamvek ding chi’n Guite in gen hi.KSDC in Independence Day leng zatlouh ding in puang uh a,govt employee leh student-te leng Aug 15 a Independence Day lopna a tellou din ngen uhi.Guite in Kuki statehood ngetna lawhchinna ding in Kuki mipite’n General strike lunglut taka support chiat dingin theisak hi.
Secretariat building complex enkhia
Imphal, Aug-7: Manipur Chief Minister O. Ibobi Singh in tuni in Chingmeirong a Manipur Secretariat complex kibawl enkhia nei hi.Huai hun ah Manipur govt a top official-te banah PWD official-te leh Manipur Secretariat staff te’n Chief Minister zui uhi.Chief Minister in Manipur Secretariat complex bawlna a nasep paidan leng ngentel takin enzui a, nasep houhthei pena sem ding leh akin lma zawhsiang leng sawm ding in nasemte theisak hi.
Patriots’ Day zat hiding
Imphal, Aug-7 : Manipur govt inntekna in August 13, 2013 in Patriots’ Day zat hiding hi. Huai tawh kisai programme poimawh deuhte zinglam dak 8.00 in Yaiskul a om Hicham Yaichampat a Bir Tikendrajit han ah zahna piak hiding a, Palace compound a Thangal General temple ah leng zahna piak hiding hi.Programme zatna zinglam dak 8.00 in kipan ding a, nitaklam dak 4: 00 a zawh hiding chih ahi hi.
Road Connectivity of Hill Districts kichi Workshop tuni in kipan
Imphal, Aug-7 : Tribal Research Institute, Manipur sponsored-na leh saina in tuni in Chingmeirong a Tribal Research Institute mun ah ‘two days Workshop on Road Connectivity in Hill Districts’ kipan hi. Huai ah Chief Guest in Dy. CM Gaikhangam pang kawmin hihna workshop hong hi. Functional President in RD & PR Minister Francis Ngajokpa pang a, Guest of Honour in Works Minister Dr. Kh. Ratankumar pang hi.
Chief Guest in a genna ah Manipur singtanggam a tuantual zawk ziakin phaijang bial sang in development programme leh Schemes ngah tamzaw uh hi’n gen a, hun paisa, tuhun leh tunung a lamlian omdan ding bukkawk kawmin leng thugen hi. state govt in phaijang kia puahlou in singtanggam naktaka puahzaw hidan in leng gen hi. Huaiziakin mipiten govt leh agencies tuamtuamte tung ah kipahthu gen poimawh chi’n gen hi.
Open Counselling om ding
Imphal, Aug-7: Academic session 2013-14 a Diploma course in Engineering, Pharmacy & Allied course tuamtuam ading in August 10, 2013 zinglam dak 10.30 in Takyelpat a om Govt Polytechnic a Multipurpose Hall ah Open Counselling om ding hi. Huai a telding candidate te’n original document tuamtuam tawi ngai ding hi.Engineering & Allied course adingin original testimonial leh 10+marksheet tawi ngai ding a, Pharmacy adingin 10+2 mark sheet tawi ngai ding chi’n Controller of Technical Education Manipur apan thusuak in gen hi.
IES ah lawhchinna ngah
Imphal, Aug-7 :UPSC saina a IES personal interview na result zan in suak a, huai ah Pausianmuang Tunglut s/o T. Ginzakham of Lamphelpat, Imphal lawhching hi. A kigendan in personal interview bel June 2013 in om a, zan a result suak ah Manipur apan ST mi 2 lawhching om a,khat pen Naga mi hi’n kigen hi.
S. Bidyalaxmi in Press-te kimuhpih
Imphal, Aug-7 : Manipuri numei kum 17 lela upa in ‘Stop Violence Against Women’ chih thupi nei in Northeast States teng phakkual sawm a, tua tawh kiton in tuni in Paona International Market a Manipur Cycle Club-te office ah press-te kimuhpih hi. Huai hun ah S. Bidyalaxmi in Aug 21, 2013 in Imphal akipan Nagaland tawn in Northeast States teng phak sawn ahihdan gen hi. Aman cycle zang ding a, huai zang in ni 110 sung northeast a state teng phaksuak sawm ahihdan gen hi.
Foreign News:
Nairobi airport ah meikuang
Nairobi, Aug-7: Kenya capital Nairobi airport ah meikuang nasatak om ziakin patauhna om a, Jomo Kenyatta International airport a meikuang ziakin airport nasepna khawlsak in om hi. Huailou in lenna a tuang khenkhat emergency landing tanpha om a,tuni zingsang dak 5.00(local time) vela thiltunna mun bel departure lounge a immigration section leh international arrivals area hi’n Kenya Civil Aviation Authority official in gen hi.
Musharraf damsung suangkulh ah?
Islamabad, Aug-7: Pakistan Prime Minister-lui Mrs Benazir Bhutto thahna tawh kisai in huai hunlai a vaihawm General(retd) Pervez Musharraf kigolh mah hiam chih suichetna dingin hearing om ding ahun August 20, 2013 adin ahun suan thak in om hi. Musharraf zan in anti-terrorism court ah "security reason" ziakin kilang a, criminal conspiracy leh Bhutto thahna tawh kisai a kigolh mah ahihleh damsung suangkulh ah tang ding hi’n kigen
hi.
Army te’n rebel 62 kaplum
Damascus, Aug-7: Syria sepaih te’n tuni’n Damascus khaw kiangah rebels pawl ambush bawlin mi 62 kaplum uhi. Syria military apan thusuakin amaute jihadist Al-Nusra Front member hi’n puang a, kaplup a omte tuailai(youth) ngen ahihdan leng taklang uhi. Tuabang kalah thusuak khenkhat in Eastern Ghuta a military post luh sawm a kuante ambush a om uh hi’n kigen hi.
Army Chief damsung kulkhum ding
Ankara, Aug-7: AKP government paihkhia a, gamsung thagum a thuneih khumna(coup) tawh kisai in Army Chief General İlker Başbuğ telin makai poimawh 3 te’n a sihma tan uh kulkhum tuak dingin court in thutankhum hi uhi. Erdogan makaih Justice and Development Party (AKP) in kum 2002 a vaihawmna alet lai un sepaih thahatna tawh paihkhiak sawmna a kigolhte lakah journalist 20 vel khahkhiak in om uhi.
Sports News:
C. Ronaldo leh L. Messi UEFA Award kituh nawn din kilang
UEFA in Best Player Award piak a sawm uh tawh kiton in players 10 telkhiakna om ah Real Madrid apan C. Ronaldo, Barcelona Lionel Messi leh Bayern Munich apan Franck Ribery ten vote tam mupen uhi. Tuni a telkhiak (shortlist) a om players 10 te lakah August 29, 2013 in mi 3 telkhiak hi nawn ding uhi. Man. United striker Robin van Persie 10na ah om zou hamham a, tulel a newsmaker Gareth Bale min top 10 ah om khalou hi. Bale in Premier League ah Awards nih tak sang a, tua nungin Real Madrid in World Record a leikhe ngam ahihdan uh taklang uhi.
Hiai UEFA Award bel kumlui in Barcelona midfielders Andres Iniesta in sang hi.
Hiai players te bel France khawpi Monaco ah journalists tuamtuam in electronic system tungtawn a vote a khiak uh hi a, mabanah players 3 ahihkiam hi nawn ding uhi. Ronaldo in season beita ah Champions League ah goal 12 khum in top-scorer hihna la, Lionel Messi in Spanish Primera Liga Barcelona te lakpih in, Franck Ribery in Bayern Munich te Champions League, German Bundesliga leh German Cup lakpih hi.
Numei lamah zanzek a Women’s Euro Champion Germany player 2 telkha ua, Sweden apan khat om uhi.German keeper Nadine Angerer, leh Lotta Schelin banah Sweden mi Lena Goessling ten vote tam mupen in top 3 luah uhi. Nadine Angerer in Women’s Euro ah penalty nihvei tak save hi. Numei lam ah leng players 3 maban ah telkhiak thak hi nawn ding uhi. UEFA Award bel September 5, 2013 in om ding hi.
Shortlist of Players (from top 4) :
4 Arjen Robben (NED) –Bayern München (57 points)
5 Robert Lewandowski (POL) – B Dortmund (39)
6 Thomas Müller (GER) – FC Bayern München (38)
7 Bastian Schweinsteiger (GER)Bayern München (32)
8 Gareth Bale (WAL) – Tottenham FC (24)
9 Zlatan Ibrahimović (SWE) – PSG FC (14)
10 Robin van Persie (NED) – Man United FC (10)
Dempo in jersey thak lahkhiakna nei
Goa Football powerhouse Dempo SC ten tuni in maban a 2013-14 I-League a jersey thak ding lahkhiakna nei uhi.Hiai hun in Head Coach Arthur Papas leh Club Director Shrinivas V. Dempo te leng kihel uhi. Hiai hun in Papas in vualzawhna pen tang gige sawm hi a, tua banah players te overall development poimawh hidan in gen hi. Kum 8 nung i et a leh Dempo te record hoih mahmah a, tua hunsung in I-League champion 5vei la ua, AFC Cup ah semi-final lut uhi. Dempo in season thak ah home jersey dingin blue leh black zang ding ua, away jersey dingin white leh black zang ding uhi.
Fenerbahce, Lyon leh Basel te play-offs adin qualify
Europe’s Premier Club Competition UEFA Champions League 2013-14 ading a qualifying match om lel ah Fenerbahce, Lyon leh Basel ten masawn zel in tu in final qualifying round lut uhi. Fenerbahce in Salzburg te 3-1 in zoukhia ua, tua tawh kiton in play-off adin qualify uhi. Hiai match ah Raul Meireles, Moussa leh Peirre Webo ten goal khum uhi. Match dang France club Lyon ten Grasshoppers te kimawlpih ua, huai ah Clement Grenier goal in 1-0 in vualzawhna tang ua, Basel in vangphathuaitak in Maccabi Tel Aviv te 3-3 in kidrawpih ua, aggregate in 4-3 a vualzawhna tang in play-off tang hamham uhi. Play-off ah Arsenal, AC Milan, Schalke leh Real Sociedad te kihel ding uhi. Play-off ah team 10 suakta ding ua, amau direct qualification tang team 32 te lakah kihel tou ding uhi. Group stage drawna bei Aug. 29, 2013 in om ding hi.
Direct qualifying teams :
* FC Bayern München (GER) – holders
* FC Barcelona (ESP)
* Chelsea FC (ENG)
* Real Madrid CF (ESP)
* Man. United FC (ENG)
* FC Porto (POR)
* SL Benfica (POR)
* Club Atlético de Madrid (ESP)
*Shakhtar Donetsk (UKR)
* O Marseille (FRA)
* CSKA Moksva (RUS)
* PS Germain FC (FRA)
* Juventus (ITA)
* Man City FC (ENG)
* AFC Ajax (NED)
* B. Dortmund (GER)
* Olympiacos FC (GRE)
* Galatasaray AŞ (TUR)
* B. Leverkusen (GER)
* FC København (DEN)
* SSC Napoli (ITA)
* RSC Anderlecht (BEL)
Football Thuthang:
** Man. United in R. Madrid apan C. Ronaldo lak kik sawm in panla uhi. Ronaldo bel 2009 a R. Madrid in 80 million pounds a aleikhiak uh ahi.
** Tottenham in winger Gareth Bale Spanish club R. Madrid kianga 105 million pounds a zuak ding uh hidan in gen uh.
** Arsenal in leikhiak a sawm uh Sporting Lisbon keeper Rui Patricio French club Monaco in leikhe ding dinmun in om uh.
** Newcastle midfielder Paiss Cisse Turkish club Trabzonspor in deih ahihdan uh taklang.
** Tottenham in Steaua Bucharest defender Vlad Chiriches 7 million pounds a leikhe ding dinmun in om uh.
** Everton in loan a Juventus midfielder Luca Marone lak a sawm uh Juventus in phal lou uhi. Amau leikhiak ahih ding a leh bel phal hiding in gen uh.
No comments:
Post a Comment