Manipur Express | October 5, 2013

Bus tuahsia ah mi 1 si
Lamka, Oct-4: Tuni sunnung dak 12:30 velin Mizoram Champhai area Ruantlang leh Mualkawi kikalah passenger 30 pua Sesih Bus (No. MZ04/4144) a brake fail ziaka accident in amun ah Zamlianthang (43) s/o Nawkdal of Sesih si a, midang 2 liam uhi. Thutut Zamlianthang ahihleh SBI Champhai Branch a Customer Assistant sem hi a, Sesih a Zomi Baptist khawmpi atel dia kuan tuahsia hi’n kigen hi. Bus ahihleh Paukhatlang s/o Hminglianniang of New Champhai hek hi’n kigen hi.

BRTF nasemte’n culvert tuang sung uh

Lamka, Oct-4: Tedim road apan Simveng zotna lampi bul ah BRO/BRTF te’n kum bullam in lampi akimkhat ah culvert bawl uh a, Sept 13, 2013 in lampi kimkhat (tumlampang) ah culvert bawlna nasep pan uhi. Huai tuni’n cement, suanghum leh leingoi zangin culvert tuang(floor) sung uhi. Culvert kisungthak zat ahihna dingin kha 1 vel hunla ding hi’n kigen hi.

Chairman,ADC/CCpur hongtung

Lamka, Oct-4: Langkhanpau Guite, Chairman, ADC/CCpur in Shillong a programme tuamtuam azat nungin tuni’n Lamka hongtung a, Tuibuong a ADC office tawn masa in office a pending file omteng hihfel hi. Aman Shillong ah Zomi student tuamtuamte tawh leng hun zangkhawm uh a, SSPP Jt HQ Shillong kum 50 chin lopna hunah Chief Guest in pang hi.

3rd World Zomi Convention cheplawkna
Lamka, Oct-4: 3rd World Zomi Convention Organising Committee makaih in Oct 5, 2013 zinglam dak 11:00 in Sim Veng a SYO Hall ah 3WZC cheplawkna kick-off program om ding a, Rev Lamkhogin Khaute, Executive Director,EOC in hong ding hi. Huai ah Chief Guest in Langkhanpau Guite, Chairman ADC pang ding a,Special Guest in Health Minister Phungzathang Tonsing pang ding hi. Huai ah Rev Thangkhangin, Director (Inst) in ‘Be a Blessed Nation’chih thupi zangin Pathian thugen ding hi.

CDDU pawl Medal 11 tawh hongtung

Lamka, Oct-4: State Platform for Disable People Orgn-te saina in Oct. 2-3, 2013 sung Imphal a Khuman Lampak Main Stadium ah ‘1st State Level Sports Meet, 2013 for Person with Disability’ om a, CCpur dist ai-oh in CCpur District Disable Union (CDDU) apan mi 35 vatel uhi. Amau tuni’n Gold Medal 4, Silver Medal 4 leh Bronze 3 tawh hongtung uhi. CDDU apan Gold Medel late- Paulginthang (100 metre race), Stephen Sanglun (100 metre race), Kimngaihrem (arm wrestling) leh Tinkholam (arm wrestling) hi uhi. Silver Medal late- Khailet Touthang (arm wrestling), Zenthianngaih (arm wrestling), Lamneivah (100 metre race) leh Dimneinieng (arm wrestling) hi uh a, Bronze medal late- Lalrosang (100 metre race), Ngamzathang Khongsai(100 metre race), Kimnuntheng (100 metre race) hi uhi. CDDU member te’n Bamboo Dance lahna leng nei uhi.

Yamaha FZ bike pekik di’n theisak
Lamka, Oct-4: 3WZC ding tawh kisai a Info&Pub dept –te’ gari zatlai Yamaha FZ-S(Black-Green) zan nitakin Uptown Media, Lamlian Veng, Bungmual ah a kizanglai gukmang in om a, a gutu leng thei uh ahihman in kintak in 3WZC Information Centre a koih dingin Co-Convenor in theisak hi. Gari ahihleh Chasis No. ME 121COE6C2022464, Engine No. 21 CEO22418 hi’n kigen hi.

PMEGP loan apply-te list kitakkhia
Lamka, Oct-4: PMEGP 2013-14 loan apply trade tuamtuam apan applicant 1418 teng category 3- KVIC, DIC leh KVIB a kikhen in Oct 7-25, 2013 sung zinglam dak 10:00 apan in DC office ah interview om ding hi. Tuni’n DC office ah KVIC apan loan apply mi 164 list kitakkhia a, hileleng KVIC leh DIC tungtawna loan apply-te list bel kitak nailou hi. KVIC tungtawna loan apply Sl.1-164 te’n Oct 7-10, 2013 sung interview neiding uh a, KVIC tungtawna loan apply 651 teng in Oct 14, 15, 17, 18 leh 20, 2013 sung interview neiding uh a, DIC tungtawna loan apply 603 tengin Oct 22-25, 2013 sung interview neiding uhi.

Housie Bumper draw
Zomi Football Club(ZFC) panpihna ding in Oct 5,2013 nitaklam dak 3.00 in New Bazar Bus parking area ah ‘Housie/Tambola Super Bumper’ om nei ding uh chihthu kiza hi.

HEADLINES:

State Assembly Election ah NOTA option zat hita ding-EC

Mizoram telin state 5 ah Assembly election om ding

New Delhi, Oct-4: Election Commission of India (ECI) in Mizoram state telin state 5 ah assembly election om hun ding tuni nitakin puang uhi. ECI thusuak danin state 5te ah Nov 11, 2013 apan Dec 4, 2013 sungin assembly election neih hiding a, election result leng ahun tawh kituak a puankhiak pah hiding chi uhi. Tutung assembly election om hun ah NOTA option kichi zat hiding chi’n ECI in puang uhi. State 5 a assembly election om ding lakah state 4 ah phase 1 in election zawh hiding a, huaite ahihleh Assembly seat 230 omna Madhya Pradesh ah Nov 25,2013 in election om ding a, Assembly seat 200 omna Rajasthan ah Dec 1, 2013; Assembly seat 70 omna Delhi ah Dec 4, 2013 leh Assembly seat 40 omna Mizoram ah Dec 4, 2013 in om ding hi. Assembly seat 90 omna Chhattisgarh ah Maoist pawl ahat mahmah ziakun election leng phase 2 in om ding a, huaite Nov 11 leh Nov 19, 2013 hiding in bikhiah ahi hi.

VS Sampath in a gendan in election neihna ding state 5 ah voter crore 11 val om a, constituency 630 pha in polling station 1.30 lakh ah vote khe ding uh chi hi. Rajya Sabha Chairman leh Lok Sabha Speaker te’n mawhpaih a om MP/MLA te election ah candidate theih ding leh theihlouh ding tawh kisai official announcement a bawlzawh chiangun nomination leh candidate list tungtang hihfel hilai dinga, ECI in Supreme court thupiak a zahtak a, tuaziak mah in ‘Convicted lawmakers’ tungtang a ordinance kipia ECI in khauhtakin a paipih maithei chi’n Sampath in gen hi.

Chhattisgarh state adingin thu buaihuai mahmah om a, huai bel South Chhattisgarh leh Kanker banah North Chhattistgarh a Ranjnandgoan region ah Maoists te’n nopneh takin constituency 18 thuzawh uh chih ahi hi. Tua ziakin ECI in huai bial teng phase masa ah polling om ding in bikhiah uh a, security kichingtak koih hiding a, vote khiakma, khiaklai leh khiaknung tanpha enkai ding chi uhi. Chhattisgarh assembly election adingin centre in special security personnel pia a, Election commission in Nov 1, 2013 apan Chhattisgarh bial lut dingin security personnel 50,000 bikhiah khin uh chih hi. Chhattisgarh a 2nd phase state election ah constituency 72 apan mipi(voter) te’n a palai ding uh tel ding uhi.

Dec 8, 2013 in vote sim kipan ding a, poll process tengteng Dec 11, 2013 in zawhsiang hiding hi. Chief Election Commissioner VS Sampath makaihna election commissioners H S Brahma leh S N A Zaidi te’n tuni in state 5 a poll schedule ding puangkhia uha, election model code of conduct leng zat kipan hi. Nov- Dec 2013 kawmtuah in state 5 a assembly election om hunah NOTA kichi "none of the above" (NOTA) button system zatpat hiding a, hiai pe’n voter khempeuh in electronic voting machines (EVMs) tungtawnin candidate-te’ lakah deih anei kei ualeh zalentakin kuamah ka deih uh ‘None Of The Above’ (NOTA) kichi anuai nung pen a om ding meek thei ding uh chi uhi. CEC Sampath in a genbehna ah, candidate-te’ lak ah khat vote teitei ding chih thu omlou a, deih i neihkei leleng kuamah ka deihkei chih hangsantak a i taklat ngam poimawh a, hiai tungtang mipite’ lakah theihsiamna uangsem a bawl poimawh lai ding chi hi.

Tualou in in Delhi Assembly hun(term) Dec 17, 2013 in bei ding a,Madhya Pradesh Assembly hun bel Dec 12, 2013 in beiding hi.Mizoram Assembly hun leng Dec 16, 2013 in beiding a, Rajasthan Assembly hun bel Dec 31, 2013 in bei ding hi. Chhattisgarh Assembly hun ahihleh kumthak January 4, 2014 in bei ding hi.

States Seats Polling

Phase 1 Phase 2

Chhattisgarh 90 11 Nov 2013 19 Nov 2013

Madhya Pradesh 230 25 Nov 2013

Rajasthan 200 01 Dec 2013

Delhi 70 04 Dec 2013

Mizoram 40 04 Dec 2013

Dist Level Literary Competition hunkhakna om

Lamka, Oct-4: SSA &RMSA/CCpur saina in tuni Hiangtam Lamka a YPA Gen.HQ Hall ah ‘District Level Literary Competition 2013’ hunkhakna functiona om a, Phungzathang Tonsing, Minister (Health &FW, GAD, CADA) in Chief Guest a pang in uap hi. Huai hun ah Functional President in H.Deleep Singh, IAS, Director of Edn (S) & State Project Director, SSA & RMSA pang a, Dist Level Officer tamtak in leng uap in kipahman tuamtuam hawmna leng om hi.

Chief Guest in agenna ah tuma in school tuamtuam ading in Dist Level Literary Competition om ngeilou a, DC/CCpur felna ziaka omthei ahihziak in pahtakthu gen hi. Kum 2 vel paisa in CCpur dist in SSC exam centre neita a, tuailai laisiam tamtakte’n Lamka mun ah competitive examination tuamtuam pethei uh a, maban ah hong poimawh semsem ding hi’n gen hi. Tuni a paikhawm teng in thupi a kizang ‘Our role in Nation building’ chih theithak chiat ding in gen hi.

Functional President in agenna ah thil tuamtuam ahoihlamte Dist HQ apan kipankhe ding mah hi’n gen a, competitive exam tuamtuam ah CCpur dist mi tamtak lawhching in laisiam leng mi tam hi’n gen hi. State Level ah Nov 2013 in class VIII-X student-te adin Talent search examination om ding a, tukha top lamin dist teng apan asiampente ading kidemna debate, quiz leh essay competition om dingin gen hi. Director of Education leh DC kia in thilteng enzui thei veklou a, school hoihna ding in School Management Development Committee(SMDC) te’n mawhpuakna lian in poimawh petmah hi’n gen hi.SMDC ah Chairman in Headmaster pang a,Senior Teacher khat Secretary hi a,member in khawsung hausa/Village Authority Chairman, educationist, parents leh NGO apan palai 1 tel hi’n gen hi.

SMDC in school kaihoih leh kai hoihlou teacher-te etzuina banah school tawh kidai nasep leh contruction himhim amau tungtawn a sepkhiak ahihman in active tak leh chihtakna tawh kithuah in thilteng a etzui(monitor) uh ngai ahihdan gen hi.

Right to Education Act lawhching hehu naikei mahleh awla lawhching touzel hi’n gen Director in gen hi. Aman agenbehna ah kum 2014 apan zat ding school calendar kichi govt in bawlkhiat sawm a, huai bawlkhiat hunhun in school tengin exam hun, summer leh winter vacation akibang a neithei ding hi’n gen hi.

Tuni a programme zatna ah kidemna tuamtuam a kipahman mute laka piakkhiakna leng om hi. Huaite Painting: (children with special needs 9-13yrs) ah 1st in Kajol Das (class III) of Kingship school, 2nd in Kimneivah (class IV) of Khengjang JB school leh 3rd in Pauminlian (class I) of Dawn school hi a, 14-18 yrs ah 1st in Ngamkhothang(class VI) of St. Mary’s school, 2nd in Thanglet (class VII) of S. Ideal H/S leh Jangngam (class V) of Bethany Christian Hr. Sec. school hi uhi.

Painting: Sub-Junior ah 1st in Kim Jolly (class V) of KGV,Tuilaphai; 2nd in Pauminlal (class V) of Salt Brook school leh Lianmuanlal (class V) of Hermon English school hi uhi.

Junior ah 1st in Kaiminlian (class VI) of Salt Brook school; 2nd in Mangminthang (class-VII) of Sunshine English school leh 3rd in Jackson Chibu (class-VIII) of , Gilgal English H/S hi uhi. Senior ah 1st in Nempineng (class IX) of Salt Brook school; 2nd in Goubiaksang (class IX) of Hermon English school leh Thunkym Lakphieng Gangmei (class IX) of Gilgal English H/S hi uhi.

Singing/Solo: Sub-Junior ah 1st in Hatneichong (class V) of KGV, Tuilaphai; 2nd in Chingthianmuang (class V) of Ebenezer Academy leh Thanglemlian (class V) of Vungzagen govt H/S hi uhi. Junior ah 1st in Joicy Chinglemsiam (class VIII) of L.Foundation school; 2nd in Nemlemkim (class VII) of Ebenezer Academy leh Prissila Lianhoih (class VII) of Ebenezer Academy hi uhi. Senior ah 1st in Tracy Ngaihching (class X) of Phungkhothang Govt. H/S; 2nd in Chiinlianvung (class IX) of L.Foundation school leh 3rd in Vungbiakching (class IX) of Ebenezer Academy hi uhi.

Elocution: Sub-Junior ah 1st in Tabitha (class V) of Grace Academy; 2nd in Frida Chonghoihthem (class III) of Greenwood Academy leh 3rd in Kim Dina (Class III) of St. Xavior school, Thanlon hi uhi. Junior ah 1st in Jenny (class VI) of Blue Star Academy; 2nd in Thangsuanlian (class VI) of Hermon English school leh 3rd in Dimzasiam (class VIII) of St. Peter’s school hi uhi. Senior ah 1st in Benjamin (class X) of Singngat Standard H/S; 2nd in Niangthianmuang (class IX) of St. Peter’s school leh 3rd in Akip Kom (class X) of Hermon English school hi uhi.

Choroeography: Junior ah 1st in T.E. Paul H/S, Samulamlan block; 2nd in Sunshine English school leh 3rd in L. Foundation school hi uh a, Senior ah 1st in Grace Academy; 2nd in T.E. Paul H/S leh 3rd in Salt Brook School hi uhi.

Skits: Senior ah 1st in St. Xavior School, Thanlon 2nd in Sundayson and Party, Sagang H/S, leh 3rd in St. Joseph School hi uhi. Dist Level Literary Competition 2013 ah CCpur block; Singngat block; Thanlon block; Henglep block; Tipaimukh block leh Samulamlan block apan student tamtak tel uh a, huai teng lak ah CCpur block in Overall Champion la uhi. Individual kidemna ah 1st in Rs.1200 + trophy + certificate, 2nd in Rs 1000 + trophy + certificate banah 3rd in Rs 800 + trophy + certificate ngah uhi. Group kidemna ah kipahman in 1st ah Rs.2000 + trophy + certificate; 2nd ah Rs 1500 +trophy + certificate leh 3rd ah Rs 1000 + trophy + certificate ngah uh a, kidemna tel kipahman lakhaloute kiang ah leng consolation prize piak hi uhi.

IMPHAL NEWS

Governor leh CM akipan message

Imphal, Oct-4 : Manipur Governor Dr Ashwani Kumnar leh Chief Minister O. Ibobi in Oct. 5, 2013 a ‘Mera Chaoren Houba’ festival tawh kisai in Manipur mipite deihsakna thuchah puang uhi. Governor in Manipur ah kumteng in Mera-tha(Sept-October) lakin Mera Chaoren Houba kichi kipumkhatna leh kituahna latsakna in festival nuamtak zat hisek hi’n gen a, tutung in leng hiai festival zatdan phatuam leh a hoihlam a kuapeuh in zang chiat dingin deihsakthu puang hi. Chief Minister in Mera Chaoren Houba kichi Manipur adin traditional festival poimawhtak hi’n gen a; hiai in Manipur phaijang leh singtanggam a khawsate ki-unauna leh ki-itna langsak hi’n gen hi. Tutunga zatna hun ah leng Manipur mipite laka kipumkhatna hih kipsem dinga deihthu puang hi.

FCI in Nov stock laklut din phal

Imphal, Oct-4: Food Corporation of India(FCI) in November kha ading Manipur antang leh wheat(sapbuh) advance a pawkhe thei ding in Manipur govt a Consumer Affairs Food & Public Distribution(CAF & PD) deptt zasak chihthu om hi. Hibang kalah Targeted Public Distribution System (TPDS) nuaia October 2013 kha ading antang 7791 metric ton leh wheat 2321 metric ton leng hawmkhiak bangmah om nailou in Imphal a FCI warehouses ah omlai chihthu kiza hi’ Huailou in Sangaiprou leh Koirengei a FCI godown ah tulelin antang 13,200 matric ton leh wheat 4,314 matric ton koihsa in om a, huaite Truck 400 valin Jiribam leh Dimapur apan FCI warehouse apan antang leh wheat hong puaktung uh a koihna ding omlouh ziakin Truck tung apan nawnkhiak theihlouh in om lai chih ahi hi.

AGP makaite’n MPP leader-te kimuhpih

Imphal, Oct-4: Assam Gana Parishad (AGP) Working President Atul Boraoh, General Secretary leh ex-Minister Pradip Hazarika te’n Manipur hong pha in Manipur People’s Party (MPP) President Sovakiran tuni’n Imphal a a office ah kimuhpih uhi. Hiai hun ah India a Regional Party te’n maban a Lok Sabha election ah pankhawm ding thu genkhawm uhi. MPP President Sovakiran in press-te kiang a gendan in regional party te’n Oct. 20 & 21, 2013 in Guwahati a Brahmaputra Ashoka Hotel ah political convention nei ding uh hi’n gen hi. Huai ah Pubjab a Akali Dal, Andhra Pradesh a TDP leh North East a regional party tuamtuam tel ding uh hi’n gen hi. MPP te’n Indo-Myanmar gamgi tawh kisai a border fencing thu leng huai hun ah pawlut ding uh hi’n Sovakiran in gen hi.

Phaijang bial ah office suti ding

Imphal, Oct-4: Manipur phaijang mite adia festival poimawh leh minthang ‘Mera Chaoren Houba’ ziakin October 5, 2013 in Imphal telin Manipur phaijang biala govt office-te suti vek ding uhi. Hileleng Manipur singtanggam ah bel Oct 5, 2013 suti hilou ding a, DC te’n amun tawh kituak festival dang suti hizaw dia thusun a bawl uh govt in a pomsak ziakin Lamka telin singtanggam mun tamzaw ah suti hilou ding chihthu om hi.

Dakkal 12 sung General Strike

Imphal, Oct-4: Committee on Protection of Land in Border Fencing,Manipur pawlin Indo-Myanmar border fencing ziakin Manipur gam liankhop tak Myanmar gama laklut hiding chih patauh thu puang kawmin Manipur Governor, Chief Minister leh Principal Secretary(Home) ah memorandum piak himahleh huia tungtang ah govt in tuni tan in panlalou chih ziaka lungkimlou in Oct. 7, 2013 zingsang dak 5.00 akipan in dakkal 12 sung Manipur pumpi ah General strike puang uhi. Bandh om sung in water supply, medical leh fire service khahkol hiding chi’n puang uhi.

Amulspray packet ah ganhing

Imphal, Oct-4: Naungek-te adia bawngnoi powder kigen minthang ‘Amulspray(infant milk powder)’packet kawm ah ganhing(insect) a om ziakin a leite pilvan mahmah ngai chihthu om hi. Thutut kingahdan in Ningthoujam Anand of Tera Yengkhom Leirak in Tera Tongbram Leirak a Oriental College kiang ah zan in Amulspray milk powder (gram 500) packet khat Rs. 146 in lei a,tuni zingsang in singpi bawlsawm in a hon leh bawngnoi powder lak ah ganhing Meitei-pau a “tin kokchaobi” kichi khat a om ziakin mangbang hila hi’n kigen hi. Huai bawngnoi powder bel Gujarat Co-operative Milk Marketing Federation Limited te’ bawl hi’n kigen a, April 2013 a kibawl hi a, March 2014 nungqa ahun bei(expire) pan ding chih ahi hi.

Student 300 adingin teacher 11 om

Imphal, Oct-4 : Manipur govt in education puahphat a sawm tawh kiton in Thoubal district sung Arong High School ah student 300 omte’n teacher 11 lel nei uh hi’n DESAM ten mukhia uh chih ahi hi. Headmistress M. Kamala in a gendan in Arong H/S ah Nursery apan Cl-X tan om a, teacher omzah leh student omzah kikhe mahmah a, teacher kidaihlouh kia hilou in vanzat tuamtuam tamtak kisam hidan in gen hi. Classroom kidaihlouh ziakin room khat ah akigawm a class neikhawm a om hidan in gen a, tua banah clerks leh chowkidar leng omlou hidan in Kamala in gen hi.

AE akipan EE in kaisang

Imphal, Oct-4:Manipur govt nuai a AE(Civil) 2 tutung in EE(Civil) in kaisang uhi. AE(Civil) akipan EE(Civil) a kaisang mi 2te T. Lamzamuan leh W. Prashanta Kumar hi uhi.

FOREIGN NEWS

Al-Qaeda samlut tu’n President ding

Kabul, Oct-4: Afghanistan gamsunga Al-Qaeda helpawl samlut tu, Abdul Rassoul Sayyaf in Presidential Election ah President tuh dingin kisa a, tuni mah in Kabul ah Independent Election Commission theihpihna ah office ding hongkhia hi. Kumnawn sungin NATO leh U.S. makaih gamdang sepaihte’n Afghanistan pawtsan ding uh a, tua ziakin Presidential election pen poimawh mahmah ding hi’n kigen hi.

Muslim makai thah ziakin Kenya buai

Nairobi, Oct-4: Kenya a Mombasa khawpi ah zan nitak in car sunga mi 5 vel omte bukap hi uh a, biakbuk a sinsakna neizou innlam zuanlai Muslim makai(cleric) poimawh mahmah Sheikh Ibrahim Omar telin anungzui mi 3 kaplup hi uhi. Tua kithahna bel Nairobi shopping mall a Somalia helpawl Al-Shabaab te’n mi 60 val a thah zawh ua thiltung hi a, amah leng Muslim gindan kulmut tak sinsak a, biakbuk sunga helna bawl dinga tuailaite makaihtu ahihman in, Nairobi shopping mall thiltung tawh kizawi tawn dingin gingta uhi. Muslim makai poimawh kaplup ahihziakin tuni’n Kenya gamsung mun tuamtuam ah Muslim community leh Security force kal a tension lianpi om in, mipi thangpaite’n kiphinna husa ngaihtak nei uh a, Police-te gamtatna hi’n ngoh uhi. Muslim te’n Mombasa ah Christian-te biakinn haltum ngal uh a, Police-te’n thiltung etkaina dingin teargas tanpha zang uhi.

Police te’n Philippine helpawl inn luh

Manila, Oct-4: Philippine Police te’n tuma a Muslim helpawl MNLF helpawlin southern Philippines area abuluh uh tawh kisai in Nur Misuari kichi Muslim makai khat inn luh uhi. Chief Inspector Ariel Huesca in AFP atheihsakdan in officer te’n Zamboanga city nawl a Nur Misuari tenna inn kisungkalh pen bomb zanga hihsia in luh uh a, himahleh amah omlou in Philippine simlam(southern) ah kibu hiding in gingta uhi. Khalui in Philippines ah MNLF pawlin minautang salmat in nei uh a, kikaptuahna ah mi 200 val thah in om uhi. MNLF in sepaih 12,000 vel nei uh a, khalui a khawsung aluhna uah inn 10,000 vel bukap uhi.

Italy ah siluang 127 mukhia

Rome, Oct-4: Italy kiang a long(boat) tuahsiatna ah zan akipan tunitan in siluang 127 vel muhkhiak in om a, midang 150 vel hutkhiak himahle uh aza a sim omna kitheilou ahihman in siluang kibehlap lai ding hi’n coast guard official Floriana Segreto in gen hi. Long tuahsiatna bel Lampedusa kiang hi’n kigen a, Libya akipan Italy zuanlai hiding a gintak ahihbanah tuikawm metre 20 vel a tum hiding chi uhi. Coastguard te’n longneu leh helicopter zang in tuahsiatna mun ah zonglel uhi.

NATIONAL NEWS:

Kolasib ah 74th anniversary zatna om
Aizawl, Oct-4: Hmar Students' Association (HAS) te’n Kolasib munah kum 74 chinna thupitakin lawm ua, huai hunah Hmar sung a heutu tamtak paikhawm uhi. HSA in ahihleh Mizoram’ Sakawrdai munah College khat bawlkhe dingin Mizoram state govt ngen uhi. Hmar Nam sunga organisation upa pen a chiamteh ahihleh Hmar Students’ Association hi’n kigen hi. HSA, Kolasib Joint headquarters inn tekna in apaisa Oct 1, 2013 apan tuni dong 74th anniversary zatna om a, tua hunah, joint headquarter tuamtuam, units leh branch tamtak apan makaite tel uh chih ahi hi.

HSA, Silchar Branch, HSA, Sinlung Hills Joint Headquarters leh Lamka (CCpur) apanin leng makai tamtakin hiai hun uap uh chih hi a, program bangkim tuni in zawhsiang in om chi uhi. Diakkawn YMA Hall ah indoor program tuamtuam sai in om a, tua hunah khaw kim khawkiang apan inleng mi tamtak paikhawm uh chih ahi. Rothanglien Khawbung, General Secretary HSA, General Headquarters; Lalthawmlien Neitham, Chairman, Barak Valley Hill Tribes Development Council, Government of Assam leh Vanlallien Pulamte, Assistant Professor, Dept. of Political Science, G C College, Silchar leh Lalmuanpuia Punte, Vice President, NESO te’n Chief Guest hihna tawh uap a, Lalremruata Varte, Zolife editor, Aizawl leh Lalthlirlien Darngawn, Treasury Officer, Silchar, Government of Assam te’n Guest of Honours hihna tawh uap uhi.