By: Dr. R. Sanga
“…Bang diing a hiai thil mulkimhuaitak hih nata mai a….?” chi a Pasian in houpih hinapi’n Kaina in angeingaih tuan het louh ziak in athuakzoh vaal gawtna atung ah Pasian in atungsak chih Genesis 4:13 &14 ah i mu hi.
Gam leh Nam damna diing in Israel suante lak a Levi chi a Siampute’n kithoihna laan in Siampu Lianpen (High Priest) in kum khat in khatvei zel dantan sungnungpen a lut in Kithoihna a laan sek hi. Hiai kithoihna pen gamsung pumpi huap a Israel mite sik-le-taang a ngaihdamna diing a “Thillat” ahi hi. Tu, Thukhun Thak hun in ahihleh Pasian in tangtak a mihingte houpih lou in atapa Jesu Khrist ah, houpih in, thu agenzawta hi (Hebrute 1:1-2). Daan lui, amasa pen kheek a hong om in, Daan Thak Jesu Khrist sisan a Thukhun Thak leitung mihingte tengteng zuih diing a piak in om hi. I zuihnop-le-zuihnop louh bel mimal sia-le-pha theihna a kinga liuliau ahi.
Gitlouhna leh sualna ahuaise mahmah mai a, Sodom leh Gomora khopi phiik mei leh kaat a kangtum dimdem in gawtna mulkimhuai in anuaigawp chih i thei hi. Sualna leh giitlouhna meipi’n hon tuam kimvel asuakta hi. Mihing pilna in tawpchiang nei ahihna ah kingakna diing taktak bel Toupa Pasian ahi chih theihna neih lel ahuntawk kei a; kiteltak a theihkaakna neih kisam petmah hi. Dik leh kilawmtak bang a kilang atawpna lah manthatna hi ngal; Nekgukna leh Golhgukna chihte (Corruptions) tengteng mihing lungsim ah mi lian leh mi lalte a diing a vualzawlna, chettheihna leh mipilte gamtatna bangdan a koihsuk mai… Nekguk-taakgukna (Corruptions) a kibual kha lou mi lian, mi lal khenkhat om bang hitaleh – Pasian ngaih a mi diktat hinapi in – huchibang mite’n i sosaiti ah bel mihai chih lohtaak lel diing uh suak hi. Thilhoih pen hoih lou chi a, thilhoih lou pen a hoih chihna khovel in i gam pumtuam ahihman in “Thudik” kua’n tangkoupihta diing hiam? I Gam, i minam damna diing in Thudik tangkoupih lah thil kul-le-poimoh penpen ahi ngal si a!
Neekzonna, niteng khosakna leh sum-le-pai zonna (business/entrepreneur) lam ah khawdaak hun lua hi. Lamka khopi sung ah Ngalsaute leh pawlam mite’n Tedim Road & Tipaimukh Road ah mun hoih leh poimoh – mipi punkhawm baihlamna mun kizente ah Sumbuuk ngaak in, thuneitak in hong khosa maimah uhi. New Lamka huapsung nasan ah Ngalsaute’n maingaltak in sumbuuk hong bawl in numei pawngsual ngam zong hong omta uhi. Kum 10 nungchiang in Zomite’ Economy bang dinmun ah aom taphet diam chih ngaihtuahtham ahi! Kiakniam lam manoh maimah diing hileh kilawm abang hi…?? Tulel dinmun a Zomite’ Economy huaise mahmah leh adetdou kingakna diing mumal bangmah om lou hi. Kumpi nasepna mimal a ngah bangzah hiam ana omta mahleh mipite Economics bawlphatna diing in ahuntawk kei hi. Neektaak zonna toh kisai adetdou Khantouhna (Sustainable Economic Development) i gam ah piansak kul-le-poimoh ahi. Zomi laisiam nungak-tangval tamtak India khopi: Delhi, Bangalore, Chennai, Hyderabad, Shillong, Mumbai, etc., etc., chihte baan ah Gamdang (Foreign) nasan ah kithehzaak in om uhi. Bangziak a i pianna gam leh khanletna mun-le-mual a laisiam tamtakte om ut lou uh hiam? Tomchik a dawnna bel: “Corruption” uang lua – kaam leina diing sum nei zou mahmah lou chih ahitangpi vek maimah hi...! Lungkhamhuai hi mai….
Mipite makhua khualna ziak in Schemes tuamtuam Phualpi Sorkar in kum teng in bawl gige a; Annual Plan a guanlut ahih dungzui in State Governments tungtawn in sum-le-pai tam huntawk, State teng ah pekhe zel mahleh; India-Mahni kivaihawm ahihnung kum 60 vaal zeen paita, Manipur-Zodawn a teeng mipite lak ah bel ahi diing bangtak a sum-le-pai zat a om hia/om lou chih theihphak malak in huchibang Project(s) om ahihlam nangawn mi tamzawte’n phawkpha baan vet lou in gentheitak in khosa nitnit lai uhi. Zodawn khosakna ahaksat luat tel ziak in New Lamka ah kibendim metmot mai, nupi mehzuak, papi Rickshaw hawl leh kilohna diing zongtawm a neekzong tampi omta hi. Zodawn neekzonna pen etkiik kiphamoh petmah hi. Khutnasem mite kiang ah Zohuan bawlna diing, akilawm hun panpihna sum-le-pai State Sorkar in Budget a aguanlut toh kituak a pia hileh bel Zodawn a neekzonna toh kisai gah hoihtak muh diing tam mahmah diing a; Lamka khopi leh asehvel a sualna, giitlouhna leh numei-pasalna toh kisai a ‘Thaangtatna’ leh ‘Corruption’ hichi lawmlawm a uang di’n a gintakhuai kei hi. Aziak bel mi tamzawte’n khutnasep pibawl diing ua, zulhzauna leh zautatna kiamtuan mahmah diing hi.
Khaw-ul kaai a neek muh diing chih pen Bible sinsakna toh akituak lianlian khat ahi hi. Himahleh tulai in bel mi tamzawte’n nuamtak leh baihlam theipen a sum-le-pai tampi ngah diing, sem lou a niang-le-tai a om diing chih bekbek lung-gulh pipen asuak maimah hi. I sepgah neek diing: “…Kuapeuh in na a sep nop keileh, neek leng ne kei hen. Na lak ua khenkhat Daan lou bang a om nakte tungtang ka za ngal ua, huchibang mite’n na himhim asem kei ua, alawptawp zaw uhi” (2 Thessalonika-te 3:10, 11). Khristian sabiak paizia ah bel mahni khutnasep gah neek diing, i sepgah ahih keileh neek louh diing chihna suak hi. Thadahna kichi omzia bel ‘Corruption’ chikhat ahi peuhmah hi. Nasem lou a om pen lawptawpna in zui zel in, noptal utna toh kithuah angkawmna bang, diktat louhna chiteng leh amulkimhuai duhgawlna baan ah neekguk-taakgukna ih khotang hinkhua ah nasia petmah hi.
Mipi nautangte khualna ziak leh kum bangzah hiam nungchia mahni mimal a akitoudelh theihna diing uh ngimna ziak a Phualpi Sorkar in Schemes tuamtuam abawlte lak a khat: Job-Card chi a mitamzawte’n i theih uh; khosakna niam leh haksa zawte’n kumkhat a ni zakhat tha pia in kilohna ngah in nitha hoihtak piak in om uhi. Manipur Zodawn ngei ah zong nasatak in hiai Job-Card tungtawn in mi tampite’n sepna ngah in hamphatpih omta uhi. Adetdou, kingaknatham neekzonna hiai Job-Card tungtawn a piansak/bawlkhiak diing chih pen Phualpi Sorkar tupdan hinapi in eite lak ah ahihleh Job-Car khawng Job-Bolero khawng suaksak pawl om hileh kilawm abang maimah hi. Deputy Commissioner makaihna nuai ah alian, alal leh thuneihna neite baan ah khawsung Hausa khawnbawl upate leh khawsung mite pangkhawm a kithulual in asetdet theih diing Zodawn khua tuamtuam ah Zohuan toh kisai ‘Plan & Project’ guanlut hi henla, khut nasep pibawl mahmah le’ng mi nautang in phattuampih chiat diing uhi.
Job-Card tungtawn a hamphatna hoihtak Phualpi Sorkar in hon bawlsak ahi chih Zomite kiphawk a, amanphatdan theisiam hi le’ng bel tuni chiangchiang ah adetdou neekzonna toh kisai mit a muhtheih bangzah hiam apiankhiak hunta hi. Tua bel Lamlian gei hahsiang, nullah hahsiang in tui luankhiatna phiat leuhleuh, khawsung hahsiang, Lou lampi gei khawng a loupa vaat ningneng, ahihke’h bangmah himhim sem lou – Khosung Hausa Khawnbawl Upate toh kitheisiam a sum hawm zaizai zel, huchia lungkim mahmah – hoihtak in sui detdet le’ng bel eimah leh eimah kituisabuah nilouh i hihlam kikhawnung phawk diing hang a, Sial-lou taannung a Sial-dai kaih saang in tu hun a adetdou diing geel a, sep diing pen mumaltak leh omzenei a bawlkhiak hun petmah ahi hi. Etsakna di’n: Zohuan bawlna diing in Project mumaltak bawl in; khawsung Hausa khawnbawl upate toh kithulual a lung-geel detdet a hih himaizen lehang Job-Card in khangsawn-mounoute neek-le-taak zonna ah dawnzangkhai mahmah diing hi. Zohuan bawl diing, nitha Job-Card tungtawn a ngah lai zawmah diing, agah eimah neek diing hilai – hiai kaan a hoih bang a omnawn di’a chihtuak hi lou maw?? Tua bel hiai Job-Card ahong om akipan khutnasem mite thadah deuhdeuh, “Thadah kizilna vanzat hoihtak suaksak gawp lel hi le’ng kilawm maimah hi....” Bangmah sem lou a, baihlamtak a sum muhna naak (free source of income) suaksak maimah houh i hi uhia…! Corruption, Corruption & Korapson! Thil Mulkimhuai Lua ahi….!!! Kua pat hiam aw, Akpi pat
No comments:
Post a Comment