Manipur Express | January 14, 2014

UP govt in Delhi CM vengtu dingin security kiching pia

Arvind Kejriwal in mipi ma ah kiniamkhiak sem sawm

New Delhi, Jan-13:  Delhi Chief Minister Arvind Kejriwal in zan akipan kal tengin mipi tawh hun zatkhawmna ‘public feedback session’ kichi  zatsawm mahleh mipi’n a bawh buai luat ziakin hibang hun avangkim azat hizaw dingin gen a, huchi kalah, mipi ma ah aniam zaw semin ka kinem khiaklai ding chi hi. AAP Convenor banah Delhi CM  Kejriwal in a genna ah alompi a mipi tawh kimuhkhawm sangin anai zawsem a kimuhtheih dingin vengchih ah ka paikual  ding a, Kiginni (Saturday) tengin Delhi a veng tuamtuamte ka ban phak kual  ding chi hi. Delhi CM Kejriwal bel Uttar Pradesh state sunga om Ghaziabad khawpi a Kaushambi bial ah a innkuanpihte tawh   khawsa hi a, aman vengtu ding  security poimawhlou  chi mahleh a dinmun ziakin vengtu ding poimawhlua

hi a thei in Uttat Pradesh state govt in  tuni (Jan 13, 2014) akipan  Z-category security pia a, Sub-Inspector 3, Head Constable 7 leh Police Constable 20 in sun-le-zan in veng uh a,escort gari 2 adin  driver 2 leng piak in om hi.

            Arvind in a genna ah mipi tawh kithu zaktuahna ding in Call Centre honkhiak hiding a, online hiam post tungtawn a kithuzak theih ding chi hi.Huailou in kal khat in ni khat atuam in mipi tawh kithuahna din dakkal 3 sung hunzang ding a, huai din ani bikhiah hiding chi’n gen hi. Mipite’n a haksatna uh hon tunkei uhenla, ken amau haksatna ka va dong zaw ding a, a poimawh leh office na tuamtuam taisan in a tenna innte uah ka paikual zaw ding chi’n tuni in press-te kiang ah gen hi. Kejriwal in CM aletnung ni tamlou pai mahleh corruption tawh kisai a kigolhkha official 13 in jail bang zutta uh chih hi a, traffic police-te’ soisak khak a om Delhi a Rickshaw pu 20 val te’n zangna dopna (compensation) in Rs 20,000 chiat ngah uh chih ahi hi.

            AAP in mipite’ ading liauliau in ‘grievances online’ kichi bawlkhia uh a, huai tungtawnin govt officialte tungah hekna tampi omta a, huaite enzui dingin committee chi tuamtuam 3 dinkhiak hi a, committee member dingin mi diktat mahmah a theihte’ banah Journalist leh Ukil tanpha seh in om uh  a, amin ubel puankhiak hilou chi uhi. Amah hinna chiklai peuh lauhuai thei ahihdan security official lamte’n a gen hun un Kejriwal in ‘mipi vantang  adia kihumbitna taktak a poimawh leh mipite mah in hon humbit henla, kenleng mipite ka humbit ding, galvan ziakin mipite’n bitna a ngah tuankei ding ua, khantouhna detdou tak i ngah hun chiangin kivenven a poimawh nawn kei ding a, tua hun ka ngaklah mahmah” chi  hi.

Delhi govt in  tuni in Delhi CM Kejriwal vengtu dingin police personnel 14 piakbeh nawn ua, aman bel kei hon vengtu ding mipite ahi chi’n pang lailai chih hi. Uttar Pradesh’ Ghaziabad a a omna area ahihleh Kaushambi a Girnar Tower hi a, hun paisa a ahun zat bangin CM ahihnung in leng tuni dong inn vengte tawh kikawmtuah in hun zanglai chi’n a inn vengpa’n gen a, kum 4/5 apaisa a ami hihna tawh tuni dong a kibang gige lai chi hi. Hibangkalah Kamlesh Bahadur Circle Officer, Local Intelligence Unit (LIU) in tunitak a agendanin, Kejriwal in security poimawhlou a chih hangin amah venbit poimawh mahmah a, tua ziakin amah mimal vengtu dingin personal security officers (PSOs) 2 piak hi a, amaute sub-inspector rank tuak hi ua, SI khat ahihleh security guards 8 zelin veng a, mi 16 in uniform silhlou (plain clothes) in venbitna kipe gige chi hi. Tualou in a poimawhna munmun a taikual dingin head constable tuamtuam makaihin aguk agal in escort gari hunkhop mansa in om gige a, huai garite ahihleh Delhi apan hilou in Ghaziabad police-te apan ahi chi’n Kamlesh Bahadur in gen hi.

HEADLINE 2NA

SSPP 67^th Foundation Day-cum-Awards Distribution,2014 om  

Lamka, Jan-13: Siamsinpawlpi(SSPP) Gen HQ inntekna in tuni’n Hiangtam Lamka a YPA Gen HQ Hall ah SSPP 67^th Foundation Day –cum- Siamsin Awards Distribution – 2014’ om a,  Award tuamtuam tamkhop hawmkhiak in om hi.Tuni a hun zatna ah  PC Lawmkunga, IAS, Manipur  Chief Secretary khuallian in pang a, Guests of Honour in Armstrong Pamei, IAS leh Vungzamuan Valte, IRS pang uh a, Chief Host in Ms Jacintha Lazarus, IAS, DC/CCpur pang hi.

            Chief Guest in a thugenna ah student organisation-te’  thupi ‘education’ ahihdan gen a, Education kia hun nawnlou in khua-le-tui hoih hihna (good citizenship) poimawhta a, khawtang ah omdan kilawm  i hih ding ahi, chi hi.  Tulai khawvel pen tuailaite(youth) hun ahita a, khua-le-tui hoihtak a omna din tuailai hoih a om ngai chi hi. Aman  a genzelna ah tuailaite leh siamsin mite  tunung chianga makai dingte hi ua,  tuaziakin ‘civic sense’ neikawm a siamsin din hasuan hi. Student orgn min a thilnget  leng student-te’ adia kilawm  mah nget ngai  a, education tawh kisaikha hiloute ngetlouh  ding hi a, politics ah leng  kigolhlouh ding ahi chi hi. Huailou in khawsuahna taktak  dingin Civil Service mah poimawh a, ST reservation selou a mahni siamna  a lut sawm dingin  siamsinte hasuan hi.

            Armstrong Pame,IAS  in a gendan in Manipur ah student orgn laka school run omsun  SSPP himaithei hi’n gen a, society adia nasep hoihtak a neih uh kipahpih kawm in sunzom zel dingin ngen hi. Tuni a pahtakna ngahte’n malam kal sangzaw suan beh lai dingin ngen hi. Civil Service ka try lai in khawsung  a inn 50 te’n Rs. 100 chiat kithawhkhawm in hon huh ua, amaute hon deihsakna gah thupitak bangin,SSPP inleng tuabang a panlakna sunzom din ngen hi.  Armstrong Pame ahihleh Zeme Naga tribe hi a, govt. huhna tellou in  Tousem area lampi km 100 asau abawl ziakin national newspaper ah taklat in om hial  hi.

            Vungzamuan Valte, IRS in agenna ah, student te’n thildang sangin laisim mah poimawh ngaih din hasuan a, siamna taktak mah delh lehang kithaman pen ding, chi hi. Tulai in laizilna  ah leng siamna tungtuan poimawh a, laisiam maimai hithei nawnlou in midangte sanga tungnun zawk kia  khawsuahna ding om sun hi’n gen hi. Bangziak a eimi Chief Guest ding kitasam dek i hiam chi’n siamsinte dotna bawl a, khawsuah theihna dingin Civil Service  a lut in pibawl leng i nam tawisang in a om ding chi hi.

Jacintha Lazarus, IAS  in a genna ah, hibang award ngahte’n midangte leng hasuan ahihman in SSPP in sunzom zel din ngen a, award ngahthei dinga kuapeuh kisakkholh hoihpen chi hi. Hibang award-te’ govt in a bawl kilawm himahleh SSPP in award hawmkhia a govt official-te’ a chialkhawm pen thupi sakthu gen a, award ngahthei dingte leng SSPP in keklian a, tanzauzaw a saitheih hileh kidopsangna hoihtak hiding chi hi.

M Zamchinthang, Chairman, SSPP Standing Committee in sinlai naupangte’n siamsinna mah pibawl a, laisimte’n leng nu-le-pate kia mawhsa mailou a maban hoihzawkna ding tum ding leh huaimah laisimsan(purpose) ahihdan theithak din ngen a, eimite’ adin civil service mah poimawh pen chi hi. Lehkha bute lukham in hon zang unla, huchi’n a gah i nekhawm vek thei ding, chi’n siamsinte maban a muhkholhdan gen hi. Civil Service a lawhching a omchiang in, amah leh as innkuante ading kia hilou namsung leh mi-le-sate’n leng hamphatpih uh chi hi. Student te’n i hunzatna ah haipih hial in i tup tangtunna  di’n panla ni, tuni pen na nitawp(last day) banga ngaihsun in hahtakin panla in, chi’n student-te hasuan a, lawhchinna dingin Pathian phawk a omte mah gahsuah uh chi hi.

Award hawmkhiakna hun ah Doner Awardee, Meritorious Awardee, Honour Awardee nuaiah award chi tuamtuam tamkhop hawmkhia uhi.  SSPP Foundation Day zat ahih tawh kitonin  Zaila Sub-Committee saina a kibawl  Siamsin la koihna http://siamsinpawlpi.org/ website honkhiak in om a, ‘Be an Agent of Change’ chih etsakna in candle lighting leng om hi.

LOCAL NEWS

MLA makaih in school thu meeting om    

Lamka, Jan-13: Ginsuanhau, MLA (Singngat A/C) makaih in Lailam Veng a a tenna inn ah tuni in Singngat bial a school omte academic 2014 session akipan a function theihdan ding tawh kisai meeting om hi. Huai ah Singngat leh CCpur a DI of schools 2te banah teacher tamtak tel uhi.MLA in ita lrh naute school kaina din Lamka delhdelh lou in Singngat mun mah ah kaithei ding uhiam chih ngimna ziaka teacher-te tawh meeting om hi’n gen a, school bawlna din MLA, DI of schools leh Headmaster-te kia hilou in teacher teng tawh pankhawm ngai hi’n gen hi.Aman  February 2014 khasung in Education Minister tawh Singngat A/C sung a govt school omte inspection bawl hiding in gen hi. Tulel in Singngat bial ah  govt leh private school kigawm in 69 om a, huai lak ah High school 7 leh Jr H/S 5 om  hi’n gen hi.

DLCC meeting om ding

Lamka, Jan-13: DC/CCpur makaih in Jan 16, 2014 zinglam dak 11:00 in DC’s office a BRGF Resource Centre ah Dist Level Co-ordination Committee (DLCC) meeting om ding a,huai ah January 26, 2014 a  Republic Day lopna ding tawh kisai genkhawm ding uh a, tanmun (work allocation) hawmna leng om ding hi. Huai ah  DLO te kimtaka tel ding in BO HQ, DC’s office in theisak hi.

Army te’n ginlelh mi 2 mankhia

Lamka, Jan-13:Police apan kizadan in  7-Assam Rifles te’n Jan 11, 2014 nitak dak 11:15 velin  New Market Area, Sielmat bridge ah Yahama R-15 (MN 02A-7064) a tuang mi 2 ginlelh ziaka khawlsak in body search bawl uh  9mm country made pistol 1, magazine 1 leh atang 2 ban ah LG mobile 1 mukhia uhi. Army te’n mi 2te -Urikhamban Joy @ Malsawmthang (23) s/o U.Hemanta of Khawmawi leh Stephen D.Sinate (18) s/o Nathan L.Sinate of Khawmawi ban ah amau apan thil muhkhiak teng Police Station ah pekhia uhi. Police te’n mi 2te zan in JMIC/CCpur court ah dingsak uh a, Court in January 17tan Police custory a omdi’n phalsak a, Police te’n FIR No. 07 (01) 2014 CCP-PS U/S 25 (1-A) Arms Act registered uhi.

Orphanage Home 3 ah panpihna pia

Lamka, Jan-13: Ginsuanhau @ GS Haupu, MLA (Singngat A/C) in tuni in Bijang a Sangga Muon Inn veh a, Home a om naupangte’n 1 chiat a silhding in blanket pia hi. Aman huaizawh in Zomi Colony a Tunnu Liimbel leh Vondei Sauliim mun pha in nu-le-pa neilou naupangte silhding puanlum (blanket) pia hi.

KMAA akipan mi 5 tel ding uh

Lamka, Jan-13: MFI Pro-Promotional Muaythai Council leh Manipur K-I Assn kigawm a saina in February 1-4, 2014 sung Khuman Lampak a SAI boxing arena mun ah ‘3^rd National Muaythai Challenger Cup & 1^st K-I Open India Championship-2014’ om ding a, huai ah Kuki Martial Arts Association(KMAA) akipan in player 5 teldingin telkhia uh ahihdan KMAA thusuak in gen hi.

Sanga chihding hizaw

Lamka, Jan-13: Zan issue ah Aam Aadmi Party, Lamka kiphuhkhiat official a puankhiat thu kisuah ah NT Sang Hangshing kichi pen Sanga chihding hizaw hi’n K.Paumuanthang, Gen Secy, AAP  apan kiza hi.

KNO/KLA 3 galvan tawh taikhia

Lamka, Jan-13:K. Winson Kuki, Home Secy KNO/KLA akipan thusuak in a gendan in January 2, 2014 nitakin Sinai designated camp a om KNO/KLA cadre 3 in automatic galvan 23 tawh taikhia uh a, state govt leh KNO/KLA in double lock in Camp a Arm Cote a koih uh hihsia in galvan pawkhia uh hi’n gen hi. Thusuakin a gendan in cadre 3te Lance Corporal Amos, Private Albert leh Private Michael in meltheihlouh pawlam mi tawh kithuahin SoO ground rule bawhsia a gamtang uh hi’n thusuakin gen hi.SoO atel Kuki group kuamah in cadre 3te lalut lou ding leh kibukna leng pelou din thusuak in theisak a,mipi kuamah leng kigolhlou din theisak uhi.Cadre 3te omna genthei a om leh kipahman Rs. 1,00,000/-piak hiding in huai thusuak in taklang hi.

SUUNNA

Chingneihoih @ Neipi (50) w/o Thangkhogin @ T. Hegin Singsit of Haokip Veng, Imphal, zan nitaklam dak 3:00 velin BP stroke ziakin si a, tuni’n kivui hi.

Chiinkhoching w/o (late) H. Lamkhothang of Dumsau, zanhal nitakin natna tuamtuam ziakin si a, zan in Dumsau hanmual ah kivui hi.

 

IMPHAL NEWS

CM in Dairy Milk Processing  

Plant thak tuni’n hongkhia

Imphal, Jan-13: Chief Minister O. Ibobi in Thoubal Wangmataba mun ah tuni’n Dairy Milk Processing Plant thak hongkhia hi. Aman a thugenna ah huai Dairy Milk Processing Plant tungtawn in sepna neiloute adia sepna muhna leh sum muhna hoihtak hiding in gen hi. CM in a genzelna ah government in miteng sepna pe zoulou ahihman in NGO te’n mi tamtak adia phatuam ding a patkhiak uh pahtak-thu gen hi.Tuni a CM in Plant thak a honkhiak bel Youth Volunteer Union(YVU) kichi NGO pawl khatin a patkhiak uh hi’n kigen hi.

NE state a project-te enzui ding  

Imphal, Jan-13:Prime Minister Dr Manmohan Singh in Central fund zanga Northeast state tuamtuam a project kisem lelte etkhiakna kawmin January 20, 2-014 in New Delhi ah ‘Review meeting’ nei ding a, huai ah Manipur telin Northeast state tuamtuam akipan Chief Minister-te leng telchiat ding uh chihthu om hi. Planning Commission in Manipur Chief Secretary kiang ah theisakna thon in huai meeting ah Manipur Chief Minister O. Ibobi a tel ngai ding chi’n theisak chihthu om hi.

Gaan Ngai festival tuni’n kipan  

Imphal, Jan-13: Zeliangrong mite ading a festival minthang leh thupipen hi a kigen  Gaan Ngai Festival kichi ni 5 sung om dingin tuni’n Imphal East district a Keikhu Kabui village mun ah kipan a, Dy. CM Gaikhangam in Chief Guest a pang in huai Festival uap hi. Huai hun ah Minister, MLA leh ADC member tamtak in leng uap uh a,  cultural dance tuamtuam lahna om hi.   Dy. CM in a genna ah Gaan Ngai festival in lemna leh muanna a tut deihthu genkawm in Manipur mipite laka kituahna tun dia deihthu leng gen hi. Aman a genbehna ah, Pathian i it aleh midangte leng i it ding ahi, mahni innvengte it loupi a bangchidan a Pathian ka it chi thei ding i hiam ?chi hi. Huai hun ah  PHED Minister I. Hemochandra; Industry Minister K. Govindas, TN Haokip,MLA;  Kikhonbou Newmai, MLA leh AMUCO President Y. Manikhuman ten leng uap uhi.

ISBT complex ah Drivers’ Day    

Imphal, Jan-13: All Manipur Petroleum Tankers’ Drivers Union & Transporters and Drivers’ Forum pawl kigawm in Khuman Lampak a Inter-State Bus Terminus comlex ah January 14, 2014 in 25^th Drivers Day zang ding uh chi’n thusuak in gen hi.Kum 1990 akipan Drivers’ Day a zat ua kipan tuni tanin Driver le handymen asi leh taksa upat ziaka khawl kigawm 62 pha uhi. Drivers’ Day zatna function ah driver sisate innkuante itna thilpiak piaksawm uh a,  a khawl(retired) sate leng ngaihnat latsakna thil piaksawm uhi.

Mao-Maram, Paomata leh  

Purul sub-divn a population

Imphal, Jan-13: Kum 2011 in Manipur a census omlai in mihing 28,55,794 pha a, huaite pasal 14,38,586 leh numei 14,17,208 hi uhi. Huai huna census dungzui in Senapati district sunga Mao-Maram sub-divn ah mihing 1,63,285; Paomata sub-divn ah 53,990 leh Pural sub-divn ah 66,357 om in akigawm 2,83,632 hi a,Manipur govt in mijhing pundan(growth rate   123.14) sanglua chi’n pomlou hi.Registrar General of India in Manipur state thuzaklou in huai sub-divn 3 a population om zah suithak  a, huai dungzui in Mao-maram ah 1,63,380, Paomata ah 53,901 leh Purul ah 68,123 hi’n pom uh chihthu om hi.Huai dungzui in sub-divn 

3 a mihing omzah 2,85,404 pha a, growth rate leng sangzaw in 124.54 tung chih ahi hi.

Search Operations bawl uh  

Imphal, Jan-13: Imphal West District Police te’n tuni’n  Imphal West district sung a Singjamei Mayeng Leikai area lakah search operation bawl uhi.  Dr S. Ibomcha,DSP/Imphal West  makaihna in January 26, 2014 a  Republic Day lopna ding tawh kisai security dinmun etkhiakna kawm a Police te’n khawpi sung mun tuamtuam ah combing leh search operation bawl uh hidan in kigen a, matkhiak omlam bel theih hilou hi. Police te’n maban ah leng   mun tuamtuam ah operation neitou zel ding uh hi’n kigen hi.

Army te’n vanzat dng chituamtuam pia   

Imphal, Jan-13 : 6-Dogra troop te’n Chandel district sunga New Songyang Primary School te akai student-te adingin tuni’n vanzat poimawh chi tuamtuam a hunkhop pia uhi. Vazat a piakte uh  Street light leh laibu tuamtuam hi’n kigen  hi. Tua banah Assam Rifles te’n zan in Chandel district sung a om Molcham leh Khengjang village-te adingin Solar street light leng pia uhi. Huai banah Jan. 11, 2014 in Assam Rifles-te mah in Tamenglong district sung  Noney khua a Govt. School a dingin sports item tuamtuam pia uhi. Huai sports item-te bel Assam Rifles Military Civic Action Programme tungtawn  a apiak uh hi’n kigen  hi.

Tuni in mi 3 in BJP zom  uh

Imphal, Jan-13: BJP in tuma zekin state 5 a assembly election om hun ah state 4 ah govt a bawl zawh ziakun India gamsung state tuamtuam ah minhoih mahmah uh a, Manipur ah leng maban a Lok Sabha election om hun ah BJP hat dinga gingta ahunkhop om hi. Huaiziak mahin Manipur ah  khenkhat in BJP zom uh a, tuni’n leng T. Hangkhanpau, Dr. Naorem Binoykumar Singh, leh Dr. AK Manglemjao Singh te’n BJP zom uhi. Dr. AK Manglemjao Singh in a nungzui hunkhop tawh BJP zom uhi.

Manipur in electric meivak a muhdan       

Date 13/01/14  Time 17:40:00

 State          Schedule    Drawal            Deviation

 Manipur    97.9             121.2                23.3

NATIONAL NEWS

Khaps te’n numeite thupiak bawlkhum theilou ding: SC

New Delhi, Jan -13: Hun bangtanhiam paisa apan in Khap Panchayat tuamtuam te’n numeite’ tungah thupiak khauh taktak bawlkhum ua, Khap panchayat in tuabang thupiak numeite’ tungah bawltheilou ding chi’n tuni’n Supreme Court thusuakin gen hi. Khap panchayat bangzahhiam takin tuma deuh apan numei te’n jean khekol a tentheihlouh ding uh, mobile a tawi theihlouh ding uh, lampi lai ah pasal ahoupih theihlouh ding uh chih leng dress code tuamtuam tamtak khun khum ua, thupiak zuiloute’ tungah khawsung a nawhkhiak ahih ding banuah sum liausak dingin thupuan nei uhi. Uttar Pradesh leh Haryana state te ah tuabang thupiak uang mahmah hi’n kigen hi. Tuni a Supreme Court thusuakin agenna ah, Khap panchayat in numeite’ tung a hibang thupiak khauhtak a bawl un hoihna sangin hoihlouhna tun tamzaw ding chi kawmin, Khap Panchayat te’n hibang thupuan bawl nawnkei uhen chi uhi. Huai kawmkawm in Khap te’n SC ah ngetna abawl uh khenkhat omte March 5, 2014 chiangin court in genkhawm nawn ding chih ahi.

Lucknow ah ni 1 in mi 3 rape in om

Lucknow, Jan -13: Police thusuak in tu ni a agendanin, Lucknow khawpi sung ah zan Jan 13, 2014 in mun tuamtuam ah numei 3 thagum a sualluih (raped) in om chi uhi. Numei 2 te ahihleh, kum 20 kimlak tuak hi ua, Sarojini Nagar area ah mi tuamtuak in a sual uh ahi chi uhi. Numei khat pen ahihleh a pa lawmpa’n a inn ua asual hi a, mi sualtu Enul leng matkhiak hingal chi uhi. Numei dang khat pen ahihleh nasemtu (labourer) hi a, Ratibhan Singh kichi in sual a, police ten delhzui mah le uh amah ana kihemmang in tu in Lucknow khawpi kim le kiang banah Delhi tanpha ah zon in om lel chi uhi. Zan mah nitaklam in Arvind Yadav kichi Kakori area a Sarai Alipur Barsauli village a inn khat ah va lut in kum 22 a upa numei khat va sual chi uhi. Police ten suizui chih a theihphet in Yadav leng kihemmang ngal in tu in mun tuamtuam dapkolh in om lel hi.

Delhi ah flights delay nawn

New Delhi, Jan- 13: Indira Gandhi International Airport (IGI) ah tuni’n mei zing (fog) a tam luat ziak in lenna 21 val ding khawl sak in om a, huai ziak in airliners tuamtuam in a flight te uh a reschedule ngai uh hi’n kigen hi. Airport Official in Runway Visibility Rang (RVR) 625 meter in kia niam a, airport authorities te’n CAT-I landing system a zat ngai uh hi’n gen a, flights 10 khong  runway hoihtak a muhthei ahihlouh ziak a delay a om hi’n gen hi. Met department official in mei zing pen ni bang zah hiam a daih ding a temperature leng kia niam lai ding in leng gen hi. Tuni’n IGI ah Minimun temperature 12.7 degree Celsius tung zou a, kum dang sang in 4 degree Celsius in normal zaw lai hi’n leng kigen hi.

Mulayam in centre mawhsa

Lucknow, Jan- 12: India gamsung ah vanman a khan hulhul tawh kisai in Uttar Pradesh a vaihawmna len Samajwadi Party Chief Mulayam Singh Yadav in centre government mawhsakthu gen a, adiak in Union agriculture minister Sharad Pawar ginatlouh ziak ahi chi hi. Samajwadi Party ahihleh UPA coalition adia partner lianpen nihna ahi hi. Central government in mipite’ nekding ban ah a poimawh tuamtuamte uh sukbuchinna ding in policy bawlkhial mahmah ua, black a vanzuakte leh mimal hamphatna ding gelte pawl in government hamphatpih mahmah uh chi’n Mulayam Singh Yadav in gen hi. Yadav in agenbehna ah, India gamsung ah mi zawng tam law mahmah a, amaute kankuahna ding leh amaute dopsangna ding in central government in a kilawmdan in policy khoh kichi mah le uh ataktak in mizawng leh gentheite’ adia haksatna tuntu suaklel uh chi hi.

Naupang bomber khat man

Srinagar, Jan -13: Border Security Force ten zan nitak in Pakistan helpawl atel suicide bomber dia gintakkhat mankhia ua, amah kum 13 lel a upa hidanin leng gen uhi. Mat a om Md Azim kipuandan in, India khawpi tuamtuam ah bomb puahsak ka sawm ua, huai ding in mi 4 telkhiakin ka om ua, ‘four -member suicide squad’ te’ lak ah numei 1 leng atel chi hi. BSF te Indo-Pakistan gamgi zul a patrolling apailai un naupang Azid pe’n a nervous mahmah ziaka matkhak a om hi’n thusuakin gen hi.

Car leh train kiphu: mi 3 si

Lucknow, Jan -13: Uttar Pradesh state sung ah zan nitak in train 1 leh car khat kiphutuah a, huai ah mi 2 si in midang 3 liam uhi. Barabanki district sung a rail crossing mun ah car khat hattak in tai a, huchih lai in a gal apan Lucknow apan Sultanpur zuan Harihar Nath Express leng hattak in tai a, Barha railway crossing mun geih ah kiphutuah kha uh ahi chi uhi. Car a tuang mi 5 te’ lak ah 2 te a mun ah si ngal a, midang 3 te Lucknow a Trauma Centre ah etkol ding in puak in om uhi. Thiltun ziak in hiai lampi ah dakkal 2 sung train tai teng leng khawlsak in om uhi.

Maoists te’n numei naupang recruitment bawl

Raipur, Jan- 13: Chhattisgarh state sung a Maoists helpawl om ten tulai in numei naupang tamtak helpawl ding in lalut thak ua, amaute gammang lak ah training pia uh chi’n Chahattisgarh Police ten ngohna bawl uhi. Police thusuak in agendan in, Maoists ten helpawl dia numei naupang alakthak te uh women’s wing ading in heikhe ziahziah ua, Bastar region ah numei naupang tamtak om na theihlouh in om chi uhi. Maoists ten numei naupangte Krantikari Adivasi Mahila Sangh member ding in khum lut ua, training leng pasal te a tawh kibang hin gen uhi. Pawan Deo, police's special intelligence branch (SIB) in agendan in, pasal sang in numei lungtang thuzawh nop zaw a, huai ziak mah in Maoists ten numei enlah mahmah uh chi uhi. Vishwa Ranjan, state's police chief in agendan in, Chattisgarh state sung ah tulel in helpawl member 10,000 val om ahihdan gen a, Maoists member tengteng 35,000-40,000 kikal hiding uh chi uhi.

FOREIGN NEWS

Libyan Christiante’ lungzing

Tripoli, Jan-13:  Muslim chilgil takte khawsakna Libya ah Christian namtawm zawte’n gelgawtna atuah ziakun lungzing mahmah uh a, himahleh Muslim dan(Shariah law) zuih chiat dinga thuvek pawl a omlai un Christian gindan leng phalsak himaithei chihthu om ziakin Christian khenkhat in kipahna guktak nei uhi. December 2013 in Libya’s General National Congress  in  legislation  leh institution teng kibulphuhna dingin Shariah law pen zat ding in vote khia a, Arab Spring revolution hunlai a Christian milip tamtak Middle-east a hawlkhiak ahihziakun patauhna leh gamdangte’ mawhsakna tuak hi.

Iran nuclear tungtang genkhawm ding

Brussels, Jan-13: Khawvel makaite’n Iran khutsuak nuclear galvan omthei ding tungtang patauhna aneih ziakun gawtna chituam tuam bawlkhum uh a, himahleh kihouna tungtawn a kilemna piching lunggulhna aneih uh hihbuching dingin February sunga kihouna neih ding thupuan bawl uhi. Kihouna hunah Iran's nuclear programme dinmun genkhawm hiding a, Middle East a lemna hihse thei dinga kigen Iran nuclear programme pen etkai dingdan ngaihtuah sawm uh hi’n kigen hi.

South Sudan sepaihte’n Bor manawh

Bor, Jan-13: Ceasefire omlai in rebels khut apan Bor city laksuh dingin government sepaih tamtak in huaimun zuan uh a, tulel a rebels khutnuai a khua omsun Bor pen Juba city akipan km 200 vel a gamla hi a,  Jonglei State adia capital ahi hi. Hun sawttak paisa akipan President Salva Kiir makaih government nuaia sepaihte’ leh Vice President lui Riek Machara sepaihte kala kikaptuahna ah mi tamtak thah in om uh a,  Vice President inleng and tribal sepaih tamkhop kaikhawm in government dou pih hi.