Manipur Express | January 7, 2014

HEADLINES:

Lok Sabha election adingin Manipur ah kisakkholhna kipan

Manipur ah vote neithei ding mi 17,30,005 om

Imphal, Jan-6:O. Nabakishore,IAS, Chief Electoral Officer(CEO) Manipur in tuni’n January 1, 2014 akipan vote neithei dingte telin Manipur Assembly Constituency 60 a  final electoral rolls suahkhia a, kumlui 2013 a final electoral roll ah voter 17,47,889 om mahleh tuni a electoral roll kisuahkhia ah vote neithei ding zah tawmzaw tham in 17,39,005 pha hi.Huai lakah pasal  8,52,918 leh numei 8,86,087 tel uhi. CEO in a gendan in voter khenkhat a om nawnloute banah munkhat sanga tamzaw a   omkhate bawldik ahihziakin voter omzah kumlui 2013 sangin tawmzaw hi’n gen hi. Tunung sawtlou in India gam pumpi a Lok Sabha election om ding tawh kisai in Manipur ah leng election sai di

nga kisakkholhna kipanta hi’n kigen hi.

        Chief Electoral Officer in a gendan in Election Commission of India(ECI) thusuak dungzui in electoral roll thak ah January 1, 2014 akipan vote neithei dingte telsak ahihban ah bawldik ngai omte leng bawkdik ahih nungin final electoral roll suahkhiak hi’n gen a, tuni a electoral roll kisuahkhia enchian nuamte’n  official website www.ceomanipur.nic.in. ah et-theih ding a, a diklou a om leh ERO level ah bawl diktheih hiding chihthu om hi. Thusuak in a gendan in Polling Station honkhiakthak 13 om a, huaite telin polling station 2662 om ding hi. Lok Sabha election ding tawh kisai a kisakkholhna chikhat dan in Electronic Voting Machine(EVM) etchetna masa(1^st checking) neihkhit hita a, huai ah Bharat Heavy Electrical Limited(BHEL) akipan Engineer-te leh political party palaite leng tel uh chih ahi hi.

      CEO in a gendan in electoral roll tawh kisai  Special Summary Revision om sungin vote neithak ding a mi  85,371 guanglut ding a ngetna om a, huaite lakah pomtheih  case 58,218 om a, huaite electoral list ah telsak hi uhi.  Objection category ah case 57,157 muhkhiak hi a, huaite lakah adik case  6,467 muhkhiak hi a, huaite leng list ah telsak hi uhi. Huailou in munkhat sanga tamzaw ah list atel 38,277 te paihkhiak(deleted) hi uh a, huaite lakah duplicate voter 13,624 hi uhi. Picassa software zangin  Duplicate Voter-te suikhiak hi uh chi’n leng CEO in gen hi.

Northeast mite’n Delhi CM kiangah a haksatnate uh tun 

New Delhi, Jan-6:  All India Tribal Students’ Association (AITSA) makaite’n Delhi a om India malsuahbial (Northeastern states) mite’n haksatna tuamtuam a tuahte uh Chief Minister Arvind Kejriwal kiangah thu vatun uhi. AITSA in Delhi Chief Minister Kejriwal kiangah memorandum pia uh a, huai ah national capital New Delhi mun mahmah ah India malsuahbial mite’n haksatna thupitak tuak uh a, abiktakin sinlai naupangte’n haksatna tuamtuam a tuahte uh puaknat-huai  mahmah chi uhi. Northeast  student- te’ adingin innluah man pung  hulhul tungtang leng AAP government in etdan hon neitheilou ding hiam chi uhi.

AITSA te’n Chief Minister Kejriwal kiangah government in koute hon theih hetlouh ziak mah in Delhi tualsuak mite tawh koute kalah kingaihnatna om hetlou a, singtangmi ka hihna uleh mel-le-puam ah neuchik lamdanna ka neihziak ua India khawpi Delhi mun ah inntek tak a om theilou mah ka hiding uam chi’n dotna bawl uhi. AITSA in kum 1996  apanin Scheduled Tribes (ST)-te’n  Delhi government nuaia reserved category ah ka om uh poimawh chi uh a, tua dingin phut tinten uhi. Himahleh, tuni dong lawhching lou uh a, Chief Minister Kejriwal kiangah India malsuahbial a tribal mite’ maban ding gelpih dingin thuum uhi.

Ministry of Home Affairs (MHA) in thusuah a bawl notification vide OM.No 7/2/55-SCT dated 14/10/1955 ah India khawpi a ST omte’ adingin hamphatna tuam bik bawl hi a, ahih ziakin huai hamphatna national capital ah ahi ding bangin  sepsuah hilou a, national capital ah sepkhiak hileh state dangte’n leng hon zuiding uh ahi chi’n AITSA in a memorandum uah taklang uhi. India mi hihna Identity card tuamtuam tawi mah lehang leng, India malsuahbial singtangmite’n dotna tuamtuam kituak mun  mahmah a, India mi-le-sa ihih lai a, koi apan hong kipan na hiam, koi lam zuan ding na hiam chih tanpha leng ki enghouna tuamtuamte AAP government in a beisak AITSA in ki-lamen mahmah chi uhi. AITSA kichi ahihleh India gamsung a singtangmi student-te’ kipawlkhawmna ‘organisation’ ahi hi.

Mizoram a Parliamentary Secretary-te mawhpuakna pia

Aizawl, Jan-6: Mizoram Chief Minister Lal Thanhawla makaih Congress party in tutung state assembly election om ah term 3na tan a govt bawlthei ding in vualzawhna thupitak a ngah nungun Minister- te’ adingin tanvou tuamtuam piak hi uh a, tu in Parliamentary Secretary dinga  CM in a guan mi  5 te’ ading in mawhpuakna tuamtuam pekhia hi. Amaute KS Thanga, Lt. Col. ZS Zuala, Joseph Lalhimpuia, TT Zothangsanga leh K Lalrinthanga hi uhi. Amaute leh amawhpuakte uh  anuai abang ahi hi.

Min                             A thuap ding uh Minister                 A Department ding uh

KS Thanga                              Lalsawta                                  Finance, Planning, Taxation, Law

& Judicial

Lt.Col. ZS Zuala                     R Lalzirliana                            Home, Agriculture, RD, Excise

H Zothangliana                       R Romawia                             H&TE, Art & Culture, Revenue,

Parliamentary Affairs

Joseph Lalhimpuia                  H Rohluna                               School Education, Industries,

Trade & Commerce

TT Zothangsanga                    John Rotluangliana                 Suppy, Transport, Tourism

K Lalrinthanga                        PC Lalthanliana                      Horticulture, LAD, Social

Welfare

           

Hmingdailova Khiangte          Zodintluanga                           UD&PA, Sports, PHE

&&&&&&&&&&&&&&&&&&&&&&&&&&&&&&&&&&&&

LOCAL NEWS

IAS probationer te’n Lamka hongpha 

Lamka, Jan-6: Uttarakhand state sung Mussoorie a ‘Lal Bahadur Shastri National Academy of Administration’ a training lel IAS probationer 18 te’n tuni in Lamka hongpha uh a,  CMO kimuhpih in NRHM nuaia nasepnate genkhawm uhi. Huai zawh in Dist Hospital enkhia in Saikot PHC leng vapha uhi. Sunnung in  ZEO/CCpur mu in SSA tungtawn a  nasepna tuamtuamte kikum uhi. IAS probationer te’n Jan 7, 2014 in HQ Veng a CO 7-Assam Rifles mu ding uh a, sunnung dak 1:00 in  SP/CCpur muding uh a, huai zawh  DFO/CCpur leh DC/CCpur muding uhi. 

Special drive ah gari 69 mankhia 

Lamka, Jan-6: SP/CCpur panlakna ziakin Police,Traffic Police leh VDF te’n January 4 & 6, 2014 in Lailam lei (bridge)gei,CCpur College kong leh Dist Transport Office kong ah special drive bawlin bawl uh a, gari 69 mankhia uhi.  Gari 69 te’ TR-5 cut in gari 1 ah Rs.100 liausak uh a, akigawm in Rs. 6,900/-mukhia uh a,Dist Transport Office a submit ding uh hi’n kigen hi.

Kum 1 in damdoi tamtak zangbei &&&&&&

Lamka, Jan-6: District Immunisation office in National Child Survival &Safe Motherhood Program nuai ah Jan-Dec 2013 sungin damdoi tamtak zangbei uhi. Nupi naupai (pregnant) 4701 vel Titenus(T.T) in kap uh a, naupang kum 1 nuailamte 4711 vel T.B dalna (BCG) damdoi in kap uhi. Huailou in  naupang 19914 te’ Polio(zengdalna) damdoi dawnsak uh a, khuhhip dalna (DTP) damdoi in naupang 21294 kap uhi.  Sensidalna (measles) damdoi in naupang 5663 kap uh a,Hepatitis ‘B’ dalna in naupang 12093 kap uh a, JE (Japanese Enphylitis) damdoi in naupang 15546 kap uhi. Naupang 3038 te’ Vitamin ‘A’ damdoi dawnsak uh a, kum 5 tunglam liamna ziakin Titenus (T.T) in mi 10176 kap uhi.

Makai poimawh Dr. Khuplam Lenthang si  &&&&&

Lamka, Jan-6: Dr. Khuplam Milui Lenthang h/o  Tingzakhol of 1st Street, New Lambulane, Imphal zan zinglam in teknat ziakin si hi.  Dr. Khuplam Milui Lenthang bel Kahui (Kohima), Naga Hills  a piang in laisiam masa leh mi poimawh hi a, apa Assam Rifles jawan a sihnungin Jorhat ah Dr. DD William(European Christian missionary) in lai zilsak a, huchi’n Manmasi or Manasseh (Kuki, Chin, Mizo) mite tanchin, kipatdan, tawndan leh thil tuamtuam sui in doctorate ngah hi. Aman kum 2005 in Manmasi Chate Thulhun Kidang Masa (The Wonderful Genealogical Tales of Manmasi (Kuki-Chin-Mizo) suahkhia in copy 1000 val zuakkhiak hi a,kum  1979 in ‘Home Medical Aid Book’ in Thadou-Kuki language’ kichi bawl hi. Huailou in a laibu gelh tuamtuam 4-te’ HTC and Lars Göran Svenson of Sweden huhna tawh suahkhiak(published) hi a, a nasepkhiakte international media tuamtuam 16 ah khahkhiak leh suah in om hi.Dr. Khuplam  ahihleh ‘Galngam Theory’ frontman Boigund Lenthang’ pianna pa ahi hi. 

  

News tungtawn in kipahthu gen   &&&&&

Lamka, Jan-6: Apaisa January 1, 2014 zinglam dak 9:00  vela Khumujamba  a thiltung tawh kisai thuchiangzaw kingah dan in  Dec 31, 2013 nitakin Khumujamba ah buaina omlou a, a zing (Jan 1, 2014)  zinglam dak 9:00 velin buaina om khazek a, huai pe’n khamtheih tawh kisai  hilou hi’n thuchiangzaw kingah hi. Tuabang kalah  hutkhiaka om te’n a hunkhetute’ tungah Newspaper tungtawn in kipahthu gen uh a, maban ah hibang thil a tun nawnlouh deihthu leng taklang uhi. 

DC office ah interview kipan

Lamka, Dec-6: Integrated Watershed Management Programme/CCpur nuai a Watershed Development team a post 28 semding lakna dingin Nov 26 & 27, 2013 in mi 150 vel in DC’s office ah interview nei uh a, huaite laka select a om mi 60  tengin Jan 7, 2014 zinglam dak 10:30 apan DC’s office a BRGF Resource Centre ah interview nei nawn ding uhi.

Block 6 ah JNV Selection Test  &&&&&&&

Lamka, Jan-6: JNV/Tuinom ah academic session 2014 akipan Class VI zil ding lakna ding in  Feb 8, 2014 zinglam dak 11:30 in block 6 ah selection test omding a, huai ah pasal 634 leh mumei 675 avek un 1309 te’n exam ding uhi. CCpur block apan pasal 400 leh  numei 482 te’n Rayburn H/S ah exam ding uhi. Henglep block a pasal 60 leh numei 47 te’n Vumhao Govt H/S, Tuilaphai  ah exam ding uh a, Singngat block a pasal 31 leh numei 23 te’n Singngat govt H/S ah exam ding uhi. Thanlon block a pasal 15 leh numei 17 te’n Thanlon govt H/S ah exam ding uh a, Tipaimukh block a pasal 41 leh numei 41 te’n Parbung govt H/S ah exam ding uhi. Samulamlan block a pasal 87 leh numei 65 te’n INA Memorial H/S ah exam ding uhi.

Sinzawl PHC te’n enkai ding

Lamka, Jan-6: Khuanggin khawmi Pauzamang(9) s/o Pausianmang of Khuanggin (Thanlon sub divn)  January 3,2014 in  Dist Hospital ah khawsikpi (Malaria PF) ziaka si tawh kisai in CMO in Sinzawl PHC a MO i/c Tunlalmuan makaih in thil omdan enzui ding un theisak hi.

 Zogam.com Person of the Year 2013 Award

Lamka, Jan-6: Zogam.com website in ‘Zogam.com Person of the Year 2013 Award (ZOPA)’ kichi  March 2014 in hawmkhe ding uh a, kumlui 2013 a Zomi sunga nasem hoihte’n pahtakna ngahthei ding in January 31, 2013 tan nomination piaklut theih ding hi’n kigen uhi.  Nomination ngahte  public vote tungtawn a telching hiding uh a, Feb 2014   a Top 10  telkhiak zawh  March 9, 2014 in  Zogam.com  kum 11  chinna, Delhi  a lopna hunah award hawmkhiak hiding hi. 

SUUNNA    &&&&&&

James Rolumpieng (38) s/o Chawngpui of Tipaimukh Road, Hiangtam Lamka tuzing dak 10:30 vel in sinna in si a, Lamka hanmual ah kivui hi.

&&&&&&&&&&&&&&&&&&&&&&&&&&&&&&&

IMPHAL NEW

‘Media-te’ poimawhna lian’- CM

Imphal, Jan-6: Manipur Press Club kum 39 chinna tuni’n Majorkhul a Manipur Press Club ah All Manipur Working Journalists Union (AMWJU) te inntekna in zat hi a, Chief Minister O. Ibobi khuallian a pang in uap hi. Aman a thugenna ah  Manipur genlouh India pumpi ah govt leh kivaihawmna hoih omna dingin media-te poimawh mahmah chi’n gen hi. Press kichi democracy a 4^th Estate ahih dungzui in govt in a sepkhelh hiam thil diklou omte ahun taka suahkhia a, huaite bawlhoihna ding a lampi kawkmuhtu hoihpen ahihdan leng CM in gen hi.       

      Tuni a programme zatna ah Deputy CM Gaikhangam; Works Minister Dr Kh Ratankumar; Social Welfare Minister AK Mirabai; Parliamentary Secretary(IPR) K Meghachandra, Indian Journalists Union (IJU) President SN Sinha leh IJU Secretary Geetartha Pathak banah AMWJU president Wangkhemcha Shamjai Singh te’n Guests of Honours hihna tawh uap uhi.

MNPF te’n amau sulnung hi’n puang

Manipur a Naga helpawl thak MNPF

Imphal, Jan-6: Manipur Naga National Front (MNPF) te’n  thusuah a bawlna uah zanhal a Imphal District a Lamlai police station huamsung a om Laikoiching a 49-BSF te ambush  amau pawl ahihdan puang uhi. MNPF te’n a gendanun ambush bawltute ahihleh MNPF nuaia om Manipur Naga People’s Army (MNPA) te hi uh a, 49Bn C-Coy BSF te Senapati district sunga  Laikoiching leh Leisiphung kal a atailai tak ua attacka om ahi chi uhi. Khawkim le khawkiangte apan thusuak danin, huai ambush ah BSF personnel  4  si uh a, BSF personnel hunkhop  leng liam uh chi’n MNPF Assistant publicity secretary in gen a, ahihziakin tutanin misi om leh omlouh bel thuchian zak omlou hi.

Imphal News-te suaklou ding

Imphal, Jan-6:Tuni’n Manipur Press Club kum 39 chinna zat ahih ziakin Imphal a Newspaper adiakin All Manipur Working Journalists’ Union(AMWJU) nuaia om Newspaper office teng kikhak a, huaiziakin January 7, 2014 in Imphal akipan kisuah Newspaper-te suaklou ding chih thutut kingah hi.

Pasal sangin numei voter tamzaw

Imphal, Jan- 6: Tuni’n  in Manipur a final electoral roll  puankhiak ah pasal sangin numei voter tamzaw hi. Huai dungzui in vote nei mihing  17,39,005 om a, huailak ah numei vote nei 8,86,087 pha a, pasal vote nei 8,52,918 lel pha in numei sangin pasal vote nei 33,189    in tawmzaw   hi. Media te’ ma ah CEO in a gendanin kum 2013 a ratio 1000:1029 (female/numei) tawh etkakin tutungin 1000:1039 (f/numei) tungtou chi hi. Aman agenbehna ah bangchidan a voter te’ lak ah pasal sanga numei sangzaw mawk hiam chih naktaka ngaihsut ahihnungin electoral list ah numei sanga pasal a kikhum tawmzawk ziak hidin ngaihsut hi a, tuabanah, state dang ah Manipur mi pasal a om tam ziak hidin ngaihsutna om chi hi.

15-Day Basic Course in News

Reporting honna om ding

Imphal, Jan-6: Directorate of Information & Public Relations(DIPR) saina in ’15-day Basic Course in News Reporting’sinsakna patna ding in January 7, 2014 zinglam dak 10.30 in Manipur Press Club ah honna(inaurugal function) om ding a, Letkhogin Haokip,IAS, Principal Secretary(IPR) khuallian a pang in hong ding a,Functional President in W. Rajen Singh,IAS, Director(IPR) pang ding hi.

Nagaland a misi 9 te theihvek hita

Dimapur, Jan-6:  Dimapur police  te’n zanhal masa nitak a siluang 9 a muhte uh theihsuah vek hita a, amaute Assam a Karbi Anglong district a  Karbi mite ngen ahi uh chi uhi. Addl Supdt of Police, Dimapur banah Special Investigation Team, (SIT) a makai Watichuchang Jamir in a genna ah zan tanin siluang 4te ahihna uh chet hi a, huai lak ah student leader khat leng tel a, tu in bel amaute’ hihna chet hivekta chi hi. Siluang 9 te Dimapur district a  Chumukedima ‘A’ a Pachaspura area ah vui a om hi ua, a innkuanpihte uh kiang ah siluang piakkhiakin om a, himahleh, thil omdan sousang mahmah a, siluang pe’n pupa dan in vui in a omna diam chih gen ngam hinailou a, Nagaland leh Assam gamgi zul ah curfew khauhtak om lel chi’n ASP W. Jamir in gen hi. Sihna tuak student leader khat ahihleh Karbi Anglong district a Bokajan sub-division  mi hi a, Karbi mite’n na asak mahmah ziakun Karbi leh Naga kal sousang thei dinmun ah omlai chi hi.

Transfer & Posting :

(INDIAN FOREST SERVICE OFFICERS)

1.Dr. Lukho Pune, IFS(MT-89), Chief Conservator of Forest, Manipur as Officer-on-Special Duty(Planning), Manipur

2.SS Chhabra, IFS (MT-93), Chief Conservator of Forests, Manipur as Officer-on-Special Duty(SW) & CEO, MSRRDA, Manipur.

&&&&&&&&&&&&&&&&&&&&&&&&&&&&&&&&

FOREIGN NEWS

Bangladesh ah Awami League hat

Dhaka, Jan-6: Bangladesh ah zan in Parliamentary election om ah Opposition party –Bangladesh Nationalist Party(BNP) in a boycott ziakun Prime Minister Sheikh Hasina makaihna Awami League pawl seat seh 4 suah seh 3 ah ching uhi.Seat 300 om laka seat  147 ah election om a, huailak ah Awami League pawl seat 107 ah ching uh a, seat dang 127 ah tuhtu omlou in Awami League candidate-te ching uhi. Seat 300 laka seat 234 ah Awami League-te  kia ching uh a, Constituency 8 ah buaina om ziakin election  result puankhiak hi nailou hi.

Iraq army te’n Fallujah buluh

Fallujah, Jan-6: Iraq gamsung Anbar province a Sunni Muslim-te’ khawpi, Fallujah ah Iraq sepaihte’n Al-Qaeda helpawlte hawlkhiak sawm in valut nawn uh a, tuni zingsang baihtakin Fallujah simlam ah al-Qaeda kahiang  Islamic State of Iraq and the Levant (ISIL)  tawh kikaptuahna piang in, Ramadi area ah leng kikaptuahna ah mi tamtak si uhi. Iraqi officials  thusuak gendanin Ramadi  kiangah zan in kikaptuahna kipan a, huai ah  sepaih 22 telin mi  34  si uh a,  midang 58  liam in, anti-government force tamkhop telkha uh chi hi. Anbar provice bel tribal militia te tawh Al-Qaeda pangkhawm a Iraq sepaihte a nawhkhiakna mun uh hi a, Iraq solkar in huai area lakkik sawm in apoimawh dungzui a Army sawllut dingin lemsa a, himahleh Army te gamtang le uh Sunni Muslim tamtak khase ding ahihman un pilvang taka thupukna bawl hiding, chi’n official khat in gen hi.

Joint Press Statement suah

Lamka, Jan-5: Kuki Students Orgn/CCpur leh Hmar Students’ Assn makaite’n  tuni’n Rengkai a HSA campus ah Tuinom Youth Club leh Laldittlang innkuante telin meeting uh a, huai ah Dec 27, 2013 in Tuinom khua ah Laldittlang soisak ahih tungtang ah genkhawm nungin kingaidam a huai thiltung mangngilh dingin kihoulem uh chihthu om hi. Huaiziakin Tuinom khua a Laldittlang soisak ahihna tawh kisai kitheihsiamlouhna bangm,ah omlou chi’n KSO CCpur President leh HSA Gen HQ a Vice President in  Joint Press Statement suah uhi.