.JPG)
.JPG)
.JPG)
-------
Thanlon Sub-Division a om Bukpi khua ateng Damzanang Tawmbing s/o (L) Phungkam Tawmbing in February 20, 2014 ni’n Bukpi akipan Lamka khawpi tan (Kilometer 177) Cycle zangin hongtai tung hi. Hiai thuzak phetin PhualvaTimes Team in BukpiTimes Admin te tungtawn a line bawl in February 23, 2014 zingkal in a zintunna Zoar veng, Bungmual a ki dianglut mahleh Pa Langkhanchin inn, Bethel veng, New Lamka ah ann ne dia a sap ziak un, annekna ding mun ah kimuhpihna va kinei hi.
PVT: PhualvaTimes Team | DZN: Damzanang Tawmbing
PVT: PhualvaTimes in Cycle let/kia a Bukpi akipan Lamka tai tung chih kazak un, thupi leh lamdang sa mahmah in, mi bang chi bang hi himhim na hiam chihleh na khualzinna tawh kisai houlim khawm leng ka chi ua, lem mah inte maw?
DZN: Hi, a lemlouhna ding a om kei lua…
PVT: Khualzinna lam i patma un, na min, kum chihte nawn hilh thei diam?
DZN: Ka min ahihleh Damzanang ahi a, kum 1953 kum in ka pianga, tukum in kum 61 pha kha hita.
PVT: Na pianna pa min leh zi leh ta te min nawn hilh thei diam?
DZN: Hilh thei tham e. Ka pa Phungkam Tawmbing ahi, amah a om nawn kei. Kum 1974 in ka zi Thangnian tawh ka kiteng ua, gil agah toutan tapa 2 leh tanu 6 ka nei a, tu 15 leh tusawn 2 melmu ka hita.
PVT: Thupi mahmah chia! Ahihleh Bukpi lou koi khua khua ah na teng kha ua?
DZN: Kei theihphak tanin, Zoupi khua ah ka teng ua, huai akipan Bukpi a pem in, huainung in Zoupi a teng nawn in, huai akipan Bamboo Camp chihte a tengin, Bamboo Camp akipan Bukpi khua ah Chapel Lane veng ah ka pem nawn ua, tunitan ka teng den lai uh.
PVT: Nekzonna ding in loukhoh chihlou nasep dang na nei hia?
DZN: Bamboo camp khen zek ah ka loutul ah Zongtah leh Sekkhum nou tuhna khong ka bawl a, huaite khong ahi ding lou nasep ding a omlou kal a kasep tangpi.
PVT: Tutung a Lamka nong zinna bang vai tawh kisai ahi?
DZN: Saptuam vai tawh kisai a February 23, 2014 a meeting poimawh tak om ziak a hong zin ka hi e.
PVT: Bang hun in Bukpi nusia in nong kipan a? Bang hun in Lamka nong tung a?
DZN: February 19, 2014, zing dak 7 vel di khong in kong kipan a, February 20, 2014, nitaklam dak 3.30 in Lamka khong tung.
PVT: Lam kal ah koi lak a ah na giak zou a?
DZN: Kaimunnuam khua nitak khawmial ma in ka tung a, huai ah zan giakin, huai akipan February 20, 2014 dak 8.00 velin ka kipan khe nawn.
PVT: Bang cycle nawn zang a?
DZN: Hero Cycle te ahi.
PVT: Lam kal ah nuam lou leh haksatna bangbang na tuak a?
DZN: Ka Cycle zat siat ding ka lua mahmah a, huailou anuam lou leh haksa gen ding le ka thei tuan kei. Santing kong tun dek in ka gim mahmah a, Santing phakma a khua om pen ah nahtang khong ka va kan leh ann hon nesak ua, kei antun paw lou le tuh hituanlou in.
PVT: Van bangbang na pua a?
DZN: Sakhau khat leh antun chihlou puak ka nei kei a.
PVT: Tui na puaklouh na dangtak lou hia?
DZN: Ka dang ahuchi tak lam ka thei kei a, Leijangphai leh Tuilaphai a singpi ka dawnlouh tui ka dawn kei.
PVT: Ahimhim a bang tupna a cycle a hong taitung zenhouh na hia? Gari lah niteng a pai zen a?
DZN:Sum haksat ziakin a ahi mai e, a sum neihlouh ziak mah a khaw-ul pawt kawm van man ding lawh a hia chia hong pai ka hi. Saptuam te’n T.A hon piaksak himahleh huai pen a nasepna van ding poimawh tenten te leina dia ka zat nawp ziak ahi. Huai lam thutuam hita leh, ka suangphuh hoihtak khat hi ding banah, ka sih chiang khong a a gengen ding ua, chiamnuih dan a kong tai tung ahi.
PVT: Bukpi leh Lamka kikal lampaina in up down ah bangzah khong abei zou a?
DZN: Lampaina ah Lamka tan tunna dingin Rs. 500 bei zel, kinaw na adingin Rs 1000 khong bei zel hi.
PVT: Ni bangzah atung di’n na ki hisap himhim a?
DZN: Kei ki hisap danin, ni 3 sung hongpai di’n ka ki koih a, ka saptuam programme kipatma ni khat tawldam man dia ka kikoih lai in, ni 2 in kong tung zou a, lampi ah cycle siat ding ka lauh ziakin ka hat tai ngam lou hi zaw mah ka hi.
PVT: Lamkal ah na lung a lel sim hia?
DZN: Ka lung a lel lam ka thei kha kei..
PVT: Lamkal a na tot khak kua te’n honna houpih kha uh hia? Bang na chi dawn a?
DZN: Hi, honna houpih a om tham uh, koi a hoh ding ahon na chi zel ua, Lamka ah! ka chih chiang in, a nui uh zat in a zat a.
PVT: Na zan giahna ah na ihmu thei hia?
DZN: Ka tawl sim ziak ahi diam, ka ihmu thei khawlkei.
PVT: Bukpi mi hichibang hih a om ta hia? Nang a patna na hi di e?
DZN: Lamlian kisial ma in Zoupi khaw hausapa Pu Thangsiam Singngat akipan Zoupi tan nikhat in khe in apai tung a, huailou in Pa Goulian leng Singngat apan Bukpi tan mah, nikhat in ana paitung ngei uh.
PVT: Na ann tun ne lamkal a neilou hi chin a, bang na lawh a?
DZN: Huai antun maw, Lamka kontun in ka tunnate naute tawh ka ne khawm uh aka.
PVT: Lamka nong zin patna ahi hia? Khawdang cycle in na zin ngeita hia?
DZN: Lamka ka zin patna ahi kei a, tamveipi zinkhin ka hita. Khawdang ah zaw cycle in ka hoh ngeikei.
PVT: Tep leh muam bangbang tawh na hong kuan a?
DZN: Tuibuk leh laizial pua in ka hong khualzin hi.
PVT: Tuibuk leh laizial hih tawh kisai hoihna sa hia?
DZN: Tuibuk leh laizial in hatna hon pia chih ka theikei.
PVT: Kik nawn ding hile chin na ngap lai diam?
DZN: Ka kihta sim na a, painawn leng ka ngap mahmah. Tuilaphai ah dangtak lua chia singpi ka dawnna a Bag ka mangngilh va la kik lou hileng, tua sangin kong tung baih zaw lai di. Banah, lampi a hat pipi a tai hileng nikhat inleng ka tung ngap.
Comment:
Pathian vualzawlna tawh Lamka zanga tengte’ lungnuam taka i om lai in, Zodawn a khawsa i sanggamte haksa taka om lai uh chih ahon musak hi. Niteng a lou kuan, gamvak leh meh ding zong a, khaw-ul luang zen a pang ahi uh chih hon musak hi. Mite’n khaw-ul luang a a lawh khiak mah ne ua, haksatak a singtang a khawsa hi uhi. Lamka zin gige chih leng sum neilou te dia haksa mahmah ahi chih hon musak a, govt. lam hoih hileh Sub-Division HQ teng a nuamtak a kileh zou ding uh hia chih bang leng hon musak hi. Guite road hi in Tipaimukh road hitaleh, lampi hong kisial tunglai khawng in Cycle a khualzin hizel mahleh tuni chiang in gari mah in khual i zin ua, sum-le-pai haksatna ziakin mi tampite’n khualzin lunggulh napi alunggulhna uh muih kha zel hi.
No comments:
Post a Comment