Lamka ah Naungek phil Siamese twins piangkhia -- Conjoined twin in Churachandpur

February 5, 2014 zinglam dak 11.15 velin District Hospital a Operation Theatre(OT) ah Dr Lalzuitluangi @ Dr Zuii, Gynaecologist, District Hospital makaih in Dr V Imochoubi, Gynecologist; Dr Jarjou, Paebiatric Doctor; Dr. Tila Keshowri, Anaesthesis; Dr. Kim Simte, Dy Suptd leh Nurse 4 banah OT Staff te’n kum 31 mi nupi naupai khat operation bawlin Kg 1.5 a gik naungek phik 2 atkhia uh a, naungek mel-le-puam lamdang mahmah in ataksa kahiang khenkhat kikop ‘Conjoined baby twins’ (Siamese twins) hi. Operation bawhzawh a Dr.

Zuii in OT kong a naungek omdan pulak kawma agenna ah, ngeina sanga nupi naupai agimluat ziakin Ultrasound la uh a, huai apan naungek kiphik om ahihdan theikhia in tuni’n dakkal 2 sung vel operation bawl ahihnung in Naungek 2 taksa kahiang kikop(Conjoined twins) atkhia uh a, khe 4 leh khut 4 nei a, lungtang(heart), zunbu leh tuap(lung) kikop in bil(ear) 3 nei a, a awm(chest) munah taksa nihte kizom(joined) in, nungzang-guh(backbone) 2 nei hi.

Dr Zuii in agenzelna ah hibang a naupiang om mengmenglou in Manipur adia khatna ahihbanah India ah leng om mengmeng lou in 2vel ompan a, himahleh huai naungek dan chet om nailou hi’n gen hi. Tuni a naupiang kha 7 pha nailou himahleh anu’n haksa sa lua in ki-at sak hi’n gen hi. Naupang nihte khenzak theih vuallouh a, apiankhiak tung in hinglai mahleh huainung minute 30 vel a si hi’n gen hi. A sungkuante uh phalna tawh Naungek pen JNIMS Museum, Imphal a koih dingin muat theilou a kepbit hiding chi a, JNIMS ah tuni’n puaksuk in om hi. Tuma in Mumbai ah hibang naungek piang ngei a, Surgeon 20 velin buaipih in atkhia uh chi a, tuni’n bel Doctor tamlou in buaipih in lawhching takin zou uh chi hi.

Naungeknu bel Chinkholhing (31) w/o Ginsanglien Khongsai of Thadou Veng, Singngat hi a, tulel in ta Numei 4 leh Pasal 2 nei hi. Apasal Ginsanglien in agendanin, a naupai hunsung in lel(gim) mahmah a, ann anek chiang in leng agil dim pahpah in ann tam ne theilou a, athuaklah luat ziakin operation bawlpih mai hi’n gen hi.

Chinkholhing bel Jan 29(Wednesday) in Ultrasound kila a, Hospital’ Maternity Ward ah Jan 31(Friday) a ki-admit a, tuni a naungek atkhiak nungin adamtheihna hoih mahmah hi’n kigen hi. Hibang Conjoined Twins bel misiamte’ gendanin khawvel pumpi a naupiang Lakh 5 zel ah mi 1 ahihkeileh, Crore 1 zel ah naungek 1 lel om sek a, India adingin Lakh 2 zel ah naungek 1 khawng om in, Southwest Asia leh Africa ah om deuh mahleh India adingin thiltung mengmenglou ahi hi.