Manipur Express | February 1, 2014

Manipur Express | February 1, 2014

HEADLINES :

 ADC-te’n 6^th Schedule a nget uh lungkimhuai dingtan panlakpih chiam

Manipur Governor Vinod Kumar  Duggal in Lamka hongpha

Lamka, January-31:Manipur Governor Vinod Kumar Duggal in Governor ahih nunga hong phak masakna hidingin Imphal akipan tuni sun dak 12.00 velin Lamka hongpha a,DC/CCpur office ah sawtlou khawl tawldam kawmin singpi dawn a, huchi’n District Council office pha hi.Governor in  ADC Chairman, Vice Chairman, EM-te leh ADC member-te kimuhpih  in a haksatnate uh  ngaikhia a,6^th Schedule tawh kisai ADC-te  ngetna  a dawnna ah ‘logical conclusion’ tunpih ding hi’n gen hi. Governor in ADC office akipan DC/CCpur office phakik nawn in huai ah DLO-te  houlim pih a,huaizawh in District Hospital pha hi.

         Governor in ADC member-te tawh akimuhna uah ADC Chairman Langkhanpau in memorandum  pekawm in tulela ADC kivaipuakna  5th schedule lah hilou 6 schedule lah hituanlou, thuneihna bangmah neilou ahihdan gen a,  Manipur govt  in grant-in-aid dan a a koih maimai hi a, na septheihna ding in mahni a kivaihawm theihna 6th schedule pedin ngen hi. NE bial a tribal mite omna teng 6th schedule in kipua  a, himahleh Manipur a singtangmite’n  huai bang hamphatna tanglou chi’n ADC Chairman in gen  hi.H Mangchinkhup, EM in  singtangmite ading tuama kibawl Tribal development deptt  pen ADC nuai a  a omding ahi chi a, singtangmite nekzonna thupipen singtanggam/gammang ahihman in  Forest deptt  piching khat neihtuam  kiphamawh hi’n gen hi.  

        Governor in ADC-te thusun a dawnna ah, ADC tungtang CM tawh  2 vei  genkhawm uh a, CM leng ngaihdan tuamtuam omte ah kihong mahmah  chi hi. Aman agenzelna ah Governor mawhpuakna pen Constitutional head mai hisim mahleh Governor hihmai sawmlou in sep leh bawl tuak omte sem ding ahihdan gen hi.Thupukna lak taktak ahihma in ADC 6 omte a vek sipsip un a ngaihdan uh lakkhawm hiding a, tua pen kha 2 sung velin zawh hiding chi’n  gen hi.

       Manipur Governor in  ADC member-te akimuhpih khit in DC Office a BRGF Hall ah District Level Officer(DLO) te kimuhpih a, deptt tuamtuamte dinmun leh bang haksatna tuak uhiam chihte dong hi.  Aman DLO-te kiangah a nasep uah mipi lungtung na uhiam chih leh mipi kipahpih pen bang hihiam chih tanpha kan sipsip hi. Water supply tawh kisai ah NEC in sum sanction khin a,tunung sawtlou a nasep pat hidin akisaipih deptt lam in gen uhi.Health tungtang ah HIV tawh kisai bang dinmun hihiam chih taklatna banah NABARD lam in  district sunga block tuamtuam ah banking facilities kisamlai  ahihdan gen uh a, SDO/Parbung in power connectivity omlouhdan gen hi.DLO-te tawh a kimuhkhit in Governor in Dist Hospital zuan din DC office apan a kumsuk lai in Joint Philanthropic Orgn(JPO) pawlin khawpi sung lamlian, electric meivak ginalou leh tuisiang dawnding taksapna tawh kisai panla dinga ngen in memorandum pia uh a,CCpur District Sports Assn pawlin leng Lamka Public Ground ah carpet grass koihsak dinga ngetna memorandum pia uhi. 

          Dist Hospital ah Governor in Med Supdt leh CMO leh a seppihte uh  a kimuhpih khit in damlou bangzah hiam mimal takin houlimpih a, amaute etkol ahihdan uah lungtung na uhiam  chih leh thil dangdang dotna bawl hi. Med Supdt in memorandum a piakna ah vanzat(infrastructure) poimawhte, specialist doctor, damdoi leh adangdang banah semtu kiching a nget banah Casualty/Emergency deptt tuam,Intensive care unit, anaesthesia work station leh C-arm ngetna pia hi. CMO in leng Dist Hospital upgrade banah puah hoihsem ding a ngetna,FHW training school upgrade ding leh CHC building bawl banah PHC a doctor koih dinga ngetna memorandum pia hi. Governor in khawpi sung lamlian tawh kisai a genna ah DC tawh leng genkhawm uh ahihdan taklang kawmin  lampi bawlhoih din BRO-te  sawl hiding chi hi.   

         Governor in azi leh a tanu khat hong tonpih a,aman mun tuamtuam a phak sungin azi leh a tanu in Bijang a Sanga Muon inn leh Pangzawl a Happiness Home pha a, Self-Help Group(SHG) tuamtuamte nassepna leng enkhia uh hi’n kigen hi.Governor in Dist Hospital akipan zing-an nedin DC Bungalow manawh a, huai ah azi tawh kimu uh a, an nekkhit in Imphal ah kiknawn uhi.         

             

Governor in a thuchiamte  

1. ADC-te Sixth Schedule nget ‘logical conclusion’ tunpih ding.

2. BRO-te lampi bawlhoih dia sawl ding

3. Public Ground ah carpet grass phah ding.

4. Electric leh water supply etzui

SBI/CCpur Branch ah tuni’n ATM 4 hongtung

Lunkim Thangboi,AGM, SBI/Imphal Region in SBI/CCpur Branch a phakni in Chief Manager S.  Kaikhanthang in ana vaidawn lai

Lamka, Jan-31: State Bank of India(SBI)/CCpur Branch adingin tuni’n ATM 4 hongtung a, S. Kaikhanthang,Chief Manager, SBI/CCpur Branch in a gendan in SBI/CCpur Branch ah 2 koih behlap hiding a,Lailam Veng leh Light House mun ah 1 tuak koih hiding in gen hi.

       Huailou in Lunkim Thangboi in Dec 2, 2013 in SBI/Imphal Region ah Asst General Manager(AGM) hihna la a,amah om ma  a AGM James Thathlinga in AGM, Aizawl Branch len dingin kisuan hi. Lunkim Thangboi ahihleh CCpur district a Tollen khawmi(Monglenphai khawkiang) hi a,amah  Manipur a hong kisuanma in  Shillong a SBI Zonal office ah sem a,US gama Los Angeles khawpi a SBI office ah  leng kum 4 semsa  hi’n kigen hi.

Chief Minister Kejriwal in thiltung tawh kisai panla pah

Delhi ah Arunachal Pradesh akipan student 1 thah in om

New Delhi, Jan-31: India malsuahbial(Northeast) biala Arunachal Pradesh mi kum 20 a upa Nido Taniam tuni in South Delhi a Lajpat Nagar ah vuaklup in om hi. Thiltung tawh kisai police-te’n suizui uh a, Northeast mite tungah bangchidan a hibang thil piangnawn thei mawk hiam chih suizui lh chihthu kiza hi. Delhi Chief Minister Arvind Kejriwal in thiltung ngai serious mahmah in mipite zahngai dingin ngen a, huai kia hilou in  ‘magisterial inquiry’ bawl pah hiding in leng gen  hi.

Nido Taniam bel Jalandhar a BA first year sinlel hi a, apa  Arunachal Pradesh government  Parliamentary Secretary len hi a, ni 10 suty zangding in  Delhi a vazin lai hibang tuahsiatna  tuak hi’n kigen uhi. Nido Taniam leh alawmte 2 zanin Lajpat Nagar ah bazaar kaidingin vahawh uh a, confectionary shop ah a khawl laitak un Vaite  bangzahhiam in chiamnuih  uh chih ahi hi. Khawtualmi Vaite bangzahhiam te’n na samtan dan leng bangchidan ale nuihzat-huai na e chi a a chiamnuih phet un Taniam leh alawmte thangpai in kisualzakna piang a, local mi (Vaite) te’n singkhuah-suangtum in mi 3 te kizialhuan uh chihthu om hi.

Police te’n Nido Taniam leh alawmte  hunkhia uh a, Green Park Extension a a giahna room tan uh vakha uh a, himahleh, aman vuakliam ahihna thuak zoulou  in tuni zingkal baihtakin si chi’n  Karunakaran, Deputy Commissioner of Police in gen hi. Social activist Binalakshmi Nepram telin mi tuamtuam banah India malsuahbial apan organisation tamtak te’n thiltung tawh kisai lungkimlouhthu puang uh a, Delhi a ruling Aam Aadmi Party (AAP) Chief Minister Arvind Kejriwal leh a Cabinet te’n delhzui in thil omdan AAP in ngaikhawk mahmah a, mi khoihtute police te’n tu apan dakkal 25 sungin a mankhe vek ding chi uhi. AAP member Dilip Pandey in a genna ah Delhi police te’n bangchituk a thil hihthei uhiam chih a chian uh tuhun in poimawh chitep hi.

1^st Lady Madhu in mun 4 pha  

Lamka, Jan-31: Manipur Governor Vinod Kumar Duggal’ zi 1^st Lady Madhu leh atanu in tuni’n Governor hongzui uh a,  sun dak 12:00 in Bijang a Sangga Muon Inn pha uh a, huai zawh in Pangzawla Happiness Home pha uhi. Huaizawh in Rengkai  ah Marie Gold SHG-Dry Flower leh Muollum SHG Handloom munte enkhia uhi. 1^st Lady Madhu in Sanga Muon Inn leh Happiness Home-te  panpihna Rs.10,000/- tuak pia a, Orphanage home a naupangte amuh in hehpih mahmah in a mittui tanpha pawt  hi’n kigen a, Marie Gold SHF-Dry Flower leh Muollum SHG Handloom munte amuh in lunglut mahmah a, Dry Flower tamtak tawh paikik hi.

Officer hunkhop pension ding

Lamka, Jan-31: CCpur Dist a Officer  hunkhop February 28, 2014 in a  sepna uapan retire ding uh a, huaite lak ah Dist Level Officer ahunkhop tel uhi. Huaite Dr H.L Liensang, CMO; Dr N.Paul Ginthang, Medl Suptd Dist Hospital; Joseph Lalrothang, ZEO; G.Hanghal, General Manager DIC; S.Kaikhankap, Dist Co-op Officer; Dr Lalbieksang, MO, PHC/Saikot; D.T Haokip, DI of Schools/Henglep; Lalbiakthuami, Headmistress Vungzagen Hr Sec. School; Lhingnu Touthang, Headmistress Gandhi Memorial H/S; T.Ngulkhenthang, Extension Officer, BDO/Vangai ban ah deptt tuamtuam a staff tamtak retire ding uhi.

Esther Laltankim Serto in IFS mu

Lamka, Jan-31: UPSC nuaia Indian Forest Service Examination 2013 exam result puankhiak hi a, mi 85 lawhching  ST-6, SC-13, OBC-29te lakah Miss Esther Laltankim Serto 62-na a pang  hi. Miss Esther Laltankim Serto ahihleh Imphal a khawsa hi a, University of Delhi nuaiah Mathematics subject Graduate  ahi hi. UPSC nuaia Indian Forest Service Exam 2013 result zanhal Jan 29, 2014 in puankhiak hi a,  huaima Dec 2013 in written exam  om khin ahi.

Naupang khat sisa in kimukhia

Lamka, Jan-31:  Sumila Devi @ Echan (10) d/o L. Amuthoi Singh of Chandonpokpi, Bishnupur district apaisa January 22, 2014 nitaklam dak 3.00 akipan pawtkhia tuni’n Pheijawl khua ah sisa in kimukhia hi. Pheijawl bel Ccpur district sung hikha mahleh Bishnupur a Kumbi Police Station etkaina(Jurisdiction) hi a, Bishnupur Police-te’n siluang vala uhi.

Block 6 ah JNV Selection Test 

Lamka, Jan-31: JNV/Tuinom ah academic session 2014 akipan Class VI zil ding lakna ding in  Feb 8, 2014 zinglam dak 11:30 in block 6 ah selection test om ding a, huai ah pasal 634 leh mumei 675 avek un 1309 te’n exam ding uhi. CCpur block apan pasal 400 leh numei 482 te’n Rayburn H/S ah exam ding uhi. Henglep block a pasal 60 leh numei 47 te’n Vumhao Govt H/S,Tuilaphai  ah exam ding uh a, Singngat block a pasal 31 leh numei 23 te’n Singngat govt H/S ah exam ding uhi. Thanlon block a pasal 15 leh numei 17 te’n Thanlon govt H/S ah exam ding uh a, Tipaimukh block a pasal 41 leh numei 41 te’n Parbung govt H/S ah exam ding uhi. Samulamlan block a pasal 87 leh numei 65 te’n INA Memorial H/S ah exam ding uhi.

Guta-te’n Gas Cylinder 3 gu

Lamka, Jan-31: New Bazar, CCpur Cinema Hall a ground floor ah Ms Chingzaman w/o Khama of Tedim Road(near UBI/CCpur)  in Hotel bawl a, apaisa January 29, 2014 zingsang baihtak dak 3:00 vel in hotel kongkhak kikalsia in  LPG Gas Cylinder (adim) ngen 3 kigumang hi. Gutate’ thilguk teng sum atuat in Rs.13,000/- vel hi’n kigen a, Police te’n guta te’ matkhiat sawm in suizui  uh a, FIR No. 21 (1) 2014 CCP-PS U/S 457/380 IPC leng registered uhi.

SSPP ‘Free Coaching’ hongkhia

Lamka, Jan-31: Siamsinpawlpi Joint Hqs, Lamka in maban a Class-X exam ding SSPP member-te’ Free Coaching piaksawm in tuni’n Kaikhanlian Guite, DI of Schools, Ccpur in coaching patna di’n hong hi.  Aman  tup neih a poimohdan gen a, hibang coaching facility omthei pen student-te’ adia hamphathuai  ahihman in siamsinna pibawl dingin chial hi. I gamsung a education dinmun hoihlouhna ziakte lakah MGEL omlouhna muna teacher post om theilou ahihman in MGEL pen bangchi koih theih nawn ding hiam chih mipite’n panlak ngai chi hi. Education hoihna din Headmaster poimawh mahmah a,  tu in headmaster pension dingte thakhengtu ding mi muanhuai  muh ngai hi’n gen hi. Ccpur Govt. College a SSPP Free Coaching hunah student 147 tel ding uh a, huailou in Class-X examna ding Centre Rayburn High School leh Ebenezer Academy hi’n kigen hi.

DAPCU a semte’n  strike zom

Lamka, Jan-31: All India AIDS Control Employees Assn. (AIACEA) pawlin Central govt ah demand tuamtuam 7 a piaklut uh hihbuchin ahihlouh ziakin zan apan All India Level Indefinite Strike pan uh a, Manipur State AIDS Control Society Employees’Assn pawlin leng zom uh a,Lamka a  Dist AIDS Prevention and Control Unit(DAPCU) staff te’n leng strike zom uhi. MSACSEA pawl zan in Lamphel a MACS office ah sit in protest tu uh a, Lamka apan DAPCU staff hunkhop vatel uhi.

SUUNNA

Mrs. Vungkholian @ Pi Lian (63) w/o K.Kaizalian of Hebron Veng, New Lamka tuni zinglam dak 10:00 vel in heartfail in si a, YPA Hanmual, New Lamka ah kivui hi.

Siamthianlal @Lalpu (39) s/o  (late) Lianzapau Hrangchal of New Lane, Bungmual tuni nitak dak 6.30 in sungna in si a, Feb 1, 2014 in Bungmual hanmual ah kivui ding hi.

IMPHAL NEWS

Cabinet in Jr H/S 9 upgrade lemsa

Imphal, Jan-31:Tuni nitaklam in CM Secretariat ah Cabinet meeting om a, huai ah  Junior High Schools 9 akinthei lam in High Schools dinga upgrade dingin thupuk uh a, huchih huna teacher kisam ding 54 leng lak(recruit) dingin thupuk uhi.Jr H/S 9 tunung zeka High School a upgrade dingte banah teacher 54 lakthak dingte Rashtriya Madhyamik Shiksha Abhiyan (RMSA) nuaia sepkhiak hiding chih ahi hi. High School a upgrade ding Jr High School 9te bel 1) Andro a om Poirou Khongjil Junior High School, 2) Bishnupur district a  Pukhrambam  Jr High School, 3) Senapati district a   Maram Khullen Jr High School, 4)Senapati district sung maha om Bishnulal Jr High School; 5)Thoubal district a  Chairen Jr High School,  6) Cpur district a Kangreng Jr High School,7)Tamenglong district a  Dolang Jr High School, 8) Tamenglong district sung mah a om  Tharon Jr High School leh 9) Ukhrul district a Lambui High School hi uhi.

      Huailou in tuni a Cabinet meeting in Border Road Organisation(BRO) zangin Kamjong-Chasad Road, Nampisa-Khudengtabi Road, Gamnom-Chamu Road leh  Phungrei-Mellori Road bawl hidin lemsa uh a, huai lamliante PMGSY hilou in Defence tungtawn a bawlkhiak hiding ahihman in BRO mah zat ngai hi’n govt thupuantu CAF & PD Minister M. Okendro in gen hi.  Huaite banah Nagar Panchayat a Executive Officer 18 leh Municipal Council 8 a EO lam dingin leng Cabinet in lemsa uh a,Jail deptt ah contract basis a semding male nurse 5 lak dingin leng thukim uhi. 

Combined team in galvan mukhia

Imphal, Jan-31:Imphal East Commando mi 6 leh Cingarel post a om 30-Assam Rifles leh Yaingangpokpi post a om 16-Assam Rifles kigawm combined team in  tuni’n Lamlai PS a Twichin village a search operation a bawlna uah galvan 18 mukhia uhi. Thusuak in a gendan in huai galvante KNO/KLA cadre khenkhat in designated camp akipan a puakkhiak uh hiding a gintak hi a,Twichin khua a tangbul khat ah gunny bag 2 sunga kikoih muhkhiak hi’n kigen hi. Galvan kimukhiate AK 56 rifles 4,AK 47 rifles 2,AK-22 rifles 2, AK-Rifle (Foldable butt) 1, M-16 Rifles 2,  M-21 Rifles 1,  M-15/AR-15 Rifle 1,  SLRs 2,  G-3 Rifle 1,  HK Rifle 1 leh Lethod gun 1 leh  ammunition hunkhop hi’n kigen hi. Supdt of Police/NAB in a gendan in huai galvante  Samushang SoO camp akipan galvan lakkhiak ziaka criminal case om suizui hilel tawh kisaikhakna nei dingin ginthu gen hi.

Md Abdul Salam tuhtu omlou in ching

Imphal, Jan-31: State tuamtuam 16 ah Feb 7, 2014 a Rajya Sabha member 55 telna ding ah  Manipur a kipan seat 1 telkha a, huai ding  Md Abdul Salam,ex-Minister kia in   nomination paper filed a, Returning Officer  Y Indira in tuni’n Md Abdul Salam tuhtu kuamah omlou in Member of Parliament(Rajya Sabha) ding aching hi’n puang a, china certificate  leng pia hi. Tuni nitaklam dak 3.00 tan candidate kizukkik nuamte adin hun hon hi a, huai ah Md Abdul Salam a nomination paper kia om a, kuamah midang a omlouh ziakin ching a puan in om hi. 

Manipur apan Rajya Sabha member Rishang Keishing in term thak ading in lunglut nawnlou ahihdan puangkhin hi.

Diesel man litre ah paisa 50 in pungnawn

New Delhi, Jan-31: Tuni in India gamsung pumpi ah diesel man litre ah paise 50  in pungnawn a, petrol man bel a ngeizah mah hilai chihthu om hi. Diesel man a vangkim a pung CPI telin opposition party tuamtuamte’n naktakin soisel uhi. Tunitak a diesel man hihpun a om tuni zankim akipan n zat hiding chih hi a, local sales tax, VAT ahihkeileh khawpi tuamtuam a tax omsate huamlou ding chih ahi hi. January 3, 2014 in thautui (petrol) man litre ah paisa 70  in khang a, tua hunin diesel man leng litre ahpaisa  50  in khangkhin hi.

Bahuguna in CM hihna apan kitawp

Dehradun, Jan-31: Uttarakhand Chief Minister Vijay Bahuguna in tuni in Chief Minister ahihna apan in kitawpna pia  a, Union Minister Harish Rawat in Uttarakhand Chief Minister lenthei ding dinmun in om chih ahi hi. Chief Minister Bahuguna in Governor Aziz Qureshi kiangah kitawpna pia  a, party high command apan thupiak dungzui a kitawpna pia ahihdan gen hi. Amah  High Court judge lui hi a, dan thei mahmah mi hi’n kigen hi.

Senior Congress leader banah Uttarakhand Chief Minister Vijay Bahugunu in tuni niktak a media-te ma ah a gendan in Congress President Sonia Gandhi kiangah thuneihna bangkim ka pia a, aman ka thakhengtu ding a chih bangbang ka pom chi hi. Union Minister Ghulam Nabi Azad banah AICC General Secretaries Janardan Dwivedi leh Ambika Soni in tu in Uttarakhand a Chief Minister thakding tungtang ‘final’ bawl dingin Uttarakhand state pha ahi.  Kumlui 2013 in Uttarakhand state ah tuilet thupitak ziakin mihing asang asim in hinna chan uh a, tenna inn le lou tamtak mangthang a, tua tungtangah Uttarakhand mipite’n Chief Minister Bahuguna iplah mahmah uh chih ahi hi.