The 27th KNO Raising Day zat in om

The 27th KNO Raising Day zat in om 

  

Lamka, Feb-24: Kuki National Organisation(KNO) kiphuhkhiak nung kum 27 chinna “The 27th KNO Raising Day” tuni’n Kholmun Playground, Ccpur ah zat in om hi. PS Haokip, President, KNO in Nampi Puanlap khaipalh in, Zale’n-Gam Choir in zui hi. Huaizawh in Helen Kipgen, PRS, KNO makaihna in Phamsa salphate suunna om hi. Huai huna PS Haokip, President, KNO in athugenna ah tuma zek a KNO makai phamsa Moson, UMLA; Marvin, KLO/KLA; Ngamthang, Chaplain KNA; Maj Chungkholun, KNA; Jangthong, Antone Haokip, Secy-Home(KNO) te zahna pia hi. Huailou in Thangkholun Haokip, first Commander-in-Chief KNA, Brig Vipin Haokip, Chief of Army Staff KNA te zahna salam pia hi. 

KNO President in “Na Puan-inn keklian in” (Isai 54:2) pansan a agenzelna ah Nov 6, 2012 in Dorcas Hall,New Lamka ah KNO leh UPF makaite’n kimuh khawmna nei in, KNO leh ZORO Northern Zone kimuhkhawmna Thingkangphai, Lamka ah om nawn a, kimuh khawmnate ah ki-unauna ding tup-le-ngim in nei uh chi hi. KNO leh ZORO in kalsuan khawm tou zelin ZORO leh KNO palaite’n Feb 12-14,2014 in Bordumsa, Changland Dist, Arunachal Pradesh ah Kachin mite tawh ki-unauna dingin kimuh khawmna ah vatel nawn uh chi hi. Zosuante Tripura, Assam, Manipur leh Mizoram banah Sagaing Division(Kachin State) leh Chin State banah Chittagong Hill Tracts(Bangladesh) a khenzak  a omte Zo Re-Unification Orgn(ZORO) panlakna tawh kinaihsemna omta chi hi.  KNO President in UN level a ZORO makaite tungah kipahthu gen a, maban a kalsuanna dingte leng kipahpihthu gen hi. 

KNO Spokesman Dr Seilen Haokip in thuthak saite kianga agendanin SoO suaikaih nung Govt. in ground-rules tamveitak bawhsia in KNO in zui a, camp 17 a om KNO cadres te’n govt. thuchiamte ngak mahle uh tunitan kihouna om thei nailou ahihman in lungkimlouh thu taklang hi. Aman agenzelna ah KNO in nam tuamtuamte kala kitheihsiamna a om ding deih in, namdang-te’ thilnget(demand) te  leng Kuki mite hihbuai ding ahihkei peuhleh dal lou a, himahleh Colonial rule om ma a kivaipuakna bang a khawsak kik nawn ding KNO in lunggulh in kalsuanpih chi hi. Govt sang in Kuki mipite KNO in poimawh zaw a,  huchih kawmkawm in maban  election te a govt hoihtak hong dinkhiak ding KNO in lunggulh chi hi. KNO thupuangtu in agenzelna ah Manipur ah community teng in kituak taka amau rights aneihna ding uh KNO in deih hi’n gen hi. 

Tuni a KNO Raising Day zatna ah Chandel akipan Lamkang cultural troupe, The Holigans, Zou cultural troupe leh namlam tuamtuam lahna om a, ZORO Northern Zone makaite, MDC tuamtuam, JDU, KIC . Nu Parchi, COPTAM, KWHRO, KSO telin Kuki Frontal orgn tuamtuam apan makaite leh mipite kihel uh a, ZORO President R Thangmawia apan Presidential Message simkhiakna ZORO Northern Zone a President George Guite in nei hi. Tunitakin KNO kiphuhkhiak lopna in Concert om a, lasiam tuamtuam in lasa in MDC tuamtuam khuallian in pang uhi. 

Click to Enlarge each Photos |  Copyright: PhualvaTimes | Photo by Joy Ngaihte / www.phualvatimes.com