Manipur Express | May 25, 2014

Nulla ah handgrenade kimukhia

Lamka, May-24: New Bazar, Thangzam Road a CCpur Cinema Hall sakzek, Auto Parking ngei, Secondhand zuakna kiang a nulla kuak ah tuni nitaklam dak 3:00 velin handgrenade 1 kimukhia a, Police te’n la in kem uhi. Huai handgrenade ahihleh Indian made hilou in mai pengpung a, Chinese ahihkeileh USA made hiding in Police te’n ginthu gen uhi.

Sister Shanta Kaur in thugen ding

Lamka, May-24: Gospel for India team thusuak kingah dungzui in Sister Shanta Kaur(grand dauhghter of late Sadhu Sunder Singh) in May 25, 2014(Pathianni) zinglam dak 10.00 in Zomi Colony Road (Mandop Leikai) a Central Church,ZPCS ahPathian thugen ding chih ahi hi.

Pakistan Prime Minister  in Modi kichiamna hun uapding

BJP leader-te’n Modi leh Rajnath kimuhpih

New Delhi, May-24: BJP senior leader tamtak te’n tuni’n  Prime Minister thak ding  Narendra Modi leh party chief Rajnath Singh kimuhpih in government bawlkhiak dingdan houlimpih uh chihthu om hi. Modi in a mizat mahmah Amit Shah leh BJP general secretary J P Nadda  tuni nitakin New Delhi a Gujarat Bhawan tung uh chihthu kiza hi.Huchih lai in May 26, 2014 chiang a India Prime Minister thak ding Narendra Modi a kichiam hun ah Pakistan Prime Minister Nawaz Shariff uap ding chihthu om hi.

      BJP leh NDA leader te’n tuni’n Dehi a Gujarat Bhavan ah Narendra Modi kimuhpih in govt thak bawlkhiak ding tungtang genkhawm uh a, huai ah BJP lam akipan Amit Shah, Uma Bharti,  M Venkaiah Naidu tel uhi. Amau BJP national President Rajnath Singh leng atuam in mu uh chihthu om hi. Thudang khat ah Republican Party of India (RPI) chief Ramdas Athawale in leng Modi kimuhpih a, BJP MP Maneka Gandhi, Udit Raj leh senior Delhi unit leader banah Rajya Sabha member Vijay Goel telin mi poimawh tamtak te’n Modi kimuhhuan uh chih hi. Hibangkalah AB Vajpayee in makaihna a NDA govt hunlai Union Minister lenkha ID Swamy in leng tuni’n Prime Minister thak ding  Modi kimuhpih hi.

     Modi in chialna a bawl nung ni 3 chin tawh kitonin Pakistan Prime Minister Nawaz Sharif in May 26, 2014(Seppatni) a Modi in Prime Minister dinga a kichiam hun lapman ding May 26 ni in Delhi hongtung ding a, huaizawh May 27, 2014 in Prime Minister 2te’n kihouna nei ding uh chih ahi hi.Sharif in India President Pranad Mukherjee leng kimuhpih ding hi’n kigen hi.  Modi in South Asian Association for Regional Cooperation (SAARC) makai tuamtuamte leng  chial  a,  Sri Lanka President Mahinda Rajapaksa, Afghanistan President Hamid Karzai, Bhutan Prime Minister Tshering Tobgay, Nepal Prime Minister Sushil Koirala leh Maldivian President Abdulla Yameen Abdul Gayoom  in Modi kichiamna hun uap ding uh hi’n dawnna pekhin uhi.  

    Pakistan PM Sharif in Delhi hong phak hun ah Pakistan National Security Advisor    &      

Foreign Affairs Sartaj Aziz, Special Assistant Tariq Fatemi leh Foreign Secretary Aizaz Chaudhry in hongzui ding uh chihthu om hi. PML-N party thusuak in a gendan in Prime Minister Sharif naupa banah Punjab Chief Minister Shahbaz Sharif  in zan nitakin dakkal khat leh akim sung Army chief Gen Raheel Sharif tawh kihou uh a, huai ah  Shahbaz Sharif in Gen Raheel Sharif kiang ah gam 2 kal kitanauna hoih om theihna dingin Nawaz Sharif in India a phak mah poimawh ahihdan genpih chih ahi hi. Sharif in India hong pha ding chih thu a zekai ziak thildang hilou in Pakistan army establishment ah a lemsalou ngaihdan khauhtak nei a om ziak hi’n kigen hi.

    India Prime Minister ding kichiamna hun ah gam tuamtuam a Head te’n a uap masakna pen uh tutung hiding in kigen a, the Rashtrapati Bhawan kong(forecourt) a Modi kichiam hun ah mikhual(guest) 3,000 val in uap ding uh hi’n kigen  hi.BJP leader Prakash Javadekar in Pakistan PM in India pha dinga Modi in a chial pom a hong zin ding ziakin huai tungtawn in gam 2 kala kitanauna hoihsem a om khiak lam-et huai hi’n gen hi. Senior Congress leader Rashid Alvi in AIR thupesawntu tawh a kihouna uah kipahhuai sakthu genkawm in India in kim-le-kianga gam tuamtuam a kihouthei a om  Congress in deih gige hi’n gen hi.

Nature Education & Wildlife Awareness om

Lamka, May-24: New Lamka a EBC Dorcas’ Auditorium ah tuni  in Divisional Forest Officer (DFO), Southern Divn/CCpur saina in Church Leader leh Evangelist-te ading in ‘One Day Nature Education and Wildlife Awareness Campaign’ om hi. Huai ah Pastor, Elder, Church Leader-te ban ah Evangelist mi 60 vel tel uh a, Kham Suanmung Tawmbing @ K.S Tawmbing, IFS, Divnl Forest Officer/ Southern Divn in sinsak  hi.

       DFO in  agenna ah Nature kichi Pathian’ thilsiam  hi a, huai lakah huih, tui leh lei (soil/land) poimawh mahmah a, huai tunga thuneitu ding  in Pathian in akhut mahmah in mihing siam hi’n gen hi. Forest deptt in sing leh gua sat/phuklouh bilbel ding chilou a, hong pichin hun ua sat/phuk ding chih hizaw hi’n gen hi. Hausa khenkhat te’n Chinese’ Teak suansawm uh a, i gamsung mahmah uah sing leh gua hoihtaktak omte khekkhiat sawmna lungsim tawpsan hun hi’n gen hi. Hausa khenkhat te’n amau gamsung ah Nepali- te omsak uh a, bawng/lawi/kel tamtak khawi in gan(cattle) nekding a poimawh hunhun un gamlian taktak haltum zel uh a, ganhingte’n sing leh lou piangkhe ding tamtak ahihsiat ziak un i gam sung uah Nepali-te’ om thil hoih hina hiam chih ngaihtuahtham ching hi’n gen hi.

Bulldozer vaidawnna leh latna

Lamka, May-24: Socio-Eco Dev Orgn (SEDO) pawl in Kolkata apan Bulldozer khat a lei uh  tuni’n Lamka hongtung in Tuibuong Bazar a Sumkuong Kaimun ah tuni sunnung dak 1:00 in Demmang Haokip, Vice Chairman ADC in vaidawnna in ribbon cutting nei a, Pastor Seiboi, ECA in Pathian kiang ah laan hi. Tuni a Bulldozer hongtung Lamka tan hongtunna din  Rs.20 lakhs val bei hi’n kigen a, tuni mah in Boljol khua ah gari apan lakhia uh  fitting zawh hun in Henglep lampi bawlna ah kizang ding hi’n SEDO makaite’n gen uhi. 

SEDO pawlin Tuibuong apan Henglep lampi abawl uh M.Phaijang khua tan km 10 vel zouta uh a, maban ah T.Hengjang khua apan road widening nasep kipan ding hi’n gen uhi.

HSA’ Topper  2 in  Award  sang uh

Lamka, May-24: Hmar Students Association(HSA) member-te lak akipan  Class-X zoute laka percentage sangpen kiangah  kum 24 paisa a Hmar Literature Society(HLS) in Liensangvung Award a piakzel uh tuni’n Young  Learners School, Zenhang Lamka ah  hawmkhia uhi. Huai ah Douglas School akipan Judith Ramtharmawi leh Albert Lalkhuongam kiangah Joseph Lalrothang, Vice Chairman/HLS in citation leh cash award Rs. 15,000/-  tuak pekhia hi.

Joseph Lalrothang in a genna ah, student-te’ khuak pilna sang hiaihiai in state dangte leng siamsinna lamah khangtou uh a, huchihlai in amaute sanga tulai a eilawi siamna sangzaw tham hi’n gen hi. Ccpur district a percentage niam mu kichite leng state dangte sang in dinmun hoihzaw tung zel uh hi’n gen  hi.

CCpur college ah SSC exam ding

Lamka, May 24: SSC saina in May 25, 2014 zinglam dak 10:00 akipan sun dak 12.00 tan CCpur Govt College ah Junior Engineer(Civil&Electrical) examination 2014 a paper-I examna  om ding a, CCpur dist apan  candidate 36 vel tel ding uhi.

Accident ziakin mi 3 liam

Lamka, May-24: Kholmun playground kiangah tuni nitaklam dak 3.00 velin Activa a kipua pasal 3 tuahsia in liam uh a, amau laka Daniel (14) s/o (late) Sonneh of K Salbung abil ah sisan pawt in serious deuhpen a, hospital ah admit in om hi.  Aliam midang 2te  Lhunkhomang (37) s/o Chonlun  of K. Lhanghoi veng leh David Lalboi (14) s/o Saltlian of  Molnom  hi uh a,  Casualty a dressing bawlzawh in paisak hi uhi.

VK Tawna College ah Commerce

Lamka, May-24: Council of Hr Sec Education,Manipur(COHSEM) in Red Cross Road,Lamka a om VK Tawna College ah Commerce stream pat theihna dingin May 21, 2014 in phalna(permission) pia a, huai dungzui in Class XI(Commerce) zil nuamte adingin admission bawltheih lai chi’n Principal apan thutut kingah hi.

Free Artificial Assessement Camp  

Lamka, May-24: Tuibuong a 27-Sector Assam Rifles te’n tuni zingsang dak 7:00 apan in IB road a Synod Hall ah ‘Free Artificial Limb Assessement  camp’ nei uh a, Jaipur Foot akipan expert team leh Caliters Soceity, Guwahati apan expert te’n manbei in mi 12 kiang ah Artificial Limb thuahsak uhi. Kum lui 2013 in leng 27-Sector Asssam Rifles te’n mi bangzah hiam Artificial Limb pia uhi.

Student te’n loan in Solar laktheih ding

Lamka, May-24: Thadou-Kuki Students’ Union, Manipur in electric ginatlouh ziakin laisimna ah  student-te’n haksatna tuak uh a, amaute’ khualna ziakin installment (loan) in solar 150 W laktheihding in sai uh a, adeihte’n May 26, 2014 zinglam dak 11:00-4:00pm sung in KSO/CCpur office ah thuchian kantheih ding hi. 

Khangthakte SAI a lut din chial

Lamka, May-24: Lamlun Buhril, Asst. Professor in tuni’n   Beaulahlane ah Media-te’ kimuhpih in Sports Authority of India(SAI) nuaia Physical Education(Sports) lam  siamsinna hoihtak hi a gen in  Lamka akipan atamtheipen lut dingin chial hi. Aman agendanin SAI nuaia om Lakshmibhai National College of Physical Education, Kariavattom, Thiruvananthapuram, Kerala in Khuman Lampak Stadium ah June 18-20, 2014 sungin BPED  lut theihna dingin Admission Test hong sai ding uh a, MPE adi’n MPE & PGDHFM adi'n June 9, 2014 tan, BPEd. adi'n June 9, 2014 leh M.Phil adi'n June 19, 2014  in SAI-NSEC, Imphal ah Admission Test om nawn ding chi hi. Huai college bel India adia Physical Education lam a suanhuai mahmah ahihziakin alunglut te adia chance om hi’n gen  a, himahleh Admission Test adi’n hoihtaka kisakkholh ngai chi hi. Website  www.lncpe.gov.in ah prospectus & application form download theih hi’n gen hi.

SUUNNA

Lalmalsawm(15) s/o Hoikhochong of HQ Veng tuzing dak 6:00 velin ZEO office gate kianga Pan dukan zatnawnlouh sungah sisa in kimu a, tuni’n HQ Veng hanmual ah kivui hi.

M.Thangkhandai (85) f/o M.Chinkhokham of Zion Veng, New Lamka tuzing dak 6:00 vel in teknat in si a, YPA Hanmual, New Lamka ah kivui hi.

Mrs. Thangkim (63) m/o Tluongte of Nehru Marg zunkhum natna ziakin tuni nitaklam in RIMS ah si a, May 25, 2014 in Lamka hanmual ah kivui ding hi.

HOT SPOT

Lamka Police te’n tunai zekin Police Station building pua leh asung a room tuamtuam ban ah duty post leh  gate tanpha rong nuhthak uhi.

IMPHAL NEWS

Mipi laka sumkhon matkhiak in om

Imphal, May-24 : Imphal khawpi ah  PREPAK min zanga mipi lak a sum demand a kipei Police ten mankhia uhi. Amah Ayekpam Tomba Singh s/o Sanajaoba of Pukhao Naharup hi a, amah thudotna akipan in  a makai pipen a kigen Mayengbam Ibomcha leng matkhiak in om hi. Thusuak in a gendan in May 12, 2014 in Pologround kianga dukan bawl Jayenta kiangah  Ayekpam in sum Rs. 80,000 pedin  demand  a, tuahun in dukan neitu in neilou ahihdan gen chih hi. May 19, 2014 zinglam dak 11:30 in vapai nawn AK-47 tang, handgrenade khat leh Airtel Simcard khat valak hi. Jayenta kiangah  PREPAK makaite phone houpih dingin sawl a, tua phet in Jayenta in amah dukan kianga dukan neitu kiangah gensawn  a, dukan neite pangkhawm in  police ah report  uhi. May 21, 2014 in Ayekpam va painawn a, tua phet in police te’n mankhia uhi.

RIMS  a semten badge vom belh ding

Imphal, May-24 : RIMS  a semte’n May 26, 2014 (Monday) in badge vom belh in nasem ding chih ahi hi. Thutut kingahdan in RIMS a numei professors, faculties leh numeite’n RIMS tawh kisai Poknampham newspaper ah diklou taka suah chi’n huai  mawhpaih ziakin badge vom belh sawm uh  hi’n igen hi. Thusuak in  a gendan in tuma in RIMS a Dental College akai numei khat kilawmloutak a bawl in om a, huai tawh kisai leng RIMS in poisakthu taklang kawm in tuabang a mawk bawltheih ahihlouh dan taklatna kawm in hibang a badge vom belh a nasep sawm uh hi’n kigen hi.

Sudha Pillai in hongzin ding cancel

Imphal, May-24 : Mrs  Sudha Pillai, IAS (retd) banah former Member- Secretary, Planning Commission  May 28-29, 2014 in  Manipur hongphak   sawm mahleh lemtanlouhna khenkhat om ziakin cancelled thak hi. Manipur Cabinet in Jan. 29, 2014 in Manipur a Land Revenue leh Land Reforms (6th Amendment) bill tawh kisai genkhawm uh a, New Land Use Policy zat ding a thukim in huai Consultant hidin Union Home Secretary lui GK Pillai’ zi Sudha Pillai mawhpuakna pia uhi. Tua tawh kiton a Sudha Pillai in Manipur hongphak sawm hi’n kigen hi. (UNA)

Transfer & Posting :

1.PC Lawmkunga, IAS, Chief Secretary & Secretary (Cabinet & Confidential/Forest &

   Environment/MOBC), Chief Vigilance Officer, Govt. of Manipur & Member Secy. (State

   Commission for OBC) as Chief Secretary & (Cabinet & Confidential/DP), Chief Vigilance

   Officer, Govt. of Manipur.

2.Nikhilesh Jha, IAS, Addl. Chief Secretary (AR/MI) & DG/SAT in addition as Addl. Chief

   Secretary (AR/Forest & Environment/MI) & DG/SAT in addition.

3.Barun Mitra, IAS, Principal Secretary to CM & Principal Secretary (DP/RD & PR/Social

   welfare) as Principal Secretary to CM & Principal Secretary (Finance & Planning).

4.SK Dev Verman, IAS, Principal Secretary (Labour & Employment/TA & Hills) as

   Principal Secretary (TA & Hills/Social Welfare).

5.JC. Ramthanga, IAS, Commissioner (DE/Horticulture & Soil Conservation) & Member

   Secretary (EBADA, BRVDB) as Commissioner (DE/Horticulture & Soil Conservation/RD

   & PR) & Member Secretary (EBADA, BRVDB).

6.Thangkholun Sitlhou, IAS, Commissioner as Commissioner (Lab. & Employment).

7.M. Lakshmikumar Singh, IAS, Secretary (Transport) as Secretary (Transport/MOBC) &

   Member Secretary (State Commission for OBC).

 

FOREIGN NEWS

Assad rally ah bomb puak: mi 39 si

Damascus, May-24: President Bashar al-Assad in  June 3, 2014 a Presidential Election tuh dinga kisa in election campaign aneihna ah mortar bomb hattak puakzak a, mi 39 si uhi. Official thusuakin ataklatdanin puan-inn(tent) sunga Assad supporter-te’ a kikou lai un akipatna theihlouh rocket khat lenglut in puakzak a, naupang telin mi 39 vel si uh a, midang 30 val liam uhi. Thiltunna mun Deraa bel  rebels group - Free Syrian Army hatna bial hi a, rocket kaplut tute leng FSA hi’n kigen hi.

Al-Shabab in Somalia Parliament  luh

Mogadishu, May-24: Islamist helpawl al-Shabab te’n  Mogadishu  city a Somali parliament  valuh in mi 10 that uh a,  asunga bombpuak leh thauging ngaihtak om hi’n kigen hi. Parliament attack ahihphet in  African Union sepaihte leh Somali police  kithuah in helpawlte kikaptuah uhi. Al-Shabab  ahihleh  al-Qaeda tawh kizom in, kum 2011  leh 2012 kawmtuah in Somalia gamsung lianzaw opkhum uh a, himahleh nawhkhiak in om uhi.

SPORTS

Champions League Final :

Real Madrid ten vangphathuaitak in Champion la uh; Electric pailou (zel)

UEFA Champions League final match kimawlna zan nitak in Portugal khawpi Lisbon mun ah om a, huai ah Madrid derby om in Real Madrid ten hun beikuan a goal khat khum ziakin 4-1 a vualzawhna tang in champion la uhi. Hiai match ah Spanish League champion thak liklek Atletico Madrid ten half ma in Diego Godin goal in 1-0 in makai ua, half tan in 1-0 in zou ua, half nung a leng goal khum zoulou ding a omlai un hun beikuan mahmah in Real Madrid defender Sergio Ramos in goal khat khum in 1-1 in kidraw uhi. Tua tawh kiton in extra-time kimawlsak in om ua, huai ah Real Madrid ten Gareth Bale, Marcelo leh C. Ronaldo te tungtawn in goal khum in 4-1 in vualzawhna leh tang daih uhi. Real Madrid ten champion alak uh tawh kiton in kum 12 nung a Champions League alak nawnna uh hi a, amau Champions League 10vei alakna uh leng hita hi.

            Real Madrid Coach Carlo Ancelotti in abul akipan in haksatak in ki om a, himahleh a khonung in vualzawhna kitang a, kipahhuai mahmah, chi hi. Atletico Madrid Captain Gabi in hun beikuan a Ramos in goal a khum ziakin extra-time ah Real Madrid ten banglam peuh ah thaneh mahmah uh hidan in gen a, Coach Diego Simeone in vuallel mahle uh a mittui pawt lou ding hidan in gen hi. Aman Spanish Primera Liga champion lak nung a Champions League a final tan tung hamphathuai mahmah hidan in gen a, tunitak a leng vualzawhna tang tawh kibang ahihdan in gen hi. Tu in maban ah match kimawl ding om nawnlou a, tua ziakin season thak a ding a kisakkholhna neih poimawh hidan in gen hi.

            Tunitak a UEFA Champions League final match bel mun tuamtuam ah tamtak in et sawm in ngaklahtak in om mahle uh akipat ding kuan in electric hong mit meimah a, tua ziakin a tamzaw in ngak thawn uhi. Hiai ma ni 3/4 in nitak sawtpipi electric pai in zan khawvak phial in pai a, Lamka mipite lunglutna Football final match kimawlna om ding nitak kherkher in mei mit mawk a, mi tamtak in lamdangsa mahmah uhi. Huaiziakin, Lamka a football lovers te electric department ten hoihtak in gawtna pia uh chihna tawh kibang hi. Huaiziakin, football ngaina tamtak a dingin huathuai khop in electric department om mawk uhi.  Huaiziakin, maban a FIFA World Cup om ding a leng electric department te mawhpuakna lian mahmah a, Lamka a football ngaina tamtak omlai in electric  om ding dan tamtak in ngaihven ua, kingak thamching a World Cup sung bek a hong om deih huai mahmah hi.

QPR te Premier League adin qualify uh

England Premier League a qualify theihna ding in zan nitak in QPR te leh Derby County ten play-off nei ua, tua ah hun beikuan a QPR striker Bobby Zamora goal in QPR ten vualzawhna tang in season nawn in Premier League ah QPR te mel kimu nawn ding hi. Hiai match ah QPR player Gary O’Neill half ma in red card piak in  om a, tua tawh kiton in Derby ten chance hoihtak nei mahle uh goal khum zoulou ua, hun beikuan in Derby defender Richard Keogh hihkhelh ziakin QPR striker Bobby Zamora in goal khat khum in huai in vualzawhna tang uhi. Tua tawh kiton in season thak a dingin QPR te qualify uhi.

COMMENTS

** Ken zaw bangchituk in vualzou in vuallel le uh leng Gunners tem ah ka chi tinten lailai.  Lets not forget the past & think the future. –Oliver Lal

** Everybody lets cheer the Champions League final between Real Madrid & Atlertico Madrid. -9402632098

** Lets hope Chelsea will lift the EPL trophy next season. Longlive Chelsea. –ZUV

** Luke Shaw you are my star. -8974153157

** Neymar is the best. -9863745554

** Torres mahmah a thiempen ei. –Zuxuy

** Barca ten La Liga trophy bek hongla le uh kiti a. –Barca fans

** Argentina will lift the trophy becoz there is a fantastic Messi. –Zuzui

** Congrats to Hazard & Suarez for your PFA award.- Lalzui

** Bangtik leh Bharat te hi World Cup le pang guo eita ding um maw ? Ahilole CCpur te hi ahung pang vak zoh maw ding u. Who knows it may or may not. –Lalzuy

** Juergen Klopp plis come and rule Manchester United. – BVB

** Eden Hazard is the best footballer right now, no one can argue with this. That’s why he is the richest footballer. I love Eden Hazard and all your fans. Chelsea forever. –Amazing Grace

** Liverpool fanste aw puaknat huai na maizen e maw ? Match tawp a Suarez bang chu hong kap hialta maizen. Nasri kampau dan khamhuai thou City inle zoulou, lainat huai na mahmah e maw ? –S Mang Guite

** C. Ronaldo is the best footballer in the world. –Fans

** Real Madrid is the best. –Optimus VPS

** Ronaldo is all time goalscorer. –Polgen

** Januzaj kha siam petmah himai. –Suan Naulak

** I don’t think Spain will lift the WC trophy becoz Neymar, Oscar, Fabinho etc are in brazil. –Oscar Lun

** Tuchung World Cup ngaklah um ei, but electric dumde bang ah vak zel mit zel ding kal ngaklah huai khollou. –Diamond Suahtah

** For my opinion Neymar will be the best players than Ronaldo. -8131804024

** Eiloi World Cup di I ngaklah lawna a meilam bang hongchi diam maw ?? –Nyang tonsing

** Our heart beats for Liverpool FC. You’Il never walk alone. –Mituru Hiangtam Lamka

** Epi cheng na sei vang un kei apa Hazard kichep bou kavet nompen. –E. Mang’s Old Gelmol

** World Cup ngaklah a umta e. –Football lovers

** Among the footballers Lionel Messi is the best. -8413034681

** Ken Chelsea te ka panpihpen e. –Gouthang

** ZFC kan club pahtak le changkang om kei. A management team, coaching staff te soisel ding khat le om kei. Phaijang mi hitaleh singtangmi hitaleh ei club min a kihel le uh leng a min hoihna chu ZFC ahi thouthou ahi. So, it does n;t matter.  Eg: club lian Arsenal, Man,. United chihte khong enle uh chin a players te uh England mi ngen hi tuanloupi ua, gamdang apan players hoih taktak leikhia ua, hong minthang ahi uh. –ZFC diehard fans

** Portugal team is the best. –CR Sang

** Real Madrid doesn’t won becoz CR7 doesn’t joined. So, friends don’t be worried. –Minlal

** Chelsea ten Atl. Madrid te zoulou chih mawngmawng ka gingta thei mahmah kei. –Chiakers NMLT

** I miss Ozil play morethan mu girlfriends message. –Dave

** Thousang of football clubs, but there is onl\y one FC that is Chelsea FC. –Khuolsiem

** Tutung World Cup ngaklah huai e maw. Germany te lak ding lah theihsa. –Siam Guite

** This season what happen to Man. United, Rooney, Persie, Hernandez, no goalscorer. –Christi Lamboi

** Manchester te Kankan om kei, United in alak kei a lehle City in Manchester a trophy hon pawtung thouthou, Nuamlua. –GGM Thangkeuh

** Tutung World Cup chu Argentina te a ahita ding. –Nicolas Mate

** All Liverpool fans I beg forgiveness to all of you. We should have not won, we don’t know that you all have that much hope. Sorry all. -8730955233

** The world is chance, every thing is change. Now everyone is waiting for Brazil World Cup 2014. Its gonna be a great match here. –T. Syam

** I wish Suarez is a Brazilian. -9612497209

** I am disappointed in Scolari for not leaving a squad for Kaka & Ronaldinho  and Brazil don’t lose hope to be the champion without them. –Kakalal

Brazil ah WC deihlouhna in protest om nawn

Brazil in 2014 World Cup zintun a sawm tawh kisai in a gamsung ua om mi tamtak in deihlou in protest rally ahun phet teng in nei uhi. Tu in World Cup omna ding ni tamlouchik in samta a, tua tawh kiton in zanzek in Sao Paulo mun ah Brazil a nasem a kilawh tawmte banah inn leh lou neilou tamtak in protest rally nei uhi. Amau FIFA World Cup ziaka sum kisengte mipi lak a thehdalh hileh chih deih ua, hiai bang a mi genthei tamtak omlai a World Cup ding ziaka sum tamtak seng hoihsa lou a, tua sumte amaute lak a thehdalh hileh Brazil in khantouh lam manawh ding hidan in gen uhi.

            Hiai hun in Luiz Gionvani in, World Cup ding ziakin Brazil in sum tamtak seng poisalou ua, mi tamtak inn leh lou neilou a omte ngaihsaklou ua, tua ziaka hiai bang a protest nei uh hidan in gen hi. Brazil in World Cup zintun ziakin US dollar 11 billion bang seng ding a tuat hi a, a sumseng teng ua inn leh lou neilou banah health care tawh kisai a seng hileh chih mi tamtak in deih uhi. Hiai ziakin Sao Paulo mun ah traffic naktak in buai a, km 170 tan khawng ding gari lampi ah kivual dim hidan in kigen hi.