LAMKA, July-22 (PhualvaTimes) : Zan nitak akipan tunitak tan vuah tamtak azuk ziakin Lamka khawpi sung tawnkha Lanva lui leh Tuitha lui naktak in khang a, lui kiangnai a tenna inn tamkhop a omte buaizak uhi. Lanva lui tawh kimat Dorcas Veng leh Hebron Veng area banah Gangpimual area mun khenkhat ah luitui luanglut a, kumteng in Lanva lui khang zek mahleh hiaibang thilte bel tung meng meng lou hi'n leng kigen hi. Zenhang Lamka area ah tunitakin Tuitha luitui nasatak in kibehlap a, mun niam a inn neite kihem khia uhi.
New Lamka a thiltungte bialtu MDC nih te'n va enkhia in mipite khamuan uhi. M. Gouzamang Guite, MDC, New Lamka East in tenna inn tamkhop te haksatna thuakpih ahihdan genkawm in, Lanva luitui khang guih theite ziakin buaina om gige thei ahihman in, hiai kiim a inn kibawlte ah pilvan na ding om maithei hi'n gen a, government lam ah disaster management toh kisai in panlak theihdante ah mipi haksatna thuakte adia pang ding hi'n gen hi. CT Lian Guite, MDC , New Lamka West in abialsung mite vehkawm in haksatna thuakte panpih theihdan dan in panpih a, Assam Rifles tawh pangkhawm in panpihna nei hi.
Lanva luitui khan ziakin akimnai a om mi tamtakte'n tenna inn pawtsan uh a, tunitaklam a tui khan hun in, innsung vanzat poimawh tamtak lakkhiak manlouh a om hi'n leng kigen a, huainung sawtlou in mi phatuam ngai tamtak paikhawm te'n mun tuamtuam a haksatna thuakte panpih uh a, innsung vante leng mun bitzaw ah nawnkhiak pih uhi.
Reporting by Joy Ngaihte. Photo by Muante Khuptong / PhualvaTimes
No comments:
Post a Comment