‘Diktatna A Kibulphuh Thakna’ thupi anei in Valpakotsuah Pastor Bial Khawmpi om

LAMKA, April-4 (PhualvaTimes) : Tulai gamsung siatnate apan Tuailaite kikemsiangthou ding a tangkoupihna paitou zel in, Lamka khawpi sung leh muntuam tuam ah DIKTATNA tangkoupih in om a, April 1-4, 2016 sung in Sangaikot area a B. Kaljang khua ah EBC Val
pakotsuah Pastor Bial’ BYF Sub-Committee panlakna in Khawmpi poimawhtak om hi. Hiai YOUTH CONFERENCE -  CUM - MUSICAL FEST -  2016 hunah Diktatna tawh kisai Seminar poimawhtak tak om a, Tuailaite’n diktatna tawh hinkhua zat apoimawhdan sinsak in om uhi.

 Huai hunah Rev.  K Kamchinkhup, Divisional Superintendent, EBC Imphal Division banah Rev.  N Pumsuanmung, Youth Co-Ordinator,  Rev.  E Paukhanlian, DS, EBC Lamka North Division, leh Jimmy Ginbiakthang ten Tuailai paikhawmte sinsak in thugenna hun zang uhi. Youth Conference tawpni nitakin Musical Fest om a, Lamka khawpi sung ah EBC Valpakotsuah Pastor Bial huamsung apan lasiam tuamtuam te’n laa sa uh a, EBC Central Choir leh EBC Lamka North Division Choir te'n leng Phatna lapawl sa uhi. 

Paunakte  14:34 (Diktatna In Nam A Tawisang A, Himahleh Khelhna, Mi Kuapeuh Adingin Zahlakna Ahi) pansan in EBC a Tuailai pawlin “Tuailai 1434Pro Motivational Tour” aneih uh tunitan sunzom tou zel uh a, amaute panlakna ziakin singtang khua a Teacher posting a omte bangzah hiam in asepna mun uh va delh uh chihthu, Thanlon apan khualzinmite apan kiza hi. 

Ccpur district sung ah diktatlouhna, mihinpihte neksiatna a ot-luat ziakin innsung, khotang, saptuam, politics leh thilteng ah diktatlouhna gah muhtheih ding om hi’n kigen a, tuhun in diktatna tangkoupihte’n mi tamtak lungsim ah chii tuh uh hi’n leng kiza hi. “3 Bills” tawh kisai leh Khotang siatna thupitak om nun gin Tuailaite lungtang ah diktatna lunggulhna a let luat man in Mi khenkhat te’n, tuhun pen “Diktatlouhna Khang (Generation) apan Diktatna Khang a Kikhek Hun Ahimai Diam” chi uhi.

click to enlarge photos