HEADLINES:
Uttarakhand PR koihthu ah Parliament Business Session buai
West Bengal 4th phase election ah vote 78.05% kikhia
Kolkata, April-25: West Bengal state assembly election ah tuni in 4th phase om a, huai ah constituency 49 ah 78.05 percent in vote khia uh a, mun tuamtuam ah election hunsung in dan kalh a gamtang chih ziakin mi 230 mat hi uhi. West Bengal a vote khethei ding mi 1.08 crore val te’n candidate 345 maban ding khentat ding in tuni in vote khia uh a, candidate-te’ lakah numei 40 om
uhi. Huai bangkalah, Parliament ah tuni a Business session kipat hun in Uttarakhand a President Rule tungtang ah buaina piang a, session hoihtak a pai theilou in, 4vei hihbuai ahihnung in a 5veina ah tuni adi’n khawlsak in om hi.
Voter-te tuni zingsang in polling station 12,500 te ah kivual uh a, Kolkata ah khawlumdan 40.2 degrees Celsius tung in, ngeina sang in degree 5 in sangzaw hi. Monk tamtakin Ramakrishna Mission leh mun tuamtuam ah vote khia-te en mahle uh, kumdang a achindan uh bang in election ah kihel lou uhi.
Election enkai ding in central armed force telin security personnel 90,000 val Election Commission in koih a, vote khiak ma, nitak teng in amaute’n patrolling nei uh hi’n kigen hi. Law & Order tawh kisai buaina omlouhna ding in district nih ah police oberserver di’n IAS officer 5 koih in om uh a, huailou in, mobile surveillance team 1,100 inleng vote khiakdan etkaina ah panla uhi.
Parliament ah tuni a Business session kipat hun in Uttarakhand a President Rule tungtang ah buaina piang a, session hoihtak a pai theilou in, 4vei hihbuai ahihnung in a 5veina ah tuni adi’n khawlsak in om hi. Hiai session hunah Congress member te’n BJP makaite dem kawm in, BJP vaihawm louhna state-te ah BJP in democracy thahsawm in, Uttarakhand ah President Rule koih chi uhi. Hiai session hunsung in government in GST Bill banah Bankruptcy Bill, Factories Act ammendment leh a tuamtuam genkhawm ding uh hi’n kigen hi. Tuni a thubuai ahihleh innpi tutkhawmna om dek chiang in Congress member te’n kikou kawm in Centre demna slogan tuamtuam sam uh a, Deputy Chairman Prof. P J Kurien in Constitution (Scheduled Castes) Order (Amendment) Bill, 2016 a puaklut sawm chiang in Congress member te thangpai uh hi’n leng kigen hi. Tuabang kalah Opposition leader Ghulam Nabi Azad in Constitution Amendment Bill pen Congress in kalh lou ahihdan gen a, himahleh innpi a kilemlouhna om sung a passed adeihlouh thu gen hi. Tuni a Congress MP kiphin pawlin “Dictatorship in omzia neilou” chih tanpha in Modi kou uh a, tua ziakin BJP member te thangpai mahmah uh hi’n kigen hi. Tuni a tutkhawmna omtheihlouh ziakin April 26 sunma dak 11:00 in om nawn ding hi.
Tuni a West Bengal assembly election in state minister tuamtuamte omkha uh a, amaute ahihleh Finance Minister Amit Mitra, Agriculture Minister Purnendu Basu, Law Minister Chandrima Bhattacharya, Tourism Minister Bratya Basu, Food leh Supplies Minister Jyotipriyo Mullick banah Agriculture Marketing Minister Aroop Roy hi uhi. Candidate tallang deuhte lakah Saradha chit fund thubuai tungtang a judicial custody a omlel Minister-lui Madan Mitra in Kamarhati constituency ah Trinamool ticket in tuh a, huailou in BCCI president-lui Jagmohan Dalmiya tanu Vaishali, Bengal cricket captain Laxmi Ratan Shukla, footballer Dipendu Biswas leh Bidhannagar Mayor Sabyasachi Dutta te’n leng tutung election tuh uhi.
Vote khiak hun in Trinamool Congress candidate leh cricketer Laxmi Ratan Shukla in Election Commission kiangah, a kikhinpih candidate in diklou tak a panla chi in complaint bawl hi. Dum Dum North constituency ah pawlkhat in CPM candidate Tanmay Bhattacharya tuanna car suang in va deng uh a, a khut mun bangzahhiam liam hi’n kigen hi.
PTC Gen Hqtrs. in Mizoram zinna report pia
Lamka, April- 25: Mizoram veh a zin Paite Tribe Council (PTC) GHQ a makaite April 20, 2016 in Lamka hongtung uh a, tuni sunnung dak 3:00 in Hiangtam Lamka a PTC Conference Hall ah Press-te kimuhpih in, khualzinna report pia uhi. L. Pumlianpau, President in agendan in, April 12, 2016 in Sinzawl ah giaklut in Sinzawl block a makaite tawh kithuahkhawm uh a, April 13, 2016 in Mimbung tung ua, April 14, 2016 in Teikhang ah PTC/Mizoram HQ suangphuh honna uap in, Sialkal Range huamsung a PTC Unit om Mimbung, Hiangmun, Teikhang leh Kawlbem a makaite tawh kithuahkhawm uhi. April 15, 2016 in Champhai ah PTC Sub-Hq/Champhai makaite tawh meeting nei in, April 16, 2016 in Aizawl tung uh hi’n gen hi. Aizawl om sungun PTC leh SSPP makaite banah Officer tuamtuam kimuhpih in, Mizoram Chief Minister Lal Thanhawla leh MNF President Zoramthang leng kimuhpih uhi. April 19, 2016 in Aizawl nusia in Silchar tawn in Jiribam tung in, PTC/Vangai block a executive member-te tawh kithuahkhawm uhi. John K. Ngaihte, Gen. Secy. in Lal Thanhawla leh Zoramthanga kimuhpih in, Manipur a om Zosuante’n maban ah leng panpih/kithuahpih poimawh gige ding ahihdan genpih uh a, amau leng pangkhawm dinga chiam uh chi’n gen hi. Chinkhanmang Ngaihte, Secy (Orgn.) in Mizoram a Paite Minister nih leh MLA mi 3-Hauzel Rohlhun, Hangshing Ngurdingliana, Vuite Lalrobiaka, Lalrinawma Khuptong leh Lalthanliana Naulak kimuhpih uh a, Paite Puandum 1 chiat silhsak uhi.
LOCAL NEWS:
Dist. Disaster Respond Team meeting
Lamka, April-25: Lunminthang Haokip, IAS, DC/CCpur makaih in ama’ office chamber ah tuni zinglam dak 11:30 in District Disaster Respond Team te’n meeting nei uhi. Huai ah SDO-te’n amau bialsung chiat ah tunai zeka huihpi, vuah leh gial (hailstorm) in inn-le-lou, thil tuamtuam asuksiat-te report bawl uh a, tuni mah in Manipur Chief Secy kiang ah WT Message in DC/CCpur office te’n report pia uhi. Inn-le-lou kisia tawh kisai CCpur Sub Divn ah khua 5 ah inn 86 kisia a, Henglep Sub Divn. ah school building 2 tel in khua 19 ah inn 354 kisia hi. Singngat sub Divn. ah khua 5 ah inn 30, Thanlon Sub Divn. ah khua 7 ah inn 41 kisia a, Tipaimukh Sub Div. ah Community Hall 2, PHC building 1 tel in inn 138 kisia a, Tuibuong block ah khua 2 ah inn 4 kisia hi.
ZEO in school building thak hong ding
Lamka, April-25: Samulamlan block a Lailampat Primary School ah April 26, 2016 zinglam dak 8:30 in T. Goukhomang, ZEO/CCpur in School building kibawlthak hong ding hi. Huai ah Special Invitees in N. Pakasana, DI of schools, Samulamlan block; Ashong Kom, AI of schools, Samulamlan block, Lalngaklien Khobung, Co-ordinator Civil Work, ZEO/CCpur; Mahindra Singh, AE, ZEO/CCpur; Sarat Singh, SO, ZEO/CCpur; Tongkhopau Haokip, Social Worker leh Zamkholet Haokip, Chief of Lailampat pang ding uhi.
KKL GHQ in QRT bawlkhia
Lamka, April- 25: Kuki Khanglai Lawmpi, GHQ (KKL-GHQ) a makaite’n zan (April 24) sunnung dak 1:00 in IB Road a KKL Complex ah block tuamtuam a makai-te tawh joint meeting nei uh a, tulai a theihkhol louh a vangsiatna tungphut phut tawh kisai genkhawm uhi. Joint meeting a telte’n QRT (Quick Response Team) bawlkhiak dingin thupuk uh a, huai tawh kiton in makai ding leng guang ngal uhi. Chairman in Nehgin, Secretary in Seikholen Lhungdim, Val upa (Tuollaipao) in Otkhomang leh executive member in Thangkholen, Mangminthang, Thangkhochon leh Lienlal guang uhi. Panpihngaite panpih thei dia block-te’n naktak a panla ding leh vangsiat tuah hun ah QRT tawh kithuzak ding inleng mipi ngen uhi.
Special Gram Sabha Day kizang
Lamka, April-25: Dist. Training Centre Hall, Tuibuong ah tuni zinglam dak 10:30 in PHED/CCpur, Good Samaritan Foundation leh DLO pangkhawm a saina in Special Gram Sabhas “National Panchayat Day” zatna om a, Lunminthang Haokip, IAS, DC/CCpur in hongkhia hi. DC in Govt of India in Ministry of Drinking Water & Sanitation tungtawn in India gamsung pumpi ah village panchayat tungtawn in Special Gram Shabha kizang hi’n gen hi. Program sung in ‘Sanitation’ chih thupi zang in John, AE Sub. Divn. No. IV (PHED) leh ‘National Rural Drinking Water Program’chih thupi zang in RK Surendra, AE Sub Divn. No. V (PHED) in thugen uhi.
Singngat ah DLCC meeting om ding
Lamka, April-25: Lunminthang Haokip, IAS, DC/CCpur makaih in May 6, 2016 sun dak 12:00 in Singngat Sub-Divisional HQ ah Dist. Level Co-ordination Committee (DLCC) meeting-cum- review meeting omding a, Dist. Level Officer-te telding uhi.
YMA in Relief Camp bawlkhe ding
Lamka, April-25: April 23, 2016 zing baihtak in huihpi, vuah leh gial (hailstorm) kithuah in Henglep Sub Divn. a Saichang area ah inn 200 val hihsia hi. Huai thu ah zannitak in YMA Chiengkawn Branch Emergency Relief Committee kiphutkhia uh a, amau Chiengkawn bazar ah panpihna (donation) kaikhawm uh a, April 26, 2016 in relief material kaihkhawm teng tawh Saichang area phading uhi. YMA Chiengkawn Branch makaihin Relief Committee te’n zan in panpihna Rs. 48,216/-, tuni’n Rs. 36,890 banah antang bag 30, havai/dal bag 3 kaikhawm uh a, vanzat tuamtuam tamtak leng mi kiphalte’n pekhawm uhi. Gial leh huihpi in ahihsiat nasa deuh khua –Saichang, Kawnpi leh Maumual ah April 26, 2016 in relief camp set-up ding uh hi’n Relief Committee makaite apan kiza hi.
BJP Mahila Morcha in kipahthu gen
Lamka, April-25: Tinkhonei, President, BJP Mahila Morcha/CCpur Dist. in Rajya Sabha member dia Mary Kom nominate a om kipahpihthu puang a, maban ah MP numeite tawh singtangmi numei-te’ adia sports ah khantouhna thupitak ahon sepsuah uh deihthu taklang hi. India Prime Minister Narendra Modi in Rajya Sabha member dia Mary Kom a nominate ziakin kipathu gen a, singtangmite’ dia khanthouhna thil tuamtuam sepkhiat-te tung ah leng kipahthu gen hi.
Training zou te’n Certificate laktheih
Lamka, April-25: Tuibuong a DIC office ah Entrepreneurship Training zou te’n April 26, 2016 zinglam dak 11:00 apan sunnung dak 2:00 tan in office working days in Certificate laktheih ding a, proper authorization omlou in training a tellou midang kiangah certificate piakkhiat hilou ding hi’n General Manager, DIC/CCpur in theisak hi.
7th AR-te’n computer set 6 pia
Lamka, April- 25: Headquarter Veng a om 7th Assam Rifle-te’n tuzing dak 10:00 in Lanva Model High School akai naupangte zatding computer set 6 pia uhi. Computer-te ahihleh Col. Aditya Verma, Commanding Officer, 7th Assam Rifles in Mannou, Headmistress kiangah pekhia hi. Ama’n agenna ah kum paisa in Lanva Model School in computer pedia a nget dungzui ua amau leng ngai poimawh in MCA Project tungtawn in computer set 6, Rs. 2,30,000/- bei in leikhia in tuni a pia uh hi’n gen hi. Tulai khawvel ah computer omlou in bangmah hih theih hinawnlou a, student te’n maban siamsinna ah phatuam theipen dia azat uh deihsakthu gen hi.
Anngawl thumna omding
Lamka, April-25: EBC Division Dorcas Makai Camp a paikhawm teng in Manipur Singtangmite’ buaina tawh kisai, I gam uh buaina awlmawhna ziakin EBC bial pumpi ah anngawl thumkhawmna neiding in thupuk uh a, Director of Ministries, EBC in April 30, 2016 zingkal 7:00 apat sunnung dak 2:00 tan Dorka Pawl makaih in saptuam mipi’n anngawl thumkhawmna nei ding in theihsakna bawl hi. Huai ziakin April 30, 2016 a kuapeuh in program bawllou ding leh EBC bial pumpi a anngawl thumkhawmna neichiat dingin Dorcas Central Sub Committee te’n ngetna bawl uhi.
YPA GHQ in YPA Vengnuam South veh
Lamka, April-25: YPA GHQ makaih te’n tunitak in YPA Vengnuam South Unit, New Lamka veh uh a, YPA Lamka block, YPA New Lamka block, SSPP GHQ, JAC makai-te, MTMRC makai-te leng tel uhi. Chinngaihpau, President YPA GHQ in YPA GHQ nasepte mipi theih ding in genkhia a, Lianzapau Samte, President SSPP GHQ, H. Mangchinkhup Chief Convenor, JAC, G. Nengdouthang, Chairman, MTMRC te’n leng thugenna nei uhi.
MTMRC/JAC makaite vaidawn ding
Lamka, April-25: JAC against anti Tribal bills (Singngat Area ) te’n April 26, 2016 in JAC CCpur leh MTMRC makaite Aizawl zuan a zin dingte Singngat khua ah vaidawn ding uh a, Singngat hausapu Inn ah makaite tawh kithuahkhawm ding uh hi’n Thanglunlal Samte, Jt. Secy, JAC Singngat Area apan kiza hi. Huai hunah maban panlak dingdan tuamtuam kikupna nei ding uh a, JAC CCpur makaite’n report bawl ding uhi.
SSPP Jt HQ Lamka saina in annual sports kipan
Lamka, April- 25: SSPP JHQ Lamka saina in April 30, 2016 tan omding tuni sunma dak 11:00 in Lamka Public Ground ah ‘SSPP Annual Sports Meet 2016’ kipan a, Pastor D. Kamchinmang, Local Pastor, EBCC/Hiangtam Lamka in thumna in hong hi. Huai hun ah M. Gouzamang Guite, EM/ADCC leh G. Thangkhosuanmung, EM/ADCC te’n Guest of Honour hihna tawh a uap banuah branch 22 apan kimawlmi tamtak kihel uhi. G. Thangkhosuanmung in siamsin te’n lawhchin nang in hun zatdik poimawh hi’n gen a, lungsim ahat nangin taksa leng sukhat poimawh a, kimawlna kichi siamsinte a din leng poimawh a, kimawlmite’n game spirit neikawm a kimawl dingin ngen hi.
M. Gouzamang Guite in tulai in gamsung ah khanlawhna nasatak tungin, siamsinte maban ah gam leh nam, society adia mi poimawh dingte ahihman un siamsinna pibawl dingin student-te ngen hi. Tuzing dak 5:00 in marathon race nei uh a, huai ah mi 34 tel uhi. Marathon Race ah T. Chinzamang in 1na la in, Paolian Neihsial in 2na leh S. Phungminthang in 3na la a, John Lalmuang, Anthony Neihsial, Lamlalson Neihsial, Khuplianmang Guite, Raja Dutta leh Vicky Neihsial te’n consolation prize la uhi. Sports hunsung in football leh volleyball telin individual leh group item tuamtuam om ding a, April 30, 2016 in zou ding uhi.
World Malaria Day 2016 zang uh
Lamka, April-25: Caritas India/DSSS saina in District Vector Borne Disease Control Society (DVBDCP) leh Behiang Youth Club (BYC) tawh pangkhawm in tuni’n Behiang khua ah World Malaria Day 2016 zang uhi. Huai hunah M.Hausuanthang, MDC/Singngat in flag-off abawl zawh in student 300 velin Malaria tawh kisai placard tuamtuam tawikawm in lampi zui uh a, Chinlunthang, President, UZO; Ginzamang T. Zomi, Assistant Professor, Ccpur Govt. College; Major Neggi, 26th AR, Behiang, Dr. Liankhawjam, District Malaria Officer; Muan, District Project Officer, DVBDCP; Nengkhosoi, President, Zou Sangnaupang Pawlpi; Benjamin Haumuon, Secretary, Zomi Students Federation (ZSF) leh Robert Lunminthang, Chief of Behiang banah Behiang area a hausa leh makai tuamtuam 500 kihel uhi.
Pastor Thang Ngaih Mung, EBC in hunlatna aneihzawh in Dr. Liankhawjam, DMO in Malaria kilawhsawn theihnate leh kikep dingdan tuamtuam gen a, Behiang ah malaria omthei gige ahihman in mipi kikem siangthou ding in ngen hi.UZO President Chinlunthang in singtangmite pankhawm apoimawhdan gen in, Ginzamang T. Zomi in Education ngai poimawh ding in mipi chial a, khawtang phattuamna ding in thil tamtak tungsaktute laisiamte mah hi uh chi hi.
SUUNNA:
P. Thawngzathang (81) s/o (late) P. Nengkhai of Red Cross road, Central Lamka tuni zinglam in BP Stoke in si a, nitaklam in Lamka hanmual ah kivui hi.
Thangjangam Baite (45) s/o (late) Lunthang of Gelmol village/CCpur, nasepna mun ah apheipi suang (stone) in adengkhak tulel a RIMS ah etkol a om damlou in si a, April 26, 2016 in Gelmol hanmual ah kivui ding hi.
IMPHAL NEWS:
Chief Minister in NFSA hongkhia
Imphal, April-25: Imphal Sangaiprou ah tuni in State Directorate of Consumer affairs, food and public distribution (CAF & PD) ah CM O. Ibobi in National Food Security Act (NFSA) Manipur a zat theihna dingin hongkhia hi. Hiai hun in Dy. CM Gaikhangam, CAF & PD Minister Ksh. Biren, Social Welfare Minister AK Mirabai leh State Chief Secretary O. Nabakishore te kihel uhi. CM in NFSA bel mipi hamphat ding liau-liau hi a, huaiziakin politics kihelsak lou dingin ngen hi. Opposition te’n NFSA pen Congress in maban a assembly election ziaka hon implement uh hidan in gen uh a, hiai pen CM in naktakin nial hi. Tuni a program bel dakkal nih zekai ziakin tamtak in program kpatma in paisan uh a, mi tawmchik kia omkha uh hidan in kigen hi. (UNA)
Misi innkuante tunma a misi
Postmortem ziakin buaina om
Imphal, April-25: RIMS Morgue ah numei siluang, a innkuante tunma a postmortem bawl ziakin pawlnih kalah buaina piang hi. Thusuakin agendan in, misi Ningthoujam Ningol Mutum Ongbi Angali Devi(21) w/o Mutum Gautam ahihleh April 24 nitaklam dak 5:00 velin Yurembam Awang Leikai a apasal tawh a omna inn uh room sungah kikhailumsa in mukhia uh a, numei nute hilh lou in a pasal leh a sungkuante Police ah kipekhia uh a, hiaithu ziakin innkuan nihte kal sousang mahmah hi. Bhamdier Gram Panchayat member Laishram Mangolnanbi in huai tawh kisai tuni'n RIMS Moruge a athugenna ah, innkuan nihte'n anih tuak ua a om hun un postmortem bawl ding in lemsa uh chi a, video coverage thuah kawm a postmortem bawl ding chih himahleh numei sungkuan lamte hospital morgue a tun tak un postmortem zoukhin uh ahihdan hilh in om chi a, kithukimna omsa zuih ahihlouh ziakin buaina liantak om hi'n leng gen hi.
DGM, Kangpokpi in total black-out hilhchian
Imphal, April-25:Tulai a vuahpi leh gialpi ziakin Sadar Hills area sung Kangpokpi apan Leimakhong kikal ah electric kisia a, kalkhat bang kisiat nungin bawlzawh hilou a, mi tamtak in complaint bawl ua, tua tawh kisai in Deputy General Manager, MSPDCL Benjamin Lalneisang Saiate in, line kisia pen Manipur State Power Company Limited te mawhpuak hi a, amau bel line pekhetu hi ua, tua ziakin MSPCL ten a bawl ma uh MSPDCL ten bangmah hih theilou uh hidan in gen hi. Line kisia tawh kisai MSPCl te kiangah theihsak hi mahleh tunitan hong bawl nailou uh chi’n gen hi.
Non-local 24 matkhiak in om
Imphal, April-25: Imphal West Police commando pawlin Thangal Bazar area ah document kichiantak neilou state dang a kipan Manipur honglut, mi 24 mankhia uhi. Imphal khawpi sunga khawtang hoihna ding dal thei dia gintakte matkhiakna dia Imphal police te'n theihtawp suah a, sun-le-nitak a operation abawl uh sutzop in om a, Police te'n mi 24 mankhia uh chihthu a zakphet un JCILPS pawlin leng thiltunna mun delh uh a, mi 24 lakah 18 te'n akipatna uleh tulel a a omna uh kigelhna neilou uh hi'n theikhia uhi. Midang 6 in ID card khenkhat nei mahle uh bawltawm hiding in Police leh JCILPS pawlin gingta uh a, ID card a limlak omnate leng muhchian theihlouh ding in koih uh chi uhi. Police te'n thudotna neih dingin kemlel uhi. Thusuakin agendan in amaute ahihleh Manish (40) s/o Madan Lal Jain, tulela Thangal Bazar a om in nasem dia a laklut hi a, moulopna a kihel dia zat sawm hi'n leng gen uhi.
TRANSFER & POSTING
1. Somorjit Salam, MCS, i/c Director (Survey and Settlement/DIPR) and EO/GTB as i/c Director (Survey and Settlement) and EO/GTB
2. Lokeshor B., MCS, AC to DC/IE (under transfer as OSD, MSPDCL) as AC to DC/IE
3. Smt. Indu Oinam, MCS, Survey and Settlement Officer (under transfer as Deputy Director (Tourism) as Deputy Director (CAF & PD)
TUNI THUPI:
“Unaute aw, ngaihtuahna lamah naupang kei un; himahleh, gilou lamah jaw naungek unla, lungsim lamah piching un.”
- I Korinth-te 14:20
EDITORIAL:
Naupangte leh thaulem
Tuni chiangin company te’n thaulem (toy gun) nalh taktak mai, alem leh atak kitheikhen lou ding khop in bawlkhethei uh a, naupangte’ adingin etlahhuai mahmah ngut hi. Mun tuamtuam ah tulai in toy pistol tawh kimawl muhding naupang hunkhop om a, half yearly exam bang hon zoulai le uh thaulem tawh kimawlna hong uang nawn mahmah dingin kilang hi. Thaulem atom leh asau banah design tuamtuam om a, akhente ngial atang (rubber bullet) hatpipi om zawmah a, mit khawng kikapsak kha le uh duk/del zou mahmah dingin gintakhuai hi.
Nu-le-pa te’n leng tate adingin hibang thilte leisak kholkei theile hoih mahmah dingin ginhuai hi. Tualou in thaulem hon tawi chiang un, a ngaihtuahna (concept) uah ahoihsang in ahoihlouhna om zaw in theihtheih hi. Helpawl/terrorist te ngaihsangna bang om pahpah thei a, Afghanistan telin Maoists te’ lakah leng naupang kumchinglou hunkhop helpawl ah alutna ziak uleng ‘force’ hivek khollou hi. India telin leitung pumpi’n child soldiers angaih khawk mahmah lai in ISIS telin Muslim helpawl lakah child soldier bangzah a om maizen de aw?
Thaulem a kimawlna tungtawn apan naupangte’ lakah ngaihdan hoihlou chi (seeds) kituh thei mahmah ahihdan theihtheih hi. Tualou in Indian army te’n a changchiang in student-te lakah galvan lahna bang, galvan khoihdan training sakna neisek uhi. Lamka zang mahmah ah leng tuabang om kha zeuhzeuh hi. Ahoihna om mahleh ahoihlouhna tamzaw mahmah dingin gintak huai a, “handling arms” tawh kisai ngaihtuahtham pha mahmah hi. Army-te’ ngaihdan abel naupangte’n military lam ah lunglutna hon neile uh chih tupna bel hipeuhmah dinga, tua ziaka ‘arms display’ hihsek uh hidingin igingta hi. Mun khenkhat bangah army te’n student-te’ kiangah AK rifles, SLR, Granite launcher, 9 mm, Sten carbine, 84mm rocket launcher, LMG leh trench mortar tanpha khoihdan sinsak uh chih ahi.
Ministry of Home Affairs in ngohna abawldan un Naxalites te’n numei leh pasal naupang kum 6 -12 kikal mite’ lungsim brainwash in helpawl ah lutsak uh chih ngohna nei uh a, UN Secretary General kiang tanpha ah hiai thu tun uhi. Kuapeuhin i theihkhat uh ahihleh Naxalite affected area himhim ah naupangte’ adingin education lam ah khawsuahna ding vang mahmah a suikhiakin leng om hi. UNICEF in ‘Child Soldier’ kichi ahihleh naupang kum 18 nuailamte ahi chi uhi. India sepaihte’n kum 17 ½ tan a service zawhchiang un official voluntary recruitment lathei uhi. India in military prep school tamtak Rashtriya Indian Military College/ Sainik Schools leh National Cadet Corps te nei uh a, tua ah naupang kum 11 ½ apan kum 13 kikal mi lasek uhi. Huchi ahihleh, huaite leng ‘Child soldier’ danin aleh laktheih diam? Thau lem tawh akimawl ding uh bawn i deihlouh naak kala, ataktak te va ki lahlah leng hoihpen dingin gintakhuai lou hi. Tua sangin naupangte’ lakah thau tawh kisai kisinsakna kipe ut ihihleh a kumchinma uzaw practical a lahkhiak hikholkei henla, a theory chauhin sinsakna piak hileh ahoihzaw diam? A ut te’n internet tungtawnin leng adeihdeih uh enthei mahmah ding uhi.
Mihingte’ lunglutna leh tempaina bel akibang vekkei tham a, himahleh, naupang kumkhat mi lel bangin leng thaulem amuh nak leh lunggulhna neimawk uhi. Tuni chiangin technology leng asang mahmahta a, hong sangtou semsem laiding hi. Naupang pau hoihthei nailou tanpha in ‘Smart Phone’ khoihthei in a utut uh mekkhe zatzat thei uh a, nu-le-pate’ khoihtheih louh tate’n baihlamtakin khoihthei uh a, i tate uh kinung delhding bangta hi. Technology hong khang semsem dinga ‘education’ lamah leng kitaitehna hong thupi semsem laiding a, huchih lai in en i tate houchik a ikhotkhiak khakding lauhuai a, nu-le-pate’n tate tuasang a nasazaw a etkai poimawh i sa hi. Lehkha hong siamkhit chiangun bel amau lunglutna chiat ah pai uhenla, a utte medical/engineering, Pastor, army line leh adangdang ahihlouh tawpin helpawl a ut lele amau thu chini. Bangteng bangteng adingin leh khasiam poimawh mahmah a, lehkhasiam lou himhim azatna ding hong tawm hiaihiai dingin kilang hi. Tua ziakin i tate a chil hun laitak mahin chil ni.
No comments:
Post a Comment