A hong tung ding April 17, 2016 (Sunday) nitaklam 1:30 pm in Nationwide Gospel Music Festival Office ah meeting poimawh tak nei ding. NGMF in Motivational Programme apaipih lel pen, 3 Bills leh i Martyrs te ziaka, i gam in buaina a tuah ziaka sutzop theih louh a a om ziakin, kikhawlsan tadih hi.
Himahleh, khawvel pen apai ngeia pai a, khawl tuan lou ahih man in, Toupa leh a Gam a dia i nasepna pen khawlsan mai theih ahih louh ziakin, a hongtung ding June 25, 2016 hun in, i gam pumpi huapsuak ding in, THUMNA programme thupitak a organize kisawm hi.
"I Pathian kiang ah kik ni, hihdam a i om theih na ding in" chih thupi a nei in, Saptuamte leh tuailaite teng teng kinaihkhawm a, "Prayer-cum-Youth Fellowship" thupi tak ki organize sawm a, huai a ding in program enkhawm ding in meeting ki sam hi.
Hiai hun ah, NGMF in Biakinn chih a tuailaite organize vek a, PHATNA LAPAWL thupitak lepkhawm a, Pathian phat khawm ding chih tupdan hi a, huai banah, hiai hun ah, Biakna/Saptuam makai poimawh tak tak te leh Saptuam a i heutute THUMNA pitu in pang ding uhi.
Hiai program zatna di ah, EBC GHQ Dorcas Hall in, EBC Centinary Hall leh, a kisaipih vante zat ding a phal tak a ahon piak ziak un, i kipak petmah ua, i heutute tung ah Toupa min in kipahthu i gen hi.
NGMF in a thupi paipih pen ahihleh, i gam pumpi Christ a, khalam kipumkhatna chih thupi a nei in, i gam a Pathian mite lakah khalam kipumkhatna in zung kiptak a akaih ding chih i deih na ahi.
Hiai hun ah, Chi leh Nam thu i buaipih kei ding ua, Pau leh Ham thu buaipih lou in, huai ban ah, gindan (Doctrine) hichi bang te buaipih lou in, Khrist tatna leh ahong pai kikna lamen te teng teng in Amah phatkhawmna leh biakkhawmna thupitak ahih ding I deihdan ahi.
Huaiziak in, kuapeuh mahni omna saptuam chiat a laazilna leh hiai tawh kisai a kisakkhawlhna te a, Toupa min a theih tawp suah a pan ana la chiat ding in i kingen uhi.
Hiai nasepna, Saptuam a i heutu ten ahon patkhiakpih uh, ahih dung zui in, mahni omna Saptuam chiat a gin om tak a pang kawm in, i kithuah khawm ding uh hi.
Khrist le a gam a dia, noute tawh sem khawm.
Sd/-
(Lalnghaisan Intoate)
Gen. Secretary, NGMF
Sd/-
(T. THANGTHUAM)
Chairman, NGMF
