Nidang a athu kia a i na zaakkhak, a taktak a eilak hongtung dia i gintaklouhte tu in i lak hongtung maimah hi. Western Culture i chihsek, tumlam gamte’ khosawkdan leh tawndante in khangthakte’ lungsim luahdim vek a, tua in i khothang (society) sung hoihlam hi’n hoilou lam hitaleh nakpitak in hon nawk hi.
Nam khangtou leh changkangte’ om dan leh khosakdan koppih dia i economic life un hon chin tatak nai tadihlou ahihman in tuate koppih in hoihlam sang in siatna lam hon tunpih zaw diing bang hi.News khawng a i na muh leh zakzak sa, mi kongtual hiam ahihkeileh mi omkhawmna mun (public place) a bomb thangkam leh sukpuak chihte thil lamdang hinawn keimahleh ei kiang ahongtun hial chiang in bel lamdang saklouh theihlouh suak hi. Hichibang sual gamtatna pen kuapeuh in kimohpaih chiat a, maban ah hichibang numei-naupang lungphawng sak thei di thilte kuapeuhmah in i tawpsan vengveng uh i deih. Tua ziakmah in pawlpi tuamtuam – Innpi, Students’ body, Philanthropic Organization leh bang organization-tion le ahia, A-Z, a mohpaih thei liaisiah in mohpaih thu i suah kheukhou uhi.
Tua kia mai hilou in, mohpaih latsakna a bandh/total shutdown bawl manlouh khak di lau hile kilawm hial in bandh/total shutdown kin-le-buang in i bohzui sak ngal uhi. Khauh mahmah chi-o! Hiai total shutdown kibawl pen philanthropic organization khenkhat in a bawl d’uh ka sak leh ana hilou daih!
Kuapeuhmah in gamsung hoihna di kideih chiat a, gamsung galmuang leh thoveng a a-om theihna diing in kuapeuhmah, aneu-alian kihong tak in ki-om khiukheu chiat hi. Gamsung hoihna di ahihnakleh a awlmohlou ki-omlou a, mimal hi’n pawlpi hitaleh kimohpaih vek hi. Himahleh, pawlkhat i dinsuah chiang in a dinsuah nasan om vek a, thilteng a va kigolh pah lo-lokpen kilawmlou hi. Thilzaw awlmoh di mah hi hilele, issue teng a i va kigolh a, va kitaklah luat pahpah pen ei-le-ei kisukneuna maimai hinuam mahmah hi.
Huan, hichibang bandh/total shutdown te’n i niteng nektak zonna hon nawkkhak dan i theivek ua, himahleh hiaite lou a ‘means’ dang om mahmah lou le hikha’n teh, lungkimlouh latsakna in hiaite mah i kivialleh sak nilouh denlai uhi. Ahi a, lungkimlouh latsakna a bandh/total shutdown bawl, tua pen pawldang khat in hon mohpaih zel di, ei-le-ei kimohpaih tuahtuah di mah i bang uhi. Paunak in “Akta mangkuan kitutu” achihte uh kibang maimah le hita lou hiam? Khekhat a dingkhawm a, khantouhna di gamla mahmah lai bang maw??!
Thukhat ah eilak a bel ‘mohpaih’ chih mahmah le kithang thoh gawp in chin kuamah in le thupi ngaih lawmlawm nawnlou, ngaizaam sukmai chiat hile kilawm bang hi. Mohpaih sukpah, aban chu a kisaipih thunei tute’ hih dia koih. A kisaipih thunei tute! Mohpaih a omte’n lah thupi ngaihvaklou; a mohpaih tute’n le mohpaih tankia thei. A ban mong. Bei! Mohpaih thusuah tanlel a i gamsung hoih diing hilebel a hoihna kumkhua sawtta ding hi.
I gam Christian gam i chi a, Tangthupha vaak in i gammial a hon tanvaknung bangleng kum 100 valthamta hi. Himahleh i gamsung ah sual gamtatna – sum-le-pai deihtakna, mahni angmasialna, kineksiatna leh numei’ tung ah tatsiatna te’n mailam nawt hiaihiai hileh kilawm hi. Sum-le-pai deihtakna, kineksiatna ziak in i gamsung abuai a, tua in bangtan hondaih lai di ahia chih i theikei. Tua, hiai i gam buaina ziak in hinna 9 hilhial mansuah mahle a po-tham lel sawkkha i bang lai ua, a core issue taktak i sukkhak ma ua ahong po-dam maimah khak di lauhuai pi ahi.
Tua hiai 3 Bills tungtang a i gam buaina uh genlouh a kallak in buaina neuhneuh gen di tampitak i tuak ua, i tuaktou lai diing uh. Numei’ tung a thangtat ziak in hinna khat i na mansuah ua lah a khonung a sum bangzah hiam toh kihoulem chih hizel! Ahi a, kihoulem in lemlou hitaleh a sisa hongthou kiik di ahi kei. Ka gennop takbel bang chituk in khial mahle mihing’ hinna kilaksak hial pen khengval ana sa deuh ka hih chu, ken.
Huan, sum bangzah hiam toh sihna thu genlem theihzel ahih ale bel ahau leh neizoute a ding a haksa hetlou suak mawk ding bang hi. Hinna kichipen eikhut a omlou ahih banah sum-le-pai a leng leitheihmawk thil ahihlouhman in hinna tung a zahngaihna neihzek kisam hi.
Numei-pasal kal thangtatna leh numei’ tung a tatsiatna i chihte i lak ah tua hong ompan ahi zenzen kei. Nungak leh tangval nupa bangmai a omkhawm chihte’n i lak ah mun lianpi luahta a, a siangsiang a gen in hiai pen tumlam gamte’ om dan a kipan i laksawn uh ahi chile’ng khial sautel di’n ka kikoih kei.
Ngawntang phialphial a ki-selfie gehgah chihbang le i lak ah om thamta. Hichibang thil te mite’n nekzonna leh sum muhna’n zangmah le uh eilak abel minsiatna hizaw ahihman in nam khangtou leh changkangte’ om dan leh gamtatna teng va koppihpen ahoihpen hi (nai) lou phot hi. Huaiziakin, mite’ hihdan leh om dante i eng a, i va koppihnuam ahih in bel ei sung kibawllem masak tawmtawm poimawh phot lai diing hi.
5/4/2016
