MANIPUR EXPRESS | MAY 14, 2016

HEADLINES:
UNC, KIM leh Inpi/Tribe Council te’n meeting nei

Lamka, May-13: United Naga Council, Kuki Inpi Manipur, Hmar Inpui, Mizo People’s  Convention leh Zomi Council makaih nam tuamtuam a makaite’n tuni in Hmuia Veng a MPC office ah joint meeting nei in thupukna tuamtuam bawl uhi.  Khamneithang Vaiphei, General Secretary, Zomi Council & Recording Secretary in meeting thupukna suahkhiak ah tribe tuamtuam a makai paikhawmte’n May 9, 2016 a Chief Minister O. Ibobi  makaih all-political party meeting thupukna mawhpaih uh a, all political parties' meeting in singtangmite’ deihlouh leh lungsim nasak ding thupukna alak uh chiamteh ding in thupuk uhi. JAC against Anti-Tribal Bills in singtangmite luahna bialteng ah May 16 zankim apan May 18, 2016  zankim tan dakkal 48  sung total shutdown a puan leng gum in, a lawhchinna din naktak a panlak dingin thupuk uhi. JAC Against anti-tribal bills panlakna hatsemna din Manipur-wide Co-ordination committee a baihtheilam a bawlkhiak dingin thupuk uhi.
     Co-ordination Committee ah United Naga Council (UNC) leh Kuki Innpi Manipur (KIM) President-te Convenor leh Co-Convenor  hiding uh a, Hmar Inpui, Kuki Innpi Manipur, Mizo People Convention, United Naga Council leh Zomi Council te’n palai 2 chiat sawl ding uh a, Co-ordination Committee tawh JAC Against Anti-Tribal Bills in nasemkhawm ding in thupuk uhi. Makai paikhawmte’n joint memorandum bawl ding leh huai ah India President kiangah  anti-tribal bill-te lemsakpihna  pelou dinga nget  ding in thupuk uhi.  Meeting ah JAC against Anti-Tribal Bills leh CCpur pansan Tribe/Council tuamtuam makai mi 58 paikhawm uhi.


RS session ah buaina ziakin dakkal 19 bei
Member of Parliament apan retire ding 53 khakna om
New Delhi, May-13: Rajya Sabha session tuni in zawh siang hita a, session sungin bill 12 passed in om hi. Huchi kalah, issue tuamtuam ziakin thubuai hunkhop om a, tua ziakin dakkal 19 sung bangmah lou in hun mansuah uh chihthu kiza hi. Abikin Uttarakhand a President's Rule koih a om thu in hun sawtpi session hihbuai a, AgustaWestland helicopter deal thubuai (controversy) ziakin leng session dakkal tampi buai hi. Session hun a dakkal a hisap in dakkal 69 sunglel hi a, himahleh, huai lakah dakkal 19 sung bangmah houlim theihlouh in buai chih thu om hi. Gujarat State Petroleum Corporation a KG Bsin Gas Project thubuai tawh kisai a CAG report in leng hihbuai  mahmah a, khawlum leh khawkeu ziakin leng  Rajya Sabha sitting leng buai sek  hi.
    April 25, 2016 in Rajya Sabha Session sutzopna kipan nawn a, tuni tan om hi. Tuni zawh in Member of Parliament apan khawl(retire)  ding  53-te ngaihnatna leh zahna piakin om hi. Amaute RS Chairman Hamid Ansari in khiak lahna thugen a, a thugen in member te’ lungtang khoih mahmah chih ahi hi. Ansari in thu tam gen kei mahleh a thugen tom in mite’ lungtang deng ‘short and challenging’ chi uhi. Member te’n mipite khualna a ngaihdan tuamtuam igenkhawm un akal lakah kitheihsiamlouhna hon tun mahleh mipite adingin khantouhna thupitak tun ahi chi hi. Prime Minister Narendra Modi in MP 53-te zahna pekawmin amaute ziakin India in lam tuamtuam ah khantouhna mu ahihdan mit in muhtheih chi hi.
    Rajya Sabha MP  June/July kha a retire dingte  Congress apan 13, BJP apan 11, BSP apan 6, JD (U) apan 5, AIADMK apan 3, Samajwadi Party apan 3, TDP, DMK, BJD leh NCP apan 2 chiat, Shiv Sena leh Shiromani Akali Dal apan 1 tuak banah Independent 1 tuak ahi  uhi. Retire dingte laka mi tallangte ahihleh Union Minister-M Venkaiah Naidu, Nirmala Seetharaman, Piyush Goel leh Mukhtar Abbas Naqvi telkha uh a, amaute BJP apan ngen hi uhi. Tualou in, Congress apanin Mohisina Kidwai, Ambika Soni, Oscar Fernandes leh Jairam Ramesh leng tel uhi.
    Bill tuamtuam 12 ki-passed  mipi khualna ngen ahi chi’n RS Chairman Ansari in gen a, tuate lawhchingtak a sepsuah ahih ka gingta chi hi. Hibang kalah, RS in bill a passed uh a pideuhte ahihleh Finance Bill 2016, Insolvency and Bankruptcy Bill leh GST bill hi a, tualou in bill hunkhop leng passed uhi. GST bill tawh kisai in buaina thupitak tung a, opposition Congress in deihkhop in nang(resist) ua, tualou in bill tuamtuam ah kikantuahna om leleng innpi tungnungzaw (Rajya Sabha) houlimna kha khat nungin zawhtheih khongin om chih ahi  hi.


IED nuai ah Escort leh Transport Allowance hawmkhia
Lamka, May 13: Thangzam road a Inclusive Education for Disabled (IED)/SSA Resource Centre ah tuni zinglam in IED nuai a Disabled person-te lakah kum 2015-2016 a Escort and Transport Allowance hawm in om hi. Huai ah Chief Guest in Lalthanzam Infimate, BO/HQ DC’ office leh Guest of Honour in T. Goukhomang, ZEO/CCpur pang hi. Chief Guest in mi 131 kiang ah Transports Allowance hawmkhia a, Guest of Honour in student 115 kiang ah Escort allowance hawmkhia a, mi 1 in Rs.2500 zel ngah uhi.
     BO HQ in agenna ah children with special needs-te panpih ngaiden ahihman un nu-le-pa te'n hoihtaka enkol din ngen hi. Amaute panpihtu ding midang sangin nu-le-pate hi uh  ahihdan gen  hi.   ZEO in Disabled Person-te panpihna dinga govt in  scheme tuamtuam a bawlkhiat thupi hi’n gen a,  vual phaloute govt in hoihtak a hon kepsak aleh mahni ta, mahni sisan apiangte  bangdia hoihtaka kemlou ding i hiam? chi'n nu-le-pate chou hi. Mitamtak te'n vualphalou mahni tate ziakin  lungkham uh a, himahleh Pathian in mi teng talent pia a, vualphaloute’ talent pholhsuah leng amau leh amau kitoudelh thei ding uh hi'n gen hi.
        Program sung in IED, SSA nuai a hamphatna ngahte lak ah Kimneilam (8) d/o Jangkhohao of Mongbung, Singngat sub divn. leh Vungthiannem (13) d/o N.Tunthang of Vengnuam, New Lamka nu-le-pa te'n a tate uh SSA tungtawna Medical Treatment a piakte uh ziakin hamphatna a ngahte uh a paikhawmte lakah puangkhia uhi.


LOCAL NEWS:
Lamka area ah electric supply theilou
Lamka, May-13: Tuni nitaklam a vuahzu leh huihpi kithuah ziakin 132/33/11-KV Khengjang Power Sub Station apan Lamka khawpi leh asehvel ah electric meivak supply theilou a, huihpi in singkung amutpuk ziak a electric meivak paitheilou hiding in kigen hi. Khengjang power sub-station apan 33/11 KV-Khominthang, New Lamka ah ahihleh bel electric paithei hi’n kigen hi.


SDO/BDO Singngat in panpihna pia
Lamka, May-13: N. Thuamkhansuan, SDO/BDO Singngat in zan leh tuni’n huihpi, vuahpi leh gialpi thuakte panpihna hawmkhia hi. SDO/BDO in mi 1 kiang ah antang half bag 1 leh sum bangzah hiam pia a, akim khat kiang ah pezouta hi’n kigen hi. Singngat sub divn. a khua 8 apan mi 35 te’n huihpi, vuahpi leh gialpi (hailstorm/cyclone) thuak uh hi’n kigen hi.


VTI ah training prog hon hiding
Lamka, May 13: Reformed Presbyterian Church, North East India (RPCNEI) Dev. Deptt. nuai a om Rengkai Muolhlum a Vocational Training Institute ah May 14, 2016 zinglam dak 10:00 in "1 Month Training for Bamboo Cap Making & 15 Days Skill Development Training on Wood Carving & Its Allied Crafts" hon  hiding hi. Huai ah Chief Guest in Vivek Kumar Dewangan, IAS, Commissioner (Commerce & Indus); Guest of Honour in B. John Tlangtinkhuma, IAS, Director, Commerce & Indus) leh Chief Host in Rev. Edwin Darsanglur, Director, Dev. Deptt , RPCNEI pang ding hi.


UZO Exe meeting leh furniture latna
Lamka, May-13:  Zoveng a Zogal Memorial Hall complex a UZO office ah May 14, 2016 zinglam dak 10:30 in UZO Executive Committee meeting om ding hi. Huai ah Zou Custom Sappau (English) a lehkhiat ding a kiguang theihpihna; UZO Annual Fund 2016-2017, Constitution Drafting Committee mi 5 guanding thu leh  Executive member  3 nominate ding thu genkhawm ding uhi. Sunnug dak 2:00 in UZO in Policy Plan lak a Project a neih uh Office Furniture bangzah hiam bawlzawh hita a, huaite Rev Stephen Chinzathang, Executive Secy, ZPCS in Pathian kiang ah lan ding hi. Huai hun ah UPSC a lawhching M.Thangsuansang Zou leh MPSC a lawhching M.Khamsuanhang Zou  kipahpihna program tawh thuahkhawm ding uhi.


ATML in thupuan bawl uh
Lamka, May-13: All Tribal Movement Lamka (ATML) in thusuah a bawlna uah gamsung buaina leh haksatna tawh kisai gen-le-sak neilou MLA-te’ boycott puankhum ahih dungzui in programme tuamtuam ah tel theilou ding uh a, hongpha a om leleng mipi om maimai lou ding chih taklang uhi. MLA-te programme a teldi’n leng kuama’n chial nawnlou dingin thusuah bawl uhi.


PRA ah C-in-C lenzom ding
Lamka, May-13:  T. Stephen, Secretary (Publicity), KNO in thusuah a bawlna ah March 18, 2016 issue Newspaper 1 ah Milan, C-in-C, Pakan Re-unification Army (PRA) terminated chihthu suah a, KNO a Central Working Committee te’n tuni’n huai thu ngaihtuah uh a, PRA President in  mimal deihna kia in  constituent member-te phalna tellou in C-in-C khek theilou a, Milan in PRA a C-in-C mah lenzowm ding chi’n taklang hi.


Relief Committee te’n panpihna peding
Lamka, May 13: S. Thienlal Joy Gangte, Chairman, YMA Relief Committee leh CV. Duhawma, President, GYMA, Manipur makaih in tuzing  in Saichang Area Relief Committee te’n  Saichang area ah relief material 3veina hawm dingin kuan uhi. Relief Committee te’n DI tata 1 leh 407-tata 2 zang in relief material- antang bag 10, langva (CGI sheets) bundle 60 pua uh a, Bolero leh Gypsy kigawm gari 5 zang uhi. Amau tuzan in Saichang ah giak uh a, May 14, 2016 in D. Loupum, Saichang, Konpi, Maumual, K. Zoar, Santing-1, Santing-L, Chongchin leh C. Zalen ah panpihna  hawm ding uhi.


HSA CCpur Jt. HQ in surprise visit nei
Lamka, May 13: HSA CCpur Jt. HQ makai te’n tuni in Rengkai govt Hr. Sec. school leh Saikawt govt school ah surprise visit bawl uh a, school 2te’n haksatna atuahte uleh poimawhte HSA CCpur Jt. HQ makaite kiangah genpih uhi. Maban ah HSA CCpur Jt.HQ in amau area sunga school omte function theihna din panlak zel sawm uh a, school thuneitute leh mipi’n kithuahpih di’n ngen uhi.


Martyr poster zang thanghuaite’n ngaihdam ngen di’n theisak
Lamka, May-13: Manipur singtangmite adia hinna pia Salpha mi 9te min tuanna poster khat Torbung bazar a Diesel Auto Workshop neitu khatin a zat thanghuai ziakin ngaihdam ngen dingin poster bawltu ‘The Singtangmite’ apan thusuakin theisak hi. Poster zang thanghuai te’n Manipur singtangmite’ simmawh in salphate zahna neilou  chi’n mawhpaihna sangpen puankhum uhi. May 16, 2016 tan in media hiam Torbung V/A tungtawn in gelhthawh a ngaihdam ngen ding in theisak uh a, ngaihdam ngetna a om keileh koih maimai lou ding uh hi’n taklang uhi.


Relief material hawmkhe ding
Lamka, May-13: Joel Haokip, SDO/BDO Thanlon makaih in staff te’n Thanlon sub divn. a huihpi, vuahpi, gial in inn-le-lou a hihsiat-te panpihna peding in tuni’n  kuakhia uh a, Bukpi khua tan ah panpihna hawm ding uh hi’n kigen hi.


DM in shooting permit pia
Lamka, May-13: Dist. Magistrate/CCpur in CCpur Dist. Rifle Club-te kiang ah May 14, 2016 in Lamjang village ah Air Rifle leh .22 Rifle (gun) shooting competition nei ding in phalna pia hi.


Saptuam in panpihna ankuang luiding
Lamka, May 13: EBCC Khominthang, New Lamka in biakinn bawlna ding in May 14, 2016 nitaklam 3:00- 6:00 sung EBCC Khominthang campus ah panpihna ankuang luiding uh a, chial a omteng in Pathian’ min a umsak chiat dingin ngen uhi.


Excursion paite tungkik
Lamka, May-13: Deptt. of Science & Technology, Manipur apan huhna zangin Guwahati a ‘The 19th DST Science Excursion’ a pai Manipur  a Private leh Government School a kai Class IX student 65-te tuni Imphal hong tungkik uh a, CCpur dist a student-te Lamka tan hong tun theihna ding un M. Gouzamang Guite, EM/ADCC in ngaihtuahsak in zinglam dak 10:00 in Lamka hongtung uhi.


CDSU in kipahpih
Lamka, May-13: CCpur District Students’ Union (CDSU) in tutung Class XII examna result suak a lawhching student-te kipahpih thu puang in  maban ah lawhching zel din  deihsakthu taklang uhi. Huailou in  lawhchinna ngahloute leng thuakpih in, lawhsapna pen lawhchinna dia kalbi masa ahihlam phawkthak kawm a panla ding in hasuan uhi.


ZNC Orthodox te’n meeting nei
Lamka, May 13: Simveng a Simte Inn ah tuni zinglam in Zomi National Congress (ZNC) orthodox pawl meeting uh a, ZNC defunct a om hihhat thak hoih hiam, ZNC member sisate’ han mun ah pakkhi bek piak a, a mualsuang uh bawl a, aminte uh gelh hoihlou hiam chih genkhawm uhi. Himahleh thupukna bawlthei lailou in Aug 4, 2016 zinglam dak 10:30 in  meeting om nawn din thupuk uh hi’n kigen hi.


BSN, Muolvaiphei ah Free Medical Camp
Lamka, May-13: Bethesda School of Nursing, Muolvaiphai ah tuni in State AYUSH Society saina in "National AYUSH Mission" nuaia ah Public Health Outreach activities tungtawn in Free Medical Camp om hi. Huai ah Dr. L.Lokendro, Director National AYUSH Society, makaih in Dr. Iboton, Medical Officer (MO); Dr. Gitarani, MO; Dr. Ngaimuankim, MO; Dr. Dhaneshori, MO; Dr. Ritamathuri, MO; Dr. Tennyson, MO; Dr. Lukhoi, Sr. MO leh Dr. Aken, Yoga Instructor te'n Muolvaiphei leh akim  apan damlou mi 200 en uh a, manbei in dawmdoi pia uhi.


IMPHAL NEWS:
BJP in candidate 24 puangkhia
Imphal, May-13: Imphal Municipal Corporation election tungtang puankhiak ahihnung in BJP min a election tuh ding candidate 24te tuni’n puankhiak hita a, seat 27 lakah BJP in 24 tuh ding hi’n kigen hi. IMC election adi’n Lamshang AC leh Imphal East banah Imphal West sungah voter 175864 in in pasal 84045 leh numei 91819 hi uh a, polling station 255 om hi. Imphal East district ah electorate 51756 om in councilor 7 nei ding uh a, ward development member 14 om in,  polling station leng 66 pha hi. Imphal West ah vote khe thei ding 124108  om in amaute’n councilor 20 nei ding uh a, ward development member tel a om ding mi 40  ahihbanah polling station 189 pha hi. BJP candidate ticket 54 omtheite adi’n mi 43 in ticket ngen uhi.


Inn khat kang, A/R te’n panpih
Imphal, May-13: Tuzing dak 8:15 velin electric short-circuit ziakin Tengnoupal, Chandel ah inn khat kang a, HQ IGAR(S) leh 26 Sector Assam Rifles nuaia om 12 Assam Rifles  te’n meikang thuakte panpih in meikuang phelhmit pih uhi. Thusuakin ataklatdanin innkang omlai in Assam Rifles pawlin Fire Fighting Party, Quick Action Team, Medical personnel leh Water Bowser te tawh pang in dak 8:20 velin phelhmit thei uhi. Meikuang phelhmit dia kisalai A/R Officer khenkhat kangliam uh a, minautnag khenkhat leng kangliam in amaute A/R  Unit Hospital ah etkol hi uhi. Assam Rifles pawlin panpihna apiak ziakun khawsung mite’n kipahthu gen uh hi’n leng PIB(Defence Wing) apan thusuakin taklang hi.


State Edn. Sector masawnna ding in panla
Imphal, May-13:  Manipur Education Department in state sunga siamsinna masawnna ding in panla ahihdan NG College, Imphal West a 'Women’s Hostel and Indoor Hall' honkhiak hunah education minister Dr Kh Ratankumar in gen a, education hihbuai thei ding bangmah bawl ngeilou ahihdan leng gen hi. Education sector a pending issue omte leng hihbei sawm a panla uh hi’n gen a, thil tuamtuam nget ziaka Bandh leh Blockade te’n siamsinna hihbuai hi a gen in mipite’n kiphinna tawpsan ding inleng ngen hi.


Konung Mamang apan Irilbung kikalah kiphin
Imphal, May-13: JCIPS makaih a kiphinna paitou zelin tuni’n Konung Mamang akipan Irilbung demanding tan ah mipi akizom in kiphin uh a, state assembly in Bill 3 a passedte akintheipen a paisuak sak ding ngen uhi. Tuni a kiphinna hunah locals club tuamtuam leh  'meira paibi (women pressure group) te’n sit-in-protest nei uh a,  zingchiang in Keishampat apan Hiyanthang tawn in Mayai Lambi road ah kiphinna sunzom ding uhi.


IGNTU ah May 20 tan PG & Ph.D admission
Imphal, May-13: Indira Gandhi National Tribal University, Regional Campus, Manipur adia PG leh Ph.D course online admission pailel May 20, 2016 tan ading in hihsau hi a, Univeristy website www.igntu.ac.in ah thuchian muhtheih ding hi'n S.L. Varte, Director i/c in thusuah bawl hi.


Transfer and Posting
1. M. H. Khan, IAS,  Principal Secy (CAF & PD/Eco & Statistics) as Principal Secretary (CAF&  PD)
2. K. Moses Challai, IAS, Principal Secretary (Co-op) as Principal Secretary (Co-op/Social Welfare)
3. Paulunthang Vaiphei, IAS, Principal Secretary (Hr & Tech. Edn/SCERT) as Principal Secretary (SCERT & Eco & Statistics )
4. Vineet Joshi, IAS, Commissioner (Planning/Power) and Resident Commissioner, Manipur Bhawan, New Delhi as Commissioner (Hr & Tech. Edn/Planning/Power) and Resident Commissioner, Manipur Bhawan, New Delhi
5. B.B Sharma, IAS, Commissioner (Adult Education/GAD) as Commissioner (Adult Education )
6. PK Singh, IAS, Commissioner (DP/IT/Health & Family Welfare) as Commissioner (DP/GAD/IT/Health & Family Welfare)
7. Thaithuilung Panmei, IAS, Commissioner (Horti & Soil Conservation) & Member Secretary (EBADA & BRDVB) as Commissioner (Horti & Soil Conservation/TA & Hills) & Member Secretary   (EBADA& BRDVB)
8. R.K Dinesh Singh, IAS,Commissioner (YAS/MAHUD) as Commissioner (MAHUD)
9. H. Deleep Singh, IAS,  Commissioner (Edn-S) & SPD (SSA/RMSA) and Chairman, BSEM in addition as Commissioner (YAS)
10. Sumant Singh, IAS, Secretary (Fishery) as Secretary (Edn-S) & Chairman, BSEM in addition
11. Th. Gopen Metei, IAS, Secretary(IFC/Agri/MOBC) & Secretary, State Commission for OBC as Secretary (IFC/Agri/Fisheries/MOBC) & Secretary, State Commission for OBC
12.  Hungyo Worshang, IAS, Jt. Secretary (PHE) as Joint Secretary (Fin) & PD (MACS) in addition
13. S. Naba Singh, MCS, Dy. Secy (Co-op & Social Welfare) as  Dy. Secy (Co-op & Social Welfare) & i/c Director (Printing & Stationary)
14. N. Praveen Singh, MCS, Joint. CEO, Manipur-Joint. Secy (Election) & Director ( Edn-S) as Joint. CEO, Manipur-Joint. Secy (Election) & Dir (Edn-S) & SPD (SSA/RMSA) in addition
15. Peter Salam, MCS, i/c Distt Coordinator (MAHUD &UBS) as i/c Distt Coordinator (MAHUD & UBS) & Asst. Registrar, Manipur Technical University
16. K. Kenish Sharma, MFS FO/Commerce & Industry as FO/Commerce & Industry & Asst. FO, Manipur Technical University
17.  Md. Ziour Rahaman, MFS,  DFA (C&I) & in addition DFA (SW) as DFA (C&I)
18. Irengbam Sobhachandra, MFS, AFA/PWD as AFA/PWD & Asst FO, Manipur  Technical University
19. N. Parithoihen Singh, MFS, ATO, Chandel as Assistant Director/Treasuries  & Accounts
20. Gonmei Bosco Singamlung, MFS,  FO, Fisheries & FO/SLNA in addition as FO, Fisheries.
21. Altal Hussain , MFS,  ATO/BPR as FO/ RD & PR
22. M. Chinglembi Luwang, MSS,  SO/DP as SO/DP and SO/Manipur Technical University in addition


TUNI THUPI:
“Huaichiangin mangte in na honlau sak a, mengmuhnatein na hon mulkimsak hi:” - Job 7:14


EDITORIAL:
Mengmuhna leh taksuahna
Mengmuhna (vision) kichi mihingte’n kineichiat a, i mengmuhna leh i lungtupte bang chibangin a langtang (reality) in i semsuah aleh chih ahi. Tulai ngialbang Manipur state assembly election ding hong nai mahmahta a, kumnawn February 2017 vel hidingin gintakhuai hi. Hiai kitelna ding tawh kisai in mengmu tamtak leng omta ngei dingin igingta hi. Mengmuhna kichi chi tampi om a, election kuan ngialin tamdiak a, election result puankhiak ahihma tanin leng mengmu thei mi tampi om ban hi. Nidang hunin Lamka zang ah lottery kichi thansak mahmah in om a, tua hun ngialin nitak a mengmu tamthei mahmah a, zingchiang a hiai Number pawtding, hiai number cut un chithei bangleng tamtak om hi.
    Vision kichi muhtheihtham a, a mute teng a adikkei ichi kei a, a mute’ lak ah leng a diklou leng om dingin gintakhuai hi. Tulai in Lamka khawpi a kithang mahmah khat ahihleh, Food Security Act tawh kisai in mi ginom hunkhop in a ration card uh surrender uh a, kipahpih huai mahmah uhi. Diktatna vai tawh kisai leh adangdang ah muhkholhna sautak nei uh hidingin igingta a, mi tamsem inleng a cardte uh surrendered lai ding uh igingta hi.
    Government in azawngte’ lakah zawngdiak ‘poorest of the poors’ kichite’ laka antang athawn bangtuk a ahawm ding ngahding a kisiamtanlou a hi peuhmah uh a, hibang a hamphatna thupitak tangding lai a a cardte uh a piakkik ngam uh zahhuai mahmah uhi. Diktatna len tinten a card pekik te’n lam tuamtuam ah leng a ginomna uleh chihtakna/ diktatna hon lettouh zel uleng i ging in i lamen hi.
    Mengmuhna leh ataka nasepsuahna tawh kisai ban genzual lai lehang, North East States a khantouhna a omna dingin ‘the North East Vision 2020’ leh ‘Act East Policy’ kichi bawlkhiakin om a, hiai tawh kisai Prime Minister Narendra Modi makaih BJP/NDA government in a sepsuahna dingin panla lel a, himahleh, muhtheihin a gahsuah om ngellou a de aw chih theihin om hi. Dr Manmohan Singh in Prime Minister alet hun Congress/ UPA ministry ah ‘Look East Policy’ chih in om a, hiai pen PM Modi in atak a alatsak ut ziakin ‘Act East Policy’ chih hialin om hi. Kipahhuaitakin Myanmar ah mipi vaihawmna tunding ahih tak ziakin hiai pen hong lamzang dingin kilang a, himahleh, BJP/ NDA government in bangtan semkheta uhiam chih theih haksa mahmah hi.
    Leitung paidan hong kilamdang touzel in kuapeuh bangin leng politics vai ah khawvel pumngam mawkvek ihita ding uam chih theihin om hi. Politics paizia theiloupi a MLA hih ut mawk kichi bangleng om thei a, kuate hiam gendan hileh ‘kha pi dandan’ chi a kinga top mawk leng pawlkhat om hi. MLA i chih dan bawltu ahi a, dan theiloupi a MLA hih ut mawk, ahihkei leh MLA hilel-te iplahna leh hazatna ziak khawng lel a MLA tuhsawm ihih khakding thil lauhuai mahmah hi a, vision chikhat nei mahle hang, bangchibang mengmuhna nei ihia, i mengmuhna hong taksuah ngial hileh bangchibangin a takin na isemkhe dia chihte ngaihtuahtham apha hi.
    Pathian thu vai ah en lehang, thakhat thu a khalam hat guih, saptuam makaite sit mawk kichi omthei a, mahni mimal hinkhua leh khalam dinmun kingaihsun pha hetlou mi tamtak om thei hi. Ginna (faith) hong hatphut chiangin paikhelhna (cult) kichi om baih mahmah a, Pathian apan vision kichiantak muloupi a saptuam makaite i sit mawk leh huaileng Pathian apan vualzawlna hikhollou maithei hi. Khawtang vai leng ahithou a, mi hoih i kisakdeuh chiangin khawtang makaite iplahna om baih mahmah hi. Mite’n a kum akum a khawtang (society) ana pawta uh ahi chih mangngilh baihlam mahmah a, makai khat hitaleng hiai teng ka semsuah ding chi a kingaihsutna om thei mawkmawk hi. Vision i muh peuhmah bangchibang vision ahi a, bangchibang a ataka sepsuah ding ahia chihte i ngaihsut vengveng poimawh mahmah hi.