Manipur Express | May 5, 2016

Shaktiman accident ah liam omlou
 
Lamka, May-4: Tuni sunnung dak 2:00 velin Serou Piaunel (Leingoi) paw dia Sugnu lam zuan atai Shaktiman (NL 08A-2523), Valpakawt khua ah accident a, lampi khang a Lalrinawna’ inn delhkha in bed room sung ah gari kithal lep hi. Accident hun in inn neitute kuamah omlou uh a, gari atuangte aliam leng kuamah omlou hi. Mit amute gendan in gari hattai ziaka accident hi’n leng gen uh a, singpek, singzawl hunkhop pua hi. Gari neitu bel Paosei of Bungjang village leh driver bel Haosei hi’n kigen hi.


HEADLINES:
W.Bengal ah ‘final phase leh 6th phase’ election om ding
Kolkata, May-4: West Bengal state assembly election pailel tawh kisai in May 5, 2016 (Ningani) in ‘final phase’ election om ding hi. Hiai pen a phase 6-na hiding a, Purba Medinipur district apan seat 16 leh Coochbehar district apan seat 9 ah kitelna neih hiding hi. Candidate 170 om lakah numei 18 om hi.
    Coochbehar district a seat 9 kitelna om ding ah candidate 67 om a, tua ah Independent candidate 12 om hi. Purba Medinipur district a seat 16 om lakah candidate 103 om a, tua ah leng Independent candidate 12 mah om hidanin kigen hi. May 5 a election om ding ah voter 58 lakh in vote kheding uh a, kua party hat ding hiam chih theih haksa mahmah chihthu kiza hi.
    Coochbehar a constituency 5 ah voter thak 9,000 val mawngmawng om a, amaute India khua le tui hihna nei ding a kikhumthak liuliau hi uhi. Final phase election om ding tawh kisai Election Commission khauhpai mahmah in zanhal apan security force tuamtuamte polling station tuamtuam ah thunlut khinta uh a, Central security forces chauh leng company 361 zat hiding hi. Tunitak apanin Purba Medinipur district leh Coochbehar district ah security-te kigalgingsa a om dingin leng zaksakin om ua, tua ziakin galvilna lam ah security personnel-te leng pilvang mahmah uhi.


Chief Minister in 33/11KV Power Sub-Station 2 hongkhia
 
 
Imphal, May-4: Chief Minister O. Ibobi Singh in tuni in Thoubal Leishangthem Thoudam ah 33/11 KV Power Sub-Station khat hongkhia a, state government in a adeihpen thil honkhiak mai hilou in mipi phattuampih theih ding bawlkhiak hi’n gen hi. Thoubal a sub-station honkhiak zawh in Thoubal district sung mah Lilong Ushoipokpi ah Chief Guest hihna tawh 33/11 KV Power Sub-Station dang khat hongkhe nawn hi. Tuni a power station honkhiak tawh kiton in, akim nai a mipi’n meivak tawh kisai in haksatna tuak nawnlou ding uh hi’n Ibobi in gen a, Manipur a electric lam enkaitu Manipur State Power Company Limited (MSPCL) in kintak a huai nasepnate a zawhsiang ziakun leng kipahthu gen hi.
    Mun nih a power station honkhiaknate bel MSPCL saina nuai a kibawl hi a, Md. Fazur Rahim, MLA Wabagai A/C banah Zilla Parishad Member tuamtuam in uap uh a, huai bial a mipi leh hausate banah N. Sarat Singh, MD MSPCL, Deputy Commissioner Thoubal, Superitendent of Police Thoubal leh MSPCL apan officer leh staff-te’n leng uap uhi.
    Thoubal Leishangthem Thoudam a 33/11 KV Sub-station  ahihleh SPA nuai a Planning Commission Project  Rs. 1086.96 lakh bei a kibawl hi a, huaikim a khua tuamtuam - Leishangthem Kelimakhong, Keibung, Keibung Wangmataba, Khekman, Thoubal Moijing, Sabal Tongba, Thoubal Ningombam, Leishangthem, Thoudam, Irong Thokchom, Maibam konjil, Iram siphai leh adangdangte’n hamphatpih ding uhi.  Lilong Ushoipokpi a 33/11KV Sub-station bel 10th Plan RGGVY (Rajiv Gandhi Grameen Vidyutikaran Yojana)  tungtawn a Rs. 3.50 crores bei a kibawl hi’n kigen hi.



DC/CCpur makaih in Bank tawh kisai meeting om
Lamka, May-4: DC/CCpur makaih in tuni sun dak 12:00 in DC office a BRGF Resource Centre ah Bank tawh kisai Dist. Consultative Committee (DCC)/Dist. Level Review Committee (DLRC) meeting om hi. Huai ah March 31, 2016 tan a Bank-te’ CD Ratio etkikna, March 31, 2016 tana Dist. ACP 2015-16 achievement etkikna (review), Govt. sponsored scheme/program sepsuah (implement) etkikna, RSETI nasepna, Dist. sung a ATM position tel in bank-te’ nasep tuamtuam enkhawm uhi. March 31, 2016 tan in CCpur Dist. ah bank tuamtuam a sum deposit teng Rs. 37,217.97 lakhs pha a, loan (advance) a kihawmkhia Rs.18, 426. 67 lakhs pha in, CD ratio 50% tung hi. March 31, 2016 tan a Priority Sector ah loan (advance) a kihawmkhia Rs.12, 285. 31 lakhs , total advance 67%, agriculture ah loan a kihawmkhia Rs. 3, 422. 45 lakhs hi a, 19% tung hi. Weaker section ah advance a kihawmkhia Rs. 4, 158. 31 lakhs pha in 23% tungzou hi.
    Meeting hun ah Thangzamuan Hauzel, Chief General Manager, RBI/Imphal leh DC/CCpur te’n nasem hoih bankte kiangah appreciation certificate hawmkhia uhi. Bank te- UBI/CCpur in SLBC/DCC date submit masak pen ziakin kipahman ngah a, MSCB (594%) in Dist. ah Ratio sangpen la a, ICICI (78%) in Agriculture advance ah highest percentage ngah hi. MRB (79%) crop loan advance ah highest percentage ngah a, Canara bank te’n Highest percentage in SSI Advance (639%), Education advance (138%) leh overall priority sector advance (154 %) ah kipahman 3 ngah uhi. UCO bank te’n housing advance (102%) ah highest percentage ngah uh a, MRB te’n other priority sector advance (126%) ah highest percentage ngah uhi. SBI/Tuibuong te’n Non-Priority advance (303%) ah highest percentage ngah uhi. Huailou in CCpur Dist. ah ATM booth 24 om hi.


LOCAL NEWS:
ADC Chairman makaih in meeting
Lamka, May- 4: Langkhanpau Guite, Chairman, ADC/CCpur makaih in tuni’n ama office chamber ah MDC te’n meeting nei uh a, huai hun ah constituency tuamtuam apan MDC hunkhop paikhawm uhi. Meeting hun ah Dist mipi’n tuisiang dawn ding kiningching angah theihna ding leh huihpi/vuahpi ziaka haksatna thuakte’n panpihna a ngah theihna ding uh tawh kisai genkhawm uhi.  Thu kizadan in tuma a MDC team New Delhi a zinte’n drinking water & sanitation a Dy. Adviser kiangah CCpur Dist in tuisiang dawn ding taksapthu vatun uh a, Dy. Adviser in DPR bawl a, memorandum pelut dinga theihsak dungzui in memorandum piaklut dingdan genkhawm uh a, MDC leh SDO-te’ kithuah a mahni bial chiat ah vuahpi leh huihpi ziaka haksatna tuak omte enkai a, panpihna angah theih nang ua District Disaster Management Authority (DDMA) kiangah report piak di’n gen uhi. Tuaban ah, tulai in CCpur Dist ah sum leh pai deihna ziakin kidnap kithang mahmah a, mi sisan/hinna hiam ahihkei leh mi neihsa sum-le-pai a kuamah kimawllou dingin  ADC Chairman in Pathian min in ngen hi.


Relief material-te khakkhiatna program 
Lamka, May-4: CCpur Dist. ah huihpi, vuahpi leh gialpi (hailstorm) in inn-le-lou, thil tamtak hihsia a, huai thuakte panpih nang in Soiminlian Lenggen, MCS, SDO/Henglep makaih in tuni’n Imphal ah antang quintal 500 leh langva (CGI sheets) bundle 1000 nitaklam in Lamka hongtung hi. Relief material-te Henglep Sub Divn. ah hawmkhiat dingin May 5, 2016 zing dak 7:00 in Peace Ground, Tuibuong ah khakkhiatna (flag-off) program omding hi. Huai hun ah akisaipih teng telchiat ding in DC/CCpur in theisak a, relief material-te SDO/Henglep leh SDO/CCpur makaih in Henglep sub divn. (Saichang area) ah puakkhiat hiding hi.


ZC post 6 ading election nei
Lamka, May-3: Ginzamang T. Zomi, Chief Election Commissioner, Zomi Council makaih in tuni zinglam dak 11:00 in Hiangtam Lamka a PTC GHQ Conference hall ah ZC Cabinet post awng 6 ading kitelna om hi. Kitelna ahihleh proposal system a pai in secret ballot a vote khiak ding chih himahleh proposed a omte tuhtu omlouh ziakin un-contest in ching uhi. General Secy. ding in Th. Khamneihthang Vaiphei, Fin. Secy. in Paukhogen, Treasurer in T. Chinlunthang leh Secretary (Administrative Affairs) in Dr. R. Sanga banah Speaker ding in Khamminlun @ KG Tungnung leh Dy. Speaker in G. Chin Khan Muan hi uh a, amaute Thangzamang, Interim Speaker in kichiamsak a, Rev. Palet Thuomngel, Lamka Area Pastor, CBA  in thumsak hi. ZC Cabinet member thakte’ term ahihleh 2018 tan hiding hi. Election ahihleh ZC Office, Khominthang, New Lamka a neihding chih himahleh vuahzuk ziakin PTC Office a kisuan uh hi’n kigen hi.


Galvantawi pawlkhat in nasemtu 1 pimang
Lamka, May- 4: CCpur Police apan kizadan in, Singngat Sub-Divn huamsung a om Bongbal gamsung a Spl. Contractor T. Lala Vaiphei of Lingsiphai nasemte lak a khat zan nitak dak 12:30 velin meltheihlouh galvantawi pawlkhat in Khumanthem Tondonba Singh (23) s/o Kh. Kwaklei of Naharup Pngaei Yangdong, Imphal East  pikhia uh a, a tanchin theihzui hilou hi. Thu kizadan in, Tondonba Singh ahihleh Poklen (JCB chi khat) hektu (driver) hi a, Bongbal-Takvom khua lut ding PMGSYlampi bawl a  na sem a giahbuk (Tuingam Luidung) uapan meltheihlouh galvantawi pasal 7 velin Mohori tawh a pikhiak uh hi’n kigen a, Mohori bel kum upat ziaka khahkik uh hi’n  kigen hi. Thiltung tawh kisai a kipuang omlam zak ahihlouh ziakin kuate khutnung hiam chihtheih hilou hi. Tuni sunnung in Kh. Tondonba Singh innkuante’n CCpur Police ah report bawl uh a, Insp. N. Thangzamuan , OC/CCpur PS makaih in Police te’n Bongbal leh a sehvel a khua bangzahhiam pha in, thil omdan suizui uhi. Thiltung tawh kisai Police te’n  FIR No. 24 (5) 2016 CCP-PS U/S 400/365/34 IPC & 25 (1-C) A. Act  register uhi.


May 22 a SSC exam ding kisuan
Lamka, May-4: Sh. N. Zimik, Regional Director, Regional Office (NER) Staff Selection Commission in T. Goukhomang, ZEO/CCpur theihsakna ah, SSC saina in May 22, 2016 a Combined Graduate Level (Tier-I) Examination 2016 om ding chih himahleh ahun kisuan (postponed) hi’n theisak hi. Exam bel August 2016 a neih hiding a, ani leh hun ding bikhiah (fix) thak hiding inleng theisak hi.


Post Office ah core banking kizangta
Lamka, May-4: CCpur Dist. khangthu adia masapen dingin Tuibuong a Post Office ah core banking system zat hita hi. Manager Chinmuanthang apan kizadan in System Manager Milan makaih in Imphal apat staff mi bangzahhiam te’n Post Office ah core banking system zattheih nang abuaipih nung un core banking zat hita hi’n gen hi. Tuni apan Post Office staff te’n saving account digit 6, recurring deposit account digit 5, personal bank account digit 4 teng digit 10 a bawl vek sawm in nasem lel uhi. Post Office, Tuibuong bel bank-te tawh kizom (link) nailou a, himahleh post office tuamtuam tawh core banking system hita hi. Imphal apat technician te’n tunung sawtlou in ATM khat hong koih ding uh a, huai zat theih hunhun in customer-te kiangah ATM card issue hiding a, huai ATM card zang in post office tuamtuam a ATM omnate ah sum draw khiat theih ding hi’n leng kigen hi.


Lingsiphai khawmi lungkimlou

 
Lamka, May- 4: Lingsiphai khua apan Songpi/Mission Compound kikawmtuah lampi puahthak in om a, contractor in hun sawttak bawl louh a koih chih ziakin Lingsiphai khawmite’n  lungkimlouh thu Press/Media ah tun uhi. Lelem of Lingsiphai in Press-te mai ah agendan in, huai lampi ahileh April khabul puahthak in om a, nasemte’n suang leh leisan sungin kha 1 val bang paita mahleh tunitan khawlsan uh hi’n gen hi. Aman Lampi a suang kisungte road roller a gawimam ahihlouh ziakin phok lekluk a, vuahzuk hun chiangin nawi mahmah in khe a paina ding tanpha in haksa a, gari a leng tai theihna vual hilou hi’n gen hi. Lampi puahthak a ompen khawsung mi’n a kipahpih lai ua hiai bang dinmun a koih pen ngaisiamlou uh a, a kisaipihte’n a kinlam a enkai ding ngen hi. Lampi pen bang fund a kibawl hiam theih ahihlouh banah khua hausa inleng contractor atheihlouh banah thuzak aleng omlou hi’n gen hi. Lampi bel 1997 kum a Songpi/Mission Compound tan kawmtuah dia kibawl hi a, Zogam Road chi a minvuah in om hi.


Panpihna kigente taklang di’n theisak
Lamka, May-4: Khousabung Sub-Division Demand Committee (KSDDC) pawlin Saichang leh Chongkhozou area a gialpi leh vuahpi ziaka haksatna thuak panpihna petu hidan a “Relief Committee” kibawl tungtang government in abawlkhiak hiam chih dotna bawl uh a, local media a relief panpihna piak a om chih a gente uh nouneltak a taklang dingin theisak uhi. 'Relief Committee clarification' tungtang dotna bawl kawm in, PHED Minister banah MLA (57-Henglep AC) mizat khenkhat-te gamtatna hi’n leng taklang uh a, govt. in relief committee abawlkhiak himah hiam chih leh Minister adia political agent hi uh hiam chi’n dotna bawl hi. Hiai tuahsiatna tawh kisai Minister in relief material apiak tengteng taklang  dinga theisak kawm in, MHJU fact-finding team-te muhsuahte tungtang clarification abawl uh leng pomlou in media te’n suahlou ding in ngen uhi.


SUUNNA:
N. Chinkham (64) b/o (late) Rev. N. Nengzakhai of  Hebron Veng, New Lamka tuzing dak 6:00 velin sungna in si a, sunnung in YPA hanmual, New Lamka ah kivui hi.
Goihkhoman (58) w/o M. Nengkhopau of Vengnuam south, New Lamka tuni nitaklam in Imphal ah zunkhum leh kal (kidney) buai ziakin si a, May 5, 2016 in YPA hanmual, New Lamka ah kivui ding hi.
Kimhoiching (22) d/o Lamchinthang Tungnung of Zoumunnuam, hunsawttak damlou a om tuzing dak 4:00 velin si a, nitaklam in Zoumunnuam hanmual ah kivui hi.


IMPHAL NEWS:
Imphal Mun. Council election ah Congress kimuang : TN Haokip
Imphal, May-4: Imphal Municipal Election (IMC) election ah Congress in vualzawhna ngah ding a lam-en ahihdan Manipur Pradesh Congress Committee President TN Haokip in gen hi. Manipur a ‘Smart City’ programme enkai siam ding omsun Congress hi’n leng TN Haokip in gen a, tuni a Congress in IMC Councillor Yumlembam Ratikanta alaklut tawh kiton in IMC election ah Congress muanhuai huntawk ding chi hi.


General Strike leh Public Curfew kizom
Imphal, May-4: Kikhailumsa a muhkhiak a om Sagolsem Prashanta sihdan lungkimlou a kibawl Joint Action Committee (JAC) pawlin tunitak zankim akipan ninih sung (48hrs) Manipur pumpi ah General Strike puang uh a, JCILPS pawlin May 5 zankim akipan dakkal 42 sung Public Curfew apuan ziakun Strike leh Public Curfew kizom ding hi. Tuni’n United Committee Manipur (UCM) Office ah JAC leh UCM banah All Manipur United Club Organizations, (AMUCO) pawl tawh meeting hunah 48hrs General Strike puan in om a, tualthatte kintak a govt. in mankhe di’n theisak  uhi.


Manipur ah sepna zong 7,51,376 om
Imphal, May-4: Numei 5,31,313 leh pasal 2,20,063 telin mi 7,51,376 te’n March 2016 beikuan in Manipur ah sepna zong uh a, district tuamtuam a Employment Exchange te ah min khumlut uh hi’n Directorate of  Employment Exchange (Manipur) apan thusuakin gen hi. Amaute lakah Imphal West district  apan in sepna zong tampen a,  pasal 1,27,199 leh numei 69,025 kigawm 1,96,224 om uhi. Imphal East dist. ah mi 1,19,875 (pasal 84,225 leh numei 35,650), Thoubal ah 1,27,478 (pasal 99,300 leh numei 28,178), Bishnupur ah 71,878 (pasal 53,085 leh numei 18,793), Churachandpur ah 74,953 (pasal 54,773 leh numei 20,180) Ukhrul ah  30,721 (pasal 21,323 leh numei 9,398), Senapati ah 62,306 (pasal 44,800 leh numei 17,506), Tamenglong ah 26,343 (pasal 19,821 leh numei 6,522) banah Chandel ah 32,040 (pasal 21,781 leh numei 10,259) om uhi. Physical/Handicapped mi 2,794 (pasal 1,876; numei 918) inleng sepna zong in employment exchange ah minkhumlut uh a, U.E. I & G. B nuaiah mi 6,764 (pasal 3,130; numei 3,634) om uhi.  


Ukhrul a kithahna ziakin JAC phutkhia
Imphal, May-4: Shamulailatpam Jayenta (42) s/o Sh. Bijoy Sharma of Nepra Company, Thoubal thahna tawh kisai in  tualthatte matkhiak ahihtheihna dia panla di’n JAC phuhkhiak in om a, amaute’n Manipur Press club ah tuni’n press conference sam uhi. Huai huna Convenor Ch Sumila gendanin Jayenta Sharma  ahihleh ginlelh huaitakin Ukhrul dist. a Lunghar village ah sisa a muh hi a, ataksa tung mun tuamtuam ah liamna om hi. Ukhrul police station ah huai tawh kisai report piak ahihbanah thuneitute’n kintak a tualthatte mankhe ding in ngen uh a,  Jayenta luang bel RIMS Morgue ah omlai hi.



TUNI THUPI:
“Khawmial leh sihna limin amau adingin huai ngen uhen; a tungah meipi kai hen; khua nimsak tengtengin huai tuh lausak uhen.”
– Job 3:5


EDITORIAL:
Manipur ah meipi kai!
La khat in heiha… huiha! ana chi a, chidik ngial mahmahin theihtheih in om a, abiktakin Manipur Chief Minister Okram Ibobi Singh adingin lungngai vungvunga hiai la asak dingin hoih leh kilawm bangin kilang hial hi. Ibobi in Chief Minister alet ziakin buaina om mun chi ihi kei a, ama ma a Chief Minister tamtak omsate’ hunin leng thubuai-labuai gending tampitak ana om a, himahleh, tuni chiangin khang kikheng kin law mahmah in theihna, pilna leh gam-leh-leitang itna lian mahmahta a, tua ziakin Chief Minister telin mipi palai (elected) MDC/ MLA leh MP-te adingin leng lung-ap huai hun tam mahmah ding ahihdan muhtheihin om hi.
    Banghiam thiltung om zek leh tua in second khat sungin leitung pumpi zelsuak ngala, hibang khawvel a i khawsak lai a mipi palai hihding leng kilawpluatna ding bangmah om hetlou suak hi. Na isep hoihleh mipi’n hon kipahpih ding uh a, i sepkhelh zek lelah kap zak ngal thei ding khawvel a ding ihihman in, mipi palai hiam ahihkeileh society tuamtuam a leader hih ding tanpha leng kilawpluatna ding omlou hi’n kigen hi. Himahleh, heutu himhim hih ut bel ki-omzel a, mihingte ikibat hetlouhna khat hizel hi. Tuni in i ngaihtuahna tawpkhawk tawh en vengveng lehang Manipur leh a maban ding meipi kai bangin ngaihsut theih hi.
    Manipur state kichi nam chi tuamtuam nuamtak a tenna  gam banah huihsiang leh zoutui sik luanna mun ahi hi. Himahleh, kum 20 valzek paisa apan a bouruak ngeina bang nawnlou in om a, poi mahmah hi. Gam leh leitang banah thuneihna kituhna in phaizang leh singtangbial khen siang vilvel dia kisa hihiam chih theihin om a, tu hun a Chief Minister leh a khaw bawl upate adingin hibang meipi zing aphutkhak uh vangtahhuai mahmah dingin kilang hi. Communalism kichi chibing a kikhenna in Manipur leitang luahsuak a, thamlou in tenna mun banah pau- le- ham tawh kisai in ‘locational politics’ hat mahmah nawn hi. Chief Minister Ibobi vaihawm asiamkei ichi kei a, siamlua leng himaithei, ahihkeileh phaizangmi hi’n singtangmite’ mit mei veng tuaktuak leng hikha maithei, khimpi zingin Manipur state maituam tawh kibangin om mai hi.
    Tu in “3 Bills” tawh kisai in JCIPS pawlin May 5, 2016 zankim akipan May 7 nitaklam dak 6:00 tan dakkal 48 sung Manipur pumpi ah 'Public Curfew' puang uhi. Hiai bill ziak mahin Lamka khawpi sung ngekngek ah luang 9 kikham a, tuni dong vui hinailou hi. Kha 8 paisa a state assembly in 3 bill a passed nung in President of India dawhkan ah lui in om denlai a, state government in nawhna a piak louh ziak hi’n JCILPS in ngawhna bawla, dik leng adik maithei! Hiai tungtang zaw kamsim zualphot ni… Issue dang ah tu in Manipur University Tribal Students Union (MUTSU) pawl tu in kipan nawn uh a, MU a singtangmite’n Campus sungah Total Shutdown apuan ziakun class omlou a, hiai tungtang ah alanglang ah kikaptuahna om vengvung nawn hi. Hun paisa in hiai issue mah ah Canchipur a om Manipur University a tribal hosteller teng leng hong pawtkhia uh a, MU apan singtangmi om tengin mass exodus bawl ngeita uhi. Hiai issue thu namai ahikei a, Chief Minister Ibobi adingin ngaihtuahna piak ngai mahmah dingin kilang hi.
    Tunung sawtlou in state capital Imphal ah Municipal councillor ding telna poimawhtak om ding hi. Tua dingin BJP-te kisa nak mahmah uhi. Manipur ah tulel dinmun et in regional party hat a genphak om nawnlou a, election om himhim ding ah Congress versus BJP hi veve ding un kilang hi. 2017 February kha velin MLA election hong om gintakhuai a, tua hunah leng Congress leh BJP mah hong kitauhtuah dingun kilang hi. Manipur ah tulelin bandh/blockade/ general strike leh adangdang thubuai-labuai niteng in om gige a, hiai pen opposition-te adingin advantage liantak ahi hi. Manipur ah khimpi zing petmah banga, niteng in buaina tuamtuam om toutou dingin kilang lai hi.