Seat 27 ading election ah seat 11 ah BJP lawhching
Tuni’n state 7 ah Rajya Sabha Member ding 27 telna om
New Delhi, June- 11: State 7 akipan Rajya Sabha member 27 telna ding in tuni zinglam dak 9:00 akipan nitaklam dak 4:00 tan election om a, huaizawh nitaklam dak 5.00 in vote sim in om hi. Huai ah BJP-te seat 27 lak a seat 11 ah ching uh a, SP te seat 11 leh Congress te’n 6 ah ching uhi.
Tuni a election omnate state-te Uttar Pradesh ah seat 11, Karnataka leh Rajasthan ah seat 4 tuak, Madhya Pradesh ah seat 3, Haryana leh Jharkhand ah seat 2 tuak banah Uttarakhand ah seat 1 ahi hi. Rajya Sabha member mun awng(vacant) 57 om mahleh June 3, 2016 a kizukkik theih hun in candidate 30 tuhtu omlou a ching (elected unopposed) a puan hi uh a, huaite laka tallang deuhte ahihleh Union Ministers – Suresh Prabhu leh Piyush Goyal, eminent lawyer Ram Jethmalani, Lalu Prasad tanu Misa Bharati leh JD(U) president-lui Sharad Yadav-te hi uhi.
Uttar Pradesh ah seat 11 ah candidate 12 om uh a, Samajwadi Party te’n seat 7 luah uh a, BSP te’n seat 2, Congress leh BJP te’n seat 1 tuak luah uhi. SP candidate lawhchingte Beni Prasad Verma, Reoti Raman Singh, Amar Singh, Sanjay Seth, Vishwambhar Prasad Nishad, Suresh Nagar leh Sukhram Singh Yadav hi uhi. BSP apan telching a omte Satish Chand Mishra leh Ashok Siddhartha hi uh a, BJP in candidate guan a neihsun uh Shiv Pratap Shukla leng lawhching a, Congress candidate Kapil Sibal in BSP leh RLD MLA-te panpihna ziakin BJP in a gup uh Independent candidate Priti Mahapatra zou hi.
Uttarakhand ah Rajya Sabha seat 1 awng a, huai ah Congress apan candidate 1 leh Independent Candidate 2 om a, Congress candidate Pradeep Tamta in BJP in a gup uh independent candidate Anil Goyal zou in, telching hi a, aman party MLA 26 banah PDF MLA 6 apan vote mu hi.Rajasthan ah seat awng 4 omteng ah BJP vualzou vek uhi. Huai a lawhchingte lakah Union Urban Development Minister M Venkaiya Naidu leh BJP National vice president Om prakash Mathur leng tel uh a, telching dangte ahihleh Harsh Vardhan Singh leh Ramkumar Verma hi uhi. Rajasthan a MLA 200 omlak ah MLA 199 in vote khia uh a, BSP ML 1 in tualthahna case aneih ziakin High Court in gakna bawl uh a, jail a om in vote khelou hi.
Madhya Pradesh a seat 3 awng lak ah BJP candidates Anil Madhav Dave leh MJ Akbar banah Congress nominee Vivek Tankha telching hi uhi. Karnataka ah seat 4 telna ah, MLA khenkhat in a vote dingte uh kianga sum ngen chihthu om mahleh Election Commission in election paisuak sak veve uh a , huai ah Congress in seat 3 luah in, BJP in seat 1 luah hi. BJP candidate telching a om ahihleh Commerce Minister Nirmala Sitharaman hi a, Congress apan telching a omte Ramamurthy, Jairam Ramesh and Oscar Fernandes hi uhi.
Haryana a seat 2 telna ah BJP candidate Choudhry Birendra Singh leh independent Subhash Chandra-te telching hi uhi. Jharkhand a seat 2 telna ah BJP candidate tuak Union Minister Mukhtar Abbas Naqvi leh Mahesh Poddar-te telching hi uhi.
Covenant Children’s Home ah kipahpihna program om
Lamka, June-11: Mualkoi a Covenant Children’s Home(CCH) ah tuzing in class XII passed 14 leh class X passed 16 kipahpihna program om a, amaute Rev. H.Chin Thiansong, Member Managing Board CCH in Pathian kiang ah thumsak a, Son K.Tombing, Manager, CCH makaihna in student lawhchingte present piak hi uhi. Rev. G. Suanzalam, Chairman, Managing Board in vaidawnna thugen a, Rev Khen P. Tombing, Director, CCH in hiai tan tun theihna ziak Pathian ziak ahi chi hi.
Rev Khen P. Tombing in a gendan in CCH ah sponsored student 200 om a, home based tel in CCH ah student 448 om a, midang 248 te’n student sponsored-te’ zar zou uh hi’n gen hi. Sponsored tute’n naupang a let tanpha un mi 1 suah ding chih tup in nei uh a, CCH inleng student-te mi 1 suahsak ding, gahsuah ding, pilna siamna, salam, khalam a khanlet ding, inam, igam, saptuam leh society a zattak hiding chih atup leh ngim ahih ziakin chawm (sponsored) a omte’n leng mi 1 suah sawm teitei dia panla ding in ngen hi.
CCH ah sponsored ngahlou mi 248 te’n sponsored a ngah theihna ding un Oct 2016 in zinkhe ding ahihdan gen a, May 2014 akipan CCH ah mawhpuakna alak akipan tunitan in administration structure kikhek in zawhsiang hinailou chi hi. Policy thak ah CCH a sponsored dingte tagah kia ahih ding, PCI saptuam ahihding chih kipaipih hi’n gen a, sponsored naupangte kum 23 tan sponsored hiding chi hi. Tu’n sponsored ngen waiting list ah mi 200 val om hi’n leng gen hi. CCH phutkhetu Lian C. Tombing leh Clara Zoujam-te’ contribution lian in amaute tuni’n kiphawk ahihdan gen hi. Rev. Khen P. Tombing in agenzelna ah Hebron Veng a, atenna inn gei ah Agape Baby Home kihongthak ah tulel in naungek 12 etkol a om in, adoption ding te’n laktheih ahihban ah a latu ding kuamah a omkei leh kum 7 nung a Covenant Children Home a koih hiding un gen hi.
Training-cum-Farmers Interaction program
Lamka, June-11: Manipur Organic Mission Agency (MOMA) and Aromatic Medicinal Plants & Socio Economic Dev Society (AMPSEDS)/CCpur te’n Delhi a Ministry of Agriculture and Farmers Family apan huhna zang in tuni’n Bunglawn Community Hall ah ‘One Day Training-cum-Farmers Interaction Program on Organic Farming’ om a, Chief Guest in Seilenmang Khongsai, MDC (Khousabung) pang hi. Guests of Honour in K. Debadutta Sharma, Chief Executive Officer, MOMA leh Dr L. Ibomcha Singh, OneCert Asia Agri. Certification (P) Ltd ban ah Chief Host in S.Paokholal Gangte, Chief of Bunglawn pang hi.
Chief Guest in training hong kawmin thugen a, loubawl mite’n haksatna tuak mahle uh agah ei ading kia hilou in itate uh ading ahihman in lungkelou a, panla dingin hasuan hi. Manipur ah Lengthei tam piagkhia a, kipahhuai hi’n gen a, loubawlmite’ adia thilhoih hong pawlutte tung ah kipahthu gen hi. Guests of Honour leh Chief Host te’n leng thugen uh a, huaizawh in farmer-te’tawh interaction nei uhi. K. Debadutta Sharma in farmer mi 200 velte panpihna in Rs. 3,000/-chiat pia hi.
MZP makaih in Gangte MIL lopna om
Lamka, June-11: Chiengkawnpang Community Hall ah tuni sunnung in Mizo Zirlai Pawl (MZP) Chiengkawn Branch makaih in BSEM in class IX leh X ah Gangte Pau –Major Indian Language (MIL) subject a tawi dinga phalna apiak lopna leh Gangte Literature Society (GLS) te’ tunga kipahthu genna program om hi. MZP in GLS-te panlakna kipahthu genna in Lienkhopao Thangjom, Chairman GLS kiang ah memento pia uh a, Rev Soikhogin Thangjom in Gangte MIL neihna tung ah Pathian kiang ah kipahthu gen hi.
Chairman GLS in Gangte MIL neih theihna ding a panlakdan leh haksatna omte pulak a, office lam ah thil a tuahte uh gen in a seppihte leh Book Writer-te tungah kipahthu gen hi. MIL subject 1 vei thu a neihtheihlouh ahihdan gen a, office procedure haksatna lak ah Pathian hehpihna ziak a Gangte MIL omthei hi’n gen hi.MPC Sub-HQ. Zone-I, MZP GHQ, YMA Chiengkawn Unit, MPC Chiengkawn Unit, Chiengkawnpang V/A te’n leng thugen uh a, lasiam tuamtuam in lasa uhi.
SSAC in 1st Songtal Siamsin Award hawmkhia
Lamka, June-11: Songtal Siamsin Award Committee (SSAC) pawlin tuni zinglam in EBC Dorcas Jubilee Guest House a Mini-Auditorium ah 1st Songtal Siamsin Award distribution program nei uhi. Huai hun ah special invitee in Thiankholian, Chief of Songtal; Langkhanpau Guite, Chairman,ADC/CCpur; C. Hangsing, (retd) MCS; CT. Lian Guite, MDC 16-New Lamka (W) leh K. Paukhansuan, Director, Trinity Centre pang uhi. Joel Tonsing, Chairman SSAC makaih in award hawmkhiak hi a, Rev.H Chinthiansong, Co-ordinator (Ministries) PCI (R) in hasotna thugen in lawhchingte thumsak hi. Class X ah topper in Langmuanmung Tonsing s/o T. Nanggoulian pang a,
Class XII topper ah H. Joshua Kamsuan s/o H. Thianzagin pang hi. Class X ah form submit 26 pha a, huai lak ah 1st divn 14 leh 2nd divn 12 om a, class XII ah form submit 15 lak ah 1st divn mi 10, 2nd divn mi 4 leh mi 1 failed hi. Class X & XII passed teng mi 6na tan memento + kipahpihna sum pia uh a, mi 7na apat atunglam teng memento pia uhi.
G. Thiankholian in amau hunlai in school kai leh loukhawh thuah uh a, 2nd divn a class X passed te mipi’n lawm uh a, amah leng III divn in class X passed a, Pathian hehpihna ziaka hiai (SBI officer scale –IV) tan tung hi’n gen hi. Lawhchinna kichi mihing akipan hilou in Pathian apan hi a, Pathian vualzawlna ngahna ding in mihingte’ kisakkholh ngai a, ei igin-om zahzah in Pathian leng gin-om a hon pahpih dia mansa gige hi’n gen hi.
Chairman ADC in English-te’ thupil in piantung apan sihdawng a siamsin kihi ahihdan gen a, sin ding, zil ding tampi omlai chi hi. Class X & XII exam a failed-te lungkelou a hahpansem ding in hasuan hi. C. Hangshing in thagum, thatang a nekmuh ngaploute’n lai simsim leng atawp a lawhchinna leh nek-le-tak muhna hongpiang ding hi’n gen hi. Student-te’ nek-le-dawn ah pilvan ngai a, mobile kia buaipih lou a, laisim mah buaipih dingin student-te hasuan hi. CT Lian in thil himhim nuamtaka lawhchin hilou a, ahaksa phut paisuak ngai chi hi.K. Paukhansuan in class X & XII passed-te’n mahni lunglutna line ah pai a, tupna hoihtak nei ding in hasuan hi.
Ginkhanpau Vualnam in feet 21 asau bamboo pen bawlkhia
Lamka, June-11: Gua (bamboo) zanga ‘pen’ kibawlkhe masapen a theih Ginkhanpau Vualnam, Proprietor, Zogam Bamboo Works in Guinness World Record ngahsawm in leitung pumpi a pen lianpen hiding bawlkhia a, tuni zinglam in Zehang Lamka a BCD Hall ah Bamboo Pen Display & Measurement Programme om hi. Huai ah theihpihtu in Langkhanpau Guite, Chairman, ADC/CCpur leh DC/CCpur sik in Alfred Jamlallun Khaute, MCS AC to DC; B. Dongzalian Simte, Chairman, Zomi Council, KS Tawmbing, DFO/CCpur, Lianzapau Samte, President, SSPP GHQ leh nam tuamtuam makai banah mun tuamtuam akipan deihsaktu tamtak tel uhi.
Ginkhanpau Vualnam in agenna ah innsung khawsak haksat ziakin Class X tan zou in aban sunzom theilou a, kum 2008 velin gua zangin pen bawl kipan a, deihsaktute tungtawn in Zogam Bamboo Works kichi pankhia in DIC/CCpur ah registration kibawl hi’n gen hi. Khawvel pumpi a pen Pen (saupen leh lianpen) bawldia kisa in Guinness Book of World Record ngah theihnang in June 5, 2015 in application pelut a, October 2015 a dawnna a ngah tawh kiton in pen bawl kipan hi’n gen hi. Pen bawl zawhna dingin ni 80 val lut a, official lam akipan documentary bawl a mipi muh alahkhiakna leh tehna (measurement) nei dia thupiak om ziakin tuni a hibang hunzat a om hi’n gen hi. Documentary teng India HQ, Mumbai ah thon hiding in leng gen hi. Tulel a World Record holder pen feet 18 in sau a, Zogam Bamboo Works in abawl ahihleh feet 21 a sau ahihman in world record ngah lam-et thu leng gen a, ZBW in maban ah Asian Record leh Limca Book of Record leng ngahsawm a panla hi’n gen hi.
KZP in Class X & XII lawhchingte kipahpih
Lamka, June-11: Khangthah Zuun Pawl (Gen HQ) in tuni’n Simveng a Simte Inn ah class X leh Class XII lawhchingte kipahpihna nei uh a, Chief Guest in Armstrong Pame, IAS, Joint Secretary, TA & Hills, Govt. of Manipur pang hi. Guest of Honour in T. Goukhomang, ZEO/CCpur leh Chief Host in Th. Jamchinthang, MDC( Thanlon) leh Special Guest in T. Lamminlal Simte, MCS pang hi.
Chief Guest in a genna ah lawhchinna dingin eimah kibawl poimawh a, laisimna ding in hun kibawl siam poimawh petmah chi hi. Haksat hun laitak in khemtu leng hatding a, huai douzou dia panla di’n student-te chial hi. Rev. Dr. L. Liankhanlal, Executive Secy., SBCA in lawhchingte thumsak hi.
Tuikia mi 2-te’ luang mun tuamtuak ah kimu
Lamka, June-11: Tuitha lui a kia Leishom Tomba Singh (23) s/o Yaima of Zenhang Lamka leh T. Khamchinkhup (26) s/o Laltuakmawi of V. Munhoih luang phatuamngai te’n a zon nungun tuni’n mun tuamtuak ah mukhia uhi. Tomba luang tuzing dak 8:00 velin Saiton Khullen area a Dopkon khawte’n luisung a ninlom kom a mu in lakhia uh a, a innkuante ahilh nungun aluang lakin om hi. Huaithu zak phet in CT Lian Guite,MDC leh YPA makaite delh in puandum in siluang tuam uhi.
T. Khamchinkhup luang tuni nitaklam dak 3;00 velin akiakna mun (Saikot Lei kiang) akipan lam 30 vel a gamla ah Zarzosang of Saikot in sikchiang zangin ah tuisung apan kaikhia hi. Aluang June 12, 2016 in YPA hanmual, New Lamka ah kivui ding hi.
Class X & XII passed- te kipahpihna
Lamka, June-11: Hiangtam Lamka a YPA GHQ hall ah tuni in Tungdim Khangthah Kiloikhawm (TKK) (Orgn of Tungdim, Tunglut, Lhungdim, Tungnung & Tungte) te’n tutung a class X & XII passed-te kipahpihna nei uhi. Huai hun ah T. Paukhanlian, MDC; T. Singneng, President, Tungdim Phungpi Orgn. (TPO); Dr. LB. Hemkhomang; T. Hanglamthang leh Lunzamang Tungnung, MPS te’n thugen uhi.
Free Medical camp ah 213 val ki-ensak
Lamka, June-11: Young Vaiphei Assn (YVA) saina in tuni’n S. Kawtlian khua ah free medical camp om a, huai ah mi 213 val ki-ensak uh a, damdawi a manbei in pia uhi. Medical camp ah Dr. Asem Vaiphei, Dr . Kinzang Wangda, Dr. Seiminthang Haokip, Dr. R.S Richard Veikheponii, Dr. Solomon Kamei, Dr. Vahneineng Haokip, Dr Shahriinii Paomai, Dr. Haominlun Lhungdim leh Dr Sylvia Siamlian Vaiphei te’n damloute en uh a, Nunnem Vaiphei, Song Vaiphei, Kim Florence, Jamish Vaiphei, Rozy Vaiphei te’n kithuahpih uhi. Vungminthang Khaute, President YVA GHQ, Zabiaksang, President YVA Imphal Jt. HQ leh a cabinet-te ban ah S. Minlianthang Vaiphei, IAS, Director TA & Hills inleng uap hi.
Tuni in ni 1 sung Lok Adalat om
Lamka, June-11: National Legal Services Authority, New Delhi leh Manipur State Legal Services Authority thusuak dungzui in CCpur Dist. Legal Services Authority te’n tuni in Tuibuong a CJM court complex ah ni 1 sung ‘Lok Adalat’ sai uhi. Huai ah bank tawh kisai, MACT, Insurance claim leh family matter tawh kisai gen vengsak ut-te’ case tamtak sai uhi.
ZSP GHQ in kipahpihna nei ding
Lamka, June-11: Zou Sangnaupang Pawlpi (ZSP) GHQ in June 25, 2016 in Zoveng a Zogal Memorial Hall complex ah tukum a class X & XII passed-te kipahpihna leh Pathian kiang ah thumsakna program neiding uhi. Huai tawh kisai student lawhching te’n June 20, 2016 ma in mark sheet (Xerox) leh passport copy 1 submit ding in Chinkhenpau, Gen Secy. ZSP GHQ in theisak hi.
No comments:
Post a Comment