Result paidan etin term-lui sangin Congress keniam
IMC election ah Congress 8 leh BJP seat 5 ah ching
Imphal, June-6: Imphal Municipal Corporation (IMC) a Councillor 27 telna dingin June 2, 2016 a election om tuni zingsang dak 8:00 akipan DC/Imphal West office campus leh Porompat a DC/Imphal East campus a DIC Training Hall ah vote sim kipan a, hiai thu gelh ahihtan in Councillor seat 17 tan a result puankhiak hi a, Congress candidate-te seat 8 ah ching uh a, BJP in seat 5 a ching in Independent 4 ching uhi. Tutan a result paidan etin term-lui a seat 1 kia a ching BJP-te tutung in seat ah 5 ching uh a, term-lui a ruling party Congress bel nasatakin keniam uh hi’n kilang hi.
Imphal West district a Municipal ward 20 om lakah tuni nitak in ward 10-tan a vote sim hi a, June 7, 2016 zingsang dak 8.00 akipan in Ward dangte sim hinawn ding hi. Imphal West ah tuni tan a vote kisimkhinte lakah Congress seat 5, BJP seat 4 leh Independent in seat 1 ching hi. Imphal East district a om Ward 7 a Councillor-te vote simzawh hi a, Congress seat 3, BJP seat 1 leh Independent seat 3 ah ching uhi. Hiai thu bawl ahihtan in Imphal East ah Ward Development Committee member 14 kitelna a vote sim hilai hi.
Evan Thangvang blessing home leh street hong
Lamka, June-6: Khominthang ah ah tuni nitaklam in Evan Thangvang Street(V. Munhoih leh EBC Khominthang kikawmna) leh Evan Thangvang Blessing Home honna leh latna om hi. M. Gouzamang Guite, EM/ADC in lampi chiamtehna suang hong a, Rev. S. Vung Minthang, Gen. Secy , EBC in Blessing Home hong in Pathian kiang ah lan hi.Evan Thangvang bel Paite mite laka Christian masapen ahih banah Guite kual a Christianity sahkhua pawluttu hi’n kigen hi.
Robert Ginsuanlian Guite, Under Secretary, Lok Sabha in vaidawnna leh apu Evan Thangvang tanchin tomkim pulak hi. Amah kum 1871 in Kangjam khua (tu a Phaitong kichi) ah piang a, Feb 5, 1910 a Watkin Roberts in Senvon khua pha chih a theih in Senvon khua a va zin in Pathia thu-awi ding in a min vapelut hi. Phaitong hausa Kamkhothang deihsakna tang in kum 1910 in Phaitong ah Pathian thugen pan a, Pathian na asep nungin April 15, 1960 in si hi’n gen hi. Robert in apu min in kum 2009 in V. Munhoih ah innmun lei in Evan Thangvang Blessing Home ding bawl uh a, V/A phalna leh bialtu MDC theihpihna in lampi kibawl hi’n gen hi.
SHG tuamtuam adi’n training kipan
Lamka, June-6: Rural Aid Service (RAS) nuai a Self Help Group-te adin NABARD huhna zangin RAS office, Tuibuong ah tuni’n ni 7 daihding Livelihood & Enterprise Dev Programme tawh kisai training kipan hi. Huai ah Chief Guest in James Doujapao, SDO/Tuibuong pang a, Guest of Honour in N. Hauzel, LDM leh Functional President in T. Guite, DDN/NABARD pang hi. Training ah RAS nuai a SHG tuamtuamte batch 5 a khen in training pia uhi. Tuni’n 1st leh 2nd batch te’n pan uh a, June 13, 2016 in zou ding uhi. Amau batch 1 ah mi 30 tan tel uh a, ah P. Khamsanglian, Progressive Farmer in Bokashi technology zangin vok leh ak khoidan sinsak hi.3rd batch-te Kangvai ah training ding uh a, 4th leh 5th batch te’n S. Phaipijang ah Mushroom Cultivation training ding uhi. Batch 1 ah mi 30 tan tel uhi.
Gas a haksatna neite’n doc. tawi ngai
Lamka, June-6: Kim Joe Gas Agency ah June 7, 2016 zinglam dak 8:00 apan sunnung dak 1:00 kikal in Gas a haksatna neite’n Aadhar card, bank account, gas book leh DGCC tawi in ki report ding in Manager in theisak hi. Gas hawmkhiatni a hun kipe theilou ahihman in June 7, 2016 a gas haksaksatna neite’ kuapeuh document tawi a, hawhchiat dingin theisak hi.
Zoljam khua ah Free Medical Camp om
Lamka, June-6: Dist. Health Society/CCpur leh Food and Nutrition deptt. ICDP DD RPC-NEI pangkhawm in tuni in Zoljam khua ah ‘One Day Mobile Medical Camp’om a, Khaipao Haokip, MDC in huai hong a, Rev NT Lamcha in Pathian kiangah thumna in lan hi. Free Medical camp ah Dr Robinson leh Dr. Jireh in damlou tamtak en in damdawi a manbei in pia uhi. Medical Camp zawh in Saidan, L. Molvom leh Joljam Farmers Club member te kimukhawm uh a, Joljam hausa Haopu Khongsai in mipi hamphatna ding a Free Medical Camp saitute tungah kipahthu gen hi.
DC in Solar Energy Water Pump leh Public Toilet hong
Lamka, June-6: Lunminthang Haokip, IAS, DC/CCpur in tuni zing 8:00 in Saidan khua ah Solar Energy Water Pump tungtawn in mipi tuinek ding pump khiakna hong a, Rev. Huolthangsei, Executive Director, EAC in Pathian kiangah thumna in lan hi. Huaizawh zinglam dak 9:30 in DC in Rengkai Road a Sugnu Bus Parking ah mipi zatding Public Toilet hong hi. Sangaikot Sub-division Chief Assn. te’n gam neitu Miss Damhoiching akipan phalna tawh ama’ compound sung ah Rs 3 lakhs bei in pasal’ toilet 2 leh numei’ toilet 2 a bawl uh hi a, Chief Assn. te’n toilet enkai dingin Miss Damhoihching kiang ah mawhpuakna pia uhi. Public Toilet ah zuntha ut te’n Rs 5, leh daileng dingte’n Rs 10 pia in zattheih ding chih ahi hi.
DC in Solar Energy Water Pump honna hun ah a bawlsaktu Tata Trust, Mumbai leh EAC-te pahtakthu gen a, Solar energy tungtawn in khawl nasepnate’n carbon emission a suktawm kia hilou in gamsung a khantouhna thupitak tun hi’n gen hi. Carbon emission suktawmna ding in gam khangtou (western country) te’n solar power tungtawn in khawl (machine) nasepna pibawl uh a, India leng Solar production gamte lakah a 2na in pang hi’n gen hi. Solar energy ahihleh ni asat laisiah omthei ahihziakin kuapeuh in a zatdan siam poimawh hi’n gen hi.
Simon L. Hrangchal, Secretary, Relief and Dev, EAC in agenna ah Solar panel 1200 watt (1.2-KV) Energy Power zang in Saidan khua a mipi’n tuinek kiningching a ngah theihna ding a kibawl Solar Water Pump bel feet 180 a thuk (depth) leh tui litres 25,000 storage capacity nei Tata Trust, Mumbai panpihna nuai ah EAC in a sepsuah hi’n gen hi.Local level ah technician omlouh ziakin Rs. 3 lakh bei in PHED, Imphal te’n drilling( feet (180 athuk) vuhsak uh a, Mangal Rural, Imphal te’n Solar panel-te installation bawl uh hi’n gen hi. Diversion Based Irrigation construction of Solar Energy Water Pump for Drinking Water Supply System in mipi tuinek ding minute 1 sung in litres 20 pekhe ding hi’n leng gen hi.
Huaikhit in DC in Public Toilet ahon hun ah Sugnu lama Bus service te’n huai toilet phattuampih ding uh hi’n gen a, mipi’n neitu banga kingai a siangthou taka kem chiat dingin deihthu gen hi. Bialtu MDC V. Khaikhanmung in Sangaikot Sub-divn Chief Assn-te’ panlakna kipahpih thugen hi. Khupzasuan Zou, Chairman, Toilet Construction in area mipi te’n public toilet bawlsak dingin Chief Assn. ah ngetna tampi om ziaka Assn. in mimal leh MDC level ah panpihna ngen in Rs. 3 lakh bei a toilet bawl hi’n gen a, Chief Assn in mi kiphalte apan Rs 2.2 lakh kaikhawm uh hi’n gen hi.
Suangdoh leh Lungthul block a lawhchingte kipahpih
Lamka, June-6: Suangdoh V/A, SSPP Suangdoh Block leh Lungthul Block-saina in HSLC & HSSLC passed-te kipahpihna banah SSPP Tuima Unit honna om a, SSPP Gen HQ President Lianzapau Samte, Thangzamuan Tombing, Tribunal General, ATSUM banah SSPP GHQ Executive mi 6 vatel uhi. June 4, 2016 in Suangdoh H/S a Class X pass masa Mangsuanlian Guite kipahpihna hun Chief Guest in President, SSPP GHQ pang a, G. Suanchinpau, MDC, 11-Lungthul ADC in bawng 1 thawh hi. Paukhenkhup Guite, Chairman, School Management & Dev Comm, Suangdoh Govt. H/S school in agenna ah SSPP pangkhawm in school puahthak a om hi’n gen a, Mangsuanlian’ lawhchin kipahhuai in alehlam ah khasiat huai chi hi.
Chief Guest in Suangdoh Govt. H/S puah thakna gah masa Mangsuanlian Guite hi a, SSPP siamsinna ngai poimawh in school pukse theidingte kuapeuh pangkhawm a puah hi’n gen a, Maban ah Tony Blair Foundation tawh panlak hidin gen hi. Pastor T. Lamkhanthang, Area Pastor, EBCC Suangdoh in lawhchingte thumsak hi. Session 2na ah block sung a Class X pass mi 5 leh Class-XII mi 4 kipahpihna om a, huai ah Chief Guest in bialtu MDC pang a,lawhchinna ngahte Pastor VL Hminglian in vualzawlna ngetsak hi. Chief Guest in Lungthul Block huamsung ah khangthakte hun ah lam-etna lianpi nei hi’n gen hi. Siamsinna ah gentheihna in hangsanna leh kuhkalna tun a, huaite ziaka panla ding in siamsin naupangte hasuan hi.
SSPP Lungthul Block saina in block sunga Class X ah mi 19 leh Class XII ah mi 16 lawhchingte kipahpihna leng om a, amaute memento 1 chiat piak hi uhi. Class-X ah 85.5% mu Dimkhawmching leh Class-XII ah 89% mu E. Tuanchinmang in block topper ngah uh a, memento leh wall clock 1 tuak piak hi uhi. June 5, 2016 Tuima hausa inn ah President, SSPP Gen HQ in SSPP Tuima Unit hong a, President din P. Langkhansiam telching uhi.
SUUNNA:
Upa K.Ngilzakhup (67) s/o (late) Upa K.Thongzagin of Elim Veng, New Lamka tuzing dak 1:30 velin cancer in si a, sunnung in YPA hanmual, New Lamka ah kivui hi.
Mantinkhawl (66) w/o Tinzadong @ Dongvom Chief of B. Munpi, Thanlon sub-divn nungjang guh (spinal cord) buaiziak hun sawttak zeng a om zanhal nitaklam dak 3:45 in S. Munnuam khua ah si a, zan in kivui hi.
TNHF in 12th Meritorious Award pe ding
Lamka, June-6: TN Haokip Foundation (TNHF) Trustee Board saina in June 10, 2016 zinglam dak 11:30 in B. Vengnuom Community Hall ah 59-Saikot A/C biala 12th Meritorious Award Distribution, 2016 om ding a, Chief Guest in D. Korungthang, Minister (Health & FW, CADA & GAD) pang ding hi. Guest of Honour in James Doujapau Haokip, SDO/BDO Tuibuong leh Special Guest in Vanlallien Haokip, Principal, Salt Brook School pang ding uhi. Rev Hemkhomang, Principal, DTS in Meritorious Award Pathian kiang ah thumsak ding hi.
Thousilen 12,908 hawmkhia uh
Lamka, June-6: Dist Malaria deptt./CCpur te’n tunitan in PHC 6-Singngat, Behiang, Sangaikot, Thanlon, Henglep & Saikot) area a khua leh veng tamzaw ah thousilen-Long Lasting Insecticide Net/Insecticide-treated Net (LLIN/ITN) 12,908 val hawmkhia uhi. Malaria deptt. te’n June 7, 2016 in Saikot PHC nuai a inn 977 neite lakah leng thousilen hawmkhe ding uhi.
Food Safety Awareness poimawh- DO, FS
Lamka, June-6: K. Sunita Devi, Designated Officer, Food Safety/CCpur in market a kizuak nek tjheih thilte Food Safety/CCpur etkaina nuai a om hi’n gen a, fund leh manpower lam ah taksapna lianpi om ziakin market ah drive kizoulou chi’n food safety awareness poimawh hi’n gen hi. Sazuak ding gan (bawng, vok, ak etc) te a kigawh masiah Vety. & AH-te etkaina nuai hi a, himahleh mipi in alei ding, nekding a kigawh chiang in Food Safety etkaina nuai a om pan hi’n gen hi. Sazuakna a sa kizuakte govt dan hileh akisem zawh chiang in Freezer a koih teitei ding hi’n gen hi. Food poisoning tawh kisai sa leh nga nekkhelh ziaka kuahiam in damlouhna atuah leh food poisoning ahi kichipah theilou a, deptt. in hoihtaka test zawh nung doctor in a certified zawh chiangin a food poisoning kichi theipan hi’n gen hi. Bazar ah sa-le-nga a siangthou zuak ahihtheihna din awareness kisam a, sazuakte’n leng awareness a neihlouh ziak ua freezer a koihlou himaithei a, aleitute’n leng siangthou leh freezer a koihlouh kichi awareness taksap ziak hi’n gen hi. Govt apan fund om hunhun in leh mipi lakah sa-le-ngasa siangthou taka zuak ahihtheihna dingin sa zuakte awareness neih poimawh sakthu leh a utthu gen hi.
CDFRA pawlin election nei ding
Lamka, June-6: CCpur Dist. Farmers’ Research Assn. (CDFRA) pawlin June 20, 2016 in Tuibuong a KIC complex ah Election nei ding uh a, huai a candidate nuamte’n Agriculture Office, Compound, B. Vengnuom a Lalboi Tea Hotel ah June 18, 2016 tan Rs. 100/- pia in nomination form submit theih ding hi. Election hun ah President, Secy. General, Secy. Organisation, Secy. Development, Secy. Finance leh Secy. Inf. Publicity Wing telding uhi.
ZYA Tuikumuallum Unit hong
Lamka, June-6: Letminlun, President, ZYA Leijangphai Block, Thanlon Sub Divn. in zan sunnung in ZYA Tuikumualllum Unit hong a, Block makaite’n election neihpih in Upa Khaikhokam, Tuikumuallum in Pathian kiang ah thumsak hi. Makai telching thakte- President in Thangtinsuan, Secretary- Khamlalzawm, Finance Secy-Ngamhau leh Treasurer-Ginminlun hi uhi.
KZP GHQ in kipahpihna hun neiding
Lamka, June-6: Khangthah Zuun Pawl (KZP) GHQ te’n June 11, 2016 sunnung dak 1:00 in Simveng a Simte Inn ah Class X & XII passed-te kipahpihna nei ding uh a, Chief Guest in Armstrong Pamei, IAS, Jt. Secy. TA & Hills pang ding hi. Chief Host in Th. Jamchinthang Simte, MDC; Guest of Honour in T. Goukhomang Simte, ZEO/CCpur leh Special Guest in T. Lamminlal Simte, MCS pang ding hi.Rev. Dr. L. Liankhanlal, Executive Secy., SBCA in student lawhchingte Pathian kiang ah thumsakna leh hasotna thu gending a, khualliante leh Simte Literature Society, KZP, Education Foundation-te apan thugenna om ding hi.
Guite road bawlna ding panpihna pia
Lamka, June-6: Eimi CISF (Central Industrial Security Force) Whatsapp Group te’n amau sung ah CO akipan Riflemen tan mi 47 in Guite road bawlna ding sum kithawh uh a, NPS Mung, Asst Commandant, CISF makaih in member 4 in Manipur Tribal Movement Road Construction te kiangah Rs. 54,000/-pekhia uhi. NPS Mung in sum kithawhkhawm tam kei mahleh Security Force dang -BSF, CRPF, Assam Rifles, Assam Regt,, Manipur Rifles, Police te’n leng awareness hong neih ua, Guite road bawlna ding sum a thawhkhawm uh deihna ziakin Eimi CISF Whatsapp group te’n pankhia uh hi’n gen hi.
No comments:
Post a Comment