LAMKA, June-25 (PhualvaTimes) : Manipur singtangmite gam leh leitang, nekzonna leh maban ding sautak humbitna dia hinna pia, Salpha mi 9te sihnung ni 300 chin ding tawh kiton in, tuni'n New Delhi akipan Tribal mite adia theihtawp suah a pang, makai 2 in Lamka hongpha in zahna sangpen tawh Lamka mipite'n vaitun uhi.
Salphate omna District Hospital Morgue ah tuni'n mipi tamtak paikhawm uh a,Manipur Tribal Movement adia naktak a pang, Pu Biswajit Dimary, MP (Rajya Sabha) leh Delhi a Manipur singtangmite makaihtu Pu Romeo Hmar, Convenor, Manipur Tribal Forum-Delhi zahna sangpen piak in om uh a, Anti-Tribal Bills hihbeina dinga kiphutkhia All Manipur Tribals Women Union leh All Tribal Movement Lamka te'n Police Station akipan Hospital Morgue tan ah, zahna etsakna in 'Laang' zang in zawng uhi. Singtangmite paidan ah kuahiam zawng a omte bel zahna sangpen ngahte hi uhi. Pu Romeo Hmar in Delhi khawpi sung ah haksatna tuamtuamte lakah Tribal mite ading in theihtawp suah in panla a, amah leh a seppihte nasepna Lamka mipite'n haihlou uh ahihdan tuni'n muhtheih hi.
Zingchiang in Tribal Movement ni 300 chinni YPA Hall, Hiangtam Lamka ah zat hiding a, mipi tamtheilam in uap ding in JAC te'n ngen uhi.
No comments:
Post a Comment