HRILFIENA
Churachandpur, the 21st July,2016
Hmar Students’ Association, Manipur State Coordinating Committee (SCC) chun hieng a hnuoia thukhawchâng hai hi Hmar mipui hriet dingin kan hung tlangzâr:
1. Joint Action Committee Against Anti Tribal Bills, Churachandpur, indin ani huna khan Hmar Students’ Association, Joint Headquarters , CCpur hi Sudent body dang hai leh an din tu laia thang a nia, 2nd September 2015 a JACAATB indin a ni ṭum khan, kha hun a HSA General President chun HSA Jt. Hqtrs. CCpur, chu JACAATB chung thu ah mawphurna la vawng dingin a dânde a nih. Chun, 26th March, 2016 Central Executive Committee, Hmar Secretariat, HSA Campus, Rengkai a nei a ni ṭumin HSA Central Executitive Committee chun resolution no 14 dungzuiin HSA , Jt Hqtrs. CCpur, in JACAATB ah palaina sin a thawna kawngna mawphurna la vawng dingin dândea ah umna chu a namdet nawk a nih.
2. Hmar Students’ Association chun JACAATB in kei ṭhuoidan chu ngun taka a thlîr hnung in a sungril thu ah, thil tamtaka fel zo ta loin a hmu in a hriet a, chuleichun, HSA chun JACAATB chu khang hun laia Hmar Inpui ṭhuoitu hmasahai leh to khawm a tosan ta hrim bawk a nih.
3. Hun fe pei a chun, Hmar Inpui ṭhuoitu thar hai hung um in, Hmar Inpui Gen. Hqrs., ṭhuoitu thar inza um tak tak hai chun a hmaa hmalakna hai ngaiven a hrepui tum hran chuong ta loin, JACAATB a HSA palai hai le Hmar Inpui ṭhuoitu hmasa hai huna palai hai khawm an lo um zing laiin Hmar Inpui ṭhuoitu thar hai chun a afilliated body hai leh inrâwnderna khawm um ṭhak loin JACAATB a chun palai ding mi thar pathum ruotin a lo tir nel el tah a. Hi thu a hin HSA chun nasatakin a tuorna a, hrietthiem intak a tih.
4. 22nd February, 2016 khan HSA chun Class 10 le Class 12 exam March a nei ding chungthuah exam chawkbuoi lo zawnga tu khawma bandh thaw lo dingin, chanchinbu le social media hai fethlengin ngenna a siema. 12th March 2016 khan HSA chun official taka lekha siemin Chief Convenor, JACAATB kuomah exam lai a shutdown chu inchûklai hai hmakhuo ngaituona leia a hun sawn hrâm dingin a ngen. 17th le 18th March 2016 khan JACAATB chun exam lai zingin 200 days inserna hun hmangin total shut down a puong ta tho tho a, exam mek hai naupang tamtak an chiai pha hle ta nghe nghe ani kha. HSA chu JACAATB palai a ni ve lai zing sia, hienga a thilngen pawmpuina um ṭhak lo a iengmalo anga ngai a a um el hi chu HSA chun a tuorthiem naw hle. Hieng lai zing hin Hmar Inpui Gen. Hqrs, President chun HSA hai thil ngen chu hrilpui le ngaiven pui tum ṭhak loin 18th March 2016 zan a hin program a hai a lo hang ṭhang nawk hiel hih HSA chun hrietthiem harsa a ti hle bawk a nih.
5. 28th March 2016 khan HSA, Jt Hqrs. CCpur, chun Hmar Inpui Gen. Hqrs, President le General Secretary hai kuomah JACAATB chungchanga a hrilfiena phût in lekha a pêk a, chu lekha chu dawnna hun iemanichen nghak ani hnungin dawnna a um naw leiin, 14th May 2016 khan HSA Jt. Hqrs. ṭhuoitu hai chu HSA General Hqrs. haiin Hmar Inpui Gen. Hqrs., President inhmupui a 28th March a lekha pêka um chungthu a hohlimna nei pui dingin a tir a. Hi huna hin Hmar Inpui Gen. Hqrs., President inzaumtak chun HSA hai hi darkar khat vel ding lai ṭhungna khawm a pêk nawh a, chun tham lo zet in hieng hin a lo dawn ta ringawt el a: “Ieng lei in am ka affiliated body chu ka rawn rawn ding?”. 16th May 2016 Hmar Martyrs’ Day le intuok in JACAATB in total shut down a lo puong thu ah HSA in Press Release insuo ding in thurawn Hmar Inpui Gen. Hqrs., President kuomah a siem leh, lo to phawt dinga hril an ni nawk bawk si a.
Hieng a thu hai khawm inrawn pui harsa taka hotu lien inzaum tak a um el na hin HSA chu a barakhaih khawp el a nih.
6. 28th May 2016 in HSA General Hqrs. chun Hmar Inpui Gen. Hqrs. kuomah chun JACAATB a HSA hai ngirhmun lekha ngeia a hrilfiena mi nei pêk dinga ngen ania , a hrilfiena chu a um ta chuong bawk nawh a.
7. 8th June 2016 khan Executive Body meeting nei pui dingin Hmar Inpui Gen. Hqrs. chun a affiliated body hai po po a ko tah a, chu ni chun thu mumal a rêl fel ani thei nawh. Hmar Inpui Gen. Hqrs., chun, zanthim chen inṭhung a ni hnung khawma, HSA ngirhmun le thuhril hai chu a hrietthiem nuom chuong nawh a. Hi ni hin Hmar Inpui Gen. Hqrs, President chun, JACAATB chungthu ah HSA chu Kuki Student Organisation, CCpur hai leh inrawntlâng pui dingin thurawn a pek a. Hmar Inpui Gen. Hqrs., resolution ah ruok chu hi thurawn hi inchuon a ni nawk bawk si nawh. Chun hi ni hin meeting hi mumal lo taka suktawp a ni a, an hma thei anga meeting nei nawk dinga inṭhe ani ta hlawl el a nih.
8. Meeting ko nawk dinga ti chu ko a ni nawk tanaw phing chun 8th June 2016 a Hmar Inpui Gen. Hqrs, President thurawn angin HSA chun 28th June 2016 khan Kuki Student Organisation, CCpur hai chu JACAATB chungthu ah inrawn khawmna nei puiin Joint Press Release HSA, CCpur Jt.Hqrs. le KSO CCpur chun an siem ta a nih.
9. Hmar Inpui Gen. Hqrs, President chun a thurawn pêk anga HSA in hma a lo lâkna chu hrethiem nuom nawk loin 29th June 2016 ah chun emergenecy Executive Body Meeting HSA Campus a ko nawk a. Hi ni hin HSA palai hai chun HSA le KSO in Joint Press Release an lo thaw chungchanga san indik tak hrilfie ding le an ngaidân hai hrilfel dinga an ngir zât in, hril zo thei lo dingin vai ṭhung a in ngirkhum in Hmar Inpui Gen. Hqrs., President chun ro a rel khum nawk ta si a. Hi ni hin beidawng tâwp khâwk in HSA palai hai chun rorelna Hall anthawkin thlabâr takin an suok ta hlawl a nih.
10. 30th June 2016 Hmar Inpui Gen. Hqrs Executive Resolution no 3 a “JACAATB ,CCpur chungthua HSA Jt Hqrs , CCpur hai lungawinawna thu ngun taka hril tlâng a ni hnung in an lungawinawna a hrietpui, an lungawinaw na hai po po hi Hmar Inpui chun JACAATB intlun pek a tih” tiin Press Release a meu thu an suo a.
Hmar Inpui in HSA thu le hla JACAATB kuoma an tlun thu hlak chu voisun ni chen hin hriet khawm a la ni chuong bawk si nawh.
11.Kuki Student Organisation le Hmar Students’ Association hi Manipur a chu inlaichinna le in unauna inthûktak tiena tlânga inthawka nei an nih a. All Tribal Students’ Union Manipur a khawm lunginruoltaka hma la tlâng hlak an nih. Hi ang dungzui hin 17th July khan HSA le KSO chun Joint Meeting an nei a, Bill hai chu hne an ni ta leiin tribal MLA ei la boycott zing hi a ṭulna ala um am a nih, ti thu le kawng dang a hai khawm hmasawmna lampui hai chu dap tlâng dinga ngaidân an nei hai chu 19th July 2016 khan Press Release in an insuo tah a nih.
12.19th July 2016 a HSA le KSO Joint Press Release chungchang a hin ringnaw zâwng taka Hmar Inpui Gen. Hqrs. in tham lo taka 20th July 2016 a Press Release hmanga HSA hai thudik ngir pui chu hre nuom dêr loa HSA Jt. Hqrs, CCpur a hung kâwkna hi HSA chun pawi a ti hle el a, a tuor na a, naufahra anga Hmar Inpui Gen. Hqrs ṭhuoitu hai chun an mi lo en zing a nih ti a suk chieng hle. Hmar Inpui Gen. Hqrs. in HSA hi JACAATB chung thuah thurawn la pe ngai rêng rêng si lo a, inbiekpui a inrâwn pui nuom bawk lo a, a chungthu ah a kut a sawp faina ang hiel a Press Release hmanga 20th July 2016 a nuom a to ṭawk ṭawk ding le ngaidân nei thei lo ding hiel khawpa a vauna hi HSA chun hrethiem ngai naw nih.
13.Hmar Students’Association Joint Headquarters hai le State Coordinating Committee hai hi General Heaquarters nei kan nih a, Hmar Inpui Gen. Hqrs a affiliated body kan nina chu kan General Headquarters fethlengin a ni lem. Hieng a HSA Jt. Hqrs pakhat Hmar Inpui General Headquarters in a khing ngat ngat tlat el hi a Hmar Inpui Gen. Hqrs thaw ding chie khawm am amanih, ti hih zawna lientak a tling. Chun Press Release insuo khuma in vau, inṭhi le inrîkrap khum nêkin kan General Heaquarters hai leh ṭhataka inrawnna neia, a thu khawchâng en fel chu pa chan chang hai thaw dân ding lem awm ah kan ngai. Hi lai zinga HSA Jt. Hqrs pakhat an bituk char char el hi an hmakhuo ding HSA in thudik a ṭanna lei hin suk buoi a nei lei hiel am an tah ti khawm hi ngaituo tham a nih.
14.Hmar Inpui Gen. Hqrs chu Inpui(Institution) a nina chu HSA chun an za hlie hlie a, iengtiklai khawma inza naw lai a neinaw reng reng. Amiruokch , tuta Hmar Inpui Gen. Hqrs. ṭhuoitu inza umtak tak hai in HSA an sawisak dan a ruok a hin chu, Inpui institution chu HSA in inzâ hle sien khawm, tuta Inpui ṭhuoitu hai ruok hi chu HSA chun a ringzo thei ta dêr naw a nih.
15.Hmar Inpui Gen. Hqrs. in Manipur a Hmar mipui hai hmakhuo ngaia sin a thawna a hin, a affiliated body hai leh thu inhmuna ṭhatak um loa hma a lâk zawm zing chun Hmar mipui hai hmakhuo ṭhatna ding a pieng chuong ding am a nih ? Manipura Hmar hnam hmakhuo ding Hmar Inpuiin a ngaituona a hin, CCpur huom sung chau huopa hmathlîr nei loa, a hnam têlpui tadinga remchang ṭhalem ngaituona a suok theina ding chun Hmar mipui laia mithiem mivar tamtak Manipur sunga mi chau niloa state dang danga mi hai khawm ṭhangsa in ngaituona einei tlâng chu a hun anta naw manih?
16. HSA hi Student Body ani angin tukhawm Politician le Political party ṭan bîk le ditsak biek anei nawa, mitin in mani sie le ṭha hrietna le Pathien rawn puma India Dân pui in phalna insângtak (Constitutional Right) ami pêk hmang ṭangkaiin, ṭhuoitu ding chu thlang thiem dingin a ditsak seng a nih.
17. HSA ṭhuoitu hai mimal taka annina hai diriema hnam tadinga ringzo umlo anga social media haia indemna hi tâwpsan nita sien kan tih a. Hnam tadingin ringzo an um tâwk a nih ti kan puong bawk a nih.
HSA hin Hmar hnam tadingin ienglai khawmin ṭhahnem ngai takin sin thawng ata, thudik ṭan kawngah chun Pathien râwn zing pumin ṭhahnemngai takin ngir zing a tih.
HSA damzing raw seh!!
Ram le hnam tadinga inthawpui,
(LALROBUL PUDAITE )
Coordinator SCC,Manipur
( NATHAN SANATE)
CEC Member, CCpur
( MALSAWMTHANG RALSUN )
SecretarySCC,Manipur
( HRILSANGMAWI )
CEC Member, Imphal
(RUOLKHUM HMAR)
CEC Member, Jiri-Vangai
No comments:
Post a Comment