Manipur Express | June 18, 2016

Zomi Council in UPF makaite vaidawn

Lamka, June-17: UPF leh KNO  in Centre Govt leh State Govt tawh kum 8 sung Suspension of Operation (SoO) a neih nungun June 15 in Delhi a Ashoka Hotel ah a masapen di’n political dialogue nei uh a, Lamka hongtun utawh kiton in tuni’n Zomi Council makaih in Simveng a Simte inn ah vaidawnna om hi.  Huai ah Calvin H. Convenor, UPF in tripartite talks  tawh kisai report pia a, huai a paikhawmte’n interaction session leng nei  uhi. 

KNO leh UPF in kum 2008 in Centre leh state govt tawh Suspension of Operation ah suaikai uh a, kum 8  a ngak nungun political dialogue om hi.Kihouna ah UPF leh KNO in Statehood  pedin ngen uh a, lam-et thu leng gen uhi. Vaidawn kikhopna ah ZC nuai a tribe tuamtuam akipan palaite banah UPF  leh Zomi sung a Frontal Orgn tuamtuam  makaite tel uhi.

Guite Road a Shaktiman accident ah mi 1 si, mi 6 liam

Lamka, June-17: Lamka apan passenger pua Shaktiman gari 1 in Kangkap khua zuanlai, Songtal leh Kangkap kikal Kangkap kho phakma deuh Vanpangmual kichihna mun ah tunitak dak 6:00 velin steering fail ziakin accident a, lamlian akipan feet 30 vel ah lengkhe suk hi'n thutut kingah a, huai ah mi 1 si in midang 6 liam uhi. Misi ahihleh Mrs Chiinnemvung (28) w/o L. Chinkhanlal of Kangkap hi a, amun ah si a, aliam mi 6te ahihleh Nemkhanching w/o Kapzamawi; Zuaikhovung w/o Paukhankhup; Niangsianlun w/o Pausonthang, Thiemting  w/o Paulemjoy, leh Ginkholun h/o Chingbiakvung leh Siempu, handyman hi uh a, amaute Lamka puaktung hiding uhi. Gari handyman chihlouh siah mi 5te Kangkap khaw mi ngen hi’n kigen hi.

Thukiza danin, June 13, 2016 in Mrs. Nemvung banah atate pasal 2- kum 6 leh kum 4 vel tawh Lamka ah misi gal in hongzin uh, tuni a khua uh zuanlai hiai bang tuak hi’n kigen hi. A liamte paw dingin bialtu MDC G. Suanchinpau in tunitak dak 9:30 vel in Ambulance 3 - ADC/CCpur Ambulance, District Hospital Ambulance leh Singngat PHC Ambulance tawh Kangkap khua delh suk a, amah panlakna a zingkal baihtak a Lamka puaktung hiding uh hi’n kigen hi.

Artistes leh Designer-te theihsak 

Imphal,June-17: New Delhi ah January 26, 2017 a Republic Day celebration a lah(show/display) dingin Manipur govt nuaia Directorate of Art & Culture in Manipur akipan a lunglut artistes leh designer-te’n design/ sketch model submit  dingin theisak hi.Palace compound,Imphal a Directorate of Art & Culture ah office kaihun sungin application form  laktheih ding a, application form kimtaka fill-up banah design, short write-up  leh a design lemlak 1 telin July 10,2016 sun dak 12.00 tan  Directorate of Art & Culture ah submit ding in Dr K. Shushila, Director in theisak hi.

Blockade om mahleh thautui tasam lou

Imphal, June-17: JAC against Anti-Tribal Bill leh Outer Manipur Tribal Forum (OMTF) te’n June 9, 2015 zankim apan ni 10 sung daih ding singtang bial a National Highway (NH) teng ah Economic blockade a puan uh tuni’n ni 9 chingta a, Manipur ah thautui kizangte Assam a Khatkati akipan NH-2 (Imphal-Dimapur) lampi tawn in Manipur ah puaklut hi a, blockade ziak a thautui taksapna omlou hi’n gen uhi. Blockade kipat ni ding in petrol pump tamzaw-te ah ‘stock nil’ kigelh a, himahleh security vengbitna nuai ah Mao gate a thautui leh van tuamtuam pua gari-te  pikhiak ahihziakin petrol pump-te ah ngeina bang a thautui om thei nawn hi’n gen uhi. 

St. Anthony ah rank 3 na in pang  

Lamka, June-17: NEHU a St. Anthony College ah B.A/B.Sc final result suak ah Miss Ninglianmawi Shoute d/o  Thongkhanmung Shoute of Church road, New Lamka in B.A (Philosophy Honour) subject ah 71% mu in rank 3na apang hi’n kigen hi.

Combine team in galvan mukhia

Imphal, June-17: Lilong Police leh 9-sector nuai a 6-A/R combine team te’n NH-102 in a tawtkhak Waithou area ah galvan selgukna mun om chih thuguk a muh uh dungzui in tuni zingsang dak 5:30 velin search operation bawl uhi. Huai ah lethod round 5 leh hand grenade 3 mukhia uh a, galvan muhkhiak-te Lilong police station ah pekhia uh hi’n gen uhi. 

The Great June Uprising, 2016 zatna  dinga kisakkholhna bangkim mansiang

Imphal, June-17:  ‘The 15th Great June Uprising (Unity Day)’ kichi  Kekrupat ah June 18, 2016 zingsang  akipan AMUCO leh UNC kigawm a saina  in zat hiding a, huai dingin kisakkholhna bangkim zawh hita chihthu om hi. Zingsang dak 5.00 akipan nitak dak 8.00 tan programme pat hiding a,June 18, 2001 a  Manipur gam leitang humbitna dinga si mi 18te zahna tuamtuam leh thilpiakna om ding a, martyr-te memorial site kiangah public meeting leng om ding hi. 

June 18,2001a Indo-Naga ceasefire gamgi bikhiah omlou(without any territorial limit) chih tungtang ah Manipur bial ah mipi sousangin buaina thupitak piang a,huai ah security-te’n  thau a khah ziakua  mi 18 si a,huai akipan Centre in  Nagaland pua tanpha a ceasefire a keklet uh zukkik uhi. Huchi’n AMUCO leh UCM in kum tenga June 18, 2016 in mi si 18te zahna leh sunna in  ‘The Great June Uprising (Unity Day)’ chih minvuah in  zang uhi.             

The Gret June Uprising zat ding ziakin June 18, 2016 zingsang dak 6.00 akipan nitaklam dak 5.00 tan Imphal khawpi a gari lut dingdan bikhiah hi a,huai dungzui in Thoubal akipan Gari-te Singjamei bazar akipan Kongba leh Wangkhei tawn in Palace compound ah khawl ding uhi. Mayang Imphal akipante Kwakeithel bazar akipan Lamphel Bus parking tawn in Lamphel Sanakeithel ah park ding uhi.Tedim Road tawnte Kwakeithel akipan Tera bazaar tawn in Sogolband road a lut in Jiri parking area ah kinga ding uhi.

14th Felicitation-cum-Career Guidance, 2016

Lamka, June-17: KSO, Singngat Block te’n tuni in Haijang khua ah 14th Felicitation–cum-Career Guidance, 2016 nei uh a, Special Guest in R.L Haokip, Principal, Greenwood Academy leh T.L Haopu, President KSO/CCpur pang uhi. Thangjangam Haokip, Gen Secy. KSO Singngat block makaih in Manipur board a X & XII ah MIL (Thadou-Kuki) topper te, Manipur board leh CBSE ah X & XI topper te kiang ah Meritorious Award pia uh a, Rev Kamkholun Singson, ECA Pastor, Singngat area in Pathian kiangah thumsak hi. TL Haopu, President KSO/CCpur; (aban pek 4na ah)

14th Felicitation-cum-......pek 1na zopna

D. Ngullun Haokip, Chief of Chahnou; President, Haosapu, Singngat Area Kuki Chief Assn. (SAKCA)  leh KSO Singngat Block makaite’n  huai hun uap in thugen uhi.

      Manipur board a class X MIL (Thadou-Kuki) topper award Jamminlal Haokip (Greenwood Academy) s/o Tongkhopao Haokip of L. Phaimol in ngah a, class X topper award Lamminthang Doungel (St. Joseph's H/School) s/o Mangkholal of S. Thadou Veng in la hi. Class XII  MIL topper award Lamneihoi Haokip (Young Pillar College) d/o Letsei Haokip of S. Thadou Veng leh Veronica Chachan Haokip (Don Bosco Hr. Sec. School) d/o Robert Khaiminthang of Hengjang in te’n ngah uhi. Class XII topper award Lamneihoi Haokip (Young Pillar College) d/o Letsei Haokip of S. Thadou veng in la  hi.

       CBSE class X topper award N. Paolenmang Haokip (JNV) in la  a, CBSE class XII topper award Vahneihoi Haokip (St.Paul's Institute) d/o Seilet Haokip in la hi.

SUUNNA:

Gouzakham Tonsing (72) f/o T Khamchinlian of  Zoar Veng,  Bungmual tuzing dak 9:00 velin Delhi ah cancer in si a, aluang hong kipaw ding a, Bungmual hanmual ah vui hiding hi.

Lalruotthang of Sielmat, zannitak dak 9:30 velin cancer in si a, tuni’n Sielmat hanmual ah kivui hi.

Upa P. Chinzathang (72) f/o Gousuankap of Vengnuam South, New Lamka tuzing dak 7:20 velin sinna in si a, sunnung in YPA hanmual, New Lamka ah kivui hi.

N. Thanghang (76) h/o Dimzaching of Singngat Mission Veng tuzing dak 2:00 vel in cancer in si a, nitaklam in Singngat hanmual ah kivui hi.

Genlemkhai (39) s/o Upa S. Khoma of Lingsiphai, tuzing in awklum a, nitaklam in Lingsiphai hanmual ah kivui hi.

Hmar’ Autonomous Council pelou ding

HPC(D) tawh Peace Talks neihsawm

Aizawl, June-17: Manipur pansan Hmar People's Convention (Democratic) tawh tunung sawtlou in Mizoram government in Peace Talks pan nawn ding hi’n  official thusuakin tuni’n gen hi. Thusuakin agendan in 1994 akipan Hmar tribal-te adia autonomous council ngetna in HPC (D) pawlin Mizoram gamsung ah hiamgamna pan uh a, Mizoram government tanpha dengdel takin koih uh chi hi.

HPC(D) tawh peace talks neihding state government in lemsa mahleh, HPC(D) thilnget-te laka poimawh pen Autonomous Council piak hilou ding hi’n Home Minister R. Lalzirliana in tuni’n gen a, Mizoram mipite’n chi-le-nam(ethnic) thil a autonomous council bawlkhiak deihlou uh chi hi. Local leader-te’ tungtawn in HPC(D) kiangah kihouna ding tawh kisai theisak khin uh chi a, tunung sawtlou in official taka chialna bawl hiding chi’n Lalzirliana in gen hi. Hmar helpawl leh Mizoram government in 2013 akipan Suspension of Operations(SoO) beisak uh a,  tuma in HPC(D) tawh peace talks neih nawnlouh ding tanpha in Lalzirliana in gen ngeita hi. 

Central government akipan Mizoram state in 2000-01  sungin ‘Peace Bonus’ dan in Rs 182.45 crore ngah uh a, India a state galmuangpen leh helna leh hiamgamna enkai zoupen  a chiamteh ahihziakun hiai hamphatna piak hi uhi. State galmuangpen a chiamteh himahleh March 28, 2016 in HPC(D) te’n police party ambush in mi 3 that uh a, midang 6 liam in, hiai record beisak hi’n thusuakin gen hi.

FAST in kum 18 Rising Day zang

Lamka, June-17: Friendship Athletic Sporting Team a member te’n tuni in Rengkai a HL Daka Memorial Hall ah ‘Raising Day’ lawm uh a, huai ah Chief Guest in M. Gouzamang Guite, EM ADC pang hi. Functional President in Richard Laltanpui, Asst. Secy, HSA GHQ leh Guest of Honour in Joufawnlien, Chief of Rengkai pang hi. Chief Guest in a genna ah Dist Council in khawpi sung sianthou ban ah damtheihnalam awlmawh ziakin  aksa zuakte’n lamnawl ah zuaklouh ding, vok goute’n amul bawhthawh ding leh dawr bawlte’n electronic weighing machine zang dia thupuan  kuapeuh in zui din theihsak hi. Football kichi team work ahihban ah nek zonna hithei ahihman in FAST member te’n naktaka panla din hasuan hi.

Counter blockade thukkikna kipan

Kangpokpi, June-17:  Manipur singtang bial a National Highway (NH) teng ah June 9, 2016 zankim apan JAC against Anti-tribal bill leh OMTF te’n ni 10 sung daih ding economic blockade a bawl uh doudalna in phaizang bial ah counter blockade bawl te’n Imphal apan singtang bial zuan ding gari-te van puak banah damdawi (medicine) tanpha lakkhiak sak uh hi’n kigen hi. Tua Counter blockade thukkikna in tuni’n Kangpokpi a IT Road gei leh Gamgiphai mun ah blockade supporter te’n gari taite check in van omte lak khiaksak uh a, Senapati DHQ ah leng counter blockade thukkikna kipan hi’n gen uhi. Hiai thu tawh kisai in Thadou bodies te’n Motbung ah tunitaklam in emergency meeting nei uh a, huai ah June 18, 2016 apan counter blockade nasasem a thuk kik dingin thupukna bawl uhi. Huai lou in Naga People’s Organization (NPO) te’n NH-2 ah non-commercial leh private gari tanpha-te van puak lakkhiak banah hentang sak ngaikhawk uh  a, hiaibang a gamtatna tawpsan ding leh Counter blockade bawl te’n mimal van-te leh local product-te khahkol dingin ngetna bawl uhi. Huai ahihkeileh Counter blockade-te gamtatdan tawh kituak a thukkik ding uh chi’n gen uhi. 

EDITORIAL

Imphal ah damlou ki-refer veu...

Damlouhna kichi mihing kuapeuhin i tuahtheih uh hi a, damlouhna leh puksiat kichi mihingte’n i pumpelh theih vuallouh  uh, ei ut leh utlouh thu leng hilou a   tuah guihguih theih himawk a, thakhat thu a pukphut kichi bangleng om thei hi. Adiakin  heart attack hiam  cardiac arrest kichi  leh adangdang ziak a buaiguih bangleng om i gam ah om guihguih thei mawk hi. Huchimah bangin cancer kichi natna bang le g nanvual hilou khop in igam ah leng a, heart attact telin natna tuamtuam ziak a pukguihna kichi igam ah pumdim hi’n kilang hi.
Damlouhna i tuah hunah Imphal a govt hospital omte leh private Hospital tuamtuam hoih tungtuan dia tmtak in  i ngaihsut uh Sky Hospital, Shija Hospital, RIMS, JNIMS, Raj Polyclinic, Mothers’ Care, Catholic Medical Centre leh adang bangzahhiam ahi hi. Lamka a ikisukkhak hun hiam accident hun ah damlou kintaka etkol ngaite  Imphal a i ki-referred veu in ihihna uh gen chian mahmah hilou hiam chih theihin om hi. Lungtang natna ahihkeileh BP stroke tawh kisai a buaina nei khempeuh Imphal a  SKY hospital hiam koilai mun hiam tut hi a, sungna leh natna tuamtuam neite Shija Hospital, RIMS, Raj Poly Clinic leh atuamtuam iki tun ziahziah  uhi.
Hospital management tawh kisai soisel i hikei a,  Lamka khawpi a District Hospital ah leng leng facility tuamtuam ginatak om thei samlou  ahi ahiam chihthu ahi hi. A masapen in life saving drugs/ life support/ ventilator neithei ding damdawi inn nei nailou i hihiam? Lamka a Distict Hospital ah  damlou kuahiam gim a omleh thautui man kisen in ambulance zat theih ding chih Medical Suptd thusuak hitel hi. 
Manipur adia khawpi nihna Lamka ah hibang thusuak om ahihleh, govt kia hilou in mipite’ adia zahlakna thupitak ahi cihtheih hi. District hospital in a kiningching in Ambulance a neizou kei a,huaizakin  KKL/ YPA ahihkeileh private Ambulance tuamtuam a service  ua, government zahlaklou lel hi. Bandh ni hiam  in huai ambulance-te tai mahle uh koilai hiam ah khoihbuai in a om khasek uh. Poi mahmah. Private/ mimal in district hospital kithuahpih (support) lou hileh hospital adingin kong tamtak ah zahlakna om  ding bang hi. Ahi a, hospital administration tawh kisai in mipite’n  iva sukbuai ton uh leng tam mahmah samding chih bel i mangngilh tuankei hi.
Tuni a i gen ut pen ahihleh, accident hiam emergency case a om chiang a Imphal a ki refer veu chih chikni chiangin i beisak  thei dia? Medical facility hoihzaw ahi chih i thei a, bangchileh Lamka a district hospital ah facility bukimzaw ikoih theiding hiam  chih ngaihsut poimawh a, panlak leng poimawh petmah hi. Lamka sangin Imphal, Imphal sangin Guwahati, Guwahati sangin Delhi a hoihzaw ding chih pe’n kuapeuh in  i ngaihsutna ahi. Dik leng dik kha mah in teh. Himahleh, minor case khenkhat Imphal a ki-referred om khasek hidan a gen in om a, awlmawhna ziak leng hi dingin i gingta hi.
Casualty a a kisaipih (concerned) doctor-te hiam, nurse leh staff tuamtuamte mawhsa ihi  kei a, bangchileh Imphal a ki-refer seselouh a Lamka a Dist Hospital   ah ki-etkolna hoihzaw om theiding hiam chihlam hizaw hi. India gam munteng ah government hospital sangin private hospital-te hoihzaw leh standard zaw ahi chih bel ithei ua, himahleh, Lamka a Dist Hospital ah Ventilator/ Life support system tanbek a om deihhuai mahmahta a, oxygen kia hithei nawnlou ahihdan kilang  hi. Tua ziak mahin, Lamka a District hospital a building  puahphat kawmin, damloute’ hamphatpih theih ding facility tuamtuam omte leng tulai khawvel tawh kituaka etthak kisam hi. Emergency case banghiam om teng a Imphal a ki-refer veu kichi damlou tamtakte adin haksa mahmah hi’n kigen hi.  Imphal ah damlou atamzaw private hospital ah lut uh a, tua hunah niteng in sum asang asing asim  lut ziahziah mai hi.        

Lamka ah doctor siamtaktakte’n leng vanzat kilawm leh hoih huntawk neih unta a, damlou khenkhat Imphal a ki-refer veu chimtak-huai mahmah hi a gen hunkhop omta hi. Huaiziakin Lamka ah leng  speciality hospital poimawh mahmah hi’n kilang hi. Lamka a District Hospital in kum 2015-16 in  sianthouna, damtheihna leh public health care lama hihhoih ziakin kipahman Rs. 50 lakh  tawh kithuah Kayakalp Award hial la ahihna ah  a dinmun tawh kituak facility leh damlou etkolna lamah leng suanhuai leh phattham ching a nasemthei ahih hun hita hi.