MANIPUR EXPRESS | JUNE 28, 2016

Salphalte zahna pumbuk ah sit-in-protest om
Lamka, June-27: JAC against Anti-Tribal Bills(JAC-AATB) makaihna in tuni akipan Aug 31, 2016 tan daih ding in Hiangtam Lamka a Salphate zahna pumbuk ah sit-in-protest kipan nawn hi. Huai ah Rev Hangpi Manlun; Rev Dr Lalkholien Pulamte; D.Angam Gangte makaih in Pearsonmun, B.Vengnuom, Hill Town leh Nehru Marg tel uhi.H.Mangchinkhup, Convenor, JAC-AATB makaih in JAC makaite ban ah Romeo Hmar, Convenor, Manipur Tribal Forum, Delhi(MTFD) in uap  in thugen uhi.
    Romeo in New Delhi ah MTFD makaih in Jantar Mantar ah protest pailel report pia a, tuni a Bills 3 tawh kisai kiphinna om JAC-te mawhpuakna kia hilou in miteng mawhpua hi'n gen hi. Pankhawm hatna hi a, bangziaka pangkhawmlou ihi uhiam? chi’n dotna bawl hi.

    Nuakna/ agitation tawh kisai pawlhunkhop om mahleh govt tawh kihou chiangin JAC-AATB min a kihouna neih poimawh a, pawl 3 /4 ipai leh govt leng lungbuai thei chi gen hi. Tunia kiphinna maban ah leng tup/target hoihtak nei a paitouh zel ding, bills 3te i nanzawh kei leh i tusawn, khangsawnte'n bangdia bills 3 te ana dal lou uhiam? Chi a hon mawhsa ding uh hi'n gen hi. British te’n India hong opkhum ma un singtangmite’ atuam in kivaihawm in i om  a, eikhang ah leng singtangmite  atuam a om ding tup-le-gim hi gige chi’n gen hi.
    Mangchinkhup in  Bills 3 ziakin mi 9 i si a, maban ah bill dang hong kipass ding, sihbeh zel ding maw? chih kingaihtuah hun hi'n gen hi. Bills 3 ban ah atuam a kivaihawmna kichi JAC te kia hilou in mipi ban ah tribe leader-te leh nam sepaih te pankhawm vek poimawh chi hi.June 28, 2016 in Pearsonmun, Khominthang (New Lamka), Gangpimual leh Apollo Veng te sit in protest tuding uh a, Rev B L Sandam; Thangzamang leh Henkholun Gangte in makai ding uhi.


June 29, 2016 tan in Cabinet ah puaklut sawm
July 1, 2016 akipan 7th Pay Commission zat hiding
New Delhi, June-27: India solkal nuaia nasem leh pensioner crore 1 val te’n July 2016 apan 7th Pay Commission hamphatpih ding uh a, khalawh 23.5 percent in khangtou ding hi. Cabinet Secretary P.K. Sinha makaih Committee of Secretaries te’n Seventh Pay Commission  tungtang report abawl uh zawhsiang hita a, huaite June 29, 2016 tan in Cabinet ah pawlut ding ua, Cabinet inleng pom ding a lamet huai hi’n Finance Ministry apan official thusuakin tuni’n taklang hi.
    Committee of Secretaries (CoS) te’n Pay Commission recommendation tungtang saifel khinta uh a, huai report tungtawn in draft Cabinet note bawl hiding chi’n Finance Secretary Ashok Lavasa in tuni’n gen hi. Tulelin Central government nuaia sem, employee lakh 50 val leh pensioner lakh 58 om hi’n leng gen hi. Pay Commission enkai dinga guan a omte’n Basic pay leng 14.27 percent  hiding in lemsa uh a, kum 70 paisa akipan basic pay khansakna ah percent niampen hun hiding hi. 6th Pay Commission ah basic pay 20 percent  in khansak in om hi.
    Central government nuaia nasem ding kilaknate ah khalawh kipatna (entry level pay)  Rs 18,000 per month hiding a, tulelin  Rs 7,000 ahi hi. Secretaries’ panel te’n minimum entry level pay  Rs 23,500 per month  leng pomna bawl ding uh a, huai dungzui in khalawh tampen in  khateng in Rs 3.25 lakh tan lawh thei ding uhi.  Seventh Pay Commission adi’n Rs 70,000 crore vel koihkhiak in om hi.


LOCAL NEWS:
PTC GHQ kum 67 chinna tuni’n zat in om
Lamka, June-27: Paite Tribe Council (PTC) GHQ in tuni in Hiangtam Lamka a PTC GHQ Conference hall ah kum 67 chinna Raising Day lawm uh  a,  K. Chinkhansuan, Vice Chairman, CWC in makaihna  in makai sisate minute 1 sung dide in suun uh a, L. Pumlianpau, President, PTC GHQ in PTC flag kaipalh in presidential address gen hi. Aman nam itna ziak leh makaite kipiakzawhna ziaka PTC in kum 67 mel mu ahihdan gen in, heutu masate zahna  pia hi’n gen hi.
    Heutu masate’n June 27, 1949 in Lanva block  a om Tangnuam khua ah Paite National Council kichi phutkhia uh a, huaihun in Kaihlam tung leh Kaihlam nuai block in kikhen a, tuchiang in block 13  omta chi hi. Kum 1993 in politics ah khanlawhna thupitak om in, kivaipuakna lianzaw nomenclature dingin Zomi kipom in, Zomi pen national identity hong hihtak ziakin kum 2004 in Paite National Council leng Paite Tribe Council(PTC)  in khek a om hi’n gen hi. Singtanggam teng a suahtak theihna dingin thautawite’n India govt tawh kihouna (political dialogue) pan theita uh a, maban limchitak neithei ding in i om chi hi. Tuni’n PTC nuai a Paite Literature Society leh Paite Cultural Society banah block tuamtuam a makaite tel uh a, PTC in JAC against Anti Tribal Bills leh Zomi Council a palai dia a sawl te’n report pia in mi tuamtuam in thugen uhi.


Rationing Agent-te lungkimlou
Lamka, June-27: Thanlon bialsunga National Foot Security Act (NFSA) nuai a rationing agent te’n tuni zinglam dak 11:00 in Tuibuong a District Council Office ah Langkhanpau Guite, Chairman ADC/CCpur, a office chamber ah kimuhpih uh a, huai ah haksatna tuamtuam aneihte uh tun uhi. ADC Chairman in Agent-te haksatna tawh kisai in DC/CCpur thuzak in Dist Supply Officer sam a, DSO in theih siamlouh aneihte uh briefing nei hi. Chairman in agent-te kiang ah nasepna a kuapeuh ginomtaka nasem ding leh mipi tanding zah bikhiahsa omte ahithei tan a semsuah dingin ngen hi. Huai hun ah T. Paukhanlian, MDC/Ngazam leng tel hi.


TKSU in singara zuakna dukan khaksak
Lamka, June-27: Zenhang bazar a Bharat Hind Jalpan Hotel & Pan Corner ah mihing nek taklou khopa lauhui Singara khing leh hoihlou zuak  om chih ziakin Thadou Kuki Students Union (GHQ) in tuni’n hunchiam omlou din khaksak uhi. TKSU makaite gendan in huai hotel ah singgara (samosa) ne dingin Janglenphai Youth Club-te atut lai un hotel neite’n allu khing apiak uh ap(fungus) hi’n gen uhi. Huai phet in  Janglenphai Y/C te’n Hotel manager Robin Singh  (26) s/o Sanjay Singh of Paltan Bazar, Guwahati man in TKSU-GHQ khut ah pekhia uhi. Hotel Manager in tuabang  sunzom nawnlou dia a kichiam ziakin Bihari Assn, CCpur khut ah pekhia uh hi’n gen uhi. Dukan ah mihing adia lauhuai thei ding, kuaman a hunbeisa zuaklou ding in TKSU GHQ in theisak uh a, thupiak zuiloute a dawr uh khaksak banah a  trade licence uleng hihbei  hidin hi’n gen uhi.


Elect. Weighing machine kizangta
Lamka, June-27: District Council member te’n June 14, 2016 a sitting thupukna ah khawpi sunga sazuak leh dawr bawlte’n tehna dik omtheih nangin electronic weighing machine zatdi’n thukim uh a, huai tawh kiton in New Bazar a Voksa zuakte’n zangpan uhi. Ser (Weighing Scale) sangin zatnuam zaw hi’n azang te’n gen uhi.


Unit makai ding tel
Lamka, June-27: HSA JHQ CCPur makaih in tuzing dak 7:00 in HYA GHQ Office, Meeting hall ah HSA Rengkai Unit 2016 –’18 makai ding telna om a, huai ah President in Gulith Laltlinthang, Vice President in Darthansang, Secy. in Lungruolpui, Asst. Secy. in Robert Joute, Fin. Secy. in Rebecca Lalhlimzing leh Treasurer- Roselyn telching uhi.


CDEEU in 1st Conference nei
Lamka, June-27:Vimala Raina H/S ah tuni in CCpur Dist. Education Employees' Union (CDEEU) makaih in Principal/Head  Conference masa nei uh a, CDEEU constitution kumlui a amendment leng member-te zattheih dingin hawmkhia uhi.T. Goukhomang, ZEO in school function theihna din govt in panla a, semtute'n sepding, bawlding om hi'n gen hi. Lamka  a teacher omte'n mahni tate Private school ah school ikaisak ua, huai mahbang in singtang a om nu-le-pa tamtak Lamka zang hongtung zouloute'n leng atate uh school hoihtaka kaisak ding lunggulh leh ut mahmah uh ahihdan kuapeuh in theihchiat ding in a paikhawmte thuhilh hi. School function theihnang in bang ka hihdia? bang ka semdia? chih kuapeuh in ngaihtuah thak ding in ngen hi.
         Huai ah Conference ah CCpur dist. a govt school ah HSLC exam zawh tengin 1st. 2nd leh 3rd    topper te kipahman piakding; subject topper- teng award piakding; paybill ah DC in countersign a bawl zel tawpsak  ding; Selection grade leh Deptt Promotion Committee thu concerned authority ah tut  ding; Enrolment fee/membership fee tawh kisai HOD tungtawna staff-te theihsiam sak ding; ZEO/CCpur nuai a Utilization of Teacher thu akisaipihte kianga   bawhzui ding ding; Addl. Director(Education-S/Hills) kiang ah CDEEU in memorandum submit ding chih leh transferred and posting thu CDEEU in authority thuzak ding chi’n thupuk uhi


1-Day Workshop on Peace Building
Lamka, June-27: Thadou-Kuki Students' Union (TKSU), GHQ leh Indo-Global Social Service Society (IGSSS) saina in June 29, 2016 zinglam dak 11:00 in KKL Complex, Lamka ah ‘One Day Workshop on Peace Building’ program om ding hi. Program ah Rev. Dr. Kh. Khaizakham, (retd.) Principal, ECT in "Religious perspective on peace and reconcilation (Factors that Hinder Peace Building) chih leh Lalramsang Infimate, MCS/ADC Bishnupur in "Peace without justice is only a mirage" chih zang in thugenna nei ding hi.


JPO, Singngat leh Singngat
Vision 2020 in kipahthu puang
Lamka, June-27: JPO/Singngat leh Singngat Vision 2020 Implementing Committee te'n June 25, 2016 a joint meeting neih hun uah N. Thuamkhansuan, SDO/BDO Singngat leh staff te'n June 1, 2016 apat Singngat khua ah office function ziak un kipahthu puang uh a, office staff te mipi'n kithuahpih chiat ding in ngen uhi.


Vok leh Ak vulhdan sinsak
Lamka, June-27: Rural Aid Service (RAS) in NABARD nuai a Livelihood and Enterprise Development Programme tungtawn in tuni’n Tuibuong a RAS Office, Happy Valley ah Bokashi technology zanga  vok leh ak vulh ding dan tawh kisai training pan hi. Huai ah T. Boljang, Tuibuang DHQ, Bijang, Kamdou Veng, Boljol, Mata Lambulane, Tuibuang Zion Veng, L. Semol leh New Lamka Vengnuam akipan mi 30 kihel uh a, P. Khamsanglian, Progressive Farmer in sinsak in July 4, 2015 in zou ding uhi.


Vanamahotsava Week zat hiding
Lamka, June-27: Kum teng a July 1st week pen Observation of  Vanamahotsava Week in kizang gige a, July 1, 2016 zing dak 7:00 in Southern Forest Division, CCpur office te'n  amanbei in Tuibuong Forest Gate, Saikot/Muolvaiphei Centre leh Singngat Range ah singnou (seedlings) amanbei in mipi ading hawmkhe ding uhi. Singnou deiha ngetna pia te’ n  amau centre naipen ah singnou lachiat ding in Kham Suanmung Tawmbing, IFS, Divnl Forest Officer, Southern Divn./CCpur in theisak hi.


IMPHAL NEWS:
Khaw 2 kal buai: mi 1 si, curfew kipuan
Imphal, June-27:  Meltheihlouh mi 3 in April 11, 2016 nitak in nupite omna lak  thau a kapna uah nupi 10 leh naupang bangzahhiam liam a, Thoubal district a Nungei Metei village te’n Nungei Muslim village tawh kikawmtuahna lampi  fencing bawl in khaktan uh a, kha 3 nung tanpha in thubuai paitou zel in Nungei Meitei village te’n fencing a bawlna gei uah lampi dang a bawl ziak un tuni zinglam dak 10:00 velin khaw 2-te kal  buai in suang in kideng tuah uh a, thau tanpha a gin ziakin gamgi om  IRB e’n hihtheih a neihlouh ziak un police-te sap beh uhi. Police-te lut ding dal pawl om a,  police te’n mipi khamdaihna di'n tear gas, mob bomb leh thau bangzah veihiam kap uh a, huai ah Md. Arib @ Abo Khan (18) leh Md. Muhibur Rahman (25)-te kapliam khak hi uhi. Shija Hospital zuan a Arib puak ahihlai in lamkal ah si a, Md. Muhibur Rahman dinmun bel lauthawng huailou hi.Buaina khawksem  piankhak ding venna in Dist Magistrate/Thoubal in hunchiam omlou ding curfew puang hi.
     Akigendan in zan nitakin  RBI personnel leh Nungei Meitei village-te a kiselkhak ziakun fencing a bawlna gei uah lampi dang bawlin om a, tua ah police leh IRB-te tanpha lutsaklou uhi. Lampi bawlte khawlsak sawma galvan tawh vakuan-te leh IRB personnel-te kinawktuah uh a, IRB te’n blank fire bawl uh a,  police-te’n mipite khoudai thei mahle uh akhen chiang in khaw 2te  kibuluh sawm tuak uh hi’n Police te’n gen uhi.


United Gorkha Comm Manipur phutkhia
Imphal, June-27: Manipur a Gorkha om teng khaikhawm tu dingin Kanglatongbi a Rose English High School ah tuni’n United Gorkha Committee Manipur (UGCM) kichi phuhkhiak hi a, ILPS tawh kisai a bill thak draft hun ah Manipur a Gorkha community-te thu tawh kisai banah a lungkhamna-te uh taklang tu hiding a Gorkha women leaders, Social workers, politicians, bureaucrats, intellectuals te’n a phutkhiak banuah office bearer ding leng tel ngal uh hi’n kigen hi. President ding in Hari Prasad Nepal, Vice President- Bhumi Prasad leh Gen. Secy. – Shiva Kumar Basnet hi a, Joint secy. dia L.B. Adhikari, Karan Rai, Dillip Bhurtel leh Rajen Rai-te telkhia uh hi’n kigen hi. Hari Prasad Nepal in Manipur a Gorkha te’n orgn. tuamtuam nei mahle uh Gorkha community teng huamkha dia orgn. omlou a, Gorkha tawh kisai a panlatu din UGCM phuhkhiak hi’n leng kigen hi.


Antang 13kg lel tang uh
Imphal, June-27: Lamlai A/C ah Food Security Act tungtawn a AAY card neite’n kha 1 a antang kg 35 leh PHH’s card neite’n antang kg 5 mu ding uh chih himahleh 9-Lamlai Kendra A/C a AAY beneficiary te’n kha 1 in antang 13kg lel mu uh hi’n kigen hi. Hiai tungtang ah tuni’n press conference om a, huai ah Kh. Ibomcha, BJP member in 8-Lamlai Kendra A/C a AAY beneficiary mi 1012 leh PHH beneficiary mi 29744-te adia antang kg 351,84,140 bikhiah himahleh Ksh. Biren, Minister (CAF & PD) thupiakna dungzui in FSA agent te’n antang kg 92,586 khenkhia uh chi hi. April kha a ding antang hawm zawh hi nailou a, hiai tungtang ah beneficiary te’n a tan ding zah uh ngen mahleh uh agent te’n Minister in kg 13 lel hawm khe dia thupia hi’n gen uhi.


Imphal (E) a govt. office-te khaksak
Imphal, June-27: JCILPS a ex-convener lui Kh. Ratan tunga ngawhna omte beisak ding phutna in ‘JAC formed against the govt wanted tag to JCILPS ex-Convener Kh. Ratan’  a volunteer te’n tuni’n Imphal East a govt. office-te khaksak uhi. Nupi pawlte’n NIELIT Akampat, Bashikong leh Sangaipat a Sericulture office khaksak uh a, a thilphut uh tangtun masiah govt. office teng khak ding uh chi’n gen uhi.
    Huai lou in JAC Convenor Th. Subah in tuni’n media-te tawh kimuhna ah JCILPS ex-convener tungah ‘Wanted tag’ lakkhiak masiah kiphin om  ding  chi a, CM makaihna in zanhal a All political party meeting  ah a thilphut uh  genkhak hilou a, kuapeuh in JCILPS leh JAC-te atuam  a koihlou ding in theisak a,  JCILPS-te thuzak nung a nasep pankhia uh hi’n leng gen hi.


Transfer & Posting:
1.A. Subhash Singh, MCS, Deputy Secretary (DP) as Deputy Secretary (DP) & OSD (Admin)
Manipur University of Culture/Manipur Film Institute.
2. Nongthombam Sudip Singh, MFS, Dy. Director (PIC), Spl. Officer (MIS) & US (Cab/Fin) in addition as Dy. Director (PIC), Spl. Officer (MIS) & US (Cab/Fin) in addition and OSD (Fin)/ Manipur University of Culture & Manipur Film Institute.


TUNI THUPI:
“A bawngtalsa leh, avun leh a ek zaw, khawpaw lamah mei in na hal ding hi, khelhna thillat ahi.”  – Eksodas 29:14


EDITORIAL:
Khamtheih doudal mahni!
Galvantawi pawl khenkhat in khamtheih  naktakin doudal uh ahihdan puangsek uh a, veng leh mun tuamtuam a nupi pawlin leng a doudal uh chih i thei hi. Khamtheih tuamtuamte doudal mah nihang, himahleh bang paidan  (system) i zang ua chih theih haksa mahmah hi. United Nations (UN) panlakna in kum tenga  June 26 in ‘International Day Against Drug Abuse and Illicit Trafficking’  zat in om sek a, hiai ni in khamtheih-guihtheih in khawtang a hihsiatdan leh khangthakte’ tulel dinmun leh maban ding tawh kisai workshop/seminar leh program tuamtuam zat in om a, leitung ah khamtheih-guih theihin hizahta a i society khoihsia  ahi maw chih hon ngaihtuahsak hi.
    Tutung in  eilak ah huai thu serious taka lak  ahihlouhna ziak bel Anti-Tribal bills ziaka i buaina un panlakna tuamtuam a kizangte adin hun kidaihlou  hidingin ngaihsut huai hi. UN office on Drugs and Crime (UNODC) te saina in kum tengin khamtheih control na  tawh kisai in mipi vantang lakah campaign naktak in neih hisek a, UNODC official-te leitung gam tuamtuam a zinkualin khamtheih in khangthakte lah khoihkha nak mahmah ahihdan leh  naupang kumchinglou tanpha leng khamtheih sal a tang in hutkhiak zawh nawnlouh ding tamtak omhi.Naupang chikchik a tek melpu bang ahihkeileh overdose a si sim senglouh phial atam a omta chi uhi.
    Eilawi naupang chikchik tek leh vuai nemnum banga omte ihi ua, mite a nu-le-pate un a vui uleh eilawi naupang chikchik nu-le-pate’n aleh vui a omte ihi uhi. Ahi a, Vietnam, Borneo leh Thailand gamte paidan etton in neithei lehang bang achi dia chih  ut-huai hi. Huai gamte ah governments, organization tuamtuam  leh mimal in promotional events tamtak a neih ban uah, public rallies leh mass media involvement  tanpha om in, khamtheih i chih cancer chikhat ahi chihial uhi. School tuamtuam ah leng khamtheih a lauhhuaidan, huai sal a tangkha peuhmah a mawkmai a pawtkhe thei nawnlou ahihdante taklat in om a, sinlai naupangte’ adia a lauhthawng theihna khop uh program zat ngai ana hita e, chih hon ngaihtuah sak hi.
    International Day Against Drug Abuse and Illicit Trafficking kichi leitung gam tuamtuam ading a a manphatdan thutuam hileh i tenna uh Lamka khawpi mahmah adin leng poimawh leh kintak a sepsuah ding tamtak  a om ahihdan theih in om hi. Lamka khawpi sung ah naupang kumchinglou drugs hih tampi petmah om a, adiakin student numeite lak ah leng  uang mahmah a theih ahi hi. Lamka numei tamtakte’n beer bangleng zu chikhat ahi chi in pom ut nawnlou in a nemlua, a gim nam thamkei, kikham zoukei, ahihkei leh houchik in ngai ua, hard drinks mah pibawl zawta ua theih ahi maimah hi.
    UNODC in study a bawldan ngialin kum 20 val paisa in leitung ah mihing 200 million valin cocaine, cannabis, hallucinogens, opiates leh khamtheih chi tuamtuam hih zongsang uh chih hitel a, kum 2012 in bangzah tungtou ding hiam chih ngaihsuttham pha hi. December 1987 in UN General Assembly in khamtheih doudal ni(anti-drugs day) danin June 26 in  International Day against Drug Abuse and Illicit Trafficking a zat hihen a chih ziakun huai hun akipan tuni dong hiai Ni poimawh zat touh detin om hi. Ani zat leng  poimawh a, himahleh, huaisang a poimawhzaw, ahihleh bangchileh hiai khamtheih doudal zawh a om taktak ding ahiam chih ahi. I lak ah khamtheih-guihtheih hih ziakin naupang chikchik i na vuita ua, khangthakte’n nu-le-pate i vui ding hi awmtak, i nu-le-pa e un hon leh vuita ua, khang kidang mahmah chih mailouh gen ding omlou hi.
    Lamka khawpi ah tulel in drugs a business bawl bangzah a om dia chih suttham pha a, tamtakte’n kizoppih lianpipi nei ding ua, civil society tanpha in i va sawk ngamlouh khat le nih leng om kha ding uhi. Saptuam upa drugs a business bawl leng om ahi chi a gen leng om a, tualou in khamtheih zuak ziak mah a muhtheih a khang hulhul hunkhop om chilai uhi. Tu hun a khauhtak a i dal kei leh khang kibansam gawp a i om dinguh lauhuai mahmah hi. Drugs doudalna ah thathak lak ut-huai mahmah hi. Ahi a, bangchidan in i doudal ding hiam chih ngaihsut huai hi.