Manipur Express | August 12, 2016

HEADLINES:
GK Chin panlakna in NEC in full sanction bawl ding
Science Centre leh Helicopter Service ompahta ding
Lamka, Aug-11: ADC, CCpur a Education, Town & Industry lenlel M. Gouzamang Guite, EM ADC/CCpur in Guwahati leh Shillong pha hongtung kik tawh kiton  tuzingin Press-te kimuhpih a, huai ah CCpur Dist. ah tunung sawtlou in Science Centre leh Lamka leh Aizawl kikal Helicopter Service ompahta ding hi’n gen hi. Science Centre tawh kisai in Deptt. of Science & Technology leh MTDC official te’n June 9, 2013 in Science Centre mun ding New Lamka leh Lamzang khua enkhe ngei uh a, Ukhrul dist tawh hihkhawm ding chih himahleh gam ding fellouh ziakin process zekai hidan in gen hi. Science Centre tawh kisai North Eastern Council (NEC) ah DPR piaklut hita in technical checking leng zawh hita a, DPR tawh kisai bawldik ngai omte leng hihfel a om in, Aug. 8, 2016  in G.K. Chin, IP & TAFS, Financial Adviser, NEC kiang ah pelut hidan in gen hi.
    Guideline dungzui in NEC Project himhim State in 10% leh NEC in 90% pawkhesek mahleh GK Chin panlakna tungtawn in CCpur Dist. a Science Centre bawlna ding State Govt. sawklou a NEC in pawkhe vek dinga chiam hi’n gen a, nasep leng patpah hiding in gen hi.
    Lamka leh Aizawl kikal Helicopter service om theihna dia Aug. 10, 2016  zinglam dak 10:45 in Guwahati ah Pawan Hans Company tawh 2veina dingin Vijay Pathiyan, General Manager (Eastern Region), KS Manilal, Joint Director (Safety) leh Sarabjit Singh, Joint General Manager (Engineering) banah Siamzamuan Valte, Dy. Director of Airworthiness, Civil Aviation Department, DGCA, Ministry of Civil Aviation, Govt. of India telin kihouna nei uh a, huai ah Halipad bawl dingdan, rate ding leh operational cost tawh kisai telin thu tuamtuam genkhawm in company apan hih theihlouhna ding omlou ahihdan kamteh uh a, sepsuahna ding tawh kisai genkhawm nawn ding uh hi’n gen hi.

Dalit te’n Ahmedabad-Una tan lampi zui ding
Lok Sabha ah Dalit mite bawlsiatna genkhawm in om
New Delhi, Aug-11: Indian caste system a nam niampen Dalit-ten bawlsiatna atuahte uh tawh kisai Lok Sabha ah tuni’n genkhawm in om hi. Nambing khat tung a thagum suah a hiamgamte zungkalh hidi’n central government thusuakin gen a, huai ding tawh kisai in kum 2 paisa akipan panlakna tuamtuam om hi’n taklang hi. India milip 1/4  luahpha Dalit mite’n lauhna tawh hinkhua azat un Lok Sabha member-te lungphawngsak a, Dalit mite humbitna dia government in kalsuan beh ding in political party tuamtuam apan member-te’n ngen uhi. Dalit namniamte thuakna pen political thil a vuahzawh tupna tawh party dang mawhsakna dia zat louh ding hi’n BJP makaite’n party dangte theisak uh a, thiltung ngaihkhawk huai mahmah ahihziakin political game maimai a zat ding hilou chi uhi. Dalit-te thuakna tawh kisai Opposition party te’n ruling government ziak hi’n ngawh uh a, Modi government in Bawng humbitna ding a tangkoupih nung in Dalit community te’n hiamgamna tamtak thuak beh uh chi uhi.
    Dalit makai poimawh BSP chief Mayawati in Prime Minister kiangah ngetna bawl in, a mite thuakna Parliament a Modi in tangkoupih ding in ngen hi. Mayawati in Parliament kong a agendan in, Modi in Parliament pawlam ah Dalit mite gupna thu a gen khiak theih leh, bangziak in Parliament sung ah tangkoupih ngamlou hiam chi’n dotna bawl a, Dalit mite gupthu puan sangin, amaute adia siatna omsakte mankhe zaw ding inleng Mayawati in Modi theisak hi.
    Gujarat a Dalit pawlpi poimawh Una Dalit Atyachar Ladai Samiti makaih in Ahmedabad apan Una kikal km 350 tan ah August 15 in Dalit mite’n lampi zui ding uh a, state tuamtuam a bawlsiatna athuakte uh beisakna dia panla di’n central government nget sawm uhi. Dalit makaite gendan in Bharatiya Janata Party (BJP) government omna munte ah bit lou uh a, central leh state government in kintak a pan alak keileh Dalit milip omna teng ah patauhna beilou ding chi uhi. Amaute’n lampi azuih hun un railway line teng khaktan ding uh a, kikawmtuahna lampi poimawh teng leng khaktan hiding hi. July 31 inleng Ahmedabad ah Dalit mite’n kiphinna thupitak nei uh a, huai hunah mi 20,000 val kihel uhi.


LOCAL NEWS:
70th Independence Day lopna
Lamka, Aug-11: District Administration, CCpur Dist. saina in hongtung ding Aug. 15, 2016 in Tuibong Peace Ground ah 70th India Independency Day lopna om ding hi. Hiai hun in Lunminthang Haokip, IAS, DC/CCpur Chief Guest a pang in India flag kaipalh ding hi.


T.K Simte in Natl. Deworming Day hong
Lamka, Aug-11: T.K. Simte, Asst Commissioner to DC/CCpur in tuni zinglam in CMO Mini Conference hall ah DC/CCpur sik-le-tang in 2nd Round National Deworming Day 2016 hong hi. Aman agenna ah tukum in state 29 ah National Deworming Day kizang hi’n gen hi. WHO thusuak dungzui in India ah Soil-Transmitted Helminths (STH) tampen a, naupang kum 14 nuailam millin 220-te hut (worm) vei uh hi’n gen hi. Naupang kum 19 nuailam te’n hut (worm) aneih chiang un an kiningching nelou (malnutrition) om a, huai in taksa leh lungsim sukkhak ziak in hoihtak in laisim theilou uh chi hi. Hut (worm) apan kivenna ding in damdawi nekkhia hilou in khut (hand) hoihtaka silsiang banah kim leh kiang sianthouna poimawh mahmah hi’n gen hi.
CMO in National Deworming Day lawhchinna di’n Health Deptt kia hitheilou a, kuapeuh pangkhawm chiat ding in ngen a, 1st round Feb 2016 ah damdawi nekhalou naupangte leng tutung a kipiak vek sawm hi’n gen hi.


Nupi khat in ta 3nei, 1 si
Lamka, Aug-11: Dist. hospital a maternity ward ah zan in Niangboi (23) w/o Lunminsang of  D. Phailien a om in naungek thum (triplets) nei a, tuzing dak 7: 00 velin khat si hi. Nurse-te gendan in, naungek masapen sun dak 12:05 in piang a, minute 19 nung dak 12:24 in 2na piang in minute 11 zawh dak 12:35 in 3na piang hi’n gen uh a, apiang tung un etkoltheih uh hi’n gen uhi. Naungek 3-te ahihleh numei ngen hi uh a, masapen kg 1.6 in gik a, 2na leh 3na ahihleh kg 1.7 tuak in gik uh a, Neonate Ward ah Oxygen pia in etkol hi uhi.
Naungek 3na in nak haksa a sak banah achidup in tuzing dak dak 7:00 in si a, 1na inleng nak haksa sa a, 2 ahihleh hoihlel hi’n kigen hi. Naungek nu gendan in, Ultrasound ah nau phik (twins) om ahihdan thei a, himahleh naungek 3 omlam ultrasound in mankhelou hi’n gen a, ata 2na hita hi’n gen hi. Dist. hospital ah nau phik piang zeuhzeuh mahleh triplet bel om ngei nailou hi’n kigen hi.


Gari 2 kiphutuah; mi 2 liam
Lamka, Aug-11: Tedim Road a UCO Bank kong ah tunitak dak 5:15 velin New Bazar lam manawh Pulsar (MN02A/6822) leh New Lamka lam manawh Jupiter (MN02B/0386) kiphutuah uh a, gari a tuang-te liam tuak in Imphal ah refer in om uhi. Pulsar hektu Kamzagin (23) s/o Songchinhau of Mualsan hi a, Jupiter hektu Ningzakim (38) d/o Darching of  Dorcas Veng hi a, alu tuak uh liam in khaw phawklou uhi. Gari 2-te malam tuak sia in CCpur Police te’n la in station ah kem uhi. Hiai mun ah avangkim in accident om sek hi'n kigen hi.


Mobile Traffic Court sai ding
Lamka, Aug-11: CCpur Dist. Legal Services Authority (CDLSA)  te’n Aug 13, 2016 zinglam dak 11:00 apan in CCpur Police Station mai, Tedim road ah “Mobile Traffic Court” sai ding uhi. Huai ah gari tawh kisai check dingte- driving license, kum chinglou gari hek, gari’ registration certificate, insurance certificate, registration No., gari hattai lua (excessive speed), helmet, gari hek kawm a mobile phone zangte hiding hi. Kuapeuh 2-wheeler gari ataite’n helmet khu ding, valid driving license, gari documents  leh gari registration plate dawksak (display) ding in CDLSA te’n ngen uhi.


VA/Hausa-te kimuhpih
Lamka, Aug-11: Ngursanglur, ex-MLA in atenna inn Lighthouse Lane ah tuni zinglam in Vangai Area Authority/Hausa-te kimuhpih in annekhawmpih hi. Huai hun ah Lienkamlo, Vice President  BJP CCpur leh Lalnghaklien, President, BJP Tipaimukh Mandal te’n leng uap uhi.   
        Ngursanglur in a genna ah inam leh gam masawn theihna ding in Village Authority/Hausa-te leh MLA pankhawm poimawh dan naktak in gen a, Govt panpihna in Tipaimukh bial ah development work lutte V/A, Hausa-te enkaitu leh hoihtaka semsuah saktu hiding in ngen hi. Maban ah 11th Manipur Legislative Assembly Election om hun ah amah leng candidate sawm nawn ahihdan gen a, Tipaimukh A/C mipi’n hehpihna pia a, kithuahpih ding in ngen hi.


SDPO makaih in rehearsal omding
Lamka, Aug-11: H. Basulal Singh, MPS, SDPO/CCpur makaih in Aug 13, 2016 zing dak 7:00 in Tuibuong Peace Ground ah Independence Day parade rehearsal omding hi. Huai ah Parade contingent atel ding school 23 banah contingent 32te telvek ngai ding hi’n kigen hi.


Malaria Deptt te’n fogging kap
Lamka, Aug-11: Malaria Deptt/CCpur te'n tuni nitaklam  in Rengkai Bible Hills a Alpha & Omega leh Hope Baptist Academy ah JE natna apan kivenna ding in meikhu (fogging) kap uhi.


EBC Workers Pensioner Fellowship
Lamka, Aug-11: EBC Dorcas Jubilee Guest House a Mini Auditorium ah Aug 13, 2016 zinglam dak 10:00 in EBC workers pensioner te’n fellowship leh thumkhawmna neiding uh a, pensioner-te paikhawm chiat ding in akisaipih te’n ngen uhi.


DRDA documentary honna om ding
Lamka, Aug-11: J.C Ramthanga, IAS, Principal Secretary (RD & PR) khuallian apang in Aug 13, 2016 zinglam dak11:00 in Tuibuong/Tuibong a DTC Hall ah DRDA Documentary hong ding hi. Huai ah Guest of Honour in Brig. Ajay Kumar, Commander 27-Sector pang ding a, hiai hun in DRDA documentary show leng om ding hi.


Children ward a ding Nebuliser pia
Lamka, Aug-11: Sangboi s/o L. Muana of HQ veng in tuni in Dist. hospital a Children ward a zat ding Nebuliser khat ward in-charge khut ah pia hi. Hiai Nebuliser bel Rs. 2000 val man hi a, Patient-te awlmawhna ziaka pia hi’n Sangboi in gen hi.


Kholai Guam hah siangsak
Lamka, Aug-11: Lanva MDC T. Khaikhomang, Chairman, Finance Committee, ADC/CCpur in Tangnuam mipi khualna in tuni’n Tangnuam field gei a ‘Kholai Guam’ kichi JCB khat zangin hahsiang sak in keklian hi. Tuktui luan hun in hawktui luangkhe theilou a field lai ah tui dim in EBC Pastor Quarter nuai tanpha ah tuivung den in namse mahmah hi’n kigen a, damtheihna tawh kituaklou banah thoukang adia mun poimawh hiding ahihman in Tangnuam EBCC in ngai poimawh in hausa tungtawn in bialtu MDC kiangah a, bialtu MDC inleng JCB khat zangin hahsiangsak hi.


Thanlon ICDS Project makai ding tel
Lamka, Aug-11:Thanlon ICDS Project nuai a Anganwadi Worker leh Helper te’n Simveng a Simte Inn ah tuni’n meeting nei uh a, huai ah Thanlon Anganwadi Workers & Helpers Association kichi tungding thak in Upa G. Khupchinthang, Adviser makaih in member paikhawmte’n  2016-18 sung makai ding tel uhi. Assn. a makai thakte ahihleh President in Hoihneingai, Vice President in Helena Ching, Secy in Ngaihauching, Asst. Secy  in Chinglemkim, Finance Secy in Manhoihching leh Treasurer  in Sawmi telching uhi.
    Meeting ah honorarium tawh kisai telin thu tuamtuam genkhawm uh a, member teng atel ban uah Adviser dia azat uh Mangkhanlal Guite leh Thiankhosiam te’n hasotna thu gen uhi. Thanlon ICDS Project nuai ah Anganwadi Centre 144 om in Worker leh Helper kigawm  288 om hi.


SUUNNA:
Lalbiaklian Tombing (45) s/o (late) Suakvung @ Taipi of  Pangzawl, tuni zing dak 6:45 vel in cancer in si a, nitaklam in Pangzawl hanmual ah kivui hi.
Damneiching @ Damnu (57) w/o Th. Kaikhanthang of Simveng, tuni sun dak 12:00velin sungna in si a, Aug 12, 2016 in Simveng hanmual ah kivui ding hi. Damnu’ bel Guwahati ah ki-ensak, innlam zuanlai Dimapur kim lak ah damzoulou a si hi’n kigen hi.


IMPHAL NEWS:
Zinling thuak-te’ inn kibawl hong
Imphal, Aug-11: Manipur ah Jan 4, 2016 ni a zinling hun ah Senapati district a Chalbung leh Charhajare village a inn kisia bawlthak-te tuni’n Chief Guest apang CM. O. Ibobi in hongkhia hi. Functional President in Dy. CM Gaikhangam pang a, Guest of Honour in M. Okendro Singh, Minister (RD & PR) leh Ngamthang Haokip, Minister (IFCD)-te pang uhi. Huai hun ah CM in a thugenna ah Jan 4, 2016 ni a zinling hun ah sub-division 7 sungah inn 1,055 kisia a, inn 622-te kise zek hi’n gen hi. Manipur ahihleh leitung pumpi a Earthquake prone area Zone-V ah om kha ahihziakin inn banah thildang bawl hun ah pilvan ngai hidan in gen hi.
    Huailou in CM in zinling hunah inn kisia-te leh panpihna tuamtuam hawmkhiak hun tawh kisai in photo gallery etkhiakna nei a, hiai hun Nemcha Kipgen, MLA, Sadar Hill ADC a Vice-Chairman leh member-te, Principal Secy., RD & PR; Secy, Relief & Disaster Management, DC/Senapati, SP/Senapati leh District Level Officer te’n uap uh hi’n kigen hi.


Blood donation Camp om ding
Imphal, Aug-11: SSPP Lamphel Branch leh YPA Lamphel Unit-te saina in Lamphelpat a RIMS Hospital ah Aug 13, 2016 in ‘One Day Blood Donation Camp’ om ding hi’n gen uhi. Akigendan in mun tuamtuam apan Imphal area ah damlou omte’n sisan poimawh hun ah haksatna a tuah sek uh ngaih poimawhna ziak a blood donation camp sai sawm hi’n gen uh a, camp hunsung a sisa pe ding in mi 50 vel in min pelut uh a, mi phatuam kuapeuh mah in sisan piak theih ding hi’n leng taklang uhi.


Kumchinglou 2 telin numei 3 hunkhia
Imphal, Aug 11: Thoubal Police team te’n Myanmar gam ah puaklut (traffic) ding naupang kum chinglou 2 telin numei 3 hunkhia uh a, thiltung tawh kisai a ngawh a om Thangkhumi Mizo @ Thangi (56) w/o (late) Sanga Mizo of Moreh Ward No. 3 leh Driver Lalbiakliana (50) s/o (late) Vanvel Thanga of Khawmawi village tulel in Ngathel veng, CCpur ah omte Kakching Lamkai ah tunitaklam dak 4:15 vel a mankhia uh hi’n kigen hi. Hiai thu tawh kisai in Thoubal SP Office a Conference hall ah tuni’n press meet om a, huai ah Rakesh Balwan, Addl. SP (LO) in a thugena ah Aug 10, 2016 zinglam dak 3:00 velin Ccpur district apan Moreh leh mun tuamtuam ah naupang puakkhiak sawm om chih thuguk a muh uh dungzui in
Kakching Lamkhai ah vehicle check point bawl uhi. Zingsang dak 4:15 velin ECCO (No. MN01G-5273) a checkna uah muangmawh mi 2 mankhia in kum 15-20 kikal a upa numei 3 hunkhia uh a, thiltung tawh kisai in Women Police Station ah case chiamteh in om a, Court in mi 2-te ni 10 sung police custody a om ding in thutan khum chi hi.
Aman agenzelna ah Thangkhumi in Sesei Haokip  (36) of HQ veng CCpur, Lalrohlul of Appolo veng, CCpur-te tawh kithuah khawm in mundang adi’n numei pawkhia uh chi’n kipuang a, huai banah Sangpui of Kongpui village, Sanghi of Thingkangphai leh Mary of  CCpur-te leng agent in pang uh a, Tamu a Puia kichi kiangah numei-te pesawn uh a, huai apan Yangoon (Rangoon) ah Bautlei kichi in numei-te om nang banah  passport leh visa bawltawm saisak a, District police dang-te tawh pangkhawm a trafficker-te list banah numei puakkhiak a omte list bawlkhe ding hi’n gen hi. Aman a genzelna ah hutkhiak a om numei-te thudotna apan in singtang bial a innkuan haksa diakte Singapore ah sepna piak ding chiam in kum 14-20 kikal a upa numei puakkhiak innkuan-te Rs. 5,000 pia uh a, numeite pau lam ah basic training zilsak zawh nung in Yangoon apan Bangkok leh Trafficking industry-te demand tungtawn in mun tuamtuam adia puakkhiak hi uh a, hiai tungtang ah mipite pilvang ding leh kikhemna ah puklou ding a theihsak hi uh a,  trafficking agent theikha te’n police-te theisak ding in leng ngetna bawl uhi.


NH-102 ah bandh kipan
Imphal, Aug-11: JAC against the murder of M. Jamkholal Zou @ George te’n NH-102 (Imphal-Moreh) ah indefinite bandh a puang uh tawh kiton in tuni zingsang in H. Kotlenphai village ah bandh supporter te’n lampi khak in banner leh placard tuamtuam tawi uh a, commercial leh private gari tai muh ding omlou hi.  Himahleh bandh in emergency service, media, damlou pua gari-te leh sahkhua tawh kisai a thil-te huamkha lou hi’n gen uhi. Hiai thu tawh kisai a JAC member te’n media-te tawh kimuhna hun ah kha 2 paisa a FIR khiaklut himahleh a kisaipih thuneite’n tunitan a tualthat-te matkhiakna dia panlakna a neih louh uh mawhpaihna a bandh puang uh hi a, mawhna nei mimal leh organisation-te tungah action lak masiah SoO signatory group-te lakah kithah thuahna leh muanna banah bitna suksiatna bei lou ding a, state govt. in panlak masiah kiphinna paitou ding hi’n leng taklang uhi.


TPLA Home Secy galvan tawh man
Imphal, Aug-11: PIB (Defence) thusuak in a gendan in Imphal West Police Commando leh 25-A/R combine team te’n thuguk a muh uh dungzui in zan in Keithelmanbi ah TPLA a self styled Home Secretary mankhia uh hi’n kigen hi. Mat a om Nehmang Singsit @ Mang of Keithelmanbi, Senapati district hi a, amah apan 9mm pistol 1 leh tang 3 muhkhiak hi a, a kipuang khiakna tungtawn in a inn  huangsung ah Ak-56 1 muhkhiak hi’n gen uhi. Huai hun ah nupi leh naupang pawl-te tawh kinawk tuahna piang a, Sekmai police station ah pekhia uhi.


Transfer & Posting
(I.A.S. OFFICERS)
1. Jacintha Lazarus, IAS, Deputy Commissioner/Senapati as Special Secretary (Health &  Family Welfare).
2. C. Arthur Worchuiyo, IAS, Director (Education-U) and Chairman COHSEM as Deputy Commissioner/Senapati.


TUNI THUPI:
“Pathian thuhilh guk na za ta hia? huan pilna na kikoih hoih hia?”
- Job 15:8


EDITORIAL:
Salphate’ Ni: Patriot’s Day
Zinghal(August 13, 2016) in Manipur ah mihangsante’ Ni(Patriots Day) zat hiding hi. Hiai ni in salphate phawkthakna leh theihgigena dingin program tuamtuam zat hisek hi. Patriots day ahihleh i theihchiat bang un state holiday ahihban ah, official program tanpha zat in om a, salphate theihgigena dia hansuang leh statue kibawlte ah pakvui piakna omsek a, tutung inleng pak piakna neih hinawn ding hi. Manipur gam leh leitang a dingin Bir Tikendrajit, Thangal General, Niranjan Subedar, Kajao leh Chirai Naga te’n August 13, 1891 in hinna ana pia uh a, British te’n mulkimna bei in ana khailum uhi. Amaute theihgigena ding in kumteng in August 13 pen Manipur ah ‘Patriots Day’ chi’n zat ana hisek hi.
    Manipur ah ni poimawh bik bangzah hiam chiamteh in ana om a, tua mihingsante sihni Patriots Day gen louh in, Kuki black Day, June 18 uprising day leh day chi tuamtuam tamtak om hi. Tua teng banah, helpawl (revolutionary) tuamtuam te’n leng amau a chiat Martyr’s Day kichi ana nei uh a, a mihangsante uh gam-le-nam adia hinna ana pete phawkgigena in ni khat mawngmawng sehtuam sak in hun ana zangsek uhi. Eilawi adingin bel August 31 pen Patriots Day ahi ka mawhkei ding chi phot ni.
    August 13, 1891 in Manipur gam leh leitang itna ziak in heutu 5 te’n hinna ana pia uh a, amaute theihgigena ding mah in Thangal Bazar, BT Road leh min tuamtuam piak in om uhi. Mihingte’ sisan (blood) kichi manpha mahmah in, sum le van in sisan khekkhe theilou a, sisan khenna ding in sisan mah poimawh hi.
    Christian dan tak in gen lehang, Jesu Christ in mihingte /mikhialte tan dingin leitung ah hong pai a, mihingte a tatna ding in sisan mah hong seng in cross ah kilhlup in hong om hi. Jesu sisan in mikhialte a hondam chih pen thudik sel vuallouh ahi hi. Christian gingtute adingin Jesu pen mihangsan a chiamteh ahi a, amah sihni pen Good Friday dan in i zangsek uhi.
    Mihingte’ hinna leh sisan a manpha mahmah a, amawk mai a sisan seng ngap kuamah a omkei chih pen thudik hinawn a, huai teng lakah sisan tanpha thoh ngam a gam leh nam adia kuankhia/kipekhia mihangsante pen a mawkmai a koih theih hilou in zahna piak ngeingei ding ahi. India in British-te apan zalenna a ngah ma in Subhas Chandra Bose makaih in Indian National Army in India khua leh tui zalenna ding in sisan-naisan tawh ana sual uh a, huai mah bang in Manipur ah leng Britishte nawhkhiak ding deihman in Thangal General lawi in pan nasatak in ana la uhi.
    Mihangsante hong kipatkhiak chiang un, mi dawilokte hihngam louh tanpha hih ngam in, a gam le nam itna uh lian mahmah in sih ding pen huphulh vetlou in nasem uhi. Mahatma Gandhi in Non violence kichi tangkou pihpih mah leh Violence kichi a poimawhna hun om a, zalenna sualna kong ah Violence leh Non violence pen a kituak a a paikhawm helhel (parallel) ding ahi. Violence (thagum) a poimawhna mun a tam mahmah bang in non-violence (thagum suahlouhna) leng a poimawh hun a tam mahmah zel. Indian National Army apan bang ahih kei leh Manipur apan zalenna sualna ah bang hinna pe ngam a a sisan uh thohkhe ngam heutu/makai leh nam sepaihte om kei le uh India in tuni tan Zalenna a mu diam chih dot tham ching hi.
    Zalenna sualna ah sisan naisan poimawh a, tha-le-zung banah sum-le-pai tamtak kisam hi. Mihangsan omlou in zalenna om theilou a, mihangsante sihna gah in mipi ading in zalenna tunsek hi. Huaiziak in eilawi inleng la ah Phamsa mihangte hon itlua ung e… i chih pian deuh un, mihingsan leitung honna paisan sate pen i khangthu a mang nawnlou dia chiamteh tuak mahmah hi a, amaute phawkgigena dingin, lampi min hia, khaw min hia, lei (bridge) min hia, bazar min ahihkei leh mun poimawh deuh amau min a tapsak a, amaute adia ni khat mawngmawng hun i zat uh poimawh hi. Mihangsante’ phamna hang in eite’n zalenna i mu uhi.