Manipur Express | August 22, 2016

HEADLINES:
Manipur adia numei Governor masapen kichiam
Imphal, Aug-21: Dr. Najma A. Heptulla tuni zinglam dak 11.30 in Raj Bhavan a Darbar Hall ah Manipur Governor thak dingin kichiam hi. Manipur High Court a Acting Chief Justice  Rakesh Ranjan Prasad in Dr. Najma kichiamsak a, Dr Najma A. Heptulla bel Manipur adia numei Governor masapen ahih banah Manipur Governor 18na ahi hi.
    Governor thak in kichiamna a neih zawh in amah zahna in Guard of Honour om a, Media-te’ dotna Governor in a dawnna ah Manipur masawnna ding leh khantouhna dingin panlak theihna tenga panla ding hi’n gen hi.

    Governor in Manipur mipi deih leh taksap bang hihiam chih leng ngaihven ding hi’n gen a, Manipur kichi India khawpi Delhi akipan gamlapi a om himahleh a lungsim ah ngaihnatna a neih ziakin naichik a om bangin ngai hi’n gen hi. India ading in Northeast bial mun poimawh mahmah hi a, huaimun a amah hong omkhak vangpha kisa mahmah hi’n leng gen hi. Manipur gam culture tawh kisai a hausa mahmah hi a, culture a Manipur hauhsakna India gam a state tuamtuam leh leitung pumpi a minthansak a utdan Governor in gen hi.
    Tuni a Governor thak kichiamna hun ah Chief Minister O Ibobi; Assembly Speaker Th. Lokeshwar; Deputy CM  Gaikhangam; Minister dangte;  Dr. Th. Meinya, MP (Lok Sabha); Thangso Baite, MP (Lok Sabha); MC Mary Kom, MP (Rajya Sabha);  MLA-te, Chief Secretary; Director General of Police banah state govt a senior official leh police-te leh army-te tel uhi. Kum 76 a upa Dr Najma A. Heptulla bel Rajya Sabha a Deputy Chairman 2vei alet banah Union Cabinet Minister (Minority Affairs) lenlai July 12, 2016 a kitawp hi’n kigen hi. Amah Aug 17, 2016 in Manipur Governor len ding a guan(appointed) in om a, aman Meghalaya Governor lenlai Manipur Governor dinmun tawh lenkhawm V Shanmuganathan khengkhia hi.
    Dr Najma April 13,1940 in tulai a Madhya Pradesh state khawpi Bhopal ah piang a, apa Syed Yusuf Ali hi a, anu Fatima Yusuf Ali hi a, Bhopal a Motilal Vigyan Mahavidyalaya (MVM) a laizil masa a, Ujjain a Vikram University  akipan Master' of Science degree in Zoology leh  Ph D in Zoology (Cardiac Anatomy) degree la hi.  Kum 22 a upa ahih in Zoology (Avian Hearts) akipan doctorate degree la hi. Kum 1966 in Akbarali A Heptulla tawh kiteng uh a, tanu 3 nei uhi. A pasal kum 75 ahih Sept 4, 2007 in New Delhi ah si hi. Dr Najma in BJP Vice President dinmun a let ngei banah kum 1986-2012 sungin Rajya Sabha member in 5vei pang hi.


LOCAL NEWS:
Mary Kom in Festival uap ding
Lamka, Aug-21: State Level Manipur Pineapple Festival saina in  Aug 27, 2016 in Khousabung ah State Level Pineapple Festival om ding a, huai ah International boxer MC Mary Kom, MP (Rajya Sabha) khuallian a pang in huai Festival hong ding chihthu om hi.
    Pineapple grower (lengthei ching)te adingin ‘Pineapple Contest’ om ding a,1st position Rs, 40.000; 2nd position Rs. 30,000 leh 3rd position Rs. 20,000 kipahman piak hiding uh chi’n Manipur Pineapple Festival  a Working Chairman Seilenmang Khongsai, MDC in gen hi.


Nghathal Meitei biakinn hongkhia
Lamka, Aug-21: PCI (R)/PMF saina in tuni sunnung in Rev. Khen P. Tombing, Chief  Co-ordinator, PCI (R) in Nghathal leh Kanaan Veng gamgi zula PCI (R) Nghathal Meitei biakinn (Hosanna Meitei Singlup) hong a, Rev. M. Khamlianmang, Coordinator (Missions) PCI (R) in Pathian kiangah lan hi. Huai biakinn ah tulelin innkuan 7 apan member 30 val om a, kum 2012 a kiphutkhia hi a, amaute Evangelist Rajesh Singh etkaina nuai a om hi uhi.  Rev. Khen P. Tombing in message gen a, Elder H. Thuamson, Chairman PMF in leng thugen a, Elim PYF  leh Rayburn PYF te’n lasa uhi. Nghathal Meitei biakinn bel Pastor quarter tawh kithuah in tukum April 2016 a kilam pan  ahi.


Adviser in PHC  2 enkhia
Lamka, Aug-21: Dr.  H. Bushan, Adviser, System Resource Centre,  Ministry of Health & FW, Govt. of India zan in Lamka hongpha a, Singngat leh Behiang PHC enkhia hi.  Aman Dist. hospital pha in Medical Supdt. makaih in hospital authority-te kimuhpih in ward tuamtuam enkhia a,  huaizawh Imphal ah kik hi. Aman hospital sianthou kidemna Kalyakalp (Cleanliness Award)  tawh kisai a hongzin hi a,  Manipur ah Dist. Hospital tamlou ahih ban ah Award paidan khen a om in  Hospital level beisak hi a, tu’n health centre (PHC/CHC)  level ah sai hiding hi. Dist. a health centre tuamtuam te'n amau level in  sianthouna tawh kisai panla uh hi’n Med Supdt in in gen hi.


Jr MCS 2 in leave la
Lamka, Aug-21: Deparmental exam ding ziakin DC/CCpur office ah Jr.  MCS 2-Lalthanzam Fimate, BO/HQ leh Jangminlen, Judicial te’n Aug 22,2016 apan kha 1 sung leave la uhi.


Mobile kigumang 5 ngaihven theih
Lamka, Aug-21: Police te’n tuni zinglam in New Bazar area ah khamtheih hih hiding a ginlelh mi bangzah hiam frisking bawl uh a, khamtheih hihte gukmang mobile 6 mukhia uhi. Tuni’n mobile gukmangsak a om mi 1 in a mobile ahihdan proof in Police Station ah lakhia hi. Police te’n touch screen mobile phone 5 kemlai uh a, mobile phone kuate hiam gukmangsak te’n amau’ mobile mah ahi chih proof na tawi in Police Station ah claim theih ding hi. Touch screen mobile phone 5 te bel Samsung Galaxy J2 (gold colour), Samsung Duos (black), Samsung Galaxy On5, Letv (gold colour) leh Micromax E471 (white colour) ahi.


AMWTSCPCM-te meeting ding
Lamka, Aug 21: All Manipur Written Test Successful Candidate of Police Constable Male, 2013 apan thukimu dan in Manipur govt in kum 2013 a Police Constable lakna ding PET, Written Test leh Viva Voce zawhsa teng cancelled thak a, Aug 30-Sept 22, 2016 sung a neihthak vek ding a order suah thu ah Aug 22, 2016 sun dak 12:00 in KKL complex ah Emergency/Joint meeting sam uh a, member te, nu-le-pate telding in ngen uhi.


Earthquake Disaster training
Lamka, Aug-21: Deptt. of Relief and Disaster Management, govt of Manipur saina in Aug 22, 2016 zinglam dak 10:00 in District Council Office  a Conference Hall ah Earthquake Disaster/Structure Behaviour/Building Bye-laws" tawh kisai training omding hi. Huai ah MDC member 26 teng telchiat ding in  Henlianthang Thanglet, CEO i/c in ngen hi.


No Helmet No Petrol zuih hiding
Lamka, Aug 21: Ministry of Road Transport & Highways, govt of India in 2-wheeler gari atuang te’n helmet akhuklouh ziak ua accident hun ah si leh liam-te ngai poimawh  a, huai thu ah M. Lakshmikumar Singh, Commissioner (Transport), Govt. of  Manipur in Motor Vehicle Act 1988 a section 129 provision in 2-wheeler hek leh a tuang te’n BIS standard tawh kituak a helmet khuk ding leh Central Motor Vehicle Rule 1989 a Rule 134 (4) (f) ah 2-wheeler manufacture/dealer te’n gari lei-te helmet 1 a piak ding chi’n thusuah bawl hi. Sept 1, 2016 apan 1st phase in Imphal East leh Imphal West a IOC, BPCL, NRL Retail outlet/station-te ah ‘No Helmet No Petrol’ dan zuih hiding a, 2nd phase ah Dist. tuamtuam ah zuih hiding in taklang hi.


B. Kaljang leh G. Monlian Unit veh
Lamka, Aug-21: YPA GHQ, YPA Lamka block leh YPA New Lamka block makai te’n tuni sunnung in YPA B. Kaljang Unit & G. Monglian Unit veh in motivation program nei uhi. Huai ah YPA Lamka Block te’n G.Monglian Unit-te’ zat ding Sound System hoihtak pia uh a, T. Khailianthang @ Thangte, President YPA GHQ in pekhia hi.


SUUNNA:
B. Liankhokai Buansing (47) s/o B. Khaikam of  Vengnuam South, New  Lamka tuzing in cancer ziakin si a, sunnung in YPA hanmual, New Lamka ah kivui hi. Amah Pastor Thangngaihmung & Rev B Chinlamthang’ te sanggam (pianpih) ahi hi.
Robert Ngullianthanga (24) s/o (late) Khailiana of  Thingkangphai, zan nitak in akhaw hanmual ua waiting shed ah awklum a muhkhiak hi a, tuni’n kivui hi.


IMPHAL NEWS:
Bandh ding tawp kik thak
Imphal, Aug-21:  State govt. in kum 2013 a All Manipur Written Test Successful Candidate of Manipur Police Constable Male 2013 (AMWTSCMPCM 2013) tawh kisai in recruitment process teng paihkhiat (cancel) ahihdan taklang uh a, huai tawh kisai a member tuamtuam te’n Aug 21, 2016 zan kim apan dakkal 24 sung bandh  sawm mahle uh tawp kik thak  uh a, Aug 25, 2016 tan  govt. thupukna ngak ding uh hi’n kigen hi. All Manipur Written Test successful candidate of Manipur police constable male 2013’ a viva voice result ngak lel te’n state govt.  thupukna pawm theilou uh a, blockade om sung in oil tanker leh kuva teh (betel leaf) pua truck te’n soisakna tuak uhi.
Hiai thu tawh kisai in tuni’n Press Conference om a, huai ah Zahir Khan, AMWTSCMPCM 2013 thupuangtu in a thugenna ah state govt. in Aug 25, 2016 tan a  thupukna a bawl uh en dik thak ding in ngetna bawl uh a, huai ahih keileh kiphinna tuamtuam pan ding uh hi’n taklang hi. Huailou in Khwairamband bazar a AMWTSCMPCM 2013 member te’n kiphinna a neih hun uah police te’n tear gas banah mock bomb a zatna uah mi bangzahhiam liam uh hidan in kigen hi.


Helpawl a tel 2 mankhia
Imphal, Aug-21: Thoubal Police Commando leh 22-A/R combine team te’n thuguk a muh uh dungzui in Aug 18, 2016 ni a Pallel bazar a operation a bawlna uah helpawl a tel mi 2 mankhia uh hi’n kigen hi. Mat a om P. Romio Changra Chothe (32) s/o Ibohal Chothe of Chumbang village hi a, amah apan People Republic of Nagalim a work permit card 8 muhkhiak hi’n gen uhi.
    Huailou in Imphal West Police Commando leh 12-Bihar Regiment te’n thuguk a muh uh dungzui in Aug 18, 2016 ni a New Delhi zuan dia kisa Thadou People’s Liberation Army (TPLA) a cadre 1 mankhia uh hi’n kigen hi. Mat a om Hengoulal Haokip (21) s/o (late) Sehpu Haokip of Kangpokpi Ward No. 6 hi’n leng taklang uhi.


Free Medical Camp om
Imphal, Aug-21: The Rotary Club of Imphal leh Hengbung Youth Club-te saina in tuni’n Hengbung Community hall ah free speciality medical camp om hi. Huai ah Gynaecology & Obstetric, paediatric, Orthopaedics, skin, surgery, dermatology, dental, ENT, eye, Pharmacy leh general medical lam apan Doctor tuamtuam te’n mi 1500 val en uh a, blood sugar, blood pressure, bio-chemical & pathological test, papanicolaou banah manbei in test tuamtuam sai uh hi’n kigen hi. Hiai hun ah Twilongkun area a khua 11 apan mi tuamtuam ki ensak uh hi’n leng kigen hi.


KSO in mawhpaih thupuang
Imphal, Aug-21: KSO-GHQ in Henglep sub-division sung a Molcham village ah zan a 2/5 Gorkha Rifle leh ZUF cadre-te kikaptuahna tawh kisai in mawhpaih thupuang uh a, kikaptuah nung a  ZUF cadre te kihem khia in  Kuki khua-te kibukna in zang uh a, kidalna dia mipi zat tawh kibang hi. Hiai tungtang ah KSO in helpawl tuamtuam te’n Kuki khua-te kidouna mun dia zang nawnlou ding in ngetna bawl uh a, Gorkha rifles te’n mipi lak ah thagum a suah louh banuah maban ah buaina om nawn louhna dia panla ding in leng ngetna bawl uhi.


Gold Biscuit 3 mankhia
Imphal, Aug-21: Khudengthabi Checkpost a 12-A/R te’n gari tuamtuam checking a bawlna uah numei khat apan gold biscuit 3 mankhia uh hi’n kigen hi. Moreh a Custom Preventive Force a SP in media-te tawh kimuhna ah mat a om RK Tampa Sana (52) w/o Mobi of Khadengpali Panthak apan  500gram vel  ding a gik gold biscuit 3 muhkhiak hi a, Moreh a custom-te kiangah piak khiak hi’n leng taklang hi.


Oil Tanker Driver leh Govt. te’n MoU kai
Imphal, Aug-21: Oil Tanker Driver leh State govt. lam apan CAF & PD Minister in tuni’n MoU tawh kisai in suaikai uh a, Chandra, President, All Manipur Petroleum Driver Transport Union in a thugenna ah state govt. in tulel a Raj Medicity ah Usham Gojain etkolna man teng a seng ding uh banah amah omlouhna khat a om leh a innkuan-te govt. sepna piak ding banah Imphal-Dimapur lampi ah tax hong-te tawh kisai enkai dia chiamna a bawl ziak ua kilemna om hi’n gen hi.


Innkuan omna theilou
Imphal, Aug-21: Khongampat Awang Leikai a innkuan khat a omna uh theihlouh tawh kiton in Police te’n suizuina pan uh hi’n kigen hi. Akigendan in Mutum Premjit (45) leh a zi Taorem Ningol Mutum (O) Mala Devi (45)-te Aug 8, 2016 zingsang dak 8:30 in Maruti van (No. MN03B-1523) in a tapa uh Remkum (11) leh tanu Mutum Sushma Devi (9)-te tawh gari in pawtkhia uh a, huai nung in tungkik nawnlou uh hi’n kigen a, hiai tawh kisai a omna thei te’n police-te thuzak ding in ngetna bawl uhi.


TUNI THUPI:
“Huchi’n hichi ahi a, nitengin a ngen ngutngut a, a kutkut ziakin sihna khop hial ding in alungsim a buaita a.”
– Vaihawmmite 16:16


EDITORIAL:
Bangchibang a guta?
Central hi’n state government ahihleh hoih mahmah chi phot ni. Policy leh programme tuamtuam sepkhiak bikhiah hoihtak nei uh a, a pichin uhia ahihkei leh a pichin kei uhiam chih  suizawh vual hilou hi. Himahleh, policy hoihtak a guante uh mipi’n kihamphatpih lai hi’n ngaihsut theih a, Centre in policy leh programmes a guante state in sepkhiakna (implementation)  lam  zou zoulou ahi de aw, ahihkeileh chihtakna tamsam deuh ahi diam chih hun om hi. Huai kawmin, guktak-laktakna tawh kisai gen zek lehang ut-huai a hi.
    Kha nawn akipan  ‘a Ber’ kha (September, October) chihte  hong kipan nawn ding a, tulela August 2016 kha abei ding kuan hita a, khawvot hun a kipat tawh kiton in guta hong uang nawn mahmah ding hi. Guta-lata tawh kisai bel Lamka khawpi ah dakkal 24x7 sung ahi a, kuateng in gutate’ ziaka manna i tuak ding ua chih gen chet theih hilou hi. Muhtheih a thil gu leh muhtheih chetlouh a thilgu kikal leng ettham mahmah ding hi. Huchi kalah mahni a ngoihngoih gukhia a zuak, ahihkeileh, midangte’ van gu a zuak a khamtheih hih abikin ‘No 4’ piece 1/2 leina dinga guktak-laktak thil buaipih leng a hunkhop om ahihdan haihvual hilou hi.
    Guktakna chi tampi om a, saptuam thil ah, social thil ah ahihkeileh mimal tuamtuam in ‘guktakna’ chih kampau  bangchidan in i lakha dia? Kidiktatsak mahmahte’n leng koihiam ah guktakna i hihkha diam? Saptuam makai i hikha maithei, politician i hikha maithei, govt servant hiam, NGO makai leh niteng nektawm zong a kilawh leng i hikha maithei; guktakna kichi in bangteng huamkha  ahi dia? Tuailai-pro kichi in diktatna kichi thupi zangin mipi vantang   lakah panla uh a, kipahhuai mahmah chih ding hi. Ahi a, diktatna kichi in bangtan huam (cover) kha ding hiam chih lungsim ah ngaihsut mahmah ngai leh kilawm hi.
    Muhtheih a guktakna tawh kisai gen zualni.  Tuni chiangin i gam ah mobile, laptop leh adangdang hun tomchik sunga kiguksak baihlam law mahmahta hi. Newspaper-te ngial ah niteng phial in ‘lost and found’ tawh kisai in mobile leh wallet mang suah in om gige a, ahihna (identity) i theih gegu nunga leng a pekik utlou hunkhop  om a, i theihlouh ziaka pekhe theilou leng i om ding uhi. Ahi a, muh ngoihngoih a guktakna tawh kisai in kuamah mat ngam hi nawnlou chih theihkhop in i gam dinmun omta a, mite hiamhei tawh om vek hita uh chihtheih  hi.
    Dawr/dukan tuamtuam ahihkeileh inn tuamtuam luhte public in naktakin i mawhpaih a, mawhpaih tuak mah leng ahi uhi. Mahni inn ngoihngoih luhte leng mawhpaih huai petmah uhi. Huchi kalah mipi nautang’ theihlouh a kiluhna bangteng a om kha dia le? Electricity department pe’n tu in privatise  hita a, tua nungin police-te tungtawnin dan tawh kituaklou a line ana bawl danglam mi tamkhop matin omta hi. Maban ah tui (water) tawh kisai telin na hong semtou zel ding un leng lam-en hang. Mahni sepna (posting) na mun a pai ngeilou hiam ahihkeileh office leng kai ngeilou i chihte leng nekgukna ahihkeileh guktakna chikhat hi dingin gintak-huai hi.
    Politician khat ka hi a, ka chethei e, i chi hiam ahihkeileh helpawl leader khat ka hi a, ka tungah thunei kuamah a omkei, ka ut-ut in vai ka hawmding i chih leleng huai leng guktakna chikhat hiding in gintak-huai  hi.Kipahhuaitakin, Lamka khawpi sung mun tuamtuam ah solar panel thuah in om a, solar plate omte  suksiat sawma suang a deng leh gawphel a kap khemkhem bang i om ua poi mahmah hi. Public property i chih ei property ahihdan thei nailou a hailai i hihman un ihehpih huai mahmah chih ding hi’nte. Tualou in, khawpi sung cheina hikawm inWaiting shed standard leh smart mahmah 2/3 bawlkhiak hita a, huai a kibulh glass-te khawng vakhense khemkhem chih i mawl (ignorant) lai luat ziak uh chih a latna himai hi. National Food Security Act(NFSA)  tawh kisai a hamphatna hiam ahihkeileh MGNREGS tawh kisai a Job card i neihte i surrender zongin guktak leh diktatlouhna lam ah mimal kivel chet mahmah ding omkha ding  hi.