Manipur Express | August 30, 2016

HEADLINES:
TWA GHQ makaih in tribal unity rally om
Kiphinna dan in numeite’n tuni'n silent rally nei
Lamka, Aug-29: JAC against Anti-Tribal Bills makaih in tuni’n numeite’n peaceful silent rally pai  uhi. Rally paite CCpur College a kingakkhawm in Paul Lalchhanhima, Secretary, JAC-AATB in rally paiding dan pulak a, Mrs. Boboi Gangte (retd.),  ZEO in thumna in khakhia hi. Rally a telte’n Tipaimukh Road-Phailian- Compound Veng-Tedim Road-Police Station-Tipaimukh Road zui in Hiangtam Lamka a Salphate’ Pumbuk ah zou uhi. H. Mangchinkhup, Chief Convenor, JAC-AATB in a thugenna ah Bill 3-te ziaka kiphinna kum 1 ching ding himahleh Salpha 9-te tawh kisai Manipur govt. tawh kikup khawmna omlou hi’n gen a,  India President in bill 1 nawlkhin mahleh bill dang 2-te dinmun theih hilou ahihman in kiphinna khawltheih vual hilou hi’n gen hi. Maban Assembly session ah bill thak puaklut ding leng alui tawh kikhiatna omlou ahihman in pawmtheih vual hilou chi hi. JAC in half-day total shutdown a puan leng khauh mahmah in  khawpi sunga siamsinna inn, dawr leh bazar kihong muh ding omlou a, tuzankim apan Aug. 30 sun dak 12: 00 tan half-day shutdown paizom ding hi.

    Huai banah, Thadou Women Assn. (TWA) GHQ makaih in tuni’n Sadar Hills ah tribal movement pailel hatsem ding tupna in ‘Tribal Unity Rally- 2016’ om a, Sadar Hills sunga numei te’n Keithelmanbi apan Sapermaina SDO Office tan km 20 vel asau lampi zui uhi a, rally zawh in Gamnom Community hall ah mipi kikhawpna om hi. Rally ahihleh sun dak 12: 00 akipan in Sadar Hills a khua tuamtuam akipan numei 1,000 val paikhawm uhi. Mipi kikhawpna hun ah  Vahchiin Thadou, President TWA-GHQs leh Tongmang Haokip Thadou, Advisor Thadou Inpi GHQs te’n thugen uh a, maban ah singtangmite’n kipumkhatna kembit a panla dingin TWA GHQ President in mipi paikhawmte ngen hi. Nitaklam in TWA GHQ makaite’n Manipur Governor kiang ah memorandum pia uh a, President leh Home Minister a ding leng copy pia uhi.


India leh Myanmar in kilemna tuamtuam bawl
New Delhi, Aug-29:Myanmar’ President U Htin Kyaw leh India Prime Minister Narendra Modi in Connectivity, Medicine, Renewable energy, agriculture, banking, power, border co-operation, border security leh border trade tawh kisai ah kilemna tuamtuam bawlin suaikai uhi.
    India leh Myanmar gamsung a galvantawi helpawlte doukhawm ding, helna leh hiamgamna beisakna dia kithuah khawm ding leh gam 2 te’n thuguk poimawh kipetuah ding inleng kilemna bawl uhi. Myanmar President leh India PM tunitaklam in New Delhi ah houlim khawm uh a, 21st Century Panglong Conference tawh kisai India in gupthu puang ahihdan Prime Minister Modi in gen hi. India adia a innveng hoih mahmah Myanmar hi a, South East Asia tawh kizopna dia lampi poimawh mahmah ahi chi’n Modi in gen hi. Buddhist principles in kituak dialdial a tenkhawm a, ki-it tuah diamdiam apoimawh dan agenin gam 2 kikal ah kizopna thukzawsem omsak ding hi’n leng PM in gen hi. Gam 2 kizopna in social economic development thupitak tungsak dia lam-en ahihdan Myanmar President U Htin Kyaw in Modi kiangah gen hi.
    Gam 2te’n Kaladan Multi-Modal transport  leh trilateral highway sepsuah ding in kilemna point 4 leng bawl uh a, renewable energy, tradition systems of medicine & construction leh upgradation of 69 bridges kichite leng telkha hi. India leh Myanmar kigamgitna 1,600 kilometer in sau a, gamnihte’ kalah galvantawi a kiphinna nei pawl tamtak gamtang hi’n kigen hi. President Kyaw ahihleh tu zingkalin zahtakna sangpen tawh Rashtrapati Bhawan ah vaidawn in om a, President Pranab Mukherjee leh Prime Minister Narendra Modi banah Union minister hunkhop leh official tuamtuam te’n huai hun uap uhi.Kyaw in March 2016 apan Myanmar President len a, huainung a gamdang aveh masakna pen hi’n gen uhi.
    Myanmar President  ahihleh Aug 27-30 sung om dia India hongzin hi a, a zi Daw Su Su Lwin banah Myanmar Minister 5 telin delegation member 31 in hon zui uhi. Amaute’n Kiginni in Bihar state sunga om Bodh Gaya ah Mahabodhi Buddhist temple veh in biakna hun zang uh a, Pathianni in 17th Century hun a Mughal monument kibawl Taj Mahal veh uhi.


Tribal Unity Day zatdan ding bikhiah
JAC Against Anti-Tribal Bills ten Aug. 31, 2016 a Tribal Unity Day zatdan ding abuai a bang in bikhiah uhi.

WEDNESDAY - AUGUST 31. 2016
■ Total Shutdown of all institutions and establishments in all tribal areas; free passage will be given to all private (non-commercial) vehicles. There will be no volunteers on duty on this day. All tribals are humbly requested to comply with the appeal as a sign of respect to our Tribal Martyrs.
■ Traditional Gun Salute and sounding of Traditional Gong by tribal households at 9:00 AM. ■ Paying tribute to the Tribal Martyrs at District Hospital morgue at 10:00 AM.
■ Tribal Unity Day: Main Event begins at 11:00AM.
■ Press Meet at Lamka Press Club after the Main Event.
*The following will be exempted during the shutdowns: Medical emergencies, entrance exams (including the SSC 's Combined Graduate Level Tier-1 Examination), pre-planned conferences, airport pickup and drop, Treasury Department and various other essential services like electricity, telecom and media; however, relevant documents would have to be produced as proof whenever required.


Swachh Bharat rally om
Lamka, Aug-29: Dist. Admn leh EE, PHED/CCpur Divn. makaihna in tuni sunnung in Bijang Loubuk Govt. H/S apan Tedim road zui in Tuibuong Peace Ground tan Bijang Loubuk Govt. H/S, Tuibuong govt Jr. H/S leh NGO-te’n ‘Freedom from Open Defecation’chih thupi zangin Special campaign of Swachh Bharat rally nei uhi. Rally-te DC/CCpur in flag-off ding chih himahleh Imphal ah meeting neih ziakin Th. Baite, EE,PHED/CCpur Divn.in flag off hi. Aman agenna ah  India govt nuaia Ministry of Drinking Water & Sanitation  deihna bang in June 9, 2015 in tulela Swachh Bharat kichi kipankhia in amin (name) kikhekzel hi’n gen hi. India govt in mipi damtheihna ding in zun-le-ek utna munmun ah thaklouh ding, toilet hoihtaka bawlding chih deihna ziak hi’n gen hi. Rally atel te’n Freedom from Open Defecation’ omtheihna ding a panla chiat ding ban ah zun-le-ek utna munmun a thak ziak in natna tamtak mihing te’n kinei hi’n gen hi. Swachh Bharat Rally te’n Tuibuong Peace Ground ah human chain nei uh a, program saulou neih zawh in zou uhi.


LOCAL NEWS:
Lamka tan rally pai ding 
Lamka, Aug-29: JAC against Anti-Tribal bills in weeklong protest neih dia bikhiahsa dungzui in Aug-30 in JAC Singngat makaih mipi’n km 35 asau Singngat-Lamka khe a pai in rally nei ding uhi. JAC makaih in khawpi sunga mipi’n ngeina bangin kiphinna chikhat public rally nei ding a, zinglam dak 9:00 in Dorcas Hall kong leh Pearsonmun ah gari kidawh ding hi'n kigen hi.  Nitak dak 6:00 in Hiangtam Lamka a Salphate’ Pumbuk ah Singngat JAC makaih  rally paite vaidawnna om ding a,  huai hun ah flying lantern leng khah ding uhi. Rally a teldingte’ puanvom leh asan a kithuam ding leh Zampi nei tengin tawi dingin JAC in ngen hi.


BJP CCpur in kiphinna nei ding
Lamka, Aug-29: Dist. BJP, CCPur in Aug- 30 zinglam dak 10:00 akipan Lighthouse, Sielmat a BJP Office kongah dharna tu ding uhi. Dharna ahihleh Manipur Home deptt. in 2013 a Police recruitment cancel abawl deihlouhna hi a, Manipur pumpi ah kiphinna om ding hi’n leng kigen hi. Huai ah successful candidate banah a utpeuh teltheih hi’n Dist President apan kiza hi.


Martyrs 9-te portrait honna om
Lamka, Aug-29: JAC against Anti-Tribal Bills in tribal martyr’s 9-te lemlak (portrait) poster abawl uh honna tunitak in Police Station ah om a, Pastor Benson in hong in lan hi. Huai hun ah H. Mangchinkhup, Chief Convenor in thugenna hun zang a, mun tuamtuam apan mi tamtak paikhawm uhi.


Police kilakna adin Bus omding
Lamka, Aug-29: Police constable lakna dingin kum 2013 batch te’n PET leh Written Test om result puanglou in Manipur govt. nuaia Home deptt in a cancel a, Aug 30 & 31, 2016 in fresh recruitment ah CCpur Dist. te’n Pangei, Imphal ah PET nei ding uhi. Aug 30, 2016 zingsang dak 6:00-7:00 sung SP office, Tuibuong ah Police te’n bus 2 arrange uh a, escort ding uhi. Kum 2013 batch te fresh recruitment atelding te’n documents ban ah employment card tawi ngai ding a, tukum tana kum over-te leng PET ah teltheih ding hi’n kigen hi.


OFC kitan bawlhoih uh
Lamka, Aug-29: Zan zinglam apan Khomawi khua ah BSNL Optic Fibre Cable (OFC) kitan ziak in BSNL zattheih louh a, BSNL tungtawn a  internet zangte buai mahmah uh a, tuni nitaklam in deptt te’n bawlhoih uhi. BSNL OFC kitan ziak in tuni’n Bank-te, LIC te’n transaction bawl theilou in buai mahmah uhi.


ZSF Thanlon block makai ding tel
Lamka, Aug-29: ZSF GHQ makaih in Aug. 27, 2016 in ZSF Thanlon block a 2016-19 makai ding  telna om a, President in P. Vanlalmuan of  Thanlon,  Gen. Secy in S. Minlun of  Thanlon, Finance Secy in HN. Khamchinhau of  Suangpehmun telching uh a, Vanlallian Khaute, President ZSF GHQ in kichiamsak hi. ZSF makaite’n Thanlon leh Henglep biala ZEO leh ADC nuai a school omte leng veh uh hi’n kigen hi.


SUUNNA:
Laltinthang (90) h/o (L)  Domzakhawl of Phuaisanphai  Village  tunitak dak 6:30 in teknat in si a, Aug. 30 in Phuaisanphai hanmual ah kivui ding hi.
Lamzalal (55) f/o Siemlalpawl of L. Phainuom, tunitak dak 6:30 velin Dist. Hospital ah sungna in si a, Aug 30, 2016 in akhua uah kivui ding hi.Amah Rev Thangkhosiem’ pianpih ahi.


IMPHAL NEWS:
Union Minister in Airport enkhia
Imphal, Aug-29: Union Minister of State for Civil Aviation Jayant Sinha tuni zinglam dak 11:30 in Imphal Tulihal International Airport hongtung a, Airport inspection ngal hi. Union Minister in media-te tawh kimuhna hun ah India gamsung a airport-te ah domestic leh international travel puah hoihna ding a Centre plan dungzui in airport-te keklet leh puahhoih hiding in gen hi. Hiai ding tawh kisai in Imphal Tulihal International Airport ah regional connectivity puahhoihna ding in inspection bawl a, Tulihal Airport in puahhoihna dia scope tamtak nei hi’n gen hi. Union Minister Jayant Singh in Dy. CM Gaikhangam tawh Imphal Airport keklet leh puah hoihna ding tawh kisai a panlak ding dan genkhawm ding uh hi’n leng kigen hi.


Bomb dia gintak in mipi patausak
Imphal, Aug-29: Thoubal district a Pallel Police Station gei ah tuni zingsang dak 7:00 velin bomb hidia gintak polythene a kitun in mipi patausak hi. Thiltung tawh kisai in Police te’n huai kim lakah dakkal 2 val mi lut ding kham uh a, Bomb Squad-te hun sawttak ngak nung a tunglouh ziak un Police Constable khat in chiang zang in Polythene va dawt a, bomb hilou in sahkhua tawh kisai a thillat dia kizang ann kitun ahihdan theikhia uhi.


Buaina omsak sawm hi’n ngawh
Imphal, Aug-29: Nityaipat Chuthek a BJP Manipur Pradesh office ah tuni’n press conference om a, huai ah BJP Manipur Pradesh a thupuangtu S. Tiken in media-te tawh kimuhna hun ah Congress makaihna a state govt. in kum 2013 a Constable Male Civil Recruitment a cancel uh khawnung lam a thil hoihlouhna ding leh dan toh kituak lou a, govt. in Manipur ah buaina bawl sawm uh chi’n ngawh hi. Aug 30, 2016 ni a fresh recruitment tawh kisai boycott ding in vau uh a, party worker te’n recruitment rally mun ah recruitment boycott leh ‘ban’ va bawl ding uh chi’n gen hi.


SSC(NER) Guwahati te’n ngen
Imphal, Aug-29: Staff Selection Commission (NER), Guwahati a Regional Director in Aug 30 – Sept 11, 2016 sung in Imphal leh Churachandpur Centre-te ah Combined Graduate Level 2016 (Tier-1) written exam om ding a, Imphal a candidate 11,363 te’n venue 2 leh CCpur district a candidate 901 te’n venue 1 ah exam nei ding uh a, hiai tawh kisai a mipi leh bodies tuamtuam te’n exam hunsung a kiphinna tuamtuam omte khawlsak ding in ngetna bawl a, Central govt. of India a post tuamtuam sepnang a India pumpi a kidemna hun ah tuailai te’n sepna a mansuah louhna ding uh ngaihtuahna hidan in gen hi.  Huai ahihkei leleng bandh/strike sung a candidate te’n buaina bangmah a tuah louhna ding un official-te tawh huamsak lou ding in ngetna bawl hi.


Martyr Day of Haipou Jadonang zang
Imphal, Aug-29: Haipou Jadonang Statue & Park Development Committee (HJSPDC)-te saina in Keishampat a Haipou Jadonang Park ah ‘The 85th Martyr Day of Haipou Jadonang’ zatna om a, huai ah Dy. CM Gaikhangam makaihna in mipi paikhawm te’n Haipou statue mai ah pak piakna nei uh a, amah tungah zahtakna latsakna in minute 2 sung daidide in om uhi. Hiai hun Maibon Phaomei, Deputy Mayor of Imphal Municipal Council; Ph. Thambaljao, Chairman, HJSPDC; Rajita Golmei, member, Manipur State Women Commission leh Zeliangrong community apan mi tamtak paikhawm te’n uap uh hi’n kigen hi. Haipou Jadonang ahihleh Nungba Sub-division sung a Kambiron village ah June 10, 1905 in piang a, pioneer freedom fighter of India lakah khat hi a, British-te tungah douna a bawl ziak in Aug 29, 1931 a khailup hi’n gen uhi.


March 2017 akipan Aadhar  poimawhta ding : Chief Secy
Imphal, Aug-29: Chief Secretary O. Nabakishore office chamber ah tuni’n news conference om a, huai ah March 2017 akipan India govt. nuai a scheme teng a dia Aadhar mandatory hiding a, Aadhar seeding ahihleh Central sponsored social welfare scheme-te direct a beneficiary te’n a muhtheihna ding uh ngimna hi a, huai ziakin mipi a diak in student community te’n scholarships ahamphatpih theihna ding ua Aadhar number ngaihtuah ding in ngen hi. India govt. in Minorities leh tribals affairs tawh kisai in Pre-matric leh Post matric a ding in National Scholarship Portal bawlkhia uh a, on-line a registration bawl theihna dia Aadhar number ngaita hi’n gen hi. MH. Khan, Principal Secretary (MOBC) in kum 2013-14 leh 2014-15 adia minorities scholarship application 80% val-te document kimlou, bank account leh signature omlou banah over writing ziak in reject in om a, akintheipen a tukum a applicant te’n scholarship a muh theihna ding un MOBC office va naih ding in leng theisak hi. T. Panmei, Commissioner (Tribal Affairs and Hills) in a thugenna ah student 68,000 vel ding te’n Pre-Matric leh Post Matric scholarship hamphatpih uh a, Centre in kum 2016-17 sung adia khauhtak a zuih ding in applicants teng in scholarship a mu thei ding ua Aadhar number  nei ding uh chi’n theisak uh a, treasury in sum a khahkhiak hun ah kum 2015-16 adia scholarship pending-te hawmkhiak hiding in gen hi. BB. Sharma, Commissioner (CAF & PD) in NFSA nuai a ration card holder te’n Aadhar seeding a bawl uh ngai a, hiai tungtang ah DC leh ADC teng theisak hi’n gen hi. Director of Social Welfare in IGNOAPS, IGNWPS leh IGNDPS nuai ah pension scheme hawmkhia uh a, himahleh beneficiary 40% lel in tunitan a Aadhar number nei uh hi’n kigen hi.


Lawyer te’n mawhpaih thupuang
Imphal, Aug-29: Old Guwahati High Court Complex sung a meltheihlouh te’n Government Advocate Office a hal uh mawhpaihna in High Court Bar Assn. of Manipur (HCBAM) leh All Manipur bar Association (AMBA) a member 100 vel ding te’n Chingmeirong a Manipur High Court maiah tuni’n joint sit-in-protest nei uhi. Hiai thu tawh kisai  Kh. Binoykumar Singh, President, HCBAM in hiai thilte midawi lok te thilhih dan leh gamtatna hi’n gen hi. Meikang ah kum 50 paisa sung a pending leh disposes case om teng kangtum a,  criminal record teng leng mangthang  hi. Akisaikhak pih teng in maban ah thilchin tawpsan ding leh state govt. in district teng a govt. office-te ah security kidaih koih ding in ngetna bawl a, record kangtum teng kaihkhawm thakna ding in hun tampi la ding a, police dept. te’n leng govt. office halkuang na ah kigolh-te mankhe ding in ngetna bawl uhi.


Dakkal 24 sung bandh puang
Imphal, Aug-29: Constable recruitment test for 2013 batch te’n Pangei a Police Training Centre ah Aug 30, 2016 ni a fresh recruitment test om ding mawhpaihna in tunitak zankim akipan dakkal 24 sung Imphal East district ah general strike puang uhi. Hiai thu tawh kisai in Manipur Press Club a press conference hun ah Constable recruitment 2013 batch a thupuangtu Md. Zheer Khan in media-te tawh kimuhna hun ah Old Guwahati High Court Complex mun a state govt. office halkuang na tawh kisai in kigolhkhakna neilou uh a, state govt. in office 2 halkuangna tawh kisai a constable recruitment test for 2013 batch a candidate-te gamtatna hi’n ngawh sawm uh a, candidate te’n Court ah case a file uh tawh kisai a tuni hearing om ding sukbuai sawmna hi’n gen hi. Aman a genzelna ah guardian leh candidate te’n tuni a joint meeting a neih hun ah bandh bawl ding in thupukna bawl uh a, recruitment process hun ah thil diklouhna muhkhiak tawh kisai a candidate-te hilou a recruitment test sai-te mawhna hi’n gen a, video recording leh press media-te maiah recruitment process sai hi a, written test hun a mark ‘0’ mu candidate khat telching a om theihpen kuamawh hiam chi hi. Constable recruitment appeared body of 2013 batch a member teng in recruitment rally thak ah tellou ding uh a, state govt. in recruitment a thak a neih sang a result puangkhe ding in thutawp pia uhi.


NPF MLA tenna inn ah bomb puak
Imphal, Aug-29: Meltheihlouh pawlkhat in zan nitak zankim lak velin Dewlahland a NPF MLA Samuel Risom tenna inn ah Chinese hand grenade va pai puak uh a, si leh liam om kei mahleh bomb neng in a inn mailam bang kha hi’n gen uhi. Akigendan in Ukhrul A/C apan Samuel Risom (45) telching in om a, state assembly in Manipur ah ILPS zat ding tawh kisai a bill 3 a pass-te uh mawhpaihna a tribal movement gupna a kumlui in amah telin NPF MLA 4 in kitawpna pia uh a, himahleh Assembly a Speaker in MLA 4-te kitawpna pomsak nailou hi’n gen uhi.


TUNI THUPI:
“Thil hihhoih lechin pahtak na lawh kei dia hia? Na hihhoih kei lebel khelhna kongkhak bulah a kual nilouh hi: – Genesis 4:7


EDITORIAL:
Bandh a om chianga volunteer-te
 India gam adia bandh om munnapen Manipur  hiding in gintak-huai hi. Tulai ngialin a thuahthuah in bandh om teltul mai a, maban ah leng waiting list (bandh om ni ding puankhiak) a hunkhop omlai hi. Bandh/strike/ total shutdown tawh kisai in media tungtawnin ‘program a bikhiahsate uh taklatin om zel a, akim sipsip in bel taklat seng hilou zawmah hi. Tualou in social network tungtawn mah inleng bandh/strike tawh kisai in proposed/tentative program-te taklatin om zel hi.
    Huchi kalah, tuni a i gennop ahihleh ‘bandh volunteer’ chih ahi hi. Issue tuamtuam ziakin eilak telin Manipur gamsung mun tuamtuam ah bandh/strike/blockade om mun mahmah a, tua hun ah volunteer poimawh mah ahi hi. Himahleh, volunteer-te bangchibang a om uhiam chih bandh bawlte’n a etzui uh poimawh hi. Bangchidan a gari ahong tai uhiam chih leng dot masak omlou, gari khense ngal, pate/ pute’ vual khawng tai phanphan, thamlou a zahmawh hou a housuk zialzial chih khawng thil kilawm hilou a, kamsia zatkhumte tungah vangtahna tungthei thil hizawmah hi.  Bandh himhim a saitute’n ngentel deuh a a volunteer-te uh a lepfel uh a, thuhilhna(briefing)  hoihtak a piak masak uh deihhuai a, zukham sakham kawm a duty dinga mi kuamah sawllouh himhim deihhuai hi. I thiltup demand pen government in hong  piak ding ahi a, ei-leh-ei mi nautang kigawt tuahtuah ding hilou hi.
    Kiphinna leh kiphindan  chi tamtak om a, mite’ kiphindan etton ding tamtak om  hi. India adia mi poimawh mahmah khat social activist Anna Hazare in India a nekguk-takgukna douna dingin Jan Lokpal Bill khauhtak om sak ding chih a phut ziakin an ngawlin nuakna  nei a, huai hunah lehkhasiam pipi, khuak hiam pipi banah student-te, tuailaite leh mipi a sing asim in anungzui zuazua mai uhi. Hazare kiphinna in India gamsung a zelsuak genlouh leitung pumpi deng suak a, ani ani in gumtu hau deuhdeuh mai hi. Huai kiphinna gahsuah leng ahi ngeiding a, eilak ah leng diktatna a poimawhdan leh a manphatdan tangkoupih i omtheita uhi.
    Tua kia hilou in leitung mun tuamtuam fangkual lel Yoga Guru Baba Ramdev kiphindan leng chituam nawn leuleu a, aman leng zuitu mihing a lakh asim mah nei hi. Lokpal issue akipan in a thei nailoute’ adia theihtuak, a theihate’ adia theihbeh dingin Press/media-te’ role ziak ahi chih theih hi a, India Parliament in Anna Hazare leh a teamte’ ngetna nawlkhin sawmsawm mahle uh ahih theihlouhna ziak media-te’ ziak mah hi a, Anna lawhchinna thuguk leng media-te’n hahtaka a suah  ziak mah ahihdan kichian petmah  hi.
    Huchi kalah mite’n nuakna leh kiphinna aneih chiangun bangchi gamtat uhiam chih ngaihtuahtham ching hi. Security force tawh kinawktuah chihbel ahi ding him leng hithei a, ei-leh-ei kinawktuah chih pen Telangana state te’ paidan tawh teh theihin om mawk hi. India gamsung ah mipi zalenna a let luat ziakin a khenchiang in buaina lel tunzaw ade aw chih bang hon ngaihtuah sak thei a, Indian freedom struggle hun apan in India gam ah bandh/strike/non co-operation chih te kipan hi. Education leh i economy dinmun awlmawh huai mahmah a, mehzuak leh rickshaw pute te telin sum buuk bawlte’ dinmun banah school naupangte’ dinmun ngaihkhawk huai mahmah hi.
    Huai kawmkalah, bandh volunteer te’n khauhpai dan a kisin siam uh poimawh mahmah a, thagum a mi zialsuk pahmai, ahihkeileh mahni sanga upa zawte’ tunga kamsiam kawmtaka khakkhiak dan siam poimawh mahmah hi. Gari a kuahiam hong taikhak ziaka bangmah donglou a hihphut chihte chiin ngailou a, amaute i demand hon pethei leng hilou ua, tua ziakin thagum a kinawk sangin kamsiam kawmtaka hepkhiak pen vualzawlna hizaw dingin gintakhuai hi. Lu-gak kawm kham neknak a mi vautute kuaman thu lak tuan khollou maithei a, huai kawmkawmin, Manipur a bandh leh strike kibawlte democratic manner hi taktak ding hiam chih bang leng theihbut huailou khop ahi hi.