“MINUTE 25 IN KA ZEKAI A AHI”

Written by: Khamkhanthuam@ Jejem Young

 

An Idea taken from 25 minutes too late (MLTR)

“Khawilam lanu nge maw inih le?Tu hria leng chawi nge maw inih le?
Tiangreng a, kadawn lungruk min tibuaitu,ka tawng ngailou nanglo chu.
Aw hmeltha, aw hmeltha izun leng ngaih reng ana e.
Isakhmel tawnni lo her thin mahse. Mitkap kar leh chhungin mual iliam leh thin.
Ipar mawi nahi katan hian lung ngaihna leh beidotna;
Tahna ruam a min tlan Tir tu, nihtir suh aw hawilo par ka enchimlo.”

Hichibang zaila ‘Vanlalsailova’ in ana awih ngiahngiah lungsung ah hongdawklou theilou hi.Siamsin, khawlam a suty pai a ka omkhak laitak ahi chih ka thei lai a, lawmte tawh hunnuam zangin luidung khawng ka hawh sek uhi. Sabang ka Tatna, mimbang ka pianna vangkhua a omlel ka hih manin zingkar khat lawmte tawh luidung hawh dingin ka kisak laitak in ka nunglam ah gari ‘Bolero’ khat ahong gingphei a, ka pam gamlalou ah a khawl hi. Kuatehiam chih thei-ut a ka mit sika ka melhphei leh nungak melhoih takmai khat hong pawtkhia in mikhat kiang ah kan khat nei hi’n ka thei hi. Huai mipa’n hon kawkphei zauh mawk a, kenleng ka kilehngatsan zat a, a enlou khem ka kineih hi. Ka etnawn leh a hongtung phei dek a, kei kiang honzuan ahi chih ka haihkei hi. Ka mumang bang sahial in ka mit ka nuai thakthak zawzen a, huchih kalin a hongtung a, kakiang ah “ U, ka dangtak a tuidawn ding na neih uleh non pethei diam?” chi’n  aw nem takin tuidawn ding hon ngen mawk hi. Kei leng lamdang sakna tawh nasep van a om ka hi a, zumsimpi-in tui kava la paw-pawp hi. Adawn lailai in ke’n leng “ Koi a kipan na hi uhiam? Koilam manawh ding?” chi’n ka dong  hi. Aman leng “ Tipaimukh lam pha ka hi uh, Lamka lam a paisuak ding ka hita,bangmah ka hon genman kei ding, zingchiang a ka pa Singapore lam a zinding ahihziak in akinawhlua ua, hi’n hiai ka –college I-D ahi, na hon piakkik nawn ding ahi” chi’n  hon gen lomlom in hon paisan a, a gari khu uh hondik sak fafat abang hial uhi. Huai hun in zaw, Zomuanpuii in a sak ‘ cham rihrawh kan vangkhua ah hian’ chih la ka sak khum kei hamham hi. Kei leng hibang a ka theih ngeilouh khat in a ‘Id’ hon piak mawk pen lamdang ka sa mahmah a, himahleh amin ka et-et chiangin ka theihngei a bangsim a, amel bel ka theikei hi. Ke’n leng hon thei ngei ding in ka gingta tuan bok kei hi. Huai zingkar nanana zaw ka amhai dek zawzen a, ke’n leng ka sum-bawm vala in a sungah ka guanglut gaih hi.

    Luidung ka tung petmahta ua thabang zoisim mawk, chikmah a ngaihzawng nei leng ki hilou a, huaizinga ka mi muh in ka lungsim a huchi luahmawk pen ka theisiam thei kei hi. Ngaihzawng ahih keileh itna mit hon honsak hi’n ka thei hial hi. Ka lungsim in sapten ‘teen age’ hun a chih uh dinmun a ki-omta hisam ngalven chi’n ka kihehnem mai hi. Hunte hongbei hulhul in keileng ka pianna vangkhua paisan a, khawpi lam a siamsin dinga ka kuan hun nawn ahihman in vante nitaka sakhin in zingkar bel deuh in ‘passenger’ gari khat ah ka tuang a, Lamka lam zuan in ka kisawitou neknekta hi. Kipankhe baih ka hi ding ua, Lamka ka tungbaih mahmah ua, nitak an nekhin hun-awl ka neih sungin ka khua ua ka numei muh call dingin ka hong kisa a, amah I-D ah (amin, contd.no. anu min leh pa min) chihte omvek  ahih man in amin ka thei a, Chiching chi’n kasam hi. Ka hon call ta chu dipbang kisai ditdit in, hon dawng tazen leh bang ka gen ding a chi’n ka buaigu vial mahmah hi. A ring a ging dardar petmah a, “ Hello” hon chi in kenleng ‘hello, chiching na hi hiam?’ ka chihleh, “ hilou, anu Ka hi, bang na chisim a ahia?” honchi a, kenleng laikhat piak ding nei ka hihdan ka hilh hi. “Kikhawm ahi, atawp dekta ding uh, atawp chiang un ka hon theisak ding, na min bang ahia?” chi’n hon dong hi. Ke’n leng Jejem ka hi, Chiching atawp chiangin hon call thak mai un aw leh Nuvung chi’n ka gen a, aman leng,  aw le chi’n hon kepsan hi. Keileng hun neilai ka hihman in laibu khel dingin kava kuan a,ka phone silent mode in ka kem hi. Hun bangtan hiam nungin ka phone ka etleh Chiching akipan missed call 3 ana om a, ke’n leng ka call kik pah leh Chiching  in hon dawng pah a, a aw chu ka thei hoih mahmah hi.“ Ujem nang hongzinta maw, bangchik a hongzin e?” chi’n ka min in honsap pah mawk leh  lamdang ka sa lawguih a, bangchidan a kei hon thei ngei maw ka chih leh “ hon thei ngei tham e, zenzen, nang kei hon theilou maw? Ka neulai a huai lei (bridge) tung aka kiak deklai nana mat tangnu kha ka hi, nahon theita hia?” honchi hi. Kenleng huai lai in chu ka thei a, himahleh ana lianlaw mahmahta a, a mel leh puam kikheng gai vek ahihman in tunbel thei nawn hetlou ka hihdan ka hilh hi(.Kei sang in amah ahihleh kum sagih in a naupangzaw a, taksa lam ah bel ka kikim thei ve-ve uhi). Nidanglai tangthu khong hon gen gen leh kenleng ka theisuah thak a, huaini in ana mantanglou hi zenzen leng a leitung hinkhua ana beiding ahihdan ka thei hi.( Leilawn sangtak kazuih na uah siktal kha in kedeklai kamat tang khaklai ka theisuak thak hi. Ken leng, aw konthei tave Ching. Ka kipaklua thil non theisak a, ka chih leh aman leng aki pahdan leh hampha akisakdan khong hon gen tiautiau a, kenleng hoihtak in ka na ngaikhia hi. ‘ Huai na college i-d kha zingchiangin kong pe ding aw’ ka chihk hit phet in ka balance in hon beisan a, aman leng hon call kik nawn tuankei a, kei leng nitak inn tungin ka lumpah a, ka ihmu pah vangvang hi. Ahi, kei bel nungak neiding leh ngaihzawng nei ding ngimna a zin ka hi kei a, himahleh ka khua  ua lai a honpiak pen ka piakkik ngai ahihman in amah call ka hi zaw a, kenbel ka tup ka thei gige hi.
   

 Zingkar khua hong vak in keileng gamdang a kinawhdeuh a zinna ding nei ka hihdan Chiching kiang a ka gen leh, ‘zin nuam’ hon chipah lat mawk hi. Huaini in Imphal lam bandh a omchet a, keileng ka zinthei kei thak a, hun-awl ka neihin Chiching tawh ka khua ua ka  kimuh utawh a nihveina dingin ka kimu nawn uhi. Ka khua ua ka muh tung dan khong chiamnuih sim khong in ka gen zel a, huchi’n thu tuamtuam ka kikum zel ua, ka hong  kimaingal mahmahta uhi. Aman sawtpek apan amah pen kei ading a ana kikemsa leh kei pen amah ading a ana siit ahihdan a hon hilh in lamdang ka sa mahmah a, kenleng ka muhtung a pat a ka lungtang tengteng luahden pah ahihdan ka theisak hi. Hunte ka hon zatkhawm tam deuhdeuh chiang un ka kingaina deuhdeuh ua, theihlouh kar in ana ki-it ka na hi maimah uhi. Sihna louin khen zawhlouh ding  khopin ka hong ki-it ta uhi. Kei leng ka lamet hetlouh in gamdang a ka zinkhia na ding a hong om phut a, ka it Chiching tawh zaw salam, taksa a kikhen phot ding chih ka ngaihtuah chiangin haksa ka sa a, himahleh ka maban ding ka khual zaw gige a, huaiziakin thazawi mahleng ka zinsan  teitei hi.
    

Himah leh ka lungsung ah bel a thamden a, aman leng hon ngai theilua ahihdan ahon hilh gige hi. Kumte,hunte theihlouh kar in hong mualliam zungzung a, gamdang a ka omsung zong kum nih lambang paita hi. Hunte ahong sawt deuhdeuh chiangin Chiching tawh ka  kithuzak vang deuhdeuhta ua,kei leng Lamka lam a paisuk nawn ding bang ka lungsim ah a omthei mahmah a,himahleh siamsinna lam ah bah ka ut kei a, ka pang teitei hi. Nikhat lam-et hetlouh in Chiching in pasal nei ahi chih sms in ahong kikhak mawk hi. Ka zinkhiakma a Chiching in ka kiang a, ‘Ujem, keizaw LDR ( Long Distance Relationship) utlou ka hi hong chih ka theikhia  hi. Himahleh ken akiang ah (mihing bangchidan in munkhat ah i omkhawm gige thei ding a Ching? I omkhawm theihna dinga maban i et zawk phot ngai ahi)chi’n ka gen zel hi. Tua thuthang pen zuauthu maimai ahihdan ka hon thei a, himahleh meima pawnlou a thou tulou chih zaw ka theina aka. Lamdang ka sa a, thusia-lasia (TS-LS) te’n zaw a honzou thei mahmah mai aka. Nikhat taget lah Chiching in ngaihzawng dang nei ahihdan     ka lawmte’n ahon hilh get ua, kei leng hichia omom sangin ka khenmai ding chi in sms tungtawn mahin ka khenphut mawk a, himahleh a khawnung in ka kisik petmah hi. Aman lah hon thuzak ngei nawn samlou, call lah ki-call khebun ngei mahmahlou ahihziak in ka khen ahi zaw hi. Nikhat ka computer ka etleh ka e-mail ah hichi’n thu ana kigelh hi. “ Ujem, na dam na maw? Bangding a nang thuzuau mulmal lou pipi, kei mahmah  kamsuak loute ana gingta na hia?, Nang a ding a chin zoulou taktak ka hi hiam? I thuchiam sate bang chita ding ahia? Ka hinkhua ding khatvei bek hon-gel pih in!.Kei hostel a va om ing a tuni a pawtkhe theipan ka hi” chin a kigelh hi. Adang omlai hiam chia ka et leh laklawh simin huaitan aki gelh hi.
    

Ken leng Chiching ka itna beithei mahmah lou ahi a, hima leh ka khen nung khatvei leng ka kithuzak kha nawnkei uhi. Huainung kum nih chinma deuhin suty ka nei a, huai in tuh Lamka lam pai theihna hun ka nei a, ken leng thupukna kala a, Chiching kiang a vapai a ngaihdam va ngen ding ka chita hi. Flight in ka pai a, Lamka ka tun in zingkar lamdeuh ahi lai a, Chiching ka call pah leh a mobile ki-switch off a kichi hi. Ken leng lawmte kiang ah kan theihna teng kan in ka zonzon hangin ka mu zoukei hi. A tawpin beidong taka ka paitouh leh pau ngaihna ( mike) ahong pau a,Chiching in pasal nei ding ahihdan akiang ate ka dot leh hon hilh uhi. Kei leng kava dianglut  a, a gal lam a Chiching moupuan silh a kipah meltak a nui selsal ka galmuh a,ken leng ka vanaih phei a akiang ka tuntak in ka BP bang sang hulhul in ka thei hial hi.Akiang ah “Ching na ki lawmlua, singdang siang ah sanmun na muangta maw? Singdang ang ah sambang na zal mai ding maw?” ka chi a, akiang ah ngaihdam ka ngen hi. Amah leng hong kidek zoulou in hong kap khia a, kap kawm in “ Ujem, akikhelta hi.Minute 25 in na hong zekaita,ka hon it mahmah a,himahleh hiai thuchiamsa palse thei ka hi nawnkei hi. Na hong paina gamlapi ahi chih leng ka haih kei a, himahleh singdang in nang zong ahon ngak ngei ding chih ka thei hi. Na siamsinna ah hong lawhching inla’n lungmuang takin hon paisan mai in. Na hon deihsaknate ka thei gige a,ka mangngilh ngeikei ding hi” chi’n mittui vung dildel in hon gen hi. Ken leng gen ding dang theinawn samlou in “ Ching-Happy wedding,nupa lawhching hong hi un, Toupa’n na nih un hon vualzawl hen!” chi’n khase takin ka paisanta hi.
   

 Keileng maban sunzom dingin ka omna lam zuan in a kalnawn in “ Ching mangpha, Lamka mangpha” chi’n ka paisan hi.Huainung bel Chiching tawh ka kithuzak nawn se kei ua, himah leh ka lawmte khatin ta neita uh ahihdan ahon hilh hi.
 

Note:Hiai i tangthu simzawh chetpen ahihleh nidang laia lasasiam “Michael Learns To Rock” ten ana sak uh “ 25 minutes too late” akipan ngaih tuahna a hong piangkhia ahi a, a gelhtu pan etsak nei nuam a aphuah leh a ‘idea’ hon suklat maimai ahi. Kuapeuh i dam lai in thil ihih khempeuh ah denchiangin chih i thangsak mahmah ua, mi tuamtuamte hinkhua i et chiang in leng hiai thumal ‘denchiangin’ a chih ziakun a kisik mi tampi om ahi chih ithei ua, huaiziak in i tangthu sim a bang a ikisik louhna dingin tu ahunlai in thil ihih peuhmah ah ahun lap i sawm ding uhi. Toupa nungzuihna ah zong i zaitha nem hun hong om ding a, tawlet a ansute hong khawl hun omding hi.
-Ka kipak-