Manipur Express | September 24, 2016

HEADLINES:

France leh India tuni in New Delhi ah kilemna suaikai uh

India in France akipan Rafale fighter jets 36 lei ding

http://www.livemint.com/ 

New Delhi, Sept-23: Union Defence Minister Manohar Parrikar leh India a hongzin  French Defence Minister Jean Yves Le Drian te’n tuni in New Delhi ah  kilemna suaikai uh a, India in France akipan kidouna lenna ‘Rafale fighter Jet’ 36 lei dingin thukim uhi. Huai dingin India in Euro 7.87-billion ( India sum in Rs 59,000 crore vel) seng ding hi’n kigen hi. Rafale fighter jet ahihleh latest missile leh weapon system kithuahvek hi a, zat ahih hun ah Indian Air Foce-te’ vanzat  muanhuai in khauh mahmah ding in kigen hi. Tuni a France leh India in kilemna a bawl theihna ziak  Prime Minister Narendra Modi in kha 16 paisa a France khawpi Paris a phakna  gahsuah ahi kichi hial hi. India in tulai a kidouna lenna suak nanungpen  leisawm in kum bangzahhiam paisa akipan panla hi. 

Dassault Aviation company khutsuak Rafale fighter leikhiakna di’n kum 2007 apan India in panla a, tuni a kilemna bawl ahihdungzui in, huihkhua ah Pakistan tunglam a India thuneizaw ding hi’n gen uhi. India kiangah Dassault in Rafale fighter a sawllut nung uh kum 5 sung aircraft adia vanzat tuamtuam - weapon system, spare part leh maintenance leng enkai lai ding uhi. Senior ministry of defence (MoD) official gendan in, France leh India in kum tamkhop kihouna aneih nung un, pilot khat tuan theihna Rafale fighter 1 man di’n Euro 91.7 million (Rs 681 crore) bikhiah hi a, huai fighter 28 leikhiak hiding hi. Mi 2 tuan theihna fighter 8 leikhiak hiding a, fighter khat man di’n Euro 94 million (Rs 703 crore) bikhiah in om chi hi. Tuni a contract bawl hunah India in Rs. 59,000 crore laka 15% (Rs 8700) apiak masak ngai a, kumnawn sungin 25% dang pe nawn ding uhi. Tuni a Rs. 8700 crore piak dingte IAF budget in daih zoulou in budget dang sawk a om hi’n leng official thusuakin taklang hi. Kilemna dungzui in, tuni apan Kha 36 tan in lenna piak khiakna kipan ding a, Fighter teng Kha 67 tan in India gamsung puaktung hiding hi. IAF in April 2022 velin huai lenna zang theita ding uh chihthu om hi. 

Rafale fighter ahihleh kum 10 paisa in French Air Force te’n gam tuamtuam ah combat mission hun in zang uh a, Dassault in tunitan a fighter 152 bawlkhia in huaite Afghanistan, Libya, Mali, Iraq leh Syria ah zat in om hi. Rafale fighter tawh kithuah “beyond visual range air-to-air missile” (BVRAAMs) in km 140 a gamla ah melma-te lenna kapkhe thei a, huai lenna tawh kithuah 300km tan kapban air-to-ground cruise missile ziakin leng kidouna banghiam om hunah IAF in baihlam takin huihkhua thuneihkhum thei ding uhi. New Delhi pansan Institute for Defence Studies & Analyses apan Laxman Kumar Behera in agendan in, Pakistan air force te’n aircraft azat tampen uh China a kibawl hi a, kidouna(combat mission) ah Rafale tawh tehkak vual ahihlouh banah tamveitak target kap khalou a gen in om chi hi.

CMT in SASA Open Football Tour Champion la

Lamka, Sept-23: Singngat Area Sports Assn (SASA) in Singngat a MK Thomas Mini Stadium ah SASA Open Football Tournament 25-veina a sai uh tuni’n hunkhakna leh final kimawlna om a, huai ah Chief Guest in P. Tongthang, Zou, Special Contractor pang hi. Functional President in M. Thianzathang, President, Munluo Phungpi Orgn pang a, Guest of Honour in Hangzamoi Tonsing, Govt. Advocate leh Chief Host in Nengkhanlam, Chairman, Singngat Vision 2020 pang uh a, Special Guest in Dominic K. Munluo pang hi. Huai hun ah Singngat area a khawhausa hunkhop telin mi tamtakin uap uhi. 

Chief Guest in a thugenna ah a thugenna ah, Singngat A/C kichi Zou pau zangte majority ahihman in mabana assembly  election ah paudang zangte a kigolhlouh deihthu gen hi. Zou nam sung ah laisiam leh siamlou vaihawmthei hunkhop om ahihman in mipi’n maban a election ah Zou te’n Singngat A/C a khahsuahlouh deihthu genkawm hi.  MLA hithei ding amah leng om ahihdan gen a,mipi’n kum 5 sungin Singngat bial ahoihlam a 4vei kikheng(change) a ut  ualeh maban a MLA election ah candidate khat a pang ding ahihdan leng gen hi. Aman Tournament atel team teng kiang ah football 1 chiat a piak ban ah hausa hunkhowp puansan (red blanket) silhsak a, SASA kithuahpihna in Rs. 30,000/- pia hi.

Chief Host in football kimawlna a discipline neih bangin  maban election om hun ah candidate leh voter te’n siangthou leh diktatna nei dingin chial a, midangte’n i right hon zahtakpih ding i deih bangin enleng mi right zahtak poimawh a, tutung kitelna ah kina, kivaulau, kitalkaih chihte omlouhna din kuapeuh panla dingin chial hi. Programme hunsungin Singngat Standard School a student te’n special item a neih ban uah guest tuamtuam te’n thu gen uhi. Huai hun uap din Chief Guest makaih gari 10 vel in mi tamtak kuan uhi.

Final match ah SSPP Rayburn College leh Corinth Memorial Team, Singngat kimawl uh in full time tan in 1-1 in kidraw uh a, penalty shootout ah Corinth Memorial Team in 5-4  in zou hi. Champion team in kipahman in Rs. 30,000/-+ trophy sang uh a, Runners-Up in Rs. 15,000/- a san ban uah 3rd Place Seinou Memorial Team in Rs. 5,000/-, Best Discipline Team (SSPP Rayburn College) in kipahman  Rs. 1,500/- sang uhi. SASA Open Tournament 25vei paisa  Sept. 1, 2016 a kipan om hi a, huai ah team tuamtuam 15 tel uh a, tournament sunga goal  kikhumzah 125,  yellow card 35 leh red card  1vei lahkhiak  in om hi.

LOCAL NEWS:

Armstrong Pamei, Jt. Secy (TD & Hills) in New Lamka UPS enkhia

Lamka, Sept-23: Armstrong Pamei, IAS, Jt. Secy (TD & Hills) in Lamka hongpha a, Mannuamching, IAS, Director (TD) in zui a,  ADC/CCpur nuai a school function hoihpen a kigen New Lamka Upper Primary School (UPS) pha in, school omdan  enkhia uhi. Huai hun ah Soiminlian Lengen, MCS, CEO/CCpur leh bialtu MDC CT Lian Guite leng tel uhi. Official teamte’n huai school in TD & Hills tungtawn in World Class Computer Studio a ngah enkhia in maban panlak dingdan kikum uhi. Jt. Secy in  school  function dan kipahpih a, studio kibawl leng lungtunhuai sak thu gen a, Headmaster leh Staff-te telin student-te tawh hun sawtlou zangkhawm uhi. 

      New Lamka UP School a blackboard kizang teng white board a khek ding banah world class studio a computer hilhtu ding contract basis a mi 1 lak dingin gen a, bialtu MDC leh CEO tawh maban panlak dingdan genkhawm zawh in Imphal ah kik uhi. TD & Hills in singtanggam district tengah World Class Computer Studio 1 chiat koih dia a bikhiah lakah CCpur district adingin New Lamka UPS telkhiak hi a, server computer 1 telin computer 12, Smart Noteboard (touch screen) 1, projector 1 leh solar piak hi uhi.

Election prepare dan taklang

Lamka, Sept-23: Tuni sunnung in DC makaih in AC to DC & OSD (Election), CEO/ADC, SDO/Singngat, SDO/Saingaikot leh Dist. Election Officer te’n Press-te kimuhpih uh a, maban a election om ding tawh kisai kisakkholhna taklang uhi. DC in Sept 7, 2016 in Special Summary Revision 2017 kipan a, Oct 7, 2016 a zawh hidin gen hi. ECI in thil thakthak pawkhia a, tutung a election ah mipi thanuamsak a, atamtheipen in vote khiak ding, Mobile/Telphone leh electric omna teng a Polling Station tuamtuam ah CCTV tungtawna  vote khiaklai ‘live telecast’ ding hi’n gen hi.

AC to DC in kha 1 sung Special Summary Revision poimawh mahmah a, BLO te kiang ah kuapeuh in form 6-inclusion, form 7- deletion, form 8- correction leh form 8-A transpotition/transfer zanga hihfel dingin ngen hi. Electoral roll ah min double a om theihlouh ziakin singtanglam apan Lamka pemlutte’n leng form 7 zanga hihfel dingin ngen hi. Sept 26, 2016 sunnung dak 1:00 in CCpur College ah ‘Special Awareness & Registration Camp for Youth’ om ding a, Sept 27, 2016 sunnung dak 1:30 in Rayburn College, Sept 29, 2016 in Young Pillar’s College ah om ding hi’n gen hi. Mi 1 in vote 1 kia neih ding, double, trible vote nei a om leh computer tungtawn a paih(delete) hidin gen hi. 

      Youth Icon 4 te’n vote manphatdan, mahni vote chiat khiak ding ahihdan gen ding uh a, Campus Ambassador 12 te’n amau college ah electoral roll a min kikhumlut nailou college student te mawhpaw ding uh hi’n kigen hi. Maban ah SVEEP te makaihin activities tuamtuam om ding a, Oct 15, 2016 in Tuibuong a DTC Hall ah election tawh kisai ‘Talkshow’ omdin kigen hi.

L. Mangkhogin Haokip khakna om

Lamka, Sept-23: CCpur SP apan CO 8th IRB len ding a kisuankhia L. Mangkhogin Haokip, IPS tuni nitaklam in Tuibuong a SP quarter mun ah Police Officers ten khakna nei in belpi tel in thil tuamtuam pia uhi. Hiai hun in L. Mangkhogin Haokip in CCpur Dist. a SP  alet sungin anuai a officerte, constable, VDF, nam makaite leh organ. Tuamtuam te kithuahpihna tung ah kipahthu gen a, tua bang mah a thakhengtu ding leng nungthuap ding in ngen hi. CCpur SP dingin Rakesh Balwal, IPS hongpai ding hi.

BSF personnel 1 kipuk:dam zoulou 

Lamka, Sept-23: STC/BSF Mualkoi a omlel (Const. No. 051330037) Kulwant Singh s/o Lilu Ram of Barwala village, Hissar Dist. Haryana, tuzing dak 4:00 velin barrack apan dining hall ah singpi dawnding apailai kipuk a, BSF hospital ah first aid piak nung Dist. Hospital ah puaklut himahleh damzoulou in si hi. Alawm te’n Police ah report bawl uh a, RIMS ah postmortem bawl ding in puak hi a, Police te’n Unnatural Dealth (UD) Case No.4/CCP-PS 2016 U/S 174 CrPC registered uhi.

CEO,ADC/CCpur  in U-DISE trg hong

Lamka, Sept-23: Soiminlian Lengen, CEO/ADC in tuni’n Hiangtam Lamka a YPA Gen HQ Hall ah Student Database Management Information System (U-DISE 2016-17) tawh kisai 2-day awareness/training hong hi. Huai ah Functional President in T.Goukhomang, ZEO/CCpur pang a, ZEO leh CEO nuai a CCpur block leh Henglep block a Headmistress/Headmaster-te leh Pincipal-te tel uh a,Biren Singh, Dist. Coordinator/MIS leh K.Dhanabir, State Coordinator, RMSA te’n sinsak uhi.

CEO in  gam tuamtuamte’n health & education ngai poimawh uh a, India leng education ah khangtou in Manipur a dist. teng lak ah CCpur dist. khangtoupen hi’n gen hi. SSA, RMSA in quality education enkai a, next generation ading in teacher-te poimawh petmah hi’n gen hi. Huai dingin  Headmaster/Principal te’n kuhkal leh chitak dingin ngen hi. Sept 24, 2016 in Singngat block, Tipaimukh, Thanlon leh Samulamlan block nuai a private leh govt school a Principal, Headmaster/Headmistress-te training ding uhi.

Oct 11, 2016 tan govt hun pia

Lamka, Sept-23: Saikot Sub-Divn. Demand Committee (SSDDC), Hausa leh V/A te’n tuni’n DC kimuhpih in Manipur Chief Minister, Revenue Minister leh RD & PR Minister ading memorandum pia uhi. Saikot Sub-Divn. Office ah SDO ding MCS koih ding leh office run theih ding staff kining ching Oct 11, 2016 tana koih ding in hun pia uh a, Oct 15, 2016 tana SDO/Saikot function sak ahihkeileh nuakna (agitation) pat hiding in govt vau uhi.

A/C 6 ah Gram Sabha nei ding

Lamka, Sept-23: Special Summary Revision 2017 tawh kisai Assembly Constituency 6 ah Sept 24, 2016 in Gram Sabha neih hiding a, AERO, BLO, V/A, Youth Club makai-te ban ah mipi telding hi. 55-Tipaimukh A/C ah Polling Station- Senvon (A), (B), (C) leh Vangai area ah Patpuihmun ah neih hiding hi. 56-Thanlon A/C ah Bukpi (1), Bukpi (2) leh Mualnuam ah neih hiding hi. 57-Henglep A/C ah Tuilumjang, Thenjang, Molpheitampak leh Kangvai ah neih hiding hi. 58-CCpur A/C ah New Lamka a PS tuamtuam New Lamka (A), (B), (C), (N), (D), (E), (E1), (F1), (F2),(C1), (C2), (H), (I),(I-1), (J), (K) leh (L) ah neih hiding hi. 59-Saikot A/C ah Kholmun (A) leh (B) ah neih hiding hi. 60-Singngat A/C ah Singngat (A), (B) (C) leh Sangaikot ah neih hiding hi.

Joint Fellowship nei ding

Lamka, Sept-23: Hmar Artists Assn(HAA), Kuki Artists Progressive Union (KAPU) leh Zogam Artists Assn(ZAA) pawlin Oct 15, 2016(Saturday) in Dorcas Hall Mini Auditorium, New Lamka ah ‘Campaign for Unity Through Music’ paipih in  Joint Fellowship neikhawm ding uh a, huai ding tawh kisai in zingchiang(Sept 24) in Lengtonghoih Recording Studio ah laa sak dingte etkhawmna kipan ding hi’n thusuah bawl uhi. Fellowship hun ding Oct 8 chih himahleh lemtang zaw ding etna a Oct 15 dia suan a om hi’n gen uhi.

Siktui Vengnuam League hun khakna

Vengnuam United Soccer (VENUS) te saina a ‘The 1st Siktui Vengnuam League’ neih a om hun khakna Sept. 24, 2016 in om ding hi. Hiai hun in M. Gouzamang Guite, EM/ADCC in uap ding a, closing ceremony ah League Champion FCO leh Venus Board te friendly match kimawl ding uhi. Siktui Vengnuam League ah team tuamtuam 12 kihel ua, amaute khatvei  chiat kimawltuah ua, tua ah FCO ten point 25 mu ua, VASA te tawh point kikim mahle uh goal a khum tam zawk ziakun FCO ten champion la ua, VASA te nihna ah om uhi.

Final League standings:

1. FCO 11 25

2. VASA 11 25

3. Pethuel  FC 11 22

4. VKMFT 11 20

5. Khanglai FC 11 20

6. Kanaan YC 11 18

7. Khominthang 11 15

8. EUS 11 14

9. Khimkhem 11 11

10. Munhoih FC 11 08

11. Milaar Blue 11 05

S. Muvanlai leh S. Vengnuam  ZPYP-te'n champion la uh

Zou Presbyterian Youth Fellowship in Diamond Jubilee cheplawkna in Zomi Colony a ZPCS Campus ah Diamond Jubilee Celebration Committee saina numei leh pasal volleyball tournament asai uh tuni sunnung in zou uhi. Final (pasal) ah S. Muvanlai ZPYF leh Hiangtam (B) ZPYF  kimawl uh a, S. Muvanlai in champion la a, numei ah S. Vengnuam ZPYF  leh ZPYF Central Church kimawl in S. Vengnuam in champion la hi. Champion team in kipahman in Rs. 5,000/- + medal sang uh a, Runners-up in Rs. 3,000/- + medal sang uhi. 

Huai hun ah Chief Guest in M. Zamkholian, Headmaster, Chinkham Modern School pang a, Guest of Honour in S. Jamliankhup, SI, Functional President in Upa Hauliankhup ban ah Chief Host in Siama, Singngat/OC pang hi. Tournament ah ZPCS nuai a Dist. 10 apan pasal team 12 leh numei  team 9 kihel uhi.

IMPHAL NEWS:

MHA in UPF leh KNO-te a ding in Rs. 4.4 crore pia

Imphal, Sept-23: Union Ministry of Home Affairs (MHA) in SoO nuai a om KNO leh UPF-te stipend ding in Manipur govt. tungtawn in Rs. 4,40,20,000 pia hi. Manipur govt. in KNO leh UPF te’n SoO zat ahih apan in separate state phut ding tupna nei lou uh chi’n gen uh a, himahleh pawl 2 a palaite’n New Delhi ah June 15, 2016 ni a tripartite political dialogue masapen hun in a thilphutna lak uah poimawhpen  Manipur gam kek in separate state bawl khiak ding telsak uhi. Thusuak in a taklatna ah Sept 2013 apan Feb 2015 tan a UPF leh KNO cadre-te stipend piakna dia RBI advise na in MHA in state govt. kiangah Rs. 4,40,74,000 pia uhi. State govt. in Rehabilitation scheme modules tungtawn a UG 2-te kiangah stipend piak ding tawh kisai proposal Rs. 7,07,28,000 a bawl uh 100% lakah MHA in Rs. 4,24,2000 (60%) pia uhi. Home Ministry thusuak in UPF ah cadre 1004 leh KNO ah cadre 1096 om a, Rehabilitation Scheme for Surrendered UGs nuai ah cadre-te kiangah stipends piak hi a, MHA in sum piakkhiak-te reimbursement bawl hi’n gen uhi.

Solar rooftop project tawh kisai a hearing om ding

Imphal, Sept-23: Manipur Renewal Energy Development Agency te’n Solar rooftop project a levellised tariff ding tawh kisai in Joint Electricity Regulatory Commission for Manipur leh Mizoram te’n Hotel Classic a Regency Hall ah Sept 26, 2016 sunnung dak 1:00 apan nitaklam dak 3:00 tan public hearing om ding hi’n taklang uhi.

Gari guk sawm mankhia

Imphal, Sept-23: Keishampat a Electricity Office mai ah Maruti Car kikoih mi 1 in a guk sawm laitak in security guard numei khat in tuni sunnung dak 1:30 vel a mankhia hi’n kigen hi. Akigendan in gari guk sawm Md. Sanathoi (41) s/o Md. Nijamuddin of Thoubal Leishangthem hi a, Maruti Car (No. WB02X-3178) kongkhak hong sawm a, a omdan ginglelh huai sak banah amah gari hilou chih a theih ziak a security guard in dotna tuamtuam va bawl a, huai nung in thil omdan a kiang a mipi omte a theihsak nung in Md. Sanathoi matkhiak banah soisak nung in police khut ah pekhia uhi.

Non-local mi 80 val mankhia

Imphal, Sept-23: State govt. in Manipur tualsuak mite humbitna dia ILPS tawh kisai a dan bawlkhiak ding phutna in kiphinna a neih uh khauhsak sem uh a, bangzah vei hiam theihsak nung in Manipur ah non-local-te  pawlut travel agency khat khaksak uhi. Ibobi makaihna nuai a govt. in bill thak bawlkhiak ding lawhsam chih ziak in JCILPS te’n zan apan Manipur ah non-local-te tungah ‘Total ban’ puang uh a, huai hun ah BK Moirangcha, Convener, JCILPS in non-local-te tungah ‘ban’ puang banah Union Minister in Manipur hongphak ding boycott uh chi a, Sept 21, 2016 tan a hunbikhiah himahleh state govt. in bill a luikhiak louh banah ILPS tawh kisai a bill pass lou uh a, ban in non-local students leh govt. employee-te huam lou ding hi’n gen uhi. JCILPS te’n non-local-te tungah ban a puang uh sawtlou nung in zan nitak dak 10:00 velin Sagolband area a ILPS volunteer te’n NH-37 ah non-local mi 59 mankhia uh a, non-local-te tuanna passenger gari- Cruizer 1 leh Tata Sumo 3 suksiat sak uh hi’n kigen hi.

Huailou in JCILPS a nupi pawl te’n NH-2 in a tawt khak Sekmai mun ah tuni’n Dimapur apan Imphal zuan passenger gari-te checking a bawlna uah non-local mi 21 mankhia uh a, Thoubal district a Sewa Power Project mun ah nasem ding in Manipur honglut uh a, Th. Apabi, Convenor, JCILPS Womeng’s Wing in mi 21-te sawl kik hi uh a, JCILPS-te thupiakna kalh inter-state buses leh travelling agenciens-te tungah action lak hiding in gen hi. JCILPS Convener in Travel Agency – Triveni Travel-te tungah gawtna dan in Imphal a booking counter  kha 1 sung khak ding in thupia uh a, JCILPS-te thupiak kalh-te gawtna piak hiding in gen hi.

Economic blockade bawl sawm 

Imphal, Sept-23: Flood Victims Demand Committee (FVDC) Chandel te’n Sept 25, 2016 zankim apan Imphal-Moreh leh Chandel District HQ - Chakpikarong lampi-te ah economic blockade bawl sawm uh hi’n kigen hi. FVDC te’n tuni a joint meeting nei uh a, mass protest, sit-in-protest leh memorandum bangzah vei hiam piak nung tanpha a akisaipih thuneite apan dawnna kichiantak om louh ziak in economic blockade bawl ding in thupuakna bawl uhi.

PET ading hun bikhiah thak

Police Constable (Male/Civil) 2000 lakna dingin Pangei a Police Training College ah Aug 30-Sept 22,2016 sung Physical Efficiency Test (PET) omlai atel theilou  district tuamtuam a candidate-te adingin Manipur Police in Sept 24-Oct 7, 2016 tan  zinglam dak 8:00 leh nitaklam dak 4:00 kikal PET om dingin anuai bang in bikhiah hi.

Date                          District 

Sept 24 & 25, 2016 : CCpur district

Sept 26, 2016          : Senapati & Tamenglong

Sept 27, 2016          : Chandel & Ukhrul

Sept 28 & 29, 2016 : Bishnupur 

Sept 30 to Oct 2, 2016: Thoubal

Oct 3 & 4, 2016     :        Imphal East & Jiri sub-divn

Oct 5 to Oct 7,2016: Imphal West

MCS Officer 16 kaisang

Manipur govt in Manipur Civil Service(MCS) grade-II mi 16 tuni in MCS(grade-I) payscale Rs. 15,600-39,100+grade pay Rs.6,600 in kaisang sak hi. MCS grade-I a kaisang Officer-te anuai abang hi uhi.

1. Kh. Lalmani Singh, MCS

2. H. Balkrishna Singh, MCS

3. Ng. Bhogendra Meitei, MCS

4. Chingakham Shachi, MCS

5. W. Ibohal Singh, MCS

6. L. Kirankumar Singh, MCS

7. N. Gojendro Singh, MCS

8. Kajaigai Gangmei, MCS

9. Regina Hongray, MCS

10. T. Kammuanlal Simte, MCS

11. G. Shantikumar Kabui, MCS

12. M. Kamala Devi, MCS

13. S. Kunjakishore Singh, MCS

14. A. Sivadas Sharma, MCS

15. A.S. Elias, MCS

16. K.H. Leiyaphi Rita, MCS

TUNI THUPI:

“Ni tum dia a kisak sialsial laiin, Abram a na ihmu hithit a; huchiin, ngaiin, a mial a mial, thil mulkimhuai petmahin amah a honkhuh a.”  –Genesis 15:12

EDITORIAL:

Uri thiltung leh Manipur 

Jammu and Kashmir state a om Uri ah security force-te munpi luhin om a, hiai mun ahihleh Line of Control (LoC) adia a defence ministry tela security force te’n muanhuai asakna mun mahmah uh ahi hi. Punjab a Pathankot base camp attacked a om nung sawtlou a hiai LoC mun a om Uri based camp luh a ompen thil mak mahmah hi a, India ading inleng kivelna ding tamtak om hi. Indian security force-te lakah Pakistan tawsawn banah Pakistan adia pang security personnel bangzah a om dia chih bang leng ngaihsuttham pha mahmah a, tua ziakin India in Intelligence wing lam a sukhat poimawh hilou hiam chih bang hon ngaihtuahsak hi.

Gam-le-nam, khua-le-tui adia kipumpiak sepaih hangsan siluang 18 in Uri mun a sihna atuah un mipi su lungphawng mahmah a, abiktakin Prime Minister Narendra Modi makaih BJP Government adingin zahlakna liantak leng ahi hi. Tuni apan ni 3 sung daihding BJP National Executive Meeting om ah Uri terror attacked case in hun zapi uap chih hi a, security lam ah India bitlou ahihdan chiang hun tawkin kilang chihna himai hi. Ruling BJP-te amau sung aguktakin buai uh a, huaibanah, Jammu and Kashmir a vaihawmna len PDP sung leng buai mahmah hi’n kigen hi.

Central ah Congress in vaihawmna alet hunin Pakistani helpawlte maingal huntawk uh a, BJP in hon let hunin a zia omdeuh tawh kibangin kilang hi. Himahleh, BJP Government akhauh pai tawh kitonin Pakistan tawsawn helpawlte uang deuhdeuh ding dinmun in om zel uh a, India maban ding hong bangchi paitouh diam chih gen haksa mahmah lai hi. Alehlam daih genin, New Delhi inleng Pakistan ah helpawl bangzah tawsawn a, bangzah sawllut ta hiam chih leng theikhang, himahleh, gamnih kikal ah kibeihtuahna hong sangtou deuhdeuh ding banga, South Korea leh North Korea-te kala thiltung, Israel leh Palestinian kala thil om dante i maituah touhtouh ding uh bang hi.

Gamgi vai a thiltung i gen kawmkawm un Manipur ah bangteng hongtung ding hiam chih i theikei a, kumnawn 2017 pen kipahna bukim tawh kivaidawn ding uhiam chih leng genngam khang. Manipur adia helpawl upa mahmah NSCN (IM) leh Govt of India in peace agreement tawh kisai in ‘frame work’ bukimtak neita uh a, HPC (D) leh Mizoram Govt in lah peace talks neilel kawmin kilemna neiding in kisa uhi. Huchih lai in, Manipur state sung apanin KNO/UPF in Manipur state apan pawtkhiak ding gelna ziakin central government apan ‘separate state’ chih tangkoupihta! Manipur phaizangmi bangzahhiam lah Schedule Tribe deihna ziakin kiphin uh a, Inner Line Permit System phutna ziakin annngawl a kiphinna nei lah beilou. Tualou in bandh leh strike kichi niteng in om lai…!!!

Myanmar’s leader Aung San Suu Kyi in tutung United Nations General Assembly (UNGA) a a thugenna chiamteh tham mahmah chingkhat bel ‘Tualsuakmi (Indigenous) kichi bawltawm theih hilou a, i mel-le-puam banah i khawsakna leh i tendan banah i tawn danin hon pawkhe mai hi. Suahtakna kichi i goutan ahi a, huai pen thagum a hon henkoltute apan i kipekkhiakna dingin, sual ana ngai mah hi’ chi hi. Suu Kyi in bangteng kap utna aneih ziaka hibang kampau zanghiam chih bel theikhang, sui tuak tamtak om a, India gamsung lah buai deuhdeuh, Manipur state lah buai semsem ding ahihmanin heutute’ adingin ngaihtuahna ding thil tamtak apian deihhuai mahmah hi.

Uri mun a thiltung bangbang Manipur state ah hongtung kei ding i chi ngamkei hi. Huai sanga huaise zawsem leng hongtung thei gige hi. Zanin Imphal’ Tulihal Airport ah New Delhi-Via-Guwahati zuanding Air Asia flight ah passenger khat in ka vansung ah bomb a om chi a, tua ziakin lenna hun sawtkuamtak hih zekai in om hi. Hiai pen bang tupna ahi dia? I gen minthang mahmah uh Jammu and Kashmir state tel a India state tuamtuam a thiltung tuamtuamte bang i phut touh ding uh ahih mel kuan a thei a? Manipur phaizang helpawl lianteng kigawmna CorCom pawl state hi’n central government in akhen dai taktak diam? Manipur state pen laisiam bangzahhiam lel in Drama/ Lila tawh akibang a kimawlpih utawh kibang in omlel hi.