HEADLINES:
“India in software, Pakistan in Terrorist thonkhia” - Modi
Armed Force Chief 3 in tuni’n PM Modi kimuhpih
 |
| http://im.rediff.com/ |
New Delhi, Sept-24: Chief of Army Staff , Air Force Chief leh Vice Chief of the Navy te’n tuni in Prime Minister Narendra Modi a tenna inn ah kimuhpih uh a, huai hun ah Jammu & Kashmir dinmun banah India maban ding telin thu tuamtuam genkhawm uhi. Service’ Chief 3 te’n Uri attack tungtang amuhdan uh tawh kisai Prime Minister kiangah gen uh a, Prime Minister in leng ngaihdan khenkhat a neihte genkhia hi. Tuni a PM kimuhpihte Army Chief General Dalbir Singh Suhag, Air Chief Marshal Arup Raha leh Vice Chief of Naval Staff Vice Admiral K B Singh hi uh a, National security advisor Ajit Doval leng amaute lakah kihel a, Navy Chief Admiral Sunil Lanba gamdang ah a zinkhiak laitak ahih ziakin amah sikin Vice Chief of Naval Staff Vice Admiral K B Singh tel hi’n gen uhi. Army Chief in Uri attack a sepaih 18 a sihna tawh kisai in Prime Minister Modi leh PMO official tamtak mukhinta chihthu om a, tuni a meeting hunah India a security dinmun banah Pakistan in a nawk gige Jammu & Kashmir dinmun leng genkhawm uh a, helpawlte tunga khauhtaka panlak dingdan tanpha gen uh chihthu leng om hi.
India in technology lam ah masawnna thupitak nei in ‘Software’ thonkhia(export) a, huchihlai in Pakistan in minautang that thei ding Terrorist thonkhia hi’n Prime Minister in tunitaklam in gen hi. Uri terror attack om nung a Prime Minister in mipi maia athugen masakna hiding in, Kerala a Kozhikod munah tunitaklam in BJP Rally uap a, Uri attack a Army 18 sihna India in mangngilh ngeilou ahihdan gen in, asisan uh athawn in luanglou ding chi hi. Prime Minister in mipi paikhawmte laka athugen hun in Pakistan makaite leng vau a, South Asia a terrorist-te munpi omsun Pakistan ahi chi in, Osama-Bin-Laden telin helpawl makai tamtakte Pakistan ah zalentak a khawsa uh ahihdan gen a, helpawlte mai ah India kun ngeilou ding chi hi. Prime Minister in agenzelna ah India hihsiat sawm in, Pakistan in tumazek apan terrorist 17vei hon thonkhia a, huaite lawhchinglou in India army te’n zouvek uh chi hi. Kha tamlou paisa sungin terrorist 110 val thah a om hi’n leng Prime Minister in gen hi.
LOCAL NEWS:
PHED Minister in office hong
Lamka, Sept-24:Dist. Congress Committee, CCpur in tuni zinglam in Bijang a Family Lane ah DCC office ding honna tawh kithuah state govt. in MDC 2 a nominate (M. Chungpa Kom leh Holjang Lhungdim) vaidawnna nei uh a, programme zawh in meeting leng nei uhi.
Huai hun ah T. Manga Vaiphei, Minister (PHED) in DCC office ding hong a, Rev. Dr. V. Lalnghakthang in lan hi. Minister in a genna ah Congress party kichi secular ahih dungzui in biakna ah khentuam neilou hi’n gen a, maban a assembly election ah leng Congress party mah in govt bawl ding hi’n gen a, congress member-te lungkelou ding in hasuan hi.
Khaipao Haokip, MDC/Kholmun in Congress-te adin lungkiakna ding omlou a, Manipur CM Ibobi in Oct. 11, 2016 in CCpur dist. hongpha ding a, Peace Ground ah public meeting uap ding hi’n gen a, huai tawh kisai local MLA tengin arrangement bawlkhin uh a, huai hun ah mun teng phathei ding hi’n gen hi. Programme hunsung in CCpur dist. a Independent a MDC ching Pumtulthang Lienzaw in Congress party zomthak ahihdan puankhiak hi a, aman leng thugen hi. Huai hun ah Congress party atel K.C. Chonsei, MDC; Paolal Haokip, MDC; Ngamhao Touthang, MDC; Demmang Haokip, MDC leh Block level a Congress makaite tel uhi.
YVA Ambulance thak latna om
Lamka, Sept-24: Young Vaiphei Assn (YVA) Gen. HQ in damlou leh panpih ngaite khualna a Ambulance alei tuni’n B. Phaicham Community Hall ah Rev. Dr. Th. Lamboi Vaiphei in Pathian kiang ah lan hi.Huai hun ah VPC GHQ makaite, T. Manga Vaiphei, Minister PHED, JN Baite, MDC/Moreh leh P. Kamkholal Vaiphei, MDC/Haopi Range telin Vaiphei sunga mi poimawh tuamtuam in uap uhi.
Lalkithang, Chairman, Project Board in Ambulance tawh kisai agenna ah YVA GHQ in Central Working Committee tawh meeting tamveitak neih nungin March 2016 in Ambulance Project kipan hi’n gen hi. Ambulance adia senna teng Rs. 12 lakhs val hi’n gen hi. Tuni a programme sungin Rev. C. Zorammawia, A.S, Manipur Area MPCS telin mi poimawh tuamtuam in thugen uh a, Manipur Area Choir, MPCS; EOC Central Choir leh BPYF (B. Phaicham) te’n lapawl sa uhi. Ambulance bel Chennai a Ashok Leyland Company in a bawl hi a, Aug. kha a ki-rder tukha Sept. 2, 2016 in Lamka tut hi a, ambulance thak lopna in a paikhawmte’n ankuang umkhawm uhi.
Ex-Servicemen Rally om
Lamka, Sept-24: Khuga Dam a om Khuga Battalion (6th Sikh Light Infantry) saina in tuni’n Indian Army panglui (Ex-servicemen)-te a dingin ex-servicemen rally om a, huai ah Ex-Servicemen Ass., tuamtaum apan member 200 kihel in Lunminthang Haokip, IAS DC/CCPur leh SP/CCPur thak Rakesh Balwan, IPS banah Brig. Ajay Kumar, CO 27 Sector Assam Rifles te’n leng uap uhi. Huai ah pension tawh kisai buaina neite’ a dingin Suvigya Cell hong uh a, SBI Extension Counter a koih ban uah natna tuamtuam neite a din medical camp leng nei in CSD canteen leng hong uhi.
Brig. Ajay Kumar, CO 27 Sector Assam Rifles in agenna ah hiai rally kichi spaih pangluite’n haksatna tuamtuam aneihte uh tutna dia sai a om hi’n gen a, July 2016 tanin ex-servicemen 500 valin pension tawh kisai haksatna tun uh a, tutan in ex-servicemen leh meithai kigawm 142 case hihvengsak hita chi’n gen a, huailak ah ex-servicemen 57 val ading treasury tungtawn in amau bank account chiat ah pension sum thunkhit hita chi’n gen hi. CCpur dist. a tuailaite khualna in Khuga Dam, 7 Assam Rifles leh Singngat ah Pre-recruitment rally neih in om a, mipi ngetna bangin CCpur dist. ah leng recruitment rally neih theihna dia panlak uh hidan in gen a, April 2017 tan in neihtheih lam-et thu gen hi.
MZP Manipur Annual Conf- cum-Meritorious Award
Lamka, Sept-24: Mizo Zirlai Pawl (MZP) HQ Manipur in tuni’n Hmuia Veng a YMA hall ah Annual Conference 43veina tawh kithuah in tukum lawhchinna tuamtuam ngahte kipahpihna hun zang uh a, Chief Guest in Joseph Lalhimpuia, Parliamentary Secy, Govt. of Mizoram pang hi. Guest of Honour in Lungmuana Lakher, IAS, Principal Secy, Govt. of Manipur leh JC Ramthanga, IAS, Principal Secy pang uh a, Functional President in B. Vanlaltana, Vice President, MZP GHQ pang a Chief host in Vanlalrinliana, President, MPC Manipur pang hi.
Chief Guest in a thugenna ah, mi nam kal a om ihihman in, kuapeuh in mahni nam (Mizo) tawisang sawm a panla dingin ngen a, siamsinna lou khawsuahna ding omlou a, laisiamte kuama’n musit ngeilou ahihman in siamsinna mah pibawl a naktak a tawisang dingin siamsinte ngen hi.
MZP sunga Class X & XII Board tuamtuam a mark mutampen 3na tan kiang ah kipahpihna in memento leh sum pia uh a, Mizo subject topper-te kiang ah memento leh Rs. 1000/- a piak ban uah Graduation level a mark mutam pente kiang ah certificate leh Rs. 2,000/- chiat pia uhi. Kumlui leh tukum a deptt tuamtuam a sepna muthak leh Ph.D ngahthak mi 6 kiang ah certificate pia uhi.Huai hun ah MZP Lamka Branch te’n namlam alah ban uah lasiam tuamtuam leh CCpur Dist. a Student Orgn. tuamtuam a makaite’n leng uap uhi.
Singtangmite pilvang di'n deih
New Delhi, Sept-24: Tribal Students’ Union, Manipur te’n India gam khawpi tuamtuam a om Manipr singtangmite pilvang dingin deihthu zasak uhi. JCILPS pawlin Non-Manipuri mite Manipur a lut theilou dingin Sept 23, 2016 akipan ‘Total Ban’ a puan ziakun Vaite’n New Delhi, Mumbai, Bangalore,Pune leh India gam khawpi tuamtuam a om Manipur mite tunga phuba la u tom dinga ginlelh ziakin singtangmite pilvang chiat ding leh train hiam metro ah mi khat kia tuang hetlou dingin leng theisak uhi. Mun tuamtuam a nasem a om numeite leng sun hi’n nitak hileh nasepna mun hiam omna inn a pai hun ah pilvan theihtawp suah dinga theihsak hi uhi. Nitak in lawmte tawh leng potkhiak louh ding, night shopping a pailouh ding, pai teitei a poimawh leleng a honpi(group) hih ding chih tanpha in pilvan deihna ziakin Tribal Students’ Union Manipur pawlin thusuah bawl uh a,pilvanlouh ziaka mualphou taka om theih laitak hi’n leng taklang uhi.
Bukpi ATWU leh Joseph in morgue veh
Lamka, Sept-24: All Tribal Women Union (Bukpi) te’n tuni’n dist. hospital a morgue pha in, salpha 9te zahna pekawm in programme zang uh a, Pumzalam, Adviser, ATWU/Bukpi in makai hi. Pumzalam, Adviser in agenna ah numeite’ panlakna election politics ahihlouh ban ah kuahiam dinmun ding bawlna hilou in, 6th schedule deihna ziak hi’n gen hi. Nitaklam in Joseph Lalhimpuia, Parliamentary Secy, Govt. of Mizoram makaih a teamte’n leng morgue pha in salphate zahna pekawm in galna nei uh a, huai ah Joseph in Salpha innkuante kiang ah a galna danin puanza 1 chiat pia hi. Benjamin, President, Lunglei MZP Hqtrs & Vice President, MZP GHQ in Manipur a singtang mipihte thuakna Mizoram a omte’n leng thei in thuakpih ahihdan uh gen a, saptuam leh mipi’n thumna ah phawk gige uh a, pankhawmna in maban ah lawhchinna hongtun ding lam-et thu gen hi. Huai hun ah JAC-AATB leh ATWU makaite leng kihel uhi.
Damna Khrista kichi album thak hong
Lamka, Sept-24: Khuga Sadar Presbytery nuai a Khristian Khanglai Pawl (KKP), T. Lawklaiphai in Gospel music video album abawl ‘Damna Khrista’ kichi T. Lawklaiphai khua ah tuni’n Chief Guest Letzamang Haokip, APO, DRDA/CCpur in hong hi. Huai ah Guest of Honour in Genneikhup Vaiphei, EM, ADC/CCpur leh Functional President in S. Genlunthang Vaiphei, Chief of T. Lawklaiphai pang hi. Chief Guest in album thak a honkhiak zawh in Rev. HL Vena, bialtu Pastor in lan a, khualliante akipan thugen ngaihkhiak in om hi.
SUUNNA:
Niengkholhing (100) m/o Thangcha of Gangpimual tunitaklam dak 1:30 vel in teknat in si a, Sept. 25, 2016 in Gangpimual hanmual ah kivui ding hi.
IMPHAL NEWS:
Bill 3te Assembly election ma in fel ding: Gaikhangam, Dy. CM
Imphal, Sept-24: Manipur Deputy CM Gaikhangam in tuni in bill thum tawh kisai a buaina om pen maban assembly election om hun ding puankhiak ma hih fel hiding in gen hi. Gaikhangam in tuni a reporters te akimuhpihna ah bill thum lak a khatpen bawlthak in om a, tua tawh kisai assembly a passed na ding a chiklaipeuh a assembly sap theih hidingin gen hi. Assembly in bill pending a om pen Election Code of Conduct om ma ngei a hih fel hiding in gen hi. Hiai tawh kisai a JCILPS leh JAC against anti-tribal bills ten a ngaihdan a piakte uh hoihtak in en ua, govt,. in thutanna kichiantak a bawl theihna ding a kuapeuh in panla chiat dingin ngen hi.
Non-local 18 mankhia
Imphal, Sept-24: JCILPS pawl in non-local tawh kisai drive a neih uh ni 2 chingta a, tua tawh kiton in tuni in Mao akipan bus a hongtuang non-local mi 18 vel ding North AOC ah mankhia uhi. Amau bel inter-state bus in Guwahati akipan in Mao tan hongtuang ua, huai akipan in Inter-district bus in Imphal hongtung uhi. Tamenglong district a Simplex Company ten nasem ding a hired uh hi a, tua ziakin JCILPS convenor BK Moirangthem in Simplex Company te kiangah hiai tawh kisai thudik mah hiam chih chetna ding a JCILPS office a pha ding in theisak hi. Hiai tawh kisai a travel agency ‘Blue Hills’ ten non-local tamtak Manipur a puaklut zel ziakun booking counter uh khakhat khak ding in theisak uhi.
Truck accident in mi 2 delhlum
Imphal, Sept-24: Jiribam Hmar veng ah tuni nitaklam dak 2:30 velin suang pua truck khat accident a, huai ah lam khang a om tenna inn khat delh kha a, a sung a om nupi khat leh naungek khat delhlum hidan in kigen hi. A kigendan in truck in a delhlup nupi bel Lalngaikim (34) w/o Lalvarlien leh a tanu Catherine Zosangkim (9 months) h’n kigen hi. JCB zangin gari lakkhiak hi a, himahleh nutate si khinta uhi.
Hand grenade khat mukhia
Imphal, Sept-24: Imphal East police station huamsung Moirang Kampu village a om Indira Devi tenna inn ah meltheihlouh kuate hiam in a koih uh handgrenade tuni zingkal dak 7:00 in muh in om a, kintak in police te thuzak in om a, police bomb siamte valakhia uhi. Indira Devi bel Moirang Kampu village a Pradhan in hidan in kigen hi. Hiai tawh kisai mawhpaihna in vengsung mipiten Khurai Lamlong Bazar ah sit-in-protest nei uhi.
Mock test recruitment rally
Imphal, Sept-24: HQ IGAR (South) nuai a om 9 Sector Assam Rifles a 12 Bihar ten zan in Chandel district sung Kampang Khunou mun ah tuailai pasal te lakah mock test recruitment nei ua, tua hun in tuailai sepaih a lunglut mi 70 vel ding kihel uhi. Hiai hun in sepaih lunglutten recruitment rally om chiang a neih zelte uh km. 1.6 tai, chin-ups, 9 feet ditch jump leh beam balance chihte hi ua, nu leh pa tamtak in hiai bang thil 12 Bihar ten a neih uh pakta mahmah uh hidan in kigen hi. Zan a mock test recruitment rally a tel ten Oct. 16-21, 2016 a Senapati mun a army recruitment om hun a hamphatpih ngei uh lametthu kigen hi.
Thudang khat ah 12 Bihar ten zan in Chandel District sung Kampang Khunou village mun ah HIV tawh kisai awareness programme nei ua, tua hun in local mi tamtak kihel ua, tamtak in hamphatpih uh lamet ahi. Huai hun khua bangzahhiam akipan hausa inleng uap uhi.
Monsang tribe te'n festival zang
Imphal, Sept-24: Monsang tribe ten tuni in Liwachangning Youth & Cultural Club (LYCC) te saina in Chandel District a Liwachangning Village mun ah 58th Eler Lungha Savaang Rotha Ekur kichi autumn festival thupitak in zang uhi. Hiai festival bel Monsang tribe ten a tawndante uh kepbitna ding a neih zel uh hidan in kigen hi. Tuni a 58veina zatna hun Liwachangning village Chief te nupa Ng. Gilbert leh Ts Nelly ten Chief Guest leh Functional President hihna tawh uap uh a, tribe leaders, villager elders leh church leaders tamtak in uap uhi. Hiai hun in Monsang tribe te tawndan tuamtuam lahna om a, cultural dance tel in siamna chi tuamtuam a neihte uh mipi paikhawmte mai ah lahna om hi. Hiai festival bel Monsang tribe ten kumteng a neih uh ahi.
Helpawl a tel 1 mankhia
Imphal, Sept-24: PIB (Defence) thusuak in Thoubal District Police Commando leh 2-A/R combine team te’n zan nitaklam dak 2:30 velin Thoubal keithel mun a operation abawlna uah KYKL a cadre 1 mankhia uh hi’n kigen hi. Mat a om Akoijam Suresh (48) s/o (late) Ak. Yaima of Thoubal Keithel hi a, KYKL a Khelemba kichi nuai ah nasem in Namphalong (Myanmar) a Khelemba mun ah KYKL pawl adia sum khontu ahihdan kipuang a, tukum sung a bank tungtawn in Rs. 50,000 leh Rs. 12,000 thon lut a, sumte Wangjing brick field leh school tuamtuam apan sum khonkhiak-te hi’n gen uhi. Hiai thu tawh kisai in FIR No.127 (9)2016 TBL PS U/S 17/20 UA ( p ) Act chiamteh a om hi’n gen uhi.
JDDC in kiphinna panthak uh
Imphal, Sept-24: Jiribam District Demand Committee (JDCC) ten full-fledged revenue district piak ding deihna a kiphinna aneih uh sunzom tou zel in tuni in kiphinna a thak in pan nawn ua, sit-in-protest nei uhi. JDDC pawl in state govt. in hiai tawh kisai piak dingin chiam mahleh tunitan bangmah hih tangtunglou in dai dide a, tua ziakin JDDC te om mai-mai thei nawnlou ua, thuchiam a bawl bang ua hih tangtung dingin gen uhi. JDDC leh Manipur State in Nov. 9, 2011 in Jiribam Sub-Division full district a dopsang dingin MoU suaikai ua, himahleh tunitan in state govt. in bangmah sepsuah nei nailou hi.
TUNI THUPI:
“Thil hihhoih lechin pahtak na lawh kei dia hia? Na hih oih kei a a hihlebel khelhna kongkhak bulah a kual nilouh hi”
– Genesis 4:7
EDITORIAL:
I thilchin deih huailoute
Tulai in i gam ah mi tamtakte’ thilchin awlmawhhuai khenkhat hong kigen minthang mahmah a, abiktakin TV leh film tuamtuam ah leng a hoihlouhdan taklat a omsek zu, laizial leh tobacco product tuamtuam hong kilang sek hi.Huai a hihte i mawhpaih pumlum kei a, himahleh huai tawh kisai gen dia hoih leh sin dinga hoih tamtak om dingin gintak-huai hi. Huaiziak mah in i damtheihna (health system) adingin a hoih chih theihna ding aziak omlou himhim hizawmah hi. Zu in taksa a neksiatdan, laizial telin tobacco product tuamtuamte’n i taksa a suk khakdante leng hun paisa ah i taklang sek uhi. Zu a dangtak ngoihngoih, laizial duh tuntun ahihkeileh khamtheih tuamtuam lunggulh petmah igam ah tuailai tamtak om a, amaute mawhsa pumlum kei mahlehang mihing taksa adia siatna lauhuai tuntu mai hilou in ahunloupi a sihna tanpha piangsak thilte hibang thilchin lauhuaite himawk hi.
Bangziaktak a eite’n zarda gimnam kuva tuamtuam hichi khop a ngaina i hi ua, zu, laizial leh adangdangte lawm bangkhop a bawl ihi hiam chih ngaihtuahtham ching hi. Hibang thilte’n cancer natna lauhuai tungsak sek uh ahi chih theilou lailai i hi uhiam chih ut-huai hi. Amasa in zu tawh kisai gen lehang, zu in i mihingte’ sin (liver) sukha masapen a, tua zawh chiangin i kal (kidney) hon hetkha ding hi. Liver Functioning Test(LFT) om a, Liver Functioning Test hoihtak a iki-etkhiak zawh chiangin i gilpi teng Ultra Sound bawl poimawh lai hi. Tua kia hilou in, i kal (kidney) dinmun leng etkhiak zel poimawh mahmah hi.
Zudawn mite ading in sin(liver), kal(kidney) leh tuap(lung) banah taksa pumpi leh organ tuamtuamte dinmun(function dan) etkhiak mun poimawh petmah hi. Laizial tep mite’ ading in gawl(throat) leh awm(chest) lak etkai gige poimawh chi’n doctor siamte’n gen uhi. Zu, laizial leh i thilchin uh deihhuailou tuamtuamte ziakin sin natna khawktak mai Hepatitis vei thei om a, huaite A &B azia om mahleh, sinnatna laka lauhuaipen Hepatitis ‘C’ hidanin kigen hi. Huchikalah, khuh thokthok kawm a midangte lawhsawn theih ‘Tuberculosis(TB)’ natna om a, tua in zi leh tate lawhsawn baih mahmah chih ahi hi.
Manipur ah kum tamlou paisa in zu zuak dalna khauhtak omlou a, Lamka khawpi mahmah ah leng kum 1980s hunlai in zalentakin kizuak hi. Tu in bel Dry state chih ahih ziakin zu zuak kham in om a, himahleh a deihte adin bel utna munmun ah zu muthei veve uh a, huai pe’n state govt adingin etthak tuak mahmah hi. Leitung koilai mun peuh ah zu leh khamtheih chi tuamtuam dalzawh vilvel ahikei ding hi.
Mizoram state leng tuma kum tamlou paisa ah wet state ahi a, tu in permit neite adia abawl uh card tawite in leitheih hi. Huai tungtang MNF in complaint tuamtuam bawl mahle uh a lawhchin uh gintak haksa hi. Wine & Beer zuakna a zu kiman zawdeuh a lakpen zu dawn mite adingin hamphatna hizaw a, thamlou in amaute’ damtheihna ding in black a alei sang un zu kimanzaw a dawn uh leng chihtheih hi. Zu, laizial ahihkeileh ganja tel a thil hoihlou tuamtuam hih ahoih chi ihi kei a, himahleh, bangchibang a a hih zongsang (addicted) te kepding hihiam chih leng ngaihsut huai chihna lam hizaw hi.
Hiai i gen kawm in thudang gen tawh tuah lehang Mizoram ah pasal te’n laizial a hai mahmah ua, Manipur singtangmi adiak in CCpur district mipite’n tuibuk hai mahmah uh akichi hi. Hiaite TB kipatna ahi chih doctor te’ gendan leh muhdan ahi hi. TB i chih natna chikhat phetlou in kintaka sihtheihna ahihman in lauhuai mahmah a, huchi hizenpi bangziaka eilak mahmah ah leng TB vei tam ahi diam? Bangziak a leitung pumpi ah hiai ‘TB’ vei pumdim ahidiam chihte ngaihsuttham ching hi. Manipur in leng kum bangzahhiam paisa akipan India govt banah Supreme Court thusuak pansan in tobacco product tawh kisai dalna thusuah bawl mahleh a sepsuahna lam theih hilou hi. Adiakin, laizial leng mipi omkhawmna mun(public place) te ah ut-le-dah in a tep omlai a, dukan tuamtuamte ah laizial leh tobacco product-te deih dandan in muh theihlai hi! Laizial tep ahihleh TB natna veikhakna dia lampi (step) baihsam ahmah ahi hi. Bangteng hileh mihing adingin taksa kep siangthou kichi damtheihna dia poimawh pen khat leng ahi hi.
No comments:
Post a Comment