HEADLINES:
PM makaih in Pakistan’ MFN tungtang genkhawm hiding
Terror attack ziakin India in SAARC Summit uap sawmlou
New Delhi, Sept-27: South Asian Association for Regional Cooperation (SAARC) gam makai te’n November 2016 sungin Islamabad ah Summit nei ding uh a, Pakistan apan cross-border terrorism leh terror attack thiltungte ziakin, Prime Minister Narendra Modi in huai hun uap sawmlou ahihdan gen hi. Pakistan kianga Most Favoured Nation (MFN) Status piak a om tungtang zinghal (Sept 29) in Prime Minister Narendra Modi makaih a genkhawm hiding a, gamdang te’n Pakistan tawh kizopna abeisak theihna ding un panlak sawm uhi.
External Affairs Ministry in tuni a thusuah abawlna ah, helpawl te’n gamgi kantan a terror attack abawlte uh India in ngaikhawk mahmah a, SAARC Summit zintun ding Pakistan tunga lungkimlouh latsakna in, tutung in India kihel theilou ding chi hi. Afghanistan, Bangladesh leh Bhutan inleng SAARC Summit neih a om dingpen boycott puansawm uh a, India mipite haksatna thuakpih thu puang uhi. External Affairs Minister apan thusuakin agenzelna ah Regional Co-operation, Connectivity leh SAARC nuaia gamte’ kithuzakna (contact) tungtang India in ngai poimawh a, huaite sepsuahna di’n panla mahleh Pakistan apan gamtat kilawmlou tamtak omte ziakin nawngkai a, India in terrorism tellou in huaite semsuah ut chi hi.
Pakistan in ‘Most Favoured Nation’ (MFN) Status aneih tungtang zinghal in Prime Minister Narendra Modi makaih a genkhawm hiding a, Ministry of External Affairs leh Commerce Ministry apan senior official tuamtuam kihel ding uhi. Prime Minister leh makai tuamtuam te’n zan in Indus Waters Treaty tungtang genkhawm uh a, Uri Terror attack ziakin Pakistan tawh project neih khawm ding lemsalou uh a, huai treaty tungtawn a project kibawl te leng khawlsak ding in thupuk uhi. Kum 1996 a WTO General Agreement hun in Pakistan kiangah ‘Most Favoured Nation Status’ piak in om a, huai tungtawn in Pakistan in Tariff leh Trade tawh kisai hamphatna ngah hi.
Leilon khua ah State Level Thaziing-Lap zat in om
Lamka, Sept-27: Sadar Hills a Leilon Vaiphei village ah tuni’n ‘The 3rd State Level Thaziing Lap-2016’ zat hi a, Chief Guest in Ngamthang Haokip, IFCD Minister pang a, Functional President in T. Manga Vaiphei, Minister/PHED pang hi. Guests of Honour in Yamthong Haokip, MLA, Saikul A/C; Chief Host in Khatkhotong Baite, President, Vaiphei Peoples’ Council GHQ pang hi.
State Level Thaziing-Lap Celebration Committee saina a programme zat hun ah
Rev. S. Prim Vaiphei, President, All Manipur Christian Orgn (AMCO) in Thaziing-Lap piankhiak dan tawh kisai a genna ah Thaziing-Lap kichi Vaiphei-te kia in a neih Kut hi a, Chin Hills gam a Phaiza-Khuavaiphei ah pupa-te'n kum 1560 vel apan lou nasep tamzaw zawhnung buhlak madeuh August -Sept (Thaziingtha) sungin nawpbawlna in zangsek uh a, kum tengin bawllou uhi. Manipur ah kum 1830 in Salam Patong village a Kulbung Veng ah zatpat hi a, huai ah chiamtehna suangdawh in om hi. Salam Patong khua ah local level a hun sawttak zat ahihnung kum 2012 apan State Level a zat hi a, kum 1 hal a kizang hi’n gen hi.
Chief Guest in a genna ah Vaiphei Nam population et in tawm mahleh literacy rate (laisiamna) ah minuai a omlou in, officer lian tamtak om ahihman in ettonthamching Nam hi'n gen hi. Aman Celebration committee panpihna in Rs. 50,000/- pia hi. Functional President in Thaziing-Lap kichi pupate'n kum tamtak paisa a ana zat uh hi a, culture (tawndan) kepbitna ahihman in kumteng in zat theih dia panlak poimawh hi’n gen hi. Khangthaknte'n culture tamtak mangngilh uh a, atuambik a tawndan i neihte uh khangthak te'n a theihtouh zel theihna ding un suk-hing nawn poimawh a, huai dia panla ding in mipi chial hi.
VPC GHQ President in a genna ah traditional culture neiloute namkhat kichi theilou a, siamna sangtak nei lehang leng culture omsa khahsuah theih hilou a, kepbit poimawh hi'n gen hi thil bangkim ah kithuman a panlakhawm dingin mipi paikhawmte ngen hi. Guest of Honour a chial a om ex-Minister Phungzathang Tonsing a taksa teltheikei mahleh organizing committee-te huhna in PHED Minister tungtawn in Rs. 5,000/- pia hi.
Programme zat sung in Mualkui Folk Song Group te’n folk song (La Khiang La & La Chawm La) leh Torbung Folk Song Group te’n folk song (Chilzaang La) sa uh a, Salam Patong Cultural Troupe, Mata Cultural Troupe leh Leilon Vaiphei Cultural Troupe te’n cultural dance alah ban uah Zillai Imphal Block in Cultural Medley nei uh a, lasiam tuamtuam in leng uap uhi.
LOCAL NEWS:
YPA GHQ te’n Press-te kimuhpih
Lamka, Sept-27: Young Paite Assn (YPA) GHQ in Anti Tribal Bills thu ah Oct 8, 2015 in T. Phungzathang, MLA leh Vungzagin Valte, MLA-te’ ‘Etsan’ a puan uh Sept 21, 2016 in YPA GHQ President kiang ah zukkik ding in ngetna pia uh a, huai thu ah tuni in YPA GHQ makaite’n Press-te kimuhpih in mipi theih dingin thil omdan taklang uhi.
Khailianthang Tonsing, President, YPA GHQ in T. Phungzathang, MLA 58-CCpur A/C leh Vungzagin Valte, MLA 56-Thanlon A/C te’n YPA in ‘Etsan’ apuan zukkik ding a ngetna YPA Cabinet in a genkhawm nungin ngaihdam ngetna bangmah a omlouh ziak in ‘Etsan’ tungtang zukkik theilou hi’n taklang hi. Lianmuanthang Valte, Gen. Secy. YPA GHQ in MLA 2 te Etsanna ziak (1) Singtangmite suse thei ding Bill 3 gum a suai akaih ziak uh (2) Ami-le-sate uh azuak ziak uh hi’n gen a, hunchiam anei kei chi’n taklang hi.
Aug 31, 2015 akipan Bill 3 ziakin mipi’n buaina thupitak tuak in gam-le-nam it mi 9 in ahinna uh tan uh a, aluang uh tutan vui hilou a, mi tamtak liam leh bai in om uh hi’n taklang hi. Hibangteng nung a tuni dong kam khat leng keklou MLA-te koi a om a, bang hih ahi ua? chi’n dotna bawl a, kisikna, poisakna leh ngaihdam ngetna kamkhat leng tellou a Etsan zukkik dia ngetna a bawl uh bang chihna hiam? YPA GHQ Cabinet in omze bei kisa hi’n taklang hi. Bill 3-te tawh kisai thutak om ma leh salpha (martyrs)te luang in vaihawmna/thutanna kichian hontut masiah banah aluang uh vui ahih mateng MLA-te tungtang ngaihtuah ahi kei ding chi’n YPA GHQ Cabinet leh Gen Secy YPA GHQ te’n suaikai uhi.
Boat service ding 4 hongtung
Lamka, Sept-27: Khuga Dam kiang Lamjang gamsung ah tunung sawtlou in Siktui Farms & Resort pat hiding a, huai a zatding in Kolkota apan boat 4 tuni’n hongtung hi. Boat 4 te Vengnuam New Lamka a ngakul ah test in om hi. Boat-te bel mi 2 tuantheihna 1, mi 4 tuan theihna 2 leh mi 6 tuantheihna 1 hi’n kigen hi. Boat atuangte accident a tuahphut ua leh kivenna ding in Life Jacket 16 leh Life board diving 5 leng hongtung a, Resort ah basic facilities zawh chiangin service hidin kigen hi.
M. Gouzamang Guite, EM, ADC in agenna ah Resort mun kilkhat ah Dist. Science Centre bawl hiding a, ICAR, NABARD leh Siktui Farms and Resorts pangkhawm in Dam tung ah len (net) zang a ngasa khoina leng om din gen hi. I gam ah state dang leh gamdang a zuakkhiak theih ding kiningching kineilou a, tourism puah lehang mundang a tourist-te i lailut zawh chiang un i gam in income leh employment tampi piangsak ding chi hi.
Painting & article writing competition
Lamka, Sept-27: DFO, Southern Forest Divn./CCpur saina in tuni sunnung in CCpur College ah spot painting leh spot article writing competition om hi. Huai ah class V-VIII kikal school 16 akipan student 31 te’n “Great Indian Hornbill in its natural habit”chih thupi zang in spot painting competition nei uh a, class IX-XII kikal school 10 apan student 20 te’n “Significance of Wildlife Conservation in CCpur dist.”chih pansan in article writing competition nei uhi.
Spot painting competition ah 1st in Lianmuanlal of Hermon English School; 2nd in Joseph of Don Bosco H/S leh 3rd ah Boyai of Hermon English School pang hi. Spot Article writing competition ah 1st in Aleena Joe Fimrimawi of Young Leaners’ School, 2nd in William D. Ngulkholen of St Mary H/S leh 3rd in G. Lamsuanlal of Rayburn H/S pang hi. Kipahman mu dingte Oct 7, 2016 in Imphal a Wildlife Week, 2016 zat hunah cash prize leh certificate piak hiding uhi.
KSO Gen HQ in theihsakna bawl
Lamka, Sept-27: Seiboi Haokip, Gen. Secy., KSO Gen HQ in thusuah a bawlna ah KSO Ccpur-te term a beih tawh kiton in KSO-CCpur office term 2016-2019 sung a vai paw ding telna Oct 4, 2016 in Tuibuong a KIC Hall ah Election om ding hi. KSO Constitution dungzui KSO-CCpur executive body phiat hi a, Executive thak ding telkhiakma in Caretaker President of Administration dia President guang hi a, Election hun ah President, Vice-President, Gen. Secy., Education Secy leh Finance Secy. telkhiak hiding a, candidate ding te’n Oct 2, 2016 tan a nomination file ding leh Oct 3, 2016 ni a scrutiny om ding hi. Electoral College tawh kisai in KSO-CCpur nuai a block teng in vote 7 chiat leh Cognate Sister Student orgn. teng in vote 5 chiat nei ding uh hi’n taklang hi.
JACAATB leh OMTF te'n thusuah
Lamka, Sept-27: Joint Action Committee Against Anti-Tribal Bills (JACAATB) leh Outer Manipur Tribals’ Forum (a conglomerate of Hmar Inpui, Thadou Inpi Manipur, Mizo People Convention, United Naga Council & Zomi Council) pawlin tuni a thusuah abawl uh kimudan in, singtangmite zuausan(betray) MP khat leh tribal MLA teng Manipur singtang bial lut theilou dia thupukna omsate zuih hilai a, July 18, 2016 a Haokip Veng, Imphal a thupukna abawlte uh bawhsia, kuahiam in thiltuah aneih leh mawhpaw lou ding uh hi’n taklang uhi. Mimal leh pawl khat peuh in amaute akithuahpih uleh ‘anti-tribal’ a ngaih hiding chih thupukna bawl a om ahihdan leng taklang thak nawn uh a, singtang gam ah mipi zuausante adi’n mun awnglou ding chi uhi. Manipur govt. in phaizangmite tawh pangkhawm in, ST ah Meitei community guanglut sawm uh a, singtangmite gam suhsak theihna dia panlakna hi’n leng taklang uhi. OMTF leh JACAATB in singtangmite gam leitang, tribal rights leh identity humbitna di’n limsit neilou a panla ding uh hi’n leng taklang uhi.
ZoRO in Tuivai lei bawl di'n ngen
Lamka, Sept-27: Zo Re-Unification Orgn. (ZoRO) GHQ in Ministry of Road Transport and Highways ah Mizoram leh Tipaimukh kikawmna Tuivai lui tung ah lei (bailey bridge) bawl ding in ngen uhi. Mizoram-Manipur kikawmna lei (bridge) kum 20 val paisa a kibawl tuilian in ahihsiat ziak in Mizoram-Manipur (Tipaimukh) mipi kikawmna kitat a, Mizoram a National Highway 02 leng govt in puah mahleh Manipur lam km 100 vel major repair kin poimawh a, Tuivai lui ah Bailey Bridge bawl hileh Tipaimukh mipi’n Mizoram apan nek-le-tak ban ah thil poimawhte lalut thei ding uh a, Imphal leh Aizawl kikawmna naipen ban ah Sinzawl lam sangin km 60 vel a naizaw ding hi’n taklang uhi.
ZDV hiding a ginlelh 1 mankhia
Lamka, Sept-27: Police pan kizadan in tuzing dak 4:00 velin 7-Assam Rifles te’n New Zouveng ah ZDV hiding a ginlelh Pauzagin Zou (55) s/o (late) Tualkhogin of New Zouveng mankhia uh a, country made 9mm pistol 1, magazine 1 leh atang 3 mukhia in zinglam in Police Station ah pekhia uhi. Police te’n CJM court ah pawkhia uh a, court in Oct 1, 2016 tan Police custody ah omding in phalsak hi. Police te’n FIR No.47 (9) 2016 CCP-PS U/S 400 IPC & 25 (1-C) A.Act registered uhi.
Special Electoral Registation Camp
Lamka, Sept-27: Dist. Election Officer/CCpur, NYK/CCpur, SVEEP Core Committee ban ah Rayburn a NCC leh NSS pangkhawm in tuni’n Rayburn College ah Public Awareness campaign and Special Electoral Registation Camp om hi. Huai ah Campus Ambassador-te makaih in kum 18-19 kikal student hunkhopte’n Elecotral ah ki-enroll uh a, a poimawh bang in Election Youth Icons te’n lasa in Campus Ambassador-te panpih uhi. Sept 28, 2016 inYoung Pillar College ah program om nawn ding hi.
Police te’n Jail ah koih
Lamka, Sept-27: Ningthoujam Opendrajit (39) s/o N. Khelemba of New Bazar, Bus Parking ni bangzahhiam Police custody a om nungin Police te’n zan in CJM court ah dingsak uh a, court thupiak bang in Police te’n Jail ah koih uhi. Mang David in N. Opendrajit kiang ah gari 1 ah ni 1 khelhman Rs. 3000/-hi dingin a gari 3 zangsak a, Thounaojam Ningthem Singh s/o Th. Ibohal Singh of Luwang Sangbam Mamang Leikai, Imphal East kiang ah leng ni 1 a gari 1 zatman Rs. 3000/-piak ding in gari 7 koih mahleh mi 2 te’n gari 10 teng mortgage in koih uh chih ahi hi. Police te’n gari 10 te muhkik sawm in buaipih lel uh a, FIR No. 45 (9) 2016 CCP-PS U/S 420/406/34 IPC registered uhi.
SUUNNA:
Ngaidon (84) w/o K Pumtual of Vengnuam South, New Lamka tuni sunnung in khawsik in si a, Sept 28, 2016 in YPA hanmual, New Lamka ah kivui ding hi.
Dal Khen Thang (70) f/o Kham Khen Mung of New Lamka (G) tuni sunnung in cancer in si a, Sept 28, 2016 in CYA hanmual ah kivui ding hi.
B. Nengsuanthang (35) s/o Pumkhanjam of Bungpilon Village tuni nitaklam dak 9:30 in heartcase ziakin si a, Sept 28, 2016 in Bungpilon hanmual ah kivui ding hi.
IMPHAL NEWS:
State govt in website ah khahkhia
Imphal, Sept-27: Manipur govt in ILP tawh kisai draft Bill thak a bawlkhiak ‘The Manipur Regulation of Non-Local People Bill, 2016’ kichi tuni’n Manipur govt in official website ah khahkhia a, huai tuni issue Manipur Express page 2na ah hong kisuah hi, Govt website www.manipur.gov.in ah leng huai et-theih ding hi.
Singhania University pomlou
Imphal, Sept-27: Regional Director, NRC, NCTE, Jaipur in hilhchetna a bawl dungzui in NCTE in Rajasthan state sung Pacheri Bari, Jhunjhunu a om Singhania Univeristy, in B.Ed certificate pethei dingin theihpih (recognised) lou a, huai University in Distance Learning leng pankhe dingin NCTE in phalna pelou hi’n taklang hi. Huai dungzui in Board saina in June 19, 2016 a TET-2016 examna atel candidate te Singhania University min a B.Ed certificate leh marksheet submit a om leh cancelled a om hi’n NCTE in apaisa Aug 20, 2016 in order suah hi.
Governor in mun tuamtuam pha
Imphal, Sept-27: Manipur Governor Dr. Najma A. Heptullah in tuni’n Bishnupur district a Loktak leh Sendra mun va pha a, huai zawh in Moirang a INA mun enkhia hi. Huai hun ah official tuamtuam te’n Governor zui uh hi’n kigen hi.
World Tourism Day 2016
Imphal, Sept-27: Senapati district a Mapao Zingsho Village ah Tourism dept.-te saina in ‘Tourism for All- Promoting Universal Accessibility’ chih thupi zang in tuni’n World Tourism Day 2016 zatna om a, huai ah Chief Guest in CM O. Ibobi pang hi. Functional President in Dy. CM. Gaikhangam pang a, Guest of Honour in M. Prithiviraj Singh, Parliamentary Secy.(Tourism) pang hi. Huai ah CM in capital investment tam ngailou in industry khang hatpen Tourism in economic growth leh employment generation tun thei a, Mapao Zingsho village ah conducive environment leh infrastructure khenkhat puah hoih hileh tourist destination poimawh tak suak thei ding a, mipite’n sing phuklou ding in ngen hi. Mobile network omlouh banah LPG Gas agency honkhiat theihna dia govt. in panla ding a, khaw mite ngetna dungzui a Tourist auditorium bawlkhiak hiding in chiam a, mipi te’n leng kithuahpih ding in ngen hi.
CM in guest house ‘Home Stay’ kichi hongkhia a, Chief Secretary O. Nabakishore; Yamthong Haokip, MLA; Sailes Thangal, Consul General of Govt. of India to Guangzhou, China; R.K. Nimai Singh, Consultant to the Govt. of Manipur; Nidhi Mani Tripathy, Addl. CEO banah ex-Secretary Tourism; N. Ashok Kumar, Special Secretary Tourism; C. Arthur, DC/Senapati leh N. Bandana Devi, Director Tourism te’n uap uhi.
Axis bank branch khat hongkhia
Imphal, Sept-27: Imphal East a Green Land Square Chingmeirong ah tuni’n Dy. CM Gaikhangam in Axis Bank Chingmeirong Branch hongkhiatna nei uhi. Hiai hun Sunil Gurbaxani, Regional Head, East, Axis Bank leh Biplabi Patnaik, Circle Head, North East Circle banah Axis bank staff te’n uap uhi. Akigendan in Axis bank te’n Manipur ah tulel in branch 8 leh ATM 16 nei uh a, India adia private bank lianpen lakah 3na hi’n gen uhi.
Imphal ah Flute Concert om
Imphal, Sept-27: Indian Council for Cultural Relation, Regional office, Shillong leh Dept. of Arts & Culture, Govt. of Manipur te’n ‘7th Edition of Raasrang World Flute Festival 2016’ tawh kizawi tawn in tuni’n Maharaja Chandrakirti Auditorium ah Flute Concert sai uh a, huai ah Chief Guest in Governor Dr. Najma Heptullah pang hi. Governor in a thugenna ah India adia music siangthou pen flute music hi a, khawvel a musical instrument lui pen pawl ahihbanah Lord Krishna tawh kizopna nei a, khawvel pumpi ah bitna leh muanna omna dia politics lam ah kigawmna sang in Pupa ngeina tawh kisai a tawndan lamah kigawmna poimawh chi’n gen hi. Huai hun ah Flutists minthang Italy apan Arcadio Baracchi, Delhi apan Pandit Chetan Joshi leh Manipur apan Laishram Brajakumar Singh te’n flute show nei uh hi’n kigen hi.
JCILPS te’n mi 13 mankhia
Imphal, Sept-27: JCILPS volunteer te’n tuni zingsang in Motbung a Tata Winger (No. MN03-0566) a checkna uah migrant worker mi 13 mankhia uhi. Huai tawh kisai in JCILPS office ah press meet om a, huai ah BK Moirangcha, Convenor, JCILPS in mi 13 mat a omte Lishang Hiden bridge bawlna a Special Contractor L. Baleshwore kichi in nasem dia puaklut hi a, Tata Winger neitu K. Subash leh L. Baleshwore te’n JCILPS office ah hilhchetna a bawl ding uh chi’n gen hi.
Khetrigao buaina ah mi 1 si; 4 liam
Imphal, Sept-27: Imphal East district a Khetrigao mun ah zan in buaina om a, huai ah kumchinglou naupang 1 si a, mi 4 vel liam uhi. Imphal East District Magistrate in Khetrigao mun ah 144 CrPC puang hi’n gen uhi. Akigendan in Thoubal district a Nganglou Loukon mun ah April 2015 in Md. Naoshad Khan a Car sung ah sisa a muhkhiak hi a, ni bangzahhiam paisa apan tualthahna ah Md. Azmir kigolh hidan a gen khak ziak in mipi kipunkhawm te’n zan nitak in Md. Azmir tenna inn va lut sawm uh a, Khetrigao mipite’n a nang ziak un kinawktuahna piang a, huai ah Md. Saddam (14) si a, liamna tuak – Khergao Makha Leikai apan Md. Eki (24) leh Md. Ajij (24) banah Kshetri Awang Leikai apan Md. Muktar leh Md. Boicha-te hi uhi.
TUNI THUPI:
“Ngai in, ka lungmuanna dingin ahi, ningkitelna thupitak ka neih: himahleh nang, ka hinna na it ziak in, siatna kawkhuk akipanin na humbit a; ka khelhna tengteng lah na nunglamah na pai vekta ngal a.” -Isai 38:17
EDITORIAL:
Social Boycott kichi bang hiam?
Social boycott kichi sappau in gendan leh a kawkdan ‘term’ tamtak om kha maithei hi. Eite’n hiai tungtang a ibuaipih uh khawtang (social) tawh kisai ahi a, bangtan i palaite uh nawlkhin a, amaute tunga boycott puankhum ding i hi uhiam chih dotna omthei hi. Dan (legal) kichi chituamtuam tamtak om a, bangchibang leh bang dan a i palaite uh society akipan nawlkhin ngai hi uhiam chihthu leng ngaihtuah tham ching hi. Hihna leh mawhpuakna kibang chiatchiat a boycott pawl om, huchi kalah a boycott himhimlou pawl leng om a, eilak dinmun etin ngaihtuahna buaisak thei khop in om hi.
Social Boycott kichi om a, saptuam in leng boycott kichi apuan uh om tham hi. Social boycott tungtang gen lehang, i gam ah zu leh khamtheih tawh kisai uang mahmah a, veng tuamtuam in zu leh khamtheih zuakte leh zuakna munte a kham uh kipahhuai law mahmah hi. Kum bangzah hiam paisa in zu leh khamtheih chituamtuam zuakte doudalna ziakin inn tanpha a hunkhop phelin om a, mi tamtak jail ah lut uhi. Tua kia hilou in hanmual a soisak mi ahunkhop leng om a, amaute’ thilhih leh chindan ziakin mipi’n ‘social boycott’ a puankhum uh ahi hi.
A taktak in social boycott tawh kisai eisung ah etthak dingin hoih hi. Mimal kivawkkhiak utna hiam ahihkeileh mi kuahiam chapouna dinga ‘personal status/figure’ bawl utna tawh lampi sialna a i zat ngeingei leh kalbi masa ah kipalpukna om ding hi. Tuma a i gensa bangin kum 2017 assembly election a candidate ut mahmah mimal bangzahhiam in i politics uh hon kimawlpih (play) khak ding uh lauhuai petmah a, tua ziakin, mipite adingin leng ngaihsuttham ching om hi.
Ama in leng igenta, Manipur state phaizangbial ah MLA 40 om a, singtangmi MLA 20 lel om uhi. Tribal-te’ deihlouh bill tuamtuam assembly ah genkhawm himahleh a thudan in phaizangmi MLA te’n zou mahmah ding uh chih a chiangsa ahi hi. Singtangmi MLA te theihtawp suah in pang le uleng a zoukei ding uh chih haihvuallouh thudik ahi hi.Phaijangmi leh singtangmi MLA tamdan tehkakin singtangmi MLA-te adin panlak leng phatuamlou ding khop bang mahleh singtangmi MLA-te paulou hamlou a om pen uh bel theihsiam theih vual hilou chih theih mahj hi veve hiu.Tu a i paidan (trend) uh i et vengveng chiangin Manipur phaizangmite leh singtangmi elected MLA te’ tamdan (ratio) pe’n etzui poimawh ding hi’n kilang hi.
Tuni in Manipur singtangmi MLA-te gupna hi zenzen klei mahleh social boycott tuamtuam i bawlkhum dan uh etzui poimawh hi. Naga dominated area chi mai lehang, Ukhrul, Chandel, Tamenglong leh Senapati bial ah NPF pawl hat mahmah a, kum nawn 2017 state assembly election ah bang party tawh hong kikoi ding uhiam chih gentheih hi nailou hi. Manipur a district 4 a Constituency- te akipan Naga te’n i gen minthang mahmah uh Anti Tribal bill 3te tawh kisai in a MLA te uh a boycott uh chih theih hilou a, huchi kalah, NPF Gen. Hqtrs deihna bangin NPF in MLA 4 a neihte uh kitawp dinga thupiak abawl dungzui un amau leng kitawpnalai pia uh chihthu om hi.
Manipur state a singtangmite sukha ding bill 3te tawh kisai in Joint Action Committee (JAC) bawlkhiakin om mah a, tuni tanin JAC nasepna hoih tadih in muhtheih in om hi. Ahih ziakin mipi palaite bangtan gaksawm ihiam chih leng ngaihtuahtham ching a, assembly election anaih tak ziakin denchiangin mipite’n ‘electoral politics’ tawh kisai ahi a chih khak ding uh leng lauhuai mawhlou hi.
Kuahiam in saptuam dan kalh a zi aneih leh saptuamte’n kha 6 sung ‘thununna’ neihkhum uh a, akisik ualeh kha 6 nungin lalut nawn uh a, dansiangthou in kitenna neithei uhi. Civil organisation tuamtuamte’n leng thil hoihlou hih chih ziakin, mi tuamtuam hunkhop dan pua ah koihin kuaman kithuahpihlouh ding (non co-operation) chih thupuan nei uh a, tuape’n thudik ahi hi. Eilawi in MLA i neihte boycott ziakin bangthil apiang ale? chih ngaihsuttham ching hi. Maban a MLA candidate ut khempeuhte’n India dan (democratic rights) pansan in tuhthei ding uh chih theihsa ahi a, mipi makaite adingin pawlpi paipihdan i siam kei leh hihkhelh khak ding lauhuai thei veve ding om hi.
No comments:
Post a Comment