HEADLINES:
Gam 8 lakah India telin gam 4 in boycott sawm
Islamabad a SAARC Summit, 2016 khawlsak hiding
 |
| http://essaynparagraph.com/ |
New Delhi, Sept-28: Asia simlam bial a gam 8te kigawmna, South Asian Association for Regional Cooperation (SAARC) adia diplomatic conference poimawh pen ‘19th SAARC Summit 2016’ om ding tawh kisai India in boycott a puan nung in Bangladesh, Afghanistan leh Bhutan inleng boycott puansawm uh a, SAARC nuaia kikhai khawm gam 8 laka 4 in huai huna kihel lou dia thupuan aneih ziakun hunchiam omlou in tukum a omding pen khawlsak hita hi. SAARC Summit ahihleh Pakistan capital Islamabad leh Murree khawpi ah November 2016 sunga neih ding chih hi a, Jammu & Kashmir a Uri terror attack tawh kisai in, Summit zintun ding Pakistan tunga lungkimlou te’n huai hunzatna uap sawmlou uhi.
Pakistan Prime Minister adia Foreign Affairs tawh kisai adviser Sartaj Aziz in Geo TV leh DawnNews kianga agendan in SAARC Summit ding tawh kisai in thubuai tamtak om a, SAARC Secretariat in official takin thupuan bawl naikei mahleh tukum ading pen khawlsak phot hiding chi hi. Summit ding tungtanga thukhun kibawlte ah, member khat vuak in kihellou dinga thupuan abawl leh leng khawlsak ngai ahihdan Sartaj Aziz in gen a, huai dungzui in member 4 te’n uap louh a sawm ziakun sutzop theihlouh ding chi hi. SAARC Summit om nawn hun in Pakistan gamsung mah a neih hiding hi’n Sartaj Aziz in gen a, SAARC Charter dungzui in tutung a Summit khawlsak ding tawh kisai leng, Summit adia co-chair Nepal in official takin apuankhiak ngai ding chi hi. External Affairs Ministry thupuangtu Vikas Swarup gendan in SAARC adi’n India in kong bangkim ah panla tou veve ding a, huai ding tawh kisai a panlakna omlai a, SAARC a om gamkhat in India hihsiatna dia nasep tamtak aneihte kitheihmawh vual hilou chi hi. Pakistan apan India a honglut, terrorist pawlin Uri army base luh in sepaih 18 that uh a, gam tuamtuam in huai terror attack mawhpaih in, SAARC nuaia gam te’n leng India gupthu puang uhi.
SAARC ahihleh Bangladesh capital Dhaka khawpi ah 1985 a phuhkhiak in om a, tulel in Afghanistan, Bangladesh, Bhutan, India, Nepal, Maldives, Pakistan leh Sri Lanka om khawm uhi. SAARC in leitung a leitang(area) omzah 3% leh khawvel milip 21% huamkha a, kum 2015 tan in global economy ah 9.12% luah hi. SAARC Secretariat leng Nepal capital Kathmandu ah om a, huai pawlpi a kikhai khawm gamte laka ‘economic development’ leh ‘regional integration’ omtheihna dia kibawl ahihbanah, kum 2006 in ‘South Asian Free Trade Area’ bawl in om hi.
SP leh CEO vaidawnna banah informal meeting
Lamka, Sept-28: Langkhanpau Guite, Chairman, ADC/CCpur office chamber ah tuni’n ADC member te’n Rakesh Balwal, IPS, SP/CCpur leh Soiminlian Lengen, MCS vaidawnna leh kipahpihna nei uh a, ADC member-te’ sik leh tang in Grace Zamnu, EM in SP leh CEO puandum 1 tuak silhsak a, Dist. Council a Inspecting staff te’n CEO thak puandum silhsak uhi. Huai zawh in informal meeting nei uhi.
Chairman in SP kiang ah CCpur dist. ah tribe 10 val tengkhawm a, buaina om phutphut thei ahihman in security tawh kisai a poimawh hunhun a ADC member te’n SP athuzak hun a kithuahpih a, mipi leh elected-te tawh security thil a pankhawm ngai hi’n gen hi.
SP in a tanchin member-te theih ding in gen a, CCpur dist. ah SP a letsung in lemna leh muanna a omtheihna ding a panla ding hi’n gen a, elected-te, public leader-te, student leader-te leh mipi’n kithuahpih ding in ngen hi.
CEO in athak ahihziakin nasep ding ziltou zel hi’n gen a, ADC member-te leh Council staff te’n kithuahpih dingin ngen a, CCpur dist. mipi’ hamphatna ding a tamtheipen sepkhiat sawm ahihdan genkawm in a service hunsung a kuamah tawh kala buailou a hinkhua zat a tuppen hi’n gen hi. Chairman ADC/CCpur in SP leh CEO/ADC ading in Pathian kiang ah thumsak hi.
Huai zawh in Chairman makaih in ADC member te’n informal meeting nei uh a, Chairman leh Genneikhup Vaiphei, EM te’n Delhi a hawhna uh report pia uh a, All Tribal Women Union pawl in rally a neih hun ua, India Prime Minister leh Union Home Minister ading Chairman, ADC/CCpur tungtawn a memorandum a piak uh leng Delhi ah vapia uh hi’n taklang uhi.
LOCAL NEWS:
NLM makaih in inspection nei ding
Lamka, Sept-28: Ministry of Rural Development apan Dr Ambuj Mohopatra makaih in National Level Monitor team mi 5 vel in Central sponsored scheme tungtawn a nasepna tuamtuamte Sept 29, 2016 apan enkhe ding uh a, Henglep Block leh Thanlon block banah Tuibuong block enkhe ding uhi. NLM teamte’n Delhi apan inspection neihna ding khua 20 select uh a, huai lak ah khua 10 ah MGNREGS, IAY, IWMP, PMGSY, NSAP (Social Welfare) leh NRDWP (dringking water) enkhe ding uh a, amuh bangbang uh Ministry of Rural Development, Govt of India ah report peding uhi.
PTC GHQ te’n SP kipahpihna nei
Lamka, Sept-28: L. Pumlianpau, President, PTC GHQ makaihna in PTC makai te’n tuni in Tuibuong a SP office ah Rakesh Balwal, IPS, SP/CCpur kipahpihna in Paite Puandum 1 silhsak uhi. PTC makaite’n CCpur dist. ah lemna leh muanna om zelna dingin SP in panla ding leh a poimawh bangbang in Tribe leader te’n kithuahpih ding hi’n gen uhi. SP in CCpur dist. ah lemna leh muanna om theihna dingin mipi, makai tuamtuam leh tribe leader te’n kithuahpih ding in ngen hi.
Heb leh OD tawh kisai sinsak
Lamka, Sept-28: SHALOM in FHI360 leh DAPCU tawh kituah in CMO Conference Hall ah MACS nuai a Targeted Intervention-te adin Hepatitis B leh C banah Overdose Management tawh kisai sinsak uh a, MACS nuai a TI-NGO tuamtuam LRRC, SHALOM, PPO leh MSF apan Project Manager, Outreach Worker leh Nurse-te tel uhi. Dr. Seni, Medical Officer, Dist. hospital in overdose management tawh kisai sinsak a, theihna tawm ziakin khamtheih hih overdose a si tamtak om hi’n gen a, huai hihna din kisinsiam poimawh chi hi. Dr. Gillian, MSF in Hepatitis kipatdan tangpi gen a, Dr. Jeetesh in natna kilatdan, kilawhsawn theihdan leh sin (liver) a hih khangdan sinsak hi.
Jt. Artist Assn saina in fellowship
Lamka, Sept-28: CCpur dist. a lasiamte kipawlkhawm Joint Artist Assn in Oct. 15, 2016 sunnung dak 1:30 in EBC Dorcas Jubilee Guest House, Mini-Auditorium ah fellowship nei ding uh a, huai tawh kisai tuni’n Upper Lamka Vengnuam a Lengtonghoih Studio ah rehearsal nei uhi. Fellowship bel Hmar Artiste Assn, Kuki Artist Progressive Union leh Zogam Artiste Assn kithuah in sai sawm uh a, la pawl 3 chiat sa ding uhi. Singtangmite’n la tungtawn a kipumkhatna leh kinaihsem ding deihna ziaka saisawm uh hi a, programme zatna cable TV tungtawn in LIVE in khah hiding a, Internet tungtawn in Live Streaming leng bawl hidin kigen hi.
BRGF 2014-15 Beneficiary te’n emergency meeting nei
Lamka, Sept-28: BRGF nuai a beneficiary-te’n lakah tuni tan final instalment hentang a omte’n tuni’n KKL complex ah emergency meeting nei uh a, final instalment ngahna dia panlak dingdan telin thu tuamtuam genkhawm in pawl thak khat Demand Unpayment BRGF Instalment Assn kichi bawl uhi. Block tuamtuam ah 2014-15 sunga BRGF final instalment laloute paikhawm uh a, President dingin Nehkhohao Haokip guang uhi. Vice President in Lalpu, General Secy in David Hmangaisang, Asst. Secy in Neihmang, Finance & Info Secy in H. Lalboi leh Adviser in Kula Singh leh Letkhomang Haokip guang uhi. President thak in CCpur dist. a block 10 nuai ah BRGF 2014-15 beneficiary 200 val om a, central tungtawn in first instalment ngah uh a, 2nd instalment bel state govt. in a puak khiak ding chih himahleh tutan a puakkhiaklouh ziakin mu nailou uh hi’n gen hi. Dist. ah BRGF 2011- apan final instalment mulou ahunkhop om hi’n kigen hi.
Bandh, strike bawllou di’n ngen
Lamka, Sept-28: Haokip Students’ Orgn. (HSO) Diamond Jubilee Celebration Committee, 2016 saina in Oct 10-12, 2016 sung Kholmun village ah HSO Diamond Jubilee zang ding uhi. HSO kichi non-political, Philanthropic organisation hilou, student body hi a, Diamond Jubilee zatsung in Civil Society Orgn,-te, Student body-te, JAC etc te’n bandh, blockade leh general strike puanglou ding in ngen uhi. Diamond Jubilee lop sung in Mr & Miss HSO contest, cultural dance competition, talent show, drama, gospel concert etc omding hi. Mr & Miss Diamond Jubilee te’n kipahman Rs.50,000/-tuak ngah ding uh a,1st Runner up in Rs 30,000/- leh 2nd Runner up Rs. 20,000/-ngah ding hi.
Songza Inpi HQ in thusuah bawl
Lamka, Sept-28: (late) Michael Henkholen Mate (Mate Head Clan) s/o (late) Thienkholal Mate of S. Canaan Veng, Tuibuong mulkimna bei a thahna thu Songza Inpi leh MTU GHQ in hoihtak a a genkhawm nung un Sept 27, 2016 in Insung, Hausa Upa, Phung makai tel in mi 300 vel in kosana leh condolence program nei hi’n Secy Inf & Secy Songza Inpi, HQ CCpur in gen . Huai ah SP Zou, Under Secy. PRO, KNO/KNA in Michael Henkholen Mate sihna puaknat thu leh a it thu gen a, anutsiat innkuante khamuanna thu leng gen hi. MTU GHQ, MSO GHQ, MYu GHQ leh innsung mite’n Michael sihna tawh kisai ni 5 chinnung tualthattute matkhiat a omkei leh bandh, strike bawl ding chih leng bawllou phot ding in thupuk uh a, maban ah innsung mi’ theihlouh a Social Media & WhatsApps ah Michael sihna thu kuaman suah nawnlou ding in ngen hi.
Fin Minister mu dingin zin ding
Lamka, Sept-28: Manipur a Dist. Council 6 a Convenor Genneikhup Vaiphei, EM, ADC/CCpur in Union Finance Minister Arun Jaitley mu dingin Sept 29, 2016 in Delhi ah zin ding hi. Manipur ah Dist. Council 6 te tawh kisai in Union Finance Minister in Genneikhup Vaiphei a sap hi a, Delhi ah a omsung in Dist. Council tawh kisai mi poimawh tuamtuam leng kimuhpih ding hi’n gen hi.
St Peters’ School ding hizaw
Lamka, Sept-28: DFO, Southern Forest Divn./CCpur saina in zan in CCpur College a spot painting leh spot article writing competition om ah Spot Article writing competition ah 3rd in G. Lamsuanlal of Rayburn H/S kichi pen St Peters’ School ding hizaw hi.
Lungthul MDC workers meet om
Lamka, Sept-28: G. Suanchinpau, MDC Lungthul DCC in a tenna inn, Dorcas veng, New lamka ah tuni sunnung dak 2:00 in workers meet om hi. Hiai hun in MDC G Suanchinpau in MDC Election zawh ahih akipan in gamsung buaina nasatakin hon tuam mahleh Pathian panpihna ziakin tunitan Lungthul DCC sung ah inn 42 kiang ah langva pia ahihdan leh Financial Year nawn chiang a inn 150 kiang a piak hiding in gen hi. Kum nawn a Manipur Assembly Election om ding tawh kisai a Lungthul DCC sung a mipite pilvang ding leh khochih a mipite haksatna awlmawh thei ding candidate zonkhiak poimawh ahihdan gen hi.
Pa leh aktui nek khawm mi 4 buai sia
Lamka, Sept-28: Neihsial veng a om Malsawm (25), Sangi (25), Thethiem (48) leh Vakkhokim @ Kima (45) te’n tunitak in pateh (mushroom) chi khat tawh aktui a nek khawm ziak un buai sia in District hospital tut in om uhi. Hospital ah a thil nek-te uh a luak khiak theih ziak un mi 4-te dinmun lauhthawng huailou a, himahleh etkhiak ding a admit uh hi’n kigen hi.
SUUNNA:
Hrangthattling (59) w/o (late) Benjoy of Rengkai, zan nitak dak 11:10 velin Dist. Hospital ah nak haksa ziak in si a, tuni’n Rengkai hanmual ah kivui hi. Hrangthattling bel HSA Jt. HQ/CCpur a Secy. Arts & Culture lenlel Sarah Lungtau Hmar’ nu ahi.
Thongsiam (90) f/o K. Mangkai of Bethel veng, New Lamka tunitak dak 8:50 velin teknat in si a, zingchiangin YPA New Lamka hanmual ah kivui ding hi.
IMPHAL NEWS:
Anil Madhav tuni’n Imphal tung
Imphal, Sept-28: Anil Madhav Dave, Minister of State (Independent Charge) of Environment, Forest and Climate Change, Mizoram a Lengpui Airport apan tuni nitaklam dak 2:30 velin Tulihal International Airport hongtung a, Mizoram leh Manipur ah tour pai ding in Sept 27, 2016 apan hongzin hi’n gen uhi. Anil Madhav Dave in state forest dept. panlakna a project tuamtuam kisem-te enkhe ding a, Chief Minister O. Ibobi tawh nitaklam dak 3:30 velin meeting nei in thu tuamtuam genkhawm uh a, huai zawh in State govt. official-te tawh meeting nei nawn ding uhi. Nitaklam dak 5:00 velin Govindajee Temple veh ding a, Sept 29, 2016 zingsang dak 6:30velin Kangla Fort veh in singnou suan ding a, huai zawhin Keibul Lamjao, Sagram Wildlife Check post, Sangai Viewpoint mun-te pha ding hi. Aman Sept 29, 2016 zinglam dak 10:00 in Self Help Groups, media leh local NGOs-te tawh meeting nei ding a, huai nungin Sendra ah mipite tawh kihou khawmna nei ding a, huai apan INA museum veh ding a, sunnung dak 1:45 velin Tulihal International Airport apan New Delhi zuan ding hi’n gen uhi.
Conf. leh Cultural Linkage tawh kisai conference kipan
Imphal, Sept-28: Manipur University leh Indira Gandhi National Centre for the Arts (IGNCFTA)-te saina in Manipur University ah tuni’n ‘International Conference on North East India and Cultural Linkage’ hongkhiatna om a, huai ah Chief Guest in Dr. Najma A. Heptullah pang a, Functional President in Prof. M. Dhaneshwar Singh, Acting VC, MU pang a, Guest of Honour in Prof. Sachchinand Joshi, Member Secy., IGNCFTA-te pang uhi.
Huai ah Govenor in India leh Myanmar in tawndan, sahkhua leh innveng hihna ziak a kizopna letsak banah kipsak ding tupna a conference nei hidan in gen hi. Conference tungtawn in NE India leh Myanmar kalah ethnic leh cultural relation hoihthei pen ding bawlkhiak banah gam-te kizopna mang-te muhsuah theihna dia Mahabharat tungtang kikum khawm dia hasot ding chi’n gen hi. Hiai hun Prof. J.N. Phukan, ex-Member, Indian Council of Historical Research, New Delhi; Prof. N. Lokendra Singh, Prof. Dr. Bachchan Kumar, IGNCA, New Delhi banah foreign delegate tuamtuam te’n uap uhi.
BJP te’n Cong ngawhna nial
Imphal, Sept-28: Congress Bhawan ah Sept 26, 2016 ni a State-Level Mahila Congress Campaign Committee Meeting hun ah CM O. Ibobi in Thoubal district a Yaithibi Loukon mun ah National Sports University bawlna mun ding gam acre 400 piak khit himahleh Centre ah BJP makaihna a NDA govt. ziak in zekai a, Centre in tunitan a bang ngak uh hiam chih tungtang theih louh banah kum 2 ½ paisa a NDA in Centre ah vaihawmna a let nung apan a gen thawh siam uh, chi hi. Huai tungtangah Manipur Pradesh BJP Election Committee a Convener Th. Chaoba in CM thugen nial a, Ibobi makaihna a govt. in Sports University (SU) bawlna mun ding a gam tawh kisai a thubuai leng suveng lou uh a, thubuai tawh kisai sukveng masiah Centre in nasep panthei lou ding chi hi. Sports University bawlna mun ding laitak ah gam acre 34 vel ding state govt. in la thei nailou uh a, hiai tungtang ah state govt. in gam neitu diktak apan a leisawn tu a puangkhiak ding uh chi hi. Gam thu tawh kisai a Court ah thubuai omlouhna mun Koutruck mun telkhe lou in Yaithibi Loukon kia a telkhiak uh tawh kisai in thil kiselgu om ding ahi chi hi. Mizoram a Airport land purchasing scam ah awk Mizoram CM lui Zoramthanga dinmun tawh Manipur CM maban kibang ding hi.
Biakinn 1 leh tenna inn 3 kang
Imphal, Sept-28: New Lambulane a Hmar veng ah tuni zinglam dak 10:30 velin EFCI Biakinn leh tenna inn 3 mei in kang a, mipi leh fire brigade pangkhawm in meikuang phelmit thei uhi. Electric short circuit a meikuang in EFCI Biakinn pehsawm a, van kisia teng bangzah man ding hiam chih theih chet hilou hi’n kigen hi.
Miss Manipur 2016 om ding
Imphal, Sept-28: Manipur ah kum 4 kihal nungin mi 40,000 vel tat theihnang Palace Compound a Bheigachandra Open Air Theatre (BOAT) ah State Level Miss Manipur Committee-te (SLMMC) saina in Dec 6, 2016 in ‘Miss Manipur 2016’ om ding hi. Huai tawh kisai in tunitaklam in press conference om a, huai ah SLMMC te’n kum 10 paisa apan Manipur a singtang leh phaizang bial a teng-te telthei ding uhi. Pageant-te adia ni 15 daih ding grooming programme om ding a, mipite’n kithuahpih ding leh huai ni a bandh/blockade bawl lou ding in ngetna bawl uh a, Miss Manipur 2016 hun a title holder-te direct a Miss NE India a lut theihna ding uh ngaihtuah hiding in gen uhi. Title holder ten Rs. 70,000 banah amau deih telpen free-voucher (beauty care/salon/restaurants) tel theih ding uh a, 1st leh 2nd runner-up te’n Rs. 50,000 leh Rs. 30,000 banah cost-free service voucher mu ding uh hi’n taklang uhi.
Written examna result suak
Imphal, Sept-28: Manipur Secretariat a GAD nuai a Office Assistant semding lakna ding a written examination om a result tuni’n suak a, website www.manipur.gov.in ah result kimtak upload uhi. Written examna a passed-te adingin Oct 5,6,7,8 & 9, 2016 in Akampat, Imphal a NIELET ah shift 5 a kikhen in zinglam dak 9.00 akipan nitaklam dak 5.00 tan Computer (practical) examination om ding a, shift a kikhen dingdan roll no tuamtuam leng atunga kitaklang website mah ah om hi.
TUNI THUPI:
“A thiltup, Christ a a gelkhiak bangbangin a deihlam thuguk pilna leh theihsiamna ngen in eite ahon theisakta ngal a;” – Ephesate 1:9
EDITORIAL:
Siamsin din kihanthawn ni
I gam a education system (paidan) hoihlai tadih in kilang a, abikin Board of Secondary Education Manipur (BSEM) te India adin question set siam hi’n minthang ban uhi. Mi tamtakte’ gendanin Central Board of Secondary Education (CBSE) ah mark tam muh (score) baihlam deuh chih hi a, himahleh, BSEM nuai a exam hun ah mark tam muh haksa mahmah kichi hi. CBSE i soiselna ahi kei a, ahih ziakin, examiner- te mark ah kiphal mahmah uh hi’n kilang a, BSEM a exam paper check tute bel mark piaka chil deuh uh hi maithei chih bangleng om hi. Ahi a, CBSE/BSEM ahoihzaw chih etkakna (comparison) bawlzaw hi zenzen kei hang, huai board 2te akipan khangkhia leh India adia top post lenkha hunkhop ana omta hi. Quality Education taktak bel mimal mah ah kinga ahihna tanleng om hi.
Siamsinna tawh kisai gending tamtak om ding hi. I tate lehkha a siamkei ua leh teacher-te ngawhpah mawk chih bangleng tam mahmah zel hi. Student tamtakte’n lah ka teacher pa uh a gina keilua a ahi, chi pawl leng om uhi. Thudik gen mai lehang India gam pumpi ah government school-te’ sangin private school-te lun zawtham ua, discipline leh administration tawh kisai in leng a neizou zawdeuhte’n private school naih mah uhi. Union government in sinlaite khualna ziakin Jawaharal Navodaya Vidyalaya / Kendriya Vidyalaya leh adangdang institution bawlkhia uhi. State tamtak in lah singtanggam a mizawng leh gentheite khualna ziak mah in school building omkei mahleh singkung nuai khawng ah naupangte lai siamsak tupna in teacher hunkhop guang uh a, education policy tawh kisai in centre government hi’n state government tuamtuamte’n naupangte a awlmawhna uh hoih mahmah hi. Himahleh, a sepkhiakna(implementation) tawh kisai ginataka etkai ahihlouh ziakin, chik chiangin i gam ah quality education hong piangkhe ding hiam chih theih haksa hi.
Student makai khenkhat in siamsinna tawh kisai mahin i gam a singtanglam bial zawdeuhte a zinkual tanpha om uh a, huaite panlakna tunung kum bangzah hiam in a gahsuah muhtheih a hong om leng i lam-en uhi. Lamka zangah school hoihtak leh teacher siam taktak leng tamkhop om uh a, huaite ziaka Class X/XII leh Board tuamtuamte saina a examna ah result hoihpipi om sek mah hi.Himahleh singtanggam a laizilna munte leh teacher-te sinsakna a laizil i naupangte a hong siamkhiak masiah uh i gam khangtou taktak ngeilou ding hi chih thudik nial vuallouh ahi hi.
Tuni chiangin i society sung uh en vengveng lehang a hoihlam sangin siatlam nawtzaw i hi ua hiam chih theihin om hi. Zu zuakna (vendor) te ah school uniform silh a zudawn leh akham muhtheih ding tamtak om nawnta a, i lungtang nasak mahmah hi. Huai kia leng ahi kei, bandh/strike/total shut down chihte ziakin school naupangte’n a sin ding uh tampitak mansuah uhi. I gamah mi a migi theilai uh chih ding ahi a, koilam gam hiam hileh, hiai pe’n Parents/ Guardian Association in court ah hek (sue) thei uhi. Manipur phaizangbial leh singtanggam ah buaina (crisis) a omsek ziakin student te’n a pilna uleh theihnate a laklut ding uh sum a lei vuallouh mansuahkha sek uh a, poi mawhmah hi.
Khawvel ah kitaitehna sang mahmahta a, apil leh asiam diakte suakta ding uhi. Banghiam issue ziaka bandh/strike leh total shutdown chihte i bawl leleng education pe’n hihbuai nawnlou in khahkol (exempt) hisek leh chihhuai mahmah hi. Hiai pe’n nu-le-pate’ kipahna hi ding a, khangsawnte khualna taktak leng hong hizaw ding hi. Sinlaite theihna behlapsaktu hihsawm in, amansuah saktu hihsawm kei lehang vualzawlna thupitak leng hizaw dingin gintak-huai hi. Quality education in quality system a poimawh chih bang deuhin etkai ding tamtak om hi. Kum nawn Feb/March,2017 velin Class X/XII examna om nawn ding a, tua dingin kisakkholh hun laitak ahi hi. A ziakbel maban ah Christmas leh Kumthak banah kitenna, khawmpi leh program tuamtuam hong tam ding a, Assembly election husa hong ngaih mahmah lai ding ahih ziakin tuhun pe’n student te’ adin laisim hun laitak hi’n kilang hi.
No comments:
Post a Comment