HEADLINES:
Dawilok taka India gamtatna thukkik hiding : Pakistan PM
Army te’n ‘Surgical Strike’ bawlin helpawl 40 that
New Delhi, Sept-29: Indian Army Northern Command apan ‘Special Forces Para Commando’ 4th & 9th Battalion te’n Helicopter zang in Pakistan Occupied Kashmir(POK) a Line of Control (LoC) huamsung km 3 tan ah tuzing dak 12:30 apan 4:30 kikal ‘Surgical Strike’ bawl uh a, dakkal 4vel kikaptuahna om nung in helpawl member 40 val thah a om in ‘terror launch pad’ 7 hihsia uhi. Huai thiltung Pakistan Prime Minister in mawhpaih a, dawilok tak a India gamtatna ah Pakistan sepaih 2 thah a om in, midang 9 liam ahihdan gen a, Ceasefire bawhsia India sepaihte thukkik dia Pakistan Army-te mansa a om ahihdan leng gen hi. Tunitaklam dak 4:00 in All Party Meeting sap in om a, Prime Minister Narendra Modi telin Political Party teng in ‘Anti-Terror Operation’ kibawl kipahpih thu puang in, Uri terror attack ziakin Pakistan kiangah sinlai hoihtak piak in omta chi uhi.
Director General of Military Operations, Lieutenant General Ranbir Singh in New Delhi ah tuni’n Press Conference sam a, helpawl tamtak Kashmir a lut sawm ahihdan thuguk amuh ziakua ‘surgical strike’ bawl a om ahi chi a, maban ah tuabang operation bawl hinawnlou ding chi hi. Surgical Strike bawl hun in Ministry of Defence apan senior officer te’n Army ‘Operation Room’ ah thil omdan enkai(monitored) uh a, kikaptuahna tawh kisai ahun-hun in thuthak ngah chi hi. Thusuakin agendan in, Surgical Strike nei dia vakuan Commando pawlte helicopter zang in Bhimber, Hotspring, Kel & Lipa sector ah kinawnlut uh a, terror launch pad 7 hihsiat a om in, Pakistan leh Terrorist group pangkhawmte tawh dakkal 4 sung kikaptuah uhi.
Pakistan army official-te’n ‘Surgical Strike’ tungtang agendan un, Ceasefire bawhsia a valut Indian Army 14 kaplup a om hi’n gen ua, nitaklam dak 1:30 in 37-Rashtriya Rifles apan sepaih khat galvan tawh hingmat a om hi’n gen uhi. India in ‘Surgical Strike’ bawl hidan in mipite leh Media-te khem lungdam mahleh, Pakistan army tawh ‘cross-border fire’ om hizaw in taklang uhi. Tuni a thiltung tawh kisai in, Pakistan Prime Minister Nawaz Sharif in October 5 a Parliament Session neih hidi’n puang a, Pakistan huihkhua(airspace) humbit di’n kidouna lenna mansa a om hi’n gen a, Kashmir phaizang a minautang 80 valte sihna tawh kisai ah gamdang te’n India amawhsakna thute uh pumpelh theihna dia, India in tuabang strike bawl hi’n gen hi.
Tunitaklam in Punjab, Rajasthan, Gurajat leh Jammu region a International Border kim-le-kiang ah security hihkhauh in om a, gamgi mun a minautangte leng Indian army te’n munbitzaw ah nawnkhia uhi. Tunitaklam in New Delhi a All Political Party meeting hunah
Congress, NCP, CPM, BSP, Shiv Sena, LJSP, TDP leh political party teng apan palaite paikhawm uh a, BJP Chief Amit Shah, CPI(M), General Secretary Sitaram Yechury, BSP leader Satish Chandra Mishra, NCP Chief Sharad Pawar, Ghulam Nabi Azad (Congress), Sitaram Yechury (CPM), Ram Vilas Paswan (LJSP), Defence Minister Manohar Parrikar, Finance Minister Arun Jaitley, External Affairs Minister Susham Swaraj, National Security leh Advisor Ajit Doval leng kihel uhi. Home Minister in Punjab, West Bengal leh Odisha a Chief Minister te kiang ah surgical strike tungtang pulak a, External Affairs Minister Sushma Swaraj in Congress President Sonia Gandhi kimuhpih in thil omdan theisak hi. Tuni a strike bawl a om ahihdan Lieutenant General Ranbir Singh in official taka apuankhiak nung in, Foreign Secretary S Jaishankar in US, China, Russia, UK leh France telin gam 25 kiang ah thil omdan theisak a, amau-te’n leng India gupthu puang uh hi’n gen hi.
College tuamtuam ah SVEEP awareness camp om
Lamka, Sept-29: NYK/CCPur, NSS CCpur College leh Systematic Voters Education & Electoral Participation (SVEEP) Core Committee pangkhawm in college tuamtuam a student-te lak ah special summary revision tawh kisai public awareness leh special registration camp neih sutzop hi a, tuni sunnung in P. Kamdou Veng a Young Pillars College ah zousiang uhi. Huai ah Lunminthang Haokip, IAS DC/CCpur & Dist. Election Officer; Soiminlian Lengen, MCS, Chairman, Core Committee, SVEEP leh James Doujapao Haokip, MCS, SDO/BDO Tuibuong telin mi poimawh tuamtuam kihel uhi.
DC/CCpur in agenna ah election a kihellouh in gamsung vaihawmna naktak a sukha ahihman in, kuapeuh in a kibang a vote khat chiat ineih uh maban election ah manphatak a zang dingin ngen a, tuailai kum 18 tunglam te’n vote nei ua, vaihawmtu ding deihtel theihna aneih uh lam-etna a hiaibang sai uh hidan in gen hi.
Soiminlian Lengen, MCS, CEO/ADCC in India mi-leh-sa hihna nei khempeuh in mahni deihtel theihna aneih ding tupna hibang sai a om hi’n gen a, kuapeuh in ngai poimawh dingin ngen hi. SVEEP kichi kum 2009 a pat hi a, India khua leh tui hihna nei kum 18 tunglam te’n electoral roll a min khumlut a, gamsung a heutu hoih bawlkhiak ahih theihna dia kuapeuh in a kibang a i neih uh mahni vote chiat ikhiat theihna ding tupna hi a, kuapeuh in ngai poimawh dingin ngen hi. Programme hun ah Election Youth Icon- Roseline Kimbuang, Remruotkim, Jenny Thomte leh Naemy Haokip te’n lasa uhi.
LOCAL NEWS:
Union Fin. Minister mu di'n Delhi zuan ding
Lamka, Sept-29: Langkhanpau Guite, Chairman, ADC/CCpur in Union Finance Minister Arun Jaitley kimuhpih ding in Sept 30, 2016 in Delhi ah zin ding a, Co-ordination Commitee of six Autonomous Dist. Council, Manipur-te tawh Hill Dist. leh mipi ading a phatuam theiding thil tuamtuam sem ding uh hi’n kigen hi.
Manipur a ADC 6-te, 6th Schedule nuai a omlouh ziak un 14th Finance Commission ah telsak ahihlouh ban ah kumlui apan Central govt in DRDA nuai a BRGF ahihbei ziak in MDC te’n mipi ading phatuam theiding development tawh kisai nasepkhiat tawm mahmah a, Development omtheihna ding in India Prime Minister tungtawn in ADC 6 te’n budget bawl uh a, huai budget tawh kisai Finance Deptt. Panchayat Raj Institution, NITI Ayoog Deptt.-te mu in bang zahvei hiam Delhi phata uhi. India Prime Minister in leng ngaikhawk in Finance Minister kiang ah poimawh bang a kihoupih a, allocation tanpha om theihna ding a kihou pih dingin Manipur a ADC Chairmen-te chial ziak in Co-ordination Commitee of six Autonomous Dist .Council, Manipur leh Chairmen te’n Delhi ah Oct 1, 2016 in Union Finance Minister Arun Jaitley kimuhpih ding uh hi’n kigen hi.
Vaccine Coldchain thu ah meeting
Lamka, Sept-29: Dr. VC Pau, DFWO & DIO/CCpur leh Vaccine Coldchain Manager (VCCM) UNDP in tuni zinglam in DFWO Conference Hall ah Coldchain thu ah CHC leh PHC a Medical Officer-te leh Coldchain Handler-te meeting neihpih hi. Huai ah CHC leh PHC a coldchain point neite leh anei nailou te’n vaccine indent bawlding dan leh apiak dingdan kisinsak uhi.
Manipur pumpi ah UNDP support na in eVIN (Electronic Vaccine Intelligence Network) kipan hi. Huai tawh kisai District Vaccine Store (DVS) Sub-District Level, CHC/PHC teng ah Coldchain points (CCP) om na-te ah vaccine omzah theihpah ahihtheihna dingin Coldchain Handler-te UNDP in Imphal ah ni 3 sung training pia uhi. Tua CCP teng ah Mobile phone khat chiat leng piak hi uh a, ni teng a vaccine dinmun update ziahziah hita a, India gamsung pumpi ah internet tungtawn in Vaccine dinmun muhtheih leh theih-thehi hita hi’n kigen hi.
Court in bail in khahkhia
Lamka, Sept-29: Police te’n tuni nitaklam in CJM court ah ZDV hiding a ginlelh Pauzagin Zou (55) s/o (late) Tualkhogin of New Zouveng pawkhia uh a, court in bail in khahkhia hi. Pauzagin Zou bel Sept 27, 2016 zing baihtak in 7- Assam Rifles te’n New Zouveng ah mankhia uh a, Police te’n FIR No. 47 (9) 2016 CCP-PS U/S 400 IPC & 25 (1-C) A. Act registered uhi.
Mualsuang honna leh latna omding
Lamka, Sept-29: Tuaitengphai khua ah Oct 1, 2016 zinglam dak 11:00 in (late) Thonghang Tungnung @ T. Tungnung, retd. SDO (PHED) leh azi (late) Chiinluan Tungnung’ theihgige na mualsuang honna leh latna omding hi. Fr. Shinto, St. Teressa Parish Priest, Tuaitengphai in brief history of Thonghang Tungnung & Family laibu honna leh latna nei ding a, Rev. (retd) Kamkhojam, Founder Member JCA in mualsuang honna leh Pathian kiang ah latna neiding hi. Rt. Rev. Dr. Hangminthang, Bishop, MELC in hanthawnna thu gending a, Rev. Thangginmuanlian, Exe.Director, ZCBC in (late) Thonghang tapa’ Tongchinmang Tungnung & family-te’ ading in Pathian apan vualzawl ngetsakna leh thumsakna neiding a, mi poimawh tuamtuam te’n thugenna neiding uhi.
Kipahthu genna leh Cemetery latna
Lamka, Sept-29: D. Angam Gangte in a Pa (late) Dr. Kampu Gangte’ theihgige na ding in Tuinom leh Lhangjol kikal ah ‘Gangte Cemetery’ ding gam liantak ana pekhia a, Gangte Youth Orgn. makaih in Sept 30, 2016 zinglam dak 10:30 in H.Shawnthang inn, Gangte Veng ah Pathian kiang a latna leh kipahthu genna program omding hi. Huai ah Rev Khaigin Gangte. Ex. Executive Secretary, ESC in Pathian kiang ah thumna in Gangte Cemetery lan ding a, Th Neka Gangte, S Lungin Gangte, Lunpi S Thangjom leh Lamboi Gangte leh D Angam Gangte te’n thugenna neiding uhi.
EBC/LND Kumsim Khawmpi
Lamka, Sept-29: EBCC Moria ah Sept. 30, 2016 nitak in “Diktatna a kilamthakna” thupi zangin EBC Lamka North Divn., kumsim khawmpi 10veina kipan ding a, Upa Dr. J. Son Gokham, Chairman, DWC in hong ding hi. Oct. 1, 2016 sun in khawmpi palaite’n vaihawmna nei ding uh a, huai ah 2017-18 sunga budget leh year plan kiguangte enkhawm ding uh a, biakinn/khua tuamtuam in agenda apuaklut-te uh genkhawm ding uhi. Oct. 2, 2016 in sun dak 12:30 in Rev. N. Pumsuanmung, Youth Co-ordinator, EBC makaih in seminar om ding a, biakna kikhawp hun ah Rev. Paukhanmang Guite, Dir. of Ministries, EBC leh Evan T. Damkhothang, Evangelist at Large, EBC te’n thugen ding uh a, Oct. 2 nitak mipi kikhawp tawp in Rev. E. Paukhanlian, DS in khawmpi khak ding hi.
Police te’n ginlelh mi 2 mankhia
Lamka, Sept-29: Tuzing baihtak dak 3:00 velin SA road junction, Tedim Road ah ginlelh ziak in Police te’n Md. Amir (29) s/o Md Rahamdali of Zenhang Lamka leh Md. Saher (19) s/o Md. Babhu of Zenhang Lamka man uhi. Police te’n SDM/CCpur (Sub- Divisional Magistrate) court ah dingsak uh a, SDM/CCpur in bail in khah hi. Nitak zan sawtnung leh zing baihtak a khawlai pawt kuapeuh pilvan poimawh hi’n Police apan kiza hi.
SUUNNA:
B. Mangchungnung (45) b/o Upa B. Lamkhogin of Zenhang Lamka, tuni sunnung dak 12:20 velin sungna in si a, Sept 30, 2016 in Zenhang Lamka hanmual ah kivui ding hi.
IMPHAL NEWS:
MoS tuni’n Delhi ah kik
Imphal, Sept-29: Anil Madhav Dave, Minister of State (Independent Charge) of Environment, Forest and Climate Change, Mizoram apan zan nitaklam in Imphal hongtung a, tuni zingsang dak 6:30 velin Kangla Fort vehna nei a, huai hun ah singnou suan hi’n leng gen uhi. Huai nungin Keibul Lamjao, Sagram Wildlife Check post leh Sangai Viewpoint mun-te va pha a, zinglam dak 10:00 velin Self Help Groups, media leh local-NGOs-te tawh meeting nei uh a, huai nung in Sendra mipite tawh kihou khawmna hun zang hi. Huai zawh in INA Complex mun vehna nei a, huai apan sunnung dak 1:45 velin New Delhi zuan in kik nawn hi. Akigendan in Anil Madhav Dave bel Mizoram leh Manipur ah Sept. 27, 2016 in tour dan in hongzin hi.
Maibam Lotpa Ching ah Health Camp
Imphal, Sept-29: Lions Club of Nambol leh 9-sector nuai a 12th Bihar Regiment-te saina in Maibam Lotpa Ching aka Red Hills ah ‘World Heart Day’ tawh kizawi tawn in tuni’n Health Camp om hi. Huai hun ah Lions Club of Nambol leh Bihar Regiment a Doctor te’n mi tuamtuam en uh a, Dr. T. Gambhir Singh, Vice-President, Lions Club banah RIMS a Professor in pre-investigation awareness program sai a, damlou-te kiangah man bei in damdawi pia hi.
Tax Board a Chairman kichiam ding
Imphal, Sept-29: S. Pritamkumar Singh, Dy. Secy. to the Governor in thusuah a bawlna ah Manipur Municipality Property Tax Board a Chairman ding in Oct 1, 2016 zinglam dak 9:30 velin Raj Bhavan ah Governor in kichiam sak ding hi’n taklang hi.
Disqualification case tawh kisai in khentuam nei : Joykishan
Imphal, Sept-29: Nityaipat Chuthek a Manipur Pradesh BJP Head Office ah tuni’n press conference om a, huai ah Thangmeiband A/C MLA Kh. Joykishan in MLA-te disqualification case tawh kisai a Assembly Speaker Th. Lokeshwar in khentuam nei a thutanna a bawl banah Manipur State Congress Party (MSCP) a MLA 5 in Congress party a zop uh tawh kisai a thutanna tunung a bawl ding in suan a, 10th schedule leng bangmah lou suah chi’n gen hi. BJP Manipur Pradesh te’n Speaker in thuneihna a zat khelh mawhpaihna in Oct 1, 2016 in protest rally nei ding ua, Governor leh India President kiangah kum 15 paisa sung a govt. thil hih diklouh-te banah Speaker tungah action lak ding ngetna in memorandum pe ding uh chi hi.
BJP Manipur Pradesh State Election Management Committee a Convener Th. Chaoba in a genna ah Speaker in a vengbit nuam-te disqualification case tawh kisai a thutanna tunung a bawl di’n suan a (defer), Wangoi A/C MLA Oinam Lukhoi in BJP zom mahleh kha 3 nung a akitawp ziak in BJP apan kum 6 sung nawhkhiak hi a, 10th schedule (Anti-defection law) Constitution dungzui a telching (elected) a omte’n party 2/3 majority ngah lou in party dang zom theilou ding chih ahi. Himahleh AITC Legislator lakah Oinam Lukhoi tel kei mahleh AITC MLA 3 tawh Congress party zom uh a, huai nung in Speaker in Ibohanbi leh Shyamkumar-te tungah disqualification case beisak hi.
NSCN(IM) cadre-te mat ziakin kiphin
Imphal, Sept-29: PIB (Defence) thusuak in a taklatna ah Senapati Brigade nuai a 35-A/R (Maram Battalion) te’n zan in NH-2 ah helpawl om chih thuguk a muh uh dungzui in Senapati leh Hengbung kikal operation a bawlna uah NSCN(IM) cadre 3 mankhia uhi. Mat a om self styled Capt. Akas (41) s/o Pfokrehrii of Tadubi, self styled Lt. Ashang Kashung (41) s/o Wonmi Kashung of Samtal, Ukhrul leh self styled Corporal N. Elvis Kayina (26) s/o S. Nikhini Kayina of Makhrelui, Senapati hi uh a, amau apan 9mm pistol 1, tang 3 leh Rs. 10,000 muhkhiak hi a, thudotna ah NH-2 ah sum khon hi’n kipuang uh a, van muhkhiak-te tawh Imphal West Police station ah tuni nitaklam dak 5:00 vel a piak khiak hi’n taklang uhi.
Huailou in NSCN(IM) cadre 3 mat ziak in Senapati district HQ ah mipi thangpai te’n zan nitak apan NH-2 ah bandh bawl uh a, Senapati bridge ah Inter-state bus 10, winger 10, truck 15 telin gari tamtak tang uhi. Imphal apan Dimapur zuan Winger-te, Nagaland state transport (NST) bus 2, truck 10 telin gari 70 vel ding Taphou village ah tang uhi. Thiltung tawh kisai in Social orgn. tuamtuam te’n emergency public meeting nei uh a, huai hun ah NH-2 a total blockade pailel gup ding leh cadre 3-te khahkhiak masiah blockade bawl ding in thutanna bawl uhi.
MSCP MLA 5-te case beisak
Imphal, Sept-29: Assembly Speaker Th. Lokeshwar in kum 2012 a Assembly Election hun ah Manipur State Congress Party (MSCP) ticket a telching MLA 5 – K. Thamarjit, Nemcha Kipgen, RK Imo, P. Brojen leh Zanghemlung Panmei te’n April 3, 2014 in Congress party zom uh a, huai tawh kisai in Adim Panmei, MSCP a vice-president in MLA 5-te disqualify na dia petition a khiak tawh kisai in tuni’n thutanna a bawlna ah MSCP leh INC(Congress) kigawmna in India Constitution a 10th schedule nuai a para 4na pansan in a akulte (requirement) a chin (satisfied) banah petition khetu in chetna bawl ding lawhsam chih ziak in a case uh beisak hi. MSCP a vice-President Adim Panmei in April 29, 2014 ni a petition khelut hi’n kigen hi.
Dy. CM zi 2na dia ngawh a om ziakin complain bawl
Imphal, Sept-29: Swany Keisam in Dy. CM Gaikhangam tawh limlak akikhawmna uh zang a amah sukmin siat sawm-te tungah tuni’n Imphal Police Station ah complain bawl hi’n gen uhi. Hiai thu tawh ksiai in tunitaklam in Manipur Press Club ah press conference om a, huai ah Congress Party (MPCC) a active member banah State Coordinator lui Swany Keisam (46) of Kwakeithel Thounaojam Lekai in media-te tawh kimuhna hun ah amah facebook account ah Dy. CM tawh lem akilak khawmna uh a koih kuahiam khat in Dy. CM zi 2na chi’n social messaging apps leh social networking site-te ah upload bawl a, huai limlak ahihleh kum 2015 a Wangoi Achouba in a tenna inn ah atanu adia Nuptial feast a bawl hun a Dy. CM tawh a kilak khawm lai uh chi hi. Huai limtak upload tu ahihleh BJP a Anand Sharma hi a, Court tut ding chi a, amah sukmit siat banah Dy. CM tanpha leng minse sak chi’n gen a, maban ah hibang thilchin tawpsan ding in leng ngetna bawl hi.
DC/Imphal West suan di'n thupia
Imphal, Sept-27: Chief Election Officer (CEO) Manipur in state govt. kiangah 11th Manipur Legislative Assembly Election hun ma a kintheipen a T. Ranjit, DC/Imphal West suankhe ding in thupia hi. CEO in thupiakna tawh kisai theih hi keimahleh DC/Imphal West in Congress tawh kizopna hoihtak nei chih ziak a political party tuamtuam te’n Election Commission of India ah complain a bawl uh hidin gintakthu kigen a, huai banah Manipur govt. in ECI ah T. Ranjit suankhe lou dia ngetna bawl uh hi’n leng gen uhi.
MPS Gr-I apan MPS JAG in kaisang
Manipur Police Service (MPS) grade-l anuai a min kiktaklangte MPS Junior Administrative Grade (JAG) non-functional, pay Rs. 15,600-39,100 + grade pay Rs. 7,600/- in kaisang uhi. Huaite leh tulela a sepna uh anuai abang hi.
1. Luichumthing Ragui, Asst. Dir. (MPTC), Pangei.
2. L. Nanglianthang, Supdt of Police (SIT)
3. S.P. Thaisii, Dy. CO 5th MR, Khonjaron.
MHS Grade-II akipan Grade-I in kaisang
Manipur Health Service (MHS) officers grade-II(pay Rs. 37,400-67,000+grade pay Rs. 8,700 in mi 9 kaisang uh a,amaute’ tulela a sepna mun uh anuai abang hi.
1. Dr. S. Manikanta Singh, Medical Directorate
2. Dr. P. Shyamsunder Singh, Medical Directorate
3. Dr. Thangchinkhup Guite, CMO, CCpur.
4. Dr. Pauzachiin Guite, District Hospital, CCpur.
5. Dr. Md. Salamatt Ullah, State Leprosy Office, Imphal.
6. Dr. Kh. Sasheekumar Mangang, Medical Directorate.
7. Dr. Y. Nabakumar Singh, District Hospital, CCpur.
8. Dr. H. Bidya Devi, Medical Directorate.
9. Dr. Mingyaola Vashum, Chief Medical Officer, Ukhrul.
TUNI THUPI:
“Huchi’n Toupa Pathian in gamsa a bawl tengteng lakah gul a gitlouhpil pen hi, Huchi in, aman numei kiangah, Pathian in huansung a sing gah himhim na ne ding uh ahi kei, chi ahi maw? a chi a.” - Genesis 3:1
EDITORIAL:
Na omna mun gam thei in !
Leitung pumpi ah nek-le-tak zonna tawh kisai in lungsim tasmtak sen ngai sek a, tate’ maban ding, innkuan khawsakna tawh kisai leh adangdang mi tamtakin lungsim ngaihtuahna senga gel leh sepzui ngai sek hi. Economic globalization tawh kisai ‘global village’ bawlkhiakna dingah leng mipil leh siam hunkhop in khuak ngaihtuahna a zat uh ana ngaisek hi. Mihingte’n i omna gam leh i dinmun theihzui poimawh a, i pau a bukimlouh ziak mah in sappau in gen lehang, ‘liberal democracy, western culture’ ahihkeileh’ capitalism’ tawh kisai leng genlouh theihlouh hisek hi.
I gam dinmun en lehang, gam leh leitang thu ah CCpur district sunga om hinapi CCpur district chih signboard ah taklang veve om hi. Revenue (siah) tawh kisai Bishnupur district ah sung uh himaithei a, dan (legal) dungzui a hih uh leng hi maithei hi. Hibang case thil tamtak om dingin ngaihtuah theih a, huai kalah ‘monoculture’ kichi leng om khathei ding hi. Pupa khang a gam leh leitang ana luahte simmawhna, engbawlna, muhsitna leh adangdang om ding a, hiai apan kivenna ding line tamtak poimawh maithei hi.
Koi munah ka om a chihte mipite’ adingin theih poimawh a, leitang humbitna dingin ‘patta’ neite’ adingin panlak poimawh dingin kilang hi. India i chih ‘democracy’ gam ahi a, vaihawmna tawh kisai leng mipite’ deihna banga pai chih ahi hi. Manipur ah tulai in Inner Line Permit(ILP) tungtang kigen minthang mahmah a, hiai tawh kisai ‘immigrant leh migrant issue’ tungtang ah state government adingin ngaihsut ding tamtak om in kilang hi. ILP kia genlouhin Scheduled Tribe(ST) status deih ziaka demand tungtang leng thubuai khat hi a, phaijang bial ah mipite’n lampi tanpha zui uh a, student hunkhop in leng liamphah uhi.
Manipur gam a piang leh gamdang akipan Manipur state lut kalah leng tunung in thubuai liantak om dingin gintak-huai hi. Hiai thu saulou in sut lehang thildang anuam hetlou apian ding deih huailou hi. Telsuimi khenkhat in bel gamdang akipan phalna bei a Manipur state honglut te thakhat pawngmawk a laklut ahih ziakin, Manipur state milip tanpha ah buaina om chi uhi.
Analh mahmah khat bel Uganda a political scientist Mahmood Mamdani in a gendanin, Colonialism, Nativism ahihkeileh Genocide tawh kisai a Rwanda a thiltung a genna ah agam mi taktak leh gamdangmi kal a buaina ahizaw chi hi. Manipur adiakin, CCpur district ah gamdangmi i chihte historical, geographical leh hihna tuamtuam tawh kisai in ei tawh kigamla mahmah a, tuni chiangin maingal gawpta in sikse zong akipan Mahajon hong kai hial tamtak omta uh chih theih hi.
I omna mun agam leh leitang bangchibang a theihding ahiam? Theihsiamna (awareness) hon pedingte lah atamzaw MLA politics a kibual sawm ngen hita chihkhawng Hotel houlimna a i zak chiangin nuam hetlou hi. I gam leitang humbitna dingin mi chih in mawhpuakna i nei a, huai mawhpuakna kuaman kitheih mawh bawl leh khahsuah hetlouh deihhuai hi. Manipur phaijangmite’n Non-local a chihchih uh bang genna ahi a le? Khawvel paidan theih haksa mahmah a, hong haksa semsem laiding in kilang hi.
Nautang in i theihsiamna dingin gen lehang Syria gama thiltung tawh kisai in mi tamtak galtai uh a, amaute’n tumlam gam Western Europe mitsuan in mihing a sing asim lut uh chih ahi hi. Galtai mite telin gam tuamtuam in political, economic, cultural leh religious issue te awlmawh in nei uh chih leng taklatin om hi. A poimawh p e’n bel mahni omna mun gam theihtel poimawh mahmah hi’n kilang hi.
A theilou omkei hang, gam le nam tawh kisai in kuapeuhin theihtawp i suah a, ahih ziakin nawlkhin teitei chih a om bangleng om thei mawk hi. Nawlkhin a omte’ adingin panlak poimawh a, a nawlkhintute’n leng lungsim ‘chalak’ a neihlouh uh poimawh hi. Na omna mun gam thei in chih thupil om hilou hiam?
FOREIGN NEWS:
Khawvel makai-te’n Shimon Peres vuina uap ding
Jerusalem, Sept-29: Israel Prime Minister leh President lui Shimon Peres zingchiang in Jerusalam ah vui in om ding a, US President Barack Obama telin khawvel makai tuamtuam in sivuina hun uap ding uhi. Kum 93 a upa Shimon Peres ahihleh nipikal 2 paisa apan Stroke ziaka buaisia in Tel Aviv nawla Sheba Medical Center puaklut hi a, hun bangtan hiam ICU a etkol ahihhun in doctor-te’n a dinmun in hoihlam nawt hidan in puang mahle uh, zanhal apan gim mahmah ahihdan theihkhiak in om a, anatna thuak zoulou in zan zinglam dak 7:00 in si hi. Israel President 9na di’n Shimon Peres in kum 2007-2014 sung mawhpuakna len hi. Prime Minister dinmun leng nihvei len kha a, Interim Prime Minister leng nihvei mah len hi. August 2, 1923 in Vishnyeva, Belarus(Europe) ah piang a, azi Sonya Gelman in kum 2011 in sihsan hi.
Shimon Peres ahihleh Israel piankhiakna dia makai poimawh damlai omsunte laka khat hi a, amah panlakna ziakin Muslim gam te’n a umkual uh Middle-east biala non-Arab state omsun hiding, Israel State kichi 1948 a bawlkhiak in om hi. Peres in Israel parliament aluah hun in Middle-east biala Muslim gamte tawh kizopna bawlhoih a, Arab(Muslim) gamte tawh kilemna omthei ngeilou dinga Israel President/Prime Minister dang te’n angaihtuah lai un, Peres in gam tuamtuam tawh kizopna bawlhoih a, Isreal President lakah Muslim gamte’ Parliament a thugen masapen hidin, kum 2007 in Turkey Parliament ah thugenna nei hi. Peres in Palestinian mite tawh leng kilemna bawl a, Oslo Peace Accord ziakin 1994 in Nobel Peace Prize ngah hi.
Shimon Peres mi kingainiam mahmah hi a, Israel mipite' adia kum 60 sung 'public life' azat hun in minthanna thupitak ngah mahleh asungkuan-te'n kisaktheihna in lalou uh a, mivantang(low-profile) bang a om uh hi'n kigen hi. Azi Sonya Peres leng mipi mai ah kilang tamlou in, a tapa Yoni leh Nehemia leh tanu Tsvia Valdan leng hinkhua hoihtak zang mi hi'n kigen hi. Thusuakin agendan in kum 2007 a President dia telching ahih in Shimon zi in Jerusalem a kichiamna uap dia sapna angahte nial a, mipi mai a apasal tawh akilat nanung pen April 1990 hi'n gen uhi. Shimon Peres tapa upapen Nehemia leng Israel adia Venture Capital Firm lianpen a Co-Founder hi a, atapa naupangpen Yoni in Veterinarian sem in Tel Aviv ah Veterinary Hospital thupitak bawl hi. A tanu neihsun Tsvia Walden (Psycholinguist) in Ben Gurion University of the Negev ah Professor sem hi'n gen uhi.
Zingchiang in Jerusalem a Mount Herzel Cemetery ah Israel makai poimawh Shimon Peres vui in om ding a, tuni’n Israel Parliament ah siluang puaktun in om hi. Israeli Prime Minister Benjamin Netanyahu makaih in Parliament ah tuni’n Peres suunna neih in om a, special cabinet meeting hun ah daidide in suunna nei uhi. Sivuina hunah US President Barack Obama, President lui Bill Clinton, UN Secretary General Ban Ki-moon, German Chancellor Angela Merkel, French President Francois Hollande, French President lui Nicolas Sarkozy, Canadian Prime Minister Justin Trudeau, Australian Prime Minister Malcolm Turnbull leh Mexican President Enrique Pena Nieto telin gamtuam tuam apan makaite kihel ding uh a, Israel adia melma lianpen hi a kigen, Palestinian Authority President Mahmoud Abbas inleng suunthu puang in sivuina uap ding hi.
No comments:
Post a Comment